Hao Moui Mai he Matematekelea Lahi
“Ko lautolu na kua o mai mai he matematekelea lahi, kua unu foki ha lautolu a tau tapulu, mo e fakahina ha lautolu a tau tapulu ke he toto he Punua mamoe.”—FAKAKITEAGA 7:14.
1. Ko hai ka fakafeleveia a lautolu ia ne liu fakatu mai he liu tu mai he lalolagi?
HE MAGAAHO ne fakatu mai e tau miliona he ‘liu tutu mai ha lautolu ne tututonu mo lautolu ne hepehepe,’ to nakai fakamoui a lautolu ke he gati lalolagi. (Gahua 24:15) To aala hake a lautolu ke he tau takaiaga kua mua atu e fulufuluola mo e kua fita e tauteute e tau nonofoaga, tau koloa tui, mo e loga he tau mena kai kua taute ma lautolu. Ko hai ka taute e tau tauteuteaga nei? Maaliali ai, to fai tagata ka nonofo he lalolagi fou ato kamata e liu tumai he lalolagi. Ko hai? Fakakite he Tohi Tapu ko lautolu ia ka hao mai he matematekelea lahi hane hau. He tau fakaakoaga oti he Tohi Tapu, nakai fakauaua ko e taha a nei ne kua mua atu e fuluola—ha ko e to hao falu ne tua fakamoli mai he matematekelea lahi mo e to nakai mamate. Kua fakamoli e amaamanakiaga nei i loto he tau Tohiaga Tapu.
Tuga e Vaha ha Noa
2, 3. (a) Ko e heigoa e tau tataiaga ne ha ha he vaha ha Noa mo e vaha ha tautolu? (e) Ko e heigoa kua fakakite hagaao ke he fakahaoaga a Noa mo e hana magafaoa he Fakapuke?
2 Ia Mataio 24:37-39, kua fakatatai e Iesu Keriso e vaha ha Noa mo e tau aho fakamui, ne kua ha ha i ai a tautolu he mogonei. Ne pehe a ia: “Ka e tuga e vaha kia Noa, to eke pihia foki ka hau e Tama he tagata. Ha ko e mena tuga ne eke ke he vaha ka e nakaila hoko e fakapuke, ne kai a lautolu mo e inu, ti fai hoana a lautolu mo e fakafaitane, kua hoko ni ke he aho ne hu atu ai a Noa ke he vaka, Ti nakai iloa e lautolu ato hoko mai e fakapuke, mo e uta kehe a lautolu oti; to pihia foki ka hau e Tama he tagata.”
3 Kua tatafi kehe he Fakapuke he lalolagi a lautolu oti ne nakai fanogonogo ke he fekau hataki he Atua. Ka e nakai tatafi kehe a Noa mo e hana a magafaoa. Ne ‘huhu atu a lautolu ke he vaka,’ tuga ne talahau e Iesu. Ha ko e ha lautolu a mahani Atua fakamoli, ne foaki age e Iehova ki a lautolu e puhala ke hao mai. Hagaao e 2 Peteru 2:5, 9 ke he fakahaoaga a Noa mo e hana a magafaoa he talahau ai: “Ka e laveaki [he Atua] a Noa . . . ko e ogo he tututonu, ka e ta mai e fakapuke ke he lalolagi matahavala; Kua fioia he Iki ke laveaki e tau tagata mahani Atua mai he kamatamata.” Kua fakatatai e Iesu e vaha ha Noa mo e tau aho fakamui ke fakakite ko e laulahi he tau tagata to nakai fanogonogo a lautolu ke he fekau hataki he Atua. Ka e pete ni, he pihia a ia kua fakakite foki e ia kua omaoma a Noa mo e hana a magafaoa ke he Atua ko Iehova, huhu ke he vaka, mo e hao mai he Fakapuke lahi. Kua tuhi e fakahaoaga ha Noa mo e hana magafaoa ke he fakahaoaga he tau fekafekau tua fakamoli he Atua he fakaotiaga he lalolagi nei.
Ko e Puhala he Senetenari Fakamua
4. He fakamoliaga he tau kupu a Iesu, ko e heigoa e mena ne tupu ne takitaki atu ke he moumouaga a Ierusalema he 70 V.N.?
4 Kua vagahau foki a Iesu ke he tau mena ka tutupu he fakaotiaga he lalolagi nei. Ia Mataio 24:21, 22, kua totou e tautolu: “Ha ko e vaha ia ke lahi ai e matematekelea, nakai pihia taha mena tali mai he kamataaga he lalolagi, kua hoko ni ke he vaha nai; ti nakai tuai pihia foki. Aua he fakaku e vaha ia, po kua nakai fakamoui taha; ka e fakaku e vaha ia ha ko lautolu kua fifili.” Kua kamata e tau kupu nei ke fakamoli he senetenari fakamua he Vaha Nei ha tautolu. He 66 V.N., ko e maaga ko Ierusalema kua pa takai he tau kautau Roma i lalo a Cestius Gallus. Ne fakatagataga he tau kautau Roma e kaupa he faituga, mo e tokologa e tau Iutaia ne mautali ke kaumahala. Kua nakai amaamanaki ki ai, mo e nakai fai fakamaamaaga, ne uta kehe e Cestius Gallus e tau kautau hana. He kitia ai kua o kehe e tau Roma, ne fakagahua he tau Kerisiano e tau kupu ha Iesu, ne talahau he tau tau fakamua: “Ka kitia e mutolu kua pātakai a Ierusalema he tau kau, ti iloa ai e mutolu ke he vaha ia kua tata hana moumouaga. Ko e vaha ia, kia fehola a lautolu ha i Iutaia ke he tau mouga; ko lautolu foki ha i loto he māga ia, kia o kehe a lautolu; ko lautolu foki ha he tau kaina, aua neke huhu a lautolu ki loto ha māga.” (Luka 21:20, 21) Ko e tau Iutaia faka-Kerisiano, ko lautolu ne fifili, kua tiaki fakaave e maaga malaia ha Ierusalema mo e kua hao he moumouaga kelea lahi ne mui mai he magaaho ia ni. He 70 V.N., ne liliu mai e tau kautau Roma i lalo he Pule he Matakau ko Tito. Ne takai viko a lautolu i Ierusalema, tapaki ai e maaga, mo e moumou ai.
5. Ko e heigoa e kakano ne fakaku ai e matematekelea i Ierusalema he 70 V.N.?
5 Ne talahau mai he tagata Iutaia fakamauaga tuai tohia ko Josephus ko e 1,100,000 e tau Iutaia ne mamate, ka e 97,000 ne hao mai mo e uta fakapaea. Ko e tau Iutaia nakai Kerisiano ia ne hao nakai “ko lautolu kua fifili” he perofetaaga a Iesu. Vagahau ai ke he motu totoko ko Iutaia, kua pehe a Iesu: “Kitiala kua toka atu kia mutolu ha mutolu a fale kua moumou. Ha ko e mena tala atu e au kia mutolu, nakai tuai kitia mai e mutolu au, ato pehe mai a mutolu, Kia monuina a ia kua haele mai ke he higoa he Iki.” (Mataio 23:38, 39) Nakai fai fakamauaga ke he tau Iutaia ia, ne ha ha i Ierusalema, ko e talia a Iesu ko e Mesia he magaaho fakahiku ia ni, ti eke ai mo tau Kerisiano, mo e moua e fiafia a Iehova. Pete ni ia, ko e matematekelea ne hoko ki a Ierusalema he 70 V.N. kua fakaku. Nakai loa e pa takai fakahiku he kautau Roma. Kua fakaata he mena nei e falu Iutaia ke hao, ke fakafano atu ni ke he tau matakavi kehekehe he Pule Atu Motu Roma mo tau tupa.
Ko e Moto Tagata Tokologa ne Hao
6, 7. (a) Ko e maaga mahani fakalotu lahi fe ka amanaki ke moumou, ke fakatatai atu ke he matematekelea fe? (e) Ko e heigoa ne perofeta e Ioane hagaao ke he matematekelea lahi hane hoko mai ke he lalolagi nei?
6 Pete ni kua ‘matematekelea lahi’ moli e moumouaga a Ierusalema he 70 V.N. ke he maaga mahani fakalotu ia, ko e laulahi he tau fakamoliaga he tau kupu a Iesu to mailoga ai. Ko e maaga mahani fakalotu lahi mahaki, ko Papelonia Lahi, ko e pule atu motu he tau lotu fakavai he lalolagi, ka moua e matematekelea lahi mahaki toili ti mui agataha mai e matematekelea pihia ni ke he fakatokaaga he tau mena ha Satani ne toe. (Mataio 24:29, 30; Fakakiteaga 18:21) Ke he 26 e tau tau he mole e moumouaga a Ierusalema, ne tohi he aposetolo ko Ioane, ia Fakakiteaga 7:9-14, hagaao ke he matematekelea lahi he lalolagi katoa nei. Ne fakakite e ia to hao mai e moto tagata tokologa i ai.
7 Ko lautolu nei ne hao, ne fakahigoa ko e “moto tagata tokologa,” kua kitia ai ke he tau mena fifili ha lautolu ne taute. Hagaao atu ke he Fakakiteaga 7:14, taha mai he tau motua 24 he lagi ne tala age ki a Ioane: “Ko lautolu na kua o mai mai he matematekelea lahi, kua unu foki ha lautolu a tau tapulu, mo e fakahina ha lautolu a tau tapulu ke he toto he Punua mamoe.” E, ko e moto tagata tokologa kua fakailoa a Iehova mo punaaga he ha lautolu a fakamouiaga. Kua fakagahuahua e lautolu e tua ke he toto a Iesu mo e moua e tuaga tututonu ki mua he ha lautolu a Tufuga mo e hana a Patuiki kotofa, ko Iesu Keriso.
8. Ko e heigoa e fakafetuiaga ne ha ha he “moto tagata tokologa” mo lautolu ne toe he tau matakainaga fakauku a Iesu?
8 He vaha nei, teitei ke lima e miliona a lautolu he moto tagata tokologa ne nonofo ki lalo he takitaki gahuahua he lagi ko e Patuiki ko Iesu Keriso. Kua omaoma a lautolu ki a Keriso mo e fakalatahaaga tata mo e hana a tau matakainaga fakauku ne ha ha agaia he lalolagi. Hagaao atu ke he tauteuteaga ne foaki he moto tagata tokologa ki a lautolu ne fakauku, ne pehe a Iesu: “Ko e moli, ke tala atu e au kia mutolu, ha ko e tau mena ne eke e mutolu ke he taha ne muikau ia lautolu ko e haku a tau matakainaga nai, ko au haia ne eke e mutolu ki ai.” (Mataio 25:40) Ha kua tuku atu mo e nakai fulukovi e lagomatai ke he tau matakainaga fakauku a Keriso, kua fakafili a lautolu he moto tagata tokologa ke taute ai e mitaki ki a Iesu ni. Lagomatai he mena nei a lautolu ke moua e fakafetuiaga mauokafua mo Iesu Keriso mo e Atua ko Iehova. Kua fakamonuina ai a lautolu ke fakalataha mo lautolu kua fakauku ne toe he eke mo Tau Fakamoli he Atua mo e fua hana higoa.—Isaia 43:10, 11; Ioelu 2:31, 32.
Fakatumau ke Mataala
9, 10. (a) Ko e heigoa ha tautolu ka taute ke fakatumau ha tautolu a tuaga tututonu ki mua he Tama he tagata? (e) Ko e heigoa kua lata ia tautolu ke taute ke fakatumau ke “mataala”?
9 Kua lata e moto tagata tokologa ke taofimau e tuaga tututonu ha lautolu i mua he Tama he tagata mo e nakai fakateao, kua lata ke mataala tumau ato hoko ke he fakaotiaga. Fakamaaliali mai e Iesu e mena nei he pehe a ia: “A mutolu neke pehia ha mutolu a tau loto, he fakaniniko, mo e konahia, mo e fakaatukehe he tau mena he mouiaga nai; neke fakaofo mai e aho ia kia mutolu. Ha ko e mena tuga ne matahele, ke hoko mai ai kia lautolu oti kana kua nonofo ke he lalolagi oti. Hanai, kia mataala a mutolu, mo e liogi nakai noa, kia talahaua a mutolu kua aoga ke hao mai ke he tau mena oti ia ka hohoko mai, ke tutu foki ki mua he Tama he tagata.”—Luka 21:34-36.
10 Ke kautu he tutu ki mua he Tama he tagata, kua lata ia tautolu ke moua hana a taliaaga, ko e mena ke nakai moua e tautolu ka fakaata e tautolu a tautolu ke hufia ke he tau manamanatu he lalolagi nei. Ko e manamanatuaga fakalalolagi kua fakaohooho mo e maeke ke fakataki e tagata ke molea e tau fiafia fakatino po ke eke ke pehia hifo mo e tau lekua he moui ti nakai fahia a ia ke tuku fakamua e tau mena he Kautu. (Mataio 6:33) Ko e tau mena pihia ka fakalolelole fakaagaga e tagata mo e taute a ia ke kehe e aga ke he tau matagahua hana ki mua he Atua mo e falu. Maeke a ia ke nakai fekafekau po ke fakahagahaga kelea e tuaga hana he fakapotopotoaga he taute e agahala kelea lahi, po ke liga fakakite foki e mahani nakai tokihala. Kua lata ia lautolu takitaha he moto tagata tokologa ke onoono hifo ki a ia ni. Kua lata ia ia ke vevehe mai he lalolagi nakai mahani Atua nei mo e hana a tau gahua.—Ioane 17:16.
11. Ko e fakagahuahua he tau matapatu fakaakoaga he Tohiaga Tapu fe ka lagomatai a tautolu ke hao mai i Amaketo?
11 Ke hoko ke he fakaotiaga ia, kua foaki mai e Iehova e tau mena ne lata mo tautolu mai he Kupu hana, hana agaga tapu, mo e hana a fakatokatokaaga kua kitia. Kua lata ia tautolu ke fakaaoga fakamitaki e tau mena nei. Tuga foki, kua lata ia tautolu ke liogi mo e omaoma ke he Atua kaeke ke amanaki a tautolu ke moua e fiafia hana. Ka e taha mena, kua lata ia tautolu ke fakatupu e fakavihia lahi ke he tau mena kelea. Kua pehe mai e salamo: “Nakai nofo au mo e tau tagata matahavala; ti nakai fano au mo e tau tagata pikopiko. Kua fakavihia e au e fakapotopotoaga he tau tagata mahani kelea: kua nakai nofo foki au mo e tau tagata mahani hepehepe. Aua neke tanaki e koe au mo e tau tagata hala, ko e haku a moui foki neke fakalataha ia mo e tau tagata lima toto.” (Salamo 26:4, 5, 9) I loto he fakapotopotoaga Kerisiano, ko e tau fuata mo e tau fuakau kua lata ke fakakaupa e fakalataha mo lautolu ne nakai tukulele ki a Iehova. Ke moua e fiafia he Atua, kia lali a tautolu ke mahani hakohako katoa mo e nakai fai ila mai he lalolagi. (Salamo 26:1-5; Iakopo 1:27; 4:4) Ha kua pihia, kua fakamoli mai ki a tautolu to nakai tatafi kehe e Iehova a tautolu ia Amaketo fakalataha mo lautolu ne nakai mahani Atua.
To “Nakai Mamate Tukulagi Ni” e Falu
12, 13. (a) Ato liu fakatu mai a Lasalo, ko e heigoa e tau kupu ne vagahau e Iesu ne kua nakai maama katoatoa e Mareta? (e) Ko e heigoa ne nakai kakano e tau kupu a Iesu ko e falu to “nakai mamate tukulagi ni”?
12 Ko e mena fiafia lahi ke amaamanaki atu ke hao he fakaotiaga he fakatokaaga he tau mena nei mo e ke nakai mate foki. Ko e amaamanakiaga hanei ne foaki mai e Iesu ki a tautolu. Ato hoko atu ni ke liu fakatu mai e ia e kapitiga hana ko Lasalo he mate, ne tala age a Iesu ke he mahakitaga a Lasalo ko Mareta: “Ko au nai ko e liu tu mai, mo e moui; ko ia ke tua mai kia au, pete ni he mate a ia, ka to moui ni a ia. Ko e tau tagata momoui oti, ke tua mai kia au, nakai mamate tukulagi ni; kua talia nakai e koe e mena ia?” Talitonu a Mareta ke he liu tu mai, ka e nakai maama oti e ia e tau kupu a Iesu.—Ioane 11:25, 26.
13 Nakai pehe a Iesu to tumau e tau aposetolo tua fakamoli hana ke moui ke he tino mo e to nakai mamate. Ka e kehe mai, he magaaho fakamui ne fakakite e ia to mamate e tau tutaki hana. (Ioane 21:16-23) Moli, ke he ha lautolu a fakauku ke he agaga tapu he Penetekose 33 V.N. kua kakano ko e to mamate a lautolu ke moua e tufaaga i luga he lagi ke eke mo tau patuiki mo tau ekepoa. (Fakakiteaga 20:4, 6) Ti, ke he tau magaaho ne mole, kua mamate oti e tau Kerisiano he senetenari fakamua. Pete ia, talahau e Iesu ko e fai kakano e mena ne taute e ia. Ko e tau kupu hana ke he moui mo e nakai ke mate to fakamoli.
14, 15. (a) To fakamoli fefe e tau kupu a Iesu ko e falu to “nakai mamate tukulagi ni”? (e) Ko e heigoa e tuaga he lalolagi nei, ka e ko e heigoa e amaamanakiaga ne ha ha ia lautolu ne tututonu?
14 Ke he taha mena, to nakai moua he tau Kerisiano tua fakamoli ne fakauku e mate tukulagi. (Fakakiteaga 20:6) Kua tuhi foki e tau kupu a Iesu ke he taha vaha pauaki ka fakalavelave mai e Atua ko Iehova ke he tau gahua he tau tagata mo e to tatafi kehe e mahani kelea he lalolagi, tuga ne taute e ia he vaha ha Noa. Ko lautolu ne tua fakamoli ne fa e taute e finagalo he Atua he magaaho ia to nakai mamate he tau gahua fakafiliaga he Atua. Ka e, tuga a Noa mo e hana a magafaoa, to ha ha ia lautolu e magaaho ke hao he moumouaga he lalolagi. Kua mao kikiha e amaamanakiaga pihia, ha kua fakave ke he tau fakaakoaga he Tohi Tapu mo e kua fakakite mai he tau fakafifitakiaga. (Fakatatai Heperu 6:19; 2 Peteru 2:4-9.) Ko e fakamoliaga he perofetaaga he Tohi Tapu kua fakakite to nakai leva to fakaoti e lalolagi nei ne ha ha ai e tau fakalatahaaga tagata hepehepe ha ko e moumouaga. Ko e tuaga he magaaho nei kua nakai maeke ke liliu, ha kua kelea lahi mahaki toili e lalolagi. Ko e mena ne talahau he Atua ke he vaha ha Noa kua moli foki ke he lalolagi he vaha nei. Kua puke e tau loto he tau tagata tokologa ke he tau mahani kelea, mo e tau manatu ha lautolu kua kelea he tau magaaho oti.—Kenese 6:5.
15 Kua fakaata e Iehova e tau tagata ke pule ke he lalolagi mai he tau senetenari mo e nakai fai fakalavelave faka-Atua, ka e kua teitei hoko tuai e magaaho ha lautolu ke fakaoti ai. Nakai leva to fakaotioti e Iehova e tau kelea oti he lalolagi, tuga ne talahau he Tohi Tapu. (Salamo 145:20; Tau Fakatai 2:21, 22) Ka e, to nakai fakaotioti e ia a lautolu ne tututonu fakalataha mo lautolu ne mahani kelea. Nakai la taute he Atua e mena pihia! (Fakatatai Kenese 18:22, 23, 26.) Ko e fakaoti he ha e ia a lautolu ne kua ukufakina ke fekafekau mo e tua fakamoli ki a ia, mo e matakutaku mahani Atua? Ko e kakano mitaki ni ke he tau tagata tapuaki fakamoli a Iehova ne kua momoui he magaaho ka kamata ai e matematekelea lahi ke moua e fiafia hana mo e to nakai fakaotioti, ke tuga ni a Noa mo e hana a magafaoa ne nakai fakaotioti he magaaho ne fakaoti ai e lalolagi kelea lahi mahaki he vaha hana ke he fakapuke. (Kenese 7:23) To moua e lautolu e puipui faka-Atua mo e to hao mai he fakaotiaga he lalolagi nei.
16. Ko e heigoa e tau mena homo lalahi ka tutupu he lalolagi fou, ti ko e heigoa e kakano ki a lautolu ne hao mai?
16 Ti ko e heigoa mogoia? I loto he lalolagi fou, to tafe atu e tau monuina fakamaulu ke he tau tagata ne fa e fakagahuahua katoatoa e tau fakaaogaaga he poa lukutoto a Iesu. Ne vagahau e Tohi Tapu ke he fakataiaga he “vailele tavana ko e vai he moui, kua tavana tuga ne tioata, kua lele mai he nofoaiki he Atua mo e Punua mamoe. Ha i ai ke he vaha loto he hana hala tu, mo e na fahi takitaha he vailele e akau he moui, kua fua mai ke he tau fua ne hogofulu ma ua, kua takitaha e mahina mo e fua mai ai hana fuaaga; ko e tau lau foki he akau ke fakamalolo ai e tau motu.” (Fakakiteaga 22:1, 2) Kua mitaki lahi ai ke talahau, ko e “fakamalolo” ia kua fakalataha ai ke he kautuaga he mate ni faka-Atamu! “To fakaoti tukulagi e ia e mate; to holoholo ke he foki he Iki ko Iehova e tau hihina mata mai he tau mata oti.” (Isaia 25:8) Ti, ko lautolu ne hao he matematekelea lahi ke he lalolagi fou to nakai fehagaao mo e mate!
Ko e Amaamanakiaga Moli
17. Moli fefe e amaamanakiaga to hao falu i Amaketo mo e “nakai mamate tukulagi ni”?
17 Lata nakai ia tautolu ke mauokafua katoatoa ke he amaamanakiaga ofoofogia nei? Kua lata! Fakakite e Iesu ki a Mareta to hoko mai e magaaho ke momoui ai e tau tagata mo e to nakai mamate. (Ioane 11:26) Mua atu foki, ke he Fki veveheaga 7 he Fakakiteaga ne age e Iesu ki a Ioane, ne fakakite kua o mai e moto tagata tokologa he matematekelea lahi, ti hao mai i ai. Talitonu nakai a tautolu ki a Iesu Keriso mo e talahauaga he fakamauaga tala tuai ke he Fakapuke he vaha ha Noa? Nakai fai huhu ki ai! Ke lafi atu foki, kua ha ha he Tohi Tapu e falu talahauaga ke he tau magaaho ne fakahao moui he Atua e tau fekafekau hana mai he tau vaha fifiliaga mo e he veveliaga he tau motu. Ti kua lata nakai ke tote e amaamanaki ko e to taute pihia e ia he magaaho fakamui nei? Kua fai mena nakai ne kua nakai maeke he Tufuga ke taute?—Fakatatai Mataio 19:26.
18. To fakamoli fefe a tautolu ke he moui he lalolagi tututonu fou a Iehova?
18 He fekafekau fakamoli ki a Iehova he mogonei, kua ha ha ia tautolu e fakamoliaga ke momoui tukulagi ke he lalolagi fou hana. Ma e tau miliona loga, to puhala mai e moui he lalolagi fou ia ke he liu tu mai. Ka e, he vaha ha tautolu, ko e tau miliona he tau tagata a Iehova—e, ko e moto tagata tokologa kua nakai fai tagata ke totou po ke fakakaupa—ka moua e monuina uho ka fakahao moui mai he matematekelea lahi. Mo e to nakai mamate a lautolu.
Fakamolemole Fakamaama
◻ Fakakite fefe e hao mai i Amaketo he vaha ha Noa?
◻ Ko e heigoa ha tautolu ka taute ke fakatumau ke tutu ka hau a Iesu ke fakahoko e fakafiliaga a Iehova?
◻ Kua lata he ha a tautolu ke talahau ko lautolu ne hao i Amaketo to “nakai mamate tukulagi ni”?
[Fakatino he lau 15]
Fehola e tau Kerisiano he matematekelea i Ierusalema