Ko e Ha e Tau Fakamoli a Iehova ne Fakatumau ke Mataala

“Kia mataala a mutolu; ha kua nakai iloa e mutolu po ke magaaho fe ke hau ai e Iki ha mutolu.”​—MATAIO 24:42.

1. Hagaao ki a hai e hatakiaga “kia mataala”?

KE HE tau fekafekau oti he Atua​—ko e fuata po ke fuakau, ko e tukulele fou po ke kua leva lahi ke he fekafekauaga​—ko e hatakaiaga mai he Tohi Tapu kua tuku mai: “Kia mataala”! (Mataio 24:42) Ko e ha kua aoga ai e mena nei?

2, 3. (a) Ko e heigoa e fakamailoga ne fakamaama fakamaali e Iesu, mo e ko e heigoa e fakamoliaga he perofetaaga kua fakakite? (e) Ko e heigoa e tuaga kua hagaao ki ai he Mataio 24:42 kua kamatamata e moli he ha tautolu a tua, mo e fefe?

² Ke hoko atu ke he fakaotiaga he hana a fekafekauaga ke he lalolagi, kua talahau tuai e Iesu e fakamailoga he hana a ha ha hinei kua nakai kitia ke he malolo he Kautu. (Mataio, veveheaga 24 mo e 25) Kua fakamaama fakamahino e ia e magaaho ia he hana ha ha hinei fakapatuiki​—ti ko e tau mena tutupu he fakamoli he perofetaaga kua fakakite kua fakatokoluga a ia ko e Patuiki ke he lagi he 1914. Kua tuhi foki a ia ke he tuaga ka kamatamata ai e moli he ha tautolu a tua. Kua hagaao e mena nei ke he magaaho ka fakagahua e ia ko e Tagata Fakahoko ke moumou e fakatokaaga mahani kelea lahi nei he magaaho he matematekelea lahi ne talahau e Iesu: “Ka ko e aho ia mo e magaaho ia nakai iloa he taha tagata, nakai iloa foki he tau agelu he lagi, ka ko e haku a Matua hokoia ni.” Ti ko e mena ia he manamanatuaga kua pehe a ia: “Hanai, kia mataala a mutolu; ha kua nakai iloa e mutolu po ke magaaho fe ke hau ai e Iki ha mutolu.”​—Mataio 24:36, 42.

³ Ha ko e ha tautolu a nakai iloa e aho mo e magaaho ka kamata ai e matematekelea lahi kua lata kaeke ke talahau a tautolu ko e tau Kerisiano, kua lata ia tautolu ke momoui tuga e tau Kerisiano moli ke he tau aho oti. To fua mai kia e taliaaga he Iki ke he puhala ne fakaaoga aki e koe e moui hau he magaaho ka hoko mai e matematekelea lahi? Po ke ka hau mua e mate, to manatu nakai e ia a koe ko e taha kua fekafekau fakamoli ki a Iehova ke hoko mai ke he fakaotiaga he hau a moui mogonei?​—Mataio 24:13; Fakakiteaga 2:10.

Fakamakamaka e Tau Tutaki Fakamua ke Mataala

4. Ko e heigoa kua fakaako e tautolu mai he fakafifitakiaga ha Iesu he mataala fakaagaga?

⁴ Kua fakatoka e ia ni ko Iesu Keriso e fakafifitakiaga mitaki lahi he mataala fakaagaga. Ne liogi tumau a ia mo e fakamakamaka ke he hana a Matua. (Luka 6:12; 22:42-44) He magaaho ka fakafehagai mo e tau kamatamata, kua falanaki fakalahi a ia ke he puhala ne moua ke he tau Tohiaga Tapu. (Mataio 4:3-10; 26:52-54) Ne nakai fakaata e ia a ia ke fakalavelave mai he gahua ne kotofa e Iehova ki a ia. (Luka 4:40-44; Ioane 6:15) Ko lautolu kia ne talahau a lautolu ko e tau tutaki a Iesu kua lata foki ke mataala?

5. (a) Ko e ha e tau aposetolo ha Iesu kua uka ai ke fakatumau e lagotataiaga fakaagaga? (e) Ko e heigoa e lagomataiaga ne foaki e Iesu ke he hana a tau aposetolo he mole atu hana a liu tu mai?

⁵ Ke he tau magaaho, ne maueue foki e tau aposetolo ha Iesu. Ti ko e fua he molea e manako lahi mo e tau manatu hehe, kua fehagai a lautolu mo e tau fakaita. (Luka 19:11; Gahua 1:6) To fakaako a lautolu ke falanaki katoa ki a Iehova, ko e tau kamatamata fakalutukia kua fakahehe a lautolu. Ti ko e magaaho ne tapaki a Iesu, kua fehola hana a tau aposetolo. He magaaho fakamui he po ia, ha ko e matakutaku ha Peteru kua fakatikai tumau foki he iloa a Keriso. Kua nakai la tokaloto ia he tau aposetolo e fakatonuaga ha Iesu: “Kia mataala a mutolu mo e liogi.” (Mataio 26:41, 55, 56, 69-75) He mole atu hana a liu tu mai kua fakaaoga e Iesu e tau Tohiaga Tapu ke fakamalolo aki ha lautolu a tua. (Luka 24:44-48) He magaaho ne kitia ai ko e falu ia lautolu ka liga tuku e gahua fakamatala ne tuku age ki a lautolu ko e mena ke ua aki, kua fakamalolo e Iesu ha lautolu a tau manamanatuaga ke tokamata ke he tau gahua aoga lahi.​—Ioane 21:15-17.

6. Totoko ke he ua e matahele fe ne hataki fakamua e Iesu ke he hana a tau tutaki?

⁶ Fakamua, kua puipui e Iesu hana a tau tutaki ke nakai fai vala a lautolu he lalolagi. (Ioane 15:19) Kua fakatonu foki e ia a lautolu ke aua neke fia iki e taha ke he taha ka e fekafekau auloa ko e tau matakainaga. (Mataio 20:25-27; 23:8-12) Kua logona nakai e lautolu e fakatonuaga hana? Kua tuku fakamua nakai e lautolu e gahua kua foaki age ki a lautolu?

7, 8. (a) Fakakite fefe he fakamauaga he tau Kerisiano fakamua kua tokaloto e lautolu e hatakiaga ha Iesu? (e) Ko e aoga he ha e fakatumau ke mataala fakaagaga?

⁷ He tumau agaia e tau aposetolo, kua leveki e lautolu e fakapotopotoaga. Kua fakamoli he fakamauaga tala tuai kua nakai fakalataha e tau Kerisiano ke he tau mena fakapolitika he Fakatufono Roma mo e ko e mena ia kua nakai fai vahega takitaki lotu tokoluga a lautolu. Ke he taha fahi, ko lautolu ko e tau tagata fakapuloa makai he Kautu he Atua. Ke he fakahikuaga he senetenari fakamua, kua fakamatala oti a lautolu ke he Fakatufono Roma, taute tutaki i Asia, Europa, mo Aferika Tokelau.​—Kolose 1:23.

⁸ Pete ia, ko e tau fakakatoatoaaga he fakamatala kua nakai kakano kua nakai lata ke fakatumau ke mataala fakaagaga. Kua talahau tuai mai e Iesu ko e hauaga kua loa agaia. He hoko atu e fakapotopotoaga ke he senetenari ke ua V.N., kua tutu mai e tau mena kua fakahagahaga kelea aki e tau mahani fakaagaga he tau Kerisiano. Pihia fefe?

Lautolu kua Toka e Mataala

9, 10. (a) He mui mai e mamate he tau aposetolo, ko e heigoa e tau tupuaga ki mua kua fakakite a lautolu ne pehe ko e tau Kerisiano kua nakai fakatumau ke mataala? (e) Ko e heigoa e tau tohiaga tapu kua tohi mai he paratafa nei ka lagomatai a lautolu ne pehe ko e tau Kerisiano ke fakatumau e malolo fakaagaga?

⁹ Ko e falu ne o mai ke he fakapotopotoaga kua kamata ke talahau ha lautolu a tau fakaakoaga ke he tau kupu pulotu Heleni, ke maeke he ha lautolu a tau mena ne fakamatala ke talia lahi ke he tau tagata he lalolagi. Fano fakahaga, ko e tau fakaakoaga pouliuli, tuga e Tolu Taha mo e moui nakai mate e solu, kua eke mo taha vala he vahega ne hufia kelea faka-Kerisiano. Kua takitaki e mena nei ke tiaki e amaamanakiaga he afetau. Ko e ha? Ko lautolu ne talia e fakaakoaga ke he nakai mate e solu kua pehe ko e tau monuina he pule ha Keriso kua moua ke he matakavi fakaagaga he solu ka hao mai he tino tagata. Ti kua kitia e lautolu kua nakai lata ke mataala ma e ha ha hinei ha Keriso ke he malolo he Kautu.​—Fakatatai Kalatia 5:7-9; Kolose 2:8; 1 Tesalonia 5:21.

¹⁰ Ko e tuaga nei kua peehi mai he falu a tau tupuaga. Ko e falu kua talahau ko e tau leveki Kerisiano kua kamata ke fakaaoga e tau fakapotopotoaga ha lautolu ko e mena ke moua e talahaua ma hana ni. Kua talahau hifo fakamomole ni e lautolu ke he ha lautolu a tau manatu mo e tau fakaakoaga ko mena e uho he tatai ke he tau Tohiaga Tapu po ke mua atu ke he tau mena nei. He magaaho ne fakakite ai a ia, ko e lotu ne tiaki e taofiaga kua fakaata foki a ia ke fekafekau ke he tau mena ne fiafia e tau fakatufono fakapolitika.​—Gahua 20:30; 2 Peteru 2:1, 3.

Tau Fua he Fakatolomaki e Mataala

11, 12. Ko e ha e Fakatu Porotesano kua nakai fakamailoga e liuaki mai he tapuakiaga moli?

¹¹ He mole atu e tau senetenari he tau ekefakakelea ke he vala he Lotu Katolika Roma, ko e falu he tau Tagata Liu Fakatu kua vagahau he senetenari ke 16 aki. Ka e nakai fakamailoga he mena nei e liu mai he tapuakiaga moli. Ko e ha ne pihia ai?

¹² Pete ni he kehekehe e tau matakau Porotesano kua tokanoa mai he malolo ha Roma, kua uta e lautolu mo lautolu loga he tau fakaakoaga mo e tau gahua he tau tagata ne tiaki e taofiaga​—ko e manamanatuaga iloilo he fekafekau lotu, ti pihia foki mo e tua ke he Tolu Taha, ko e moui nakai mate he solu, mo e fakakikivekaaga tukumalagi he mole atu e mate. Mo e, tuga e Lotu Katolika Roma, kua fakatumau a lautolu ke fai vala mo e lalolagi, mo e matutaki fakalataha mo e tau mena fakapolitika. Ti kua eke a lautolu ke tiaki e ha tau amaamanakiaga he hauaga ha Keriso ko e Patuiki.

13. (a) Ko e heigoa kua fakakite ko e falu a tagata kua ofania moli e Kupu he Atua? (e) Ke he magahala he senetenari 19 aki, ko e heigoa e mena tupu kua eke mo fiafia pauaki ke he falu a lautolu ne pehe ko e tau Kerisiano kua lata? (i) Ko e ha e tokologa ne moua ai e fakatupetupe?

¹³ Ka e, kua talahau tuai e Iesu ko e mena ka mui mai he mole atu e mate he tau aposetolo, ko e tau hakeaga moli he Kautu (ne fakatatai e ia ke he saito) ka fakatumau ke tupu fakalataha ke he tapa he tau Kerisiano fifitaki (po ke, tau titania) ato hoko mai e magaaho ke helehele. (Mataio 13:29, 30) Nakai maeke ia tautolu he vaha nei ke tohi mo e iloa moli a lautolu oti ia kua kitekite e Iki ki ai ko e tau saito. Ka kua aoga lahi ke he magahala he tau senetenari 14 aki, 15 aki, mo e 16 aki, kua ha ha i ai e tau tagata kua fakamakamaka ni ke he ha lautolu a tau momoui mo e tokanoaaga ke tuku e Tohi Tapu ke he vagahau kua fa mahani e tagata. Ko e falu nakai ni ke talia e Tohi Tapu ko e Kupu he Atua ka e tiaki foki e Tolu Taha nakai mai he tohiaga tapu. Ko e falu kua tiaki e tua ke he moui nakai mate he solu mo e fakakikivekaga he afi helo kua nakai lagotatai moli mo e Kupu he Atua. Ti pihia foki, ke he magahala he senetenari 19 aki, ko e fua he tupu ki mua e fakaako ke he Tohi Tapu, ko e tau matakau he Tau Motu Kaufakalataha, Sihamani, Igilani, mo Rusia kua kamata ke fakakite e tua malolo ko e magaaho ka liu mai a Keriso kua teitei hoko mai. Ka e laulahi he tau amaamanakiaga ha lautolu kua takitaki atu ke he fakaita. Ko e ha? Ke fakalaulahi atu e manamanatuaga, ko e kakano ha kua falanaki lahi ni a lautolu ke he tau tagata mo e nakai lahi ke he tau Tohiaga Tapu.

Puhala kua Fakamoli Aki a Lautolu ne Mataala

14. Fakamaama e hafagiaga ke he fakaako Tohi Tapu ne taute e C. T. Russell mo e hana a tau tagata gahua.

¹⁴ Ti he 1870, ne fakatu e Charles Taze Russell mo e hana tau tagata gahua e fakaako Tohi Tapu i Allegheny, Pennsylvania. Nakai ko lautolu ne kitekite fakamua ke he loga he tau kupu moli he Tohi Tapu ne kuku mau e lautolu, ka e he magaaho ne fakaako, ne taute e lautolu e fakamahani ke fakakia fakamitaki e tau tohiaga tapu ke he huhu kua foaki.a Ko e ha lautolu a manamanatuaga, ke nakai moua e tau tohi kua fakamoli ke he manatu fakamua, ka ke iloa moli kua moua e lautolu e tau fakahikuaga kua lagotatai mo e tau mena oti kua talahau he Tohi Tapu ke he mena ia.

15. (a) Ko e heigoa he falu nakai ni ko Matakainaga Russell kua o mai ke mailoga? (e) Ko e heigoa kua fakamailoga aki e Tau Tagata Fakaako Tohi Tapu ke kehe mai he tau mena nei?

¹⁵ Ko e falu foki fakamua ia lautolu kua mailoga to liu mai a Keriso nakai kitia ke tuga e agaga. Ko e falu kua kitia ko e kakano he liu mai a Keriso ko e, nakai ke tugi e lalolagi mo e uta kehe e tau momoui oti he tau tagata ka e, ke fakamonuina e tau magafaoa oti he lalolagi. Kua ha ha i ai e falu foki kua mailoga ko e tau 1914 ka fakamailoga ai e fakaotiaga he Tau Vaha he Tau Motu Kehe. Ka ke he Tau Tagata Fakaako Tohi Tapu kua fakalataha mo Matakainaga Russell, kua fai mena atu foki ke he tau matapatu ni ke he tutala fakaatua. Kua talaga e lautolu ha lautolu a tau momoui takai ai ke he tau kupu moli nei mo e foaki age ki a lautolu e fakailoaaga he lalolagi katoa ke he kitiaga tote he vaha ia.

16. Ke he tau 1914, ko e ha ne tohi ai he Matakainaga Russell: “Ko tautolu ha he vaha kamatamata”?

¹⁶ Kua lata agaia a lautolu ke fakatumau ke mataala. Ko e ha? Tuga e fakatai ki ai, pete ni he iloa e lautolu ko e 1914 kua fakamailoga he perofetaaga he Tohi Tapu, ne nakai iloa moli e lautolu ko e heigoa e mena ka tupu ke he tau ia. Ko e mena nei kua tuku atu a lautolu ke he kamatamata. Ke he The Watch Tower he Novema 1, 1914, ne tohi e Matakainaga Russell: “Ki a manatu e tautolu ko tautolu ha he vaha kamatamata. . . . Kaeke ke ha ha i ai ha kakano ka takitaki atu e taha ke fano kehe mai he Iki mo e Hana a Kupu Moli mo e ke tiaki e poa ma e Gahua he Iki, ti nakai ko e fakaalofa noa ni he Atua ke he loto ne tupu mai e fiafia ke he Iki, ka ko e taha mena; ti liga ko e amaamanakiaga ke he magaaho kua ku; ko e tukulele ni ke he magaaho tonu.”

17. Tumau fefe e lagotatai fakaagaga ha A. H. Mac­mil­lan, mo e falu foki tuga a ia?

¹⁷ Ko e falu kua tiaki e gahua a Iehova he vaha i tuai ia. Ka ko A. H. Macmillan ko e taha ne nakai tiaki. Ke he tau tau fakamui, ne fakailoa fakamoli e ia: “Ke he falu a magaaho ke he ha tautolu a tau amaamanakiaga ma e aho tonu kua mua atu ke he fakamoliaga he Tohiaga Tapu.” Ko e heigoa ne lagomatai a ia ke fakatumau ke he lagotataiaga fakaagaga? Ne mailoga e ia, he talahau e ia, “he magaaho ne nakai fakamoli e tau amaamanakiaga ia, ne nakai hiki he mena ia e finagalo he Atua.” Ne lafi e ia: “Ne fakaako e au kua lata ke talahau e tautolu ha tautolu a tau mena hehe mo e fakatumau ke kumi e Kupu he Atua ma e fakafiafia lahi.”b He fakatokolalo, ko e Tau Tagata Fakaako Tohi Tapu fakamua ia kua toka e Kupu he Atua ke hiki ha lautolu a tau onoonoaga.​—2 Timoteo 3:16, 17.

18. Moua fefe he mataala Kerisiano e tau aoga tupu ki mua he nakai fai vala he lalolagi?

¹⁸ Ke he magahala he tau tau ne mui mai, ko e ha lautolu a lata ke fakatumau ke mataala kua nakai fakatote. Ne iloa e lautolu, moli, ko e tau Kerisiano kua nakai lata ke fai vala he lalolagi. (Ioane 17:14; Iakopo 4:4) He lagotatai mo e mena ia, kua nakai fakalataha a lautolu mo Kerisitenitome ke lagomatai e Tau Matakau he Tau Motu ko e talahauaga fakapolitika he Kautu he Atua. Ka e nakai kamata ato hoko atu ke he 1939 kua kitia maali e lautolu e kakano he tu uho he Kerisiano.​—Kikite The Watchtower, Novema 1, 1939.

19. Ko e heigoa e tau aoga he levekiaga he fakapotopotoaga kua fua ha ko e fakatumau e fakatokatokaaga ke mataala?

¹⁹ Ne nakai ha ha ia lautolu e vahega takitaki lotu, pete ni e ha ha i ai e tau motua kua fifili kua logona ko e gahua fakamatala he fakapotopotoaga kua amaamanaki oti mai ia lautolu. Ka e pete ia, ko e manako moli ke muitua ke he tau Tohiaga Tapu, kua liu fakamanatu he fakatokatokaaga e matagahua he tau motua ke he maama he tau Tohiaga Tapu, he liu taute pihia tumau mai he tau atu he Ko e Kolo Toko. Ko e tau hikiaga he fakatokatokaaga kua taute lagotatai ai mo e mena ne fakakite he tau Tohiaga Tapu.

20-22. Kua mau tauteute fefe e tupu atu ki mua he fakatokatokaaga katoa ke fakakatoa e gahua talahau tuai he fakailoa e Kautu ke he lalolagi katoa?

²⁰ Ko e fakatokatokaaga katoa kua mau katoa ke fakakatoatoa oti e gahua kua fakakite mai he Kupu he Atua ke he vaha ha tautolu. (Isaia 61:1, 2) Fakalaulahi atu fefe e fakamatala he tala mitaki ke fakamatala ke he vaha ha tautolu? Kua pehe a Iesu: “To fakamatala fakamua foki e vagahau mitaki ke he tau motu oti kana ke lata ai.” (Mareko 13:10) Ke he kitiaaga he tagata, ko e gahua ia kua fa mahani ke nakai maeke.

²¹ Ti mo e, mauokafua ki a Keriso ko e Ulu he fakapotopotoaga, ko e vahega fekafekau fakamoli mo e lotomatala kua une ki mua. (Mataio 24:45) Tua fakamoli mo e mauokafua kua tuhi e lautolu ke he tau tagata ha Iehova e gahua ke taute. Mai he 1919 ki mua, ko e peehiaga holo ki mua kua foaki ai ke he fekafekau he fonua. Ma e tokologa, kua nakai mukamuka ke fano he taha fale ke he taha fale mo e tutala ke he tau tagata ne nakai iloa. (Gahua 20:20) Ka ko e vala tala fakaako tuga e “Fakamonuina a Lautolu ne Nakai Matakutaku” (he 1919) mo e “Ki a Eke mo Tau Fakamalolo Mitaki” (he 1921) kua lagomatai e falu ke kamata ke he gahua, mo e falanaki ki a Iehova.

²² Ko e uiaga, he 1922, ke “fakailoa, fakailoa, fakailoa, e Patuiki mo e hana a kautu” kua foaki e manako fakaohooho ke foaki ke he gahua nei e fakailoaaga talahaua. Mai he 1927 ki mua, ko e tau motua kua nakai talia e matagahua faka-Tohiaga Tapu ia kua uta kehe. Ke he magaaho ia, ko e tau hukui ahiahi he Kaufakalatahaaga, ko e tau pilgrim, kua fifili ke eke mo tau takitaki fekafekau gahua matakavi, kua foaki age e hatakiaga fakatagata ke he tau tagata fakailoa ke he fekafekauaga he fonua. Nakai maeke ke gahua foafoa e tau tagata oti, ka ke he tau okioki matahiku fahi tapu kua tokologa kua foaki e tau aho katoa ke he fekafekauaga, kamata tuai ke he mogo pogipogi, oti fakaku ke kai e seneuisi, mo e liu kamata e fekafekauaga ato hoko ke he magaaho afiafi. Ko e tau magaaho mua ue atu a ia he tupuaga pule-fakaatua, mo e kua aoga lahi ki a tautolu he liu fakamanatu e puhala ne takitaki aki e Iehova hana a tau tagata. Kua fakatumau a ia ke taute pihia. Mo e hana a fakamonuinaaga, ko e gahua he fakamatala e tala mitaki he Kautu kua fakatu ka tamai ke he fakakatoatoaaga ka kautu lahi.

Fakatumau Nakai a Koe ke Mataala?

23. Ke he fakaalofa faka-Kerisiano mo e vevehe kehe mai he lalolagi, fakakite takitokotaha fefe e tautolu hane fakatumau a tautolu ke mataala?

²³ Fakateliga atu ke he hatakiaga ha Iehova, ko e hana a fakatokatokaaga kua fakatumau ke fakamataala aki a tautolu ke he tau gahua mo e tau aga ka fakakite a tautolu ko e taha vala he lalolagi, ha ko e hagahaga kelea neke mole atu fakalataha mo ia. (1 Ioane 2:17) Fakateliga atu ki ai, kua lata a tautolu takitokotaha ke mataala he fakateliga ke he hatakiaga a Iehova. Kua foaki mai foki e Iehova ki a tautolu e hatakiaga hagaao ke nonofo mo e gahua auloa. Ko e hana a fakatokatokaaga kua lagomatai a tautolu ke tupu e fakaaue ha ko e kakano moli he fakaalofa faka-Kerisiano. (1 Peteru 4:7, 8) Ko e ha tautolu a tumau ke mataala kua lata ke fakamakamaka tumau ke fakagahua e fakatonuaga nei, pete ni e nakai mitaki katoatoa e tagata.

24, 25. Hagaao ke he tau mena lilifu fe kua lata ia tautolu ke fakatumau e mataala, mo e ko e heigoa ne fakatoka mai mua?

²⁴ Fakatumau ki ai, ko e fekafekau fakamoli mo e lotomatala kua fakamanatu ki a tautolu: “Kia tua a koe kia Iehova mo e hāu a loto katoa; ka e aua neke falanaki a koe ke he hāu a pulotu.” (Fakatai 3:5) “Kia liogi nakai noa.” (1 Tesalonia 5:17) Kua fakatonu a tautolu ke fakaako ke fakave ha tautolu a tau fifiliaga ke he Kupu he Atua, ke eke e kupu nei mo ‘hulu ke he ha tautolu a tau hui mo e maama ke he ha tautolu a puhala.’ (Salamo 119:105) Fakaalofa kua lahi, kua fakamalolo a tautolu ke taofi mau ki mua ke he ha tautolu a tau momoui e fakamatalaaga he tala mitaki he Kautu he Atua, ko e gahua ne talahau tuai e Iesu ma e vaha ha tautolu.​—Mataio 24:14.

²⁵ E, ko e fekafekau fakamoli mo e lotomatala kua moli ni ke mataala. Kua lata foki a tautolu takitokotaha ke mataala. Ko e fua he taute pihia, ki a moua a tautolu fakalataha mo lautolu ne tutu mo e talia ki mua he Tama he tagata ka hau a ia ke fakahoko e fakafiliaga.​—Mataio 24:30; Luka 21:34-36.

[Tau Matahui Tala]

Liu Fakamanatu

◻ He fakakite ia Mataio 24:42, ko e ha kua lata ia tautolu ke fakatumau ke mataala?

◻ Tumau fefe a Iesu mo e hana a tau tutaki he senetenari fakamua ke he mataala fakaagaga?

◻ Tali mai he 1870, ko e heigoa e tau tupuaga kua ha ha i ai ha ko e tau fekafekau ha Iehova kua fakatumau ke mataala?

◻ Ko e heigoa ka fakakite e fakamoliaga ko tautolu takitokotaha ne fa e fakatumau ke mataala?

[Tau Fakatino he lau 29]

Kua fakalavelave tumau a Iesu ke he gahua kua foaki age he hana a Matua. Kua liogi nakai noa a ia

[Fakatino he lau 30]

Ko Charles Taze Russell he tau tau fakamui hana

[Fakatino he lau 31]

Ki luga he 4,700,000 he tau tagata fakailoa he Kautu hane hakahakau