Gahua Fakamatala ke he “Tau Atu Motu Oti”

“To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.”​—MATAIO 24:14.

1. Ko e ha e tau kupu ha Iesu ne fakamau he Mataio 24:14 ne ofomate ke he hana tau tutaki?

NE OFOMATE e tau kupu na a Iesu i luga ke he tau tutaki Iutaia! Ne fou lahi e manatu ia ke o atu e tau Iutaia fakatapu ke fakamatala ke he tau tagata Motu Kehe “nakai mea,” ko e “tau tagata kehe,” ko e mena kehe lahi ke he Iutaia, ti muikau he kelea.a Ko e Iutaia loto manamanatu lahi ne nakai fai manatu ke finatu ke he kaina he tagata motu kehe! Ko e tau tutaki Iutaia ia kua lahi mahaki agaia e mena ke fakaako ki a Iesu, hana fakaalofa, mo e hana fekafekauaga. Mo e lahi agaia foki e tau fakaakoaga hagaao ke he nakai fakamailoga tagata a Iehova.​—Gahua 10:28, 34, 35, 45.

2. (a) Lahi fefe e gahua fekafekau he Tau Fakamoli? (e) Ko e heigoa e tolu e mena ati tupu ai e Tau Fakamoli?

² Kua fita e Tau Fakamoli a Iehova he fakamatala e tala mitaki ke he tau atu motu oti, fakalataha ai foki mo Isaraela he vaha nei, mo e fakapuloa ke he loga atu e tau motu mai he vaha fakamua. Ke he 1994 ne molea e fa mo e hafa e miliona he Tau Fakamoli ke he 230 e tau motu. Ko e fakaako a lautolu ke he fa mo e hafa e miliona he tau fakaakoaga Tohi Tapu he tau kaina ki a lautolu e tau tagata fiafia. Kua taute e gahua nei ke he lalolagi nakai tonu, ha ko e mahani ke nakai maama e tau fakaakoaga mo e tau manamanatuaga he Tau Fakamoli. Tuga e tau talahauaga ke he tau Kerisiano fakamua, ti ko e talahauaga taha ia ni ki a lautolu: “Ha ko e mena iloa e mautolu kua talahaua kehe e vahega na ke he tau motu oti kaina.” (Gahua 28:22) Ati ko e heigoa ne kautu ai ha lautolu a gahua fakamatala? Ne ha ha i ai tolu e tau mena ati ha ha ia lautolu e tolomaki ki mua​—ko e mumuitua ke he tau takitakiaga he agaga a Iehova, fifitaki ke he tau puhala aoga ha Keriso, mo e fakaaoga e tau mena gahua ne kua lata tonu ke mitaki e tau matutakiaga.

Agaga a Iehova mo e Tala Mitaki

3. Ko e ha ne nakai maeke ia tautolu ke palau ke he tau mena ne kautu?

³ Hula nakai e Tau Fakamoli a Iehova ke he ha lautolu a kautuaga, he tuga ni ko e lotomatala ni ha lautolu? Nakai, ha kua gahuahua e tau kupu ha Iesu: “Ka oti he eke e tau mena oti ne poaki atu ai kia mutolu, ti pehe a mutolu, Ko e tau fekafekau nakai aoga a mautolu; ha ko e tau mena kua lata ke eke e mautolu, ko e tau mena ia kua eke e mautolu.” (Luka 17:10) Ko e Tau Fakamoli a Iehova ne kua tukulele, ko e tau Kerisiano kua papatiso ne talia fiafia e gahua ke fekafekau noa ke he Atua pete ni e fekehekeheaki ha lautolu a tau tutuaga. Ko e falu, ko e tau misionare gahua tumau po ke tau tagata fifili ne lautolu ke gahua noa ke he tau ofisa he tau la la he lotu mo e tau kaina ne lomi ai e tau tohi faka-Kerisiano. Ko e falu ko e fiafia faka-Kerisiano ne takitaki a lautolu ke he tau gahua talaga he tau fale lotu, ke he gahua fakamatala tumau ko e tau fekafekau paionia, po ke fakamatala ni ke he falu a magaaho ko e tau tagata fakailoa he tala mitaki ke he tau fakapotopotoaga he matakavi. Nakai maeke ia tautolu ke hula ke he ha tautolu a gahua, ‘ha ko e tau mena kua lata ke eke e mautolu.’​—Luka 17:10; 1 Korinito 9:16.

4. Kautu fefe ke he totoko he lalolagi ke he fekafekauaga he Kerisiano?

⁴ Ko e tau kautu oti ha tautolu ke he gahua kakano ni ha ko e agaga a Iehova, po ke hana a malolo gahuahua. Ko e moli ke talahaua ke he vaha nei tuga ni ke he vaha he perofeta ko Sakaria: “Ko e kupu hanai a Iehova kia Serupapelu, kua pehe mai, Nakai ko e toa, nakai ko e malolo, ka ko e haku Agaga, kua pihia mai a Iehova Sapaota.” Ti ko e mena ia ati kautu ai e gahua fakamatala pete ni e totoko e lalolagi oti ke he Tau Fakamoli, ti nakai ha ko e malolo fakatagata, ka ko e takitakiaga mo e puipuiaga ha Iehova.​—Sakaria 4:6.

5. Ko e heigoa e gahua ha Iehova ke he folafolaaga he fekau he Kautu?

⁵ Kia lautolu ne talia e ogo he Kautu, ne pehe a Iesu: “Kua tohi he tau perofeta, To fakaako he Atua a lautolu oti kana. Hanai, ko lautolu oti ne fanogonogo ke he Matua, mo e ako ai, to o mai a lautolu kia au . . . Nakai maeke ia taha ke hau kia au, ka nakai foaki kia ia he haku a Matua.” (Ioane 6:45, 65) Maeke ia Iehova ke totou e tau loto mo e tau manamanatuaga, mo e iloa e ia a lautolu ka talia hana a fakaalofa pete ne nakai la iloa e lautolu a ia. Ne fakaaoga foki e ia hana tau agelu ke takitaki aki e gahua mata kehe lahi nei. Ko e mena haia ke he fakakiteaga ne kitia e Ioane e gahua fakalataha he tau agelu mo e tohia: “Ne kitia foki e au e taha agelu kua lele ke he pulagi, ha ia ia e vagahau mitaki tukulagi ke fakamatala atu kia lautolu kua nonofo ke he lalolagi, mo e tau motu kehe oti, mo e tau magafaoa, mo e tau vagahau kehekehe, mo e tau motu.”​—Fakakiteaga 14:6.

Manamanatu ke he Tau Mena Fakaagaga

6. Ko e heigoa e agaga ne kua lata ke ha ha he tagata ke talia e tala mitaki?

⁶ Ko e taha mena foki ne foaki e Iehova e fai magaaho ke he tagata ke talia e tala mitaki ti talahau pehe mai e Iesu: “Fiafia a lautolu ne manamanatu ke he tau mena fakaagaga kua lata ma lautolu, ha ko e ha lautolu e kautu he lagi.” (Mataio 5:3, NW) Ko e tagata ne nakai kumi e kupu moli to nakai manamanatu ke he tau mena fakaagaga. Ko ia kua manamanatu ni ke he tau koloa mo e tau mena he tino. Kua eke e makona ia mo kaupa. Ti ko e mena ia, ka feleveia a tautolu mo e tokologa ka o atu ke he taha fale mo e taha fale, ne nakai talia e ogo, kua lata ia tautolu ke manamanatu ke he tau kakano kehekehe oti he tau tagata ha ko e ha lautolu a tau mahani.

7. Ko e ha e tokologa ne nakai talia e kupu moli?

⁷ Tokologa ne nakai fanogonogo kakano he uluuka ke tapiki mau ni ke he lotu ne fanau a lautolu ki ai ti nakai talia ke fakatutala. Ko e falu kua futiaki ke he lotu ne lata mo e ha lautolu a tau aga fakatagata​—manako falu ke fakafetui mo e tau mena galo, ko e falu falanaki ni ke he tau logonaaga, ko e falu kumi ni ke he tau gahua ke feleveia mo e falu ke he ha lautolu a tau lotu. Tokologa he vaha nei ne fifili e moui ne totoko ke he tau tutuaga he Atua. Liga momoui agahala, ti ko e kakano he talahauaga ha lautolu, “Nakai manako au.” Ka ko e falu, ne talahaua pulotu mo e iloilo fakasaiene, kua tiaki e Tohi Tapu he to lahi e mukamuka.​—1 Korinito 6:9-11; 2 Korinito 4:3, 4.

8. Ko e ha ne nakai lata ke fakalolelole ha tautolu a fakamakutu ha ko e nakai talia he tokologa? (Ioane 15:18-20)

⁸ Maeke nakai he nakai talia he falu ke fakatote ha tautolu a tua mo e fakamakamaka ke he fekafekauaga fakamoui tagata? Moua e tautolu e mafanatia ke he tau kupu ha Paulo ke he tau Roma: “Ti kua fefe kia? kaeke kua nakai fakamoli e falu, to eke kia e fakamoli he Atua mo mena nakai aoga ha ko e nakai fakamoli ha lautolu? Aua ia; ka kia talahaua e fakamoli ke he Atua, ka ko e pikopiko ke he tau tagata oti; tuga ne tohi, Kia talahaua tututonu a koe ke he hau a tau kupu, mo e kautu a koe ka kua fakafili a koe.”​—Roma 3:3, 4.

9, 10. Ko e heigoa e tau fakamoliaga kua kautu mai he tau totoko ke he loga he tau motu?

⁹ Maeke ia tautolu ke moua mai e tau fakamaloloaga ke he tau fifitakiaga loga he lalolagi ke he tau motu ne nakai talia e ogo, ka ko e mogonai kua fakamoli kua nakai pihia. Iloa e Iehova mo e tau agelu to moua a lautolu ia ne loto mitaki​—ka ko e Tau Fakamoli a Iehova kua lata ni ke fakatumau mo e fakauka ke he ha lautolu a fekafekauaga. Tuga e falu a motu ne ha ha i ai e tau Katolika ne uka lahi he 50 tau kua mole​—Ailani, Atenetina, Italia, Kolumopia, Mesiko, Pasili, Potukala, Sepania. Ne tokogahoa ni e Tau Fakamoli he 1943, ko e 126,000 ni he lalolagi katoa, mo e 72,000 a lautolu nei he Tau Fahi Kau Fakalataha. Ko e nakai maama, mo e nakai fiafia ne feleveia mo e Tau Fakamoli kua tuga ni e kaupa piliki ne nakai maeke ke hu atu ke he taha fahi. Ka e taha e mena, ko e vaha nei ne moua mai e falu a kautuaga ke he gahua fakamatala mai he tau motu nei. Pihia ni ke he tau motu Komunisi fakamua. Ke he 1993 ko e 7,402 a lautolu ne papatiso he fonoaga i Kiev, Ukaraine, ko e fakamoliaga he mena nei.

¹⁰ Ko e heigoa e tau puhala ne fakaaoga he Tau Fakamoli ke hokotia e tala mitaki ke he ha lautolu a tau katofia? Fakaaoga ke lautolu e tau fakaohoohoaga ke liliuina aki e tau tagata, tuga he talahau he falu? Ko e ahiahi ni kia e lautolu e tau nonofogati mo e tau tagata nakai o aoga, tuga mo e talahauaga he falu?

Tau Puhala ne Kautu ke Fakamatala aki e Tala Mitaki

11. Ko e heigoa e fakafifitakiaga mitaki ne fakakite e Iesu he hana a fekafekauaga? (Kikite ke he Ioane 4:6-26.)

¹¹ Ne fakave e Iesu mo e hana tau tutaki e puhala ne mumuitua e Tau Fakamoli tali mai ke he vaha nei ke he ha lautolu a gahua taute tutaki. Ne finatu a Iesu ke he tau mena ne ha ha i ai e tau tagata, maukoloa po ke nonofogati​—ke he tau kaina, ke he tau toloaga tagata, ke he tau tapa vai, ke he tau kaukau mouga, ti pihia ni ke he tau sunako.​—Mataio 5:1, 2; 8:14; Mareko 1:16; Luka 4:15.

12, 13. (a) Fakakite fefe e Paulo e puhala ma e tau Kerisiano? (e) Mumuitua fefe e Tau Fakamoli a Iehova ke he fakafifitakiaga ha Paulo?

¹² Hagaao ia ke he hana fekafekauaga, ne tonu e talahauaga ha Paulo: “Kua iloa e mutolu, tali mai he aho ne hoko mai ai ki Asia, haku a mahani he tau aho oti he nofo ai au mo mutolu. Ne fekafekau au ke he Iki . . . , ti nakai toka e au taha kupu aoga, neke nakai fakailoa atu kia mutolu, ti fakaako atu kia mutolu ki mua he tau tagata, katoa foki mo e taha fale mo e taha fale.”​—Gahua 20:18-20.

¹³ Ne talahaua ke he lalolagi oti e Tau Fakamoli a Iehova ha ko e ha lautolu a mumuitua ke he puhala fakaaposetolo, ko e fekafekauaga ke he taha fale mo e taha fale. He nakai gahua fakalahi ke he tau mena tau uka, potake, mo e ke he fekafekauaga ai fai kakano he tivi, ko e Tau Fakamoli ne o atu ke he tau tagata, maukoloa mo e nonofogati, mo e feleveia mo lautolu mata ke he mata. Ne kumi e lautolu ke fakatutala hagaao ke he Atua mo e hana a Kupu.b Ne nakai lali a lautolu ke taute Kerisiano laisi, ha ko e fakaaoga he tau koloa tufa noa. Ko lautolu ne fiafia ke fakatutala fakahokulo, ne talahau e lautolu ko e taha ne tali moli ke he tau mena vihi he lalolagi ko e pule he Kautu he Atua, ka hiki e tau tutuaga he lalolagi ha tautolu ma e mitaki.​—Isaia 65:17, 21-25; 2 Peteru 3:13; Fakakiteaga 21:1-4.

14. (a) Taute fefe he tau misionare tokologa mo e tau tagata foafoa e fakaveaga mauokafua? (e) Ko e heigoa ha tautolu ne fakaako mai he tau gahua he Tau Fakamoli a Iehova i Sapani?

¹⁴ Ke kamata e gahua ke he loga he tau motu, kua eke e tau misionare mo e tau tagata foafoa mo tau matapatu ke he loga he tau motu. Ko lautolu haia ne taute e fakaveaga, ti takitaki mogoia he Tau Fakamoli ne nonofo mau ai. Ti ko e mena ia, ne nakai ha ha i ai e loga e Tau Fakamoli mai he tau motu kehe ke matutaki e gahua fakamatala mo e ha ha i ai e maopoopo he tau fakatokatokaaga. Taha e fifitakiaga mua atu ko Sapani. I tua he tau tau 1940, ko e matapatu ni he tau misionare Ausetalasia mo Asia mo Peritania ne o atu ki ai, fakaako e vagahau, fakamahani ke he tau tutuaga to tua ke he magahala ia he mole e felakutaki, mo e fakamatala ke he taha fale mo e taha fale. Ke he Felakutaki II he Lalolagi, ne pa nakai fakagahua mo e favale ke he Tau Fakamoli i Sapani. Ne hohoko atu ni e tau misionare mo e moua toko gahoa e Tau Fakamoli Sapani ne malolo. Ka ko e vaha nei kua tupu ti molea e 187,000 ke he tau fakapotopotoaga ne molea e 3,000! Ko e heigoa e mena ne kautu ai a lautolu ke he tau magaaho fakamua ia? Taha e misionare ne molea e 25 e tau tau he gahua i ai ne pehe: “Kua mua atu ne aoga ke fakaako ke tutala mo e tau tagata. Ha kua iloa e vagahau ha lautolu, ati maeke ke matutaki mo lautolu, ke maama mo e fakaaue ke he puhala moui ha lautolu. Ne fakakite e mautolu ko e mena fakaalofa a mautolu ke he tau Sapani. Ne lali mo e fakatokolalo a mautolu ke eke mo tau tagata he motu ka e nakai fakahui ha mautolu a tau fakaakoaga Kerisiano.”

Mahani Kerisiano Foki e Fakamatala

15. Fakakite fefe he Tau Fakamoli e tau mahani Kerisiano?

¹⁵ Ka e taha e mena, nakai ni ko e talia he tau tagata e kupu moli hokoia. Ne kitia foki e lautolu e gahuahuaaga he mahani Kerisiano. Ne kitia e lautolu e fakaalofa, felauaki, mo e fefakalatahaaki, he Tau Fakamoli pete ne hagahaga kelea e tau tutuaga, tuga e felakutaki ni he motu, fetoko he tau magafaoa fakamatakavi mo e faitaua he tau matakau kehekehe. Ne tumau ni e Tau Fakamoli ke mahino mitaki e tu uho faka-Kerisiano ke he tau fetoko oti mo e fakamoli e tau kupu ha Iesu: “Ko e poaki fou ke tuku atu e au kia mutolu, kia feofanaki a mutolu; tuga he fakaalofa atu au kia mutolu, kia feofanaki foki a mutolu. Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.”​—Ioane 13:34, 35.

16. Ko e heigoa e mena ne tupu ke fakakite aki e fakaalofa faka-Kerisiano?

¹⁶ Ne fakatino mai e fakaalofa ke he katofia he tagata tane motua ne tohi ke he tohi tala he matakavi ia ne nofo ai a ia hagaao ki a “Mr. mo Mrs. Nice Guy.” Ne fakamaama e ia e totonu he tau katofia hana ki a ia he magaaho ne mate hana hoana. “Tali mai he magaaho ne mate ai e hoana hana . . . ne to taha e mitaki a lautolu,” he tohi e ia. “Tali mai kua ‘hiki’ e lautolu a au . . . , mo e taute e tau fekau kehekehe mo e lagomatai e tau mena vihi he tagata kua oti mai he gahua he 74 e tau tau he moui. Ko e mena ne mata kehe lahi e mena nei ha ko e tau uli ka ko e tea a au. Ko e Tau Fakamoli a Iehova a lautolu, ka ko au ko e Katolika lolelole.”

17. Ko e heigoa e puhala kua lata ke kalo kehe a tautolu i ai?

¹⁷ Fakamoli he mena tupu nei ko e maeke ia tautolu ke taute e fakamatalaaga ke he tau puhala kehekehe loga, fakalataha mo e moui he tau aho takitaha ha tautolu. Ko e moli, ka nakai tuga ha Keriso e tau mahani ha tautolu to Farasaio e fekafekauaga ha tautolu, ti nakai fai aoga. Ne nakai manako a tautolu ke tuga a lautolu ne fakamaama mai e Iesu: “Ko e tau mena oti ke tala atu ai a lautolu kia mutolu ke omaoma ki ai, kia omaoma a mutolu ki ai mo e eke ai e mutolu; ka e aua neke fifitaki a mutolu ke he ha lautolu a tau mahani, ha kua talahau e lautolu, ka e nakai ni eke e lautolu.”​—Mataio 22:37-39; 23:3.

Ko e Vahega Fekafekau mo e Tau Koloa kua Lata Tonu

18. Maeke fefe he tau tohi ne fakamaama e Tohi Tapu ke fakakoloa a tautolu ke lagomatai e tau tagata loto fakamoli?

¹⁸ Ko e taha mena aoga lahi he fakamatalaaga he tala mitaki ke he tau motu oti ko e mouaaga he tau tohi faka-Tohi Tapu ne taute he Kaufakalatahaaga Tohi Tapu mo e Pepa Lotu he Kolo Toko. Ne ha ha ia tautolu e tau tohi, tau tohi tote fakailoa, tau pepa lotu, mo e tau mekasini ne maeke ke fakamakona e tau huhu oti he tau tagata huhu fakamoli. Kaeke ke feleveia a tautolu mo e Musilimi, mo e Hinitu, mo e Puta, mo e Tao, po ke Iutaia, ti maeke ia tautolu ke fakaaoga e tohi Mankind’s Search for God po ke tau pepa lotu kehekehe mo e tau tohi tote ke kamata aki e fakatutalaaga mo e liga ko e fakaakoaga Tohi Tapu. Ka huhu e tagata taofi ke he tupumainoa ke he tufugatiaaga, ti maeke ke fakaaoga e tautolu e tohi Life​—How Did It Get Here? By Evolution or by Creation? Ka huhu e fuata, ‘Ko e heigoa e kakano he moui?’ ti fakakite age e tautolu e tohi Questions Young People Ask​—Answers That Work. Kaeke kua aofia lahi e taha he tau matematekelea fakatagata​—fakaatukehe, mategugu, fakapilo pule noa, mavehevehe e tane mo e hoana​—ha ha ia tautolu e tau mekasini ne ha ha i ai e tau puhala ne gahuahua. Ko e moli, ko e vahega fekafekau fakamoli ne perofeta mai e Iesu ka foaki mai “e tau mena kai ke he tau magaaho” kua fakamoli tuai hana a kotofaaga.​—Mataio 24:45-47.

19, 20. Fefe e mafiti he gahua he Kautu i Alapania?

¹⁹ Ka ke hoko ke he tau motu oti, kua lata tonu ni ke taute e tohi nei ke he tau vagahau kehekehe. Ti maeke fefe ke fakaliliu e Tohi Tapu mo e tau pepa Tohiaga Tapu ke molea e 200 he tau vagahau? Kia onoono fakaku ke he taha fifitakiaga, ko Alapania, ne fakakite mai e malolo he vahega fakapuloa he gahua ke he tala mitaki pete ni he loga e tau mena vihi ti nakai fai Penetekoso e vaha nei ke moua mafiti e tau vagahau.​—Gahua 2:1-11.

²⁰ Ko e gahoa ne tau tau kua mole, ko Alapania ni hokoia e motu ne kua onoono agaia ki ai kua nakai talitonu ko e fai Atua ti ko e motu pule faka-Komunisi. Ne pehe e talahauaga he National Geographic mekasini he 1980: “Ne nakai talia e Alapania e [lotu], ti fakapuloa e ia he 1967 ‘ko e motu fakamua he lalolagi ne talitonu ko e nakai fai Atua.’ . . . Ko e atuhau fou ha Alapania ko e nakai talitonu ko e fai Atua ni hokoia.” Ha kua tolomuli ki tua e faka-Komunisi, ko e tau Alapania ne mailoga e fahi fakaagaga ha lautolu ha ne talia e gahua fakamatala ne taute he Tau Fakamoli a Iehova. Ko e matakau tote ne taute e gahua fakaliliu he Tau Fakamoli fuata ne iloa e vagahau Italia mo e Peritania ne kamata ai i Tiranë he 1992. Ko e tau matakainaga tane ne o mai he falu motu ne fakaako a lautolu ke fakaaoga e tau komupiuta ke taute ke he vagahau Alapania. Ne fakaliliu fakamua e lautolu e tau pepa lotu mo e mekasini Kolo Toko. Ko e magaaho ne iloa e lautolu e gahua, ti fakaliliu foki e falu tohi aoga hagaao ke he Tohi Tapu. Ne ha ha ke he motu tote nei he magaaho nei 200 he Tau Fakamoli malolo he gahua (ko e puke tagata 3,262,000), mo e 1,984 ne fakalataha auloa ke he Fakamanatuaga he 1994.

Lago ia Tautolu Oti e Gahua

21. Ko e vaha fefe a nei ne momoui ai a tautolu?

²¹ Kua hoko ke he tapunu e tau mena tutupu he lalolagi. Ha kua tupu lahi e matahavala mo e mahani vale, ko e kelipopo mo e fakapilo pule noa he tau felakutaki ni i loto he tau matakavi takitaha, tau mahani kelea mo e hana tau fua he tau gagao uta fano fakafifine mo e tane, ko e nakai fakalilifu ke he fakatufono, kua tuga kua nakai maeke ke pule ki ai ke moua mai e maopoopo. Kua momoui a tautolu ke he vaha ne tatai mo e magaaho fakamua to hoko e Fakapuke ne fakamaama mai he Kenese: “Ne fioia e Iehova kua lahi ni e mahani kelea he tau tagata ke he lalolagi; ko e tau fatuakiloto oti foki he tau manatu he tau loto ha lautolu, ko e kelea hokoia ni ke he tau aho oti kana. Ti kua tokihala a Iehova he eke e ia e tau tagata ke he lalolagi, ti mamahi foki hana finagalo.”​—Kenese 6:5, 6; Mataio 24:37-39.

22. Ko e heigoa e matagahua Kerisiano ne lago oti ke he Tau Fakamoli a Iehova?

²² Tuga ni he vaha ha Noa, to fai fakafiliaga a Iehova. Ka ko e hana a fakafiliaga tonu mo e fakaalofa, ne manako a ia ke fakamatala fakamua e fekau hataki he tala mitaki ke he tau motu oti kana. (Mareko 13:10) Ko e maamaaga nei kua ha ha he Tau Fakamoli a Iehova e matagahua​—ke kumi a lautolu ia ne lata mo e mafola he Atua mo e fakaako ki a lautolu e hana a tau puhala he mafola. To mafiti vave mai, ke he magaaho tonu he Atua, ka fakaoti mo e kautu e gahua fakamatala. “Ti hoko mai ai e fakaotiaga.”​—Mataio 10:12, 13; 24:14; 28:19, 20.

[Tau Matahui Tala]

Manatu Nakai e Koe?

◻ Ko e heigoa e tau kautu he Tau Fakamoli he vaha nei ke he ha lautolu a fekafekauaga?

◻ Ko e ha e tokologa ne nakai talia e fekau Kerisiano?

◻ Ko e heigoa e puhala fakamatala fakaaposetolo ne fakaaoga he Tau Fakamoli?

◻ Ko e heigoa e tau koloa ne ha ha ia tautolu ke gahua mitaki e fekafekauaga?

◻ Ko e heigoa ha tautolu oti ke taute ke lata mo e Mareko 13:10?

[Puha he lau 17]

MOTU FAKAMOLI NE GAHUA HE 1943 HE 1993

Ailani 374 102,043

Atenetina 430 366,297

Italia 72 44,668

Uruguai  ?? 60,854

Falani Nakai fai fakamauaga 122,254

Filipaina 150? 4,224

Kolomopia Nakai fai fakamauaga 201,440

Mesiko 1,565 380,201

Pasili Nakai fai fakamauaga 45,363

Peru Nakai fai fakamauaga 116,576

Polani Nakai fai fakamauaga 113,551

Potukala Nakai fai fakamauaga 41,842

Sepania Nakai fai fakamauaga 97,595

Sile 22 9,144

Venesuela Nakai fai fakamauaga 64,081

[Fakatino he lau 15]

Kua tupu lahi e Tau Fakamoli a Iehova he tau motu Katolika loga, tuga a Sepania

[Tau Fakatino he lau 16]

Malolo lahi e Tau Fakamoli a Iehova he tau motu oti he lalolagi