Falanaki ke he Lima Fakahao a Iehova
“Iehova na e, . . . kia eke a koe mo lima ha lautolu ke he tau pogipogi oti, ko e ha mautolu a fakamoui foki ke he tau vaha matematekelea.”—ISAIA 33:2.
1. Kua kakano ke he heigoa e lima malolo lahi a Iehova?
KUA malolo lahi e lima a Iehova. E moli, talimai ha “ko e Atua ko e agaga,” nakai ko e tau lima fai vala kakano a lautolu. (Ioane 4:24) I loto he Tohi Tapu, kua fakatatai atu e lima fakafifitaki ke he malolo kua maeke ke omoi e pule. He pihia, ko e lima ni hana kua laveaki mai he Atua hana tau tagata. Moli, ‘to leveki he Atua hana fuifui ke tuga ne leveki mamoe; to hapai e ia e tau punua mamoe ke he hana tau lima, mo e uta e ia a lautolu ke he hana fatafata.’ (Isaia 40:11; Salamo 23:1-4) Kua haohao mitaki ha e tau tagata ha Iehova i loto he hana tau lima fakaalofa!
2. Ko e heigoa e tau huhu kua lata mitaki mo e ha tautolu a kitekiteaga?
2 Ne fakahao mai fefe he lima a Iehova hana tau tagata, i tuai mo e he mogonei? Ko e heigoa e tau lagomatai ne age he Atua ki a lautolu ko e fakapotopotoaga? Mo e ko e ha kua maeke ai hana tau tagata ke falanaki atu ke he lima fakahao hana ke he tau vaha fakaagitau oti kana ha lautolu?
Gahuahua he Lima Fakahao he Atua
3. Ke he heigoa kua tuku atu he Tohiaga Tapu e fakalilifu ma e laveakiaga a Isaraela mai i Aikupito?
3 Fakamua to laveaki mai e tau Isaraela he pipiaga he tau Aikupito ke he 3,500 e tau tau i tuai, ne talaage he Atua ke he hana perofeta ko Mose: “Ko e hanai, kia tala atu ke he fanau a Isaraela, Ko au ko Iehova, to ta mai e au a mutolu i lalo he tau kavega mamafa a Aikupito; to laveaki foki e au a mutolu mai he tau gahua ha lautolu; to fakamoui foki e au a mutolu mo e lima fakaolo mo e tau fakahala lalahi.” (Esoto 6:6) Hagaao ke he aposetolo ko Paulo, ne tamai he Atua e tau Isaraela mai i Aikupito “mo e lima fakaolo.” (Gahua 13:17) Ne tuku atu he tau tama ha Koru e fakalilifu ma e ha lautolu a kautuaga ke he Motu he Maveheaga ke he Atua, kua pehe: “Ha ko e mena nakai moua e lautolu e motu ke he pelu ha lautolu, nakai fakamoui foki a lautolu ke he lima ha lautolu; ka ko e hau a lima matau, ko e hau a lima ni, mo e maama he hau a fofoga, ha kua fiafia a koe kia lautolu.”—Salamo 44:3.
4. Ne taui mitaki fefe e falanakiaga ke he lima fakahao ha Iehova he tau aho vale a Asuria?
4 Kua hoko mai foki e lima a Iehova ke lagomatai hana tau tagata he tau aho ne totoko atu e tau Asuria. He magaaho ia ne liogi e perofeta ko Isaia: “Iehova na e, kia fakaalofa mai a koe kia mautolu, kua tatali atu a mautolu kia koe; kia eke a koe mo lima ha lautolu ke he tau pogipogi oti, ko e ha mautolu a fakamoui foki ke he tau vaha matematekelea.” (Isaia 33:2) Ne tali mai e liogi ia he magaaho ne kelipopo he agelu he Atua e 185,000 i loto he heaga api he tau Asuria, ti kua fakafano kehe e Patuiki ko Sanerivi “mo e ma” mai he tau pa takai a Ierusalema. (2 Nofoaga he Tau Patuiki 32:21; Isaia 37:33-37) Ne mitaki tumau e taui ka falanaki atu ke he lima fakahao a Iehova.
5. Ko e heigoa ne taute he lima malolo lahi he Atua ma e tau Kerisiano kua eke fakakelea he Tauaga I he Lalolagi?
5 Ne fakahao he lima malolo lahi he Atua e tau Kerisiano fakauku ne favale ki ai he vaha he Tauaga I he Lalolagi. He tau 1918 ne totoko atu ha lautolu a tau fi ke he matapatu kaina he Kau Fakatufono, mo e tuku e tau matakainaga tane talahaua ke he fale puipui. He matakutaku lahi ke he tau pule fakalalolagi, ne teitei lahi a lautolu ne fakauku ke oti ha lautolu a gahua fakamoli. Ka e liogi a lautolu ma e hana liuaki mai mo e ke fakamea mai e agahala he nakai gahuahua mo e nakai mea he matakutaku noa. Ti kua tali mai e Atua he fakatupu e tau matakainaga tane ne tuku he fale puipui ke fakatokanoa mai, mo e uta kehe e fatipiko ki a lautolu he magaaho ku he mole mai ai. Ko e fua ne tupu mai he tau fakailoaaga he ha lautolu a fonoaga he tau 1919 mo e liligi hifo he agaga gahuahua he Atua, ne liu fakamoui mai a lautolu ne fakauku ma e fekafekau nakai matakutaku noa ki a Iehova ke he fakamoliaga fakahiku a Ioelu 2:28-32.—Fakakiteaga 11:7-12.
Lagomatai i Loto he Fakapotopotoaga
6. Kua iloa fefe e tautolu kua maeke ke fakauka ke he tutuaga uka lahi i loto he fakapotopotoaga?
6 Lagomatai he Atua hana fakatokatokaaga katoa, ti kua fakatokotu he lima hana e tau tagata fakatakitokotaka i loto i ai. E moli, kua nakai mitaki katoatoa e tutuaga i loto he ha fakapotopotoaga ha kua nakai mitaki katoatoa e tau tagata oti kana. (Roma 5:12) Ko e falu he tau fekafekau a Iehova kua liga tupu e tau tutuaga uka he falu magaaho i loto he fakapotopotoaga. Tuga a nai, pete ni kua “fakamoli . . . ke he tau mena oti kua eke” a Kaio he talia e tau matakainaga ahiahi he fakamokoi atu, kua nakai talia e Tioterefe a lautolu mo e kua lali foki ke tolo ki tua a lautolu ne fakamokoi lahi he fakapotopotoaga. (3 Ioane 5, 9, 10) Ka e pete ni, ne lagomatai e Iehova a Kaio mo e falu ke fakakite tumau e mahani fakamokoi ke lagomatai e gahua fakamatala he Kautu. Kua lata e tau liogi kua falanaki lahi ke he Atua ke lagomatai a tautolu ke taute tumau e tau gahua fakamoli ka e he magaaho taha kua fakatalitali a tautolu ki a ia ke fakahako e tau tutuaga kua liga ke kamatamata ha tautolu a tua.
7. Pete ni ko e heigoa e tau tutuaga i loto he fakapotopotoaga i Korinito, ne taute fakamoli agaia ni he tau Kerisiano tua fakamoli ha lautolu a tukuleleaga ke he Atua?
7 Na pehe kua feoaki a koe mo e fakapotopotoaga Korinito he senetenari fakamua. He taha magaaho, ne fakahagahaga kelea he matakau tote kua nakai felauaki e fefakalatahaaki hana, mo e tokaholo e mahani feuaki kua fakahagahaga kelea hana agaga. (1 Korinito 1:10, 11; 5:1-5) Ne uta he tau tagata tali tonu e taha mo e taha ke he tau hopoaga fakafili he lalolagi, mo e taufetoko ke he falu mena. (1 Korinito 6:1-8; 8:1-13) Kua uka e moui ka taufetoko, mahekeheke, ita, mo e ai maopoopo. Ne huhu totoko foki e falu ke he pule malolo ha Paulo mo e eke fakateaga hana iloilo ke vagahau. (2 Korinito 10:10) Ka ko lautolu ne fakamoli kua feoaki mo e fakapotopotoaga ia kua taute fakamoli ha lautolu a tukuleleaga ke he Atua he tau magaaho uka ia.
8, 9. Ko e heigoa kua lata a tautolu ke taute kaeke kua fakafehagai a tautolu mo e tau tutuaga uka lahi i loto he fakapotopotoaga?
8 Kaeke kua tutu hake e tau tutuaga uka lahi, kua lata a tautolu ke tapiki atu ke he tau tagata he Atua. (Fakatatai Ioane 6:66-69.) Kia lata a tautolu ke fefakaukaaki, ha kua iloa ko e falu tagata kua leva mai he falu ke tui hifo e “tagata fou” mo e ke fakatapulu ni e lautolu a lautolu ni mo e loto hohofi noa, totonu, loto fakatokolalo, loto molu, mo e fakamanavalahi. Ha kua kehekehe foki e tau puhala he moui he tau fekafekau he Atua, kua lata a tautolu oti kana ke fakakite e fakaalofa mo e ke fefakamagaloaki.—Kolose 3:10-14.
9 He mole mai e tau tau loga ke he fekafekau ki a Iehova, taha mai he tau matakainaga tane ne pehe: “Kaeke kua taha e mena kua mua atu e aoga lahi ki a au, ko e mena ni ke fakatata tumau ke he fakatokatokaaga kua kitia ha Iehova. Kua fakaako mai he tau mena ne tutupu fakamua ki a au ko e ha kua nakai malolo katoatoa ai ke falanaki atu ke he tau puhala manamanatu he tagata. He magaaho kua fifili haku a manatu ke he mena ia, ne mauokafua haku a loto ke tapiki ke he fakatokatokaaga fakamoli. To maeke fefe a taha ke moua e fiafia pauaki a Iehova mo e fakamonuinaga?” Kua fakahelehele pihia nakai e koe hau a monuina ke fekafekau mo e hana tau tagata loto olioli lahi ki a Iehova? (Salamo 100:2) Kaeke kua pihia, to nakai toka e koe ha mena ke futiaki kehe a koe mai he fakatokatokaaga he Atua po ke moumou hau a fakafetuiaga mo Ia kua lima fakahao kia lautolu oti kana kua fakaalofa atu ki a ia.
Lagomatai Ka Hoko Mai e Tau Kamatamata ki a Tautolu
10. (a) Kua lagomatai fefe he liogi e tau tagata he Atua ke fehaga atu ke he tau kamatamata? (e) Ko e heigoa e fakamafanaaga ne foaki mai e Paulo ia 1 Korinito 10:13?
10 Ha ko e tau tagata fakamoli takitokotaha ne feoaki mo e fakatokatokaaga he Atua, kua ha ha ia tautolu hana lagomatai he tau magaaho kamatamata. Ke tuga a nai, kua lagomatai e ia a tautolu ke fakatumau ha tautolu a fakamoli ki a ia ka agagai ia tautolu e tau kamatamataaga. E moli, kua lata a tautolu ke liogi ke fetataiaki mo e tau kupu a Iesu: “Aua neke uta e koe a mautolu ke he kamatamata, ka e laveaki mai a e koe a mautolu he mena kelea,” ko Satani ko e Tiapolo. (Mataio 6:9-13) Ke tuga e mena nei, kua ole a tautolu ke he Atua ke nakai fakaata a tautolu ke kaumahala ka hoko mai e kamatamata ke nakai omaoma ki a ia. Kua tali mai foki e ia ha tautolu a tau liogi ma e pulotu ke kautu mai he tau mena uka. (Iakopo 1:5-8) Mo e kua maeke e tau fekafekau a Iehova ke iloa tonu to moua hana lagomatai, ha kua pehe a Paulo: “Nakai moua a mutolu he kamatamata kua kehe mo e tau tagata auloa; ha kua fakamoli e Atua, he nakai tuku atu e ia a mautolu ke he kamatamata kua mua ke he mena kua fahia ai a mutolu, ka e taute foki e ia fakalataha mo e kamatamata e mena ke hao ai, kia fahia a mutolu ke fakauka ai.” (1 Korinito 10:13) Kua puna mai he heigoa e tau kamatamata pihia, mo e taute fefe he Atua e puhala ke hao mai ai?
11, 12. Ko e heigoa e tau kamatamata ne kaumahala e tau Isaraela ki ai, mo e maeke fefe e tau mena ne tutupu ki a lautolu ke lagomatai a tautolu?
11 Kua hoko mai e tau kamatamata he tau tutuaga kua maeke ke fakataki atu a tautolu ke nakai fakamoli ke he Atua. Ne pehe a Paulo: “Hanai kua taute ai e tau mena nei mo tau fakafifitakiaga ha tautolu, ma tautolu ke nakai taute mo tau tagata kua fia loto ke he tau mena fakamamahi, ke tuga [e tau Isaraela] foki ne fia loto ki a lautolu. Po ke ua taute mo tau tagata tapuaki tupua, ke tuga e falu ha lautolu ne pihia; ke tuga kua tohia: ‘Ne nonofo hifo e tau tagata ke kai mo e inu, mo e kua mamatike hake a lautolu ke fakafiafia e tino.’ Po ke ua taute tumau e tautolu e feuaki, tuga ne taute he falu ia lautolu e feuaki, ke veveli ni, uafulu ma tolu e afe ha lautolu he aho taha. Po ke ua tuku e tautolu a Iehova ke he kamatamata, tuga ne tuku he falu ia lautolu a ia ke he kamatamata, ke tamate he tau gata. Po ke ua loma, tuga ne loma e falu ha lautolu, ke tamate e ia ko e fakahoko fakaotiaga.”—1 Korinito 10:6-10, NW)
12 Ne fia loto e tau Isaraela ke he tau mena fakamamahi he magaaho ne fakalolelole atu a lautolu ke he kamatamata ha kua lotokai ke he tanakiaga mo e kaiaga he tau salu ne foaki mana mai he Atua. (Numera 11:19, 20, 31-35) He magaaho fakamua, kua taute a lautolu mo e tau tagata tapuaki tupua he magaaho ne nakai nofo ai a Mose ti kua tupu e kamatamata ke taute e tapuaki ke he puna povi. (Esoto 32:1-6) Ne mamate e tau afe ha kua kaumahala a lautolu ke he kamatamata mo e hoko ai e feuaki mo e tau fifine a Moapi. (Numera 25:1-9) He magaaho ne kaumahala ai e tau Isaraela ke he kamatamata mo e loma ke he fakaotiaga he tagata totoko ko Koru, Tatano, Apiramo, mo e ha lautolu a kau, kua 14,700 ne tamate he malaia ne fakafano mai he atua. (Numera 16:41-49) Kua maeke ia tautolu ke lagomatai mai he tau mena tutupu ia kaeke kua iloa e tautolu kua nakai lahi mahaki e taha he tau kamatamata nei ke nakai maeke e tau Isaraela ke totoko ki ai. Kua maeke a lautolu ke taute pihia kaeke kua fakagahuahua e lautolu e tua, kua loto fakaaue lahi ke he levekiaga fakaalofa he Atua, mo e he loto fakaaue ke he tonu he hana Matafakatufono. Ti kua maeke e lima ha Iehova ke fakahao mai a lautolu, tuga kua maeke foki ke fakahao mai a tautolu.
13, 14. Kua taute fefe e Iehova e puhala ke fehalo hana tau fekafekau ka fehagaaki mo e kamatamata?
13 Ha ko e tau Kerisiano, kua fehagaaki a tautolu mo e tau kamatamata kua fa mahani e tau tagata ki ai. Ka e, maeke a tautolu ke fakamoli tumau ke he Atua he liogi ma e hana lagomatai mo e gahua ke totoko atu ke he kamatamata. Kua fakamoli e Atua, mo e to nakai toka e ia a tautolu ke mua atu e kamatamata mai he tau mena kua maeke ia tautolu ke fahia ki ai. Kaeke kua fakamoli a tautolu ki a Iehova, to nakai moua e tautolu kua nakai maeke ke taute hana finagalo. Kua taute e ia e puhala ke fakamalolo mai a tautolu ke totoko ke he kamatamata. Ke tuga a nai, he magaaho ka favale mai, to liga ke kamatamata mai ki a tautolu ke fakahui e mena he amaamanaki ke hola kehe mai he fakakikiveka po ke mate. Ka e kaeke kua falanaki a tautolu ke he lima malolo lahi a Iehova, to nakai hoko atu e kamatamata ke he mena kua nakai maeke a tautolu ke ati hake ha tautolu a tua mo e ke moua mai e tautolu e malolo ke fakatumau e fakamoliaga. Tuga ne pehe e aposetolo ko Paulo: “Kua matematekelea a mautolu ke he tau mena oti, ka e nakai fakaatukehe; kua fakahakuhaku a mautolu ka e nakai mahalohalo noa; Kua favale mai kia mautolu, ka e nakai tiaki a mautolu; kua palu hifo a mautolu, ka e nakai mahaikava.”—2 Korinito 4:8, 9.
14 Kua lagomatai foki e Iehova hana tau tagata he fakaaoga hana agaga ke fakamanatu atu mo e eke mo faiaoga. Kua liuaki mai e tau matakupu faka-Tohiaga Tapu ke he tau loto mo e lagomatai a tautolu ke kitia ko e maeke fefe ke fakaaoga a lautolu ke maeke ai ke totoko atu ke he kamatamata. (Ioane 14:26) Kua maama he tau fekafekau fakamoli a Iehova e matakupu ne putoia ai i loto he kamatamata mo e kua nakai fakavaia ai ke muitua ke he puhala hepe. Kua taute he Atua e puhala ke fano kehe mai he taute a lautolu ke maeke ke fakauka foki ti hoko atu ke he mate ka e nakai fakalolelole ke he kamatamata. (Fakakiteaga 2:10) Ke lafi atu ke he lagomataiaga ke he tau fekafekau hana kua puhala mai he hana agaga, kua fakaaoga e Iehova hana tau agelu ma e hana fakatokatokaaga.—Heperu 1:14.
Lagomatai ke he Tau Mena Fakatagata
15. Ko e heigoa e lagomatai fakatagata kua liga to moua e tautolu i loto he Lologo a Solomona?
15 Ko lautolu ne feoaki mo e fakatokatokaaga ha Iehova kua moua hana lagomatai ke he tau mena fakatagata. Ke tuga a nai, liga kua kumi e falu ma e hoa fakamau Kerisiano. (1 Korinito 7:39) Kaeke kua ha ha i ai e loto momoko, liga to lagomatai ka manamanatu ke he patuiki ha Isaraela ko Solomona. Ne kaumahala a ia ke moua mana e lima he tamafifine Sulamita ke he faihoana ha kua fakaalofa e fifine ke he leveki mamoe holoilalo. Ko e fakamauaga he patuiki ke he lekua nei kua liga ui Ko e Lologo Fakaalofa ha Solomona kehe hana Kaumahala. Kua liga hihina ha tautolu a tau hihina mata kaeke kua nakai fai fua mitaki e tau laliaga fakaalofa fiafia ha tautolu ke he taha mena, ka e ne moui mai a Solomona he hana loto momoko mo e kua maeke a tautolu ke pihia foki. Kua maeke he agaga he Atua ke lagomatai a tautolu ke fakakite e manako fakalatalata mo e falu he tau fuafuaaga he mahani atua. Kua lagomatai mai he hana Kupu a tautolu ke talia e tau mena moli kua mamahi lahi kua nakai maeke ha tagata ke fai fakaalofa fiafia ma e ha tagata he tau tagata. (Lologo a Solomona 2:7; 3:5) Ka kua fakakite mai he Lologo a Solomona kua liga maeke ke moua e taha tagata tali tonu kua fakaalofa mo e fakahelehele ki a tautolu. Kua mua atu e aoga, ko e “lologo ne mua ue atu” nei, ne fakamoli ai he fakaalofa he Leveki Mamoe Mitaki, ko Iesu Keriso, ma e hana “kitofaitane” ko e tau 144,000 ne fakauku ne muitua ki a ia.—Lologo a Solomona 1:1; Fakakiteaga 14:1-4; 21:2, 9; Ioane 10:14.
16. Ko e “matematekelea ke he tino” ne fa mahani ke tupu ke he tau Kerisiano ne kua fita e mauhoana kua liga fakalataha e heigoa ki ai?
16 Ko lautolu foki ne mau mo e tagata tali tonu kua moua e “matematekelea ke he tino.” (1 Korinito 7:28) Kua ha ha i ai e tau mena fakaatukehe mo e levekiaga kua putoia e tane mo e hoana mo e ha laua a tau fanau. (1 Korinito 7:32-35) Kua liga to tamai he kafokia e tau kavega mamafa mo e fakaagitau. Kua liga taute he favale ke uka e matua tane Kerisiano ke moua e tau mena kua lata ma e hana magafaoa. Kua liga to mavehevehe e tau mamatua mo e tau fanau ha kua tuku ke he fale puipui, mo e liga to fakakikiveka a falu mo e mamate foki. Ka e he tau tutuaga oti kana pihia, kua maeke a tautolu ke totoko ke he tau kamatamata ke nakai fakatikai e tua kaeke kua falanaki moli a tautolu ke he lima fakahao a Iehova.—Salamo 145:14.
17. Ko e heigoa e lekua fakamagafaoa ne lagomatai he Atua a Isaako mo Repeka ke fakauka?
17 Kua liga to taute ai ni a tautolu ke fakauka ke he falu mena uka ke leva e tau magaaho. Ke tuga a nai, kua liga kua fakatupu he tama tane hana tau mamatua ne mahani fakaatua ke fakaagitau ha kua mauhoana mo e taha tagata nakai tali tonu. Ne pihia e mena ne tupu i loto he magafaoa he tupuna he tohi tapu ko Isaako mo e hana hoana ko Repeka. Ko e ha laua a tama tane kua 40 e tau tau ko Esau ne mauhoana mo e ua e fifine Heti “ne fakamamahi e laua e tau loto a Isaako, mo Repeka.” Kua moli ai ni, he “pehe atu a Repeka kia Isaako, Kua vihia e au haku moui ha ko e tau fifine Heti, kaeke ke faihoana a Iakopo ke he taha fifine Heti, tuga ne tau fifine ia he motu, po ke aoga ha ha haku moui kia au?” (Kenese 26:34, 35; 27:46) Kua kitia tonu, ne fakakikiveka he lekua eke mau nei e solu tututonu ha Repeka. (Fakatatai 2 Peteru 2:7, 8.) Ka e, toto hake he lima ha Iehova a Isaako mo Repeka, kua taute ai a laua ke fakauka ke he mena uka nei ka e he magaaho taha fakatumau e fakafetuiaga malolo mo Ia.
18. Ko e heigoa e mena uka lahi ne fakauka a C. T. Russell ki ai ha kua lagomatai he Atua?
18 Ko e mena fakaagitau lahi ka fakatuai hifo e taha ne papatiso he magafaoa ke he fekafekauaga he Atua. (Fakatatai 2 Timoteo 2:15.) Ka e, moua foki he falu e matematekelea he galo fakaagaga e hoa, tuga a Charles T. Russell, ko e pelesiteni fakamua he Kaufakalatahaaga Kolo Toko. Ne mumutu kehe he hoana hana e tutakiaga mo e Kaufakalataha mo e tiaki a ia (tane) he tau 1897, kua teitei ke 18 foki e tau tau he mole mai e mauhoana. Ne taute e ia (fifine) e veveheaga taute fakamatafakatufono he tau 1903, mo e ne moua ai he tau 1908. Kua kitia maali hana (tane) momoko he magaaho ne talaage e ia ki a ia (fifine) i loto he taha tohi fakamua: “Ne liogi fakalahi ke he Iki mau . . . to nakai fakamamafa e au a koe mo e tau mena he haku a momoko, po ke lali ke fakalagalaga hau a loto fakaalofa he talahau e tau mena ikiiki ke he haku a tau logonaaga, he taha magaaho mo e taha magaaho ka moua e au e tau tapulu hau mo e falu mena kua liuaki fakamaaliali mai ki mua he loto haku a koe he vaha fakamua—kua puke lahi mo e fakaalofa mo e loto hohofi mo e lagomatai lahi—ko e agaga he Keriso. . . . Ae, ki a manamanatu mo e liogi fakalahi hagaao ke he mena kua talahau hane fai e au. Mo e kia iloa tonu ko e mahuki he momoko haku, ko e lauia hokulo lahi hana, nakai ko e matimati he fenoga he moui ne toe ka e hau a veliaga, haku fakahele, ko e hau a galomia tukulagi, e tau mena kua maeke ni au ke kitia.” Pete ni he lotomamahi pihia, kua ha ha ia Russell e lagomataiaga he Atua ato hoko e fakaotiaga he hana moui fakalalolagi. (Salamo 116:12-15) Kua lagomatai tumau e Iehova hana tau fekafekau fakamoli.
Tupu Mai he Tau Fakaagitau Oti Kana
19. Kua lata a tautolu ke fefe e tau gahua kaeke kua holo loa tumau e tau lekua fakaagitau?
19 Kua iloa he tau tagata a Iehova a ia “ko e Atua he tau gahua fakahao,” ko Ia “ne hahamo he tau aho oti e kavega ha tautolu.” (Salamo 68:19, 20, NW) Ha kua pihia, ko e tau tagata tukulele takitokotaha ne feoaki mo e hana fakatokatokaaga he lalolagi, kia nakai fakalolelole a tautolu mo e kapeletu kaeke kua tumau e tau lekua fakaagitau. Kia manatu “ko e Atua, ko e ha tautolu a taue ia, mo e ha tautolu a malolo, kua eke a ia mo lagomatai mua ue atu ke he tau mena matematekela.” (Salamo 46:1) Ne mitaki tumau e taui ha tautolu ka falanaki ki a ia. “Ne kumikumi au kia Iehova, ti tali mai ai a ia kia au,” he talahau e Tavita, “mo e laveaki e ia au mai he tau mena oti ne matakutaku ai au. . . . Ne ui atu e tagata mamahi nei, ti fanogonogo mai ai a Iehova, mo e fakamaoui a ia mai he hana tau matematekelea oti kana.”—Salamo 34:4-6.
20. Ko e heigoa e tau huhu ne toe kua lata ke manamanatu ki ai?
20 E, kua fakahao he Matua ha tautolu i luga he lagi hana tau tagata mai he tau mena fakaagitau oti kana. Ne tokotua e ia hana fakatokatokaaga he lalolagi, he foaki lagomatai ke he tau mena fakapotopotoaga mo e ke he tau mena fakatagata. E moli, “nakai toka e Iehova hana motu.” (Salamo 94:14) Ka e kia manamanatu a tautolu foki ke he falu puhala kua lagomatai mai e Iehova hana tau tagata takitokotaha. Kua fakatumau fefe he Matua ha tautolu i luga he lagi hana tau fekafekau kua gagao, lolelole e manamanatuaga, kua lofia he momoko lahi ha ko e mauku, po ke fakaagitau ke he ha lautolu a tau mena hehe? Tuga ka kitia e tautolu, ke he tau mena nei foki, kua ha ha ia tautolu e kakano ke falanaki atu ke he lima malolo lahi a Iehova.
To Taute Fefe a Koe?
◻ Kua tamai fefe he lima a Iehova e fakamouiaga he vaha fakamua?
◻ Ne lagomatai fefe e Iehova hana tau tagata i loto he fakapotopotoaga he vaha nei?
◻ Ko e heigoa e lagomatai ne foaki he Atua ke he tau mena fakatagata?
◻ Ko e heigoa kua lata a tautolu ke taute kaeke kua holo loa e tau lekua fakaagitau?
[Fakatino he lau 20, 21]
Ne uta kehe he Atua e tau Isaraela mai i Aikupito “mo e lima fakaolo”