Kua Hikihiki e Tau Vaha
LIGA ko e olioli ha ia ke moui i Isaraela tuai ki lalo he pule fakalilifu he patuiki tua fakamoli ko Solomona! Ko e vaha a ia he mafola, monuina, mo e fiafia. He magahala he magaaho ne fakatumau a Solomona ma e tapuaki moli, ne fakamonuina fakalahi e Iehova e motu. Ke he Patuiki ko Solomona, ne foaki age he Atua nakai ni ko e muhukoloa lahi ka e ko e “pulotu mo e loto matala” foki ke maeke ia Solomona ke pule mo e tututonu mo e fakaalofa. (1 Tau Patuiki 3:12) He talahau he Tohi Tapu: “Ne kumi atu foki he tau patuiki oti he lalolagi kia Solomona ke fanogonogo ke he hana pulotu kua tuku ai he Atua ke he hana loto.”—2 Nofoaga he Tau Patuiki 9:23.
Ke he tau tagata, ne foaki age e Iehova e puipuiaga, mafola, mo e loga he tau mena mitaki. Kua talahau mai e Kupu he Atua: “Ne tokologa a Iuta mo Isaraela tuga ne oneone he mataafaga he tokologa kua kai a lautolu, mo e inu, mo e olioli.” Ke he mena tupu moli mo e fakatai, ne “nonofo mo e mafola [e tau tagata] . . . ko e takitaha mo e nofo ki lalo hana vine, mo e nofo ki lalo hana mati . . . ke he tau aho oti a Solomona.”—1 Tau Patuiki 4:20, 25.
Kua hikihiki e tau vaha. Ko e moui he vaha nei kua kehe lahi mai he tau aho fiafia he vaha ia. Nakai tuga he vaha ia Solomona, ko e lekua lahi mahaki he vaha nei ko e mativa. Pihia ni ke he tau motu muhukoloa, kua ha ha i ai e mativa. Ke fakatai ki ai, he Tau Fahi Kaufakalataha mo e tau motu Kautaha a Europa, kua teitei ke hoko ke he 15 e pasene he tau tagata ne nonofo mativa, he talahau he Polokalama Fakatupu he Tau Motu Kaufakalataha.
Hagaao atu ke he fakatino he lalolagi katoa, The State of the World’s Children 1994, ko e hokotaki ne mai he UNICEF (United Nations Children’s Fund) kua fakakite ko e vala ke lima aki he puke tagata he lalolagi kua nonofo mativa, lafi atu ai ke he moui ma e tokologa he tau tagata mativa he lalolagi kua “eke ai ke tupu tolomaki e uka mo e matematekelea.”
Ke he falu he tau motu, kua lafi atu e holo hake he tupe ke he tau mena uka he tau tagata mativa. He talahau he fifine he taha motu Aferika: “Ne kitia e koe e taha mena he makete, ti pehe a koe, ‘E, to fano au ki kaina ke tamai e tupe ke fakatau aki.’ He liu mai a koe he taha e tula he mole mo e tala atu ni kua nakai maeke ia koe ke fakatau e mena ia ha kua holo hake tuai e totogi. Ko e heigoa he tagata ka taute mogoia? Ko e mena fakaita lahi.”
Taha foki e fifine he kavi ia ni ne pehe: ‘Ke moui, kua tiaki e mautolu e falu a mena kua lata. Ko e puhala ke moua e tau mena kai he mogonei e gahua ha mautolu mua.’
Hagaao atu ke he Tau Motu Kaufakalataha, ko e vaha anoiha kua tuga e fakaatukehe. Ke fakatai ki ai, kua fuafua he UNICEF, ka tumau e holo ki mua he puke tagata he mogonei, ko e numela he tau tagata mativa he lalolagi katoa to tupu ke fakalahi fa “i loto he moui nei.”
Ka e, pete ni he muitui e tau tutuaga tupe mo e he fakalatahaaga, kua fai kakano e tau fekafekau he Atua ke logona hifo e onoonoaga mitaki. Pete ni kua nonofo a lautolu mo lautolu ne onoono ki anoiha mo e holo ki mua e tuaha noa, kua onoono e tau fekafekau he Atua ki anoiha mo e olioli mo e loto mauokafua. To kumikumi he tala ne mui mai e kakano ko e ha.
[Fakatino Credit Line he lau 3]
De Grunne/Sipa Press