Moua e Agaaga he Atua, Nakai he Lalolagi

“Kua moua e tautolu nakai ko e agaga he lalolagi nai, ka ko e [a]gaga mai he Atua, kia iloa ai e tautolu e tau mena kua foaki noa mai he Atua kia tautolu.”—1 KORI. 2:12.

1, 2. (a) He puhala fe hane felakutaki e tau Kerisiano mooli? (e) Ko e heigoa e tau hūhū ka fakatutala a tautolu ki ai?

KO E tau Kerisiano mooli hane felakutaki! Ko e fī ha tautolu kua malolō lahi, eke lagatau, mo e latau tumau. Ha ha ia ia e kanavaakau ne malolō lahi nukua moua aki e tau tagata tokologa. Ka e nakai lata a tautolu ke logona hifo e lolelole po ke kaumahala. (Isaia 41:10) Kua ha ha ia tautolu e papaleaga ne mauokafua mo e kautū.

² Nakai ko e tau fakatino ha tautolu; ka ko e tau fakaagaaga. Ko e fī ha tautolu ko Satani ko e Tiapolo, ti ko e matapatu kanavaakau ne fakaaoga e ia ko e “agaga he lalolagi nai.” (1 Kori. 2:12) Ko e matapatu papaleaga ha tautolu ke he tau totokoaga haana ko e agaaga he Atua. Ke kautū ke he tauaga nei mo e fakatumau ke tupu olaola fakaagaaga, kua lata ia tautolu ke ole ma e agaaga he Atua ti fakakite mogoia e fua ia he tau momoui ha tautolu. (Kala. 5:22, 23) Ka ko e heigoa e agaaga he lalolagi, ti maeke fēfē ai ke fakaohooho lahi? Maeke fēfē a tautolu ke fifili kua fakaohooho kia he agaaga he lalolagi a tautolu? Ti ko e heigoa ka fakaako e tautolu mai ia Iesu hagaao ke he moua he agaaga he Atua mo e totoko e agaaga he lalolagi?

Agaaga he Lalolagi—Ko e Ha ne Malolō Lahi?

3. Ko e heigoa e agaaga he lalolagi?

³ Ko e agaaga he lalolagi nei kua mai ia Satani, ko e “iki he lalolagi nei,” ti kua totoko ai ke he agaaga tapu he Atua. (Ioane 12:31; 14:30; 1 Ioa. 5:19) Ko e matapatu fakahehē a ia he lalolagi, ti omoi ai e tau tagata ke muitua. Ko e malolō fakaohooho nei kua takitaki e kaufakalatahaaga he tau tagata ke totoko ke he finagalo mo e amaamanakiaga he Atua.

4, 5. Maeke fēfē he agaaga ne fakaohooho e Satani ke malolō lahi?

⁴ Maeke fēfē he agaaga ne fakaohooho e Satani ke malolō lahi? Fakamua, ne fakavaia e Satani a Eva he kaina ko Etena. Ne peehi e ia ki a Eva ko e tū kehe mai he Atua to fakaholo ki mua e moui haana. (Kene. 3:13) Kua eke mooli a ia mo pikopiko! (Ioane 8:44) Ti puhala he fifine, ne fuluhi kehe e ia a Atamu ke nakai fakamooli ki a Iehova. Ha ko e fifiliaga ha Atamu, ne fakafua e tau tagata ke he agahala, ti moua e fakaohoohoaga he aga ha Satani he nakai omaoma.—Totou Efeso 2:1-3.

⁵ Ne fakaohooho foki e Satani e tokologa he tau agelu, ne eke mo tau temoni. (Fakakite. 12:3, 4) Ko e afokau ia he Atua ne fai magaaho he tupu ato hoko e Fakapuke he vahā a Noa. Ko e tau agelu ia ne talitonu to mitaki a lautolu ka tiaki e tau tuaga kotofa ha lautolu he lagi mo e atāina ke taute e tau manako velagia he lalolagi. (Iuta 6) Mo e lagomatai he tau temoni ia, ne liliu mogonei ke he takatakaiaga fakaagaaga, ko Satani hane “fakahehe e lalolagi oti.” (Fakakite. 12:9) Momoko ai, ko e laulahi he tau tagata ne tumau ke nakai mailoga e fakaohoohoaga fakatemoni.—2 Kori. 4:4.

Fakaohooho Kia he Agaaga he Lalolagi a Koe?

6. Maeke fēfē ni e agaaga he lalolagi ke pikitia a tautolu?

⁶ Tokologa kua nakai mailoga e fakaohoohoaga a Satani, ka e nakai lata he tau Kerisiano mooli ke pouli ke he tau lagatau haana. (2 Kori. 2:11) Ti ko e agaaga he lalolagi kua nakai maeke ke fakaohooho a tautolu ato fakaatā ai e tautolu ke taute pihia. Kia kumikumi a tautolu ke he fā e hūhū ka lagomatai a tautolu ke fakakite kua fakaohooho a tautolu he agaaga he Atua po ke he lalolagi.

7. Ko e heigoa taha puhala ne lali a Satani ke utakehe a tautolu mai ia Iehova?

⁷ Ko e heigoa ne fakakite he haaku a fifiliaga ke he fakafiafiaaga hagaao ki a au? (Totou Iakopo 3:14-18.) Kua lali a Satani ke utakehe a tautolu mai he Atua he fakaohooho e fiafia ke he favale he tau loto ha tautolu. Na iloa he Tiapolo kua vihiatia e Iehova e tau tagata ne fiafia ke he favale. (Sala. 11:5) Ko e mena ia, kua lali a Satani ke fakaaoga e tau tohi, tau kifaga, tau lologo, mo e tau pelē electronic—falu ne fakalagā ai e tau tagata pelē ke fifitaki e mahani feuaki mo e favale fakalialia—ke fakaohooho e tau manako fakatino ha tautolu. Nakai tupetupe a Satani ka fai vala he tau loto ha tautolu kua fiafia ke he mena hako kaeke kua fai vala agaia kua fiafia ke he kelea ne fakaohooho e ia.—Sala. 97:10.

8, 9. Ko e heigoa e tau hūhū hagaao ke he fakafiafiaaga kua lata ia tautolu ke hūhū hifo ki a tautolu?

⁸ He taha faahi, kua fakaohooho he agaaga he Atua a lautolu kua moua ai ke meā, mafola, mo e puke he fakaalofa noa. To mitaki ia tautolu ke hūhū hifo ki a tautolu, ‘Kua fakaohooho kia he fifiliaga haaku e tau fakafiafiaaga he tau mahani mitaki i loto ia au?’ Ko e iloilo mai luga kua “nakai fakatupua.” Ko lautolu kua fakaohooho he agaaga he Atua kua nakai fakamatala e mahani meā mo e mafola ke he tau katofia ti fiafia he kitekite ke he tau favale kolokolovao mo e mahani feuaki he tau loto kaina ni ha lautolu.

⁹ Amanaki a Iehova ke he mahani fakamooli katoatoa. Ka ko Satani ne manako ke he taha e hufeilo, tuga he lali a ia ke taute age e Iesu. (Luka 4:7, 8) Liga hūhū hifo a tautolu ki a tautolu ni: ‘Ko e fakafiafiaaga kia ne fifili e au kua maeke ia au ke foaki e mahani fakamooli katoatoa ke he Atua? Kua uka lahi po ke mukamuka lahi kia he fifiliaga haaku ke totoko e au e agaaga he lalolagi? Lata kia ia au ke taute e tau hikihikiaga ke he tau fifiliaga ma e mogo i mua?’

10, 11. (a) Hagaao ke he tau koloa fakatino, ko e heigoa e aga ne fakaohooho he agaaga he lalolagi? (e) Ko e heigoa e aga ne fakamalolō he Kupu omoomoi he Atua?

¹⁰ Ko e heigoa e aga haaku ke he tau koloa he tino? (Totou Luka 18:24-30.) Ko e agaaga he lalolagi kua fakaohooho e “manako lahi he tau mata” he fakalagalaga e lotokai mo e velevelekoloa. (1 Ioa. 2:16) Kua fakatupu ai ke he tokologa ke fifili ke maukoloa. (1 Timo. 6:9, 10) Ko e agaaga ia to taute a tautolu ke talitonu ko e tanakiaga he tau koloa he tino to foaki e haohao mitaki tukulagi. (Fakatai 18:11) Pete ia, ka fakaatā e tautolu e manako lahi ke he tau tupe ke mua atu e aoga ke he ha tautolu a fakaalofa ke he Atua, to kautū ai a Satani. Lata ke hūhū hifo a tautolu ki a tautolu, ‘Hagaaki kia e moui haaku ke tutuli he tokotoko mitaki he tau koloa fakatino mo e tau fakafiafia?’

¹¹ Kehe ai, ko e Kupu omoomoi he Atua kua fakamalolō a tautolu ke lagotatai e onoonoaga ke he tupe mo e gahua fakalahi ke he levekiaga fakatino ha tautolu mo e he magafaoa ha tautolu. (1 Timo. 5:8) Kua lagomatai he agaaga he Atua a lautolu kua moua ai ke fakakite e aga fakamokoi a Iehova. Kua iloa a lautolu ia ko e tau tagata foaki, nakai ko e tau tagata moua hokoia. Ko e tau tagata ne uho lahi ki a lautolu ka e nakai ko e tau koloa ti foaki fiafia e lautolu e tau mena moua ha lautolu ka maeke ia lautolu ke foaki. (Fakatai 3:27, 28) Ti nakai fakaatā e lautolu e tutuliaga he tau tupe ke mua hake ke he fekafekauaga he Atua.

12, 13. Kehe mai he agaaga he lalolagi, maeke fēfē he agaaga he Atua ke lauia a tautolu ma e mitaki ni ha tautolu?

¹² Ko e agaaga fe ne fakakite he aga haaku? (Totou Kolose 3:8-10, 13.) Kua fakatupu ki mua he agaaga he lalolagi e tau gahua he tino. (Kala. 5:19-21) Ko e kamatamata mooli ke he agaaga kua fakaohooho a tautolu, ne nakai he magaaho ka holo mitaki e moui ka ko e magaaho ka nakai holo mitaki ai, tuga ka fakaheu he matakainaga taane po ke matakainaga fifine Kerisiano a tautolu, fakaita ki a tautolu, po ke agahala foki ki a tautolu. Lafi ki ai, to liga kitia mitaki ai ke he tau loto kaina ni ha tautolu e agaaga ne gahuahua ai. Kua liga lata ke kumikumi hifo fakatagata. Hūhū ki a koe ni, ‘He mole e ono mahina kua mole, kua tuga nakai e aga he Keriso e aga haaku po ke liu au ke he falu aga kelea he puhala vagahau mo e mahani?’

¹³ Kua lagomatai he agaaga he Atua a tautolu ke ‘tuku kehe e tagata tuai katoa mo e hana tau mahani’ mo e fakatapulu a tautolu ke he “tagata fou.” To lagomatai he mena ia a tautolu ke lahi e fakaalofa mo e totonu. To hihiga a tautolu ke fakamagalo noa e falu, pete kua tuga ke tonuhia e gugū. To nakai liu a tautolu ke tali atu ke he tau nakai fakafili tonu mo e tau favale he “fakafiu oti mo e vale, mo e ita, mo e miha, mo e kupu kelea, katoa mo e tau loto kelea oti kana.” Ka e eketaha fakalahi a tautolu ke ‘hofihofi e fakaalofa.’—Efeso 4:31, 32.

14. Fēfē e onoonoaga he tokologa he lalolagi ke he Kupu he Atua?

¹⁴ Fakalilifu mo e manako nakai au ke he tau tuaga he mahani he Tohi Tapu? (Totou Tau Fakatai 3:5, 6.) Ko e agaaga he lalolagi kua fakakite e totoko ke he Kupu he Atua. Ko lautolu ne fakaohooho he agaaga nei kua fakaheu e mena ne onoono a lautolu ki ai ko e vala nakai aoga he Tohi Tapu, ti manako ni ke he tau aga tuai mo e tau fakaakoaga he tagata. (2 Timo. 4:3, 4) Falu ne tiaki katoatoa e Kupu he Atua. Ko lautolu ia ne tuahā ke he aoga mo e hakotika he Tohi Tapu, kua iloilo ni ke he fofoga ha lautolu. Ne fakavalavai e lautolu e tau tuaga meā i loto hagaao ke he mahani faivao, fakasotoma, mo e tau vevehe. Ne fakaako e lautolu kua “mitaki e mena kelea, ka e kelea e mena mitaki.” (Isaia 5:20) Kua hufia kia a tautolu he agaaga nei? Kua falanaki kia a tautolu ke he iloilo he tagata, putoia e tau manatu ni ha tautolu, ka fehagai mo e tau lekua? Po ke eketaha a tautolu ke muitua e fakatonuaga he Tohi Tapu?

15. He nakai falanaki ni ke he iloilo ha tautolu, ko e heigoa ha tautolu kua lata ke taute?

¹⁵ Kua fakatupu he agaaga he Atua ia tautolu e fakalilifu ke he Tohi Tapu. Tuga e salamo, kua onoono a tautolu ke he kupu he Atua ko e hulu ke he tau hui ha tautolu mo e maama ke he puhala ha tautolu. (Sala. 119:105) He nakai falanaki ni ke he iloilo ha tautolu, kua tua mauokafua a tautolu ke he Kupu tohia he Atua ke lagomatai a tautolu ke iloa e mena hako mai he mena hepe. Kua iloa e tautolu ke fakalilifu e Tohi Tapu ti pihia foki ke manako ke he fakatufono he Atua.—Sala. 119:97.

Fakaako Mai he Fifitakiaga ha Iesu

16. Ko e heigoa ne putoia he moua e “finagalo a Keriso”?

¹⁶ Ke moua e agaaga he Atua, kua lata ia tautolu ke feaki ia tautolu e “finagalo a Keriso.” (1 Kori. 2:16) He “fakalataha ha [ta]utolu a tau loto ke lata mo e finagalo a Keriso Iesu” nukua lata ke iloa e tautolu e puhala ne manamanatu mo e gahua a ia ti fifitaki ki a ia. (Roma 15:5; 1 Pete. 2:21) Manamanatu ke he falu puhala ka taute ai e tautolu.

17, 18. (a) Ko e heigoa ha tautolu ne fakaako mai he liogi a Iesu? (e) Kua lata he ha a tautolu “kia ole atu”?

¹⁷ Liogi ma e agaaga he Atua. Ato feleveia mo e tau kamatamata, ne liogi a Iesu ma e agaaga he Atua ke lagomatai a ia. (Luka 22:40, 41) Kua lata foki ia tautolu ke ole ke he Atua ma e agaaga tapu haana. Kua foaki noa mo e fakamokoi ai e Iehova ke he tau tagata oti ne ole ki a ia ke he tua. (Luka 11:13) Ne pehē a Iesu: “Kia ole atu a mutolu, ti foaki mai ai kia mutolu; kia kumikumi a mutolu, ti moua ai e mutolu; kia tukituki atu a mutolu, ti vevete mai ai kia mutolu. Ha ko ia ka ole to moua e ia, ko e tagata foki ka kumikumi to iloa e ia; to vevete mai foki kia ia kua tukituki atu.”—Mata. 7:7, 8.

¹⁸ Ka kumi e agaaga mo e lagomatai a Iehova, ua mafiti ke oti e ole ki ai. Maeke ia tautolu ke liogi tumau mo e takele ke he liogi. He falu magaaho, kua fakaatā e Iehova haana tau tagata olelalo ke fakatātā e hokulo he manamanatuaga ha lautolu mo e moolioli he tua ha lautolu ato tali e ia e tau liogi ha lautolu.a

19. Ko e heigoa ha Iesu ne taute tumau, ti ko e ha kua lata ia tautolu ke fifitaki a ia?

¹⁹ Omaoma katoatoa ki a Iehova. Kua taute tumau e Iesu e tau mena ne fakafiafia e Matua haana. He taha magaaho, ne kehe e logonaaga ha Iesu ke he puhala ne fehagai a ia mo e tuaga mai he mena ne manako e Matua haana. Ka e, mauokafua a ia he talahau ke he haana Matua: “Ka e aua neke eke hoku loto, ka ko e hau a finagalo.” (Luka 22:42) Hūhū hifo ki a koe, ‘Omaoma nakai au ke he Atua he magaaho ka uka foki ke taute?’ Ko e omaoma ke he Atua kua aoga lahi ma e moui. Kua latatonu a ia mo e omaoma katoa ha tautolu ha ko e ha tautolu a Tufuga, ko e Punaaga mo e Fakatumau he tau momoui ha tautolu. (Sala. 95:6, 7) Nakai fai mena ke hukui e omaoma. Kua nakai moua e tautolu e taliaaga he Atua ka nakai omaoma.

20. Ko e heigoa kua matapatu e moui a Iesu ki ai, ti maeke fēfē a tautolu ke fifitaki ki a ia?

²⁰ Iloa mitaki e Tohi Tapu. He totoko e Iesu e favaleaga fakahako ha Satani ke he tua haana, ne fatiaki e ia e tau Tohiaga Tapu. (Luka 4:1-13) He fehagai mo e tau tagata totoko fakalotu, ne fakaaoga e Iesu e Kupu he Atua ke eke mo takitakiaga haana. (Mata. 15:3-6) Ko e moui katoa a Iesu kua matapatu ke he iloa mo e fakamooli e fakatufono he Atua. (Mata. 5:17) Manako foki a tautolu ke fagai tumau e tau manamanatuaga ha tautolu aki e Kupu he Atua ne fakamalolō e tua. (Filipi 4:8, 9) Ko e kumi magaaho ma e fakaakoaga fakatagata mo e magafaoa ka liga uka ma e falu ia tautolu. Ua kumi e magaaho, kua liga lata ni ia tautolu ke fakatoka e magaaho.—Efeso 5:15-17.

21. Ko e heigoa e fakatokaaga ka fakaaoga e tautolu ke lagomatai a tautolu ke iloa mitaki mo e fakagahua e Kupu he Atua?

²¹ Kua lagomatai he “fekafekau fakamoli mo e loto matala” a tautolu ke fai magaaho ma e fakaakoaga fakatagata mo e magafaoa he fakatoka e afiafi he Tapuakiaga Magafaoa he tau faahi tapu takitaha. (Mata. 24:45) Kua fakaaoga fakamitaki nakai e koe e fakatokaaga nei? Ke lagomatai a koe ke moua e finagalo a Keriso, maeke nakai a koe ke putoia he magaaho fakaako haau e manamanatu fakapapahi ke he mena ne fakaako e Iesu ke he tau matakupu ne fifili e koe? Maeke ia koe ke fakaaoga e Watch Tower Publications Index ke kumi e tau vala tala katoa he matakupu ne fakaako a koe ki ai. Ma e fakatai, mai he 2008 ke he 2010, ko e fufuta ma e fonua he mekasini nei kua ha ha i ai e tau fufuta vala tala ne 12 he mataulu “Ko e Mena ne Ako e Tautolu Mai ia Iesu.” Liga manako a koe ke fakaaoga e tau vala tala nei mo matapatu he fakaakoaga. Kamata he 2006, ne ha ha he Awake! e vala “To Tali Fēfē e Koe?” Ko e hūhū nei ne talaga ke lagomatai ke fakalahi mo e fakahokulo e iloilo haau ke he Kupu he Atua. He ha he fakaaoga e vala ia he fakaholoaga Tapuakiaga he Magafaoa haau he falu magaaho?

Maeke ia Tautolu ke Kautū ke he Lalolagi

22, 23. Ko e heigoa ha tautolu kua lata ke taute ke kautū ke he lalolagi?

²² Ke takitaki he agaaga he Atua, kua lata ia tautolu ke totoko e agaaga he lalolagi. Ko e totokoaga pihia kua nakai mukamuka. Maeke ke taufetului ai, ko e tau ne uka lahi. (Iuta 3) Ka e maeke ia tautolu ke kautū! Ne tala age a Iesu ke he tau tutaki haana: “To moua foki e mutolu e matematekelea ke he lalolagi, kia fakamanavalahi a mutolu, kua kautu au ke he lalolagi.”—Ioane 16:33.

²³ Maeke foki ia tautolu ke kautū ke he lalolagi ka totoko e tautolu e agaaga ia ti taute e tau mena oti kua maeke ia tautolu ke moua e agaaga he Atua. Ti “kaeke ke kau e Atua mo tautolu, ko hai kia taha ke paleko mai kia tautolu?” (Roma 8:31) He moua e agaaga he Atua mo e muitua ke he takitakiaga ia tuga ne fakamau he Tohi Tapu, to moua e tautolu e totoka, mafola, fiafia, mo e fakamooliaga he moui tukulagi ke he lalolagi foou hane tata mai.

[Matahui Tala]

Manatu Nakai e Koe?

• Ko e ha e agaaga he lalolagi kua malolō lahi?

• Ko e heigoa e tau hūhū fā kua lata ke hūhū hifo ki a tautolu ni?

• Ko e heigoa e tau mena tolu kua fakaako e tautolu mai ia Iesu hagaao ke he mouaaga he agaaga he Atua?

[Fakatino he lau 8]

Eke fēfē e falu agelu mo tau temoni?

[Fakatino he lau 10]

Fakaaoga e Satani e agaaga he lalolagi ke taofi aki e tau tagata, ka e maeke ia tautolu ke vevete kehe mai he fakaohooho ia