Ma Tau Fuata—Totoko e Agaga he Lalolagi
“Ka kua moua e tautolu nakai ko e agaga he lalolagi nai, ka ko e Agaga mai he Atua.”—1 KORINITO 2:12.
1, 2. (a) Ko e heigoa e kehe ne kua kitia he vahaloto he tau tagata fuata he lalolagi mo e tau fuata i loto he fakapotopotoaga he Tau Fakamoli a Iehova? (e) Ko e heigoa e fiafia mafanatia ka foaki ke he laulahi he Tau Fakamoli fuata?
“KO E atuhau fuata ha tautolu kua kapaletu, fakaheu mo e tau totoko.” Kua talahau pihia he tohi tala Ausetalia The Sun-Herald. Ti lafi: “Kua fakakite he fakamauaga he fale hopo e 22 e pasene ne malikiti hake [mai he tau kua mole] e numera he tau tama matahavala ne o ke hopo ha ko e tau mena kelea ne taute . . . Tamate ni he fanau a lautolu ke fakalahi tolu tali mai he atu tau 60 . . . Ti ko e veha atuhau, mogoia, kua hokulo hifo ti kua matomo atu e tau fuata ke he tau numera lalahi he kai tulaki, inu kava mo e moumou fakagoagoa ni e lautolu a lautolu.” Ka ko e mena nei kua nakai hoko ni ke he taha e motu. He lalolagi katoa, ko e tau matua, tau faiaoga, mo e tau pulotu kumikumi ke he ulu, kua fetogitogiaki ke he tuaga he tau fuata.
2 Ko e kehe mahaki ha ia he vahaloto he tau fuata he vaha nei mo e tau fuata mahani lilifu ne moua he tau fakapotopotoaga he Tau Fakamoli a Iehova! Nakai pihia ha kua mitaki katoatoa a lautolu. Kua fetului foki a lautolu mo e “tau manako lahi he tau fuata.” (2 Timoteo 2:22) Ka ko e matakau, ko e tau fuata nei kua tutu mauokafua ke he mena hako mo e nakai mahala ke he tau peehiaga he lalolagi. Kua fiafia lahi a mautolu ki a mutolu oti ko e tau fuata he kua kautu he totoko atu ke he “tau lagatau” ha Satani! (Efeso 6:11, matahui tala, NW) Tuga e aposetolo ko Ioane, kua omoi a mautolu ke talahau: “Ko e tau fuata na e, ne tohi atu e au kia mutolu, nukua malolo a mutolu, kua toka mau foki e kupu he Atua ki loto ia mutolu; kua kautu foki e mutolu kia ia ne mahani kelea.”—1 Ioane 2:14.
3. Ko e heigoa foki e kakano he kupu “agaga”?
3 Pete ni ia, ke kautu mau ke he hau a totoko ki a ia ne mahani kelea, lata ia koe ke totoko fakamahaki atu ke he mena ne ui he Tohi Tapu “ko e agaga he lalolagi.” (1 Korinito 2:12) Hagaao ke he taha pulotu he vagahau Heleni, ko e kupu “agaga” kua kakano foki “ko e mahani po ke fakaohoohoaga ne tuku i loto mo e pule ke he solu he ha tagata ni.” Ke fakatai ki ai, ka fioia e koe taha tagata ke ita vave, liga pehe a koe kua ha ha he tagata ia e “agaga” kelea. Ko e “agaga,” mahani, po ke tau fatuakiloto kua fakaohooho e tau fifiliaga ne taute e koe; kua omoi hau a tau gahua mo e vagahau. Kia mailoga, nukua maeke he tagata tokotaha mo e he matakau ke fakakite e “agaga.” Ne tohia he aposetolo ko Paulo ke he matakau Kerisiano: “Kia ha ha he tau tagata ha mutolu e fakaalofa noa he Iki ha tautolu ko Iesu Keriso.” (Filemoni 25) Ti ko e heigoa e agaga, mogoia, ne fakakite he lalolagi nei? Ha “ko e lalolagi oti ha he pule hana kua mahani kelea,” ko Satani ko e Tiapolo, ko e agaga he lalolagi kua nakai fakai ke lilifu, pihia nakai?—1 Ioane 5:19.
Kitiaaga he Agaga he Lalolagi
4, 5. (a) Ko e heigoa e agaga ne hufia ai a lautolu he fakapotopotoaga Efeso ato eke a lautolu mo tau Kerisiano? (e) Ko hai e “pule ha he pulagi,” mo e ko e heigoa e “pulagi”?
4 Ne tohia e Paulo: “Ko mutolu foki [ne fakamoui he Atua] ne mamate he tau holifono mo e tau hala. Ne o fano ai a mutolu ke he vaha i tuai, ke lata mo e mahani he lalolagi nai, ke lata mo e takitaki ha lautolu kua pule ha he pulagi, ko e agaga haia kua gahua ai ni ainei kia lautolu kua faliuliu. Ha i ai foki a tautolu, ne mahani fakalataha a tautolu oti kana mo lautolu ke he vaha i tuai he nonofo ai ke he tau manako lahi he tau tino ha tautolu, mo e eke foki e tautolu e tau mena kua loto ki ai e tino katoa mo e tau manatu, ne fanau mai foki a tautolu mo fanauaga he ita, tuga foki a lautolu kua toe.”—Efeso 2:1-3.
5 Fakamua to iloa e puhala Kerisiano, ko e tau Kerisiano i Efeso ko e tau tutaki teao he “pule ha he pulagi,” ko Satani ko e Tiapolo. Ko e “pulagi” ia nakai ko e matakavi kitia mata ne api ai a Satani mo e hana tau temoni. He magaaho ne tohia e Paulo e tau kupu ia, ko Satani ko e Tiapolo mo e hana tau temoni kua maeke agaia ke liliu ke he lagi. (Fakatatai Iopu 1:6; Fakakiteaga 12:7-12.) Ko e kupu “pulagi” ne kakano ko e agaga, po ke manamanatu, ne pule ke he lalolagi ha Satani. (Fakatatai Fakakiteaga 16:17-21.) Tuga ni e pulagi ne agagai ia tautolu, ko e agaga nei kua haia he tau mena oti.
6. Ko e heigoa e “pule ha he pulagi,” mo e gahuahua fefe ke he tau fuata tokologa?
6 Ka ko e heigoa e “pule ha he pulagi”? Kitia maali ai, kua hagaao e mena nei ke he hufiaaga hokulo he “pulagi” nei ke he tau tagata. Talahau e Paulo ko e agaga nei “kua gahua ai ni ainei kia lautolu kua faliuliu.” Ti ko e agaga he lalolagi ne fakatupu e agaga faliuliu mo e totoko, mo e fakaohooho kelea he falu tama ko e taha puhala a ia ne fakagahuahua ai e pule nei. “He fano a koe he aoga,” he talahau he tama fifine Fakamoli, “fa fakamalolo he tau tama oti a koe ke totoko fakatote. Ti fiafia e fanau ki a koe ka taute e koe taha mahani totoko.”
Tau Fakakiteaga he Agaga he Lalolagi
7-9. (a) Talahau falu puhala ne kitia e agaga he lalolagi ke he tau tagata fuata he vaha nei. (e) Kua mailoga nakai e koe e tau mena nei he matakavi hau?
7 Ko e heigoa falu fakakiteaga he agaga he lalolagi ne ha ha he tau tagata fuata he vaha nei? Ko e nakai fakamoli mo e totoko. Taha e mekasini ne hokotaki kua molea e 70 e pasene he tau tama o aoga tokoluga ne talahau ke nakai fakamoli he kamatamata he aoga. Ko e nakai fakalilifu, fakafiufiu mo e tala kiva kua holofa foki. Moli, he falu mogo ne talahau e Iopu mo e aposetolo ko Paulo e mena ne tuga e fakafiufiu ke he falu ke fakahokotia aki e ita tututonu. (Iopu 12:2; 2 Korinito 12:13) Ka ko e fakafiufiu kelea ne logona ke he tau laugutu he tau tagata fuata tokologa kua tatai ni mo e amuamu.
8 Ko e molea e fakafiafiaaga ko e tau fakakiteaga foki a ia he agaga he lalolagi. Ko e o kalapu he po, tau fiafiaaga,a mo e falu fakafiafia miha he tau fuata kua mahuiga ai ki a lautolu. Ko e molea lahi he tau tapulu mo e teuteuaga kua holofa pihia foki. Mai he tau mena tui gafugafu ke he tau fasone ofogia, tuga e fakapupu e tino, tokologa e tau fuata he vaha nei ne fakakite e lautolu a lautolu mo e agaga totoko he lalolagi. (Fakatatai Roma 6:16.) Ko e lavelave ke he tau velevele koloa ko e taha fakakiteaga a ia. Hagaao ke he taha senolo fakaako, “ha ne tauhele he tau tagata fakafua tupe e tau tama he tau mogo oti aki e tau lagatau he fakatataaga mo e fakaakoaga mo e tau mena [koloa] fulufuluola loga.” Ti he mogo ka paase mai e tau fuata he aoga tokoluga he Tau Fahi Kaufakalataha, kua fakatapakupaku tuai a lautolu ke he 36,000 he tau fakatataaga he tivi. Liga to fakaohooho foki he atu hau a koe ke fakatau. Ne talahau he tama fifine ne 14 e tau he moui: “Huhu tumau e tau tama oti, ‘Taute mai fe e miti, peleue, po ke fihui paku hau?’”
9 Tali mai he tau vaha Tohi Tapu, kua tumau e tau leo kofe fakalialia mo kanavaakau a Satani ke fakalagalaga aki e mahani kiva. (Fakatatai Esoto 32:17-19; Salamo 69:12; Isaia 23:16.) Ti nakai ko e mena ke ofo ai, ko e leo kofe mo e fakavaia mahani fakatane mo e fifine—ka nakai fakateteki—ko e vagahau kelea, mo e kolokolovao, ne fakalagalaga kua mahuiga. Ka ko e taha fakakiteaga he agaga kiva he lalolagi nei ko e mahani kelea he fakatane mo e fifine. (1 Korinito 6:9-11) Ne hokotaki mai he The New York Times: “Ko e mahani fakatane mo e fifine ke he tau fuata mui kua eke mo puhala mau . . . Kua molea e ua kuata he tau tama aoga tokoluga kua matutaki ke he mahani fakatane mo e fifine.” Ne tohi he vala tala he The Wall Street Journal e fakamoliaga he fanau he vahaloto he tau tau 8 mo e 12 kua “matutaki lahi ke he mahani fakatane mo e fifine.” Ne talahau he tagata fakatonu kua okioki laia mai he aoga: “Ha ne kamata a mautolu ke kitia e tokologa he tau tama he vahega ono ne fatu.”b
Fakaheu e Agaga he Lalolagi
10. Maeke fefe falu fuata mai he tau magafaoa Kerisiano ke mahala ke he agaga he lalolagi?
10 Fakatutuku ai ha kua mahala falu fuata Kerisiano ke he agaga he lalolagi. “Mahani mitaki au i mua he tau matua haku mo e falu Kerisiano,” he talahau he taha tama fifine Sapani. “Ka kua moui foki au ke he taha moui kehe.” Ne talahau he fuata mai i Kenia: “Fai magaaho ne fakafahiua e moui haku, kua putoia ai e tau fiafia, tau leo kofe roko, mo e tau kapitiga hepe. Iloa e au hepe e mena nei, ka e lali au ke fakamole e manatu ia, he piko to galo kehe he mogo fakamui. Ka e nakai. Au atu ni e kelea.” Taha fuata, mai i Sihamani ne talahau: “Kamata ni mo e tau kapitiga hepe. Mogoia ne ula au. Ha kua manako au ke fakamamahi e tau matua haku, ka e fakamamahi ni e au au.”
11. Maeke fefe ia Kalepa ke totoko ke he moto tagata he magaaho ne fakatuogo he tau tagata toko hogofulu e tala kelea?
11 Ka kua maeke agaia ke totoko, e, ke fakaheu, e agaga he lalolagi. Mailoga la e fakafifitakiaga mai i tuai ha Kalepa. He magaaho ne fakatuogo he tau tagata toko hogofulu e tala kelea hagaao ke he Motu he Maveheaga, ne nakai mahala a ia, fakalataha mo Iosua, ke hopoate ke fakalataha mo e moto tagata. Ne talahau fakamalolo a laua: “Ko e motu ne o a mautolu ke toko ki ai, ko e motu mitaki lahi ue atu ni a ia. Kaeke ke fiafia mai a Iehova kia tautolu, to fakahoko atu e ia a tautolu ke he motu na, mo e foaki mai ia kia tautolu; ko e motu ni kua tafe ai e puke huhu mo e meli.” (Numera 14:7, 8) Ko e heigoa ne lagomatai a Kalepa ke totoko ke he tau peehiaga ia? Ne talahau a Iehova hagaao ki a Kalepa: ‘Kua ha ia ia e agaga kua kehe.’—Numera 14:24.
Fakakite e ‘Agaga Kehe’
12. Ko e ha kua aoga ai ke fakakite e ‘agaga kehe’ ka lauia mo e vagahau he taha tagata?
12 He vaha nei, kua lata ke fakamalolo ke fakakite e ‘agaga kehe,’ po ke aga manamanatu—ne kehe mai he lalolagi. Taha puhala ke taute ai e koe ko e kalo mai he vagahau fakafiufiu, mo e nakai fakalilifu. Mailoga la, ko e kupu Peritania “sarcasm,” faka-Niue “fakafiufiu,” kua tupu mai he vepi faka-Heleni ne kakano “ke gagau kehe e vala kakano tuga he kuli.” (Fakatatai Kalatia 5:15.) Tuga ni e tau nifo he kuli ka gagau kehe e vala kakano mai he polohui motua, maeke foki he “vaiga” fakafiufiu ke uta kehe e lilifu mai he falu. Ka e tomatoma e Kolose 3:8 ki a koe ke “tuku kehe e mutolu e tau mena oti ia ko e ita foki, ko e vale, ko e loto kelea, ko e kupu kelea, mo e kupu fuafua kelea, mai he tau gutu ha mutolu.” Mo e tohi he Tau Fakatai 10:19: “Ko e loga e kupu ti nakai noa ai mo e holifono; ka ko ia kua taofi hana tau laugutu ko e tagata iloilo a ia.” Ka ekefakakelea he taha tagata a koe, kia fakauka ke ‘haga kehe e pakagutu,’ he liga vagahau totonu mo e mafola ki a ia ne vale mai ha ko mua ni.—Mataio 5:39; Tau Fakatai 15:1.
13. Maeke fefe he tau fuata ke fakakite e onoonoaga lagotatai ke he tau koloa?
13 Taha puhala foki ke fakakite e ‘agaga kehe’ ko e fakalagotatai e onoonoaga ke he tau koloa. Moli, ko e manako pauaki ni a ia ke moua e tau koloa mitaki. Ko Iesu na taha ni e tapulu mitaki hana. (Ioane 19:23, 24) Ka e, he magaaho ka manako lahi ke he tau koloa ti ole tumau a koe ke he tau matua hau ke fakatau e tau mena ne nakai fakai a laua ke fakatau, po ke he magaaho ka manako na koe ke fifitaki ke he falu tama, ti liga ko e agaga he lalolagi kua lahi e pule ki a koe ke he mena ne iloa e koe. Ne pehe e Tohi Tapu: “Ko e tau mena oti ha ha he lalolagi, ko e manako lahi he tino, mo e manako lahi he tau mata, katoa mo e tau mena he mouiaga nai ke hula ki ai, nakai mai he Matua ia, ka e mai he lalolagi.” E, kia nakai mahala ke he pule he agaga velevele koloa he lalolagi! Kia fiafia ke he tau mena ne ha ha ia koe.—1 Ioane 2:16; 1 Timoteo 6:8-10.
14. (a) Fakakite fefe he tau tagata he Atua he vaha a Isaia e onoonoaga nakai lagotatai ke he fakafiafiaaga? (e) Ko e heigoa falu hagahaga kelea ne fehagai mo e tau fuata Kerisiano he tau kalapu po mo e tau fiafia kolokolovao?
14 Ke fakalatalata ke he fakafiafiaaga kua aoga lahi foki. Ne fakailoa he perofeta ko Isaia: “Oi te fakaalofa kia lautolu kua uhu matike ke tutuli atu ke he kava, ti nonofo ai a lautolu ke hoko ke he po ato konahia a lautolu he inu uaina. Ha ha i ai ke he tau galue ha lautolu e kitara mo e napeli, ko e topa mo e kofe, katoa mo e uaina; ka e nakai manatu e lautolu ke he gahua a Iehova, nakai kitekite foki a lautolu ke he gahua he hana tau lima.” (Isaia 5:11, 12) Momoko ke talahau, kua fakalataha falu fuata Kerisiano he tau fiafia kolokolovao pihia. He magaaho ne huhu ke he matakau Kerisiano fuata ke talahau e mena ne tupu he tau kalapu po, ne talahau he taha matakainaga fifine: “Mahani tumau ke tau. Ti putoia ai foki au.” Ne talahau he taha matakainaga tane: “Ko e inu kava, ula tapaka, tau mena pihia.” Talahau foki he taha matakainaga tane: “Konahia e tau tagata. Tuga ni e tau tagata heketia a lautolu! Mo e ha ha ai e tau tulaki. Loga e tau mena kelea ne tutupu. Ka fano a koe mo e manatu to nakai lauia a koe, kua fakavaia a koe.” Ha ko e kakano mitaki, mogoia, ati tohi he Tohi Tapu e tau tafeauhi, po ke “tau fiafia kolokolovao,” ko e taha he “tau gahua he tino.”—Kalatia 5:19-21; Byington; Roma 13:13.
15. Ko e heigoa e onoonoaga lagotatai he fakafiafiaaga ne foaki he Tohi Tapu?
15 He kua kalo kehe mai he tau fakafiafiaaga kelea to nakai fakahala a koe ke he moui nakai fiafia. Kua tapuaki a tautolu ke he ‘Atua fiafia,’ ne manako ki a koe ke olioli e vaha fuata hau! (1 Timoteo 1:11; Fakamatalaaga 11:9) Ka kua hataki mai e Tohi Tapu: “Ko ia kua manako ke he tau mena fakafiafia, to eke a ia mo tagata nofogati.” (Tau Fakatai 21:17) E, ka taute e koe e fakafiafiaaga ke mua ke he moui hau, to matematekelea a koe he nofogati fakaagaga. Ti, kia muitua ke he tau matapatu fakaakoaga he Tohi Tapu ka fifili e tau mena fakafiafia hau. Ha ha ai e tau puhala loga ke olioli a koe ki ai ka ati hake a koe mo e nakai fakalolelole a koe.c—Fakamatalaaga 11:10.
16. Fakakite fefe he tau fuata Kerisiano kua kehe a lautolu?
16 Ke fakakite e fakalatalata ke he tau tapulu mo e teuteuaga hau mo e fakaheu e tau fasone he lalolagi, ka fakamailoga foki a koe ke kehe. (Roma 12:2; 1 Timoteo 2:9) Ti pihia foki hau a fakalotomatala he fifili e leo kofe. (Filipi 4:8, 9) “Iloa e au na fai leo kofe au kua lata ke liti ke he vao,” he talahau he taha Kerisiano fuata, “ka e homo ha e leo!” Taha tama tane fuata foki ne talahau: “Ko e matahele e leo kofe ki a au he manako lahi au ki ai. Ka iloa e au taha mena kelea i ai, po ke fakakite mai he tau matua haku ki a au, ne peehi malolo e au e manamanatuaga haku ke pule ke he loto haku, kakano ko e haia i loto haku e manako lahi ke he leo kofe ia.” Tau fuata, aua neke “pouli a tautolu ke he hana [Satani] tau lagatau”! (2 Korinito 2:11) Ha ne fakaaoga e ia e leo kofe ke lali ke fuluhi kehe e tau Kerisiano fuata mai ia Iehova! Kua fita he kitia e tau vala tala i loto he tau tohi he Watch Tower ne tutala ke he tau leo kofe repe, mamafa, mo e falu leo kofe foki.d Ka kua nakai tala tumau e tau tohi he Watch Tower ke he tau puhala kehekehe he tau leo kofe ka ha ha ai. Ti, kua lata ia koe ke fakaaoga e “loto manamanatu” mo e “leoleo” he magaaho ka fifili e leo kofe.—Tau Fakatai 2:11.
17. (a) Ko e heigoa e por·neiʹa, mo e ko e heigoa e tau gahua ne putoia ai? (e) Ko e heigoa e finagalo he Atua he magaaho ka fehagai mo e tau gahua he mahani mitaki?
17 Ke fakahiku, kua lata ia koe ke mahani mea tumau. Ne fakatonu mai e Tohi Tapu: “Kia fehola kehe a mutolu he feuaki.” (1 Korinito 6:18) Ko e kupu Heleni fakamua ma e feuaki, por·neiʹa, kua hagaao ke he tau mahani fakahanoa he fakatane mo e fifine ne fakaaoga e tau vala kakano he mouiaga i fafo he fakamauaga. Putoia ai ke he puhala halagutu he mahani fakatane mo e fifine mo e fota e tau vala kakano he mouiaga. Tokologa e tau fuata Kerisiano ne taute e mahani ia, he manatu kua nakai taute e lautolu e mahani feuaki. Ka kua fakamaaliali mai he Kupu he Atua: “Ko e finagalo foki he Atua hanai, kia fakatapu a mutolu, kia fakamamao a mutolu mo e feuaki. Kia takitokotaha a mutolu mo e iloa ke moua e ia ni hana hoana mo e fakatapu mo e lilifu.”—1 Tesalonia 4:3, 4.
18. (a) Maeke fefe he fuata ke kalo mai neke pikitia he agaga he lalolagi? (e) Ko e heigoa ka tutala ki ai he vala tala ka mui mai?
18 E, mo e lagomatai ha Iehova, maeke ia koe ke kalo mai neke pikitia he agaga he lalolagi! (1 Peteru 5:10) Pete ni ia, fa ufiufi e Satani hana tau matahele ne mua e kelea, ti he falu mogo kua lata ke lotomatala lahi ke mailoga e mena hagahaga kelea. Ko e vala tala ha tautolu ka mui mai kua pauaki ke lagomatai e tau fuata ke feaki hake ha lalu a tau manamanatuaga.
[Tau Matahui Tala]
a Fa mahani e tau fiafia koli ke hololoa ke he po katoa. Ma e tau fakailoaaga foki kikite e “Huhu he Tau Tagata Fuata . . . Ko e Fiafia Noa Kia e Tau Fakafiafiaaga?” i loto he Tesemo 22, 1997, fufuta he Awake!
b Fanau kavi ke 11 e tau tau he moui.
c Ma e tau lagomatai, kikite tau lau 296-303 he tohi Questions Young People Ask—Answers That Work.
d Kikite e Me 1, 1993, fufuta he Ko e Kolo Toko.
Tau Huhu ke Fakamanatu
◻ Ko e heigoa e “agaga he lalolagi,” mo e “pule” fefe ke he tau tagata?
◻ Ko e heigoa falu fakakiteaga he agaga he lalolagi ke he tau fuata he vaha nei?
◻ Fakakite fefe he tau fuata Kerisiano e ‘agaga kehe’ ka lauia ke he vagahau mo e fakafiafiaaga?
◻ Fakakite fefe he tau fuata Kerisiano e ‘agaga kehe’ ka lauia ke he tau mahani mo e leo kofe?
[Fakatino he lau 17]
Fakakite he tau fuata tokologa ha ko e tau mahani ha lautolu kua ha i lalo he “pule” he agaga he lalolagi a lautolu
[Fakatino he lau 18]
Kia fakalotomatala he fifili e leo kofe hau
[Fakatino he lau 19]
Ko e mena fakamalolo ke totoko e agaga he lalolagi