Totoko Nakai a Koe ke he Agaga he Lalolagi?
“Kua moua e tautolu nakai ko e agaga he lalolagi nai, ka ko e Agaga mai he Atua.”—1 KORINITO 2:12.
1, 2. Ko e heigoa e matematekelea lahi ne hoko ki Bhopal, i Initia, ne putoia ai e kese kona, ka ko e heigoa foki e “kese” kua mua atu e tamate tagata ne fa e fafagu he lalolagi katoa?
HE PO hauhau a Tesema he tau 1984, ne tupu e taha mena fakaofomate lahi i Bhopal, i Initia. He taone ia, kua ha ha i ai e fale gahua vaikona, mo e he po Tesema ia, ne nakai gahua mitaki e tamau he taha tula tuku kese. Ne amanaki ne tau tone he methyl isocyanate ke kamata ke tafe mai ki fafo. He uta fano he matagi, kua havili ki loto he tau fale mo e ki luga he tau magafaoa momohe. Kua hake e numela ke he tau afe ha lautolu ne mamate, mo e tokologa lahi ne auhia ai. Ko e mena pakia fakapa laia he ha gahuaaga kua mua atu ne kelea mai i tuai.
2 Ne momoko e tau tagata he magaaho ne logona e lautolu e mena i Bhopal. Pete ni ia ko e mena tamate tagata lahi, kua gahoa lahi ne tau tagata ne kelipopo he kese ne mavete mai i ai ia lautolu ne kelipopo fakaagaga he “kese” ne kua fafagu he tau tagata he lalolagi katoa he tau aho oti. Kua fakahigoa ai he Tohi Tapu “ko e agaga he lalolagi nai.” Ko e pulagi tamate lahi ia ne fakafekeheaki he aposetolo ko Paulo mo e agaga mai he Atua he magaaho ne pehe a ia: “Ka kua moua e tautolu nakai ko e agaga he lalolagi nai, ka ko e Agaga mai he Atua, kia iloa ai e tautolu e tau mena kua foaki noa mai he Atua kia tautolu.”—1 Korinito 2:12.
3. Ko e heigoa e “agaga he lalolagi”?
3 Ka ko e heigoa moli e kakano he “agaga he lalolagi nai”? Hagaao ke he The New Thayer’s Greek English Lexicon of the New Testament, ko e kakano lahi he kupu “agaga” (Heleni, pneuʹma) ko e “aga po ke malolo ne kua pukeina ai mo e pule ke he solu he ha tagata.” Kua maeke ai ke ha ha he tagata e agaga po ke aga mitaki po ke kelea. (Salamo 51:10; 2 Timoteo 4:22) Kua maeke foki ke ha ha he matakau tagata e agaga, po ke aga tuai. Ne tohia e aposetolo ko Paulo ke he hana kapitiga ko Filemoni: “Kia ha ha he tau agaga ha mutolu e fakaalofa noa he Iki ha tautolu ko Iesu Keriso.” (Filemoni 25) Kua pihia foki—ka e kua lahi mahaki ne fahi—he tokologa lahi e tau tagata he lalolagi ne fa ha ha i ai e aga tuai, mo e “ko e agaga he lalolagi” a nei ne vagahau a Paulo ki ai. Hagaao ke he Word Studies in the New Testament ha Vincent, “ko e kakano he tau kupu ke he matapatu fakaakoaga he mahani kelea ne kua omoomoi e lalolagi nakai tokihala.” Ko e hagahaga agahala ne kua lofia e tau manamanatuaga he lalolagi nei mo e kua malolo lahi e fakaheheina ke he puhala he tau mahani he tau tagata.
4. Ko hai e punaaga he agaga he lalolagi, mo e lauia fefe e tau tagata he agaga nei?
4 Ko e mena kona e agaga nei. Ko e ha? Kakano ha ko e mena hau he “iki he lalolagi nai,” ko Satani. Kua moli, kua fakahigoa a ia ko e “pule ha he pulagi, ko e agaga haia kua gahua ai ni ainei kia lautolu kua faliuliu.” (Ioane 12:31; Efeso 2:2) Kua uka lahi ke hao mai he “pulagi” nei, po ke “agaga haia kua gahua ai ni ainei kia lautolu kua faliuliu.” Kua ha ha i ai he tau mena oti kana he kaufakalatahaaga he tagata. Kaeke ke fafagu hake e tautolu, kua kamata a tautolu ke fehikitakina ke he hana tau aga manamanatu, hana tau foliaga. Kua fakamalolo ai he agaga he lalolagi nai ke ‘mahani ke lata mo e tino,’ kua pehe ai, ke lata mo e nakai mitaki katoatoa he ha tautolu a agahala. Koenaia ko e gahua he mate, “ha ko e mena kaeke ke mahani a mutolu ke lata mo e tino, ti mamate ai a mutolu.”—Roma 8:13.
Kalo Kehe Mai he Agaga he Lalolagi Nai
5. Taute mena pulotu fefe e taha Fakamoli he vaha matematekelea i Bhopal?
5 He magahala he vaha matematekelea i Bhopal, ne fakaofo hake he pu mo e elo he kese kona e taha Fakamoli a Iehova. Ti kua nakai fakatuai a ia ke fafagu hana magafaoa mo e uta fakatepetepe a lautolu ke he puhalatu. Kua tu fakaku ni ke kitia ko e agi ki fe e matagi, ti gahua uka lahi a ia ke fakahaohao he o i loto he moto tagata tokologa fakaatukehe mo e takitaki hana magafaoa ke he tapunu he matiketike i fafo he taone. I ai kua maeke a lautolu ke fakapuke ha lautolu a tau mama mo e matagi mea mo e hauhau ne havili mai he loloto vainamo ne tata ki ai.
6. Kua maeke a tautolu ke o ki fe ke hao mai he agaga he lalolagi?
6 Kua ha ha nakai e taha matatepu tokoluga kua maeke a tautolu ke o ke huhu i ai mai he “pulagi” kona he lalolagi nei? Kua pehe mai e Tohi Tapu kua fai. He amaamanaki ke he vaha ha tautolu, ne tohia he perofeta ko Isaia: “To hoko ni ke he tau aho a mui, to fakamau ai e mouga ha i ai e fale a Iehova ke he tapunu mouga ha atu mouga, to fakatokoluga ai foki ki luga he tau matiketike, ti tafe atu ki ai e tau motu oti kana. To o mai foki e tau motu kehe loga, mo e pehe age a lautolu, O mai a, kia o hake a tautolu ke he mouga a Iehova, ko e fale he Atua a Iakopo; to fakaako mai foki e ia a tautolu ke he hana tau puhala, ti o ai a tautolu ke he hana tau puhala; ha ko e mena fina atu ai e fakatufono i Siona, ko e kupu a Iehova foki ke fina atu ai i Ierusalema.” (Isaia 2:2, 3) Ko e nofoaga tokoluga he tapuaki mea, ko e ‘mouga kua ha i ai e fale a Iehova’ ne kua lagaki hake, ti ko e matakavi naia he palaneta nei ne ataina mai he agaga kona he lalolagi nai ne ponotia ai e fafagu. Ko e kavi naia ne ataina e agaga a Iehova ke tafe ke he vahaloto he tau Kerisiano fakamoli.
7. Ne fakahao mai fefe e tau tagata tokologa he agaga he lalolagi?
7 Kua tokologa ne fafagu hifo he vaha fakamua e agaga he lalolagi nai, ne kua olioli ai he moua e lagomataiaga tuga ne iloa he Fakamoli ia i Bhopal. He mole he vagahau hagaao ki a “lautolu kua faliuliu” ko lautolu ne fafagu e pulagi, po ke agaga, he lalolagi nai, kua pehe e aposetolo ko Paulo: “Ha i ai foki a tautolu, ne mahani fakalataha a tautolu oti kana mo lautolu ke he vaha i tuai he nonofo ai ke he tau manako lahi he tau tino ha tautolu, mo e eke foki e tautolu e tau mena kua loto ki ai e tino katoa mo e tau manatu, ne fanau mai foki a tautolu mo fanauaga he ita, tuga foki a lautolu kua toe; Ka ko e Atua ha ha i ai e fakaalofa lahi ue atu, ha ko e hana fakaalofa lahi ne fakaalofa mai ai a ia kia tautolu, Ne fakamomoui mai e ia a tautolu fakalataha mo Keriso.” (Efeso 2:3-5) Ko lautolu ne fafagu hifo ni hokoia e matagi kona he fakatokaaga he tau mena nei, kua mamate ni ke he kakanoaga fakaagaga. Ka e pete ni ia, fakaaue ki a Iehova, kua loga e tau miliona he vaha nei ne fehola ke he matakavi tokoluga fakaagaga mo e kua hao mai he tuaga moua mate ia.
Tau Fakakiteaga he “Agaga he Lalolagi Nai”
8, 9. (a) Fakakite mai he heigoa kua lata a tautolu ke puipui tumau ke totoko ke he agaga he lalolagi? (e) Liga to maeke fefe e agaga a Satani ke fakakelea a tautolu?
8 Kua havilivili viko agaia e matagi fakahoko mate a Satani ia tautolu. Ti kua lata na tautolu ke puipui ke nakai tafea hifo he matiketike, he liu ke he lalolagi, liga ke ponotia ai e fafagu fakaagaga. Kua lata ni ke mataala tumau ke he mena nei. (Luka 21:36; 1 Korinito 16:13) Ke fakatai ki ai, kia manamanatu la ke he mena moli nei. Kua mahani lahi e tau Kerisiano oti kana mo e tau puhala a Iehova ke he mahani mitaki mo e to nakai talia kua lata e tau gahua kiva tuga e faivao, feuaki, mo e mahani fakasotoma. Ka e, ke he tau tau takitaha kua magahala ke 40,000 e tau tagata ne fakaoti e fakalatahaaga mai he fakatokatokaaga a Iehova. Ko e ha? Ke he tau mena loga, kakano ha ko e tau mahani kiva taha nei ni. Kua maeke fefe e mena ia ke tupu?
9 Kakano ha kua nakai mitaki katoatoa a tautolu oti kana. Ti kua lolelole e kakano, mo e kua lata na tautolu ke tau tumau ke totoko ke he tau hagahaga hepe ne fa hake mai he tau loto ha tautolu. (Fakamatalaaga 7:20; Ieremia 17:9) Ka e taha e mena, kua fakaohooho he agaga he lalolagi nai e tau hagahaga hepe ia. Kua tokologa e tau tagata he lalolagi nei ne nakai kitia ko e hepe e mahani kelea, mo e manatu kua ataina ne tau mena oti, ko e taha vala ai ni he hagahaga he manamanatuaga he fakatokaaga nai a Satani. Kaeke ke fakaata e tautolu a tautolu ni ke he tau manamanatu pihia, ai kia ligaliga, ko e to kamata na tautolu ke manamanatu tuga e lalolagi. Ati nakai leva, kua liga to tupu mai ni he tau manamanatu ia e tau manako hepe kua hoko ai fakahiku ke he agahala kelea lahi. (Iakopo 1:14, 15) Ti kua o hifo tuai a tautolu he mouga tapuaki mea a Iehova ke he kelekele tokolalo he lalolagi kiva a Satani. To nakai moua he ha tagata ne manako ke nofo i ai e moui tukulagi.—Efeso 5:3-5, 7.
10. Ko e heigoa e taha fakakiteaga he pulagi a Satani, mo e kua lata he ha e tau Kerisiano ke kalo kehe mai he mena nei?
10 Kua ha ha moli e agaga he lalolagi he tau mena oti ne viko takai ia tautolu. Ke fakatai ki ai, kua ha ha i ai e aga manamanatu fakateaga mo e fakafiu ne kua feutaaki he tau tagata tokologa e tau momoui. Ha kua nakai fakafiafia he tau tagata politika fatuakiloto kelea po ke goagoa mo e tau takitaki lotu mahani kelea ne lotokai, ati kua nakai fakalilifu e tau mena ne talahau e lautolu ti pihia foki ke he tau mena lalahi. Kua totoko he tau Kerisiano e hagahaga mukamuka nei. He magaaho kua liga ha ha ia tautolu e loto feki mea, kua kalo na tautolu ke aua tamai ke he fakapotopotoaga e agaga fakafiu kua nakai mahani fakalilifu. Ko e puhala vagahau he Kerisiano kua fakaata mai e matakutaku ki a Iehova mai he loto mea. (Iakopo 3:10, 11; fakatatai Fakatai 6:14.) Pete ni ia, kua fuata po ke fuakau a tautolu, kua lata ha tautolu a puhala vagahau ke “aua neke noa . . . e tau kupu mo e fakaalofa, kia fakamasima ke he masima, kia iloa e [tautolu] ke tali fakatonu atu ke he tau tagata oti kana.”—Kolose 4:6.
11. (a) Ko e heigoa e vala ke ua aki he agaga he lalolagi? (e) Ko e ha ne kehe mai ai e tau Kerisiano ia lautolu ne fakaata mai e mena nei?
11 Ko e vihiatia foki e taha hagahaga ne fa mahani mau ke fakaata mai he agaga he lalolagi. Kua mavehevehe e lalolagi ha ko e vihiatia mo e tau faitaua ne fakave ke he tupumaiaga fakamatakavi, mahani fakamotu he motu tote, ko e motu, mo e fekehekeheaki fakatagata foki. Ka e mahomo atu ni e tau mena ka gahuahua e agaga he Atua i ai! Ne tohia he aposetolo ko Paulo: “Aua neke taui atu e kelea ke he kelea he taha; kia tauteute e tau mena gali ki mua he tau tagata oti kana. Kaeke kua maeke ia mutolu, kia nonofo fakamitaki mo e tau tagata oti kana. Ko e tau fakahelehele na e, aua neke taui atu e mutolu, ka kia fakatokatoka atu ke he ita; ha kua tohi mai, Kua pehe mai e Iki, Ha ha ia au ke taui atu, to taui atu e au ni. Haia, kaeke kua hoge a ia kua fai fi kia koe, kia fagai e koe a ia; ka fia inu a ia kia fakainu e koe a ia; ha ko e mena ka eke pihia kua tanaki ai e tau malala kaka ki luga he ulu hana. Aua neke mahala a koe ke he kelea, ka kia mahala e kelea ke he mitaki.”—Roma 12:17-21.
12. Ko e ha ne kalo kehe ai e tau Kerisiano mai he manako koloa lahi?
12 Kua fakaohooho foki he agaga he lalolagi nei e manako koloa lahi. He fakamalolo he lalolagi fakafua koloa, kua manamanatu lahi e tau tagata tokologa ke moua e tau lakau fou, fasone fou, faga motoka fou. Kua fakatupa he “manako lahi he tau mata” a lautolu. (1 Ioane 2:16) Kua tokologa mai ia lautolu ne fuafua ha lautolu a kautuaga he moui ke he fafatiaga he ha lautolu a tau fale po ke ha lautolu a tau tupe ne fakahu. Ko e tau Kerisiano, ne fafagu hifo e matagi mea fakaagaga i luga he mouga tokoluga he tapuakiaga mea a Iehova, kua totoko ai ke he hagahaga nei. Kua iloa e lautolu ka tutuli fakalahi ke he tau koloa he tino to hoko mai e moumouaga. (1 Timoteo 6:9, 10) Ne fakamanatu atu a Iesu ke he hana tau tutaki: “Ha ko e mena nakai moui taha he loga hana tau mena ha i ai.”—Luka 12:15.
13. Ko e heigoa e falu fakakiteaga foki he agaga he lalolagi nei?
13 Kua ha ha i ai falu fakakiteaga he “pulagi” nakai malolo tino he lalolagi nai. Taha ko e agaga totoko. (2 Timoteo 3:1-3) Kua kitia nakai e koe, kua tokologa e tau tagata ne nakai tuai kau fakalataha mo e pule malolo? Kitia nakai e koe ke he hau a gahuaaga i tua kua tolomaki e mahani mau ke nakai gahua ane mai kua onoono mai e taha tagata? Toko fiha e tau tagata ne iloa e koe kua moumou e tau matafakatufono—liga kua talahau fakavai ha lautolu a tau tukuhau po ke kaiha mai he tau gahuaaga? Kaeke kua fano aoga agaia a koe, kua fa fakalolelole nakai a koe ke nakai gahua fakamitaki kakano ha kua onoono hifo e faoa he vahega hau ki a lautolu ne fa kautu ke he tau aoga? Ko e tau mena oti nei ko e tau fakakiteaga he agaga he lalolagi nai ne kua lata e tau Kerisiano ke totoko ki ai.
Totoko Fefe ke he Agaga he Lalolagi Nei
14. Ko e heigoa e tau puhala ne kua kehe mai e tau Kerisiano he tau tagata nakai ko e tau Kerisiano?
14 Ti maeke fefe mogoia a tautolu ke totoko ke he agaga he lalolagi nai ka e nonofo a tautolu he lalolagi? Kua lata na tautolu ke manatu, pete ni kua ha ha i fe mo fe e tau tino ha tautolu, ka e nakai ko e vala he lalolagi a tautolu fakaagaga. (Ioane 17:15, 16) Nakai ko e tau foliaga he lalolagi e tau foliaga ha tautolu. Kua kehe ha tautolu a onoonoaga ke he tau mena. Ko e tau tagata fakaagaga a tautolu, kua vagahau mo e manamanatu “ke he tau kupu kua fakaako mai he Agaga Tapu, ka e nakai ko e tau kupu kua fakaako mai he iloilo he tau tagata, kua fakamatala atu e tau mena he agaga ke he tau kupu he agaga.”—1 Korinito 2:13.
15. Maeke fefe ia tautolu ke totoko ke he agaga he lalolagi?
15 Ko e heigoa kua maeke e tagata ke taute kaeke kua ha ha a ia he matakavi kua takiva he kese kona? Kua maeke a ia ke tuku e ufi mata kese ne tutaki atu ke he tanakiaga matagi mea, po kua maeke ni a ia ke uta kehe e ia a ia ni mai he matakavi. Ko e puhala ke kalo kehe mai he matagi a Satani ka lafi fakalataha e tau lagatau nei. Ke he mena kua maeke ki ai, kua lali a tautolu ke uta kehe e tautolu ni a tautolu mai he ha mena kua maeke he agaga he lalolagi ke lauia e tau manamanatuaga ha tautolu. Ti kua lata a tautolu ke kalo kehe mai he ha feoakiaga hepe, mo e nakai tokanoa e tautolu ni a tautolu ke he ha fakafiafiaaga tino ne fakaohooho e mahani vale, mahani kelea, matutakiaga fakataulatua, mahani fia totoko, po ke ha gahua he tino. (Kalatia 5:19-21) Ka e pete ni ia, ha kua nonofo a tautolu he lalolagi, kua nakai maeke a tautolu ke kalo kehe katoatoa ke nakai tokanoa ke he tau mena nei. Ti kua mahani pulotu a tautolu kaeke kua tututaki atu a tautolu ke he tanakiaga matagi hauhau fakaagaga. Kua fakapuke e tautolu e tau mama ha tautolu, tuga ko e pihia, he fakalataha tumau ke he tau feleveiaaga, fakaako fakatagata, gahua mo e feoaki faka-Kerisiano, mo e liogi. Ke he puhala nei, kaeke ke tafe mai e pulagi a Satani ke he tau mama fakaagaga ha tautolu, kua fakamalolo he agaga he Atua a tautolu ke nakai talia ai.—Salamo 17:1-3; Fakatai 9:9; 13:20; 19:20; 22:17.
16. Fakakite fefe e tautolu e fakamoliaga ko e moua e agaga he Atua?
16 Ko e agaga he Atua ne taute e Kerisiano mo tagata kua kehe mai ia lautolu ne eke mo vala he lalolagi nei. (Roma 12:1, 2) Ne pehe a Paulo: “Ka ko e fua he Agaga ko e fakaalofa, ko e fiafia, ko e mafola, ko e fakauka, ko e totonu, ko e mahani mitaki, ko e tua. Ko e mahani molu, mo e manako fakalatalata; kua nakai fai fakatufono ke he tau mena ia.” (Kalatia 5:22, 23) Kua foaki foki he agaga he Atua ke he Kerisiano e maamaaga hokulo lahi ke he tau mena. Ne pehe a Paulo: “Mo e tau mena he Atua kua nakai iloa e taha, ka ko e Agaga hokoia he Atua.” (1 Korinito 2:11) Ke he kakano ne fa mahani lahi ki ai, kua fakalataha ke he “tau mena he Atua” e tau kupu moli tuga e poa lukutoto, Kautu he Atua i lalo ia Iesu Keriso, ko e amaamanakiaga ke he moui tukulagi, mo e uta keheaga kua tata lahi he lalolagi kelea nei. Fakalataha mo e lagomataiaga he agaga he Atua, kua iloa he tau Kerisiano mo e talia ko e kupu moli e tau mena nei, mo e taute ai he mena nei ha lautolu a onoonoaga ke he moui ke kehe mai he tau tagata he lalolagi. Kua loto fiafia a lautolu he moua ha lautolu a olioli he fekafekau ki a Iehova he magaaho nei, fakalataha mo e amaamanakiaga ke fekafekau tukumalagi ki a ia ne ha ha i mua.
17. Ko hai ne fakatoka e fakataiaga homo ue atu he mahani totoko ke he agaga he lalolagi, mo e fefe?
17 Ko e fakafifitakiaga homo ue atu a Iesu ma lautolu ne totoko ke he agaga he lalolagi nei. Nakai leva he mole e papatisoaga a Iesu, ne lali a Satani ke fakahehe a ia mai he fekafekau ki a Iehova he fakakite e tau kamatamata ne tolu. (Mataio 4:1-11) Kua putoia ai he mena fakahiku e amanakiaga ko e to moua e Iesu e pule ke he lalolagi katoa ka tautui aki e gahua tapuaki tahamaka ki a Satani. Kua maeke a Iesu ke pehe hana manamanatu: ‘Ka taute e au e gahua tapuaki, mo e ka mole he moua e au e pule ke he lalolagi, to fakatokihala au mo e liu ke tapuaki ki a Iehova. Ha ko e pule he lalolagi, to mua atu e tuaga haku ke moua he tau tagata e tau mena aoga mai he mena ne ha ha ia au he magaaho nai ko e kamuta i Nasareta.’ Ne nakai pihia e puhala manamanatu a Iesu. Kua manako a ia ke fakatalitali ato foaki age e Iehova ki a ia e pule ke he lalolagi. (Salamo 2:8) He magaaho ia, mo e he falu magaaho oti foki he moui hana, ne totoko a ia ke he fakaheheina kona he pulagi a Satani. Ti kua, fakakaumahala ai e ia e lalolagi ne kiva fakaagaga.—Ioane 16:33.
18. Kua tamai fefe he totokoaga ha tautolu ke he agaga he lalolagi e fakahekeaga ke he Atua?
18 Ne pehe e aposetolo ko Peteru kua lata a tautolu ke mumui fakatata ke he tau tuagahui a Iesu. (1 Peteru 2:21) Ko e heigoa foki e fakafifitakiaga ne mahomo atu kua ha ha ia tautolu? He tau aho fakamui nei, ha kua fakaheheina ai he agaga he lalolagi, kua fa e tomo lahi ne tau tagata ke he mahani muikau. Ka e kua homo ue atu ai ni ha kua ha ha i loto he lalolagi pihia, e matakavi tokoluga ne tu ai e tapuakiaga a Iehova kua tavanavana mo e mea! (Mika 4:1, 2) Kua moli, kua kitia ai e malolo he agaga he Atua ke he tau miliona tagata ne fa e tafe atu ke he matakavi he tapuaki he Atua, kua totoko ke he agaga he lalolagi nei ne kua kaputia ke he tau mena oti mo e tamai ai e fakalilifu mo e fakahekeaga ki a Iehova! (1 Peteru 2:11, 12) Kia eke ai a tautolu oti ke loto mauokafua ke nonofo tumau he matakavi tokoluga ia ato uta kehe he Patuiki fakauku a Iehova e lalolagi mahani kelea nei mo e tuku a Satani ko e Tiapolo he pahua mo e tau temoni hana. (Fakakiteaga 19:19–20:3) Ati nakai ha ha i ai mogoia e agaga he lalolagi nei. To eke ai ni ko e magaaho monuina lahi a ia!
Maeke Nakai ia Koe ke Fakamaama?
◻ Ko e heigoa e agaga he lalolagi?
◻ Lauia fefe e tau tagata takitokotaha he agaga he lalolagi nei?
◻ Ko e heigoa e falu he tau fakakiteaga he agaga he lalolagi, mo e maeke fefe ia tautolu ke kalo kehe mai?
◻ Fakakite fefe e tautolu kua ha ha e agaga he Atua ia tautolu?
◻ Ko e heigoa e tau monuina ka o mai ki a lautolu ne totoko ke he agaga he lalolagi?
[Fakatino he lau 26, 27]
Mai ia Satani e agaga he lalolagi
Ke kalo kehe mai he agaga he lalolagi, kia fehola mai ke he matakavi tokoluga he tapuakiaga a Iehova