Tamai he Tokanoaaga ne Foaki he Atua e Olioli
“Ko e olioli ha Iehova ko e ha mutolu a malolo haia.”—NEHEMIA 8:10, NW.
1. Ko e heigoa e olioli, mo e ko e ha a lautolu ne fakatapu ke he Atua ne logona ai e mena ia?
KO IEHOVA ne fakapuke e tau loto he hana tau tagata aki e olioli. Ko e tuaga he fiafia po ke olioli nei ko e fua mai he mouaaga po ke amaamanakiaga he mitaki. Ko e tau tagata ne fakatapu ke he Atua ne moua e logonaaga nei kakano ha ko e olioli ko e fua he hana a agaga tapu, po ke gahuahua malolo. (Kalatia 5:22, 23, NW) Ti pete ne feleveia a tautolu mo e tau mena matematekelea, maeke ia tautolu ke olioli lahi ko e tau fekafekau a Iehova kua takitaki he hana a agaga.
2. Ko e ha e tau Iutaia ne olioli ai ke he taha magaaho pauaki he vaha ha Esera?
2 Ke he magaaho pauaki he senetenari ke lima aki he F.V.N., ne fakaaoga he tau Iutaia e tokanoaaga ne foaki he Atua ke taute aki e galue olioli he Fale Api i Ierusalema. Mole atu he totou mo e fakamaama e Esera mo e falu tagata Levi e Fakatufono he Atua ki a lautolu, “ti o atu ai e motu oti ke kai, mo e inu, mo e fakafano age ai e tau tufaaga, mo e olioli lahi ai, ha kua maama ai e lautolu e tau kupu ne fakailoa atu ki a lautolu.”—Nehemia 8:5-12, NW.
Ko e Olioli ha Iehova ko e ha Tautolu a Malolo Haia
3. Ko e tau magaaho fefe ne maeke he “olioli ha Iehova” ke malolo ai a tautolu?
3 Ke he galue ia, ne mailoga he tau Iutaia e moli he tau kupu: “Ko e olioli ha Iehova ko e ha mutolu a malolo haia.” (Nehemia 8:10, NW) Ko e ha tautolu a olioli foki haia e malolo nei kaeke ke tumau a tautolu ke he tokanoaaga ne foaki he Atua ko e Tau Fakamoli, tukulele, papatiso ha Iehova. Tokogahoa ia tautolu ne logona e fakauku he agaga tapu mo e hikiaga ki loto he magafaoa he Atua ko e tau hakeaga fakalataha mo e Keriso. (Roma 8:15-23) Ko e tokologa ha tautolu he vaha nei ne amaamanaki ke momoui ke he parataiso he lalolagi. (Luka 23:43) Kua lata ke olioli lahi a tautolu!
4. Ko e ha ne maeke he tau Kerisiano ke fakauka ke he tau mamahi mo e tau favale?
4 Pete ne mitaki ha tautolu a tau amaamanakiaga, ne nakai mukamuka ke fakauka ke he tau mamahi mo e tau favale. Ka e taha e mena maeke ia tautolu, kakano ha ko e mena foaki mai he Atua hana a agaga tapu. Ha ha ia tautolu e olioli mo e mauokafua to nakai fai mena ke kaiha a tautolu mai he amaamanakiaga po ke fakaalofa he Atua ha ko e mena ia. Ko e taha mena foki, to iloa moli e tautolu ko Iehova ha tautolu a malolo ka tumau a tautolu ke fakaalofa mo e loto katoa, solu katoa, malolo katoa, mo e manatu katoa.—Luka 10:27, NW.
5. Moua mai e tautolu i fe e tau kakano ke olioli ai?
5 Olioli e tau tagata a Iehova ke he tau fakamonuinaaga loga mo e ha ha i ai e tau kakano loga ke olioli ai. Ko e falu a kakano ke olioli haia ne tohi e Paulo ke he tohi ke he tau Kalatia. Ko e falu ne tohi mai he falu a Tohiaga Tapu. To olioli ha tautolu a tau agaga ka manamanatu ke he tau fakamonuinaaga olioli ia.
Takiofa e Tokanoaaga ne Foaki he Atua
6. Ko e ha ne fakaohooho ai e Paulo e tau Kerisiano i Kalatia ke tumau e malolo?
6 Ha ko e tau Kerisiano, ha ha ia tautolu e tau fakamonuinaaga olioli ha ko e tuaga talia mai he Atua. Ha kua fakaata mai e Keriso hana a tau tutaki mai he Fakatufono a Mose, ne fakalagalaga e tau tagata Kalatia ke tumau mo e nakai taofi ke he “akau hahamo he fakatupa.” Ka e ai kua a tautolu? Kaeke ke lali a tautolu ke talahaua tututonu ha ko e omaoma ke he Fakatufono, to vevehe kehe a tautolu mo Keriso. Ka e taha e mena, ha ko e lagomatai he agaga he Atua, ne fakatalitali a tautolu ke he amaamanakiaga he tututonu ne moua mai he tua ne gahuahua he fakaalofa, nakai mai he peritome he tino po ke falu a gahua he Fakatufono.—Kalatia 5:1-6.
7. Kua lata ke fefe ha tautolu a tau manamanatuaga ke he fekafekau tapu ki a Iehova?
7 Ko e fakamonuinaaga ke fakaaoga ha tautolu a tokanoaaga ne foaki he Atua ke “fekafekau . . . kia Iehova mo e fiafia.” (Salamo 100:2) Ko e moli, ko e fakamonuinaaga nakai fai fuafuaaga ke taute e fekafekau tapu kia “Iehova ko e Atua, ko e Malolo Lahi Mahaki Katoatoa,” ko e “Patuiki he tukulagi tukumuitea”! (Fakakiteaga 15:3, NW) Ka ha ha ia tautolu e tau manamanatuaga tokolalo ki loto ia tautolu, to liga lagomatai ke mailoga ko e mena kua toho he Atua a koe ki a ia he puhala ia Iesu Keriso mo e foaki ki a koe ke gahua fakalataha ke he “gahua tapu he tala mitaki he Atua.” (Roma 15:16, NW; Ioane 6:44; 14:6) Ko e tau kakano moli ke olioli mo e fakaaue ke he Atua!
8. Ke lata mo Papelonia Lahi, ko e heigoa e mena ke laga mai e olioli he tau tagata he Atua?
8 Ko e taha mena ke olioli foki ki ai ko e ha tautolu a tokanoaaga ne foaki he Atua mai i Papelonia Lahi, ko e kautu he lalolagi he lotu pikopiko. (Fakakiteaga 18:2, 4, 5) Pete ni ko e fifine fakataka fakalotu nei ne fakatai ko e “nofo i luga he tau vai loga,” kakano ko e “tau tagata mo e tau moto tagata mo e tau motu oti mo e tau vagahau kehekehe,” ne nakai nofo a ia po ke pule fakalotu ke he tau fekafekau a Iehova. (Fakakiteaga 17:1, 15, NW) Ne olioli lahi a tautolu ke he maama mitaki he Atua, ka e pouli kikio a lautolu ko e tau lagomatai ha Papelonia Lahi. (1 Peteru 2:9) E, to uka ke maama e falu a “tau mena hokulo ia he Atua.” (1 Korinito 2:10) Ka ko e tau liogi ke moua e iloilo mo e lagomatai he agaga tapu ke lagomatai aki a tautolu ke maama e moli he Tohiaga Tapu ke tokanoa mai fakaagaga.—Ioane 8:31, 32; Iakopo 1:5-8.
9. Kaeke ke olioli a tautolu ke he fakamonuinaaga he tokanoaaga matutaki tumau mai he tau hepe fakalotu, ko e heigoa ha tautolu kua lata ke taute?
9 Ne olioli a tautolu ke he fakamonuinaaga he tokanoaaga matutaki tumau mai he tau hehe fakalotu, ka e ke tumau e tokanoaaga nei, kua lata ia tautolu ke tiaki e taofiaga kua tiaki. Ko e tau tagata Kalatia ne tafepoi fakamitaki e poitufi Kerisiano, ka e fai ne toho ki tua a lautolu mai he omaoma ke he kupu moli. Nakai mai he Atua e tau fakaohoohoaga kelea ia mo e lata ke totoko. Tuga ne mena fakaea tote ne fakaea e lakuaga falaoa oti, ko e tau akoako pikopiko po ke falanaki atu ke he tiaki taofiaga ke maeke ke fakakelea e fakapotopotoaga katoa. Ne manako a Paulo ki a lautolu ne tua ke he peritome ne kumi ke liliuina e tua he tau tagata Kalatia nakai ni ke peritome hokoia ka e moumou foki e tau fahi tino ia. Malolo moli e tau kupu nei! Kua lata ni ia tautolu ke mao niniva e totoko he tiaki taofiaga kaeke ke tumau a tautolu ke he tokanoaaga ne foaki he Atua mai he tau hepe fakalotu.—Kalatia 5:7-12.
Fekafekau e Taha ke he Taha mo e Fakaalofa
10. Ko e heigoa ha tautolu a gahua ko e taha vala he tau matakainaga Kerisiano?
10 Ne tamai he tokanoaaga ne foaki he Atua a tautolu ke he fakalatahaaga mo e fakaalofa fakamatakainaga, ka kua lata ke taute ha tautolu a vala ke fakakite e fakaalofa. Ne nakai mahani e tau tagata Kalatia ke fakaaoga ha lautolu a tokanoaaga mo “lagatau ke he tino” po ke mena ke fakamolemole mai he lotokai nakai fai fakaalofa. Ko lautolu kua lata ke fekafekau e taha ke he taha ha ko e omoiaga he fakaalofa. (Levitika 19:18; Ioane 13:35) Kua lata foki ia tautolu ke tiaki e fegagauaki mo e fevihatiaaki ha ko e fua mai he ha tautolu a fakaotioti he taha. Ko e moli, to nakai tupu e mena nei kaeke ke fakakite e tautolu e fefakaalofa fakamatakainaga.—Kalatia 5:13-15.
11. Maeke fefe a tautolu ke eke mo fakamonuinaaga ma e falu, mo e fakamonuina fefe e lautolu a tautolu?
11 Ha ko e fakaaogaaga ha tautolu he tokanoaaga ne foaki he Atua kua felauaki mo e tau takitakiaga he agaga he Atua, to fakakite e tautolu e fakaalofa mo e maeke ke fakamonuina ke he falu. Kua lata ke aga ke fakaata e tautolu a tautolu ke leveki mo e takitaki he agaga tapu. Ti nakai toka e tau fatuakiloto ke fakamakona mo e nakai fakaalofa ha tautolu a tau tino hala ne “totoko ke he agaga mo e hana a tau manako.” Kaeke ke takitaki he agaga he Atua a tautolu, to taute e tautolu e tau mena he fakaalofa ka e nakai ha ko e tau fakatufono ke omaoma mo e tuku mai e tau fakahala ke he tau tagata ka taute mena hehe. Tuga a nei, ko e fakaalofa—nakai ko e matafakatufono hokoia—ke nakai feutaaki tala ekefakakelea ke he falu. (Levitika 19:16) To fakalagalaga he fakaalofa a tautolu ke vagahau mo e gahuahua ke he tau puhala totonu. Ha kua fakakite e tautolu e fua he agaga ko e fakaalofa, to fakamonuina he falu a tautolu, po ke talahaua mitaki a tautolu. (Fakatai 10:6) Ko e taha mena foki, ko e fakamonuinaaga ki a lautolu ka fakalataha mai, mo tautolu.—Kalatia 5:16-18, NW.
Tau Fua Fetotokoaki
12. Ko e heigoa e falu fakamonuinaaga ne moua ha ko e tiaki he “tau gahua” he agahala “he tino”?
12 Loga e tau fakamonuinaaga ne fakalataha mo e ha tautolu a tokanoaaga ne foaki he Atua ne moua mai ni ha ko e tiaki e “tau gahua he tino.” Ko e tokologa he tau tagata he Atua ne kalo kehe mo e matematekelea ha kua nakai faivao, mahani nakai mea, mo e mahani kelea. Ka tiaki e tapuaki ke he tau Atua kehe, ti ha ha ia tautolu e olioli ha ko e fakafiafia ki a Iehova ke he mena ia. (1 Ioane 5:21) Ha kua nakai taute e tautolu e tau lagatau he taulatua, ti tokanoa a tautolu mai he pule he tau temoni. Ko e ha tautolu a fematakainaga Kerisiano kua nakai moumou he faitaua, taufetoko, mahekeheke ko e vale, ko e lagalagahou, feveheveheaki, ko e tau veveheaga, mo e mahekeheke. Ne nakai galo ha tautolu a olioli ke he tau konahia mo e tau taufeauhi. Ne poaki e Paulo ko lautolu ne gahua ke he tau gahua he tino to nakai hohoko ke he Kautu he Atua. Ha kua omaoma a tautolu ke he hana a tau kupu, ti kuku e tautolu e olioli he amaamanakiaga he Kautu.—Kalatia 5:19-21.
13. Ko e heigoa e tau fua he agaga tapu he Atua?
13 Tamai he tokanoaaga ne foaki he Atua e olioli ha tautolu he fakakite e tautolu e tau fua he agaga ha Iehova. Mai he tau kupu ha Paulo ke he tau tagata Kalatia, ne mukamuka ke kitia e tau gahua he hala he tino kua tuga e tau fotofoto ka fakatatai mo e tau fua mitaki he fakaalofa, olioli, mafola, fakauka, totonu, mahani mitaki, tua, mahani molu, mo e manako fakalatalata ne to ia ke he tau loto fakaatua. Fakamakamaka ke momoui totoko ke he tau manako lahi he tino, ne manako a tautolu ke takitaki he agaga he Atua mo e momoui mo e mena ia. Maeke he agaga ke taute a tautolu ke fakatokolalo mo e mafola, nakai “hula noa, fepalekoaki, mahekeheke e taha ke he taha.” Ko e mena haia ne olioli ai ka fakalataha mo lautolu kua fakakitekite e tau fua he agaga!—Kalatia 5:22-26.
Falu Kakano ke Olioli
14. Ko e heigoa e tapulu tau kua lata mo e ha tautolu a tau atu ke he tau agaga kelea?
14 Fakalataha mo e ha tautolu a tokonoaaga ne foaki he Atua ko e fakamonuinaaga he puipui mai ia Satani mo e tau temoni. Ke kautu ke he ha tautolu a tau fagatua mo e tau agaga kelea, kua lata ia tautolu ke tui e “tapulu tau katoa he Atua.” Kua lata ke ha ha ia tautolu e pipi he kupu moli mo e ufi kahokaho he tututonu. Kia afi foki ha tautolu a tau aloalohui ke he tauteaga he vagahau mitaki he mafola. Kua lata foki, he akau punuti he tua ke maeke ke tamate e tau fana kaka hana ne kelea. Kua lata ke tui e tautolu e potiki tau he fakamonuinaaga mo e fakaaoga e “pelu he Agaga,” ko e Kupu he Atua. Kua lata foki a tautolu ke “olelalo atu a mutolu ke he Agaga nakai noa ke he tau ole mo e tau liogi oti.” (Efeso 6:11-18) Ka tui e tautolu e tapulu tau he Atua mo e tiaki e tau lagatau taulatua, ti nakai matakutaku a tautolu ka e olioli lahi.—Fakatatai Gahua 19:18-20.
15. Ko e heigoa ha tautolu a tau fakamonuinaaga olioli ha kua mahani a tautolu ke felauaki mo e Kupu he Atua?
15 Ha ha ia tautolu e olioli ha kua felauaki e tau mahani ha tautolu mo e Kupu he Atua, mo e tokanoa a tautolu he agahala ne malaia ai e tau tagata agahala tokologa. Ne ‘lali a tautolu ke moua e loto manamanatu hifo mitaki ki mua he Atua mo e tau tagata oti.’ (Gahua 24:16) Ti ko e mena ia, kua nakai lata ke matakutaku ke he taui mai luga ke lata mo e tau tagata agahala pauaki ne nakai tokihala. (Mataio 12:22-32; Heperu 10:26-31) Ka fakagahua e tautolu e fakatonuaga ia Fakatai 3:21-26, to mailoga e tautolu e fakamoliaga he tau kupu ia: “Kia omaoma mau a koe ke he iloilo mo e loto manamanatu; To eke e tau mena ia mo moui ke he hāu a agaga, mo tau mena fulufuluola foki ke he ua hāu. Ti fano ai a koe ke he hāu a puhala mo e nakai haofia; ti nakai hakina foki hāu a hui; Ka takoto a koe nakai matakutaku ai a koe; to takoto ni, mo e mohe mitaki ai a koe. Aua neke matakutaku a koe ke he fakamatakutaku fakalutukia, mo e malaia he tau tagata mahani kelea ka hoko mai ai. Ha ko Iehova ke tua a koe ki ai; to leveki, foki e ia hāu a tau hui, neke moua e ia ne fai fi mai.”
16. Maeke fefe he liogi ke fakalagaaga e olioli, mo e ko e heigoa e vala he agaga a Iehova ne gahuahua ke he mena nei?
16 Ko e taha kakano foki ke olioli ai ko e ha tautolu a tokanoaaga ne foaki he Atua ke o atu ki a Iehova ke he tau liogi mo e iloa moli to logona mai e ia a tautolu. E, ko e tau liogi ha tautolu kua tali kakano he ha ha ia tautolu e lilifu e “matakutaku kia Iehova.” (Fakatai 1:7) Ko e taha mena foki ne lagomatai a tautolu ke tumau a tautolu ke he fakaalofa he Atua ha ko e “Agaga Tapu ke liogi ai a mutolu.” (Iuta 20, 21) Taute e tautolu e mena nei he fakakite e tautolu e loto mitaki ne talia e Iehova, mo e liogi ke he takitakiaga he agaga ke he tau mena ne felauaki mo e hana finagalo mo e hana a Kupu, ne fakakite mai ki a tautolu e puhala ke liogi mo e tau mena ke ole he liogi. (1 Ioane 5:13-15) Kaeke ke fakaatukehe lahi a tautolu ti nakai iloa e mena ke liogi ha ‘ko e Agaga kua ole a ia ma tautolu ke he tau oi kua nakai maeke ke fakamatala atu.’ Ne fanogonogo a Iehova ke he tau liogi pihia. (Roma 8:26, 27) Kia liogi a tautolu ke he agaga tapu mo e fakaata a ia ke fua mai ia tautolu hana a tau fua kua lata pauaki ke fakafeleveia aki e falu kamatamata. (Luka 11:13) To tupu foki ha tautolu a olioli kaeke ke liogi mo e fakamakutu he aoga e Kupu mai he agaga he Atua mo e tau tohi Kerisiano ne taute ki lalo hifo he takitakiaga he agaga.
Fakamonuina Aki e Tau Lagomatai he Magaaho Nei
17. Fakakite fefe he tau gahua a Mose mo e tau kupu a Tavita ko e fakalataha a Iehova mo e Hana a tau tagata?
17 Ka fakaaoga fakamitaki e tokanoaaga ne foaki he Atua, ti ha ha ia tautolu e olioli he iloa kua fakalataha a Iehova mo tautolu. Ko e magaaho ne kelea lahi e tau tutuaga ke toka e Mose a Aikupito, ko e tua ne “fakauka a ia tuga ne mena kua kitia e ia a ia nakai kitia.” (Heperu 11:27) Ne nakai fano tokotaha a Mose; ne iloa e ia ko Iehova ne fakalataha mo ia. Tuga na ia, ne lologo he fanau a Koru: “Ko e Atua, ko e ha tautolu a taue ia, mo e ha tautolu a malolo, kua eke a ia mo lagomatai mua ue atu ke he tau mena matematekelea. Ko e mena ia nakai matakutaku ai a tautolu, pete he maliu e lalolagi, mo e luelue e tau mouga ki loto he tahi; Pete he go mo e loka e puke tahi, mo e vivivivi ai e tau mouga he hana fakatokoluga.” (Salamo 46:1-3) Kaeke ke ha ha ia koe e tua pihia ke he Atua, to nakai tiaki e ia a koe. Ne pehe a Tavita: “Ha kua tiaki au he haku a matua tane mo e haku a matua fifine, ti talia ai e Iehova au.” (Salamo 27:10) Ko e olioli ha a ia he iloa ko e leveki pihia he Atua hana a tau fekafekau!—1 Peteru 5:6, 7.
18. Ko e ha a lautolu ne ha ha i ai e olioli ki a Iehova ne toka ai e tokanoaaga ne foaki he Atua kua hao mai he tau fakaatukehe mua ue atu?
18 Ha kua ha ha ia tautolu e olioli a Iehova, ne toka ia tautolu e tokanoaaga ne foaki he Atua mai he tau fakaatukehe mua ue atu. “Aua neke fakaatukehe a mutolu ke he taha mena taha,” he ui e Paulo, “ka kia fakailoa atu ke he Atua e tau manako ha mutolu ke he tau mena oti kana ke he liogi, mo e ole, katoa mo e fakaaue. Ko e monuina foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu ha mutolu kia Keriso Iesu.” (Filipi 4:6, 7) Ko e mafola he Atua ke moua e loto mitaki ne nakai fai mena ke fakatatai ki ai pete ni he vihi lahi e tau mena ka feleveia. Ko e mena ia ke fakahauhau aki ha tautolu a tau loto—ko e mena ke mitaki ai a tautolu fakaagaga, tau manamanatuaga mo e tino. (Fakatai 14:30) Maeke foki he mena ia ke lagomatai aki a tautolu ke tumau e lago tatai he tau manamanatuaga, ha ko e mena iloa e tautolu nakai fakaata he Atua ha mena taha ke mamahi tukulagi a tautolu. (Mataio 10:28) Ko e mafola nei, ne moua mai he fakafetuiaga tata mo e Atua ne puhala mai ia Keriso ka moua ai e tautolu e kakano ha kua tukulele a tautolu ki a Iehova mo e omaoma ke he takitakiaga he hana a agaga, ne moua mai e tau fua he olioli mo e mafola.
19. Tokaloto a tautolu ke he heigoa ke lagomatai aki a tautolu ke olioli lahi?
19 Ka toka loto e tautolu e tokanoaaga ne foaki he Atua mo e amaamanakiaga he Kautu ke lagomatai a tautolu ke olioli lahi. Tuga a nei, ke he falu a magaaho tote e tau lagatau ke taute aki e tau tino gagao, ka e maeke ia tautolu ke liogi ke moua e iloilo mo e malolo mo e mauokafua e loto ke taute aki e gagao mo e moua e fakamafanaaga he iloa e malolo fakaagaga ne olioli a tautolu ki ai he mogonei mo e tau tului he tino ka moua ki lalo hifo he pule he Kautu. (Salamo 41:1-3; Isaia 33:24) Pete ne liga ko e fakauka a tautolu ke he kuku he tau levekiaga he tino, to nakai ha ha i ai ha kuku ke he tau levekiaga he tino ke he lalolagi Parataiso ne tata lahi mai. (Salamo 72:14, 16; Isaia 65:21-23) E, to leveki he ha tautolu a Matua he lagi a tautolu mogonei mo e mua atu e taute he ha tautolu a olioli ke katoatoa.—Salamo 145:14-21.
Fakahelehele Hau a Tokanoaaga ne Foaki he Atua
20. Ke lata mo Salamo 100:1-5, fakakite fefe e tautolu a tautolu ki mua a Iehova?
20 Ha ko e tau tagata he Atua, ko e moli e lata tonu ia tautolu ke fakahelehele e tokanoaaga ne foaki he Atua ne moua aki e tautolu e olioli mo e loga atu he tau fakamonuinaaga. Ko e mena haia ne fakalagalaga he Salamo 100:1-5 a tautolu ke o mai ki mua he Atua mo e “kalaga fiafia.” Ko e tau tagata a Iehova a tautolu mo e leveki a tautolu tuga e fakaalofa hofihofi he Leveki mamoe. E, “ko e hana a motu a tautolu, ko e fuifui mamoe ne fagai e ia.” Ko e hana Tufugatiaaga mo e mitaki mua ue atu ne foaki mai ma tautolu e fakalagalagaaga ke huhu atu ke he lotopa he hana faituga mo e fakaheke mo e fakaaue. Kua fakalagalaga a tautolu ke “fakamonu ke he hana a higoa,” mo e nava ke he Atua ko Iehova. Ko e taha mena foki, maeke ia tautolu ke falanaki tumau ke he hana a fakaalofa—totonu, po ke fakaalofa hofihofi mai ki a tautolu. “Ke he taha hau mo e taha hau” ne fakamoli a Iehova, ne nakai fai maueue e fakakiteaga he fakaalofa ki a lautolu ne taute hana a finagalo.
21. Ko e heigoa e fakamaloloaga ne foaki mai he vala tala fakamua he mekasini nei, mo e ko e heigoa ha tautolu kua lata ke taute ma e tokanoaaga ne foaki he Atua?
21 Ha ko e tau tagata nakai mitaki katoatoa, ne nakai maeke ia tautolu he mogonei ke hao mai he tau kamatamata oti. Ka e taha e mena, ha ko e lagomatai mai he lagi, to maeke ia tautolu ke malolo mo e olioli lahi ko e Tau Fakamoli a Iehova. Mailoga lahi e mena nei ke he tau kupu ne moua ke he vala fakamua he senolo nei (Iulai 1879): “Fakamalolo . . . ma haku a tau matakainaga tane Kerisiano mo e mahakitaga ne kumi mo e tau laka lolelole ke tafepoi he puhala pukilu. Aua neke tupetupe ke he puhala tule; ha kua nakai maeke ke moumou e tau matafakatufono mo e fakatapu he tau hui fakamonuina he Iki. Totou e tau fotofoto oti ko e tau fiti; ko e tau patuo matila oti ko e fakamailoga maila he mamao, ke alumaki atu a koe ki mua he foliaga. . . . Kia toka mau e tau mata hāu ke he totogi.” Ko e miliona ne fekafekau ki a Iehova mogonei ne toka tumau ha lautolu a tau mata ke he totogi ti loga e tau kakano ke malolo mo e olioli. Kia fakalataha atu mo lautolu ke tumau ke he tokanoaaga ne foaki he Atua. Kia nakai fakagalo hana a amaamanakiaga, mo e maeke he olioli a Iehova mo malolo tumau hau.
To Tali Fefe e Koe?
◻ Maeke fefe he “olioli ha Iehova” mo fakamaloloaga ha tautolu?
◻ Ka tutala fakalotu, ko e heigoa e tau fakamonuinaaga ne tamai he tokanoaaga ne foaki he Atua ke he tau tagata a Iehova?
◻ Ko e ha ne fekafekau e taha ke he taha mo e fakaalofa?
◻ Ko e heigoa e falu fakamonuinaaga ne fakalataha ai mo e tokanoaaga ne foaki he Atua?
◻ Maeke fefe he tau tagata he Atua ke tumau e olioli lahi?
[Fakatino he lau 18]
“Totou e tau fotofoto oti ko e tau fiti; ko e tau patuo matila oti ko e tau maka fakamailoga maila, ke alumaki atu a koe ki mua he foliaga”