Kia Fakaaoga Fakamitaki e Tokanoaaga Kerisiano Hau
“Tuga ne tau tagata toka noa, ka e . . . eke ha mutolu a tokanoaaga . . . tuga e tau fekafekau he Atua.”—1 PETERU 2:16.
1. Ko e tokanoaaga fe ne galo ia Atamu, mo e ko e heigoa e tokanoaaga ne fakatoka e Iehova ma e tau tagata?
HE MAGAAHO ne hala ai e tau mamatua fakamua ha tautolu he katene ko Etena, kua fakagalo e laua e matohiaga mua ue atu ke he ha laua a tau fanau—tokanoaaga mai he hala mo e fakafua loto kelea. Ko e fua ne moua mai, ai ko tautolu oti ne fanau mai kua fakatupa ke he fakafua loto kelea mo e mate. Kua fiafia ki ai, kua finagalo a Iehova ke leveki e tau tagata fakamoli ke he tokanoaaga homo ue atu. He vaha nei, ko lautolu ne loto hako kua “fakatalitali ni ke he fakakite mai e tau tama he Atua,” ti ko e fua ha lautolu kua “eke mai he tupaaga ke he mena popo vave kia hoko atu ai ke he tokanoaaga ha ha he monuina he fanau he Atua.”—Roma 8:19-21.
‘Fakauku ke Fakamatala’
2, 3. (a) Ko hai “e tau tama he Atua”? (e) Ko e heigoa e tuaga homo ue atu kua olioli a lautolu, mo e tamai ai e kavega fe?
2 Ko hai e “tau tama he Atua” nei? Ko lautolu ko e tau matakainaga fakauku he agaga ha Iesu ne kua amaamanaki ke pule fakalataha mo Iesu ke he Kautu he lagi. Ko e fakamua he tau mena nei ne fakakite he senetenari fakamua V.N. Ne talia a lautolu ke he fakahaoaga he kupu moli ne fakaako e Iesu, mo e mai he Penetekoso 33 V.N., ne fakalataha a lautolu ke he tau monuina lilifu mua ue atu ne talahau e Peteru he magaaho ne tohi e ia ki a lautolu: “Ka ko mutolu, ko e hau fifili a mutolu, ko e tau patuiki mo e tau ekepoa, ko e motu tapu, mo e motu kua moua māna.”—1 Peteru 2:9a; Ioane 8:32.
3 Ke eke mo koloa uho he Atua—ko e fakamonuinaaga homo ue atu! Mo e tau fekafekau fakauku ne toe he vaha nei he tau tama fakauku he Atua kua olioli ke he fakamonuina taha ia ki mua he Atua. Ka ko e monuina tokoluga mua ue atu ia kua eke mo tau kavega. Ne taaki e kitekiteaga ha Peteru ke he taha mai he tau mena nei he magaaho ne pehe a ia: “Kia fakakite atu e mutolu e mitaki hana ne ui a mutolu ke o mai he pouli ke he hana maama ke ofo lahi ai.”—1 Peteru 2:9e.
4. Kua fakamoli fefe he tau Kerisiano fakauku e kavega ne hau mo e ha lautolu a tokanoaaga Kerisiano?
4 Kua fakamoli nakai he tau Kerisiano fakauku e kavega nei ke fakapuloa atu e mitaki mua ue atu he Atua? E. Tutala fakaperofeta ki a lautolu ne fakauku kamata mai he 1919, ne pehe a Isaia: “Ha ha i luga ia au e Agaga he Iki ko Iehova; ha kua fakauku e Iehova au ke fakamatala e vagahau mitaki kia lautolu kua matematekelea; kua fakafano mai e ia au ke pipi e tau loto ne malipilipi, ke fakamatala ai e tokanoaaga ke he kau mahala, mo e vetevete ai a lautolu ne lili. Ke ogoogo ai e tau ke fakaalofa mai ai a Iehova, mo e aho ke lalago ai he Atua.” (Isaia 61:1, 2) He vaha nei, ko e fekafekau fakauku ne toe, kua muitua ke he tuaga hui ha Iesu, ne kua fakakite mai he tau kupu he tohiaga tapu nei kua fakahagao ki ai, kua fakapuloa fakamalolo ai ke he falu e tala mitaki he tokanoaaga.—Mataio 4:23-25; Luka 4:14-21.
5, 6. (a) Ko e heigoa e fua mai he fakamakai he tau Kerisiano fakauku ke he gahua fakamatala? (e) Ko e heigoa e tau monuina mo e tau kavega ha lautolu he moto tagata tokologa ne olioli?
5 Ko e fua he ha lautolu a gahua fakamatala fakamatafeiga, ko e moto tagata tokologa he tau mamoe ke he kitiaga he lalolagi he tau aho fakahiku nei. Kua o mai a lautolu he tau motu oti ke fakalataha mo e tau fekafekau fakauku ke fekafekau ki a Iehova, ti kua taute foki e kupu moli ke tokanoa ai foki a lautolu nei. (Sakaria 8:23; Ioane 10:16) Ke tuga a Aperahamo kua fakamatala e lautolu e fakaveaga tututonu he tua mo e maeke ke huhu atu ke he magafaoa mo e Atua ko Iehova. Mo e ke tuga a Raava ko e ha lautolu a fakapuloa he tututonu kua tuku ai a lautolu ke he fakahaoaga—ke he mena ia lautolu, ko e fakahaoaga mai ia Amaketo. (Iakopo 2:23-25; Fakakiteaga 16:14, 16) Ka e ko e tau monuina tokoluga lahi ue atu ia kua ha ha i ai foki e kavega ke fakahoko e fakamatalaaga ke he falu hagaao ke he lilifu he Atua. Ko e mena ha ia ne kitia ai e Ioane a lautolu he fakatokoluga a Iehova, “kua tauui foki a lautolu mo e leo lahi, kua pehe atu, Ko e fakamouiaga ha he Atua ha tautolu, ko ia kua nofo ke he nofoaiki, katoa mo e Punua mamoe.”—Fakakiteaga 7:9, 10, 14.
6 He tau kua mole ko e moto tagata tokologa kua molea e fa e miliona he tau numela kua, fakalataha mo lautolu e matakau fakauku ne toe he tau Kerisiano fakauku, kua foaki teitei molea e piliona he tau tula he fakapuloa atu he mitaki mua ue atu ha Iehova. Ko e mena na nai ne mua ue atu ko e fakaaoga he ha lautolu a tokanoaaga fakaagaga.
“Kia Fakalilifu ke he Patuiki”
7, 8. Ko e heigoa e kavega ke he pule he fakatufono ne kua fakamakamaka atu ke he tokanoaaga he Kerisiano, mo e ke he mena nei, ko e heigoa e mahani kelea kua lata ia tautolu ke tiaki?
7 Ko e tokanoaaga Kerisiano ha tautolu kua fakahoko ke he falu a tau kavega. Ne tuhi atu a Peteru ke he falu he tohi e ia: “Kia fakalilifu a mutolu ke he tau tagata oti kana; kia fakaalofa ke he tau matakainaga; kia matakutaku ke he Atua; kia fakalilifu ke he patuiki.” (1 Peteru 2:17) Ko e heigoa kua fakakite mai he “fakalilifu ke he patuiki”?
8 Kua hukui he “patuiki” e tau pule. He vaha nei ko e agaga nakai fakalilifu ke he pule kua tupu ke he lalolagi, ti mukamuka lahi ke pikitia ai e tau Kerisiano. Kua manamanatu foki e Kerisiano ko e ha a ia ne fakalilifu ke he “patuiki,” ha “ko e lalolagi oti ha he pule hana kua mahani kelea.” (1 Ioane 5:19) He manamanatu ke he tau kupu nei, kua tokanoa e logonaaga hana ke liuliu ke he ha tau fakatufono mo e tiaki kehe e tau tukuhau ka maeke a ia ke hola kehe mai mo e mena ia. Ka ko e mena nei kua totoko atu ke he fakamaamaaga ne talahau e Iesu ke uta “e tau mena a Kaisara, kia uta a . . . kia Kaisara.” Neke kua ha ha i ai e mena tupu he ‘fakaaoga hana tokanoaaga mo ufiufi he kelea.’—Mataio 22:21; 1 Peteru 2:16.
9. Ko e heigoa e tau kakano ua ma e omaoma ke he pule fakatufono?
9 Kua lata tonu e tau Kerisiano ke fakalilifu ke he pule mo e omaoma ki ai—pihia foki ke he puhala mitaki nei. (Gahua 5:29) Ko e ha? He 1 Peteru 2:14, 15, ne tuhi e Peteru ke he tolu e kakano he magaaho ne pehe a ia ke he tau kavana “kua fakafano mai [he Atua] ke fakahala e tau tagata mahani kelea, ka kia nava kia lautolu kua mahani mitaki.” Ko e matakutaku he fakahala ko e kakano lahi ke omaoma ke he pule. Ko e fakatuogo ha ia ke taha mai he Tau Fakamoli a Iehova ke fakahala po ke tuku ke he fale pouli he mahani vale, kaiha, po ke falu a favale! Manamanatu la ko e fefe e falu he fiafia ke fakamatala e mena pihia! Ke he taha mena, ka fakatupu e tautolu e mahani omaoma kua moua e tautolu e fakahekeaga mai he tau tagata gahua loto manamanatu mitaki. Mo e to tamai ai ki a tautolu lahi e tokanoaaga ke o atu ke fakamatala e tala mitaki. Fakalahi atu ki mua, he ‘ponoti ai e tautolu e tau gutu hepehepe he tau tagata goagoa ke he tau mahani mitaki.’ (1 Peteru 2:15e) Ko e kakano ke ua aki a nei he omaoma ke he pule.—Roma 13:3.
10. Ko e heigoa e kakano malolo ke omaoma ke he pule fakatufono?
10 Ka e ha ha i ai e kakano malolo lahi. Ne o mai ai e tau pule mai he fakaataaga he Atua. He talahau e Peteru, ko e tau takitaki fakapolitika kua “fakafano mai” e Iehova, mo e ko e “finagalo he Atua” ia ke omaoma e tau Kerisiano ki a lautolu. (1 Peteru 2:15a) Tatai ki ai, ne talahau he aposetolo ko Paulo pehe: “Ka ko lautolu ha ha i ai e pule ainei, kua kotofa he Atua a lautolu.” Ha i ai foki e ha tautolu a manamanatuaga kua fakaako he Tohi Tapu kua omoi a tautolu ke omaoma ke he tau takitaki. Kaeke ka nakai talia e tautolu ke fakalilifu a tautolu ki a lautolu, kua “totoko atu ke he pule kua totoko atu a ia ke he kotofaaga he Atua.” (Roma 13:1, 2, 5) Ko hai ha tautolu ke fia totoko atu ke he kotofaaga he Atua? Ko e fakaaoga fakahehe ha ia he tokanoaaga Kerisiano ia!
“Kia Fakaalofa ke he Tau Matakainaga”
11, 12. (a) Ko e heigoa e kavega ke ha ha he tau tagata tali tonu ne hau fakalataha mo e tokanoaaga Kerisiano? (e) Mua atu ki a hai kua lata mo e ha tautolu a loto fakaalofa, mo e ko e ha?
11 Kua pehe foki a Peteru kua lata e Kerisiano ke ha ha i ai e “fakaalofa ke he tau matakainaga.” (1 Peteru 2:17) Ko e taha a kavega nei ne hau ke he tokanoaaga he Kerisiano. Laulahi ia tautolu oti kua pota fakalataha ke he fakapotopotoaga. Moli, ko tautolu oti kua pota fakalataha ke he feoakiaga he lalolagi katoa, po ke fakatokatokaaga, he tau matakainaga. Ko e fakakite e fakaalofa ke he tau mena nei ko e fakaaoga fakamitaki he tokanoaaga.—Ioane 15:12, 13.
12 Ne tamai takitaha he aposetolo ko Paulo e matakau he tau Kerisiano ne lata pauaki mo e fakaalofa ha tautolu. Ne pehe a ia: “Kia omaoma a mutolu ke he tau takitaki ha mutolu, mo e fifitaki a mutolu ki ai; nukua leoleo a lautolu ke he tau agaga ha mutolu, to tala atu foki e lautolu e tala ki ai, kia eke ai e lautolu mo e fiafia, ka e aua neke eke mo e fakaatukehe; ha ko e mena nakai aoga ia kia mutolu.” (Heperu 13:17) Ko lautolu ne takitaki e fakapotopotoaga ko e tau momotua. Moli, ko e tau tagata tane nai nakai mea katoatoa a lautolu. Ka kua fifili a lautolu he takitakiaga ki lalo hifo he Fahi Kau Fakatufono. Ne takitaki a lautolu ke he fakafifitakiaga mo e manamanatuaga, mo e kua fifili a lautolu ke mataala tumau ke leveki e tau solu ha tautolu. Ko e mamafa ha ia he matagahua ia! (Heperu 13:7) Kua fiafia lahi e tau fakapotopotoaga ha kua ha ha i ai e tau momotua agaga mitaki, gahua auloa, mo e ha ha i ai e olioli ke gahua mo lautolu. Kua mua atu e uka kaeke ke kua nakai kau auloa e tau tagata tokotaha. Kua taute agaia ni he motua e hana a matagahua, ka e pehe a Paulo, kua taute e ia mo e “fakaatukehe.” Moli lahi nakai manako a tautolu ke taute e tau mena ke mamahi e tau momotua! Manako a tautolu ki a lautolu ke taute taha olioli he ha lautolu a gahua ke maeke ia lautolu ke ati hake a tautolu.
13. Ko e falu puhala fefe kua lata a tautolu ke kau auloa mo e tau momotua?
13 Ko e heigoa falu a puhala ke kau auloa a tautolu mo e tau momotua? Taha ko e lagomatai ke he fakameaaga he Fale he Kautu. Ko e taha ko e kau auloa ke he matagahua ahiahi atu ki a lautolu ne gagao mo e matematekelea. Kua lata ni a tautolu ke fakatumau ke malolo fakaagaga, ke nakai eke e mena ia mo kavega mamafa. Ko e taha mena aoga lahi kua lata a tautolu ke kau auloa ko e fakatumau ke he mahani mo e mea fakaagaga he fakapotopotoaga, ke he ha tautolu a mahani takitokotaha mo e hokotaki e tau mena tutupu he hala lahi mahaki ne kua iloa e tautolu.
14. Fefe ha tautolu a kau auloa fakalataha mo e ke he akonakiaga ne taute he tau momotua?
14 Ke he falu a magaaho ke fakatumau e fakapotopotoaga ke mea, kua taute ai he tau momotua ke fakaoti e fakalataha he tau tagata mahani kelea ne nakai fakatokihala. (1 Korinito 5:1-5) Kua maeke e mena nei ke puipui aki e fakapotopotoaga. Kua maeke foki ke lagomatai e tagata mahani kelea. Fa mahani, ko e tau akonakiaga pihia kua fa lagomatai e tagata agahala ke iloa e ia hana a manamanatuaga. Ka ko e heigoa mogoia ka pehe ko e kapitiaga tata po ke magafaoa hau ne fakaoti e fakalataha? Ka pehe ko e ha tautolu a matua tane po ke matua fifine po ke tama tane po ke tama fifine. Nakai kia fakalilifu e tautolu e gahuahuaaga ne kua taute he tau momotua? Moli, kua uka lahi. Ka ko e fakaaoga fakahehe ha ia e tautolu a tokanoaaga ke huhu e fifiliaga he tau momotua mo e fakatumau ke feoaki fakaagaga mo ia ne talia ke fatuaki loto kelea he fakapotopotoaga! (2 Ioane 10, 11) Ko e tau tagata oti he Atua kua talahau mitaki kakano he puhala ne kau auloa ke he tau mena tutupu. Ko e fua, ko e fakatokatokaaga ha Iehova kua nakai ilaila mai he lalolagi nakai mea nei.—Iakopo 1:27.
15. Ka taute he taha e tau hala kelea lahi mahaki, ko e heigoa hana kua lata ke taute fakamafiti?
15 Ka e kua ka taute e tautolu taha hala kelea lahi? Ne fakamaama he Patuiki ko Tavita ki a lautolu ne fiafia a Iehova he magaaho ne pehe a ia: “Ko hai kia ke hake ke he mouga a Iehova? Ko hai foki ke tu mau ke he hana haeleaga tapu? Ko ia kua lima meā, mo e loto meā, ko ia kua nakai manako lahi hana loto ke he mena fakateaga, mo e nakai omonuo pikopiko.” (Salamo 24:3, 4) Ka eke kehe falu a kakano foki ‘kua nakai mea ha tautolu a tau lima mo e loto meā,’ kua lata a tautolu ke gahua fakamafiti. Ko e ha tautolu a moui tukulagi kua tata lauia.
16, 17. Ko e ha a ia ne taute e hala kelea lahi kua nakai lata ke taute e ia he hana ni a puhala?
16 Falu kua fa mahani ke fufu e tau hala kelea lahi mahaki, kua talahaua pehe: ‘Kua fita au he fakakite ki a Iehova mo e tokihala. Ti ko e ha ke putoia e tau momotua?’ Kua ma poke matakutaku e tagata taute mena kelea ko e heigoa he tau momotua ka taute. Ka kua lata a tautolu ke manatu pete ni ko Iehova ke fakamagalo e tau hala ha tautolu kua kotofa pauaki e Ia e tau momotua ke leveki e fakameaaga he fakapotopotoaga. (Salamo 51:2) Ko lautolu ha ia ke fakamaulu, “kia fakakatoatoa ai e mitaki he tau tagata tapu.” (Efeso 4:12) Ka nakai o a tautolu ki a lautolu ka gagao fakaagaga kua tatai ni mo e nakai o ke he ekekafo ka gagao.
17 Falu ne lali ke taute ni e lautolu e tau mena tupu ha lautolu ki a lautolu ni ti iloa ai ke he tau mahina po ke tau tau he mole kua matematekelea lahi ha lautolu. Mua atu e kelea he falu ka mokulu ke he hala ke laga ua aki mo e ke laga tolu aki. Ka hoko mai e mena tupu ke he tau momotua kua eke tuai e mena ia ke liu fatiaki foki ko e tagata mahani kelea. Kua mitaki fefe ke muitua ke he poakiaga ha Iakopo! Ne tohi e ia: “Kua gagao kia taha ia mutolu? Kia ui atu a ia ke he tau patu he ekalesia, kia liogi a lautolu mo ia, mo e fakatākai a ia ke he magalolo ke he higoa he Iki.” (Iakopo 5:14) Kia o ke he tau momotua he magaaho ne maeke agaia e fakamauluaga. Ka nonofo a tautolu ke leva lahi, to mao a tautolu mo e mokulu ai ke he hala.—Fakamatalaaga 3:3; Isaia 32:1, 2.
Tauteuteaga mo e Fakafiafiaaga
18, 19. Ko e ha ne fai talahauaga mitaki ai e akoako ke he Tau Fakamoli a Iehova?
18 Lima e tau tau kua mole, ko e mekasini he lotu ko e akoako Katolika i Italia kua vagahau hagaao ke he Tau Fakamoli a Iehova.a Ne pehe a ia: “Kia au ni tokotaha, kua fiafia au ke he Tau Fakamoli a Iehova; kua talahau e au mo e fiafia. . . . Ko e tau kau ne iloa e au kua nakai fai mahani kelea, leo totonu . . . [mo e] mafanatia. A fe ka talia e tautolu e kupu moli ia kua manako ke ha ha i ai e fakakiteaga? Ko lautolu ia ne fakamatala e kupu moli kua nakai ha ha i ai e lotolotoua, namupaku, fulufagu, kiva?”
19 Hagaao ke he tau kupu nei, kua fiafia e akoako, ke he falu a mena foki, ke he tau puhala tauteute he Tau Fakamoli mo e fakakite e lautolu a lautolu. Fa mahani, ko lautolu ne feleveia e ia kua fanogonogo ke he poakiaga ne foaki he “tupa fakamoli mo e lotomatala” ke he loga e tau tau. (Mataio 24:45, NW) Kua pehe mai e Tohi Tapu ko e ‘tauteuteaga kua lata ke gali.’ (1 Timoteo 2:9, NW) Ke he tau magaaho fakateaga nei, kua lata agaia e poakiaga ia mo e tau tagata tane. Kua nakai mitaki kia ke he tau hukui he Kautu he Atua ke fakakite fakamitaki a lautolu ke he tau tagata i tua?
20. Ko e ha e Kerisiano kua lata ke manamanatu ke he hana a tau mena tui ke he tau magaaho oti?
20 Falu kua talia ke he tau fakalatahaaga mo e he gahua ke he fonua, kua lata ke fakaeneene hagaao ke he puhala tauteute, ka e logona hifo e lautolu kua nakai hagaao e tau poakiaga he Tohi Tapu ki a lautolu ke he falu a magaaho. Kua lata nakai a tautolu ke tukumuli ki tua nakai ko e tau hukui he Kautu he Atua? Moli, ha ha i ai e tau tutuaga kehekehe. Ka lagomatai a tautolu ke talaga e Fale he Kautu, kua tauteute kehe a tautolu mai he o ke he tau fakalatahaaga ke he Fale he Kautu. He tau magaaho fakafiafia ha tautolu, kua ha ha i ai e tauteuteaga ha tautolu ke he fasone okioki. Ka ko e magaaho ka kitia he falu a tautolu kua lata ke maopoopo mo e gali tumau e tau mena tui ha tautolu.
21, 22. Kua puipui mai fefe a tautolu mai he tau fakafiafia ke matematekelea, mo e he puhala fe kua lata a tautolu ke manamanatu ke he tau hatakiaga pihia?
21 Ko e taha mena foki ne kua moua lahi ke he kitiaaga ko e fakafiafia. Ko e tau tagata—mua atu ke he tau tagata fuata—ne manako ke he fakafiafiaaga. Nakai ko e hala po ke moumou magaaho ke taute e magaaho pauaki ke lata mo e magaaho okioki he magafaoa. Ne pihia foki a Iesu he uiina e ia e hana tau tutaki “ke okioki fakatote.” (Mareko 6:31) Ka e fakaeneene neke hafagi e gutuhala ma e tiakiaga fakaagaga. Kua nonofo a tautolu he lalolagi ne ha ha i ai e tau mena fakafiafia kua fakakite e mahani feuaki, kelipopo, fakamatakutaku, mo e tau taulatua. (2 Timoteo 3:3; Fakakiteaga 22:15) Ko e tupa fakamoli mo e lotomatala kua mataala lahi ke he tau matematekelea pihia mo e noa kua hataki a tautolu mai ia lautolu. Manamanatu nakai a koe ko e tau fakamanatuaga nei kua fakalavelave aki hau a tokanoaaga? Po ke kua fiafia lahi mahaki a koe ke he fakatokaaga ha Iehova ha kua leveki fakalahi hagaao ki a koe ke noa mo e tamai e puipuiaga ke he hau a manatu?—Salamo 19:7; 119:95.
22 Kia nakai nimo pete ni ko e mena hau ha tautolu a tokanoaaga mai ia Iehova ka e kavega agaia ni a tautolu ke he puhala ke fakaaoga e tautolu. Ka tiaki e tautolu e tau poakiaga mitaki mo e taute e tau fifiliaga hepe, nakai tuku e tautolu ke he falu a tagata. Ne pehe e aposetolo ko Paulo: “To takitokotaha a tautolu mo e talatala atu hana mahani ke he Atua.”—Roma 14:12; Heperu 4:13.
Kumi ke he Tokanoaaga he Tau Fanau he Atua
23. (a) Ko e heigoa e tau fakamonuinaaga fakalataha ke he tokanoaaga kua olioli a tautolu he magaaho nei? (e) Ko e heigoa e tau fakamonuinaaga kua amaamanaki lahi a tautolu ki ai?
23 Ko tautolu ko e tau tagata monuina moli. Kua tokanoa mai he lotu fakavai mo e taulatua. Fakaaue ke he poa lukutoto kua maeke a tautolu ke o atu ki a Iehova mo e tau loto mea, tokanoa ke he puhala fakaagaga mai he fakatupaaga he hala mo e mate. Ti tata lahi mai to “fakakite mai e tau tama he Atua.” I Amaketo, ko e tau matakainaga ha Iesu ke he ha lautolu a fakahekeaga ke he lagi ka fakakite ke he tau tagata ko e tau tagata moumou fi ha Iehova. (Roma 8:19; 2 Tesalonia 1:6-8; Fakakiteaga 2:26, 27) Ke he magaaho fakamui, ko e tau tama he Atua nei ka fakakite tuga e tau lala ke he tau fakamonuinaaga kua tafe mai he nofoaiki he Atua ke he tau tagata. (Fakakiteaga 22:1-5) Hau fakahaga ko e fakakite mai e tau tama he Atua nei kua fua mai he fakamonuinaaga he tau tagata fakamoli fakalataha mo e tokanoaaga mua ue atu ke he tau fanau he Atua. Kua manako nakai a koe ke he magaaho ia? Ti kua lata ni a koe ke fakaaoga fakamitaki e tokanoaaga. Fakatupa ke he Atua mogonei, ti to olioli ke he tokanoaaga ma e tumau tukulagi!
[Tau Matahui Tala]
a Kua mataaki ke he mai he akoako e talahauaga nei, ha kua lahi e totoko.
Puha Fakamanatu
◻ Fakaheke fefe e lautolu ne fakauku mo e tau mamoe kehe a Iehova?
◻ Fakalilifu fefe he tau Kerisiano e tau pule he lalolagi nei?
◻ Ke he tau puhala fe ne kau auloa e tau Kerisiano mo e tau momotua?
◻ Hagaao ke he mena tui, ko e ha kua lata e Tau Fakamoli a Iehova ke kehe mai he tokologa he lalolagi?
◻ Ko e heigoa kua lata ia tautolu ke tiaki he magaaho ke he fakafiafiaaga?
[Fakatino he lau 28]
Kua lata pauaki e tau momotua ke ha ha i ai e fakaalofa mo e kau auloa ha tautolu
[Tau Fakatino he lau 29]
Ko e mena tui he Kerisiano kua lata ke maopoopo mo e gali, mo e lata tonu mo e magaaho