Talia e Tau Maveheaga he Atua he Fakagahuahua e Tua

“Ha ko ia [ko Iehova ko e Atua] kua foaki mai kia tautolu e tau maveheaga lalahi ue atu mo e aoga lahi.”​—2 PETERU 1:4.

1. Ko e heigoa ati maeke ai ia tautolu ke fakagahuahua e tua moli?

MANAKO a Iehova ke fakagahuahua e tua ha tautolu ke he hana a tau maveheaga. Ka e taha e mena, “ha ko e mena nakai ha he tau tagata oti kana e tua.” (2 Tesalonia 3:2) Ko e fua he agaga tapu he Atua po ke gahuahua malolo e mena nei. (Kalatia 5:22, 23) Ti ko e mena ia, ko lautolu ni ne takitaki he agaga a Iehova ne maeke ke fakagahuahua e tua.

2. Fakamaama fefe mai e Paulo e “tua”?

² Ka ko e heigoa e tua? Ne fakahigoa e Paulo ko e “fakamoli he tau mena nakai kitia.” Ne malolo lahi e fakamoliaga he tau mena nakai kitia ati fakatatai ni mo e tua. Ne talahau foki e tua pehe “ko e falanaki haia ke he tau mena kua amaamanaki ki ai” ha ko lautolu ne ha ha i ai e fua nei kua ha ha i ai e fakamoliaga ko e tau mena oti ne mavehe mai he Atua ko Iehova ne mauokafua lahi kua tuga kua fakamoli.​—Heperu 11:1.

Tua mo e Tau Maveheaga a Iehova

3. Fefe e moui he tau Kerisiano fakauka kaeke ke fakagahuahua e lautolu e tua?

³ Ke fiafia a Iehova, kua lata ia tautolu ke fakagahuahua e tua ke he hana a tau maveheaga. Ne fakakite mai he aposetolo ko Peteru e mena nei ke he hana a tohi ke ua aki mai he agaga, ne liga tohia ke he 64 V.N. Ne fakakite mai e ia kaeke ke fakagahuahua e tua he hana a tau kapitiga Kerisiano kua fakauku, to maeke ia lautolu ke kitia e fakamoliaga he “tau maveheaga mua ue atu mo e aoga lahi he Atua.” Ti ko e fua, to eke a lautolu mo e “igatia fakalataha ai . . . ke he mahani he Atua” ko e tau hakeaga fakalataha mo Iesu Keriso ke he Kautu he lagi. Ha ko e tua mo e lagomatai he Atua ko Iehova kua hao mai a lautolu he liliaga he tau mahani mo e tau gahua kelea he lalolagi. (2 Peteru 1:2-4) Mo e manamanatu la! Ko lautolu ne fakagahuahua e tua moli ia ne fiafia ke he tokanoaaga taha ia ni ne nakai fai totogi he vaha nei.

4. Ko e heigoa e tau mahani ke lafilafi atu e tautolu ke he ha tautolu a tua?

⁴ Ko e tua ke he tau maveheaga a Iehova mo e fakaaue ke he tokanoaaga foaki mai he Atua ke omoi aki a tautolu ke fakamakamaka ke eke ia mo tau fakafifitakiaga Kerisiano. Pehe a Peteru: “Ko e mena ia kia lalilali ai a mutolu ni ke lafilafi e [mahani tonu-mitaki] ke he tua ha mutolu, kia lafilafi foki e iloilo ke he mahani mitaki, Kia lafilafi foki e nakai matagaoi ke he iloilo, mo e lafilafi e fakauka ke he nakai matagaoi, mo e [mahani Atua loto fakamoli] foki ke he fakauka, Kia lafilafi foki e fakaalofa ke he tau matakainaga ke he [mahani Atua loto fakamoli], ko e fakaalofa foki ke he fakaalofa ke he tau matakainaga.” (2 Peteru 1:5-7, fakatatai NW) Ne foaki mai e Peteru e tau mena mitaki nei ke toka loto e tautolu. O mai la tautolu ke manamanatu fakalahi ke he tau mahani nei.

Tau Vala Aoga Lahi he Tua

5, 6. Ko e heigoa e mahani tonu-mitaki, mo e maeke fefe a tautolu ke lafilafi atu e mena nei ke he tua?

⁵ Ne pehe a Peteru to lafilafi mai e mahani tonu-mitaki, iloilo, nakai matagaoi, fakauka, mahani Atua loto fakamoli, fakaalofa fakamatakainaga, mo e ke foaki atu e fakaalofa ke he taha mo e taha mo e ke he ha tautolu a tua. Kua lata ia tautolu ke gahua fakamakamaka ke eke e tau mena oti nei mo tau vala aoga lahi he ha tautolu a tua. Tuga a nei, nakai maeke a tautolu ke fakakite kehe e mahani tonu-mitaki mai he tua. Ko e tagata tohia tohi fakakakano kupu ko W. E. Vine ne fakakite mai e 2 Peteru 1:5, “kua lafilafi e [mahani tonu-mitaki, NW] ko e taha vala aoga lahi ke he gahuahuaga he tua.” Igatia e falu he tau fua ne tokutoku mai e Peteru ke eke ko e taha vala he ha tautolu a tua.

⁶ Ko e mena fakamua, kua lata ia tautolu ke lafilafi e mahani tonu-mitaki ke he ha tautolu a tua. Ko e kakano he mahani tonu-mitaki ko e taute e tau mahani mitaki ki mua he Atua. Ko e “mahani tonu-mitaki,” e kupu Heleni he mena nei, ka ko e falu a liliuaga ne fakaaoga e “mahani mitaki.” (New International Version; The Jerusalem Bible; Today’s English Version) Fakaohooho he mahani tututonu a tautolu ke kalo kehe mo e taute e tau mahani kelea po ke fakapakia e falu a tagata. (Salamo 97:10) Ne maeke foki ke fakaohooho e tau gahua malolo ke taute e mitaki fakaagaga, fakatino, mo e ke he tau loto manamanatu ke aoga ma e falu.

7. Ko e ha ne lata ia tautolu ke lafilafi atu e iloilo ke he ha tautolu a tua mo e mahani tonu-mitaki?

⁷ Ko e ha ne fakamalolo mai a Peteru ke lafilafi e iloilo ke he ha tautolu a tua mo e mahani tonu-mitaki? Ka feleveia a tautolu mo e tau totoko fou ke he ha tautolu a tua, ti lata ke ha ha ia tautolu e iloilo ke maeke ke mailoga e tautolu e hako mai he hepe. (Heperu 5:14) Mai he tau aoga Tohi Tapu mo e iloaaga he fakaaoga e Kupu he Atua mo e fakagahuahua e pulotu ke he tau aho he mouiaga nei, ti fakalaulahi atu ha tautolu a iloilo. Ti ko e mena ia ke maeke ia tautolu ke tumau ke he ha tautolu a tua mo e fakatumau ke taute e tau mahani tonu-mitaki ke he tau magaaho ka kamatamata ai a tautolu.​—Fakatai 2:6-8; Iakopo 1:5-8.

8. Ko e heigoa e nakai matagaoi, ti matutaki fefe e mena nei mo e fakauka?

⁸ Ke lagomatai aki a tautolu ke fakafeleveia aki e tua e tau kamatamata kua lata ia tautolu ke lafilafi ke he ha tautolu a iloilo e nakai matagaoi. Ko e kupu Heleni ma e “nakai matagaoi” ko e malolo ke taofi ne koe a koe. Maeke he fua he agaga he Atua ke lagomatai a tautolu ke taofi e tau manamanatuaga, tau kupu, mo e tau mahani. Ka tumau e fakagahuahuaaga ke nakai matagaoi, ti lafilafi atu ki ai e fakauka. Ko e kupu Heleni ma e “fakauka” ne mailoga e malolo ke tumau e tua, ka e nakai mata momoko ke tiaki ke he tau mena vihi ne nakai fai fakahaoaga. Ko e fiafia ne fakatoka mai mua ia ia ati fakauka ai a Iesu ke he akau fakakikiveka. (Heperu 12:2) Ko e malolo foaki mai he Atua fakalataha mo e fakauka ne omoi aki ha tautolu a tua mo e lagomatai aki a tautolu ke fiafia ke he tau matematekelea, totoko ke he tau kamatamata, mo e kalo kehe mo e talia e tau maveheaga kaeke ke favale mai.​—Filipi 4:13

9. (a) Ko e heigoa e mahani Atua loto fakamoli? (e) Ko e ha kua lata ia tautolu ke lafilafi atu e fakaalofa fakamatakainaga ke he ha tautolu a mahani Atua loto fakamoli? (i) Maeke fefe ia tautolu ke lafilafi e fakaalofa ke he ha tautolu a fakaalofa fakamatakainaga?

⁹ Ke he ha tautolu a fakauka kua lata ia tautolu ke lafilafi atu e mahani Atua fakamoli​—fakalilifu, tapuaki, mo e fekafekau ki a Iehova. Tupu ha tautolu a tua ka gahua e tautolu e mahani Atua fakamoli mo e kitia e tauteaga ha Iehova mo e hana a tau tagata. Ka e taha e mena, ke fakakite e mahani Atua, kua lata ia tautolu ke fakaalofa fakamatakainaga. Ha ko e mena “ko ia kua nakai fakaalofa ke he matakainaga hana kua kitia, maeke fefe ia ia ke fakaalofa ke he Atua, kua nakai kitia e ia.” (1 Ioane 4:20) Ko e ha tautolu a tau loto kua lata ke omoi a tautolu ke fakakite e fakaalofa moli ma e falu a fekafekau a Iehova mo e kumi ke he ha lautolu a malolo ke he tau magaaho oti. (Iakopo 2:14-17) Ka ko e ha ne pehe mai ki a tautolu ke lafilafi e fakaalofa ke he ha tautolu a fakaalofa fakamatakainaga? Ko e moli ko e kakano ha Peteru ke fakakite e tautolu e fakaalofa ke he tau tagata oti, nakai ni ko e ha tautolu a tau matakainaga. Ko e fakaalofa nei ne fakakite fakalahi ai ke he fakamatalaaga he tala mitaki mo e lagomatai e tau tagata fakaagaga.​—Mataio 24:14; 28:19, 20.

Tau Lauiaaga Kehekehe

10. (a) Fefe ha tautolu a tau mahani kaeke ke lafilafi e mahani tonu-mitaki, iloilo, nakai matagaoi, fakauka, mahani Atua loto fakamoli, fakaalofa fakamatakainaga mo e fakaalofa ke he ha tautolu a tua? (e) Ko e heigoa ka tupu kaeke kua nakai ha ha e tau fua nei ia ia ne ui ko e Kerisiano?

¹⁰ Kaeke ke lafilafi e tautolu ke he mahani tonu-mitaki e iloilo, nakai matagaoi, fakauka, mahani Atua loto fakamoli, fakaalofa fakamatakainaga, mo e fakaalofa ke he ha tautolu a tua, to manamanatu a tautolu, vagahau, mo e gahua ke he tau puhala ne fiafia e Atua ki ai. Fakatatai la, kaeke ke kaumahala a ia ne pehe ko e Kerisiano a ia ke fakakite e tau mahani nei, ti mata pouli a ia fakaagaga. Ne ‘pa e ia e tau mata ke he maama’ mai he Atua mo e nimo ko e mena kua fakamea tei a ia he tau hala i tuai. (2 Peteru 1:8-10; 2:20-22) Kia nakai toka a tautolu ke kaumahala ke he puhala pihia mo e fakagalo e tua ke he tau maveheaga he Atua.

11. Ko e heigoa e amaamanakiaga tonu ha tautolu ma lautolu ne fakauku mo e fakamoli?

¹¹ Ko e tau Kerisiano fakauku mo e fakamoli ne tua ke he tau maveheaga a Iehova mo e fakamalolo a lautolu ke fakamoli hana a uiaga mo e fifiliaga ki a lautolu. Pete ne ha ha i ai e tau maka tupetupe ke he puhala ha lautolu, ka e amaamanaki a tautolu ke fakakite e lautolu e tau mahani faka-Atua pehe nei. Ma lautolu ne fakauku mo e fakamoli e ‘hao mo e atā ke he hala he kautu tukulagi ha Iesu Keriso’ ha ko e ha lautolu a liu tu mai ke moui fakaagaga ke he lagi.​—2 Peteru 1:11.

12. Maeke fefe ia tautolu ke maama e tau kupu he 2 Peteru 1:12-15?

¹² Ne mailoga e Peteru to mate ai a ia, mo e amaamanaki a ia ke moua e liu tu mai ke moui ke he lagi. Ka ko e leva he moui hana ke he “faituga nei”​—ko e hana a tino tagata​—ne lali a ia ke ati hake e tua he hana a tau matakainaga mo e fakalagalaga a lautolu ke fakamanatu ki a lautolu e tau mena ke lata ma e fiafia faka-Atua. Mole atu hana a fano kehe ha ko e mate, ti maeke he tau matakainaga tane mo e fifine fakaagaga ha Peteru ke fakamalolo ha lautolu a tua ka manatu hana a tau kupu.​—2 Peteru 1:12-15.

Tua ke he Tau Kupu Faka-Perofeta

13. Foaki mai fefe he Atua e fakamoliaga ke he fakamaloloaga he tua hagaao ke he hauaga ha Keriso?

¹³ Ko e Atua hokoia ne fakakite mai e fakamoliaga ke malolo e tua hagaao ke he liu mai moli ha Iesu mo e “malolo mo e lilifu.” (Mataio 24:30; 2 Peteru 1:16-18) He nakai fai fakamoliaga ne talahau he tau ekepoa pouliuli e tau tala pikopiko ne hagaao ke he ha lautolu a tau atua, ka kua kitia mata moli e Peteru, Iakopo, mo Ioane e faliuaga kehe lahi ha Keriso. (Mataio 17:1-5) Ne kitia e lautolu hana a lilifu lahi mo e logona e leo he Atua ne talahau ko Iesu ko e Hana a Tama fakahele. Ko e talahauaga ia mo e lilifu kikila ne foaki age ki a Keriso ko e mena fakaalofa lilifu mo e kikila ki a ia. Ha ko e fakakiteaga nei mai he lagi, ne fakahigoa e Peteru e matakavi nei ko e kaukau ha Heremoni, “ko e mouga tapu.”​—Fakatatai Esoto 3:4, 5.

14. Lauia fefe ha tautolu a tua ha ko e faliuaga ha Iesu?

¹⁴ Maeke fefe he faliuaga ha Iesu ke lauia ha tautolu a tua? Ne pehe a Peteru: “Ha ia tautolu foki e kupu he perofetaaga kua mua hana mauoka, kua mitaki he manamanatu a mutolu ki ai, tuga ne lamepa kua kikila ke he mena pouli, ato matafatafaata e aho, ato hake foki e fetu aho ke he tau loto ha mutolu.” (2 Peteru 1:19) Ko e “kupu he perofetaaga” ne nakai ni ko e tau perofetaaga he Tohiaga Tapu Heperu ne hagaao ke he Mesia ka e pihia foki e tau talahauaga ha Iesu ko e to hau a ia “mo e malolo mo e lilifu.” Maeke fefe he kupu ke “mua hana a mauoka” ha ko e faliuaga? Ko e mena ia ne fakamoli e kupu fakaperofeta hagaao ke he hauaga lilifu ha Keriso ke he malolo he Kautu.

15. Ko e heigoa ne putoia ke he onoonoaga fakamakutu ke he tau kupu fakaperofeta?

¹⁵ Ke fakamalolo aki ha tautolu a tua, kua lata ia tautolu ke mailoga e kupu he perofetaaga. Kua lauia he mena nei e kumikumiaga ke he kupu ia, fakatutala ke he mena ia ke he tau aoga Kerisiano, mo e fakagahuahua hana a tau fakatonutonuaga. (Iakopo 1:22-27) Kua lata ia tautolu ke taute e mena ia ko e “kikila ke he mena pouli,” ke maama ai ha tautolu a tau loto. (Efeso 1:18) Ko e puhala ni a ia ke hataki aki a tautolu ato fakakite mai e “fetu aho,” po ke, “fetu aho kikila,” ko Iesu Keriso, ka fakakite a ia mo e lilifu. (Fakakiteaga 22:16) Ko e kakano he fakakiteaga ia ko e moumouaga ha lautolu ne nakai tua mo e fakamonuinaaga ha lautolu ne fakagahuahua e tua.​—2 Tesalonia 1:6-10.

16. Ko e ha ne ha ha ai ia tautolu e tua to fakamoli e tau maveheaga fakaperofeta ke he Kupu he Atua?

¹⁶ Ko e tau perofeta he Atua ne nakai ko e tau tagata makaka he taute e tau talahauaga iloilo ke he tau vaha i mua, ha ko e mena pehe a Peteru: “Kua nakai fai kupu perofeta ha he Tohi kua fakamatala noa. Ha ko e mena nakai ko e loto he tau tagata ne tuku mai ai e tau perofetaaga i tuai, ka ko e tau tagata tapu he Atua ne vagavagahau mai he omoi a lautolu he Agaga Tapu.” (2 Peteru 1:20, 21) Tuga a nei, pehe a Tavita: “Kua vagahau age ai ia au e Agaga a Iehova.” (2 Samuela 23:1, 2) Tohi foki e Paulo: “Ko e tau Tohi Tapu oti kana mai he Agaga he Atua ia.” (2 Timoteo 3:16) Ha ko e tau perofeta he Atua ne omoomoi he hana agaga, ti maeke ia tautolu ke tua ti fakamoli oti hana a tau maveheaga he hana a Kupu.

Ha Ha ia Lautolu e Tua ke he Tau Maveheaga he Atua

17. Ko e heigoa e maveheaga ne fakave aki e tua ha Apelu?

¹⁷ Ko e tau maveheaga he Atua e fakaveaga he tua he “tokologa” he hana a tau Kerisiano fakamua. (Heperu 11:1–​12:1) Tuga a nei, ko e tua ha Apelu ke he tau maveheaga he Atua hagaao ke he “tega” ka fakaunoko e ulu he “gata.” Ne ha ha i ai e fakamoliaga he fakahala he Atua ke he tau matua ha Apelu. I fafo he kaina ko Etena, ko Atamu mo e hana magafaoa ne kai e tau mena kai mo e kavakava ke he ha lautolu a tau mata ha ko e kelekele malaia ne tutupu ai e tau akau talatala mo e mahukihuki. Tuga a ia ne mailoga e Apelu e hagaao atu e manako ha Eva ma e hana tane mo e kitia foki e pule ha Atamu ki a ia. Ne moli e vagahau e ia hana a mamahi he fatu. Ko e hala foki ke he kaina i Etena ne leveki he tau kerupi mo e pelu puhopuho. (Kenese 3:14-19, 24) Ko e tau mena oti nei ko e ‘fakamoliaga’ ke iloa moli e Apelu ko e fakahaoaga to puhala mai he Tega he maveheaga. Ko e tau gahua he tua ati foaki e Apelu e poa ke he Atua ne mua ue atu ia ke he ha Kaino.​—Heperu 11:1, 4.

18, 19. Ko e heigoa e tau puhala ne fakagahuahua aki e tua ha Aperahamo mo Sara?

¹⁸ Ko e tau matua ko Aperahamo, Isaako, mo Iakopo ne ha ha foki ia lautolu e tua ke he tau maveheaga a Iehova. Ne fakagahuahua e Aperahamo e tua ke he maveheaga he Atua ke monuina oti e tau magafaoa he kelekele mai ia ia mo e to foaki ke he tega hana e motu. (Kenese 12:1-9; 15:18-21) Ko e hana tama ko Isaako mo e mokopuna ko Iakopo, “ko laua ne ohi fakalataha mo ia he talahauaga taha.” Ko e tua ha Aperahamo ne “nofo paea ai a ia ke he motu ne talahaua” mo e fakatali ke he “maga kua fai fakaveaga,” ko e Kautu he Atua ke he lagi ti liu tu mai a ia ke he moui he lalolagi i lalo hifo he Kautu ia. (Heperu 11:8-10) Ha ha nakai ia koe e tua pihia?

¹⁹ Ko e hoana ha Aperahamo, ko Sara, ne liga ko e 90 e tau tau he moui ti kua molea e lata ke fanafanau ka e fakagahuahua e ia e tua ke he maveheaga he Atua ti foaki age ki a ia e “malolo ke fanau” mo e fanau mai a Isaako. Ti ko e mena ia, ne mai ia Aperahamo kua 100 hana a tau tau he moui, “ko ia foki kua mate ke he tau mena ia” hagaao ia ke he kupu fanafanau, ati “tokologa tuga e tau fetu he lagi” hana a tau fanau.​—Heperu 11:11, 12; Kenese 17:15-17; 18:11; 21:1-7.

20. Pete ne nakai kitia he tau mamatua tuai he tau tagata oti e fakamoliaga katoatoa he tau maveheaga he Atua ki a lautolu, ko e heigoa ha lautolu ne taute?

²⁰ Ne mamate tuai e tau mamatua fakamoli ia mo e nakai kitia e fakamoliaga katoatoa he tau maveheaga he Atua ki a lautolu. Ka e taha e mena, “kua iloa ai [e tau mena he maveheaga] ka e mamao, ne tua foki ki ai, ti talia mo e fiafia e lautolu, mo e talahau mai ko e tau tagata kehe a lautolu mo e tau tagata o fano ke he lalolagi.” Mole e tau atuhau to eke e Motu he Maveheaga ma e tau huli ha Aperahamo. Ka e ke he tau momoui ha lautolu, ko e tau mamatua ne matakutaku ke he Atua ne fakagahuahua e tua ke he tau maveheaga a Iehova. Ha kua nakai galo ha lautolu a tua, to liliu tutu mai a lautolu ke momoui ke he lalolagi ko e vala he “maga” ne taute he Atua ma lautolu, ko e Kautu faka-Mesia. (Heperu 11:13-16) Ko e puhala taha ia ni, to maeke he tua ke taute ke tua fakamoli a tautolu ki a Iehova pete ne nakai kitia e tautolu e katoatoaaga he fakamoliaga he tau maveheaga homo ue atu hana. Maeke foki he tua ha tautolu ke omoomoi a tautolu ke omaoma ke he Atua, tuga ne taute e Aperahamo. Tuga ni he foaki age e ia e fakamonuinaaga fakaagaga ke he hana tau huli, ti maeke foki a tautolu ke lagomatai ha tautolu a tau fanau ke fakagahuahua e tua ke he tau maveheaga uho ha Iehova.​—Heperu 11:17-21.

Aoga Lahi e Tua ma e Tau Kerisiano

21. Ke talia he Atua he vaha nei, ko e heigoa ke putoia ke he ha tautolu a fakagahuahua he tua?

²¹ Ha ha i ai moli, e falu a mena ne mua ke he tua hokoia, mo e falanaki ke he tau fakamoliaga he tau maveheaga a Iehova. Ke he kamataaga he moui he tagata, ne kua lata ke fakagahuahua e tua ke he Atua ke he tau puhala loga ka manako a tautolu ke olioli ke he hana fiafia. Ne pehe mai a Paulo “ka nakai tua, ti nakai maeke ke fakafiafia kia ia [ko e Atua ko Iehova] ha ko e mena lata ia ia kua fina atu ke he Atua ke talia kua moui a ia, ko ia foki kua taui mai a lautolu kua kumi fakamakutu kia ia.” (Heperu 11:6) Ke talia e Iehova e tagata he vaha nei, kua lata he tagata ke fakagahuahua e tua ki a Iesu Keriso mo e poa he lukutoto ne foaki mai he Atua ne puhala mai ia ia. (Roma 5:8; Kalatia 2:15, 16) Pihia ni he vagahau mai e Iesu: “Nukua pihia e fakaalofa mai he Atua ke he lalolagi [he tau tagata] kua ta mai ai hana Tama fuataha, kia nakai mate taha ne fakagahuahua e tua] kia ia, ka kia moua e ia e moui tukulagi. Ko e tagata ne [fakagahuahua e tua] ke he Tama, ha ha ia ia e moui tukulagi; ka ko e tagata nakai tua ke he Tama, nakai kitia e ia e moui, ka ko e ita he Atua ha ne toka mau ni ki luga hana.”​—Ioane 3:16, 36 fakatatai NW.

22. Ko e Kautu faka-Mesia to tamai e fakamoliaga he maveheaga fe?

²² Ha ha ki a Iesu e kotofaaga aoga lahi ke he fakamoliaga he tau maveheaga he Atua hagaao ke he Kautu ne fa e liogi e tau Kerisiano ki ai. (Isaia 9:6, 7; Tanielu 7:13, 14; Mataio 6:9, 10) Tuga ne fakakite e Peteru, ne fakamoli he liliuaga ha Iesu e kupu fakaperofeta ke he hauaga ha Iesu ke he malolo mo e lilifu he Kautu. Ko e Kautu faka-Mesia ka fakamoli e taha maveheaga he Atua, ha ko e mena tohia e Peteru: “Ka e fakatalitali a tautolu ke he lagi fou mo e lalolagi fou, tuga ne hana talahaua mai, ke nofo ai e tututonu.” (2 Peteru 3:13) Ko e perofetaaga pihia ne fakamoli ai he magaaho ne liliu ai e tau Iutaia mai he paeaga i Papelonia ke he ha lautolu a motu he tau 537 V.N.K. ke he fakatufono ha Serupapelu ko e kovana mo Iosua e ekepoa ne mua. (Isaia 65:17) Ka e tuhi a Peteru ke he vaha i mua ka pule ai e “lagi fou”​—ko e Kautu faka-Mesia he lagi​—ke he “lalolagi fou,” ko e sosaiete he tau tagata mahani tututonu ka momoui he lalolagi nei.​—Fakatatai Salamo 96:1.

23. Ko e heigoa e tau huhu hagaao ke he mahani tonu-mitaki ka fakatutala a tautolu ki ai he tala ka hau?

²³ Ha ko e tau fekafekau fakamoli a Iehova mo e tau tutaki he hana a Tama fuataha, ko Iesu Keriso, ne manako lahi a tautolu ke he maveheaga he Atua ko e lalolagi fou. Ne iloa e tautolu kua tata lahi mai, mo e ha ha ia tautolu e tua to fakamoli oti e tau maveheaga uho a Iehova. Ke talia ki mua he Atua ha tautolu, kua lata ke fakamalolo ha tautolu a tua ha ko e lafilafi ki ai e mahani tonu-mitaki, iloilo, nakai matagaoi, fakauka, mahani Atua loto fakamoli, fakaalofa fakamatakainaga, mo e fakaalofa.a Ko e mena nei, liga mitaki ke huhu, Maeke fefe ia tautolu ke fakakite e mahani tonu-mitaki? Ti maeke fefe he ha tautolu a mahani mitaki ke aoga ma tautolu mo e falu foki, mua atu ia ke he ha tautolu a tau Kerisiano ne fa fakalataha mau, ne kua talia e tau maveheaga he Atua ha ko e fakagahuahuaaga he tua?

[Tau Matahui Tala]

Ko e Heigoa Hau a Tau Tali?

◻ Fakamaama fefe e “tua”?

◻ Ke lata mo e 2 Peteru 1:5-7, ko e heigoa e tau mahani ke lafilafi atu ke he ha tautolu a tua?

◻ Kua lata ke lauia fefe he faliuaga ha Iesu e tua ha tautolu?

◻ Ko e heigoa e tau fakafifitakiaga he tua ne fakakite e Apelu, Aperahamo, Sara, mo e falu foki he vaha fakamua?

[Fakatino he lau 12]

Iloa nakai e koe ko e maeke fefe he faliuaga ke lauia e tua he tagata?