Tau Huhu Mai he Tau Tagata Totou
To liliu tutu mai nakai e tau tagata kaeke kua nakai talia e lautolu e puhala Kerisiano moli he magaaho nei mo e mamate fakamua ato kamata e matematekelea lahi?
Ko e mena mitaki ki a tautolu oti kana ke nakai talia e ha hagahaga ke fakafili atu ke he taha, he mailoga ko e mena fakahiku ni hanai, kua mua e fakafiliaga a Iehova ne kua puhala mai ia Iesu Keriso. (Ioane 5:22; Gahua 10:42; 2 Timoteo 4:1) Ka kua foaki mai he tau Tohiaga Tapu e falu fakailoaaga kua aoga lahi ke tali aki e tau huhu ne mumui mai.
Ko e fakamatalaaga he tala mitaki he Kautu he Atua ke he lalolagi katoa, ko e vala aoga lahi he ‘fakamailoga he haele mai a Iesu.’ Kua fita he kitia e fakamailoga nei, tali mai he magahala fakamua he senetenari nei. Ko e fua he gahua fakamatala nei ne vehevehe e tau tagata he tau motu oti kana ke he fakamoliaga he tala fakatai a Iesu ke he “mamoe” mo e “tau koti.” He fakakatoatoa e fakamatalaaga nei mo e gahua vehevehe, to fakahoko he ‘matematekelea lahi’ e fakaotiaga ke he fakatokaaga mahani kelea nei.—Mataio 24:3, 21, 22; 25:31-46.
Ko Iehova, fakalataha mo e Tama Tane hana, ka fakafili ko hai ne nakai talia e fekau he Kautu ne kua fita e mate ato kamata e matematekelea lahi, ka eke ke fakavahega ko e tau koti. Ne pehe a Iesu to ‘o atu ai’ e tau koti ‘ke he fakahala tukulagi.’ Ha kua pihia, kua maeke ai a tautolu ke manatu fakahiku, ko lautolu ne fifili he Atua kua eke mo tau koti, ka nakai moua e liu tu mai. Kua eke e fakafiliaga ha lautolu ke tatai mo e ha lautolu ne kua “fakahala ke he mahaikava tukulagi” he magaaho he matematekelea lahi.—2 Tesalonia 1:9.
Ka e kua a lautolu ne kua liga kua nakai katoatoa e maamaaga ke he fekau he Kautu, ke maeke ai ke taute e taha fifiliaga iloilo ke loto ke he kupu moli po ke nakai, ato mamate a lautolu he vaha he “tau aho fakamui”?—2 Timoteo 3:1.
Kua tokologa e tau tagata ne mamate he vaha ne kua taute e gahua fakamatala ato hoko e matematekelea lahi, ka moua moli e liu tu mai. Kua fakakite mai he tau mena ka totou e tautolu ia Fakakiteaga 6:7, 8 e mena nei ne hagaao ke he tagata heke solofanua fakatai. Kua tokologa e tau tagata ne mamate ha kua pakia he tauaga, kuku e tau mena kai, mo e tau tatalu kelea lahi. Ha ko e “Hate” ne kua moua a lautolu nei ne pakia he “Mate,” to liliu tutu mai a lautolu he vaha he Pule he Afetau a Keriso, he magaaho ka fakamavete mai e Hate a lautolu oti kana ne mamate i ai. (Fakakiteaga 20:13) Liga iloa fakamua he falu ia lautolu ia ne mamatike hake ke momoui e taha mena he fekau he Kautu ato mamate a lautolu.
Kua lata ha a tautolu ke loto fakaaue lahi, kua nakai toka e Iesu ke he tau tagata ke fifili ko hai ne tuga e mamoe mo e ko hai ne tuga e tau koti! Kua nakai maeke e tau tagata nakai mitaki katoatoa ke fuafua fakamitaki kua lahi fefe e tau magaaho kua lata ne kua foaki atu ke he tagata ke logona mo e talia e tala mitaki. Kua maeke nakai a tautolu ke iloa ko e fefe e loto hana po kua loto moli nakai a ia ke he tututonu? Kua maeke fefe a tautolu ke fuafua ko e lahi fefe e mena ka taute e ia ha ko e hana magafaoa, hana feaki hake fakalotu, po ke falu fakaohoohoaga? Kua kitia moli kua nakai maeke. Ka e maeke a tautolu ke iloa moli kua maeke e Atua ko Iehova mo Iesu Keriso ke fuafua e tau mena ia mo e maeke foki ke taute e tau fakafiliaga ne mitaki katoatoa, tonu moli, mo e tututonu.—Teutaronome 32:4; Isaia 11:1-5.
Ha ko e mena ia, kua nakai ha ha i ai e ha kakano ia tautolu ke fakataitai ko hai ia lautolu ne kua nakai leva e mamate he magaaho kua mole ka liliu ke tutu mai po ke nakai. Kua nakai mai e pule ki a tautolu ke taute e mena nei. (Fakatatai Luka 12:13, 14.) Ko e mena pulotu lahi ke fakatalitali a tautolu ke he tau fifiliaga he Ikifakafili tututonu, ko Iehova ko e Atua mo Iesu Keriso. To foaki lahi mai he mena nei e loto mafola he fekafekau a Iehova. To lagomatai foki a tautolu ke onoono fakamitaki ke he mena ne kua kotofa ke taute e tautolu—‘kia o atu a ke eke e tau motu oti kana mo tutaki, fakaako atu a lautolu ke omaoma ke he tau mena oti ne tala atu e au ki a mutolu.’—Mataio 28:19, 20.
[Fakatino Credit Line he lau 31]
Tau mamoe Leicester, Meyers