Maeke Nakai a Koe ke Iloa Mitaki e Hoa Nakai Tua?
1. Ko e ha e tau Kerisiano ne nonofo he tau kaina mavehevehe fakalotu kua nakai ni ko lautolu ne fiafia ke lagomatai e tau hoa nakai tua ha lautolu ke talia e kupu mooli?
1 Fai tagata fakailoa nakai he fakapotopotoaga ha mutolu kua nakai tua e taane po ke hoana? Ka fai, kua manako e tau tagata fakailoa nai ke matutaki e tau hoa ha lautolu mo lautolu ke he tapuakiaga mooli. Ka e nakai ni ko lautolu. Kua fakakite he fakapotopotoaga katoa e finagalo he Atua ke “fakamomoui e tau tagata oti kana, mo e hokotia a lautolu he maama ke he kupu moli.” (1 Timo. 2:4) Maeke fēfē ia tautolu ke iloa mitaki e tau hoa nakai tua he tau tagata fakailoa he fakapotopotoaga ha tautolu?
2. To lagomatai fēfē he maamaaga a tautolu ke lalago e hoa nakai tua?
2 Fakamua, kua lata ia tautolu ke lali ke kitia e tuaga mai he hoa nakai tua. Tokologa e hoa nakai tua kua fakaalofa ke he magafaoa ha lautolu mo e lali ke eke mo hoa mau mo e matua mitaki. Liga ha ha ia lautolu e tau taofiaga fakalotu pauaki kua kehe mai he ha tautolu. Ti liga tote e iloaaga ha lautolu ke he Tau Fakamoli a Iehova ka ko e tau tala hehē po ke onoono hifo ni ne tala age he tau kapitiga ha lautolu. Falu ne nakai fiafia ke he magaaho ne fakaaoga he hoa ha lautolu ma e tapuakiaga ne fakaaoga mo e magafaoa he magaaho fakamua. To lagomatai he maamaaga a tautolu ke taute fakamitaki mo e fakalilifu e hoa nakai tua ti kalo mai he tupetupe teao ka haia a tautolu mo ia.—Fakatai 16:20-23.
3. Ko e heigoa e puhala mitaki lahi mahaki ke hau e hoa nakai tua?
3 Fiafia Fakatagata: Ko e puhala mitaki lahi mahaki ke hau e hoa nakai tua ke he kupu mooli, liga he kamataaga ko e tau aga ha tautolu, nakai ko e fakatutalaaga Tohi Tapu. (1 Pete. 3:1, 2) Aoga he mena nei ko e fakakite e fiafia fakatagata. Maeke e tau matakainaga fifine he fakapotopotoaga ke fiafia ke he hoana nakai tua, mo e taute pihia foki he tau matakainaga taane ke he taane nakai tua. Fēfē?
4. Liga fakakite fēfē e tautolu e fiafia fakatagata?
4 Ka nakaila feleveia a koe mo e hoa, liga maeke ia koe ke feleveia he mole e tutala mo e hoa Kerisiano. Ua hogohogo manava ka fakateaga e tali fakamua he hoa nakai tua. Ko e puhala kapitiga mo e fiafia fakatagata ha tautolu ka fakalagalaga a ia ke talia e Tau Fakamoli a Iehova. (Roma 12:20) Falu Kerisiano motua ne uiina e hoa nakai tua mo e magafaoa haana ke he kai afiafi, mo e amanaki ke iloa mitaki mo e utakehe e tau onoono hifo ne liga ha ha ai. Na tutala a lautolu ke he tau mena ne fiafia a ia, ka e nakai he omoi e tutalaaga ke he tau tala fakaagaaga. Fakamui, ka totoka hifo e logonaaga he tagata nakai tua, maeke mogoia e tutalaaga faka-Tohi Tapu. Po ke liga talia e ia e uiina ke hoko atu ke he taha he tau feleveiaaga ha tautolu ke kitia e mena hane fakaako he hoana haana, mua atu ha kua fitā he iloa e ia falu he fakapotopotoaga. Pete he nakai mautali a ia ke kumikumi ke he kupu mooli, maeke mooli ke fakaaue ki a ia ke he lalagoaga ne foaki e ia ke he hoa haana ne tua.
5. Iloa mitaki fēfē he tau motua e hoa nakai tua?
5 Lata pauaki he tau motua ke iloa e tau hoa nakai tua mo e kia mataala ke he tau magaaho ke fakamatala. Ko e tagata nakai tua ne fakateaga ke he tutala Tohi Tapu ka fanogonogo ke he fakamafanaaga faka-Tohi Tapu ka haia a ia he fale gagao po ke fehagai mo e tau lekua hagahaga kelea he malolō tino. Ka matematekelea e mena ne tupu ke he kaina mavehevehe, tuga e mate e tagata he magafaoa, maeke he tau motua ke uiina e hoa nakai tua ke nofo ai ka foaki e lautolu e fakamafanaaga ke he magafaoa.
6. Ko e heigoa e tau kakano ke iloa mitaki e tau hoa nakai tua?
6 Manamanatu la ke he olioli ka moua he Kerisiano he fakapotopotoaga ha tautolu ka talia mo e hau e hoa haana ke he kupu mooli! Ko e mogo fiafia ia ka tamai foki e olioli lahi ki a Iehova, tau agelu, mo lautolu oti he fakapotopotoaga. (Luka 15:7, 10) Pete ia, ka nakai talia e hoa nakai tua he mogo fakamua, maeke agaia a tautolu ke olioli ha ko e ha tautolu a tau laliaga fakatumau ke fakafiafia a Iehova, ne nakai finagalo a ia ke malaia taha, ka kia hohoko oti kana ke he tokihala.”—2 Pete. 3:9.
[Blurb he lau 6]
Ko e puhala mitaki lahi mahaki ke hau e hoa nakai tua ke he kupu mooli, liga he kamataaga ko e tau aga ha tautolu, nakai ko e fakatutalaaga Tohi Tapu