Tau Leveki Mamoe mo e Tau Mamoe he Pule-Atua

“Ha ko Iehova ko e ha tautolu a Fakafili a ia, ko Iehova ko e ha tautolu a Pule, ko Iehova ko e ha tautolu a Patuiki, to fakamoui e ia a tautolu.”​—ISAIA 33:22.

1. Kua maeke fefe ke talahau ko e tau Kerisiano he senetenari fakamua mo e tau Kerisiano he vaha nei ko e pule-atua?

KO E kakano he pule-atua ko e pule he Atua. Kua putoia ai e taliaaga he pule malolo a Iehova mo e mumui ke he hana tau puhala mo e tau fakaakoaga he tau manatu lalahi mo e ikiiki ka taute e tautolu he moui. Ko e fakapotopotoaga he senetenari fakamua ko e pule-atua na ko e mena moli. Ti maeke he tau Kerisiano ke talahau fakamoli pehe: “Ko Iehova ko e ha tautolu a Fakafili a ia, ko Iehova ko e ha tautolu a Pule, ko Iehova ko e ha tautolu a Patuiki.” (Isaia 33:22) Ha ko e tau fekafekau fakauku ne toe e alito hana, ko e fakatokatokaaga he Atua ko Iehova he vaha nei kua tei tatai ni ko e pule-atua moli.

Ko e Tau Puhala Fe ne Pule-Fakaatua a Tautolu he Vaha Nei?

2. Ko e heigoa taha puhala ke omaoma e Tau Fakamoli a Iehova ke he pule a Iehova?

² Maeke fefe a tautolu ke talahau ko e fakatokatokaaga a Iehova he lalolagi ko e pule-atua? Ha ko lautolu ne ha ha i ai kua omaoma moli ke he pule a Iehova. Mo e mumui a lautolu ke he takitaki a Iesu Keriso, ko ia ne fakafoufou e Iehova ke eke mo Patuiki. Ke fakatai, he vaha he fakaotiaga, ko e poaki fakahako nei mai he Pule-Atua Lahi Mahaki, ne fakahoko mai ki a Iesu: “Kia fakahoko atu hau a helesaito mo e helehele e saito, ha kua hoko tuai ke he vaha ke helehele ai e koe, ha kua motua tuai e tau saito he lalolagi.” (Fakakiteaga 14:15) Kua omaoma a Iesu mo e taute e heleheleaga he lalolagi. Kua lagomatai he tau Kerisiano ha lautolu a Patuiki ke he gahua lahi nei ke fakamatala fakamakamaka e tala mitaki mo e taute tutaki. (Mataio 28:19; Mareko 13:10; Gahua 1:8) Ha kua taute pihia, ko e tau tagata gahua fakalataha a lautolu mo Iehova, ko e Pule-atua Lahi Mahaki.​—1 Korinito 3:9.

3. Omaoma fefe e tau Kerisiano ke he pule-atua ka hagaao ke he tau mahani?

³ Ko e tau mahani foki, kua omaoma e tau Kerisiano ke he pule he Atua. Ne pehe a Iesu: “Ka ko ia kua eke e mahani fakamoli, kua hau ni a ia ke he maama, kia fakailoa hana tau mahani, ha kua lata ia mo e Atua.” (Ioane 3:21) Ko e vaha nei, kua ha ha i ai e tau taufetoko nakai fai fakaotiaga ha ko e tau tutuaga he tau mahani, ka ko e tau taufetoko nei kua nakai fai tokaaga he tau Kerisiano. Kua kitia e lautolu kua kelea e mena kua talahau e Iehova kua kelea, mo e kua tiaki e lautolu tuga e gagao pikitia! Kua leveki foki e lautolu ha lautolu a tau magafaoa, omaoma ke he tau mamatua, mo e tumau e omaoma ke he tau pule tokoluga. (Efeso 5:3-5, 22-33; 6:1-4; 1 Timoteo 5:8; Tito 3:1) Ko e mena ia, kua gahua a lautolu ke he pule-fakaatua, ne kua lata mo e Atua.

4. Ko e heigoa e tau aga hehe ne fakakite e Atamu mo Eva mo Saulo, mo e fakakite fefe he tau Kerisiano e aga ne kehe mai?

⁴ Ne fakagalo e Atamu mo Eva e Parataiso ha kua manako a laua ke taute ni e laua ha laua a tau fifiliaga ke he mena kua hako mo e mena kua hepe. Ne manako a Iesu ke he mena kehe mamao. Ne pehe a ia: “Ha ko e mena nakai fifitaki au ke he haku a loto ni, ka ko e finagalo he Matua ne fakafano mai au.” Kua kumi e tau Kerisiano ke he mena taha ia ni. (Ioane 5:30; Luka 22:42; Roma 12:2; Heperu 10:7) Ko Saulo, ko e patuiki fakamua a Isaraela, ne omaoma ki a Iehova​—ka e fakavalavala ni. Ha ko e mena nei ni ne tiaki ai a ia. Ne tala age a Samuela ki a ia: “Ko e fanogonogo kua mua hana mitaki ke he poa mo e omaoma kua mua hana mitaki ke he gako he tau mamoe tane.” (1 Samuela 15:22) Ko e pule-fakaatua nakai ke mumui ke he finagalo a Iehova ke he fuafuaaga pauaki he mamao, liga maeke ni ka fano tumau he gahua fakamatala po ke fano tumau he tau feleveiaaga, mo e ka mole ia ke fakamafola e tau mena he mahani po ke, ke he falu puhala foki? To nakai pihia! Kua fakamakamaka a tautolu ke ‘taute e finagalo he Atua [“mo e tau solu katoa,” NW].’ (Efeso 6:6; 1 Peteru 4:1, 2) Nakai tuga a Saulo, ne omaoma katoatoa a tautolu ke he pule he Atua.

Ko e Pule-Atua he Vaha Fou Nei

5, 6. Fehagai fefe a Iehova mo e tagata he vaha nei, mo e heigoa e fua he kau fakalataha mo e fakatokatokaaga nei?

⁵ He vaha kua mole, ne pule a Iehova mo e fakakite e kupu moli puhala mai he tau tagata takitokotaha, tuga e tau perofeta, tau patuiki, mo e tau aposetolo. Ko e vaha nei, kua nakai liu pihia foki; kua nakai tuai fai perofeta po ke tau aposetolo. Ka e, kua pehe a Iesu ko e magaaho he hana lilifu mo e ha ha hinai, to maeke ia ia ke kitia mitaki e matakau tua mo e fakamoli he tau tutaki, ko e “tupa fakamoli mo e lotomatala,” mo e to kotofa e ia ke pule ke he hana tau mena oti. (Mataio 24:45-47; Isaia 43:10) He tau 1919 ko e tupa ia kua kitia mitaki ai ke eke mo tau Kerisiano fakauku he tau fekafekau ne toe. Tali mai he magaaho ia, tuga he hukui ai he Kau Fakatufono he Tau Fakamoli a Iehova, kua eke ai mo lotouho tonu he pule-atua, he lalolagi. Takai viko he lalolagi, ko e Kau Fakatufono kua hukui ai he tau La Komisi, tau leveki faifano, mo e tau motua he tau fakapotopotoaga.

⁶ Ko e kau fakalataha mo e fakatokatokaaga he pule-fakaatua ko e vala aoga lahi he omaoma ke he pule-atua. Ko e kau fakalataha pihia ne gahua ma e lototaha mo e maopoopo he lalolagi katoa ke he fakalatahaaga katoa “he tau matakainaga.” (1 Peteru 2:17) Ko e taui, ko e fakafiafia a nei ki a Iehova, ko ia “ko e Atua nakai ko e Atua ha i ai e fakaagitau, ka ko e mafola.”​—1 Korinito 14:33.

Tau Motua he Pule-Atua

7. Ko e ha ne pehe ai kua fifili e tau motua Kerisiano ke he pule-fakaatua?

⁷ Ko e tau tane momotua oti ne kotofa, ko e heigoa ni ha lautolu a tau tutuaga ke he pule malolo, kua fakamoli e tau tutuaga kua lata tuga ne fakatokatoka mai he Tohi Tapu ma e ofisa he leveki, po ke tagata tane motua. (1 Timoteo 3:1-7; Tito 1:5-9) Lafi ki ai foki, ko e tau kupu a Paulo ke he tau motua i Efeso kua lata mo e tau motua oti: “A mutolu kia mutolu, katoa mo e fuifui mamoe oti kana kua kotofa a mutolu he Agaga Tapu ke eke ai mo leoleo, kia leveki e ekalesia he Atua.” (Gahua 20:28) E, ne kotofa he agaga tapu e tau motua, ko e mena ne hau mai ia Iehova ko e Atua. (Ioane 14:26) Ko e tau kotofaaga ha lautolu ko e pule-fakaatua. Ko e taha mena foki, ne leveki e lautolu e fuifui he Atua. Ko e fuifui ko e ha Iehova, nakai he tau motua. Ko e pule-atua a ia.

8. Ko e heigoa e tau kotofaaga pauaki he tau motua he vaha nei?

⁸ He hana tohi ke he tau tagata Efeso, ne fakatoka he aposetolo ko Paulo e tau kotofaaga pauaki he tau motua, ne pehe mai: “Kua tuku mai foki e ia e falu ke eke mo tau aposetolo, ko e falu foki ke eke mo tau perofeta, ko e falu foki ke fakamatala e vagahau mitaki, ko e fahi foki ke eke mo tau leoleo katoa mo e tau akoako, Kia fakakatoatoa ai e mitaki he tau tagata tapu, ke eke ai e lautolu e tau gahua he tau fekafekau, kia ati hake ai e tino a Keriso.” (Efeso 4:11, 12) Ko e tau perofeta mo e tau aposetolo kua momole atu tuai mo e mukemuke he “tino a Keriso.” (Fakatatai 1 Korinito 13:8.) Ka ko e tau motua hane lavelave agaia he gahua evagelia, gahua leveki, mo e gahua fakaako.​—2 Timoteo 4:2; Tito 1:9.

9. Kua lata he tau motua ke tauteute fefe e lautolu a lautolu ke hukui e finagalo he Atua i loto he fakapotopotoaga?

⁹ Ha ko e pule-atua e pule he Atua, ko e tau motua mitaki ne fakamahani fakamitaki mo e finagalo he Atua. Ne poaki ki a Iosua ke totou e Matafakatufono he tau aho oti. Kua lata foki e tau motua ke fakaako mo e kumi lagomatai tumau ke he tau Tohiaga Tapu mo e ke fakamahani fakamitaki mo e tau tohi ke he Tohi Tapu ne tohia ai he tau tupa fakamoli mo e lotomatala. (2 Timoteo 3:14, 15) Kua lafi atu ke he mena nei e tau mekasini Ko e Kolo Toko mo e Awake! mo e falu he tau tohi ne fakakite mai aki e puhala ko e fakaaoga fefe e tau matapatu fakaakoaga he Tohi Tapu ke he tau mena tutupu pauaki.a Ka e taha e mena, ha kua aoga lahi ma e motua ke iloa mo e ke muitua ke he tau takitakiaga ne tohi fakailoa ai he tau tohi he Kaufakatahaaga he Kolo Toko, kua lata foki a ia ke fakamahani fakamitaki mo e tau matapatu fakaakoaga he Tohiaga Tapu ne toka mai i tua ia lautolu. To maeke ia ia mogoia ke hoko ke taute e tau takitakiaga he Tohiaga Tapu mo e fai maamaaga mo e loto hohofi noa.​—Fakatatai Mika 6:8.

Fekafekau mo e Agaga Kerisiano

10. Ko e heigoa e tau aga kelea kua lata he tau motua ke puipui mai ai, mo e puipui fefe?

¹⁰ Liga ko e tau 55 V.N., ne tohi ai he aposetolo ko Paulo hana tohi fakamua ke he fakapotopotoaga i Korinito. Ko e taha he tau mena vihi ne taute e ia ko e mena ne tupu ke he tau tane ne manako ke fai higoa i loto he fakapotopotoaga. Ne tohia e Paulo: “Kua makona tuai ainei a mutolu, kua maukoloa tuai ainei a mutolu, kua uta a mutolu mo tau patuiki ka e nakai ha i ai a mautolu; kane mai ko e tau patuiki a mutolu po kua mitaki ni kia au, kia uta foki a mautolu mo tau patuiki fakalataha mo mutolu.” (1 Korinito 4:8) He senetenari fakamua V.N., kua amaamanaki oti e tau Kerisiano ke eke mo tau pule ke patuiki ke he lagi mo e tau ekepoa mo Iesu. (Fakakiteaga 20:4, 6) Ko e fakamoliaga mogoia, ne nimo he falu i Korinito ko e lalolagi to nakai fai patuiki pule-atua Kerisiano. Ka e, nakai eke mo tau patuiki he lalolagi, ko e tau leveki mamoe Kerisiano ne taute e loto fakatokolalo, ko e fua ke fakafiafia aki a Iehova.​—Salamo 138:6; Luka 22:25-27.

11. (a) Ko e heigoa falu he tau fakatai mua atu he loto fakatokolalo? (e) Ko e heigoa e kitiaaga ha lautolu ki a lautolu ni kua lata he tau motua mo e tau Kerisiano oti foki ke moua?

¹¹ Ko e loto fakatokolalo kia ko e lolelole? Nakai kakano pihia! Ko ia ko Iehova ne fakamaama mai kua mahani fakatokolalo. (Salamo 18:35) Ko e tau patuiki i Isaraela ne takitaki e tau kautau ke he tau mo e pule ke he motu i lalo hifo ia Iehova. Ka e pete ni he pihia, kua igatia e tagata mo e fakaeneene “neke fakatokoluga ai hana loto ke he hana tau matakainaga.” (Teutaronome 17:20) Ko e liu tu mai ko Iesu ko e Patuiki he lagi. Ko e magaaho ha he lalolagi, ko e mena ia, ne holoholo ai e ia e tau hui he hana tau tutaki. Ko e loto fakatokolalo ha a ia! Mo e fakakite kua manako a ia ke he hana tau aposetolo ke fakatokolalo pihia, ne pehe a ia: “Hanai, kaeke foki ko e Iki au, mo e Akoako, ti holoholo ni e au e tau hui ha mutolu; kua lata ia mutolu ke feholoholoaki ha mutolu a tau hui.” (Ioane 13:14; Filipi 2:5-8) Ko e tau lilifu mo e fakaheke oti kua lata ni ke o ki a Iehova, nakai lata ke he ha tagata taha. (Fakakiteaga 4:11) Pete ni ko e tau motua a lautolu po ke nakai, kua lata e tau Kerisiano oti ke manamanatu ki a lautolu ni ke he maama he tau kupu a Iesu: “Ko e tau fekafekau nakai aoga a mautolu; ha ko e tau mena kua lata ke eke e mautolu, ko e tau mena ia kua eke e mautolu.” (Luka 17:10) Ko e ha kitiaaga kehe ka ha ha i ai, nakai ko e mena he pule-atua.

12. Ko e ha e fakaalofa ko e fua kua lata tonu ma e tau motua Kerisiano ke fakagahua?

¹² Fakalataha mo e loto fakatokolalo, ko e tau motua Kerisiano ka taute e fakaalofa. Ne fakakite he aposetolo ko Ioane e aoga lahi he fakaalofa he magaaho ne pehe ai a ia: “Ko e tagata kua nakai fakaalofa, kua nakai iloa e ia e Atua; ha ko e Atua ko e fakaalofa a ia.” (1 Ioane 4:8) Ko e tau tagata takitokotaha ne nakai fakaalofa ko e nakai mahani pule-fakaatua. Kua nakai iloa e lautolu a Iehova. Hagaao ke he Tama he Atua, kua pehe e Tohi Tapu: “Kua fakaalofa a ia ke he hana tau tagata ha he lalolagi, ti fakaalofa ni a ia kia lautolu kua hoko ke he fakaotiaga.” (Ioane 13:1) Kua vagahau ke he tau tane toko 11 ka eke mo vala he kau fakatufono he fakapotopotoaga Kerisiano, ne pehe a Iesu: “Ko e haku a poaki hanai, kia feofanaki a mutolu, tuga e fakaalofa au kia mutolu.” (Ioane 15:12) Ko e fakaalofa ko e fakamailoga maali he faka-Kerisiano moli. Kua fakataki aki e tau loto malipilipi, mo lautolu ne maanu, mo lautolu ne lili fakaagaga ne kua leva e manako ke tokanoa. (Isaia 61:1, 2; Ioane 13:35) Ko e tau motua kua lata ke eke mo tau fakataiaga ke fakakite e fakaalofa ia.

13. Pete ni he liga uka e tau mena vihi he vaha nei, ka e maeke fefe he motua ke eke mo fakaohooho ma e mitaki ke he tau tutuaga oti?

¹³ Ko e vaha nei, kua fa ole tumau ke he tau motua ke lagomatai ke taute e tau mena vihi kehekehe. Ko e tau mena uka he tau fakamauaga kua maeke ke fakavakavaka fakahokulo mo e fakatumau. Ko e tau mena vihi he tau fuata ne uka he tau tagata lalahi ke maama. Ko e tau gagao he logonaaga he loto kua fa uka tumau ke maama. Ko e motua ne feleveia mo e tau mena pihia kua nakai iloa mitaki ko e heigoa ka taute. Ka kua maeke ia ia ke malolo, kaeke ke liogi mo e falanaki a ia ke he iloilo a Iehova, kaeke ke kumikumi a ia ke he Tohi Tapu mo e ke he tau talahauaga ne tohi fakailoa he tau tupa fakamoli mo e lotomatala, mo e kaeke ke fehagai fakatokolalo mo e fakaalofa lahi a ia mo e hana tau mamoe, to eke a ia mo fakaohooho ma e mitaki pete ni he ha ha i ai e tuaga kua mua atu he uka.

14, 15. Ko e heigoa falu talahauaga ne fakakite aki kua fakamonuina e Iehova hana tau tagata aki e tau motua mitaki ue atu?

¹⁴ Ne fakamonuina fakamautu e Iehova hana fakapotopotoaga aki e “tau mena fakaalofa ke he tau tagata.” (Efeso 4:8) Mai he taha magaaho ke he taha magaaho, kua moua he Kaufakalatahaaga he Kolo Toko e tau tohi loto mafanatia ke fakamoli atu ke he fakaalofa ne fakakite he tau motua fakatokolalo ko lautolu ne leveki e tau mamoe he Atua mo e loto hohofi noa. Ke fakatai, kua tohi he motua he fakapotopotoaga: “Nakai manatu e au ha ahiahi mai he leveki he takai motu ne hohofi lahi pihia ki a au po ke hane navanava agaia ki ai he fakapotopotoaga. Ne lagomatai he leveki he takai motu au ke kitia e aoga lahi he mahani mitaki he magaaho ka fakafehagai ai mo e tau matakainaga, mo e matapatu ke he mena ia e navanavaaga.”

¹⁵ Ne ha ha i ai e matakainaga fifine ne fenoga atu ke he fale gagao mamao ke tului he gagao, ne tohi: “Ko e totoka ha a ia ke feleveia mo e taha motua he po fakamua ia ne fakaatukehe ai he fale gagao mamao ligo ia mo kaina! Ko ia mo e falu matakainaga ne leva e nonofo ai mo au. Pihia ni ke he tau tagata he lalolagi ne mahani lahi mo e mena ne hoko ki a au, ne logona hifo, mena nakai lata au ke moui a na nakai fai fakamafana, leveki, mo e tau liogi ha lautolu ko e tau matakainaga fakaalofa mo e fakamoli ia.” Kua tohi foki he taha matakainaga fifine: “Kua moui au he aho nei ha ko e kau he tau motua ne takitaki fakauka atu au he haku a tau ke he manamanatuaga tupetupe. . . . Taha e matakainaga tane mo e hana hoana ne nakai iloa ko e heigoa ka tala mai ki a au. . . . Ka ko e mena ne hufia lahi ki a au ha ko e pete ni he nakai maama oti ia laua e lekua haku, ka e leveki e laua au mo e fakaalofa lahi.”

16. Ko e heigoa e tomatomaaga ne age e Peteru ke he tau motua?

¹⁶ E, tokologa e tau motua ne fakaaoga e tomatomaaga he aposetolo ko Peteru: “Kia leveki e mutolu e fuifui mamoe he Atua ha ia mutolu, kia leoleo ki ai mo e fakamakai, ka e nakai he ole fakamakamaka ai; aua foki neke eke mo e fia eke koloa, ka ko e loto fiafia. Aua neke tuga he tau tagata kua fia iki ke he kaina he Atua, ka kia eke a mutolu mo tau fakafifitaki ke he fuifui mamoe.” (1 Peteru 5:1-3) Ko e fakamonuinaaga ha a ia he tau motua pule-fakaatua pihia!

Tau Mamoe he Pule-Atua

17. Talahau falu he tau fua kua lata ia lautolu oti he fakapotopotoaga ke fakagahua.

¹⁷ Ka e taha e mena, ko e pule-atua nakai ati hake aki noa ni he tau motua. Kaeke kua lata tonu e tau leveki mamoe ke mahani pule-fakaatua, kua lata tonu foki pihia e tau mamoe. Ke he tau puhala fe? Mitaki, ko e tau poakiaga taha ia ni ne takitaki aki e tau leveki mamoe ka takitaki aki e tau mamoe. Ko e tau Kerisiano oti, nakai ko e tau motua ni hokoia, kua lata tonu ke fakatokolalo kaeke kua fakatoka e lautolu ke moua e fakamonuinaaga a Iehova. (Iakopo 4:6) Kua lata tonu oti ke fakagahua e fakaalofa ha ko e mena ka noa mo e mena ia ko e tau poa ha tautolu ki a Iehova kua nakai fakafiafia ki a ia. (1 Korinito 13:1-3) Mo e ko tautolu oti, nakai ko e tau motua ni hokoia, kua lata ke “puke . . . ke he maama mitaki ke he finagalo [a Iehova] mo e pulotu oti katoa mo e loto matala kua fakalata ke he Agaga.”​—Kolose 1:9.

18. (a) Ko e ha e iloilo ni ke he kili fakateaga noa ke he kupu moli ne nakai hokoia ni? (e) Maeke fefe a tautolu oti ke fakapuke aki e iloilo tonu?

¹⁸ Ko e tau fuata mo e tau fuakau kua tumau e feleveiaaga mo e tau fifiliaga uka ha ko e ha lautolu a lali ke tumau e tua ha kua nonofo he lalolagi a Satani. Ko e lalolagi kua puhala atu he tau mena tui, tau leo kofe, tau kifaga, mo e tau tohi, kua paleko aki e moui fakaagaga he falu. Ko e iloilo kili ke he kupu moli kua nakai lahi ke lagomatai aki a lautolu ke tumau e lagotatai. Ke iloa moli kua nonofo mo e fakamoli, kua lata a tautolu ke puke ke he iloilo tonu. Kua manako a tautolu ke he manamanatuaga mo e iloilo ne moua mai he Kupu he Atua ni hokoia. (Fakatai 2:1-5) Ko e kakano he mena nei ko e fakagahuahuaaga he aga fakaako mitaki, mo e manamanatu ke he tau mena ne fakaako ki ai, mo e tuku atu ke fakagahuahua. (Salamo 1:1-3; Fakakiteaga 1:3) Ne tohi a Paulo ke he tau Kerisiano oti, nakai ko e tau motua ni hokoia, he pehe a ia: “Ka ko e tau mena kakano, kua lata ia mo e tau tagata motua, ko lautolu ni kua mahani he ako mua ai ke mailoga e tau mena mitaki mo e tau mena kelea.”​—Heperu 5:14.

Gahua Fakalataha e Tau Leveki Mamoe mo e Tau Mamoe

19, 20. Ko e heigoa e tomatomaaga ne age ke he tau tagata oti ke kau fakalataha mo e tau motua, mo e ko e ha?

¹⁹ Ke fakahiku aki, kua lata ke talahau pehe ko e agaga moli he pule-fakaatua kua fakakite e lautolu ne kau fakalataha mo e tau motua. Ne tohi e Paulo ki a Timoteo: “Ko e tau patu kua pule fakamitaki, kia talahaua a lautolu kua lata mo e lilifu kua lafi ua, ka e au atu kia lautolu kua gahua ke he kupu katoa mo e fakaako atu.” (1 Timoteo 5:17; 1 Peteru 5:5, 6) Ko e tuaga he motua ko e monuina ke ofo ai, ka ko e laulahi he tau motua ko e tau tane fai magafaoa, o a lautolu ke he ha lautolu a tau gahuaaga tino he tau aho oti mo e fai hoana mo e tau fanau ke leveki. Ha kua fiafia a lautolu ke fekafekau, kua mukamuka lahi ni ha lautolu a fekafekauaga mo e mua atu e palepale mitaki kaeke ke lagomatai atu he fakapotopotoaga, ka e ua molea e ekefakakelea mo e fakamamafa.​—Heperu 13:17.

²⁰ Ne pehe e aposetolo ko Paulo: “Kia manamanatu e tau takitaki ha mutolu, ko lautolu kua talahau atu e kupu he Atua kia mutolu; kia fifitaki a mutolu ha lautolu a tua, mo e manamanatu e fakahikuaga he tau mahani ha lautolu.” (Heperu 13:7) Nakai, ne nakai fakamalolo mai e Paulo e tau matakainaga ke mumui ke he tau motua. (1 Korinito 1:12) Ke mui ke he tagata, nakai ko e pule-fakaatua. Ka ko e iloilo moli ke fifitaki e fakamoliaga he tua he motua ne mahani pule-fakaatua ha ko ia ne malolo he gahua fakaevagelia, ko ia ne fano tumau he tau feleveiaaga, mo ia ne fehagai fakatokolalo mo e fakaalofa ke he fakapotopotoaga.

Ko e Fakamoliaga ke he Tua

21. Fakakite fefe he tau Kerisiano e tua malolo tuga e tua ha Mose?

²¹ Ko e moli ni, ko e gahuahuaaga he fakatokatokaaga he pule-fakaatua he magaaho kua mua atu e lolelole nei he fakamauaga tuai he tagata, ko e fakamoliaga ke he malolo he Pule-atua Lahi Mahaki. (Isaia 2:2-5) Ko e fakamoliaga foki ke he tua he teitei lima e miliona he tau Kerisiano tane, fifine, mo e tau fanau, hane lali fakamakamaka fakalataha mo e tau mena vihi he moui he tau aho takitaha, ka e nakai nimo ko Iehova ko e ha lautolu a Pule. Tuga ni e fakamoli ko Mose ne “fakauka a ia tuga ne mena kua kitia e ia a ia nakai kitia,” ti ko e tau Kerisiano he vaha nei kua moua e tua malolo taha ia ni. (Heperu 11:27) Kua monuina a lautolu ke nonofo he pule-atua, mo e fakaaue a lautolu he tau aho takitaha ki a Iehova ma e mena ia. (Salamo 100:4, 5) Ha kua logona e lautolu e malolo he fakamouiaga a Iehova, ti fiafia a lautolu ke fakailoa: “Ko Iehova ko e ha tautolu a Fakafili a ia, ko Iehova ko e ha tautolu a Pule, ko Iehova ko e ha tautolu a Patuiki, to fakamoui e ia a tautolu.”​—Isaia 33:22.

[Tau Matahui Tala]

Ko e Heigoa ne Fakakite he Tohi Tapu?

◻ Ko e puhala fe ne omaoma ai e tau Kerisiano ke he pule-atua?

◻ Fakatokatoka fefe e pule-atua he vaha nei?

◻ Ko e tau puhala fe kua lata he tau motua ke tauteute aki a lautolu ke fakamoli ha lautolu a tau kotofaaga?

◻ Ko e heigoa e tau fua Kerisiano kua lata tonu ia ma e tau motua ke fakagahua mo e fakatata?

◻ He pule-atua, ko e heigoa e fakafetuiaga kua lata ke gahuahua he vahaloto he tau mamoe mo tau leveki mamoe?

[Fakatino he lau 14]

Ne fakagalo e Atamu mo Eva e Parataiso ha kua manako a laua ke taute ni e laua ha laua a tau fifiliaga hagaao ke he hako mo e hepe

[Fakatino he lau 16]

Kaeke ke fehagai fakatokolalo mo e fakaalofa hofihofi e motua mo e mamoe, to eke tumau a ia mo fakaohooho ma e mitaki