Tau Huhu Mai he Tau Tagata Totou

Kua fiafia lahi a tautolu ha ko e ha tautolu a fakaakoaga he tala fakatai ha Iesu ke he tau mamoe mo e tau koti. He kitekite atu ke he maamaaga fou ne tuku mai he “Kolo Toko” ia Oketopa 15, 1995, kua maeke agaia nakai a tautolu ke talahau ko e hane fakalataha e Tau Fakamoli a Iehova ke he gahua vevehe?

E. Kua maama ai, kua tokologa ne manamanatu hagaao ke he mena nei kakano kua pehe e Mataio 25:31, 32: “Ka hau e Tama he tagata mo e hana lilifu, ko e tau agelu tapu oti foki fakalataha mo ia, ti nofo ai a ia ke he hana nofoaiki lilifu; To fakapotopoto ki mua hana e tau motu oti kana; ati vevehe kehekehe ai e ia a lautolu, tuga e leveki mamoe kua vevehe e tau mamoe mo e tau koti.” Kua fakakite he Kolo Toko ia Novema 1, 1995, ko e ha ne hagaao e tau kupu nei ke he vaha ne mole atu e kamataaga he matematekelea lahi. To hau a Iesu mo e hana lilifu fakalataha mo e hana tau agelu mo e to nofo ai i luga he hana nofoaiki he fakafiliaga. Mogoia, ka vevehe e ia e tau tagata. Ke he puhala fe? To fakahoko e ia e tau fifiliaga ne fakave ke he tau mena ne taute po ke nakai taute he tau tagata ato hoko e magaaho ia.

Kua maeke ia tautolu ke fakatatai e mena nei ke he tauteaga he fakaholoaga he tau fakamatafakatufono ne takitaki atu ke he hopoaga. Kua leva e magaaho ne ati hake e tau fakamoliaga ato pule e hopoaga mo e taute e fakafiliaga. Ko e fakamoliaga to eke nakai e tau tagata ne momoui he mogonei mo tau mamoe po ke tau koti ko e mena kua leva tuai e fakaputuputu. Mo e hane lafi agaia ki ai. Ka e he magaaho ka nofo a Iesu i luga he hana nofoaiki, to fakaoti katoatoa ai e fakafiliaga. To mautali a ia ke fakahoko e fakafiliaga. To vevehe e tau tagata ke he mate tukulagi po ke moui tukulagi.

Ka e, ha kua ha ha agaia anoiha e veheveheaga he tau tagata ke he moui po ke ke he mate ne totoku he Mataio 25:32, kua nakai kakano a ia kua nakai fai vevehe, po ke fakamavehevehe, ka taute ato hoko e magaaho ia. Ko e Tohi Tapu, ia Mataio veveheaga 13, ne talahau taha gahua vevehe ne taute fakamua atu. Kua fulufuluola ai, ko e tohi Unit­ed in Worship of the Only True God, tau lau tohi 179-80, ne tohia e mena nei i lalo he mataulu tala “Veheveheaga he Tau Tagata.”a Ne talahau he tohi: “Kua ha ha ai foki e falu mena tutupu mua ue atu ne feoaki fakamatafeiaga e Iesu ke he fakahikuaga he fakatokaaga he tau mena. Ko e taha he tau mena nei ko e veveheaga he ‘fanau haia he kautu’ mai he ‘fanau haia hana kua kelea.’ Ne vagahau a Iesu ke he mena nei he hana a tala fakatai hagaao ke he fonua saito ne to he fi aki e tau sitania.”

Kua hagaao atu e tohi ke he fakataiaga ha Iesu ne ha ha he Mataio 13:24-30 mo e kua fakamaama mai he tau kupu 36-43. Mailoga la he kupu 38 ko e tau tega mitaki he saito kua fakatino e fanau he Kautu, ka ko e tau sitania kua fakatino e fanau hana kua kelea. Ne fakakite he tau kupu 39 mo e 40 ko e he ‘fakaotiaga he lalolagi’​—he magahala ne nonofo ai a tautolu he mogonei​—hane fakaputuputu e tau sitania. Kua vevehe kehe ai a lautolu mo e fakahiku ke tugi, fakaotioti.

Ko e fakataiaga kua hagaao ke he tau Kerisiano fakauku (ne kua ui ko e tau matakainaga ha Keriso he tala fakatai ke he tau mamoe mo e tau koti). Kua maamateka agaia, ko e veheveheaga mua e aoga kua taute moli he magahala ha tautolu, mo e tau fakauku kua kitia mitaki mai ia lautolu ne talahau noa ko e tau Kerisiano ka e kua taute e lautolu a lautolu ke eke mo “fanau haia hana kua kelea.”

Ne foaki e Iesu e falu fakafifitakiaga he tau tagata ne kua fakamavehevehe, po ke vevehe. Manatu la na talahau a ia hagaao ke he hala laulahi ne takitaki atu ke he fakaotiaga: “Kua tokologa foki a lautolu kua huhū atu ki ai.” (Mataio 7:13) Nakai ni ko e talahauaga a ia hagaao ke he mena tupu he fakamuiaki. Ko e talahauaga hagaao ke he fakatuaga holo ki mua, tuga ni kua moli he mogonei ke he tokogaogao ne moua e hala pukilu ne takitaki atu ke he moui. Manatu la, foki, ko e magaaho ne fakafano atu e tau aposetolo, ne tala age a Iesu to moua e lautolu e falu ne kua lata. Ko e falu kua nakai lata, mo e ko e tau aposetolo kua lata ke lulululu e kelekele he tau hui ha lautolu “kia eke mo talahau” ke he tau tagata pihia. (Luka 9:5) Nakai kia kua moli ko e mena taha ia ne tupu he fakatumau e tau Kerisiano he ha lautolu a fekafekauaga ke he tau tagata he vaha nei? Ko e falu kua talia mitaki ai, ka ko e falu kua fakaheu e lautolu e fekau faka-Atua ne fa e ta mai e tautolu.

Ne tohi mai he tau vala tala he The Watch­tow­er ne fehagaao atu ke he tau mamoe mo e tau koti: “Pete ni kua ha ha anoiha e fakafiliaga ne fakamaama i loto he tala fakatai, kua eke ke fai mena taute foki ne mua e aoga he mogonei. Ko tautolu ko e tau Kerisiano kua lavelave ke he gahua fakamoui he fakapuloa e fekau ne fakatupu e veveheaga he vahaloto he tau tagata. (Mataio 10:32-39).” I loto he vala tala ia he Mataio veveheaga 10, ne totou e tautolu na pehe a Iesu ke mumuitua ki a ia ka fakatupu e veveheaga​—ko e matua tane ke he tama tane, tama fifine ke he matua fifine.

Ti he fakahikuaga, kua takitaki he tau matakainaga he Keriso ne fakauku he agaga e fakamatalaaga he fekau he Kautu ke he lalolagi katoa. He logona ai he tau tagata mo e omoomoi ai ke talia po ke nakai talia, kua fakakite tuai e lautolu a lautolu. Ko tautolu ko e tau tagata kua nakai maeke, mo e kua nakai lata ia tautolu, ke talahau, ‘Ko e tagata nei ko e mamoe; ko e tagata na ko e koti,’ ha ko e kakano ne talahau he Mataio veveheaga 25. Ka e, he fakatapakupaku e tautolu e tau tagata ke he tala mitaki kua fakaata ai a lautolu ke fakakite ko e tutu i fe a lautolu​—ko hai a lautolu mo e fefe e kitekiteaga ha lautolu ke he tau matakainaga ha Iesu. Ti, tuga ai e tau fakamoliaga ne fakaputuputu ma e hopoaga, kua kitia maali ai e veheveheaga he vahaloto ha lautolu ne lagomatai e tau matakainaga ha Iesu mo lautolu ne nakai mahalo ke lagomatai a lautolu. (Malaki 3:18) Tuga ne fakakite he The Watch­tow­er, to nakai leva to nofo a Iesu he hana nofoaiki mo e taute e fakafiliaga, ko e tau tagata kua vevehe moli ai he fakahikuaga ke he moui po ke ke he mate.

[Matahui Tala]