Tau Huhu Mai he Tau Tagata Totou

Kua lata kia he Kerisiano ke hoa mo e tagata nakai talitonu he fakatugahua, ha kua talahau mai he Tohi Tapu ki a tautolu: “Aua neke hahamo a mutolu mo e nakai tatai fakalataha mo lautolu kua nakai [talitonu, “NW”]”?

Kua moua e tautolu e fakatonuaga ia he 2 Korinito 6:14-16: “Aua neke hahamo a mutolu mo e nakai tatai fakalataha mo lautolu kua nakai [talitonu, NW]; ha ko e mena fakalataha fefe e tututonu mo e mahani kelea? Ke fakafetui fefe e maama mo e pouli? Ke loto fakalataha fefe a Keriso mo Pelialo? Po ke igatia fakalataha fefe a ia kua tua mo ia kua nakai [talitonu, NW]? Ke loto fakalataha fefe e faituga he Atua mo e tau tupua?”

Kua nakai fai kakano ke talitonu ko e aposetolo ko Paulo kua foaki e fakatonuaga nei mo e amaamanakiaga ke fakatoka e tau fakataputapu pauaki, ke tuga e totoko atu ke he Kerisiano kua fakatugahua mo e tagata nakai talitonu. Ka ko e hana a fakatonuaga kua lata moli ke he mena ia, ti pihia foki mo e falu a puhala he moui.

Kua tohi e Paulo e fakatonuaga ia ke he hana a tau matakainaga Kerisiano i Korinito i tuai. Nonofo ai ke he taone ne ha ha i ai e kolokolovao, kua nonofo mau a lautolu mo e mahani kelea mo e tau hagahaga kelea fakaagaga he tau aho takitaha. Po kua fakaeneene a lautolu, ko e hafagi atu ke he tau fakaohoohoaga nakai mitaki kua maeke ke fakalolelole fakahaga ha lautolu a fakamalolo ke eke mo tau tagata kua kehe, “ko e hau fifili . . . , ko e tau patuiki mo e tau ekepoa, ko e motu tapu, mo e motu kua moua māna.”​—1 Peteru 2:9.

Ato tohi e mena ne fakakite mai he 2 Korinito 6:14-16, kua fakafehagai a Paulo mo e mena vihi hagahaga kelea lahi mahaki he hana a tau matakainaga i Korinito. Kua fakaata e lautolu e mahani kelea muikau ke he ha lautolu a fakalatahaaga, ti kua fakakite e Paulo ki a lautolu ke tuku ki tua, po ke fakaoti e fakalatahaaga, he tagata agahala ne nakai fakatokihala. (1 Korinito 5:1) Ko e mena hepe he tagata ia kua fakakite ko e feoaki kelea po ke nakai fai puipuiaga katoa ke he tau mahani kelea he lalolagi, kua maeke ke lauia ai e tau Kerisiano.

Ko e tau Kerisiano i Korinito kua lata ke fehola kehe mai he feoaki mo e tagata ne tuku ki tua, ka ko e kakano ke mena ia kua lata ia lautolu ke vevehe katoatoa mai e lautolu a lautolu mai he tau tagata nakai talitonu? Kua lata kia a lautolu ke fehola kehe katoa mai he tau matutakiaga oti po ke tau fakafehagaiaga mo lautolu ne nakai ko e tau Kerisiano, mo e kua eke ai mo tahafaga matakau lotu kua nonofo mau he fale lotu tu kehe, tuga e tau Iutaia ne fehola atu ki Qumran ne tata atu ke he Tahi Kula? Toka a Paulo ke tali: “Ne tohi atu e au kia mutolu ke he haku a tohi, ua feoaki a mutolu mo e tau feuaki. Ka e nakai pihia fakaoti mo e tau feuaki he lalolagi nai, . . . kane mai ke pihia po kua lata ai ia mutolu he o kehe ai he lalolagi nai.”​—1 Korinito 5:9, 10.

Ko e talahauaga he tau kupu ia kua mukamuka. Kua mailoga e Paulo ko e tau Kerisiano kua ha ha agaia ke he palaneta nei, nonofo ai fakalataha mo e teitei matutaki ni he tau aho oti mo e tau tagata nakai talitonu ne kelea e tau mahani mo e tokolalo lahi mo e tau tuaga kua kehe lahi. Ha ko e mena ia, kua nakai maeke ke kalo kehe ai, kua lata e tau Kerisiano ke mataala ke he tau mena hagahaga kelea he tau matutakiaga pihia.

O mai la a tautolu ke liu manamanatu ke he tohi ke ua aki ha Paulo ke he tau tagata Korinito. Kua tuhi mai e ia ko e tau Kerisiano kua fakauku kua lata mo tau fekafekau he Atua, ko e tau hukui kua gahua ma Keriso. Kua tala age a ia ki a lautolu ke fakamamao mai he mena ke fakatupu e fakalolelole ne kua liga maeke ke tamai e ha lautolu a fekafekauaga ke he maama kelea. (2 Korinito 4:1–​6:3) Kua fakamalolo e Paulo ke he hana a tau matakainaga i Korinito ne kua eke mo fanau fakaagaga hana, ke fakalaulahi ke he tau hohofi ha lautolu. (2 Korinito 6:13) He mole atu ne pehe a ia: “Aua neke hahamo a mutolu mo e nakai tatai fakalataha mo lautolu kua nakai [talitonu, NW].” Ne fakaaoga e ia e tau faga puhala vagahau kehekehe ke pehi aki e mena ia.

Kua fakakite mai he vala tala kua nakai fakatonu a Paulo ke he falu vala pauaki he moui, tuga e fakatugahua po ke gahuaaga, mo e fakatokaaga he tau matafakatufono kua lata ke fakamalolo aki e mena ia. Ka kua foaki e ia e fakatonuaga laulahi, maama mo e lagomatai ke he tau matakainaga ne fakaalofa lahi a ia ki ai.

To fakaaoga nakai e fakatonuaga nei, ma e fakataiaga, ke he tuaga he Kerisiano kua manako ke he fakamauaga? Moli. Ke he hana a tohi fakamua, kua fakatonu he aposetolo ke he tau tagata Korinito ne manako ke mau ke taute ni “kia lata mo e Iki.” (1 Korinito 7:39) Kua pehi e ia e pulotu he tau kupu nei ke he mena ne tohi fakamui e ia, tuga he talahau mai he 2 Korinito 6:14-18. Kaeke ke taute he Kerisiano e fakamauaga ke he taha tagata ne nakai ko e fekafekau ha Iehova mo e nakai ko e tutaki ha Keriso, kua lata a ia tane po ke fifine ke manamanatu ke he fakalatahaaga mo e tagata nakai talitonu. (Fakatatai Levitika 19:19; Teutaronome 22:10.) Maaliali, ko e fakaveaga kua nakai fai tataiaga ki ai kua uiina e tau mena vihi, fakalataha ki ai e tau mena fakaagaga. Ma e fakatai, ko e tagata nakai talitonu kua liga to foli atu ke he tapuakiaga he atua fakavai he mogonei po ke vaha i mua. Kua fakakakano e Paulo: “Ke loto fakalataha fefe a Keriso mo Pelialo?”

Ka e kua mogoia ke he taha puhala he moui​—taute fakatugahua mo e tagata nakai talitonu? Ke he falu a mena kua liga ke logona hifo e Kerisiano ke moua e tupe ma e moui mo e leveki ke he hana a magafaoa kua manako ke hu atu ke he fakafetuiaga fakatugahua mo e taha kua nakai ko e Kerisiano. (1 Timoteo 5:8) Manamanatu la ke he tau fakataiaga noa ni:

Kua liga manako e Kerisiano ke kamata e fakatugahua he fakafua e taha faga koloa ka e ko e puhala ni ke talia e hoa mo e tagata kua fai fakaata ke he tau koloa po ke tau lagomatai kua manako. Ko e taha Kerisiano kua manako ke taute e faama (po ke fakatu e taha vahega fuifui manu); ka e nakai fai fonua ne ata, ti kua lata ia ia ke taute e mena ia he fakalataha mo e taha tagata kua mau ke kaitalofa ki a ia e fonua mo e fai vala ke he muka. Po ke liga ke nakai maeke e taha Kerisiano ke hu atu ke he fakatugahua palama kakano kua gahoa ni e tau laisini ne foaki e Kaisara, mo e kua fita tuai he uta; ko e puhala ni ma hana ke fakalataha atu mo e magafaoa nakai talitonu kua fai laisini.​—Mareko 12:17.

Ko e tau fakataitaiaga noa ni a nei. Kua nakai lali a mautolu ke fakamakuikui ke he tau mena oti po ke ha ne fa e taute e tautolu ha fakamoliaga he talia po ke nakai talia. Ka ko e tau fakataiaga nei he loto, kitia nakai e koe ko e ha ne nakai lata ai ke fakaheu e fakatonuaga ia 2 Korinito 6:14-18?

Ko e Kerisiano ne fakatugahua mo e tagata nakai talitonu, pete ko e magafaoa po ke nakai, kua fakalago ke he tau mena vihi nakai amaamanaki ki ai mo e tau kamatamata. Po ke liga kua fakaoti he hoa ko e puhala ke taute e muka kua lata ke nakai hokotaki e tau mena moua po ke nakai fakamau e tau tagata gahua ke he tau tohi, pete ni he moumou he tau mena ia e tau matafakatufono he fakatufono. Kua liga ke fiafia a ia ke totogi fufu e tau tagata kua fekafekau ki a ia ma e tau mena kua nakai tohi hifo he lau pepa. Kua lata kia he Kerisiano ke fakalataha ke he ha vala ke he mena ia po ke falu mahani nakai fakamoli pihia? Mo e ko e heigoa he Kerisiano ke taute he magaaho ka hoko mai e magaaho ki a laua tokoua ke fakamoli e tau pepa tukuhau po ke tau fakamauaga fakamoli hagaao ke he puhala ne taute aki e fakatugahua ha laua?​—Esoto 23:1; Roma 13:1, 7.

Po ke hoa fakatugahua nakai talitonu kua liga manako ke fakaputu e tau mena hagaao ke he tau aho okioki pouliuli, fakafano e tau lau pepa fakafeleveia he higoa he ha lautolu a gahuaaga, mo e fakamanaia e fakatugahua ma e tau aho okioki fakalotu. Kua huhu a Paulo: “Ke loto fakalataha fefe e faituga he Atua mo e tau tupua? ha ko [ta]utolu ko e faituga he Atua moui.” Kua tonu ha a ia he talahauaga: “Hanai, kia o mai a mutolu mai loto ia lautolu, mo e vevehe kehe a mutolu”! kua pihia mai a Iehova, “aua foki neke piki atu . . . ke he mena kelea; ti talia ai e au a mutolu.” (2 Korinito 6:16, 17) He fakagahua ai e fakatonuaga mitaki ia, kua tokologa e tau Kerisiano kua fifili e tau faga gahua tupe ne kua hafagi ki a lautolu e tau mena vihi gahoa.​—Heperu 13:5, 6, 18.

Kua nakai hataki e fakapotopotoaga ke tumau ke kitekite atu po ke kumikumi e tau mena oti ne taute he tau Kerisiano he ha lautolu a gahua tupe, ko e tau tagata kua gahua ai po ke tau tagata ne pule ke he tau fakatugahua. Moli, kaeke ke talahaua e Kerisiano he fakalataha ke he taute mena kelea, tuga e fakatupu e tapuakiaga fakavai po ke falu a vahega pikopiko po ke kaiha, kua lata e fakapotopotoaga ke taute e tau lakaaga ke taofi mau e tuaga ha Iehova.

Ko e matapatu kei pete ni, ko e fakatonuaga omoomoi he agaga ha Paulo, “Aua neke hahamo a mutolu mo e nakai tatai fakalataha mo lautolu kua nakai [talitonu, NW],” kua maeke ke lagomatai e tau Kerisiano ke kalo kehe mai he tau mena vihi mo e ha gahua uka. Ko e tau Kerisiano pulotu to uta ke he loto e fakatonuaga ia mo e nakai fifili ke hu atu ke he tau tuaga ne ha ha i ai e lafi ki luga e mamafa ki a lautolu ke fakahagahaga kelea ai e tau poakiaga he Tohi Tapu. Kaeke ke fai tagata kua logona hifo kua lata ia ia ke hu atu ke he fakatugahua mo e tagata nakai talitonu, kua nakai lata e falu ke mafiti ke fakafili po ke tuhituhi a ia, ha kua mailoga to hahamo ni e ia e matagahua ke he hana a fifiliaga. Ko e mena mukamuka, kua nakai fakatoka e Paulo e matafakatufono pauaki mo e malolo ke fakamamao mai he hu atu ke he fakatugahua mo e tagata nakai talitonu. Ka ko e hana a fakatonuaga kua nakai lata ke fakaheu. Kua omoomoi he agaga he Atua e fakatonuaga ia mo e kua fakamau ai i loto he Tohi Tapu ma e aoga ma tautolu ni. Kua pulotu a tautolu ke fanogonogo fakamitaki ke he mena ia.