‘Kia Fakakite Hau a Tolomakiaga’
“Ka kua lahi au, ti toka ai e tau mahani he tama tote.”—1 KORINITO 13:11.
1. Ne talahaua mitaki mai fefe he tutupuaga e ofoofogia he tufugatiaaga?
MAI he fufua tote lahi mahaki kua maeke ni hokoia ke kitia i lalo he maikorotikopu, to tupu e tafua mo mena moui kua molea e tolugofulu e mita he loa mo e kua molea e 80 he tau tane he mamafa. Ti pihia foki e sekuoia lahi mahaki, ne tupu mai he taha he tau tega tote lahi mahaki, to tupu hake ai ke molea e 90 e mita he tokoluga. Kua moli, ko e tutupuaga ko e taha mai he tau mena ofoofogia he moui. Tuga he talahau mai he aposetolo ko Paulo, kua maeke a tautolu ke to mo e fakamalu, ka ko e “Atua ni kua fakatutupu ai.”—1 Korinito 3:7.
2. Ko e faga tutupuaga fefe ne talahau tuai mai he Tohi Tapu?
2 Ka e pete ni ia, kua ha ha i ai, e taha faga tutupuaga kua fakaofogia foki. Ko e mena ne talahau tuai mai he perofeta ko Isaia: “Ko e tokogahoa to eke ia mo tokoafe, mo e maga fakateaga to eke ia mo motu malolo; ko au ko Iehova to fakaave au ke eke ke he hana ni a aho.” (Isaia 60:22) Kua hagaao e perofetaaga nei hagaao ke he tutupuaga he tau tagata he Atua, mo e kua hane taute e fakamoliaga lahi mahaki he vaha ha tautolu.
3. Kua fakakite mai fefe he hokotaki he fekafekauaga he tau 1991 kua fakamafiti hake e Iehova e gahua he tau tagata hana?
3 Ko e hokotaki he fekafekauaga he tau 1991 ke he gahua he Tau Fakamoli a Iehova he lalolagi lahi ne fakakite kua hoko e numela he tau tagata fakailoa he Kautu ke he tapunu fou ko e 4,278,820, mo e katoatoa ai e 300,945 he tau tagata ne papatiso he tau ia. Ha kua tokologa a lautolu ne o mai fou ki loto, ne fakatu ai 3,191 e tau fakapotopotoaga fou, fakalataha mo e tau takaiaga fou mo e tau fakatokaaga fahi motu kua lata ki ai. Kua molea atu he valu e tau fakapotopotoaga fou he aho, kua teitei ke taha e takaiaga fou he tau aho ke ua aki oti kana. Ko e tutupuaga homo ue atu! Kua maaliali ai, kua fakamafiti hake e Iehova e tau mena, mo e kua ha ha hana fakamonuinaaga i luga he tau laliaga he tau tagata hana.—Salamo 127:1.
Magaaho ke Kumikumi a Koe ki a Koe
4. Ko e heigoa e tau huhu kua lata ke manamanatu ki ai he onoono a tautolu ke he vaha i mua?
4 Pete ni kua fakamafana lahi e loto ka kitia ai, kua ta mai foki he fakamonuinaaga nei e tau matagahua pauaki. To lahi nakai e tau tagata loto motua takitokotaha kua manako ke leveki e tau mena kua lata fakaagaga he tau tagata fou oti nei? He onoono atu a tautolu ki mua, kua uka lahi ke manamanatu ke he numela he tau tagata foafoa, tau fekafekau lagomatai, tau momotua, mo e tau leveki faifano kua lata ke leveki e tutupuaga mo e fakalaulahiaga, ti pihia foki e numela he tau tagata gahua noa kua lata ma e tau la ofisa mo e tau Kaina Nonofo he Peteli he lalolagi katoa, ke lagomatai e gahua ia. To o mai i fe e tau tagata tokologa lahi nei? Kua nakai fakauaua kua lahi mahaki e heleheleaga. Ka e ko hai he vaha nei kua ha ha he tau tutuaga ke leveki e tau tagata gahua oti kana kua lata ke oko mai e heleheleaga ia?—Mataio 9:37, 38.
5. Kua fefe e falu tutuaga ne ha ha i ai he falu matakavi ha ko e tutupuaga mafiti?
5 Kua fita he hokotaki mai, tuga a nei, koe he falu matakavi he lalolagi, kua ha ha i ai e tau fakapotopotoaga kua tokologa ti teau e tau tagata fakailoa he Kautu ka e tahamaka e motua mo e taha po ke ua e tau fekafekau lagomatai ne fekafekau fakalataha ki ai. He falu a magaaho ne taha ni e motua ne fekafekau ke he ua e tau fakapotopotoaga. He falu matakavi kua lahi mahaki e manako ma e tau fekafekau Kerisiano kua lata ke taute e tau fakaakoaga Tohi Tapu he loto kaina ti kua fakatalitali e tau tagata fou. He falu fahi, kua mafiti lahi e tau fakapotopotoaga fou ne fakatutu ti kua eke ni ke tolu, fa, po ke lima foki e tau fakapotopotoaga ke he taha e Fale he Kautu ka fakaaoga auloa. Po kua liga fita he kitia e koe e tutupuaga pehe nei he maagamotu hau.
6. Ko e ha ko e magaaho tonu ki a tautolu ke kumikumi hifo a koe ki a koe?
6 Ko e heigoa kua talahau fakamua mai ki a tautolu? Ha ko e onoonoaga ke he tau magaaho, kua lata a tautolu oti ke kumikumi hifo ke he ha tautolu a tau tutuaga ke kitia kaeke kua fakaaoga fakamitaki nakai e tautolu e tau magaaho ha tautolu mo e tau koloa ke maeke ai ke gahua atu ke he manako ia. (Efeso 5:15-17) Ne tohi atu e aposetolo ko Paulo ke he tau Kerisiano Heperu he senetenari fakamua: “Ha ko e mena ane mai eke a mutolu mo tau akoako po kua lata ai ha kua leva, ka e aoga ni kia mutolu ke liu foki fakaako e taha kia mutolu ke he tau kupu he kamataaga he kupu he Atua; kua eke a mutolu tuga na lautolu kua kai huhu ka e nakai ko e tau mena kakano.” (Heperu 5:12) Tuga he fakakite mai he tau kupu ia, kua lata foki e tau Kerisiano takitokotaha ke tutupu. Mo e ko e mena hagahaga kelea moli ke fakatuatua e taha he vaha tama tote fakaagaga ka e nakai fakaholo atu ke loto motua faka-Kerisiano. Ke fakatatai mo e mena nei, ne ole fakamakamaka mai a Paulo ki a tautolu: “Kia kamatamata e mutolu a mutolu, po kua ha ha i ai a mutolu ke he tua; kia kumikumi hifo a mutolu kia mutolu.” (2 Korinito 13:5) Kua kumikumi hifo nakai a koe ki a koe ke kitia kua fai tupu fakaagaga nakai tali mai he magaaho he papatisoaga hau? Po ke hane tu na koe he mena taha? Ka e maeke fefe ke iloa he taha?
“Tau Mahani he Tama Tote”
7. Ke fakakite e fakatolomakiaga fakaagaga, ko e heigoa e mena kua lata ia tautolu ke taute?
7 “Ko e vaha tote au ne vagahau au poke tama tote, ne manamanatu au poke tama tote, ne fakafili au poke tama tote; ka kua lahi au, ti toka ai e tau mahani he tama tote,” he talahau he aposetolo ko Paulo. (1 Korinito 13:11) Ke he fakalaulahiaga fakaagaga, mai he taha magaaho, ne tuga e tau fanau a tautolu oti kana ke he tau manamanatu mo e tau mena ne taute e tautolu. Ka e pete ni ia, ke fakakite e fakatolomakiaga, kua lata a tautolu ke tiaki e “tau mahani he tama tote,” tuga ne talahau e Paulo. Ko e heigoa a falu he tau mahani nei?
8. Hagaao ke he tau kupu a Paulo ia Heperu 5:13, 14, ko e heigoa e taha mahani he tama mukemuke fakaagaga?
8 Fakamua, kia mailoga e tau kupu a Paulo ia Heperu 5:13, 14: “Ha ko lautolu oti kua kai huhu, nakai maama a lautolu ke he kupu he tututonu; ha ko e tau tama mukemuke a lautolu. Ka ko e tau mena kakano, kua lata ia mo e tau tagata motua, ko lautolu ni kua mahani he ako mua ai ke mailoga e tau mena mitaki mo e tau mena kelea.” Kua ‘maama’ nakai e koe ‘e kupu he tututonu’? Kua iloa lahi nakai e koe e Kupu he Atua, ko e Tohi Tapu, ke maeke lahi ke fakaaoga ke “mailoga e tau mena mitaki mo e tau mena kelea”? Ne pehe a Paulo kua maeke e tau tagata loto motua ke taute pihia ha kua kai tumau e lautolu e “tau mena kakano.” He pihia, ka manako po ke fia kai mena kai fakaagaga kakano e taha ko e fakakiteaga mitaki naia po kua tupu nakai e taha fakaagaga po ke tumau agaia ko e tama mukemuke fakaagaga.
9. Ko e fakakiteaga fefe e fia kai fakaagaga he taha ke he fakalaulahiaga fakaagaga?
9 Ti kua fefe mogoia, e fia kai mena fakaagaga hau? Ti kua onoono fefe a koe ke he tau mena kai fakaagaga loga lahi ne foaki tumau mai e Iehova ne puhala mai he tau tohi ne fakave ke he Tohi Tapu mo e tau feleveiaaga Kerisiano mo e tau toloaga? (Isaia 65:13) Kua nakai fakauaua ne loto olioli lahi mahaki a koe kaeke kua fakatoka mai he tau fonoaga fahi motu takitaha he tau e tau tohi fou. Ka ko e heigoa ne taute aki e koe ki a lautolu ka hoko a koe ki kaina? Ko e heigoa ka taute e koe he magaaho ka hoko atu e fufuta mekasini fou he Kolo Toko po ke Awake! (Ala!)? Kua fakaaoga magaaho nakai a koe ke totou e tau tohi ia, po kua fukefuke ni e koe ke onoono ke he tau matapatu mena ti lafi a lautolu ke he falu i luga he fata pepa hau? Kua lata foki e tau huhu pihia ke huhu atu hagaao ke he tau feleveiaaga Kerisiano. Kua fano tumau nakai a koe ke he tau feleveiaaga oti? Kua tauteute tuai nakai a koe mo e fai vala ka tali ia lautolu? Kua kitia maali kua veveli tuai falu ke he tau aga kai fakaagaaga kelea, he totou holo mo e tuga ko e kai mena fakatepetepe. Kua kehe ha e mena ne taute he salamo, ne pehe mai a ia: “Kua lahi ni haku a manako ke he hāu a fakatufono; kua manamanatu au ki ai ke he aho oti.” Ke lafi atu, ne pehe e Patuiki ko Tavita: “To fakaheke atu au kia koe ke he fakapotopotoaga lahi, mo e lologo atu kia koe ki mua he motu ne tokologa.” (Salamo 35:18; 119:97) Kua maaliali, ko e tokolugaaga he fakaaue ha tautolu ke he tau mena fakaagaga ne foaki mai ko e fakakiteaga naia ke he ha tautolu a fakalaulahi fakaagaga.
10. Ko e heigoa e mahani he tama mukemuke fakaagaga ne fakakite mai ia Efeso 4:14?
10 Ne fakakite mai e Paulo e taha mahani he tama mukemuke fakaagaga he magaaho ne hataki mai a ia: “Kia nakai tuai eke a tautolu mo tau tama ikiiki kua hikihikifano, mo e havilia he tau matagi oti he tau kupu fakaako, ko e pikopiko he tau tagata ke he tau lagatau kelea kua taute ke fakahehe ai.” (Efeso 4:14) Tuga he iloa moli he tau mamatua, ne fia iloa mena e tau fanau ke he tau mena oti. Ke he taha puhala ko e mahani aoga a nei ha kua maeke ia lautolu ke kumikumi mo e ke ako ti holo atu fakahaga ke eke mo tau tagata loto motua. Ka e pete ni ia, kua ha ha i ai e hagahaga kelea ka mukamuka lahi a lautolu ke hikihikifano ti holo atu he taha mena ke he taha mena. Ka ko e mena kelea lahi, ha kua nakai lahi e tau mena kua iloa, ne fa mahani mau e fia iloa mena nei ke takitaki a lautolu ke he tau lekua kelea lahi, ti eke foki ke fakahagahaga kelea a lautolu mo e falu. Kua moli foki e mena nei ke he tau tama mukemuke fakaagaga.
11. (a) Ko e heigoa ne toka he loto a Paulo he magaaho ne talahau e ia e tau kupu “tau matagi oti he tau kupu fakaako”? (e) Ko e tau ‘matagi fe’ ne fehagaaki mo tautolu he vaha nei?
11 Ko e heigoa mogoia kua ha ha he loto a Paulo he magaaho ne pehe a ia ne havilia e tau tama mukemuke fakaagaga he “tau matagi oti he tau kupu fakaako”? Hanai, ko e “matagi” ne fakaliliu mai he kupu Heleni aʹne·mos, kua hagaao ki ai e International Critical Commentary (Talahauaga Fetoko he Lalolagi Katoa) he kitia kua tuga moli ko e “fifili ha kua lata lahi ke he manatu hikihikifano.” Ne fakakite fakamitaki mai he tau kupu ne matutaki atu a Paulo ki ai, “ko e pikopiko he tau tagata ke he tau lagatau kelea.” Ko e kupu “lagatau kelea” he vagahau fakamua ne matapatu ke kakano “mata pele lulululu” po ke “pele mata pele lulululu,” kua pehe e mena ia, ko e pele fetalia. Ko e manatu hanai ko e fehagaaki tumau a tautolu mo e tau manatu fou mo e tau foliaga kua liga ne tuga ko e nakai kelea, kamatamata, ti kua tuga ko e aoga foki. Kua hagaao fakamua e tau kupu a Paulo ke he tau mena ne hagaao ke he tua ha tautolu—tau laliaga he fakafetuiaga lotu, tau matagahua fakakaufakalatahaaga mo e fakapolitika, mo e tau mena pihia. (Fakatatai 1 Ioane 4:1.) Ka kua tumau foki e mahani hagaao ke he tau foliaaga kehekehe ne hikihikifano tumau mo e tau fasone he lalolagi—tau tufuga tauteute, fakafiafiaaga, tau mena kai, ke he maloloaga he tino po ke tau puhala faofao tino, mo e tau mena pihia foki. Ha kua nakai fa mahani ke he tau mena ia mo e fifiliaga mitaki, to liga hikihikitakina lahi e tama mukemuke fakaagaga ha ko e tau mena ia mo e liga to tauhele ti nakai fakatolomaki fakaagaga mo e nakai fakamoli a ia ke he tau mena aoga lahi kua lago ke he Kerisiano.—Mataio 6:22-25.
12. Ne kehe fefe e tau fanau ikiiki mai he tau tagata lalahi hagaao ke he matagahua?
12 Ko e taha mahani foki he tau fanau ikiiki, kua lata tumau a lautolu ke moua lagomatai mo e levekiaga. Kua nakai iloa po ke nakai loto manamanatu a lautolu ke he tau matagahua; ko e vaha tama tote ko e magaaho he moui kua teitei ko e tau pele fulufuluola e tau mena oti. Tuga he talahau mai e Paulo, ‘ne vagahau poke tama tote, manamanatu poke tama tote, fakafili poke tama tote.’ Ne manamanatu a lautolu to leveki he falu a lautolu. Kua maeke foki ke talahau e mena taha ia hagaao ke he tama mukemuke fakaagaga. He magaaho ka taute he tagata fou e lauga Tohi Tapu fakamua hana po ke kamata laia ke he fonua he fekafekauaga, ne loto fiafia lahi e tau mamatua fakaagaga ke taute e tau mena oti ke lagomatai atu. Ko e heigoa e mena ka tupu kaeke kua tua tumau e tagata fou ke he lagomatai ia mo e kitia moli kua nakai maeke ke talia e matagahua ke leveki ne ia a ia? Kua maaliali tuai ko e fakakiteaga a ia ko e nakai fakagahuahua e ia e tau mena ne iloa.
13. Ko e ha kua lata e tau tagata takitokotaha ke fua ne ia hana kavega?
13 Ke he mena nei, kia manatu e tomatomaaga he aposetolo ko Paulo, pete ni ia kua lata a tautolu ke “fua tumau e tau kavega mamafa he taha mo e taha,” ka e “to igatia e tagata ke fua ne ia hana kavega.” (Kalatia 6:2, 5, NW) E moli, kua fakamole magaaho mo e fai laliaga ke ako a taha ke hahamo ne ia hana a tau matagahua Kerisiano, mo e liga kua kakano ke taute e tau poa ke he falu a mena. Ka e pete ni ia, kua eke ni ko e mena hehe kelea lahi ke fakaata e ia a ia ke putoia lahi ke he tau mena pele fakafulufuluola he moui, ko e tau fakafiafiaaga tino, tau o fenoga, tau tufugaaga po ke eke foki ko e tau tutuliaga gahua tupe nakai aoga, ti kua tu noa e taha he kauhala, tuga kua eke ke pihia, mo e nakai manako ke tupu ki mua hana vala ka taute he gahua taute tutaki po ke foli ke fakatolomaki fakaagaga mo e ke he matagahua. “Kia eke a mutolu mo tau tagata omaoma ke he kupu, ka e aua neke fanogonogo hokoia ki ai, ke fakahehe ai e mutolu a mutolu,” he talahau mai he tutaki ko Iakopo.—Iakopo 1:22; 1 Korinito 16:13.
14. Ko e ha kua nakai lata a tautolu ke mamakona ai he fakakite e tau mahani he tama mukemuke fakaagaga?
14 E, kua loga e tau mahani kua mukamua lahi ke kitia ne fakakehe aki e tama mai he tagata lahi. Ka e pete ni ia, tuga he talahau e Paulo, ko e mena aoga lahi ni, ke tutupu hake a tautolu mo e tiaki fakahaga e tau mahani he tama mukemuke mo e tupu hake. (1 Korinito 13:11; 14:20) Neke eke ai a tautolu ke liga auhia fakaagaga. Ka e maeke fefe e taha ke taute e fakalaulahiaga? Kua putoia e heigoa ke fakatumau e tutupuaga fakaagaga ke loto motua?
Kua Eke ke Fakakite e Tolomakiaga
15. Ko e heigoa e tau matapatu lakaaga i loto he fakapapaleaga he tutupuaga?
15 Ne hoko fefe e tutupuaga i loto he lalolagi he tufugatiaaga mena moui? Ne fakamaama mai he The World Book Encyclopedia (Ko e Tohi Fakamaama Mena he Lalolagi) “ko e tau mena takitaha ne kamata mai e moui he tegatega pokopoko taha.” “Kua uta ki loto he tegatega pokopoko e tau koloa mo e fakafaliu a lautolu ke he tau valavala mena talaga kua lata ke fakatupu. Ti kua, tupu e tegatega takitaha, mai i loto. Kua maeke he tau tegatega nei ke fakalahi atu mo e vehevehe ke tanaki hake e falu tegatega. Ko e fakagahuaaga ke talaga, fakalahi atu, mo e vehevehe e tutupuaga.” Ko e matapatu mena kua aoga ke mailoga he mena nei ko e tutupuaga ne hoko i loto. He magaaho ka uta ki loto e tau huhua kakano tonu, ti tavili, mo e fakaaoga, ti ko e tutupuaga e fua ne moua. Kua kitia maaliali e mena nei he tama tote ne fanau fou. Tuga he iloa e tautolu, he uta fakahaga tumau ki loto he tama fou e tau mena kai ne taute fakamitaki pauaki, mo e huhu, kua kakano lahi e gako mo e mena umiti, ko e tau koloa kua lata ma e tupuaga. Ko e fua? Ko e lahi katoatoa he tutupuaga he mamafa mo e tino loa he tama mukemuke he tau fakamua kua nakai maeke ai ke fakatatai ke he tupuaga mau he falu tau he hana a moui.
16. Ko e vahega tutupuaga fe, kua kitia i loto he laulahi he tau tagata fakaako Tohi Tapu fou, mo e kua maeke he ha e mena ia?
16 Kua lahi e mena kua maeke ia tautolu ke ako mai he fakapapaleaga he mena moua noa nei he tutupuaga kua maeke ia tautolu ke fakaaoga ke he ha tautolu a fakalaulahiaga fakaagaga mai he tau matapatu mena ti loto motua. Ke fakamua aki, kua aoga lahi e fakaholoaga fagai tumau. Kia liu manamanatu ke he magaaho ne kamata fakamua a koe ke fakaako e Tohi Tapu. Kaeke kua tuga e falu a koe, kua liga ne nakai iloa e koe ha mena he Kupu he Atua. Ka e he fahi tapu ke he taha fahi tapu ne tauteute tuai e koe hau a tau fakaakoaga mo e ti taute ai e fakaakoaga Tohi Tapu pauaki hau, he magaaho ku ia, kua eke a koe ke maama e tau matapatu fakaako oti kana he tau Tohiaga Tapu. Ko e mena ia, liga kua lata ia koe ke tali tonu moli, ko e tutupuaga lahi mahaki, mo e kua pihia ha ko e fua he fagai tumau ke he Kupu he Atua!
17. Ko e ha kua aoga lahi mahaki e fakaholoaga tumau he fagaiaga fakaagaga?
17 Ka kua fefe mogoia he magaaho nei? Kua muitua agaia nakai a koe ke he fakaholoaga he fagaiaga tumau? Kua nakai lata a taha ke manamanatu ha kua papatiso tuai a ia, kua nakai tuai lata ke fakaako tumau mo e ke he puhala fakatokatoka ke uta ki loto e tau mena kai fakaagaga huhua mitaki. Pete foki, ko e Kerisiano loto motua ne gahua leveki a Timoteo, ne ole fakamakamaka a Paulo ki a ia: “Kia manamanatu a koe ke he tau mena na, kia fakamahani a koe ki ai; kia kitia ai he tau tagata oti hāu a mafiti.” (1 Timoteo 4:15) Kua lata lahi ha, a tautolu takitokotaha ke taute e mena ia! Kaeke kua fiafia a koe ke fakakite mai hau a fakatolomakiaga fakaagaga, kua aoga lahi mahaki e tau laliaga pihia.
18. To eke ke fakakite mai fefe e fakatolomakiaga fakaagaga he taha?
18 Ke fakakite e fakatolomakiaga kua nakai kakano ke taute e laliaga pauaki ke fia kitia e fakakitekiteaga he tau mena ne iloa he taha po ke lali ke nava mai e falu. Ne talahau e Iesu: “Ko mutolu, ko e maama he lalolagi a mutolu. Nakai maeke ke galo e māga kua fakatu i luga he mouga” mo e, “ha ko e loga he tau mena he loto ke vagahau mai ai e gutu.” (Mataio 5:14; 12:34) Ka puke e tau loto ha tautolu mo e tau loto manamanatu ke he tau mena mitaki he Kupu he Atua, kua eke ai ni a tautolu ke fakakite e mena nei mai he tau mena ne taute mo e talahau e tautolu.
19. Kua lata ia tautolu ke fakamakamaka ke taute e heigoa hagaao ke he fakalaulahiaga fakaagaga ha tautolu, mo e ko e heigoa e fua ne loto ki ai?
19 He pihia, ko e huhu hanai: Kua fakaako tumau nakai a koe ke he Tohi Tapu mo e fakalataha atu ke he tau feleveiaaga Kerisiano ke uta ki loto e tau koloa huhua kakano kua maeke ke fakalagalaga e tupuaga fakaagaga i loto ia koe? Kia nakai eke kua mamakona ai ni ke eke mo tagata kitekite fakalogologo ka hagaao ke he tupuaga fakaagaga. Kia taute e tau lakaaga mitaki ke iloa moli kua taute a koe ke fakaaoga katoatoa e tau mena kai fakaagaga loga lahi foaki mai e Iehova. Kaeke ko koe e taha ‘kua fiafia ke he fakatufono a Iehova, ti manamanatu a koe ke he tau fakatufono hana ke he aho katoa mo e po,’ ti kua maeke ai mogoia ke pehe hagaao ki a koe: “To lata a ia mo e akau kua to ke he tapa he tau vai lele, to fua mai ke he hana tau fua ke he tau ni hana; to nakai mokulu foki hana tau lau, to monuina foki a ia ke he tau mena oti kana ke eke e ia.” (Salamo 1:2, 3) Ko e heigoa mogoia kua maeke ke taute ke iloa moli to fakatumau a koe ke taute e fakatolomakiaga fakaagaga? To fakatutala a tautolu ke he mena nei i loto he tala ka matutaki mai.
Maeke Nakai ia Koe ke Tali?
◻ Ko e ha ko e magaaho tonu ke tivi ha tautolu a fakatolomakiaga fakaagaga?
◻ Ne fakafetui fefe e tupuaga fakaagaga ke he manako ke kai fakaagaga?
◻ Ko e heigoa e kakano he “tau matagi oti he tau kupu fakaako”?
◻ Ko e ha kua lata e tau tagata takitaha ke fua ne ia hana kavega?
◻ Ne maeke fefe ke moua e fakatolomakiaga fakaagaga?
[Fakatino he lau 21]
Kua fakaaoga magaaho nakai a koe ke totou e tau tohi ne fakave ke he Tohi Tapu?