Kua Taute Mena Auloa e Magafaoa Kerisiano

“Ko e tau matakainaga na e, kua ole atu au kia mutolu . . . ka kia fakalataha a mutolu ke he loto taha mo e manatu taha.”​—1 KORINITO 1:10.

1. Ko e heigoa e tuaga hagaao ke he fakalataha ke he tau magafaoa loga?

FAKALATAHA nakai e magafaoa hau? Po ke iga ni e tagata mo e fano ke he hana a puhala? Fa taute mena auloa nakai a mutolu? Po ke fa lavea ni a mutolu ke fakalataha ke he taha magaaho? Ko e kupu “magafaoa” kua fakakite ai e fefakalatahaaki he magafaoa.a Ka e nakai fakalataha e tau magafaoa oti. Ko e taha tagata fakaako Peritania ne fano mua tua ke talahau: “Kua lata ke ha ha i ai e fakalatahaaga mitaki, ko e magafaoa . . . ko e punaaga he ha tautolu a tau fakaita.” Moli kia e mena ia ke he hau a magafaoa? Kaeke ke pihia, kua lata kia ke he puhala ia?

2. Ha e fe e tau tagata he Tohi Tapu kua foaki e fakamoliaga kua hau he magafaoa mitaki?

² Ko e fakalatahaaga po ke nakai fakalatahaaga he magafaoa kua fa mahani ke falanaki ke he hana takitakiaga, he mai he ua e tau mamatua po ke taha e matua. Ke he vaha he Tohi Tapu, ko e tau magafaoa ne fakalataha, ne tapuaki auloa kua olioli auloa e tau monuina a Iehova. Kua moli e mena nei ke he vaha i Isaraela i tuai, ko e tama fifine ha Iehosafata, Samisoni, mo Samuela, kua iga ni ke he tau puhala kehekehe, kua foaki e fakamoliaga he hau he magafaoa mahani Atua. (Fakafili 11:30-40; 13:2-25; 1 Samuela 1:21-23; 2:18-21) He vaha Kerisiano fakamua ko Timoteo, ko e kapitiga fakatauo ke he falu fenoga misionare ha Paulo kua tupu hake mo e lotomatala ke he tau Tohiaga Tapu Heperu he hana a matua tupuna fifine ko Loi mo e hana matua fifine ko Eunike. Ti kua eke tuai a ia mo tutaki mo e misionare kua mua atu e mitaki!​—Gahua 16:1, 2; 2 Timoteo 1:5; 3:14, 15; kikite foki Gahua 21:8, 9.

Ko e Ha ke Taute Mena Auloa?

3, 4. (a) Ko e heigoa e tau fua kua lata ke fakakite aki e magafaoa fakalataha? (e) Maeke fefe he kaina ke mua atu nakai ko e fale noa ni?

³ Kua aoga he ha ma e tau magafaoa ke taute mena auloa? Ha kua ati hake e maamaaga mafanatia mo e fakalilifuaki. Ka e nakai fakamamao e tautolu a tautolu mai he taha mo e taha, ka e nonofo fetataaki a tautolu mo e foaki lagomatai. Ko e vala tala nakai la leva lahi he senolo Family Relations kua talahau: “Ko e ata maaliali kua fakakite fakamahino mai e fakamaamaaga he tau mahani ‘malolo he tau magafaoa.’ Ko e tau fua pihia kua putoia ai e tau gahua ke he taha mo e fefakaaueaki, femafanatiaaki, mitaki e matutakiaga, lotomatala ke fakahako e mena vihi, mo e malolo e moui fakaagaga.”

⁴ Ka tupu mai e tau fua nei he magafaoa, to nakai tuga e utuaga penisini e kaina, ko e matakavi ke tutu ke utu. Kua nakai ko e fale noa ni hokoia. Ko e matakavi uiina ne futiaki aki e tau tagata he magafaoa. Ko e fakamaluaga he mafanatia mo e fakaalofa hofihofi noa, hohofi, mo e maama. (Fakatai 4:3, 4) Ko e fata ne moua ai e fakalatahaaga he magafaoa, nakai ko e fakamumuliaga he akarava he latau mo e feveheveheaki. Ka e moua fefe e mena nei?

Auloaaga ke he Fakaako Fakamagafaoa

5. Ko e heigoa ha tautolu ka fakagahuahua ke maeke ke fakaako e tapuakiaga moli?

⁵ Ko e tapuaki moli ki a Iehova kua ako mai he fakaaoga ha tautolu a manamanatuaga, po ke “malolo he fakakakanoaga.” (Roma 12:1, NW) Ko e ha tautolu a mahani kua nakai lata ke fakatapulu aki e tau loto logonaaga ku tuga a lautolu ia ne liu fakamanatu mai ha ko e tau lauga fakaleo akoako mo e fakaholoaga he fakamatala fakamomole mai he tivi. Ka kua omoi a tautolu ha ko e ha tautolu a kumikumi tumau mo e manamanatu fakahokulo ke he Tohi Tapu mo e kumikumi ke he tau tohi faka-Tohi Tapu ne kua foaki mai he “tupa fakamoli mo e tua.” (Mataio 24:45, NW) Ko e tau gahua Kerisiano ha tautolu kua fua mai he moua e manamanatuaga ha Keriso ke he ha tuaga po ke kamatamata ne kua liga ke tupu hake. Ke he tuaga ia, ko Iehova ko e ha tautolu a Fakaako Lotomatala Lahi Ue Atu.​—Salamo 25:9; Isaia 54:13; 1 Korinito 2:16.

6. Ko e heigoa e fakataiaga he fakaako fakamagafaoa kua ha ha ia tautolu?

⁶ Ko e kumikumiaga fakamagafaoa ke he Tohi Tapu kua taute e matagahua aoga lahi ke he mahani fakaagaga he tau magafaoa Kerisiano oti. Magaaho fe ne taute ai e kumikumi fakamagafaoa hau? Ka nakai fai fakaholoaga po ke taute ai he ha magaaho ka manatu, ti tuga kua nakai taute tumau. Ko e auloaaga he kumikumi fakamagafaoa kua lata ke ha ha i ai e fakatokaaga pauaki. Ti maeke ai ke iloa oti e aho mo e magaaho fe ke fakaata ke olioli lahi e auloaaga he mahani fakaagaga he magafaoa. Ko e molea ke he 12,000 he tau tagata he magafaoa Peteli ke he lalolagi katoa ne iloa ko e kumikumi fakamagafaoa ha lautolu he afiafi Gofua. Ko e nava ha a ia ke he tau tagata gahua noa nei he Peteli ke manatu ko e fakalataha oti a lautolu ke he kumikumi taha nei tuga ko e hokomaiaga he oti he aho, ko e tau aelani he Pasifika mo Niu Silani, mo e fakaholo atu ki Ausetalia, Sapani, Taiuana, Hogo Kogo, mo e fina atu ki Asia, Aferika, mo Europa, mo e fakaoti ki Amerika. Pete ni e femamaoaki ke he afe e tau maila e tau nonofoaga, tau vagahau kehekehe, ko e kumikumi fakamagafaoa nei kua omoi he tau hukui he magafaoa he Peteli e logonaaga he auloaaga. Ke he matakavi tote, kua maeke ia koe ke feaki e logonaaga taha he hau a kumikumi fakamagafaoa.​—1 Peteru 2:17; 5:9.

7. Hagaao ki a Peteru, ko e kitekite fefe e tautolu e kupu he kupu moli?

⁷ Kua fakatonu e Peteru a tautolu: “Kia manako lahi a mutolu, tuga e tau tama mukemuke kito fanau, ke he puke huhu he kupu nakai fakavai, kia tutupu ai a mutolu, Kaeke kua kamata e mutolu kua mitaki e Iki.” (1 Peteru 2:2, 3) Ko e fulufuluola ha ia he fakatino ia ne fakatu mai e Peteru aki e tau kupu ia! Ne fakaaoga e ia e kupu Heleni e·pi·po·theʹsa·te, ne kua hagaao ke he Linguistic Key to the Greek New Testament, ne mai he kupu ne kakano “ke manako loto atu ki ai, ke manako, ke fia manako lahi.” Kua fakahagaao ke he manako loto. Kua mailoga nakai e koe e punua manu huifa he magaaho ka ukufeke ai ke kumi e matahuhu he matua fifine mo e he makona he tama mukemuke he tagata he magaaho ka fagai he matua fifine aki e huhu? Kua lata foki ai a tautolu ke pihia e manako ke he kupu he kupu moli. Ko e ako tokoluga Heleni ko William Barclay ne talahau: “Ke he tau Kerisiano moli, ke kumikumi ke he kupu he Atua nakai ko e gahua uka ka ko e fiafia, ha kua iloa e ia ko e loto hana to moua e huhua ke he mena ne manako ki ai.”

8. Ko e heigoa he ulu magafaoa kua fakafehagai he taute ai e fakaakoaga fakamagafaoa?

⁸ Ko e kumikumi fakamagafaoa kua lago ai e matagahua lahi ke he ulu he magafaoa. Kua lata ia ia ke iloa tonu kua alaala e kumikumiaga ke he tau tagata oti ke maeke ke fetaliaki. Ko e tau fanau kua nakai lata ke manamanatu ko e kumikumiaga kua lata ni mo e tau tagata lalahi. Ko e kakano he kumikumiaga kua mua atu e aoga ke he katoa he tau vala tala kua fakaako ki ai. Taute e Tohi Tapu ke eke mo mena moli. Ko e mena kua lata, kia lagomatai e tau fanau hau ke kitia e tau fahi mo e tau mena i Palesitaina ne kua fita e hoko e tau mena tutupu ne fakatutala ki ai. Kua lata ke fakamalolo ke taute ha lautolu a tau kumikumiaga fakatagata mo e ke felagomataiaki ai mo e magafaoa. Ke he puhala nei, to maeke he tau fanau ke ‘tupu ai kia Iehova.’​—1 Samuela 2:20, 21.

Auloaaga he Fakaevagelia

9. Maeke fefe he gahua fakamatala ke taute mo mena fiafia he magafaoa?

⁹ Kua pehe a Iesu: “To fakamatala fakamua foki e vagahau mitaki ke he tau motu oti kana ke lata ai.” (Mareko 13:10) Ko e tau kupu ia kua foaki ai ke he tau Kerisiano fakamoli e gahua​—ke fakaevagelia, felagomatai ai ke he tala mitaki he pule he Kautu he Atua mo e falu. Taute auloa ai e tau mena nei ko e magafaoa kua eke ai mo fakamaloloaga mo e mena olioli lahi. Ko e tau mamatua fifine mo e tau mamatua tane kua matalahi ai ni ke he fakamatalaaga he tau fanau ha laua ke he tala mitaki. Taha e kau tokoua mo e tolu e tama tane ke he vahaloto ke he 15 mo e 21 e tau tau kua talahau kua ha ha tumau ia laua e mahani ke o fakalataha mo e ha laua a tau fanau ke he gahua fakamatala auloa he tau Aho Lotu ka oti e aoga mo e tau pogipogi Faiumu. Kua pehe e matua tane: “Fai mena hokoia ka fakaako aki e maua a lautolu he tau magaaho oti. Ti taute moli e maua ko e mena kua fakaolioli mo e fakamaloloaga.”

10. Maeke fefe he tau matua ke lagomatai ha lautolu a tau fanau ke he fekafekauaga?

¹⁰ Gahua auloa fakamagafaoa ke he fakamatalaaga mo e fakaako atu kua maeke ke fua loga mai. Falu a magaaho kua fakateliga lahi e tau tagata ke he tau fakamatalaaga mukamuka mo e ku he tama. Ti ko Mama po ko Papa kua ha ha i ai ke he mena ia ke lagomatai kaeke ke manako ki ai. Ko e tau mamatua kua maeke ke taute moli ko e tau fanau ha laua kua fakatolomaki atu ki mua e fakamahani mo e eke ai mo tau ekegahua kua “nakai fai mena ke mā ai, kua fakatokatoka fakahako e kupu moli.” Fakamatala auloa ai ke he puhala nei kua fakaata ai ke kitekite he tau mamatua e tau mahani, fakamakai, mo e tau mahani mitaki he tau fanau ha laua ke he fekafekauaga. He taute ai e fakaholoaga tumau, kua kitia ai e laua e tupu ki mua he tama mo e foaki ai e fakaako fakamahani tumau mo e fakamaloloaga ke fakamalolo ke he hana tua. Ke he magaaho taha ko e tau fanau kua kitia ai ko e ha lautolu a tau mamatua ko e tau fakafifitakiaga mitaki ke he fekafekauaga. Ke he tau aho uka nei mo e magaaho matahavala ko e gahua auloa e magafaoa fefakalatahaaki mo e fefakaalofaaki kua liga maeke ai foki ke foaki e puipuiaga kua lata ke he tau katofia matahavala.​—2 Timoteo 2:15; Filipi 3:16.

11. Ko e heigoa e mena ke uta kehe aki e fiafia he tama ke he kupu moli?

¹¹ Mukamuka lahi e tau fanau ke moua ua e tuaga he tau tagata lalahi. Kaeke ke nakai fakakite he tau mamatua e fakaalofa fakamoli ma e kupu moli mo e gahua he taha fale ke he taha fale, to maeke ke uka lahi he tau fanau ke moua e fakamakamaka. Ti ko e matua tino malolo ne gahua ni ke he fonua he kumikumi e Tohi Tapu fakafahitapu mo e hana a tau fanau to liga ke moua e fua uka lahi he magaaho ka lalahi a lautolu.​—Fakatai 22:6; Efeso 6:4.

12. Maeke fefe he falu a magafaoa ke moua e fakamonuinaaga mai ia Iehova?

¹² Ko e mitaki he “fakalataha . . . ke he loto taha” ne liga kua maeke ke toho mai e magafaoa ke kau auloa ti maeke e taha mai ia lautolu ke gahua tuga e fekafekau foafoa mau he fakapotopotoaga. Tokologa e tau magafaoa he lalolagi kua taute e mena nei mo e moua oti ai e fakamonuinaaga mai he tau mena ne kitia mo e fakatupu ki mua e iloilo he ha lautolu a tagata foafoa mau.​—2 Korinito 13:11; Filipi 2:1-4.

Auloaaga he Taute e Tau Mena Vihi

13, 14. (a) Ko e heigoa e tuaga kua maeke ke lauia e lagotataiaga he magafaoa? (e) Maeke fefe ke puipui mai he tau mena vihi loga he magafaoa?

¹³ Ke he tau aho uka nei he “fakatupetupe” mo e “hagahaga kelea,” kua moua oti e tautolu e mamafaaga. (2 Timoteo 3:1, Revised Standard Version; Phillips) Kua ha ha i ai e tau mena vihi ke he gahuaaga, ke he aoga, ke he tau puhalatu, mo e pihia ni i kaina. Ko e falu ne matematekelea ha ko e tino gagao, po ke leva e loto logonaaga vihi, ne fa falu a magaaho kua takitaki atu ke he tupetupe mo e nakai maama ke he magafaoa. Taute fefe e tau tuaga pihia? He iga ni mo e hola kehe mai he matutakiaga auloa? He fakatukehe e ia a ia pete ni nonofo ke he kaina taha? Nakai. Ka e kua lata ia tautolu ke matutaki ha tautolu a tau fakaatukehe mo e ole ma e lagomatai. Mo e ko fe e matakavi mitaki ma e mena nei ka ke haia ni ke he magafaoa fakaalofa?​—1 Korinito 16:14; 1 Peteru 4:8.

¹⁴ Tuga he iloa he ha toketa, mitaki e puipui ke he fakamaulu. Ko e mena taha moli ia ni foki ke he tau mena vihi he magafaoa. Kua fa mahani e tutala mai he loto vagahau fakahako ke puipui e tau mena vihi mai he hoko atu ke he tau mena hagahaga kelea. Pete ni ka tutupu mai e tau mena vihi lalahi, kua maeke ke taute kaeke ke manamanatu auloa e magafaoa ke he tau tuaga he mahani he Tohi Tapu ne putoia i ai. Fa mahani ke liliu e vale ke he fakafetuiaga mitaki he fakagahua e tau kupu ha Paulo ia Kolose 3:12-14: “Kia fakatapulu a mutolu ke he fakaalofa hohofi noa, mo e mahani totonu, mo e loto holoilalo, mo e mahani molu, mo e fakauka . . . Kia fefakaukaaki a mutolu, mo e fefakamagaloaki, kaeke kua mahani kelea taha kia taha; . . . Ka e ha i luga he tau mena oti ia e fakaalofa ko e pipi haia ke fakamaopoopo ai.”

Auloaaga ke he Fakafiafiaaga

15, 16. (a) Ko e heigoa e fua ke fakakehekehe aki e tau magafaoa Kerisiano? (e) Ko e faga tagata fefe he falu a lotu ne taute, mo e ko e ha?

¹⁵ Ko Iehova ko e Atua fiafia, mo e kupu moli ko e ogo fiafia​—ko e taha he amaamanakiaga ma e tau tagata oti. Lafi atu ki ai, ko e taha he tau fua he agaga ko e olioli. Kua kehe e olioli nei mai he fakatokoluga ku he tagata afeliti ne ­kautu ke he falu sipote fetoko. Ko e logonaaga hokulo he makonaaga kua pukeina ke he loto ha ko e fua he feaki e fakafetuiaga mitaki mo Iehova. Ko e olioli kua fakave ke he tau mena uho fakaagaga mo e atihakeaga he tau fakafetuiaga.​—Kalatia 5:22; 1 Timoteo 1:11.

¹⁶ Ko e mena ia ko e Tau Fakamoli Kerisiano ha Iehova, kua nakai fai kakano ke nakai fiafia po ke nakai fakamakau. Ko e falu a lotu kua fua mai e tau tagata tuga a ia kakano ha kua pehi mai he faga tua ha lautolu e tau mena kelea. Kua fua ha lautolu a tau fakaakoaga tuga ko e faga tapuakiaga ahumate mo e nakai fai olioli, ne nakai mai he Tohi Tapu po ke lagotatai. Ne nakai taute e lautolu e tau magafaoa fiafia ke he gahua he Atua. Ne kitia e Iesu e manako he fakafiafiaaga mo e okiokiaga. Ke he taha magaaho, tuga e fakatai, ne uiina e ia hana a tau tutaki ke o “ke he mena tokanoa ke okioki fakatote ai.”​—Mareko 6:30-32; Salamo 126:1-3; Ieremia 30:18, 19.

17, 18. Ke he puhala mitaki fe ne kua lata he tau magafaoa Kerisiano ke okioki?

¹⁷ Pihia foki e tau magafaoa ke lata ke ha ha i ai e magaaho ke okioki ai. Taha e matua ne pehe hagaao ke he hana a tau fanau: “Ne taute e mautolu loga e tau mena fakafiafia auloa​—o ke he mataafaga, fefeua e fua polo he paaka, fakatoka e pikiniki ke he tau mouga. Fa mahani ke taha e ‘aho ke he fekafekauaga’ ha mautolu auloa; ti fakamanatu e mautolu e kai pauaki, ti fa mahani foki a mautolu ke age mena fakaalofa e taha ke he taha.”

¹⁸ Ko e falu lagomataiaga ke manamanatu e tau mamatua ko e o viko he su, ke he paaka fakafiafia ke he fale toka mena tuai, mo e falu a matakavi fulufuluola. O hui ke he vao uhi, kitekite manu lele, mo e taute katene ko e tau matagahua kua maeke ke fakaolioli ke fakalataha ki ai. Kua maeke foki e tau mamatua ke fakamalolo e tau fanau ha laua ke fakaako ke ta e tau kofe fakatagitagi po ke fakalataha ke he tau fefeua mukamuka. Moli ko e tau mamatua lagotatai to taute magaaho ke fefeua mo e ha lautolu a tau fanau. Kaeke ke fefeua fakalataha e magafaoa to maeke ke nonofo auloa a lautolu!

19. Ko e heigoa e aga he vaha nei ne fakamamahi aki e magafaoa?

¹⁹ Ko e aga he vaha nei ma e tau fanau fuata ikiiki ke manako ke tu kehe mai he magafaoa mo e taute ni e tau mena ha lautolu ka hoko mai ke he vala okioki. Kua nakai fai mena kelea e mena ia ke he tau fanau fuata ikiiki ke ha ha i ai e feua po ke mena fiafia pauaki fakatagata, kua nakai mitaki ke fakatoka e tau manako pihia ke taute ke vevehe kehe tumau mai he falu he magafaoa. Ka kua lata ke fakagahua e lagomataiaga ne talahau mai e Paulo: “Aua neke takitokotaha mo e manamanatu ke he tau mena hana, ka e takitokotaha mo e manamanatu ke he tau mena he falu.”​—Filipi 2:4.

20. Maeke fefe e tau fonoaga mo e tau toloaga ke eke mo tau magaaho olioli?

²⁰ Ko e olioli ha a ia ma tautolu oti ke kitia e tau magafaoa kua nonofo auloa ke he tau fonoaga mo e tau toloaga! Ko e puhala ia ko e tau fanau lalahi kua fa mahani ke lagomatai e kau ikiiki. Ko e fakatokatokaaga pihia foki kua puipui e hala he falu a fuata mai he o fakamatakau ke he tau atu nofoa i tua mo e nakai fanogonogo ke he fakaholoaga he fonoaga. Pihia foki he o he motoka ke he toloaga kua maeke ke olioli he magaaho ka pulega ai e magafaoa ko e hala fe ke o ai, ko e matakavi fe ka kitekite he o, mo e mena fe ka nonofo ai. Manamanatu la ke he magaaho fiafia kua ha ha i ai ke he aho ha Iesu he tau magaaho ne o fakalataha e tau magafaoa ki Ierusalema!​—Luka 2:41, 42.

Ko e Tau Fakamonuinaaga he Auloaaga

21. (a) Fakamakamaka fefe ke moua e kautu ke he fakamauaga? (e) Ko e heigoa e tau lagomataiaga mai he magafaoa fakalataha?

²¹ Ko e tau fakamauaga kua kautu mo e tau magafaoa fakalataha kua nakai mukamuka ke moua, ti nakai o mai noa ni a lautolu. Ko e falu kua mukamuka ni ke ‘tiaki e laliaga,’ mo e fakaoti e fakamauaga ke he feveveheaki, mo e lali ke liu kamata foki. Ti ko e mena vihi taha ia ni ka kitia ke he ha lautolu a fakamauaga ke laga ua po ke laga tolu aki. Ko e tali faka-Kerisiano kua mitaki lahi: Kia lali ke kautu mai he fakagahua e tau tuaga he mahani he fakaalofa mo e fakalilifu. Ko e tau magafaoa fakalataha kua falanaki ni ke he agaga foaki mo e uta, he nakai lotokai. Taha e tagata fakatonutonu ne talahau e puhala mukamuka ke taute e fakamauaga ke mau. Ne tohi e ia: “Ko e fa e mena aoga ne moua ke he laulahi he tau fakamauaga mitaki ko e mautali ke fanogonogo, ko e lotomatala ke fakamolemole, ko e malolo ke foaki e atihake tumau he logonaaga, mo e manako ke hohoko e hohofiaga.” Ko e tau mena ia kua lagomatai moli ke maeke he fakamauaga ke tumau kakano ha kua fakave foki a lautolu ke he tuaga he mahani mitaki he Tohi Tapu.​—1 Korinito 13:1-8; Efeso 5:33; Iakopo 1:19.

22. Ko e heigoa falu aoga mai he fakalatahaaga he magafaoa?

²² Kaeke ke muitua a tautolu ke he fakatonuaga he Tohi Tapu, to ha ha ia tautolu e fakaveaga mauokafua he magafaoa fakalataha mo e kua eke e tau magafaoa fakalataha mo tau fakaveaga he tau fakapotopotoaga ne malolo e mahani fakaagaga. Ka ke moua e tautolu e tau fakamonuinaaga loga mai ia Iehova he fakalataha tumau ke fakalaulahi e fakaheke ki a ia.

[Tau Matahui Tala]

Manatu Nakai e Koe?

◻ Ko e ha kua aoga lahi ma e tau magafaoa ke taute mena auloa?

◻ Ko e ha e fakaakoaga Tohi Tapu fakamagafaoa kua aoga?

◻ Ko e ha ne mitaki ai ke he tau mamatua ke fakalataha ke he gahua fakamatala ke he fonua mo e tau fanau ha lautolu?

◻ Ko e ha ne lagomatai ai ke fakatutala ke he tau mena vihi he magafaoa?

◻ Ko e ha e tau magafaoa Kerisiano ke nakai lata ke ahumate ai mo e nakai fai olioli?

[Fakatino he lau 23]

Maeke nakai e magafaoa hau ke olioli ke he taha e magaaho kai auloa he aho?

[Fakatino he lau 24]

Ko e fakafiafiaaga he magafaoa kua lata ke okioki mo e olioli