Ko e Fakamatakutaku Niukilia—To Uta Kehe Fakaoti!
NONOFO mo e nakai fiafia ko e mena ne nakai manako e Atua ma e tau tagata. Ha ko e “Atua fiafia,” kua manako a ia ki a lautolu ke olioli e mafola mo e moui ke he nakai haofia—ka fakaku, ke fiafia ni. (1 Timoteo 1:11, NW) I loto he lalolagi ne puke ke he tau fakamatakutaku niukilia, ko e mena nakai fakaai e mena nei.
“Mafola, kua Nakai Haofia”—Ko e Pikopiko
Ko e mena kitia maali ko e fakamatakutaku niukilia kua nakai la mole. Pete na ia, ko e tau fakapolitika, tau fakatupe, mo e tau tupetupe he fakalatahaaga, ko e laulahi he tau motu kua eke ke mitaki e tau onoonoaga. Ko e foliaga mauokafua ke uta kehe e hagahagakelea kua kitia tali mai he 1986, ke he Tau he Mafola he Lalolagi Katoa ha MK.
Ko e Bulletin of the Atomic Scientists he hogofulu tau i tuai kua liuaki e matahola he aho he fakafiliaga—ko e puhala a ia ke fakakite e liga moli he felakutaki niukilia—mai he 3 e minuti ke he tuloto po ke he 17 e minuti ke he tuloto po. He 1989 ne talahau mai he Stockholm International Peace Research Institute ko e “amaamanakiaga ke he tali he totokoaga mafola kua homo atu ke he falu a tau, tali mai he fakaotiaga he Felakutaki II he Lalolagi.”
Ko e tau tau fou e ne mole ko e Tau Motu Kaufakalataha kua fakamalolo ai ke fehagai mo e tau matakavi matematekelea he lalolagi katoa. Ko e kautuaga hana, pete ni he nakai katoatoa, kua lata tonu ke lafi atu ke he agaga laulahi he onoonoaga mitaki. Ko e vaha i mua to liga lafi mai e tau fakatuaga fou. Ko e tau kalaga ke “mafola, kua nakai haofia” to liga eke ke fakalahi mo e lahi mahaki. To liga moua e lautolu e fakailoaaga mitaki.
Ka e mataala! “Ha ko e mena ka pehe a lautolu, Kua mafola, kua nakai haofia,” he hataki he Tohi Tapu, “ti hokotia fakalutukia ai a lautolu he mahaikava, tuga ne mamahi fanau ke he fifine kua fatu, ti nakai fakai ke hao a lautolu.” Ti, ko e tau kalaga he “mafola, kua nakai haofia” to fakahoko mai aki e magaaho he Atua “ke moumou ai [ha kua puhala mai he kiva, niukilia mo e falu mena foki] a lautolu kua moumou e lalolagi.”—1 Tesalonia 5:3, 4; Fakakiteaga 11:18.
Mailoga nakai pehe e Tohi Tapu to moua he tau motu e “mafola, kua nakai haofia.” To tutala ni a lautolu hagaao ki ai ke he taha puhala, mo e fakatata e onoonoaga mitaki mo e talahauaga moli ne nakai logona fakamua. Ke he mouaaga he mafola mo e nakai haofia to kitia mai e tata lahi nakai tuga he vaha ia. Pete ni ko e fakatumau he fakamatakutaku niukilia, ko e tau motu to hohoko ke he logonaaga nakai haofia pikopiko.
Ko e tau Kerisiano moli, to nakai fakahehe. Mo e fiafia lahi to mole muatua e onoono ha lautolu ke he mafola mo e nakai haofia he tagata ke he taha mena ne mua atu e homo!
Mafola mo e Nakai Haofia—Ko e Mena Moli
Hagaao ke he Salamo 4:8, ko e mafola moli mo e nakai haofia ka moua ni ke he fakatokatokaaga he Atua ko Iehova: “To takoto au, ti mohe foki au mo e mafola; ha ko koe, Iehova na e, hoko koe ni kua nofo ai au mo e nakai haofia.” Mo e kalaga he “mafola, kua nakai haofia” ne kua fakatata i fafo he fakamauaga he fakatokatokaaga he Kautu he Atua ko e mena pikopiko ni a ia. Kua nakai maeke ke moua ha mena kua aoga tukulagi.
Ko e tau fuafua nakai katoatoa kua nakai mitaki lahi ma e Kautu he Atua i lalo ha Keriso. To lahi atu e mena ka taute he fakatufono faka-Atua he fakatote hifo ni e numela he tau kanavaakau niukilia; to fakaotioti katoatoa a lautolu mo e falu a kanavaakau he felakutaki. Ne mavehe mai he Salamo 46:9: “Kua fakahiku e ia e tau ato hoko ke he fakatulakiaga he lalolagi; kua fafati e ia e kaufana, ko e tūtū e tao; kua huhunu foki e ia e tau kariota ke he afi.”
Tuga ia, ko e tau fakamatakutaku niukilia ne moua mai he nakai gahua mitaki e tau mena fakagahuahua niukilia po ke he tau otaota he radioactive to eke mo tau mena mole. Neke taute e tau kupu ke nakai moli: “To takitokotaha a lautolu mo e nofo i lalo hana vine, mo lalo foki he hana mati; to nakai ha i ai foki taha ke fakamatakutaku ki ai; ha kua vagahau mai ai pihia e fofoga a Iehova Sapaota.” Nakai pikopiko e Atua. Nakai fai kakano ke fakauaua a tautolu ke he hana tau kupu.—Mika 4:4; Tito 1:2.
To olioli nakai a koe he fai amaamanakiaga ke moui he lalolagi ne kua uta kehe fakaoti e fakamatakutaku niukilia? Maeke ia koe, ha kua tohi fakamaali hifo he Kupu he Atua e tau poakiaga. He fakaako ki a lautolu mo e he moui fakafelauaki ki ai, liga ke he taha aho to moua e koe e olioli he talahau mo e fafagu fakamaagi: “Ko e fakamatakutaku niukilia—kua oti tuai!”
[Fakatino he lau 7]
To pule e mafola ke he lalolagi fou he Atua mo e nakai ha fakamatakutaku niukilia
[Credit Line]
M. Thonig/H. Armstrong Roberts
[Fakatino Credit Line he lau 6]
Ata he U.S. National Archives