Tau Fuata—Ko e Heigoa ha Mutolu a Tutuliaga?
“Kia hola kehe mo e tau manako lahi he tau fuata, ka kia tutuli e tututonu, mo e tua, mo e fakaalofa, katoa mo e mafola mo lautolu kua tauui ke he Iki mai he loto meā.”—2 TIMOTEO 2:22.
1. Ko e heigoa ha tautolu a amaamanakiaga ma e tau tama fuata mui kua ha ha i ai ia tautolu?
“TAU FAKAMOLI A IEHOVA,” he fakailoa he tohi tala faka-Penetekoso a Suitene ko e Dagen (Ko e Aho), “ne taute ai e matakau ne mua he tokologa e tau tagata fou he tau tau takitaha mo e lahi mahaki e matakutaku he tau fuata.” Neke ko koe foki taha vala he matakau nei, he tau fuata mea mo e matakutaku ke he Atua. Neke tupu hake a koe he puhala Kerisiano mai he tote, po ke liga logona mo e fanogonogo ni e koe a koe ke he fekau he Kautu. Ko e puhala fe ni, kua fiafia a mautolu ke ha ha i ai a koe ke he vahaloto ha mautolu. Mo e ko e amaamanakiaga ha mautolu to tutuli e koe e fakaakoaga ke he tututonu, tuga e tau fuata Kerisiano fakamoli he senetenari fakamua. Ko e tau kupu he aposetolo ko Ioane kua fakamaama fakamitakiaki a koe: “Nukua malolo a mutolu, kua toka mau foki e kupu he Atua ki loto ia mutolu; kua kautu foki a mutolu kia ia ne mahani kelea.”—1 Ioane 2:14.
2. Ko e heigoa e tau matapatu mena ne fakaukaaki e tutuli he fakaakoaga tututonu he magaaho ne “uho e fuata”?
2 Tokologa—e ko e laulahi—he tau fuata Kerisiano he vaha nei kua puipui a lautolu mai he tau mena tauhele he lalolagi. Ti moua ai e koe, mogoia, ko e tumau ke he tau fakaakoaga pihia kua nakai mukamuka. Kaeke ke hokotia a koe ke he “uho he fuata,” to logona e koe e mapeehi he tau logonaaga he loto fou mo e malolo lahi. (1 Korinito 7:36, NW) He magaaho taha ia ni, to logona ai e koe e tau kavega mamafa he tau kotofaaga he aoga, he kaina, mo e he fakapotopotoaga. Ti ha ha i ai foki e tauhele mai ia ia ko Satani ko e Tiapolo. Kua lali fakalahi ke fakahehe fakatokologa, kua moua e ia a lautolu ne liga nakai fahia ke totoko—tuga ni he taute e ia he katene ko Etena. He magaaho ia, ne nakai hagaao hana a tau lagatau fakahehe, ke he tagata fakamua, mo e lotomatala lahi ko Atamu, ka e hagaao ke he tagata fakamui mo e fifine nakai lotomatala ko Eva. (Kenese 3:1-5) Ko e tau senetenari fakamui, ne fakaaoga e Satani e tau lagatau taha ia ni kehe fakapotopotoaga nakai lotomatala i Korinito. Ne pehe mai e aposetolo ko Paulo: “Ka kua matakutaku au, neke tuga he fakavai he gata a Eva ke he hana lagatau, ti pihia foki he fakakelea e ia ha mutolu a tau manatu kia nakai fakamoli kia Keriso.”—2 Korinito 11:3.
3, 4. Ko e heigoa e falu he tau kanavaakau ne fakaaoga e Satani ko e Tiapolo ke fakaheheaki e tau tama fuata mui, mo e ko e heigoa e tau mena ne fa moua?
3 Ko e vaha nei, ko e tau mamatua Kerisiano ha mutolu kua matakutaku pihia foki ki a mutolu. Nakai manatu a lautolu kua manako a koe ke mahani kelea, ka e iloa e lautolu mai he lotomatala ko e tau tagata fuata mui kua nakai fahia pauaki ke totoko ke he “tau lagatau” ha Satani. (Efeso 6:11, matahui tala) Mamao mai he fakamatakutaku, ne taute e tau matahele ha Satani ke manaia lahi mo e manako ki ai. Ko e televisoni kua fakakite fakamitakiaki e muhu koloa he tino, maama mitaki he feuaki, fakakite he mahani favale, mo e tau agaga temoni tuga e fakafiafia tino. Ko e tau loto manamanatu mui kua fakapukeaki e tau mena ne nakai fai mena ka kua ‘moli, gali, tonu, mea, mo e fulufuluola.’ (Filipi 4:8) Ko e malolo he tau atu taha ko e taha kanavaakau malolo ha Satani. Po ke tuku he atu ia a koe ke he malolo lahi ke hiki a koe ke he ha lautolu a tau puhala momoui, tau tapulu, mo e mahani maopoopo. (1 Peteru 4:3, 4) Ko e tagata tane tohi tala nusipepa ko William Brown ne fakakite: “Kaeke ke ha ha i ai ha Atua taha he lalolagi ma e tau fuata tote ko e Atua tatai ni. . . . Ko e kehe ma e atu taha he tau fuata tote ko e malaia ka tupu kua mua he kelea ke he mate.” Taha e tama fifine Fakamoli i Italia ne fakakite: “Ne ma au ke tala age ke he tau kapitiga aoga haku ko e Fakamoli au. Ha kua iloa e au kua nakai fiafia a Iehova ki a au, ne momoko mo e loto malipilipi au.”
4 Aua neke taute ha hehe—na manako a Satani ke futiaki a koe ke he hau a moumouaga. Tokologa e tau fuata mui he lalolagi ka mamahi ha ko e galo he ha lautolu a tau momoui he matematekelea lahi ha kua fakaata e lautolu a lautolu ke fakahehe. (Esekielu 9:6) Ko e puhala ni ke hao mai ke tutuli e tau mena kua hako.
Puipui Mai he Tau Fakalatahaaga Kelea
5, 6. (a) Ko e fuata tane mui ko Timoteo ne feleveia mo e heigoa e tau totoko he nofo i Efeso? (e) Ko e heigoa e tau fakatonuaga ne age e Paulo ma Timoteo?
5 Ko e agaga a ia he lagomataiaga he aposetolo ko Paulo ne age ke he tagata fuata mui ko Timoteo. Kua molea e hogofulu tau, a nei he fakalataha ai a Timoteo mo e aposetolo ko Paulo he hana tau fenoga misionare. Ko e magaaho ne fekafekau ai a Timoteo he motu pouliuli i Efeso, ko Paulo hane nofo he falepuipui i Roma ke fakatali he hana a fakahala. Ha kua tata mai e magaaho he hana a mate, kua nakai fai fakauaua ne tupetupe a Paulo ko e fefe la e fenoga ha Timoteo. Ko Efeso ko e motu ne talahaua lahi he hana a muhu koloa, mahani feuaki, mo e tau fakafiafia tino fakateaga, mo e kua nakai tuai fai lagomataiaga a Timoteo mai he hana a takitaki lotomatala fakahele ko Paulo.
6 Ko e mena ia ne tohi ai e Paulo e tau mena nei ke he hana “tama fakahele”: “Ka e ha ha he fale lahi nakai kuenaia e tau kapiniu auro mo e ario, ka e katoa foki mo e tau kapiniu lakau mo e kelekele, kua lilifu falu, ka e fakakelea falu. Hanai, kaeke ke fakamea e taha a ia ni mai he tau mena ia, ti eke ai a ia mo kapiniu lilifu, kua fakatapu, kua aoga foki mo e Iki, kua taute mo e tau gahua mitaki oti. Kia hola kehe mo e tau manako lahi he tau fuata, ka kia tutuli e tututonu, mo e tua, mo e fakaalofa, katoa mo e mafola mo lautolu kua tauui kehe Iki mai he loto meā.”—2 Timoteo 1:2; 2:20-22.
7. (a) Ko e heigoa e tau ‘kapiniu nakai lilifu’ ne fakailoa e Paulo? (e) Fakaaoga fefe he tau fuata he vaha nei e tau kupu ha Paulo?
7 Ko e mena ia ne puipui ai e Paulo a Timoteo ha ko e mena pihia foki ke he tau matakainaga Kerisiano kua ha ha i ai e ‘tau kapiniu nakai lilifu’—ko lautolu takitokotaha ne nakai takitaki e lautolu a lautolu fakahako. Hanai kaeke ko e fakalataha mo e falu he tau Kerisiano fakauku kua eke mo lekua ki a Timoteo, fefe la e malona he fakalataha mo e tau tagata fakalalolagi ke he fuata Kerisiano he vaha nei! (1 Korinito 15:33) Kua nakai kakano pehe e mena nei ke fakatagata lahi a koe ke he tau kapitiga aoga hau. Ka e kia lata ia koe ke fakaeneene neke to molea atu ki a lautolu, po ke pihia foki ke taute a koe ke matimati he falu a magaaho. Kua uka lahi e mena nei. Kua talahau he taha tama fifine Pasili: “Kua uka lahi. Na fa uiina tumau he tau kapitiga aoga au ke fano he tau kai fiafia mo e tau matakavi ne nakai mitaki ma e tau fuata Kerisiano. Kua fa pehe a lautolu: ‘Ke ha! Ai kia fano a koe? Ko e goagoa ha a ia hau!’”
8, 9. (a) Fefe e fakalatahaaga mo e tau tagata he lalolagi ne liga mitaki, ke tuku e Kerisiano ke he mena hagahaga kelea lahi? (e) Moua mai i fe e koe e tau kapitiga ne fai fakamaloloaga?
8 Ko e falu he tau fuata he lalolagi kua liga mitaki noa ha kua nakai ula, fakaaoga kupu pilo, po ke taute e mahani feuaki. Ka e ka nakai tutuli e lautolu e mahani tututonu mogoia, ko e ha lautolu a tau manamanatuaga fakatino mo e tau aga kua mukamuka lahi ke piki atu ki a koe. Ko e taha mena foki, ke fiafia fakalataha fefe a koe mo lautolu ne nakai tali tonu? (2 Korinito 2:14-16) Ko e ha, ko e tau mena aoga fakaagaga ne ofaofa e koe ko e mena “goagoa” ia ki a lautolu! (1 Korinito 2:14) Maeke nakai ia koe ke mau e fakakapitiga mo lautolu ka e nakai fetataiaki mo e hau a tau fakatonutonuaga?
9 Kia maama mitaki ke he tau fakalatahaaga ne nakai fai fakamaloloaga. Kia fakakaupa hau a fakalatahaaga ke he tau Kerisiano ne leveki fakaagaga mo e fakaalofa moli ki a Iehova. Kia fakaeneene ke hoko foki ke he tau fuata Kerisiano he fakapotopotoaga ne nakai mahani mitaki mo e hikihikifano. Kaeke ke tupu fakahaga fakaagaga a koe, ko e hau a fifiliaga he tau kapitiga to liga hiki. Kua pehe e taha tama fifine fuata Fakamoli: “Kua taute e au e tau kapitiga fou he tau fakapotopotoaga kehekehe. Kua maeke ia au ke mailoga ko e nakai aoga ha a ia he tau kapitiga he lalolagi.”
Fehola Kehe he Tau Manako Hehe
10, 11. (a) Ko e heigoa e kakano ke “hola kehe mo e tau manako lahi he tau fuata”? (e) Maeke fefe he taha ke “hola kehe . . . he feuaki”?
10 Ne fakamafana foki e Paulo a Timoteo ke “hola kehe mo e tau manako lahi he tau fuata.” Ko e magaaho ne fuata mui agaia ai a koe, ko e manako ke talahaua, ke fiafia, po ke fakamakona e manako feuaki kua maeke ke fakaohooho lahi. Ti ka nakai kikite, kua maeke he tau manako lahi pihia ke takitaki atu ke he hala. Ko e mena ia ne pehe ai a Paulo ke fehola kehe mo e tau manako ke fakamamahi—ke poi tuga ko e matematekelea e moui he taha.a
11 Ko e manako feuaki, ka fakamaama, ne takitaki aki e tau fuata Kerisiano tokologa ke he moumouaga fakaagaga. Ko e kakano mitaki he magaaho ia, kua tala mai he Tohi Tapu ki a tautolu ke “fehola kehe . . . he feuaki.” (1 Korinito 6:18) Kaeke ke fakamahani e tama tane mo e tama fifine, mo e fakatu kapitiga, kua lata ia laua ke taute e fakatonuaga nei ke tiaki e tau vahega mena fakaohooho—tuga e nonofo ni tokoua he poko fale po ke i loto he paaka motoka. Ka fai tagata leveki ka fakatauo mo koe kua tuga e pehe ko e faga tuai a ia, ka kua maeke ai ke eke mo puipuiaga moli haia. Mo e kaeke kua ha ha i ai e falu a kupu po ke manatu hohofi kua fata ke fakakite kua aoga lahi ke fai kaupaaga kua lata ke fakatoka, ke maeke ke tiaki e tau mahani nakai mea. (1 Tesalonia 4:7) Ko e fehola kehe mai he feuaki kua lafi atu ki ai foki ke tiaki e tau kifaga po ke tau ata tivi ne liga ke tupu mai e manatu hehe. (Iakopo 1:14, 15) Ka hu mai e tau manatu kelea ke he loto manamanatu hau ka e nakai uiina atu ki ai, kia hiki e manamanatuaga ke he mena ia. Fano ke evaeva; totou taha tohi; taute e falu he tau gahua kaina ne fa mahani. Ko e liogi ko e lagomataiaga malolo lahi pauaki ke lata mo e mena nei.—Salamo 62:8.b
12. Fakaako fefe a koe ke vihiatia e tau mena ne kelea? Fakamaama.
12 I luga he tau mena oti nei, kua lata ia koe ke iloa ke vihiatia, matakutaku, mo e teteki ke he tau mena kelea. (Salamo 97:10) Ka e maeke fefe ia koe ke vihiatia e mena ne fulufuluola mo e mahofi he magaaho fakamua? Ka manamanatu ke he tau fua! “Aua neke fakahehe ai a mutolu, kua nakai fakavai e taha e Atua; ha ko e mena kua gana he tagata, ko e mena ia ni ke helehele mai ai e ia; Ha ko ia kua gana e tau mena ke lata mo e hana ni a tino, to helehele mai ai e ia ke he tino e mena ke popo.” (Kalatia 6:7, 8) Kaeke ke fakaohooho ke mahala ke he fakaalofa hohofi, kia manamanatu ko e heigoa e fua ne mua atu he lahi—fefe e mahala nei he taha ke he manatu malolo ka fakahukia e Atua ko Iehova. (Fakatatai Salamo 78:41.) Manamanatu foki, ke he mena tupu ko e fatunoa po ke moua he gagao, tuga e AIDS. Manamanatu ke he loto malipilipi mo e galo he manamanatuaga mitaki ka matematekelea ai a koe. Kua ha ha i ai foki e tau fua ne leva lahi. Kua talahau he taha fifine Kerisiano: “Ne mahani feuaki a au mo e tane haku fakamua mo e falu tagata to feleveia a maua. Ti pete ni ko e tau Kerisiano tokoua a maua he magaaho nei, ka ko e moui feuaki ha maua fakamua kua eke tuai mo kamataaga he latau mo e femahekehekeaki he fakamauaga ha maua.” Nakai ko e mena ke galo kehe, mo e ke galo e monuina pule he atua po ke mena ka tupu ko e tuku kehe mai he fakapotopotoaga Kerisiano! (1 Korinito 5:9-13) Kua fai magaaho fiafia ku nakai ne lata ke totogi tokoluga lahi pihia?
Tutuli e Fakafetuiaga Tata mo Iehova
13, 14. (a) Ko e ha ne nakai la lata ia ke hola kehe mai he tau mena kua kelea ti koenaia? (e) Maeke fefe he taha ke “lali . . . ke iloa a Iehova”?
13 Nakai koenaia mogoia, ke fehola kehe mai he tau mena kelea. Ne poaki taotao foki ki a Timoteo ke “tutuli e tututonu, tua, fakaalofa, mafola.” Ko e manatu nei kua ha ha i ai e gahuahuaaga malolo. Ne ole pihia e perofeta ko Hosea ke he motu nakai tua ko Isaraela: “O mai a, kia liliu atu a tautolu kia Iehova . . . to lali ai a tautolu ke iloa a Iehova.” (Hosea 6:1-3) Kua taute nakai e koe ha tutuliaga pihia ma hau? Kua putoia ai e lahi ue atu mai he fano ni he tau feleveiaaga mo e fakatauo mo e tau mamatua ke he fekafekauaga he fonua. Taha e fifine Kerisiano ne fakakite: “Ne feaki hake he tau mamatua haku au he kupu moli, mo e papatiso tuai ai au. . . . Ne fa lavea au ke fakato e feleveiaaga, mo e nakai maeke ke fakato taha mahina ha fekafekauaga he fonua, ka e nakai maeke ia au ke tupu e fakafetuiaga tata haku mo Iehova.”
14 Kua talahau he taha fuata ne kaumahala foki a ia he nakai maeke ke iloa a Iehova ke eke mo Kapitiga mo Matua foki, mo e lahi ni e kitia ki a ia ko e Agaaga nakai maama mitaki. Ne to a ia ke he mahani kelea ti eke a ia mo matua fifine nakai fai tane he 18 e tau. Aua neke taute e hehe taha ia! “Lali . . . ke iloa a Iehova,” tuga he poaki mai e Hosea. Ko e liogi mo e o fano he tau aho takitaha mo Iehova, to maeke ia koe ke taute a ia mo kapitiga galo hau. (Fakatatai Mika 6:8; Ieremia 3:4.) “Ka e nakai ni mamao a ia mo tautolu takitokotaha” kaeke ke kumi e tautolu a ia. (Gahua 17:27) Ko e fakaholoaga tumau he tagata ke fakaako e Tohi Tapu kua lata tonu. Ko e holoaga pihia kua nakai lata ke fakateaga po ke fio. “Ko e tau aho oti ne totou e au e Tohi Tapu ke 15 e tau minuti,” he talahau he tama fifine tote ne higoa ko Melody. Kia fakatoka kehe e magaaho ke totou e tau vala tala takitaha he Ko e Kolo Toko mo e Awake! (Ala!). Kia tauteute ke lata mo e tau feleveiaaga ke maeke ia koe ke “fakalagalaga [e falu ke he] fakaalofa mo e tau gahua mitaki.”—Heperu 10:24, 25.
Kia Tuku Age Hau a Loto ke he Hau a Tau Mamatua
15. (a) Ko e ha he falu a magaaho ne uka ai ke omaoma ke he tau mamatua he taha? (e) Ko e ha e omaoma ne ko e lakaaga pauaki ma e fuata?
15 Ko e tau mamatua matakutaku Atua kua maeke ke eke mo punaaga he lagomatai moli mo e levekiaga. Ka e mailoga e vala hau kua lata ke taute: “Kia omaoma ke he tau matua ha mutolu ke he Iki, ha ko e mena tonu ni haia. Kia fakalilifu a koe ke he hau a matua tane, mo e hau a matua fifine, (ha ko e fakatufono fakamua haia ha ha i ai e talahauaga;) Kia mitaki ai a koe, kia fakatuleva e tau aho hau ke nofo ai a koe ki luga he kelekele.” (Efeso 6:1-3) Moli, ha kua lahi fakahaga a koe mo e liga manako ke fai tokanoaaga. Kua maeke foki ia koe ke maama mitaki e tau fakakaupaaga he hau a tau mamatua. “Ko e tau mamatua tino ha tautolu” he talahau he aposetolo ko Paulo, “kua maeke ke taute ni ke he mena ne manatu e lautolu kua mitaki lahi.” (Heperu 12:10, The Jerusalem Bible) Ka e pete ni he pihia, ka manamanatu ke he tau mena aoga ne leva, ko e hau a lakaaga agaia ni a ia ke omaoma ki a laua. Na fakaalofa hau a tau mamatua ki a koe mo e iloa mitaki e laua a koe mai he tau tagata oti. Ka e liga ke nakai talia tumau a koe mo laua, fa mahani agaia ni a laua ke moua e fiafia hau ke he loto. Ko e ha ne totoko ai ha laua a tau malolo he feaki a koe “ke he tau kupu akonaki mo e tau kupu fakamafana he Iki”? (Efeso 6:4) Ko e moli, ko e tagata goagoa ni ke tiaki e “fakaakoaga he hana a matua tane.” (Fakatai 15:5) Ko e fuata iloilo to mailoga e ia e pule he hana tau mamatua mo e fakakite e fakalilifu.—Fakatai 1:8.
16. (a) Ko e ha ne nakai ko e iloilo ma e tau fuata ke fufu e tau mena vihi mai he tau mamatua ha lautolu? (e) Ko e heigoa he tau fuata ka taute ke fakamitakiaki e matutakiaga ha lautolu mo e tau mamatua?
16 Kua lafi ki ai ke he mena ia ko e vagahau e mena moli ke he hau a tau mamatua, tala age ki a laua kaeke kua fai mena vihi a koe, tuga e tauhele he tau manatu fakauaua ke he kupu moli, po ke malona ke he mahani huhu. (Efeso 4:25) Ko e fufu he tau mena fakatauhele pihia mai he tau mamatua ke fakatupuaki e tau mena vihi loga. (Salamo 26:4) Ne talahau, ko e falu he tau mamatua kua tote lahi e fakamalolo ke matutaki: “Ne nakai nofo e matua fifine haku ke tutala mo au,” he talahau he taha tama fifine. “Ne nakai fai malolo au ke talahau e tau mena haku he loto ha kua matakutaku au ha ko e mena to tuhituhi mai a ia ki a au.” Kaeke kua tu a koe he tuaga taha ia, ati fifili fakailoilo a taha magaaho tonu ke tala age ke he tau mamatua hau e logonaaga hau. “Haku tama na e, kia ta mai e koe hāu a loto kia au,” he tomatoma mai he Fakatai 23:26. Kia lali ke tutala tumau hau a tau tupetupe mo laua, to hoko atu ke tupu e tau mena vihi matematekelea.
Tutuli Tumau e Mahani Tututonu!
17, 18. Ko e heigoa ka lagomatai aki e fuata ke tumau ke he hana tutuli he mahani tututonu?
17 Tata atu ke he fakaotiaga he hana a tohi ke ua aki, ne tomatoma e Paulo a Timoteo: “Kia tumau a koe ke he tau mena kua ako ai e koe, mo e iloa tonuhia e koe.” (2 Timoteo 3:14) Kia taute pihia e koe. Ua fakaata ha tagata po ke ha mena taha ke fakapage kehe a koe mai he hau a tutuli he mahani tututonu. Ko e lalolagi a Satani—mo e hana a tau page oti—kua fano ki mua mo e mahani kelea. To nakai mule ko ia mo lautolu oti ne fai vala i ai to matematekelea he moumouaga. (Salamo 92:7) Kia fakamalolo ke ua hifo mo e matakau a Satani.
18 Ha kua tokaloto e mena nei, kua lata ia koe ke kitekite tumau hau a tau foliaga, tau manako, mo e tau mena ke fiafia ki ai. Kia huhu hifo ki a koe, ‘Kua taofi nakai e au e tau tutuaga tokoluga he puhala tutala mo e mahani kaeke ke fano kehe au he kitekiteaga he tau mamatua haku mo e tau tagata he fakapotopotoaga? Ko e tau vahega kapitiga fefe haku ka fifili? To tutala nakai e fuata lalolagi ke he haku a tapulu mo e tauteuteaga? Ko e heigoa e tau foliaga kua fakatoka e au ma haku? Kua fakatoka nakai haku a loto ke he fekafekauaga mau—po ke ke he tau gahua ni he lalolagi mate a Satani?’
19, 20. (a) Ko e ha kua nakai lata he fuata ke manatu fakalolelole ke he tau fakatonutonuaga a Iehova? (e) Ko e heigoa e tau fakatokaaga ne maeke ke fakaaoga he tau fuata a lautolu ki ai?
19 Neke kua kitia e koe e lata tonu ke taute e falu a hikihikiaga he hau a manamanatuaga. (2 Korinito 13:11) Aua neke pehia e manamanatuaga. Manatu, nakai amaamanaki a Iehova ke he ha mena lahi mai ia koe ka ko e mena kua aoga hokoia. Ne huhu he perofeta ko Mika: “Ko e heigoa foki e mena kua finagalo ai a Iehova kia koe, nakai kia ko e tau mena nai, ke eke ai e mahani tututonu, ke fiafia ke he fakaalofa, mo e feoaki mo e hau a Atua mo e loto holoilalo?” (Mika 6:8) To nakai uka lahi e mena nei kaeke ke tuku fakamua e koe e tau fakatokaaga a Iehova ke lagomatai a koe. Kia nofo fakatata he tau mena oti ke he hau a tau mamatua. Kia fakalataha tumau mo e fakapotopotoaga Kerisiano. Ka ko e mena pauaki, kia fakamalolo ke fakaako ke iloa e tau momotua he fakapotopotoaga. Kua tupetupe a lautolu ke he hau a moui malolo mo e kua maeke ke eke mo punaaga he lagomatai mo e fakamafana. (Isaia 32:2) I luga he tau mena oti, kia taute fakatata, e fakafetuiaga mafana mo e Atua ko Iehova. To atu e ia ki a koe e malolo mo e finagalo ke tutuli e tau mena kua hako!
20 Ko e falu he tau fuata, ne lolelole ha lautolu a fakamalolo ke tupu fakaagaga ha ko e fanogonogo kehe tau lologo kelea. Ko e tala ka mui mai to tutala pauaki ke he fakaakoaga nei.
[Tau Matahui Tala]
a Ko e kupu Heleni ma e “[fe]hola kehe” kua fakaaoga foki he Mataio 2:13, he magaaho ne tala age ai ki a Maria mo Iosefa ke “fehola ki Aikupito” ke hao mai he pulega fufu ke kelipopo ha Herota.—Fakatatai Mataio 10:23.
b To moua e koe e loga he tau manatu lagomatai aoga lahi ke puipui hifo aki e manako feuaki he veveheaga 26 he tohi Questions Young People Ask—Answers That Work, ne tohia ai he Watchtower Bible and Tract Society of New York, Inc.
Manatu Nakai e Koe?
◻ Ko e ha e tau fuata ne nakai fahia pauaki ai ke totoko e “tau lagatau” ha Satani?
◻ Ko e ha e fakalataha fakatata ke he tau fuata he lalolagi ne hagahaga kelea ai?
◻ Maeke fefe ia koe ke hola kehe mai he mahani kelea ko e feuaki?
◻ Tutuli fefe e koe e fakafetuiaga tata mo Iehova?
◻ Ko e ha ne aoga ai ke matutaki mo e hau a tau mamatua?
[Fakatino he lau 6]
Ko e fakamahani he tama tane mo e tama fifine ne fakatoka fakailoilo e tau puhala ke feiloaaki, tuga e holo he aisa ka e nakai nonofo kehe mai mo e falu a tagata