Maeke e Fiafia he Tau Kaina Mavehevehe
“Iloa fefe e koe . . . to moui hāu a [hoa] kia koe?”—1 KORI. 7:16.
MAEKE NAKAI A KOE KE MOUA E TAU TALI?
Ko e heigoa he tau tagata ne tua ka taute ke feaki e mafola he kaina mavehevehe fakalotu?
Liga lagomatai fēfē he Kerisiano e tau tagata nakai tua he magafaoa ke talia e tapuakiaga mooli?
Ko e heigoa he falu ka taute ke lagomatai e tau tagata ne tua ne nonofo he tau kaina mavehevehe fakalotu?
1. Ko e heigoa e lauiaaga ke he magafaoa he talia e fekau he Kautu?
KO E magaaho ne fakafano atu e Iesu e tau aposetolo haana he taha magaaho, ne pehē a ia: “Ka e o a a mutolu mo e fakamatala atu, kia pehe atu, Kua tata mai tuai e kautu he lagi.” (Mata. 10:1, 7) Ko e tala mitaki nei to tamai e mafola mo e fiafia ki a lautolu kua talia ai mo e loto fakaaue mooli. Ka e hataki e Iesu e tau aposetolo haana to tokologa ka totoko ha lautolu a gahua fakamatala he Kautu. (Mata. 10:16-23) Mua atu e mamahi ke he totokoaga he magaaho ka tiaki he tau tagata he magafaoa e fekau he Kautu.—Totou Mataio 10:34-36.
2. Ko e ha ne nakai mamao e fiafia ma e tau Kerisiano ne nonofo he tau kaina mavehevehe fakalotu?
2 Kakano kia e mena nei kua nakai maeke e fiafia ke moua he tau tutaki he Keriso ne nonofo he tau kaina mavehevehe fakalotu? Nakai pihia! Pete he totoko lahi mahaki e magafaoa he falu mogo, kua nakai pihia tumau. Ti ko e totokoaga he magafaoa foki kua nakai fa tumau. Fakavē lahi ni ke he puhala ne tali atu he tau tagata ne tua e totokoaga po ke nakai fai fakaalofa. Lafi ki ai, kua fakamonuina e Iehova a lautolu kua mahani fakamooli ki a ia, he taute a lautolu ke fiafia pete ne tau tuaga nakai mitaki. Maeke he tau tagata ne tua ke lafi ke he fiafia ni ha lautolu (1) he eketaha ke feaki e mafola he kaina mo e (2) he lali ke lagomatai mooli e tau tagata he magafaoa ne nakai tua ke talia e tapuakiaga mooli.
FEAKI E MAFOLA HE KAINA
3. Ko e ha e Kerisiano he kaina mavehevehe kua lata ke feaki e mafola?
3 Ma e tega he tututonu ke fai fua he takatakaiaga magafaoa, ko e tau tuaga mafola he kaina kua aoga lahi. (Totou Iakopo 3:18.) Pete foki kua nakaila fakalataha e magafaoa he Kerisiano ke he tapuakiaga meā, kua lata a ia ke lali fakalahi ke feaki e mafola he kaina. Maeke fēfē ke taute e mena nei?
4. Liga fakatumau fēfē he tau Kerisiano ha lautolu a mafola he loto?
4 Kua latatonu e tau Kerisiano ke fakatumau e mafola he loto. Ti kua lata e mena nei mo e liogi mai he loto, ka tamai ki a tautolu e “monuina [mafola] foki mai he Atua” ne mua atu. (Filipi 4:6, 7) Ko e fiafia mo e mafola kua fua mai he uta e iloilo ha Iehova mo e fakagahua e tau matapatu fakaakoaga he Tohi Tapu ke he moui. (Isaia 54:13) Ko e fakalataha ke he tau feleveiaaga fakapotopotoaga mo e gahua fakamakutu he fonua kua aoga foki ka manako a tautolu ke olioli e mafola mo e fiafia. He fakalataha ke he tau gahua Kerisiano he falu puhala kua maeke ai ma e tau tagata ne tua ne nonofo he tau kaina mavehevehe. Ma e fakatai, manamanatu ki a Enza,a ne totoko lahi mahaki e taane. Ne fakalataha a ia he gahua taute tutaki he oti e taute he tau fekau kaina haana. Pehē a Enza, “Fakamonuina lahi e Iehova au aki e tau fua mitaki he tau magaaho takitaha kua lali au ke folafola e tala mitaki ke he falu.” Ko e tau monuina pihia kua fua mooli mai e mafola, makona, mo e fiafia.
5. Ko e heigoa e paleko he tau tagata ne tua he tau kaina mavehevehe ne fa fehagai ki ai, ti ko e heigoa e lagomatai kua moua?
5 Kua lata ia tautolu ke lali eketaha ke feaki e fakafetuiaga mafola mo e tau tagata he magafaoa ne nakai tua. Liga paleko e mena nei ha ko e mena ne manako a lautolu ki a tautolu ke taute ne liga nakai felauaki he falu mogo mo e tau matapatu fakaakoaga he Tohi Tapu. Ko e taofi mau ha tautolu ke he tau matapatu fakaakoaga hako kua liga fakaita e falu he tau tagata nakai tua he magafaoa, ka ko e tuaga pihia kua fakatupu ki mua e mafola he vahā loa. Mooli, he nakai fakatokatoka atu ka fai mena kua nakai moumou e tau matapatu fakaakoaga faka-Tohi Tapu ka fakatupu e taufetoko nakai lata lahi. (Totou Tau Fakatai 16:7.) Ka fehagai mo e paleko, kua aoga ke kumi e fakatonuaga faka-Tohi Tapu mai he tau tohi he vahega fekafekau fakamoli mo e loto matala mo e mai he tau motua.—Fakatai 11:14.
6, 7. (a) Ko e ha ne totoko e falu ke he tau tagata he magafaoa ne kamata ke fakaako mo e Tau Fakamoli a Iehova? (e) Lata fēfē e tagata fakaako Tohi Tapu po ke tagata ne tua ke tali atu ke he totokoaga he magafaoa?
6 Ko e feaki e mafola he kaina kua manako ma e falanaki ki a Iehova mo e maama e tau logonaaga he tau tagata nakai tua he magafaoa. (Fakatai 16:20) Maeke foki he tau tagata fakaako Tohi Tapu foou ke fakalotomatala ke he mena nei. Falu taane po ke tau hoana nakai tua kua liga nakai totoko ke he hoa ha lautolu he fakaako e Tohi Tapu. Kua liga talahau foki e lautolu kua mitaki e mena nei ma e magafaoa. Ka ko e falu ne liga fakakite e favale. Ko Esther, ko e Fakamoli mogonei ne pehē kua “ita lahi mooli” a ia he kamata e taane haana ke fakaako e Tohi Tapu mo e Tau Fakamoli a Iehova. “Na tolo e au ke he vao e tau tohi haana po ke tugi ai,” he ui e ia. Ko Howard, ne totoko fakamua ke he hoana haana he fakaako e Tohi Tapu, ne pehē: “Tokologa e taane ne matakutaku kua fakahehē e tau hoana ha lautolu ke fakalataha ke he matakau fakalotu. Kua liga nakai iloa he taane e mena ke taute ke he fakamatakutaku nei ti liga totoko ai.”
7 Ko e tagata fakaako kua totoko e hoa ne latatonu ke lagomatai ke kitia kua nakai lata a ia ke fakaoti e fakaako Tohi Tapu haana. Fa mahani to maeke a ia ke fakamafola e tau matalekua ha ko e mahani molū mo e fakakite e fakalilifu ma e hoa nakai tua haana. (1 Pete. 3:15) Pehē a Howard, “Kua fakaaue lahi au ha kua tumau ni e hoana haaku ke totoka mo e nakai vale lahi mahaki!” Fakamaama he hoana haana: “Ne poaki malolō a Howard ke ua liu au ke fakaako e Tohi Tapu. Ne pehē a ia kua maliu e ulu haaku. He nakai taufetoko, ne pehē au liga hako a ia, ka e tala age foki au ki a ia nakai maeke mooli ia au ke kitia e puhala ia. Ti ole au ki a ia ke totou e tohi hane fakaako e au. Ne totou e ia ti nakai totoko ke he mena ne talahau i ai. Ne lauia lahi mahaki a ia ha ko e mena nei.” Kua mitaki ke manatu ko e tau hoa nakai tua to liga logona hifo kua tiaki po ke hopoate ka fakalataha atu e tau hoa ha lautolu ke he tau matagahua faka-Kerisiano, ka ko e tau fakamafanaaga fakaalofa ka fakatote hifo e tau logonaaga pihia.
LAGOMATAI A LAUTOLU KE TALIA E TAPUAKIAGA MOOLI
8. Ko e heigoa e fakatonuaga ne foaki he aposetolo ko Paulo ke he tau Kerisiano ne nakai tua e tau hoa?
8 Kua fakatonu he aposetolo ko Paulo e tau Kerisiano ke nakai toka e hoa mau ha kua nakai tua a ia.b (Totou 1 Korinito 7:12-16.) He tokaloto na to maeke e hoa mau ne nakai tua ke eke mo Kerisiano ka lagomatai e tagata ne tua ke fakatumau haana fiafia pete he nofo he kaina mavehevehe. Ka e, he lali ke hokotia e fekau he kupu mooli ke he tagata nakai tua, kua ha ha i ai e manatu hataki pauaki kua fakatoka mai, tuga ne talahau he mena nā ne tupu.
9. Ka talahau e kupu mooli he Tohi Tapu ke he tau tagata he magafaoa ne nakai tua, ko e heigoa kua lata ke fakaeneene?
9 He manatu e mahani haana ke fakaako e kupu mooli he Tohi Tapu, pehē a Jason, “Manako au ke tala age ke he tau tagata oti!” He hokotia e tagata fakaako Tohi Tapu ke loto fakaaue ke he kupu mooli he mena ne fakaako e ia mai he tau Tohiaga Tapu, liga fiafia lahi a ia ti tutala a ia hagaao ki ai he laulahi he tau magaaho. Ne liga amanaki a ia ke he tau tagata nakai tua he magafaoa ke talia mafiti e fekau he Kautu, ka ko e tala mitaki ka feleveia mo e tali vale. Lauia fēfē e hoana ha Jason ha ko e haana hakahakau fakamua? “Ne tupetupe lahi au,” he ui he hoana. Taha e fifine ne talia e kupu mooli he 18 e tau he mole e pihia he taane haana, ne pehē, “Ko au foki ni kua lata ke fakaako fakahaga ai.” Ka taute e koe e fakaako Tohi Tapu he mogonei mo e tagata fakaako ne nakai manako e hoa ke fai vala ke he tapuakiaga mooli, ka ko e ha ne nakai taute tumau ai e tau fakamahaniaga ke lagomatai e tagata fakaako ke fehagai fakailoilo mo e tau matalekua? Ne pehē a Mose: “To hifo haku a tau kupu fakaako tuga ne uha, to to hifo tuga ne hahau haku a vagahau; ke tuga ne uha ke he vao mui.” (Teu. 32:2) Ko e tau hihina gahoa takitaha he kupu mooli ne age fakaeneene kua fa mua atu e mitaki ke he puō fakaagaaga.
10-12. (a) Ko e heigoa e fakatonuaga ne age he aposetolo ko Peteru ke he tau Kerisiano ne nakai tua e tau hoa? (e) Fakaako fēfē he taha tagata fakaako Tohi Tapu ke fakagahua e fakatonuaga ne tohia ia 1 Peteru 3:1, 2?
10 Kua foaki he aposetolo ko Peteru e fakatonuaga omoomoi ma e tau hoana Kerisiano ne nonofo he tau kaina mavehevehe fakalotu. “Kia omaoma ke he tau tane ha mutolu ni,” he tohi e ia, “kaeke foki kua faliuliu falu ke he kupu, kia moua a lautolu he mahani mitaki he tau hoana ha lautolu, ka e nakai vagahau, ka kitekite age a lautolu kia mutolu kua nonofo fakatekiteki mo e matakutaku.” (1 Pete. 3:1, 2) Liga maeke he hoana ke tamai e taane haana ke he tapuakiaga mooli he omaoma mo e fakakite e fakalilifu hokulo ki a ia, pete ni he taute fakakelea he taane a ia. Tuga foki e taane kua tua kua lata a ia ke mahani ke he puhala faka-Atua ti eke mo ulu kua totonu he magafaoa pete ne totokoaga ne liga tupu mai he hoana nakai tua haana.—1 Pete. 3:7-9.
11 Loga e fifitakiaga he vahā foou nei kua fakakite e uho he fakagahua he fakatonuaga a Peteru. Manamanatu ke he mena ne tupu ki a Selma. He kamata a ia ke fakaako e Tohi Tapu mo e Tau Fakamoli a Iehova, ko e taane haana ko Steve ne nakai fiafia. Ne pehē a ia, “ne eke au mo tagata ita, mahekeheke, fia pule, mo e kapaletū.” Ne mailoga e Selma: “Ato moua foki e au e kupu mooli, ko e moui mo Steve kua tuga e fano i luga he tau kili fua moa. Ne mafiti a ia ke vale. He magaaho ne kamata au ke fakaako e Tohi Tapu, ne holo ni ki mua e mahani nei.” Ko e heigoa ne lagomatai?
12 Ne manatu e Selma e fakaakoaga mai he Fakamoli ne fakaako mo ia. “He taha aho pauaki,” he ui e Selma, “ne ai manako au ke fakaako e Tohi Tapu. He pō fakamua, ne lau au ia Steve he lali au ke tala age e manatu, ti logona e au e momoko mo e fakaalofa ki a au ni. He mole e tala age e au ke he matakainaga fifine e mena ne tupu mo e logonaaga haaku, ne ole a ia ki a au ke totou e 1 Korinito 13:4-7. He totou e au, ne kamata au ke manamanatu, ‘ne nakai taute e Steve e ha aga fakaalofa nei ki a au.’ Ka e taute he matakainaga fifine au ke kehe e manamanatu he hūhū, ‘Fiha he tau mahani ia he fakaalofa kua fakakite e koe ke he taane haau?’ Ko e tali haaku, ‘Ai fai, ha kua uka lahi ke nonofo mo ia.’ Kua tala age totonu e matakainaga ki a ia, ‘Selma, ko hai ne lali ke eke mo Kerisiano? Ko koe po ko Steve?’ He mailoga kua lata ia au ke hiki e manamanatuaga haaku, ne liogi au ki a Iehova ke lagomatai au ke fakaalofa lahi ki a Steve. Ne kamata fakahaga e tau tuaga ke hiki.” He mole e 17 e tau, ne talia e Steve e kupu mooli.
PUHALA KA LAGOMATAI HE FALU
13, 14. Maeke fēfē he falu he fakapotopotoaga ke lagomatai a lautolu kua nonofo he tau kaina mavehevehe fakalotu?
13 Tuga e tau matauha ne to ginigini kua fakamalū aki e kelekele mo e lagomatai e tau akau ke moui, tokologa e tagata he fakapotopotoaga ne lafi ke he fiafia he tau Kerisiano he tau kaina mavehevehe. “Ko e fakaalofa he tau matakainaga haaku ne lagomatai au ke tumauokafua ke he kupu mooli,” he ui e Elvina i Parasili.
14 Ko e totonu mo e fiafia ko e vala he falu he fakapotopotoaga kua maeke ke lahi e lauiaaga ke he loto he tagata he magafaoa nakai tua. Ko e taane i Nigeria ne talia e kupu mooli he 13 e tau he mole he moua ai he hoana haana, ne talahau: “He fano au mo e Fakamoli, ne malona e peleōafi haana. Ne kumi atu a ia ke he tau matakainaga Fakamoli he maaga tata mai, ti mai e lautolu e mena ke nonofo ai a maua he pō. Ne leveki e lautolu a maua tuga ni na iloa e maua a lautolu mai he vahā ikiiki. Mogoia ni, ne logona hifo e au e fakaalofa Kerisiano ne fa tutala tumau e hoana haaku ki ai.” I Igilani, ne hau e hoana ke he kupu mooli he 18 e tau he mole e hau he taane, ne talahau: “Ne uiina he Tau Fakamoli a maua tokoua ke he tau kaiaga. Ne logona hifo tumau e au e fakafeleveia.”c He talahau he taane he motu ia foki ne eke a ia mo Fakamoli: “Na ahiahi mai e tau matakainaga ki a maua, po ke uiina a maua ke he tau kaina ha lautolu, ti iloa e au na aga leveki a lautolu. Mailoga lahi e mena nei he haia au he fale gagao ti tokologa ne o mai ke ahiahi mai ki a au.” Maeke nakai a koe ke kumi puhala ke fakakite e fiafia pihia ke he tau tagata nakai tua he magafaoa?
15, 16. Ko e heigoa ka lagomatai e tagata ne tua ke fakatumau e fiafia ka fakatumau ni e falu he magafaoa ke nakai tua?
15 Mooli, nakai talia oti he tau hoa, tau fanau, tau matua, po ke falu he magafaoa e tapuakiaga mooli, pihia foki he mole e tau tau loga he mahani tua fakamooli mo e fakamatala fakailoilo e hoa ne tua. Falu ne fakatumau ke nakai fai fakaalofa po ke totoko tumau ai. (Mata. 10:35-37) Ka fakagahua he tau Kerisiano e tau aga mahani Atua, maeke he mena nei ke ha ha i ai e lauiaaga mitaki lahi. Ko e taane nakai tua fakamua ne pehē: “Ka kamata e hoa ne tua ke fakakikila e tau aga fulufuluola ia, nakai iloa e koe e mena kua tupu ke he manamanatuaga mo e loto he hoa nakai tua. Ti ua fakalolelole ke he haau a hoa nakai tua.”
16 Pete ka fakatumau e tagata he magafaoa ko e tagata nakai tua, kua maeke e tagata ne tua ke fiafia. Pete ne nakai talia he taane haana e ogo he Kautu he mole e 21 e tau he lali a ia, taha e matakainaga fifine ne pehē: “Maeke au ke fakatumau e olioli haaku he eketaha ke fakafiafia a Iehova, he fakatumau e mahani fakamooli haaku ki a ia, mo e gahua ke fakamalolō e moui fakaagaaga haaku. He fakamakai eketaha au ke he tau matagahua fakaagaaga—ko e fakaako fakatagata, fano he tau feleveiaaga, gahua he fonua, mo e lagomatai e falu he fakapotopotoaga—ne fakatata lahi au ki a Iehova ti kua puipui e loto haaku.”—Fakatai 4:23.
UA FAKALOLELOLE!
17, 18. Maeke fēfē he Kerisiano ke amaamanaki tumau pete he haia he kaina mavehevehe fakalotu?
17 Kaeke ko koe ko e Kerisiano tua fakamooli ne nofo he kaina mavehevehe fakalotu, ua fakalolelole. Manatu mena “nakai tiaki e Iehova hana motu ha ko e hana higoa lilifu.” (1 Samu. 12:22) Kua fakalataha a ia mo koe ka fakatumau a koe ke pipiki mau ki a ia. (Totou 2 Nofoaga he Tau Patuiki 15:2.) “Kia fiafia [lahi] kia Iehova.” Mooli, “kia tuku atu hāu a puhala kia Iehova, kia tua foki a koe kia ia.” (Sala. 37:4, 5) “Kia fakamakamaka ke he liogi,” ti tua to maeke he ha tautolu a Matua fakahele he lagi ke lagomatai a koe ke fakauka ke he tau mena uka kehekehe.—Roma 12:12.
18 Olelalo ki a Iehova ma e agaaga tapu haana ke lagomatai a koe ke fakatupu ki mua e mafola he kaina. (Hepe. 12:14) E, kua maeke ke fakatupu e tau tuaga mafola ka fakahiku ke aamotia e loto he tau tagata he magafaoa ne nakai tua. To moua e koe e fiafia mo e mafola he loto mo e manamanatuaga he ‘eke e tau mena oti kana ke fakaheke ai ke he Atua.’ (1 Kori. 10:31) He tau laliaga nei, ko e mafanatia ha ia ke iloa kua moua e koe e lalagoaga fakaalofa he tau matakainaga he fakapotopotoaga Kerisiano!
[Tau Matahui Tala]
a Hiki e tau higoa.
b Ko e fakatonuaga a Paulo kua nakai toka kehe e vevehe matafakatufono he tau tuaga hagahaga kelea lahi. Ko e fifiliaga hokulo he tagata a ia. Kikite “Keep Yourselves in God’s Love,” lau 220-221.
c Ko e kai mo e tau tagata nakai tua kua nakai fakataputapu he tau Tohiaga Tapu.—1 Kori. 10:27.
[Fakatino he lau 28]
Fifili e magaaho hako ke fakamaama e tau taofiaga haau
[Fakatino he lau 29]
Fakakite kua manamanatu ke he tau hoa nakai tua