Loto Mafola ka e ha ha he Kaufakalatahaaga Fetoko

“KAEKE ke loto taha kia mua a ia,” he fakatonu atu a Iesu Keriso ke he hana tau aposetolo, “ti muikau a ia ke he tau tagata oti kana, mo e fekafekau a ia he tau tagata oti.” Kua taufetoko e tau aposetolo ko hai ia lautolu ne mua. Ne iloa e lautolu kua vihiatia lahi e Iesu e agaga ia. Ne nakai fa fakafeoka e ia hana tau tutaki e taha ke he taha tuga ke eke mo puhala ke fakaholo hake e tau mena fakaagaga.​—Mareko 9:33-37.

Kua nakai fa mukamuka tumau ke taofimau e loto mafola ne ha ha he kaufakalatahaaga aga fetoko ne nakai loto fakaalofa noa. Ti kua lata lahi ni a tautolu ke mailoga ko e vihiatia he Tohi Tapu e “feitaaki, ko e taufetoko, ko e ita tafuā, ko e vale, ko e lagalagahou, ko e feveheveheaki, ko e tau veveheaga, ko e mahekeheke” ko e “tau gahua he tino” ne kua fakalavelave aki e tau tagata ke nakai moua e Kautu he Atua. Kua o fakalataha e tau gahua oti nei mo e agaga fetoko. Ti kua nakai fakaofo ai he fakamalolo atu e aposetolo ko Paulo ke he tau Kalatia: “Aua neke eke a tautolu mo tau tagata hula noa, aua neke fepalekoaki a tautolu, aua neke mahekeheke a tautolu ko e taha kia taha.”​—Kalatia 5:19-21, 26.

Fakalataha mo e lagomatai he agaga tapu, kua maeke a tautolu ke kautu mai he ha manako fia fetoko agaia ke he falu ke maeke ai ke holo ki mua ka ko e falu ka totogi. Ka e kua kehe, kua maeke ia tautolu ke moua e loto mafola kua fakamahomo atu e tau manamanatu. Kua fakamafanatia mai e Tohi Tapu ki a tautolu ko e punaaga he fetokoaga hele kakia, a Satani ko e Tiapolo, kua nakai leva to tuku he pahua, ti nakai gahuahua ai. (Fakakiteaga 20:1-3) To nakai ha ha ai e aga fetoko aki ke he tau katofia. Ko e fua kia ka moua mai ko e kaufakalatahaaga nakai holo ki mua? Nakai pihia? To lagaki hake e tau tagata ke he mitaki katoatoa, nakai mai he fetokoaga he vahaloto ha lautolu, ka e mai he fakaaogaaga he poa lukutoto a Iesu ki a lautolu.​—1 Ioane 2:1, 2.

Ko Keinosuke, ne talahau mai fakamua, ne kua iloa he taha magaaho e fakahekehekeaga he kautuaga fakalalolagi he mua e fakamauaga ke he fakafuaaga he tau motoka, ne fakamategugu lahi hana manamanatuaga mo e tino, ka e hoko fakamui kua tiaki ne ia hana gahua. “He magaaho nei, kua olioli katoatoa moli haku a moui,” he talahau e ia. Kua kitia tuai e ia ko e ha ne fakamailoga ai he kautuaga moli e moui a Iesu. Kua moua e ia he magaaho nei e fakahauhauaga ke he tau mena kua maeke a ia ke taute he fakapotopotoaga he Atua he lalolagi katoa. Ti kua tauteute tuai a ia ma e lalolagi fou, ko e mena ka noa mo e fetokoaga. To maeke foki a koe ke kitia tuai e tama vala he kaufakalatahaaga he lalolagi fou nei ka ahi atu ke he taha he tau Fale he Kautu he matakavi hau mo e feoaki mo e Tau Fakamoli a Iehova.