Onoono Atu ki Mua ke he ‘Mafola mo e Nakai Haofia’ ne Taute he Tagata
Ko e kupu moli hanai, kua nakai maeke he tau tagata ke tamai moli, e mafola tumau. Ko e ha kua nakai pihia ai? Ha kua nakai ko e tau moumou mafola moli e tau tagata, pete ni kua lauia a lautolu he mahani holifono he ha lautolu a fakamauaga tuai he limatoto. Kua mua atu e malolo he moumou mafola moli mai, ke he tagata. Kua nakai fai foki ka ko Satani ni ko e Tiapolo, ne fakamaama mai he Tohi Tapu “kua fakahehe e lalolagi oti.”—Fakakiteaga 12:9.
KUA pehe e Tohi Tapu: “Ka ko e lalolagi oti ha he pule hana kua mahani kelea [Satani].” (1 Ioane 5:19) Ha kua pihia, ke moua e mafola moli mo e tumau e nakai haofia kua lata ke putoia ai e utakeheaga ha Satani mai he tau mena, fakalataha mo e fakatokaaga he lalolagi ne ati hake e ia mo e kua kitia moli ne takitaki ni e ia. (Fakatatai Isaia 48:22, Roma 16:20.) Kua nakai maeke he tau tagata ke taute e mena nei.
Ti maeke fefe, he mogoia, ke moua e mafola mo e nakai haofia? Mai he malolo he Taha ne mua atu tukulagi e malolo mai ia Satani. Kua fakatu he Atua Malolo Katoatoa e kaupaaga he magaaho ke he tau gahua a Satani ke he vaha loto he tau tagata. Ka hoko mai e kaupaaga he magaaho ia, ti hokotia ‘fakalutukia e mahaikava’ ke he lalolagi ne nonofo i lalo he malolo ha Satani. (1 Tesalonia 5:3-7) Kua takitaki atu e tau fakamoliaga oti kana ke he manamanatu kua nakai leva to tupu ai e mena nei.
Mafola mo e Nakai Haofia he Magaaho Nei!
Ka e kua he magaaho nei, foki? Kua maeke foki e taha vala he mafola moli mo e nakai haofia he vaha nei. Fefe? Nakai tuga e loga he tau takitaki lotu, ne lali ke kaufakalataha i loto he tau mena fakapolitika he lalolagi nei, ka e ke muitua ke he tau poakiaga mo e tau fakatonuaga he Atua.
Kua taute moli kia he puhala ia e mafola? E, taute pihia. Ke fakatai ki ai, kua kamatamata tuai he tau Fakamoli a Iehova mo e kitia kua maeke moli ke moua e fiafia he mafola moli mo e taha vala foki he nakai haofia. He muitua ke he tau poakiaga he Atua tuga ne fakakite mai i loto he Tohi Tapu kua lagomatai a lautolu ke tolo fakalataha ko e fakatokatokaaga he lalolagi katoa ha i ai e mafola moli, pete ni ko e heigoa ha lautolu a lanu, tau motu, po ke vagahau.—Salamo 133:1.
He omaoma ke he matafakatufono fakaatua, kua taute fakatai ni a lautolu ke ‘tukituki e tau pelu ke eke mo tau koho mo e nakai liu ako tau a lautolu.’ (Isaia 2:2-4) Ne logona e lautolu e nakai haofia i loto he fakaalofa he Atua mo e lahi e tua kua manamanatu ha lautolu a tau matakainaga ki a lautolu. (Roma 8:28, 35-39; Filipi 4:7) Kaeke kua huhu a koe po kua moli nakai e mena nei, kua uiina atu a mautolu ki a koe ke ahi atu ki a lautolu ke he taha he ha lautolu a tau Fale he Kautu mo e kitia mau ni.
Mafola mo e Nakai Haofia he Lalolagi Katoa
Ko e mena nei, nakai ko e fakamoliaga fakahiku a nei he maveheaga he Tohi Tapu ke he mafola mo e nakai haofia. Kua nakai pihia! Ko e kikila ataata tote fakamua a nei, ko e fefe e lalolagi nei kaeke kua muitua e tau tagata oti ke he tau matafakatufono he Atua. To nakai leva ti faliu e kikila ataata tote fakamua ia ke he mena tupu moli.
Ne pehe e Aposetolo ko Paulo: “Ha ko e mena ka pehe a lautolu [ko lautolu ne nakai fekafekau ke he Atua], Kua mafola, kua nakai haofia [he manamanatu kua tamai tuai e lautolu e mafola mo e nakai haofia ke he puhala ha lautolu ni], ti hokotia fakalutukia ai a lautolu he mahaikava.” (1 Tesalonia 5:3) To fifili ai ni he Atua kua leva tuai he fakahehe e Satani e tau tagata. Ti kua hoko tuai e magaaho ke uta kehe a ia mai he mena ne tutupu ai, fakalataha mo e fakatokaaga kelea he lalolagi kua ha ha i loto he hana pule. Ti kua hoko tuai e magaaho ma e fakamoliaga he perofeta ha Tanielu: “Ko e vaha he tau patuiki ia to fakatu ai he Atua he lagi e kautu nakai fakaoti tukulagi; ko e kautu foki ia nakai tuku atu ai ke he taha motu, to tuki malipilipi mo e fakaotioti e tau kautu oti ia, ka ko ia to tumau tukulagi a ia.”—Tanielu 2:44.
Ko e gahua nakai mitaki kia a nei mai he Atua? Nakai fakaai. To hokotia e fakaotiaga fakalutukia ki luga ia lautolu ne lata tonu ki ai hagaao ke he fakafiliaga he Atua, ke he tau puhala he Atua. Kua falanaki nakai a koe ke he Tufuga ke fifili tonu e mena nei? Kua moli ni kua maeke a tautolu ke toka fakamitaki e mena ia i loto he hana tau lima! Ko e heigoa la e taui he hana gahua fakafili? Ne pehe e fakatai: “Ha ko lautolu ne mahani hakohako to nonofo a lautolu ke he motu; mo lautolu ne katoatoa e mitaki ha lautolu a mahani to toe ai a lautolu; Ka to vevehe kehe mai he motu a lautolu ne mahani kelea.” (Fakatai 2:21, 22) To momoko nakai taha he galo e tagata mahani kelea?
He uta kehe e tau tagata moumou mafola, ko e mafola moli mo e nakai haofia ni e tau mena he tau tagata he lalolagi katoa i lalo he pule kua lagomatai he Kautu he Atua. “Nakai mahani kelea a lautolu, to nakai moumou mena ai e lautolu ke he haku a mouga tapu oti; ha ko e mena to puke e lalolagi ke he maama kia Iehova, tuga ne toka kua ūfia ke he puke tahi.” (Isaia 11:9) Kua tali tonu nakai a koe ke he maveheaga nei he Tohi Tapu? Kua mauokafua nakai hau a tua to nakai leva ti tutupu ai e tau mena nei? Kaeke kua mahalohalo hau a manatu, kua fakamalolo atu a mautolu ki a koe ke kumikumi atu foki ke he mena ia. Kua moli, ko e puhala ni he Atua ka maeke ai he tagata ke moua e foliaga ne manako lahi ki ai he mafola moli mo e nakai haofia moli.
[Tau Fakatino he lau 6]
Kua moua he tau tagata ha Iehova e loto olioli he mafola moli mo e fuafuaaga mitaki he nakai haofia he vaha nei