Fehagai ke he Paleko he Fakamatala ke he Tau Tagata Taane
1. Ko e heigoa e manako mafiti he leveki e tau mena he Kautu?
1 He matutaki e gahua he Kautu ke tupu ki mua he tau aho fakamui nei, kua ha ha i ai e manako mafiti ma e tau tagata taane kua lotomatala fakaagaaga ke takitaki. (Mare. 4:30-32; Gahua 20:28; 1 Timo. 3:1-13) Ka e he falu matakavi kua tokogahoa lahi e tagata taane ne talia e fekau he Kautu, ke he tau fifine. He falu aga fakamotu, kua toka he tau taane ke he tau hoana ha lautolu e tau mena fakaagaaga mo e fakaako fakalotu he tau fanau. Maeke fēfē ia tautolu ke fakamalolō e tau tagata taane tokologa ke manamanatu ke he tau mena fakaagaaga ha lautolu mo e fakalataha mo tautolu ke he tapuakiaga mooli?
2. Maeke fēfē he tau laliaga ha Paulo mo Peteru ke moua e tau fua mitaki he fakamatala ke he tau tagata taane?
2 Kumi e Tau Tagata Taane: Ka talia he ulu he magafaoa e kupu mooli, kua fa fakaohooho e ia e falu he magafaoa ke fakalataha mo ia ke he tapuakiaga mooli. Ma e fakatai, he haia a Paulo mo Sila he fale puipui ha ko e fekafekauaga ha laua, ne fakamatala a laua ke he leoleo he fale puipui. Ne papatiso e tagata taane mo e magafaoa katoa haana. (Gahua 16:25-34) Ha ko e fua he fakamatala ha Paulo i Korinito, ne “tua foki ke he Iki e tagata ne pule ke he sunako, ko Kiripo, katoa mo e hana magafaoa oti.” (Gahua 18:8) Ne fakaaoga e Iehova a Peteru ke fakamatala ki a Konelio, ko e takitaki he tokoteau ne talahau “ko e tagata mahani-Atua, mo e matakutaku ke he Atua.” Ne papatiso a Konelio fakalataha mo e tau magafaoa mo e tau kapitiga tata haana.—Gahua 10:1-48.
3. He fifitaki ki a Filipo, ko hai a lautolu ne “toka ai e pule” ka fakamatala a koe ki ai?
3 He fakamatala ke he tau tagata taane “ne toka ai e pule” ka moua e tau lauiaaga lahi mahaki. (1 Timo. 2:1, 2) Ma e fakatai, ne tomatoma he agelu ha Iehova a Filipo ke vagahau ke he “fekafekau ne mua” ne pule ke he tau koloa oti kana he patuiki fifine he tau Aitiope. Ne logona e Filipo e tagata taane “kua totou [fakaleo lahi] ke he tohi a Isaia ko e perofeta” ti fakamaama age ki a ia e tala mitaki hagaao ki a Iesu. Ne eke e Aitiope nei mo tutaki ti liga folafola e ia e tala mitaki he hala ne fina atu a ia ke he motu haana. Ne liga fakamatala foki a ia ke he patuiki fifine mo lautolu he fale patuiki, ko lautolu ne liga tote lahi e magaaho ke logona e tala mitaki.—Gahua 8:26-39.
4. Maeke fēfē ia tautolu ke foaki fakalahi e tau puhala ke he tau tagata taane ke logona e tala mitaki?
4 Puhala ke Matutaki ke he Tau Tagata Taane Tokologa: Ha ko e tau tagata taane ne fa mahani ke haia he tau gahuaaga ha lautolu he aho, maeke nakai ia koe ke fakatoka e setulu haau ke lahi e magaaho ke he fonua he tau mogo afiafi, he tau matahiku faahi tapu, po ke tau aho okioki? He gahua tumau he tau matakavi pisinisi to foaki ki a koe e falu magaaho ke fakamatala ke he tau tagata taane ne lavea ke haia i kaina. Maeke foki e tau matakainaga taane ke lali pauaki ke fakamatala he magaaho noa ke he tau kapitiga taane ne gahua auloa. He gahua ke he taha fale mo e taha fale, mua atu ke he matakavi ne gahua tumau, liga ole e tau matakainaga taane he falu magaaho ke tutala ke he tagata taane he fale.
5. Ko e heigoa ka taute he matakainaga fifine ne talia fiafia he tagata taane e fekau he Kautu?
5 Ka moua he matakainaga fifine e tagata taane ne talia fiafia e kupu mooli kua nakai lata ke liu atu tokotaha ki ai. Liga uta e ia e taane haana po ke taha tagata fakailoa. He holo ki mua e tagata ne fiafia, kua mitaki lahi ke age ke he matakainaga taane lotomatala ke aahi atu.
6. Fifitaki fēfē e tautolu e aposetolo ko Paulo ke “au atu ai he tokologa ke moua”?
6 Fifili e Tau Matakupu ne Fiafia e Tau Tagata Taane ki Ai: Ne manamanatu a Paulo ke he tau tagata fanogonogo haana ti hikihiki e fakafeleveia ke maeke ia ia ke “au atu ai he tokologa ke moua.” (1 Kori. 9:19-23) Pihia foki, kua lata ia tautolu ke manamanatu ke he tau matakupu ka liga fiafia e tau tagata taane ki ai ka feleveia mo tautolu ti tauteute fakatatau ki ai. Ke tuga anei, kua fa manamanatu e tau tagata taane ke he tau paleko fakatupe, fakatufono mitaki, mo e leveki e puipuiaga mo e haohao mitaki he magafaoa ha lautolu. Liga fiafia foki a lautolu ke he kakano he moui, ke he vahā anoiha he lalolagi, mo e kakano ne fakaatā he Atua e matematekelea. To talia mitaki e tutala ha tautolu ke he fekau he Kautu kaeke ke fakakite e tautolu e iloilo pihia ke he puhala fakafeleveia ha tautolu.—Fakatai 16:23.
7. Maeke fēfē ia lautolu oti he fakapotopotoaga ke lauia lahi e mahani mitaki ke he tau taane nakai talitonu ne o mai ke he feleveiaaga?
7 Hokotia Atu ke he Tau Taane Nakai Talitonu: Pete kua lauia lahi mahaki e mahani mitaki he tau matakainaga fifine Kerisiano ha tautolu ke he tau taane nakai talitonu ha lautolu, kua lauia lahi foki e mahani mitaki he tau tagata he fakapotopotoaga. (1 Pete. 3:1-4) Ka fakatauō e hoa nakai talitonu mo e hoana haana ke he feleveiaaga, ko e fakafeleveia mafanatia ne moua e ia mai he fakapotopotoaga to eke mo fakamatala malolō lahi. Liga kua fakakite he fakalataha mai haana kua fiafia foki a ia ke he kupu mooli, ti liga makai a ia ke talia e fakaako Tohi Tapu.
8. Liga hokotia atu fēfē e tau matakainaga taane ke lagomatai e tau taane nakai talitonu ne fakakite e fiafia tote ke he kupu mooli?
8 Ke he taha faahi, ne fiafia tote falu taane ke he tau mena fakaagaaga he magaaho fakamua ka e liga makai fakamui ke fakatutala ke he Tohi Tapu mo e matakainaga taane ne mafana a lautolu ki ai. Ko e tau matakainaga taane he taha fakapotopotoaga ne lali pauaki he magaaho ka ahiahi atu ke he magafaoa mavehevehe fakalotu ke tutala mo e taane nakai talitonu ke he tau mena ne iloa e lautolu kua fiafia a ia ki ai. Ne takitaki atu fakahaga e mena nei ke he tau tutala fakaagaaga, ti kua papatiso a ia mogonei. He taha tuaga foki, ko e matakainaga taane ne lagomatai e taane aga kapitiga ne nakai talitonu, ke talaga e pā ne viko takai he fale haana. He fakakite e fiafia fakatagata ke he puhala nei, ne kamata ai e fakaako Tohi Tapu. (Kala. 6:10; Filipi 2:4) Kaeke ko koe e matakainaga taane Kerisiano, ko e ha he hoko ke he taha po ke tokologa he tau taane nakai talitonu nei?
9. Ko e heigoa e fua ka liga moua mai he fakamahani e tau tagata taane Kerisiano?
9 Fakamahani ma e Tau Magaaho i Mua: Ko e tau taane ne talia e fekau he Kautu mo e foli atu ke he tau kotofaaga he gahua ha Iehova to liga eke mo “tau mena fakaalofa ke he tau tagata,” ko e tau motua Kerisiano ne fakaaoga e tau lotomatala mo e tau malolō ha lautolu ke lata mo e fakapotopotoaga he tau tagata ha Iehova. (Efeso 4:8; Sala. 68:18) Kua leveki fakamakai mo e loto fiafia he tau tagata taane pihia e fakapotopotoaga. (1 Pete. 5:2, 3) Kua eke mooli a lautolu mo monuina ke he fakatokaaga katoa he tau matakainaga!
10. Aoga fēfē e tokologa ha ko e tau laliaga ha Anania ke lagomatai a Paulo?
10 Ke tuga anei, ne eke a Saulo mo “aposetolo ke he tau tagata kehe,” pete ne favale a ia ke he tau Kerisiano he magaaho fakamua. (Roma 11:13) Ko e tutaki ko Anania ne fakauaua he magaaho fakamua ke fakamatala ki a Saulo ha ko e mena nei. Pete ia, ne muitua a Anania ke he takitakiaga he Iki ti vagahau ke he tagata taane ne eke fakamui mo aposetolo ko Paulo. He mole e tau tau loga, kua aoga e fekafekauaga ha Paulo ke he tokoafe ne logona a ia he fakamatala ti pihia e toko miliona ne matutaki ke aoga mai he tau tohi omoomoi haana ne fakamau he Kupu he Atua.—Gahua 9:3-19; 2 Timo. 3:16, 17.
11. Ko e ha kua eketaha a tautolu ke taute e tau hikihikiaga kua lata ke fakamatala ke he tau tagata taane?
11 Ati taute e tautolu e tau hikihikiaga kua lata ke fehagai ke he paleko he fakamatala ke he tau tagata taane. He tutuli e tautolu e foliaga nei, kua mauokafua a tautolu to fakamonuina e Iehova e tau laliaga fakamakamaka ha tautolu ke taute e finagalo haana mo e leveki fakamitaki e tau mena he Kautu.