Ko e Puhala Pukilu ke he Tokanoaaga
GAHOA e tau tagata iloilo ka taufetoko ko e pule e tau matafakatufono pauaki ke he lalolagi mo e lagi katoatoa. Kua takitaki he tau matafakatufono nai e tau mena oti kana mai he tau etomo itikuhila ke he tau fakatokaaga lalahi mahaki ne toka ai e tau piliona he tau fetu. Na pehe ko e nakai fai mena pihia, kua nakai maeke ai ke taute ha fakatokaaga mo e nakai tuai fai maamaaga; ti nakai ha ha ai e moui. He maama ko e fai matafakatufono pauaki mo e gahua fakalataha mo lautolu, kua maeke ai he tagata ke fakakatoatoa e tau mena lalahi ue atu, tuga he o fano he mahina mo e fakafano mai e tau fakatino lanu kehekehe mai he ha matakavi he lalolagi po ke eke foki ke taute mai he tau mena mamao i fafo he pulagi he lalolagi ke he tau mata televisoni he tau loto kaina ha tautolu.
Ka e kua e tau matafakatufono ke he mahani mitaki? Kua aoga mo e mitaki lahi foki kia e tau fua he tapiki ki a lautolu? Kua tokologa ne logona hifo ko e nakai fai matafakatufono ke he mahani mitaki mo e fifili ai e fakaakoaga fakalatalata po ke lotu tokaholo ne kua lata mo e tau manako ha lautolu.
Ka e kua ha ha i ai foki falu, ne fifili e puhala kehe foki, ko e ‘hala pukilu ke pu atu ke he moui’ tuga ne tohi mai he Tohi Tapu. Kua nakai lata ai a tautolu ke ofo ko e fifiliaga ni he faoa gahoa a nai, ha ko e mena pehe a Iesu hagaao ke he hala pukilu: “Kua tokogaogao foki a lautolu ke moua.” (Mataio 7:14) Ko e ha ai ne tokogaogao?
Kakano he fakaapiapi he tau matafakatufono mo e tau matapatu fakaakoaga he Atua e hala pukilu. Ti ko e tagata loto fakamoli ni hokoia ka fiafia ke fakatatai hana moui ke he tau poakiaga he Atua. Kua kehe muatua mai he puhala pulahi, ne kua tuga ko e tokanoa ka e kua moli kua fakatupa ni, ko e puhala pukilu, ne tuga ko e apiapi, ka e taute e tagata ke tokanoa ke he tau mena oti ne aoga. Ko e “fakatufono kua katoatoa e mitaki ha i ai e tokanoaaga,” ne fakakaupa hana tau katofia.—Iakopo 1:25.
Puhala ne Fakatokanoa he Hala Pukilu
Moli, kua nakai mukamuka tumau ke nofo he hala pukilu. Ko e mena nakai mitaki katoatoa e tau tagata oti kana mo e kua eke ni ke taute mena hepe. Ti liga eke ne tagata ke hagahaga hehe tote. Ka e pete ni, kua mua atu ni e tau mena ka moua he tapiki ke he ‘hala lautote’ he ha mahani fakalatalata po ke tau hikihikiaga kua lata ke taute, ha ko e mena ‘fakaako mai he Atua ki a tautolu ke he tau mena ke aoga ai.’—Isaia 48:17; Roma 3:23.
Ma e fakataiaga: Kua fakatoka he tau mamatua pulotu e ‘hala lautote’ he tau mena kai ma e tau fanau ha lautolu. Kua eke e kakano he mena nei he falu magaaho ke lata ke mao e pule he tau magaaho kai. Ka ko e magaaho ka lalahi hake e fanau, to fakaaue na lautolu ke he akonakiaga fakaalofa he ha lautolu a tau mamatua. He lalahi, kua mahani tuai a lautolu ke loto ke kai mena kai mitaki. Mo e loga lahi e tau mena kai kehekehe mitaki ne kua maeke ke moua ti nakai logona ai e lautolu ko e fakakaupa.
Ke he puhala fakaagaga, kua taute he Atua e puhala taha ia ki a lautolu he puhala pukilu ne takitaki ke he moui. Ne feaki hake e ia i loto ia lautolu ne loto molu e tau manako kua mitaki ne takitaki atu ke he fiafia lahi mo e tokanoaaga moli. Ne taute e ia e mena nei he foaki mai hana Kupu, ko e Tohi Tapu. Ke lafi ki ai, kua uiina e ia a tautolu ke liogi ma e hana agaga ke lagomatai a tautolu, mo e poaki a ia ki a tautolu ke feoaki fakalataha mo e tau faoa Kerisiano, ne kua maeke ke fakamalolo a tautolu ke o tumau he hala pukilu. (Heperu 10:24, 25) E, ko e fakaalofa e Atua, mo e pehi he mahani mua ue atu nei hana tau folia mo e tau puhala oti kana hana.—1 Ioane 4:8.
He magaaho ka kaputia e fakaalofa, mafola, mahani mitaki, taofi e ia ni a ia, mo e falu fua foki he agaga he Atua, to eke ni e puhala pukilu ke nakai tuga ko e apiapi. Tuga he talahau mai he tohiaga tapu, “kua nakai fai fakatufono ke he tau mena pihia.” (Kalatia 5:22, 23) “Ko e mena ha i ai e Agaga he Iki ha ha i ai e tokanoaaga.” (2 Korinito 3:17) He magaaho nei hane kamata mo e logona foki he tau Kerisiano moli e tokanoaaga nei. Kua tokanoa mai a lautolu he tau mena matakutaku ne fakamatematekelea e tau tagata he vaha nei, tuga e tau matakutaku loga ke he vaha i mua mo e matakutaku noa ke he mate. Kua fiafia lahi ha ke manamanatu ke he vaha i mua ka “puke e lalolagi ke he maama kia Iehova, tuga ne toka kua ūfia ke he puke tahi”! (Isaia 11:9) He magaaho ia, to eke foki e matakutaku ke he matahavala ke nakai ha i ai. To galo tukulagi e tau loka mo e tau kakau papa. To logona he tau tagata oti e tokanoaaga mo e nakai haofia—ke he aho mo e po, ke he lotokaina mo e i fafo. To ha ha i ai moli e tokanoaaga!
To Moua Moli e Tautolu e Lagomatai he Atua
Moli, ke fakatauo e moui mo e tau poakiaga he Atua kua lata ni ke fai laliaga, ka e “nakai mamafa foki hana tau poaki,” mo e ke he tau tagata nakai mitaki katoatoa foki. (1 Ioane 5:3) He hiki a tautolu ke he tau mena he hala pukilu mo e logona ai e tau mena aoga he o i ai, kua tupu mai ai ia tautolu e vihiatia ke he tau puhala mo e tau manamanatuaga ne kua kitia ai ia lautolu he puhala pulahi. (Salamo 97:10) Kua mitaki ke he logonaaga ha tautolu ke omaoma ke he matafakatufono he Atua. Kua kehe he nakai “mamahi e loto” mo e “malipilipi ai e tau loto” ne fa mahani ke ha ha he tau tagata tokologa, ne mavehe mai e Atua: “Kitiala, to kalaga haku a tau fekafekau ha ko e loto fiafia.” E, ko e loto ne fakaako e Iehova kua olioli lahi mo e ataina ai.—Isaia 65:14.
Ne mate a Iesu ke maeke ai ke moua e tokanoaaga moli ma tautolu. Kua pehe e Tohi Tapu: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” (Ioane 3:16) He magaaho nei, ha ko e Patuiki he Kautu he Atua he lagi, kua fakahoko mai e Iesu e tau mena aoga he poa ia. To nakai leva, he mole e ‘matematekelea lahi,’ ko e magaaho ka hoko e puhala pulahi mo lautolu i ai ke he ha lautolu a fakaotiaga, to kamata ai a ia ke takitaki fakaeneene e tau tagata omaoma ke he magahala ne toe he hala pukilu ti hoko atu ke he hana otiaga, ko e mitaki katoatoa he tagata. (Fakakiteaga 7:14-17; Mataio 24:21, 29-31) Ati hokotia ai ke iloa ne tautolu e fakamoliaga he maveheaga homo ue atu: “Ha ko e mena to toka noa ai e tau mena ne eke mai he tupaaga ke he mena popo vave kia hoko atu ai ke he tokanoaaga ha ha he monuina he fanau he Atua.” Ko e tokanoaaga nei ne foaki mai he Atua kua mahomo atu mai he ha mena. Kua eke foki e mate ke uta kehe.—Roma 8:21; Fakakiteaga 21:3, 4.
He kitia mo e maama maaliali ko e takitaki ki fe e puhala pukilu, kua maeke mitaki ai e tagata ke fifili e puhala nei mo e fano tumau i ai. Kua mua atu he lagomatai e lautolu ne fuata ke nakai matapulefu mo e nakai hogohogomanava ke he tau mena ne tuga ki a lautolu ko e fakaapiapi he tau poakiaga he Atua. Kua ako a lautolu ke kitia e tau mena nei ko e tau fakamoliaga he fakaalofa he Atua mo e tau akau punuti ke he tau mena kelea he puhala pulahi. (Heperu 12:5, 6) Kua moli, kua lata ia koe ke fakauka, he manatu ko e mena fai magaaho ni ka mole ke feaki hake e tau manako mo e tau mahani Atua, tuga ai ni he fai magaaho ka mole ato fai fua mitaki e akau kai. Ka e to fai fua ni e akau ka tauteute e kelekele mo e fakamalu.
Ti fakaako ai e Kupu he Atua, feoaki fakalataha mo e tau Kerisiano, mo e “liogi nakai noa” ma e agaga tapu. (1 Tesalonia 5:17) Falanaki ke he Atua ke lagomatai a koe ke ‘fakahakohako hāu a tau puhala.’ (Tau Fakatai 3:5, 6) Ka e aoga nakai e tau mena oti nei? Gahua moli nakai? E, kua gahua ai ma Tom ti pihia foki ma Mary, ne kua talahau he tala fakamua.
Ne Oti ha Laua O he Puhala Pulahi
Kua tohia mai e Tom: “He lotouho he atu tau 1970, ne feleveia a mautolu mo e Tau Fakamoli a Iehova he magaaho ne ahi mai e taha ha lautolu ke he kaina ha mautolu. Kua eke e fakatutalaaga ke holo atu ke he fakaakoaga Tohi Tapu. Kua eke fakahaga ai au ke kamata ke fakamea haku a moui. Ne papatiso au he tau 1982 mo e kua fekafekau he magaaho nei he fakapotopotoaga tata. Kua papatiso foki e tama tane ha maua he magaaho nei. Kua fakaaue au ke he hoana haku he fakauka ki a au he tau tau oti ia ato ako e au e kupu moli. Mo e mua atu he tau mena oti kua fakaaue au ki a Iehova mo e hana Tama, ko Iesu Keriso, ma e tau mena oti ne foaki mai e laua ki a mautolu mo e amaamanakiaga ne ha ha ia mautolu he magaaho nei ke he vaha i mua.”
Mo e ka e kua a Mary? Kua logona hifo e ia, ko e mena to nakai fakamagalo he Atua a ia, ka e manako a ia ke ako hagaao ke he Atua ma e hana fanau. He magaaho ne logona e ia kua fakaako he Tau Fakamoli a Iehova e Tohi Tapu ke he hana tuuta kaina, ne ole foki a ia ke lagomatai a ia. Ka e taha e mena, kakano he hu lahi hana tau mahani kelea kua uka lahi ke holo ki mua. Kua eke ne fakaakoaga ke vikoviko ki tua ki mua. Ka e eke ni hana tama fifine tote ne fitu e tau he moui, ke fakamalolo atu ki a ia. “Fakamalolo ma Mami. Maeke ia koe ke taute!” he fa talahau e ia. Ti eke ai mogoia a Mary ke lali fakalahi.
He magaaho ka hoko mai hana tane mau pouli ki kaina, ko e tagata kai tulaki foki, ne nofo foki a ia he fakaakoaga. Ati eke ai fakahiku ke kautu mai he tau mahani kelea ha laua. Kua eke mogoia he mole he fakamau he fakatufono ha laua a mau moli mo e talia ke papatiso, ne iloa ai e laua e fiafia lahi mahaki mo e logona ko e magafaoa moli laia. Ka e momoko lahi, he fakaoti ai he AIDS e moui a Mary, ka e kua mate a ia mo e toka ai he loto hana e maveheaga he Tohi Tapu ke he liu tu mai mo e moui ke he lalolagi parataiso, ne kua holoholo kehe e tau mena kelea oti he puhala pulahi.
E, kua maeke ke afe kehe mai he puhala pulahi mo e laulahi ne takitaki atu ke he fakaotiaga. Ne pehe a Iesu Keriso: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.” (Ioane 17:3) Ka e kua mogoia, he fifili ke tu hau a tau hui he hala pukilu ne takitaki ke he moui? He uta ke he loto mo e fakagahua e tau mena ne ako e koe mai he Kupu he Atua, liga to iloa ai ni e koe e maveheaga fakamafanatia loto he Tohi Tapu: “To iloa foki e mutolu e mena moli, ko e mena moli foki ke toka noa ai a mutolu.”—Ioane 8:32.