Olioli ke Fakatokolalo ke he Pule Malolo
“Ka kua omaoma nai a mutolu mo e tau loto.”—ROMA 6:17.
1, 2. (a) Ko e heigoa e agaga ne kitia moli he lalolagi he vaha nei, mo e ko e heigoa hana punaaga mo e hana lauiaaga? (e) Fakakite fefe he tau fekafekau tukulele a Iehova ko e kehe a lautolu?
“KO E agaga haia kua gahua ai ni ainei kia lautolu kua faliuliu” ko e mena fakateteki lahi kua kitia moli ai he vaha nei. Ko e agaga fia tutokotaha nakai mataofi haia, ne puna mai ia Satani, “ko e pule malolo, he pulagi.” Ko e agaga nei, ko e “pulagi,” po ke aga fulukovi lahi mo e faliuliu, ne kua fakatokatoka mai e “pule malolo,” po ke malolo, ki luga he tau tagata tokologa. Ti ko e taha kakano foki ni aia hane fa e tupu ke he lalolagi e mena ne fakahigoa ko e matematekelea he fahi pule malolo.—Efeso 2:2, fakatatai NW.
2 Kua fiafia lahi, ha kua nakai fakapuke he tau fekafekau tukulele a Iehova he vaha nei ha lautolu a tau mama fakaagaga mo e “pulagi” kiva nai, po ke agaga totoko. Kua iloa e lautolu to “hoko ni e ita he Atua ke he tau tagata faliuliu.” Ne lafi foki e aposetolo ko Paulo ki ai: “Hanai, aua neke fakalataha a mutolu mo lautolu.” (Efeso 5:6, 7) Ka e kehe, kua lali fakalahi e tau Kerisiano moli ke ‘puke a lautolu ke he agaga [a Iehova]’ mo e kua inu e lautolu e “iloilo mai luga,” ko e mena “mea, ti mafola, ti totonu, ti fulumokoi [“ti mautauteute ke omaoma,” NW].”—Efeso 5:17, 18; Iakopo 3:17.
Manako Fakatokolalo ke he Pule Katoatoa a Iehova
3. Ko e heigoa e kei ke he manako fakatokolalo, mo e heigoa e fakaakoaga lahi mahaki ne fakaako mai he fakamauaga tuai ki a tautolu?
3 Ko e kei ke he manako fakatokolalo e mahani kua mailoga e pule malolo kua tonu fakamatafakatufono. Kua fakakite mai he fakamauaga tuai he tagata ko e aga nakai fia talia ke he pule katoatoa a Iehova ka nakai tamai e fiafia moli. Ne nakai tamai he aga nakai fia talia pihia e fiafia lahi ki a Atamu mo Eva, po ko ia ne kamata e mahani totoko ha laua, ko Satani ko e Tiapolo. (Kenese 3:16-19) Mai he hana tutuaga muikau he magaaho nei, “kua ita lahi” a Satani kakano he iloa e ia kua ku hana magaaho. (Fakakiteaga 12:12) Ko e mena falanaki ni e mafola mo e fiafia lahi he tagata, e, he lagi mo e lagi katoatoa, ko e mailogaaga he lagi mo e lalolagi katoatoa ke he pule katoatoa kua tututonu a Iehova.—Salamo 103:19-22.
4. (a) Ko e faga mahani fakatokolalo mo e omaoma fefe ne kua manako a Iehova ke fakakite he tau fekafekau hana? (e) Ko e heigoa kua lata a tautolu ke loto mauokafua, mo e fakailoa mai fefe he salamo e mena nei?
4 Ka e, kakano ha kua homo ue atu e lagotatai he hana tau mahani, ati kuenaia kua nakai makona ni hokoia e loto a Iehova mo e omaoma noa. E moli, kua malolo lahi a ia! Ka e nakai pule vale a ia. Ko e Atua fakaalofa a ia, mo e manako a ia ke fia omaoma lahi hana tau mena momoui iloilo ki a ia, mai he loto fakaalofa. Kua manako a ia ke fakatokolalo a lautolu ke he pule katoatoa hana kakano he fifili e loto katoa ke tuku ne lautolu a lautolu i lalo he hana pule malolo tututonu mo e tonu fakamatafakatufono, ha kua mauokafua e tau loto kua nakai ha ha i ai ha mena kua mahomo atu e mitaki ma lautolu ka ko e omaoma ni tukumalagi ki a ia. Ko e faga peresona ne manako a Iehova ki ai ke ha ha he lagi mo e lalolagi katoatoa hana, ko lautolu ia ne kua eke e tau logonaaga ke tuga he salamo ne tohi: “Kua hakohako e fakatufono a Iehova, kua liuaki mai e agaga; kua fakamoli e talahau a Iehova, kua fakailoilo a lautolu kua goagoa. Kua tonu e tau fekau a Iehova, kua fakafiafia e loto, kua meā e tau poaki a Iehova, kua fakamaama e tau mata. Kua meā e matakutaku kia Iehova, to tumau tukulagi; ko e tau fakafiliaga foki a Iehova kua moli ia, mo e tonu fakaoti.” (Salamo 19:7-9) Ko e loto mauokafua katoatoa ke he tonu mo e tututonu he pule katoatoa a Iehova—ti kua lata ke pehenai ni e aga manamanatu ia tautolu kaeke kua manako a tautolu ke nonofo he lalolagi fou a Iehova.
Olioli Lahi ke Fakatokolalo ke he Patuiki ha Tautolu
5. Fefe e palepale a Iesu ha ko e hana mahani omaoma, mo e ko e heigoa kua fiafia a tautolu ke mailoga?
5 Ko ia ni ko Iesu Keriso e fakafifitakiaga muatua he mahani fakatokolalo ke he hana Matua i luga he lagi. Kua totou e tautolu “ne fakatokolalo e ia a ia, ne oma e ia kua hoko ke he mate, ko e mate haia he satauro.” Kua lafi atu foki a Paulo: “Ko e mena foki ia kua fakamatalahi ai he Atua a ia, mo e foaki atu ai kia ia e higoa kua mua ke he tau higoa oti kana; Kia fakatokotui e tau tulihui oti kana ke he higoa a Iesu, ko lautolu ha ha he lagi, mo lautolu ha ha he lalolagi, mo lautolu ki lalo he lalolagi; Kia tokutoku atu foki he tau alelo oti, ko Iesu Keriso ko e Iki a ia, ke tupu ai e fakaheke ke he Atua e Matua.” (Filipi 2:8-11) E, kua olioli lahi a tautolu ke fakatokotui ki mua he Takitaki ha tautolu ko e Patuiki kua pule, ko Iesu Keriso.—Mataio 23:10.
6. Kua fakakite moli fefe e Iesu ko e fakamoli mo e takitaki a ia he tau matakau fakamotu, mo e to mau tumau fefe hana ‘pule he patuiki’ he mole e matematekelea lahi?
6 Ne perofeta mai a Iehova hagaao ki a Keriso ka eke mo Takitaki ha tautolu: “Kitiala, kua ta age e au a ia mo tagata fakamoli mena ke he tau motu, ko e takitaki mo e pule ke he tau motu.” (Isaia 55:4) Mai he hana fekafekauaga ke he lalolagi mo e mai he hana takitakiaga ne taute mai he lagi ke he gahua fakamatala he mole atu hana mate mo e fakaliu tu mai, kua fakakite e Iesu a ia ni “ko e talahau kua fakamoli mo e moli” ma e hana Matua ke he tau tagata he tau motu oti kana. (Fakakiteaga 3:14; Mataio 28:18-20) Ko e tau motu pihia ne kua hukui he magaaho nei he “moto tagata tokologa” ne fa e tupu e numela, ko lautolu haia ka hao mai he “matematekelea lahi” he ha ha i lalo he takitakiaga a Keriso. (Fakakiteaga 7:9, 14) Ka e nakai oti i ai e takitaki a Iesu. To mau tumau hana ‘pule he patuiki’ ke he afe tau. Ma e tau tagata omaoma, to fakamoli a ia ke he hana higoa “ko e Fakatonuaga Ofoofogia lahi, Atua Malolo Lahi Mahaki, Matua Tane Tukulagi, Tama Tane he Patuiki he Mafola.”—Isaia 9:6, 7, NW; Fakakiteaga 20:6.
7. Kaeke kua manako a tautolu ke takitaki e Iesu Keriso a tautolu ke he “tau vaipuna he moui,” kua lata a tautolu ke nakai fakatuai ke taute e heigoa, mo e heigoa ka taute aki a tautolu ke ofania e Iesu mo Iehova?
7 Kaeke kua manako a tautolu ke moua e tau mena aoga he “tau vaipuna he moui” ko e mena kua eke e Punua Mamoe, ko Iesu Keriso, ke takitaki e tau tagata loto hakohako ki ai, kua lata na tautolu ke fakakite moli ti nakai fakatuai, mai he tau puhala ha tautolu ko e olioli lahi a tautolu ke fakatokolalo ke he pule malolo hana ko e Patuiki. (Fakakiteaga 7:17; 22:1, 2; fakatatai Salamo 2:12.) Ne talahau e Iesu: “Kaeke ke fakaalofa mai a mutolu kia au, kia omaoma mai a mutolu ke he haku a tau poaki. Ko ia ha i ai haku a tau poaki, mo e omaoma ki ai, ko ia haia ke fakaalofa kia au; ko ia foki ke fakaalofa kia au, to ofania a ia he haku a Matua; to fakaalofa foki au kia ia, mo e fakakite atu au kia ia.” (Ioane 14:15, 21) Kua manako nakai a koe ke ofania e Iesu mo e hana Matua? Kia fakatokolalo a mogoia ke he pule malolo ha laua.
Olioli Lahi e Tau Leveki ke Omaoma
8, 9. (a) Ko e heigoa ne foaki mai e Keriso ma e ati hakeaga he fakapotopotoaga, mo e mena fe kua lata e tau tagata tane nei ke eke mo tau fakafifitakiaga ke he fuifui? (e) Ne fakatai fefe e loto fakatokolalo he tau leveki Kerisiano i loto he tohi a Fakakiteaga, mo e kua lata fefe a lautolu ke kumi e “loto omaoma” ka taute e tau fakafiliaga?
8 “Tuga e ekelesia kua omaoma kia Keriso.” Ha ko e hana Leveki, ne foaki e ia “e tau mena fakaalofa ke he tau tagata” ke eke ke “ati hake ai” e fakapotopotoaga. (Efeso 4:8, 11, 12; 5:24) Ne talaage ke he tau patu motua fakaaagaga nei ke ‘leveki e fuifui mamoe he Atua ha ia lautolu,’ nakai ke ‘tuga e tau tagata kua fia iki ke he kaina he Atua, ka kia eke mo tau fakafifitaki ke he fuifui mamoe.’ (1 Peteru 5:1-3) Ko e fuifui ha Iehova, mo e ko Keriso e hana “leveki mamoe mitaki.” (Ioane 10:14) Ha kua hako ai e tau leveki ke amaamanaki ke fia loto kau auloa e tau mamoe ne kua age e Iehova mo Keriso ke leveki e lautolu, ti kua lata na lautolu ni ke eke mo tau fakafifitakiaga mitaki ke he mahani fakatokolalo.—Gahua 20:28.
9 He senetenari fakamua, kua eke e tau leveki fakauku ke hukui he tau mena fakatai kua “ha he,” po ke “ke he,” lima matau a Keriso, ne kua fakakite mai ai kua mahani fakatokolalo a lautolu ki a ia ko e Ulu he fakapotopotoaga. (Fakakiteaga 1:16, 20; 2:1) Ti kua nakai tote hifo foki he vaha nei, kua lata e tau leveki i loto he fakapotopotoaga he Tau Fakamoli a Iehova ke fakatokolalo ke he takitakiaga a Keriso mo e ‘fakatokolalo ai a lautolu ni ki lalo he lima malolo he Atua.’ (1 Peteru 5:6) He magaaho ne ui ki ai ke taute e tau fakafiliaga, kia eke ke tuga a Solomona he hana a tau tau mahani fakamoli, ha kua lata ai a lautolu ke liogi ki a Iehova: “Ko e mena ia kia foaki mai ai e koe e loto [“omaoma,” NW] ke he hau a fekafekau ke fakafili ai e ia hau a motu, mo e fifili ai e ia e mitaki mo e kelea.” (1 Tau Patuiki 3:9) Ko e loto omaoma ka omoi aki e motua, ke kumi ke kitia e tau mena, tuga kua kitia e Iehova mo Iesu Keriso, ke maeke ai ke taute ai e tau fifiliaga he lalolagi ke tatai lahi mo e mena kua taute i luga he lagi.—Mataio 18:18-20.
10. Kua lata ke eketaha fefe e tau leveki oti kana ke fifitaki ki a Iesu mai he puhala ne taute mena a ia ke he tau mamoe?
10 Kua lata ni ke lali fakalahi pihia e tau leveki faifano mo e tau motua he fakapotopotoaga ke fifitaki ke he puhala ne fa taute e Keriso ke he tau mamoe. Ke nakai tuga e tau Farasaio, ne nakai tala age e Iesu e tau poakiaga loga ne mua he uka lahi ke muitua ki ai. (Mataio 23:2-11) Ne pehe a ia ki a lautolu ne tuga e tau mamoe: “Kia o mai a mutolu kia au, ko mutolu oti ne matematekelea mo e pehia he tau kavega; ko au foki ke okioki ai a mutolu. Kia hahamo e mutolu e lakau hahamo haku, mo e fifitaki mai a mutolu kia au; ha ko au ni ko e totonu mo e loto holoilalo; ti moua ai e mutolu e okiokiaga mo e tau agaga ha mutolu. Ha ko mena maeke vave haku a lakau hahamo he uta, ko e haku a kavega foki, ko e mena mama a ia.” (Mataio 11:28-30) He magaaho kua lata moli foki ke igatia ne Kerisiano “mo e fua hana ni a kavega,” kua lata ne leveki ke manatu e fakafifitakiaga a Iesu mo e lagomatai ai ha lautolu a tau matakainaga ke logona ko e matagahua Kerisiano he motua ko e mena “maeke vave,” “mena mama,” mo e kua olioli ke fua ai.—Kalatia 6:5.
Mahani Fakatokolalo Aga Teokaratiki
11. (a) Kua maeke fefe e tagata ke fakalilifu ke he ulu pule ka e nakai ko e tagata he teokaratiki moli? Talahau e fakataiaga. (e) Ko e heigoa e kakano ke eke ko e tagata he teokaratiki moli?
11 Ko e teokarasi ne kua pule ai e Atua. Kua putoia ai e matapatu fakaakoaga ke he ulu pule ne fakailoa mai ia 1 Korinito 11:3. Ka e kua lahi e kakano he mena ia. Liga tuga ko e fakakite he tagata e mahani fakalilifu ke he ulu pule ka e nakai aga teokaratiki ke he kakano katoatoa he kupu. Fefe e mena nei? Ke fakatai ki ai, ko e pule he tagata e fakatufono ne pule e tau lalotagata, mo e ko e fakamaamaaga ke he tagata kua loto ke he pule he tagata “ko e peresona ne talitonu ke he tau manamanatu he pule he tagata.” Liga ne pehe e taha tagata tane ko e tagata he pule he tagata, ti kua vili, mo e eke foki ko e politika gahua malolo. Ka e kaeke, kua fa mahani a ia ke vihiatia e agaga he pule he tagata mo e tau matapatu fakaakoaga oti kana ne kua putoia i ai, kua maeke nakai ke pehe ko e tagata moli he pule he tagata a ia? Ti kua tatai pihia ni, ke eke ko e tagata moli he teokaratiki, kua lata ne tagata ke lahi mai e tau mena ka taute ka e nakai fakatokolalo noa ni ke he ulu pule. Kua lata a ia ke fifitaki ke he tau puhala mo e tau fua a Iehova. Kua lata a ia ke takitaki moli he pule a Iehova ke he tau puhala oti kana. Mo e ha kua age e Iehova ke he hana Tama e pule malolo katoa, ko e taha kakano foki he aga teokaratiki, ke fifitaki atu ki a Iesu.
12, 13. (a) Mua atu ko e heigoa, kua putoia he aga teokaratiki? (e) Kua putoia kia e loto fakatokolalo teokaratiki ke omaoma ke he tau poakiaga loga? Talahau e fakataiaga.
12 Kia manatu, kua manako a Iehova ke loto ke mahani fakatokolalo ne kua omoi he loto fakaalofa. Ko e puhala hanai hana ne takitaki aki e lagi mo e lalolagi katoatoa. Ko ia ni e fakatino tonu he loto fakaalofa. (1 Ioane 4:8) Ko Iesu Keriso “ko e kikila a ia he hana lilifu, mo e hana fakatai moli ni.” (Heperu 1:3) Kua loto a ia ke feofanaki e tau tutaki moli hana. (Ioane 15:17) Ti ka eke ko e tagata he teokaratiki kua nakai ko e aga fakatokolalo ni hokoia ne putoia ai ka ko e loto fakaalofa foki. Kua liga maeke ke pota katoa tuga ne mui mai: Teokarasi ko e pule he Atua; ko e Atua, ko e fakaalofa a ia; ha ko e mena ia ko e pule he fakaalofa e teokarasi.
13 Liga kua eke e motua ke manamanatu ke maeke ke aga teokaratiki, kua lata e tau matakainaga ke omaoma ke he tau poakiaga kehekehe. Kua taute he falu motua e tau poakiaga mai he tau talahauaga noa ne foaki he “fekafekau fakamoli mo e loto matala” mai taha magaaho mo e taha magaaho. (Mataio 24:45) Ke tuga anai, ne talahau noa mai he taha magaaho ke maeke ai ke mukamuka lahi ke iloa e tau matakainaga he fakapotopotoaga, liga kua mitaki ke nakai nonofo tumau he mena taha he Fale he Kautu. Kua kakano mo talahauaga aoga, nakai ko e poaki hakotika. Ka e kua liga hagahaga e falu motua ke fakafaliu ai mo poakiaga mo e logona ko e nakai aga teokaratiki a lautolu ne nakai muitua ki ai. Ka e, kua liga loga e tau kakano mitaki ne fia loto ai e taha matakainaga tane mo e matakainaga fifine ke nofo pauaki he taha matakavi. Kaeke kua nakai manamanatu fakaalofa e motua ke he tau mena pihia, kua aga teokaratiki moli kia a ia? Ke eke ke aga teokaratiki, “kia eke e mutolu e tau mena oti ha mutolu mo e fakaalofa.”—1 Korinito 16:14.
Fekafekau Fakalataha mo e Olioli
14, 15. (a) Kua maeke fefe e motua ke uta kehe mai he falu matakainaga tane mo e matakainaga fifine ha lautolu a olioli ke fekafekau ki a Iehova, mo e ko e ha kua nakai ko e aga teokaratiki a nei? (e) Ne fakakite mai fefe e Iesu ko e loto fakaaue a ia ke he fakaalofa ne fakailoa mai he ha tautolu a gahua fekafekau, ka e nakai ko e fiha e loga? (i) Ko e heigoa kua lata e tau motu ke manamanatu ki ai?
14 Ko e kakano foki he aga teokaratiki ko e fekafekau ki a Iehova fakalataha mo e olioli. Ko Iehova “ko e Atua fiafia.” (1 Timoteo 1:11, NW) Kua manako a ia ke olioli lahi hana tau tagata tapuaki ke fekafekau ki a ia. Ka ko lautolu ne pili lahi ke taute fakamahao ni ke he tau poakiaga, kua lata ni ke manatu ko e ha ha he tau matafakatufono ne kua lata e tau Isaraela ke ‘taofi ai e ke eke ai’ e tau mena ne mui mai: “Ti fiafia ai a koe ki mua a Iehova hau a Atua ke he tau mena oti ni kua eke hau a tau lima.” (Teutaronome 12:1, 18) Ko e ha mena ne taute e tautolu ke he fekafekauaga a Iehova kua lata ke taute fakalataha mo e olioli, nakai ko e kavega mamafa. Kua maeke e tau leveki ke lahi e tau mena ka taute ke logona he tau matakainaga e fiafia ke taute e tau mena kua maeke a lautolu ke fekafekau ki a Iehova. Ka ko e taha fahi, kaeke kua nakai fakaeneene e tau motua, kua maeke a lautolu ke uta kehe mai he falu matakainaga ha lautolu a olioli. Kaeke, ke fakatai ki ai, kua fefakatataiaki a lautolu, he nava ki a lautolu kua hokotia po ke molea e tau tula fakaavelesi he fakapotopotoaga ke he gahua fakamoli mo e kua fakahaha e tau totoku kelea ki a lautolu ne nakai moua, to fefe mogoia e tau logonaaga ha lautolu ne kua liga fai kakano moli ati tote ai e tau magaaho ne hokotaki? Nakai kia kua maeke he mena nei ke fakaagahala noa ni e tau loto ha lautolu mo e uta kehe ha lautolu a olioli?
15 Ko e tau tula gahoa ne maeke e falu ke tuku atu ke gahua fakamoli ke he tau tagata ne kua liga ko e hukuiaga he tau laliaga lahi mahaki mai he tau tutala loga ne kua fakamole he falu ke he gahua fakamatala, ka onoono ke he tau moui fuata, mahomo atu e tino malolo, mo e falu tutuaga foki. Ke he mena nei, kua nakai lata e tau motua ke fakafili a lautolu. Kua moli, kua age he Matua ki a Iesu e ‘pule ke eke e fakafiliaga.’ (Ioane 5:27) Kua totoku kelea kia e Iesu e takape mativa, kakano he tote e mena ne foaki e ia mai he mena fakaavelesi? Nakai, ne mafiti lahi a ia ke logonatia e kakano moli he tau tupe ikiiki ia ke he fifine. “Ko e hana a tau mena oti ke moui ai,” a ia. Kua hokulo lahi ha e fakaalofa ki a Iehova ne kua hukui e lautolu! (Mareko 12:41-44) Kua lata kia e tau motua ke to tote hifo e mafiti ke logonatia e tau laliaga fakaalofa ha lautolu ne kua eke ke tokolalo e numela he mena “fakaavelesi”? Ke he kakano he fakaalofa ki a Iehova, kua liga eke e tau laliaga pihia ke molea muatua he mena fakaavelesi!
16. (a) Kaeke kua fakaaoga he leveki e tau numela i loto he tau lauga ha lautolu, kua lata he ha a lautolu ke lotomatala mo e lagotatai mitaki? (e) Maeke fefe ke lagomatai e tau matakainaga ke fakaholo ki mua ha lautolu a fekafekauaga?
16 Kua lata ka mogoia e tau kupu nei ke fakafaliu he magaaho nei mo “poakiaga” kua lata ne tau numela—pihia foki e tau mena fakaavelesi—ke nakai liu foki ke talahau? Kua nakai pihia! Ko e manatu hanai, kua lata e tau leveki ke fakalagotatai e vahaloto he fakamafana e tau matakainaga ke fakalaulahi e fekafekau ha lautolu mo e lagomatai a lautolu ke taute e tau mena kua maeke ki ai a lautolu fakalataha mo e loto olioli. (Kalatia 6:4) Mai he fakataiaga a Iesu ke he tau taleni, ne age he hana iki e tau koloa ke he hana tau tupa “kua fakalata ke he malolo ha lautolu takitokotaha.” (Mataio 25:14, 15) Kua lata foki e tau motua ke fuafua pihia e tau malolo he tau tagata fakailoa takitokotaha he Kautu. Kua taute e mena nei ke he lotomatala. Kua liga lata ni falu ke moua e fakamafanatiaaga ke fakalahi atu e tau mena ka taute. Liga to fakaaue a lautolu ke he tau lagomatai ka moua ke fakamahomo atu e tau fakatokaaga he ha lautolu a tau gahua. Ka ko e tau mena oti, kaeke kua maeke ke lagomatai a lautolu ke taute e tau mena kua maeke ki ai a lautolu fakalataha mo e olioli, kua liga maeke e olioli ia ke fakamalolo a lautolu ke fakalaulahi ha lautolu a gahua Kerisiano ne kua maeke ki ai.—Nehemia 8:10; Salamo 59:16; Ieremia 20:9.
Ko e Mafola ne Moua Mai he Olioli ke Fakatokolalo
17, 18. (a) Maeke fefe he olioli ke fakatokolalo ke tamai ki a tautolu e mafola mo e tututonu? (e) Ko e heigoa kua maeke mo mena ha tautolu kaeke kua fanogonogo moli a tautolu ke he tau poakiaga he Atua?
17 Ko e olioli ke fakatokolalo ke he pule katoatoa fakamatafakatufono a Iehova ka tamai ki a tautolu e mafola lahi mahaki. Ne pehe e salamo he liogi ki a Iehova: “Kua lahi e mafola ha lautolu kua manako lahi ke he hau a fakatufono; ti nakai fai mena ke tupetupe ai a lautolu.” (Salamo 119:165) He omaoma ke he matafakatufono he Atua, kua moua e tautolu ni e tau mena aoga. Ne tala age e Iehova ki a Isaraela: “Kua vagahau mai pehe a Iehova, ko e hau a Laveaki, ko ia ne Tapu i Isaraela, ko au ko Iehova, ko e hau a Atua, kua fakaako atu kia koe ke he tau mena ke aoga ai, kua takitaki e ia a koe ke he puhala ke fano ai a koe. Ane hagao mai a koe ke he haku tau poaki, po kua tuga ne vailele hāu a monuina; mo e tuga ne tau peau he tahi hau a tututonu.”—Isaia 48:17, 18.
18 Kua tamai he poa lukutoto a Keriso ki a tautolu e malofa mo e Atua. (2 Korinito 5:18, 19) Kaeke kua ha ha ia tautolu e tua ke he toto laveaki a Keriso mo e lali fakamakutu lahi ke tau ke he tau lolelole ha tautolu mo e taute e finagalo he Atua, to moua ai e tautolu e lagomataiaga mai he tau logonaaga agahala. (1 Ioane 3:19-23) Ko e tua pihia, ne toko hake he tau gahua, kua tuku a tautolu he tutuaga tututonu ki mua a Iehova mo e amaamanakiaga homo ue atu ke hao mai he “matematekelea kelea lahi” mo e moui tukulagi he lalolagi fou a Iehova. (Fakakiteaga 7:14-17; Ioane 3:36; Iakopo 2:22, 23) Kua maeke e tau mena oti nei mo tau mena ha tautolu ‘ane hagao atu a tautolu ke he tau poakiaga he Atua.’
19. Kua falanaki ke he heigoa e fiafia ha tautolu he magaaho nei mo e ha tuatolu a moui tukulagi, mo e fakailoa fefe e Tavita e tua ne hake mai he tau loto mauokafua ha tautolu?
19 E, ko e fiafia ha tautolu he magaaho nei mo e ha tautolu a amaamanakiaga ke he moui tukulagi he lalolagi parataiso kua vikoia ai he ha tautolu a olioli ke fakatokotalo ke he pule malolo a Iehova ko e Iki Pule Katoatoa ke he lagi mo e lalolagi katoatoa. Kia eke ai a tautolu ke tatai e tau logonaaga mo Tavita, ne pehe: “Iehova na e, ko e hau ni a mua ue atu mo e malolo, mo e fulufuluola, mo e lilifu, mo e fakahekeaga; ha ko e mena ha ha ia koe e tau mena oti ke he lagi, mo e lalolagi; Iehova na e, hau ni e kautu, kua tokoluga ue atu a koe kua mua ue atu ni a koe he tau mena oti kana. Hanai, ha mautolu a Atua na e, kua fakaaue atu a mautolu kia koe, mo e fakaheke atu ke he hau a higoa lilifu.”—1 Nofoaga he Tau Patuiki 29:11, 13.
Tau Matakupu ke Manatu
◻ Ko e faga mahani fakatokolalo mo e omaoma fefe ne manako a Iehova ke fakakite he tau fekafekau hana?
◻ Ne taui atu fefe ki a Iesu ma e hana omaoma, mo e heigoa kua lata a tautolu ke fakakite moli mai he tau puhala taute mena ha tautolu?
◻ Kua lata fefe e tau motua oti kana ke fifitaki ki a Iesu mai he puhala ne taute mena a ia ke he tau mamoe?
◻ Putoia e heigoa ke he aga teokaratiki?
◻ Ko e heigoa e tau fakamonuinaaga ka moua mai e tautolu he olioli ke fakatokolalo?
[Fakatino he lau 28]
Fakamafana he tau motua e fuifui ke taute mo e olioli e tau mena kua maeke a lautolu ke taute
[Fakatino he lau 30]
Fiafia a lehova ki a lautolu ne omaoma ki a ia mai he tau loto