To Tu Fefe a Koe ki Mua he Nofoa Fakafili?

“Ka hau e Tama he tagata mo e hana lilifu, ko e tau agelu tapu oti foki fakalataha mo ia, ti nofo ai a ia ke he hana nofoaiki lilifu.”​—MATAIO 25:31.

1-3. Ko e heigoa e kakano ma e ha tautolu a onoonoaga mitaki hagaao ke he fakafiliaga tonu?

‘HALA PO KE NAKAI?’ Tokologa ne mahalohalo he logona e lautolu e tau hokotaki hagaao ke he falu a hopoaga. Liga fa lali e tau ikifakafili mo e matakau fakafili ke fakamoli ka e fa kautu tumau nakai e fakafiliaga tonu? Nakai kia kua fa logona e koe e tau mena nakai tonu mo e tau fakalavelave he fakaholoaga he fakafiliaga? Nakai ko e mena fou e nakai fakafiliaga tonu pihia, tuga he kitia e tautolu he fakataiaga ha Iesu ne moua ia Luka 18:1-8.

² Ko e heigoa ni e iloaaga hau mo e fakafiliaga tonu he tagata, kia mailoga e talahauaga a Iesu: “Nakai kia fakafili he Atua e tau mena ha lautolu ne fifili e ia, ha ha ne tauui a lautolu kia ia ke he aho mo e po . . . ? Kua tala atu e au kia mutolu, To fakafili vave e ia e tau mena ha lautolu. Ka hau e Tama he tagata, mailoga he ha ke moua mai e ia e tua ke he lalolagi?”

³ E, to kitia ki ai e Iehova to fakahiku e tau fekafekau hana ke moua e fakafiliaga tonu. Kua putoia ai a Iesu, mua atu he mogonei ha kua nonofo a tautolu he “tau aho fakamui” he fakatokaaga kelea nei. Nakai leva to fakaaoga e Iehova e Tama malolo lahi hana ke tatafi kehe e mahani kelea he lalolagi. (2 Timoteo 3:1; 2 Tesalonia 1:7, 8; Fakakiteaga 19:11-16) Maeke ia tautolu ke moua e loto matala ke he gahua ha Iesu mai he taha he hana a tau fakataiaga fakamui ne foaki e ia, kua mahani ke iloa ko e fakatai ke he tau mamoe mo e tau koti.

4. Ko e maama fefe e tautolu e magaaho tonu he fakatai ke he tau mamoe mo e tau koti, ka e kua onoono atu he ha a tautolu he mogonei ke he fakatai? (Tau Fakatai 4:18)

⁴ Kua leva tuai he maama e tautolu ko e hagaao e fakatai ki a Iesu ne nofo hifo mo Patuiki he 1914 mo e kua taute e tau fakafiliaga tali mai he mogoia​—ko e moui tukulagi ma e tau tagata ne kitia moli ke tuga e tau mamoe, mo e mate tukumalagi ma e tau koti. Ka e ko e liu manamanatu atu foki ke he fakatai kua taute ai ke hiki e maamaaga he magaaho tonu ne tala ki ai mo e ko e mena ne fakatai ki ai. Kua fakamalolo he hakahakaaga nei e aoga he ha tautolu a gahua fakamatala mo e he aoga he tali he tau tagata. Ke kitia ai e matapatu ke he maamaaga hokulo nei he fakatai, kia o mai a tautolu ke manamanatu atu ke he mena ne fakakite he Tohi Tapu hagaao ki a Iehova mo Iesu, ko e tau Patuiki mo e tau Ikifakafili.

Iehova ko e Ikifakafili Mua Ue Atu

5, 6. Ko e ha kua lata ai ke kitia a Iehova ko e Patuiki mo e Ikifakafili?

⁵ Na pule a Iehova ke he lalolagi mo e lagi katoatoa mo e malolo ki luga he tau tufugatia oti. He nakai fai kamataaga mo e nakai fai fakaotiaga, ko ia ko e “Patuiki tukulagi.” (1 Timoteo 1:17; Salamo 90:2, 4; Fakakiteaga 15:3) Kua ha ha ia ia e pule malolo ke taute e tau poakiaga, po ke tau matafakatufono, mo e ke omoomoi e tau mena nei. Ka kua putoia e pule malolo hana ke eke mo Ikifakafili. Kua talahau mai ia Isaia 33:22: “Ko Iehova ko e ha tautolu a Fakafili a ia, ko Iehova ko e ha tautolu a Pule, ko Iehova ko e ha tautolu a Patuiki, to fakamoui e ia a tautolu.”

⁶ Kua leva he mailoga he tau fekafekau he Atua a Iehova ko e Ikifakafili he tau tutuaga mo e he tau matakupu. Ke fakatai ki ai, he mole he fuafua he “fakafili he lalolagi oti” e tau fakamoliaga hagaao ke he mahani kelea a Sotoma mo Komora, ne fakafili ua e ia kua lata e tau tagata ke fakaotioti mo e omoi e fakafiliaga tututonu ia. (Kenese 18:20-33; Iopu 34:10-12) Kua lata moli ke fakamafana mai ki a tautolu he iloa ko Iehova ko e Ikifakafili tututonu ne taute tumau hana tau fakafiliaga!

7. Fefe e aga a Iehova ko e Ikifakafili he fakafehagai mo Isaraela?

⁷ I Isaraela i tuai, ne fa taute fakahako age e Iehova he falu mogo e fakafiliaga. Nakai kia kua fakamalolo a koe he vaha ia ke iloa ko e Ikifakafili mitaki katoatoa ne fifili e tau mena? (Levitika 24:10-16; Numera 15:32-36; 27:1-11) Kua foaki foki he Atua e “tau fakafiliaga” ne kua mitaki katoatoa ke eke mo tau fakaveaga ma e fakafiliaga. (Levitika 25:18, 19; Nehemia 9:13; Salamo 19:9, 10; 119:7, 75, 164; 147:19, 20) Ko ia ko e “fakafili he lalolagi oti,” ti kua lauia ai a tautolu oti.​—Heperu 12:23.

8. Ko e heigoa e fakakiteaga aoga ne ha ha ia Tanielu?

⁸ Kua “kitiamata” e tautolu e fakamoliaga ne hagaao atu ke he mena nei. Kua foaki age ke he perofeta ko Tanielu e fakakiteaga ke he tau manu favale lahi ne hukui e tau fakatufono po ke tau kautu. (Tanielu 7:1-8, 17) Ne lafi atu e ia: “Ato tuku mai e tau nofoaiki, ne nofo ai foki A ia mai tuai hana tau aho, kua hina hana tapulu tuga ne kiona.” (Tanielu 7:9) Mailoga la ne kitia e Tanielu e tau nofoaiki “ne nofo ai foki A ia mai tuai hana tau aho [Iehova].” Kia huhu hifo ki a koe ni, ‘Kua fakamoli ka e Tanielu a nei e Atua ne eke mo Patuiki?’

9. Ko e heigoa e taha kakano he ‘nofo hifo’ he nofoaiki? Talahau e tau fakataiaga.

⁹ Moli, he falu magaaho ka totou e tautolu ko e “nofo ai” e taha he nofoaiki, liga to manatu a tautolu kua eke a ia mo patuiki, ha kua fakaaoga he Tohi Tapu he falu magaaho e vagahau pihia. Ke fakatai ki ai: “Kua eke a [Simeri] mo patuiki, kua nofo a ia ke he hana nofoaiki, ti . . . ” (1 Tau Patuiki 16:11; 2 Tau Patuiki 10:30; 15:12; Ieremia 33:17) Ne talahau he perofetaaga faka-Mesia: “To nofo foki a ia i luga hana nofoaiki mo e pule ai a ia.” Ti ko e mena ia, kua maeke foki e ‘nofo he nofoaiki’ ke kakano kua eke mo patuiki. (Sakaria 6:12, 13) Kua fakamaama ai a Iehova kua eke mo Patuiki ne nofo he nofoaiki. (1 Tau Patuiki 22:19; Isaia 6:1; Fakakiteaga 4:1-3) Ko ia ko e “Patuiki tukulagi.” Ka e, he fakakite ai e ia e puhala fou he pule katoatoa, kua liga pehe mai a ia kua eke tuai mo Patuiki, ke tuga kua nofo hifo he nofoaiki fou hana.​—1 Nofoaga he Tau Patuiki 16:1, 31; Isaia 52:7; Fakakiteaga 11:15-17; 15:3; 19:1, 2, 6.

10. Ko e heigoa e gahua ne mua he tau patuiki Isaraela? Fakamaama.

¹⁰ Ka e ko e alito he tala anei: Ko e feua ne mua atu he tau patuiki i tuai ko e fanogonogo ke he tau tutuaga mo e foaki e tau fakafiliaga. (Tau Fakatai 29:14) Manamanatu la ke he fakafiliaga pulotu ha Solomona he magaaho ne ua e fifine ne manako ke he taha e tama. (1 Tau Patuiki 3:16-28; 2 Nofoaga he Tau Patuiki 9:8) Ko e taha mai he hana tau fale fakatufono ko e “fakamaluaga ma e nofoaiki, ke fakafili ai e ia,” kua fakahigoa foki “ko e fakamaluaga ke fakafili mena.” (1 Tau Patuiki 7:7) Kua fakamaama a Ierusalema mo matakavi ne “tu ai e tau nofoaiki ke fakafili ai.” (Salamo 122:5) Kua maaliali ai, ko e ‘nofo hifo he nofoaiki’ kua kakano ai foki ke fakagahuahua e pule malolo ke fakafili.​—Esoto 18:13; Tau Fakatai 20:8.

11, 12. (a) Ko e heigoa ne fakakite mai he nofo hifo a Iehova, ne talahau ia Tanielu veveheaga 7? (e) Fakamoli fefe he falu a kupu Tohi Tapu ko e nofo hifo a Iehova ke fakafili?

¹¹ Kia o mai a tautolu he mogonei ke liliu atu ke he fakakiteaga ne kitia e Tanielu ‘a Ia ne mai i tuai hana tau aho ne nofo hifo.’ Ne lafi atu ia Tanielu 7:10: “Ne eke ai e fakafiliaga, mo e fofola ai e tau tohi.” E, kua nofo ai a Ia ne Mai i Tuai Hana Tau Aho ke foaki e fakafiliaga hagaao ke he pule he lalolagi mo e ke fakafili e Tama he tagata ke lata ke pule. (Tanielu 7:13, 14) Ti kua totou ai e tautolu kua “haele mai a ia Ne mai i tuai hana tau aho, mo e tuku atu e ia e fakafiliaga ke he tau tagata tapu,” ko lautolu kua fakafili ke lata ke pule mo e Tama he tagata. (Tanielu 7:22) Ke he fakahikuaga ne “nofo e fakafiliaga” mo e foaki e fakafiliaga velagia ke he kautu fakamui he lalolagi.​—Tanielu 7:26.a

¹² Ti kua kakano ai, ko e kitiaaga ha Tanielu ke he Atua ne ‘nofo he nofoaiki’ ko e hauaga Hana ke taute e fakafiliaga. Ne lologo a Tavita he mogo fakamua: “Kua eke e [Iehova] haku a fakafiliaga mo e haku a taofi tonu; kua nofo a koe ke he nofoaiki ke fakafili tonu ai.” (Salamo 9:4, 7) Ti tohia e Ioelu: “Kia lagalagā ai e tau motu kehe, mo e o hake a lautolu ke he pahua a Iehosafata, ha ko e mena to nofo ai au [Iehova] ke he mena ia ke fakafili ai e tau motu oti nai.” (Ioelu 3:12; fakatatai Isaia 16:5.) Kua ha ha tokoua a Iesu mo Paulo he tau tutuaga fakafili ke he mena ne nofo ai e tagata ke fanogonogo ke he tuaga mo e taute e fakafiliaga.b​—Ioane 19:12-16; Gahua 23:3; 25:6.

Tuaga ha Iesu

13, 14. (a) Ko e heigoa e fakamoliaga ne ha ha he tau tagata he Atua ko e to eke a Iesu mo Patuiki? (e) Ko e magaaho fe ne nofo hifo a Iesu he hana a nofoaiki, mo e ko e heigoa e kakano ne pule a ia mai he 33 V.N. atu ki mua?

¹³ Ko e Patuiki mo e Ikifakafili a Iehova. Ka e kua a Iesu? Kua pehe e agelu ne fakapuloa e fanauaga hana: “To foaki atu he Iki ko e Atua kia ia e nofoaiki a Tavita hana matua; . . . ko e hana kautu foki nakai fai fakaotiaga ia.” (Luka 1:32, 33) To tumau ai a Iesu ke eke mo hakeaga he pule faka-Tavita. (2 Samuela 7:12-16) To pule mai a ia he lagi, ha kua talahau e Tavita: “Kua pehe mai e kupu a Iehova ke he haku a Iki [Iesu], Kia nofo a koe ke he haku a lima matau, ato eke e au a lautolu kua fai fi kia koe mo fakatuaga hui hāu. To fakafano atu e Iehova i Siona e tokotoko he hāu a malolo; kia pule a koe ki mua ha lautolu kua fai fi kia koe.”​—Salamo 110:1-4.

¹⁴ To hoko mai ai a fe e mena ia? Nakai pule faka-Patuiki a Iesu he magaaho ne tagata. (Ioane 18:33-37) He 33 V.N., ne mate a ia, kua liu fakatu mai, ti haele ke he lagi. Ne talahau mai ia Heperu 10:12: “Ka ko ia, kua eke e ia e poa taha mo e tau hala, ti nofo tukulagi ai a ia ke he fahi matau he Atua.” Ko e heigoa e pule malolo ne moua e Iesu? “Mo e fakanofo [he Atua] a ia ke he hana fahi matau ke he tau mena ha he lagi, Kua mua ke he tau iki lalahi oti kana, mo e tau pule, mo e tau toa, mo e tau iki, . . . ti tuku atu a ia ke eke mo ulu he tau mena oti ke he ekelesia.” (Efeso 1:20-22) Ha kua ha ha ia Iesu he mogoia e pule fakapatuiki ke he tau Kerisiano, kua maeke ai ia Paulo ke tohia kua “laveaki e [Iehova] a tautolu mai he pule he pouli, ti ta mai a tautolu ke he kautu he hana Tama fakahele.”​—Kolose 1:13; 3:1.

15, 16. (a) Ko e ha ne talahau ai e tautolu ko e nakai eke a Iesu mo Patuiki he Kautu he Atua he 33 V.N.? (e) Ti kamata ne fe a Iesu ke pule he Kautu he Atua?

¹⁵ Ka e he magaaho ia, kua nakai taute a Iesu mo Patuiki mo e Ikifakafili he tau motu. Kua nofo a ia he tapa he Atua, ke fakatalitali ke he magaaho ke eke mo Patuiki he Kautu he Atua. Ne tohia e Paulo hagaao ki a ia: “Tala age ne fe a ia ke he taha agelu, Nofo a koe ke he fahi matau haku, ato eke e au a lautolu kua fai fi kia koe mo fakatuagahui hāu.”​—Heperu 1:13.

¹⁶ Kua lomi fakailoa he Tau Fakamoli a Iehova e tau fakamoliaga loga ko e vaha ne fakatalitali ai a Iesu kua fakaoti he 1914, he magaaho ne eke a ia mo pule he Kautu he Atua i luga he tau lagi nakai kitia mata. Kua talahau mai ia Fakakiteaga 11:15, 18: “Ko e tau kautu he lalolagi kua eke ma e Iki ha tautolu mo e hana Keriso, to eke foki a ia mo patuiki tukulagi tukumuitea.” “Ne ita foki e tau motu, kua hoko mai tuai hau a ita.” E, kua fakakite he tau motu e feitaaki ke he taha mo e taha he magahala he Felakutaki I he Lalolagi. (Luka 21:24) Ko e tau felakutaki, tau mafuike, tau gagao, tau hoge, mo e tau mena pihia, ne kua kitia e tautolu tali mai he 1914 kua fakamoli kua pule tuai a Iesu he mogonei he Kautu he Atua, mo e kua tata mai e fakaotiaga fakahiku he lalolagi.​—Mataio 24:3-14.

17. Ko e heigoa e tau matapatu tala ne kua moua e tautolu?

¹⁷ Ko e fakamanatu fakaku anei: Kua maeke foki ke talahau ko e nofo e Atua he nofoaiki ko e Patuiki, ka e ke he taha kakano foki kua maeke ia ia ke nofo hifo he hana a nofoaiki ke fakafili. He 33 V.N., ne nofo a Iesu he fahi matau he Atua, ti ko e Patuiki a ia he mogonei he Kautu. Ka e taute nakai a Iesu, ko e Patuiki ne fa e pule he mogonei, mo Ikifakafili foki? Ti ko e ha kua lauia ai a tautolu he mena nei, ke mua atu he magaaho nei?

18. Ko e heigoa e fakamoliaga ne ha ha i ai, ko e to eke foki a Iesu mo Ikifakafili?

¹⁸ Ko Iehova, ne kua ha ha e tonu ke kotofa e tau ikifakafili, kua fifili ai a Iesu mo Ikifakafili he hokotia ke he tau fakatufono Hana. Fakakite e Iesu e mena nei he magaaho ne vagahau hagaao ke he tau tagata ne taute ke moui fakaagaga: “Ha ko e mena nakai fakafili he Matua taha, ka kua tuku mai ke he Tama e fakafiliaga oti kana.” (Ioane 5:22) Ka e, kua molea atu e gahua fakafili ha Iesu he faga fakafiliaga pihia, ha ko e ikifakafili a ia he tau tagata momoui mo e mamate. (Gahua 10:42; 2 Timoteo 4:1) Na lagataha he talahau mai e Paulo: “[Ko e Atua] kua kotofa e ia e aho ke fakafili ai e lalolagi mo e tututonu he tagata [Iesu] kua kotofa ne ia; kua fakamoli mai ai e ia ke he tau tagata oti kana, he fakatu mai e ia a ia.”​—Gahua 17:31; Salamo 72:2-7.

19. Ko e ha kua tonu ai ke tala hagaao ki a Iesu ko e nofo hifo mo Ikifakafili?

¹⁹ Kua hako nakai a tautolu he fakaoti ke pehe kua nofo hifo a Iesu he nofoaiki lilifu he kotofaaga pauaki he Ikifakafili? E. Ne tala age a Iesu ke he tau aposetolo: “Ko mutolu kua mumui mai kia au, ka nofo e Tama he tagata ke he hana nofoaiki lilifu ke he fakafouaga, ti nonofo ai foki a mutolu ke he tau nofoaiki ne hogofulu ma ua, ke fakafili ai e tau faoa a Isaraela ne hogofulu ma ua.” (Mataio 19:28) Pete ni ko e Patuiki a Iesu he Kautu he mogonei, ko e gahua foki hana ne talahau ia Mataio 19:28 to putoia ai foki he nofo ke he nofoaiki ke fakafili ke he magahala he Afe Tau. Ke he magaaho ia to fakafili e ia e tau tagata oti, ko lautolu ne tututonu mo lautolu ne hepehepe. (Gahua 24:15) Ko e mena lagomatai lahi ke mauloto e mena nei he fuluhi e tautolu e onoonoaga ha tautolu ke he taha mai he tau fakatai a Iesu ne hagaao ke he ha tautolu a vaha mo e ke he ha tautolu a tau momoui.

Ko e Heigoa ne Talahau he Fakatai?

20, 21. Ko e heigoa ne huhu he tau aposetolo a Iesu, hagaao ke he vaha ha tautolu, ati takitaki atu ke he huhu fe?

²⁰ Nakai leva to hoko e mate a Iesu, ne huhu e tau aposetolo hana ki a ia: “Po ke hoko a fe e tau mena ia? po ke heigoa foki e fakamailoga he hāu a haele mai, mo e fakaotiaga he lalolagi?” (Mataio 24:3) Kua talahau tuai e Iesu e tau mena tutupu ne mua ue atu he lalolagi ato “hoko mai ai e fakaotiaga.” He nakai leva to hoko mai e fakaotiaga ia, ko e tau motu to “kitia ai e lautolu e Tama he tagata kua hau ke he tau aolagi, mo e malolo, mo e lilifu lahi.”​—Mataio 24:14, 29, 30.

²¹ To maeke fefe, mogoia, e tau tagata ke fehagai he magaaho ka hau e Tama he tagata he hana lilifu? O mai a tautolu ke kumikumi ki ai mai he fakatai he tau mamoe mo e he tau koti, ne kamata mo e tau kupu: “Ka hau e Tama he tagata mo e hana lilifu, ko e tau agelu tapu oti foki fakalataha mo ia, ti nofo ai a ia kehe hana nofoaiki lilifu; To fakapotopoto ki mua hana e tau motu oti kana.”​—Mataio 25:31, 32.

22, 23. Ko e fakakite mai he heigoa ko e fakatai ke he tau mamoe mo e tau koti kua nakai kamata hana fakamoli he 1914?

²² Lauia nakai e fakatai nei he magaaho ne nofo hifo a Iesu he malolo fakapatuiki he ­1914, ke tuga kua leva he maama e tautolu? Moli, kua tala foki e Mataio 25:34 ki a ia ko e Patuiki, ti kua fai kakano foki e fakatai tali mai he eke a Iesu mo Patuiki he 1914. Ka ko e heigoa e fakafiliaga ne taute e ia he mole fakatote e mogoia? Nakai ko e fakafiliaga he “tau atu motu oti.” Ka e, kua fuluhi atu a ia ki a lautolu ne talahau ke ha ha he “fale he Atua.” (1 Peteru 4:17) Ke felauaki mo e Malaki 3:1-3, ko Iesu, ko e uta fekau a Iehova, ne tivi fakafili e tau Kerisiano fakauku ne toe he lalolagi. Kua hoko foki mai e magaaho ma e fakafiliaga fakahala ki a Kerisitenitome, ne talahau fakavai ko e “fale he Atua.”c (Fakakiteaga 17:1, 2; 18:4-8) Ka e nakai fai fakakiteaga ko e he magaaho ia, po ke tali mai he magaaho ia, ko e nofo a Iesu ke fakafili fakahiku e tau tagata he tau atu motu oti kua eke mo tau mamoe po ke tau koti.

²³ Kaeke ke kumikumi atu a tautolu ke he gahua a Iesu i loto he fakataiaga, ti kitia ai e tautolu a ia ne fakafili fakahiku e tau atu motu oti. Kua nakai fakakite mai he fakatai to fakaloa atu e fakafiliaga pihia ke he tau tau loga, ke tuga ko e fakafili e tau tagata oti ne mamate he magahala he tau hogofulu tau kua mole, ke lata ke moua e mate tukulagi po ke moui tukulagi. Kua tuga ai ko e tokologa ne mamate he tau hogofulu tau e kua mole ne kua o atu ke he tukuaga ni he tau tagata. (Fakakiteaga 6:8; 20:13) Ko e fakatai, he mogoia, kua fakamaama mai e magaaho ka fakafili e Iesu e tau tagata he tau “atu motu oti” ne kua momoui mo e fakafehagai mo e fakahokoaga he hana a fakafiliaga fakahala.

24. To fakamoli a fe e fakatai ke he tau mamoe mo e tau koti?

²⁴ Ke he a falu kupu foki, kua tuhi atu e fakatai ki anoiha ke he magaaho ka hau e Tama he tagata mo e hana a lilifu. To nofo hifo a ia ke fakafili e tau tagata ne momoui he mogoia. To fakave e fakafiliaga hana ke he mahani ha lautolu ne fakakite ni e lautolu. He magaaho ia “ko e kehe he vahaloto hana ne tututonu mo ia ne mahani kelea” to kitia maaliali ai. (Malaki 3:18) Ko e fakapuloaaga mo e fakahokoaga he fakafiliaga to lauia ai ke he magaaho ku. To taute e Iesu e tau fifiliaga tonu ne fakave ke he mena ne kitia moli ke he tau tagata takitokotaha.​—Kikite foki 2 Korinito 5:10.

25. Ko e heigoa ne fakamaama mai ia Mataio 25:31, he tala ke he Tama he tagata ne nofo hifo he hana a nofoaiki lilifu?

²⁵ Ti ko e kakano he mena nei, mogoia, ko Iesu ne ‘nofo hifo he hana nofoaiki lilifu’ ma e fakafiliaga, ne talahau mai ia Mataio 25:31, kua hagaao atu ke he vaha anoiha he magaaho ka nofo hifo e Patuiki malolo nei ke fakapuloa mo e fakahoko e fakafiliaga ke he tau atu motu oti. E, ko e tuaga he fakafiliaga ne putoia ai a Iesu ia Mataio 25:31-33, 46 kua fakatatai ke he tuaga ia Tanielu veveheaga 7, ne nofo hifo ai e Patuiki ne fa e pule, ko Ia Mai i Tuai Hana Tau Aho, ke fakahoko e gahua hana, ko e Ikifakafili.

26. Ko e heigoa e fakamaamaaga fou he fakatai kua kitia moli?

²⁶ He maama ai e fakataiaga he tau mamoe mo e tau koti ke he puhala nei, kua fakakite mai ko e tauteaga he fakafiliaga he tau mamoe mo e tau koti ko e mena anoiha. To lauia ai ka mole e tupu he “matematekelea” ne talahau ia Mataio 24:29, 30 mo e ‘hau ai e Tama he tagata mo e lilifu.’ (Fakatatai Mareko 13:24-26.) Ti, mo e fakatokaaga kelea katoa ne kua teitei ke hoko ke he fakahikuaga, to taute e Iesu e hopoaga mo e fakahoko e fakafiliaga.​—Ioane 5:30; 2 Tesalonia 1:7-10.

27. Ko e heigoa kua lata ia tautolu ke fiafia ke iloa hagaao ke he fakatai fakahiku ha Iesu?

²⁷ Kua fakatonu he mena nei e maama ha tautolu ke he magaaho tonu he fakatai a Iesu, ne kua fakakite ko e magaaho fe ka fakafili ai e tau mamoe mo e tau koti. Ka e lauia fefe a tautolu ne fakamakutu ke fakamatala e tala mitaki he Kautu? (Mataio 24:14) Kua fakatote hifo ka e aoga he tau gahua ha tautolu, po ke fakamamafa fakalahi ke he tau matagahua? O mai a tautolu ke onoono atu ke he tala ne mui mai ko e lauia fefe a tautolu.

[Tau Matahui Tala]

Manatu Nakai e Koe?

◻ Maeke fefe a Iehova ke eke mo Patuiki mo e Ikifakafili?

◻ Ko e heigoa e tau kakano ua he ‘nofo hifo ke he nofoaiki’?

◻ Ko e heigoa ne talahau fakamua e tautolu ke he magaaho tonu ia Mataio 25:31, ka e ko e heigoa e matapatu ne ha ha i ai ma e maamaaga fou?

◻ Ka e ko e magaaho fe ka nofo hifo e Tama he tagata he hana a nofoaiki, tuga ne fakakite mai ia Mataio 25:31?