Foaki e Iehova e Mafola mo e Kupu Moli ne Mua Ue Atu

“To fakamalolo e au a lautolu, mo e fakakite atu e au kia lautolu e mafola mo e fakamoli ne mua ue atu.”​—IEREMIA 33:6.

1, 2. (a) Ma e mafola, ko e heigoa e fakamauaga he tau motu? (e) He 607 F.V.N., ko e heigoa e fakaakoaga ne fakaako e Iehova ki a Isaraela hagaao ke he mafola?

MAFOLA! Ko e manako lahi ha a ia, ka e gahoa ke he fakamauaga tuai he tagata! Kua mua atu ke he senetenari 20 aki, kua nakai ko e senetenari he mafola. Ka e, kua kitia ai he ua he tau felakutaki moumou lalahi ke he fakamauaga tuai he tagata. He mole e felakutaki fakamua he lalolagi, ko e Tau Matakau he Tau Motu kua fakatu ke fakatumau e mafola he lalolagi. Kua kaumahala e fakatokatokaaga ia. He mole atu e felakutaki ke ua aki he lalolagi, ko e fakatokatokaaga he Tau Motu Kaufakalataha kua fakatu ai mo e foliaga taha. Kua lata ni a tautolu ke totou e tau nusipepa he tau aho takitaha ke kitia ai kua kaumahala lahi foki.

² Kua ofo kia a tautolu ko e tau fakatokatokaaga he tagata ka nakai tamai e mafola? Nakai pihia. Molea ai e 2,500 he tau tau i tuai, kua ako ai he tau tagata fifili he Atua, ko Isaraela e fakaakoaga ke he mena nei. Ke he senetenari ke fitu aki F.V.N., kua fakamatakutaku ai he malolo he lalolagi ne mui hake, ko Papelonia, e mafola a Isaraela. Ne kumi atu a Isaraela ki Aikupito ma e mafola. Kua kaumahala a Aikupito. (Ieremia 37:5-8; Esekielu 17:11-15) He 607 F.V.N., ne moumou he tau kau Papelonia e tau kaupa i Ierusalema mo e tugi ai e faituga a Iehova. Kua ako ai e tau Isaraela ke he puhala uka kua nakai fai aoga he falanaki ke he tau fakatokatokaaga he tagata. Ka e nakai olioli ai e mafola, ha kua fakaohooho e motu ke fakapaea ki Papelonia.​—2 Nofoaga he Tau Patuiki 36:17-21.

3. He fakamoli e tau kupu a Iehova mai ia Ieremia, ko e heigoa e tau mena tutupu i tuai ne fakaako e tau Isaraela ke he fakaakoaga uho ke ua aki hagaao ke he mafola?

³ Ato to ki lalo a Ierusalema, pete ia, kua fakakite e Iehova ko ia, nakai ko Aikupito, ka tamai e mafola moli ki Isaraela. Puhala ia Ieremia ne mavehe e ia: “To fakamalolo e au a lautolu, mo e fakakite atu e au kia lautolu e mafola mo e fakamoli ne mua ue atu. To liuaki mai e au e paeaaga a Iuta, mo e paeaaga a Isaraela, mo e ati hake e au a lautolu, tuga he vaha fakamua.” (Ieremia 33:6, 7) Kua kamata e maveheaga a Iehova ke fakamoli he 539 F.V.N. he magaaho ne kautu a Papelonia mo e foaki ai e tokanoaaga ke he tau Isaraela ne fakapaea. (2 Nofoaga he Tau Patuiki 36:22, 23) Ke he vala fakahiku he 537 F.V.N., ne fakamanatu he matakau he tau Isaraela e Galue he Fale Api he kelekele a Isaraela ke he magaaho fakamua he 70 e tau tau! He mole atu e galue, ne fakatoka atu a lautolu ke liu talaga e faituga a Iehova. Fefe e logonaaga ha lautolu ke he mena nei? Kua pehe e fakamauaga: “Ti kalaga ai e motu oti mo e kalaga lahi he fakaheke atu ai a lautolu ki a Iehova, ha kua fakave ai e fale a Iehova.”​—Esera 3:11.

4. Fakalagalaga fefe e Iehova e tau Isaraela ke taute e gahua he talaga e faituga, mo e ko e heigoa e maveheaga ne taute e ia hagaao ke he mafola?

⁴ He mole atu e kamataaga fiafia, kua fakalolelole e tau Isaraela mai he tau tagata totoko mo e fakaoti e gahua he talagaaga he faituga. Ke he falu he tau tau fakamui, ne fakatu hake e Iehova e tau perofeta ko Hakai mo Sakaria ke fakalagalaga e tau Isaraela ke fakakatoatoa e gahua talaga. Ko e fiafia ha a ia ma lautolu ke logona a Hakai he pehe hagaao ke he faituga ka talaga: “Kua mua e lilifu he fale nai ke he hana lilifu fakamua, kua pihia mai a Iehova Sapaota, to foaki atu e au e [“mafola,” NW] ke he mena nai”!​—Hakai 2:9.

Fakakatoatoa e Iehova Hana a Tau Maveheaga

5. Ko e heigoa e mena kua kehe lahi hagaao ke he veveheaga valu ha Sakaria?

⁵ Ke he tohi a Sakaria he Tohi Tapu, ne totou a tautolu ke he tau fakakiteaga omoomoi loga mo e tau perofetaaga ne kua fakamafana aki e tau tagata he Atua ke he senetenari ono aki F.V.N. Ko e tau perofetaaga taha nei kua tumau ke fakamoli ki a tautolu e lagomataiaga a Iehova. Kua foaki mai ai ki a tautolu e tau kakano oti ke talitonu to foaki e Iehova ke he hana tau tagata e mafola ke he vaha foki ha tautolu. Ma e fakatai, ke he veveheaga valu he tohi ne fua e higoa hana, ne laga hogofulu e talahau he perofeta ko Sakaria e tau kupu: “Kua pehe e vagahau a Iehova.” Ke he tau magaaho takitaha, kua hafagi he talahauaga e fakailoaaga faka-Atua ke he mena ne taute aki e mafola he tau tagata he Atua. Ko e falu he tau maveheaga nei kua fakamoli ke he vaha ha Sakaria. Kua fakamoli oti ai po ke hane fa e taute ai e fakamoliaga he vaha nei.

‘Ne Fakamakutu Au ha ko Siona’

6, 7. Ke he tau puhala fe ne ‘fakamakutu mo e ita lahi a Iehova ha ko Siona’?

⁶ Ko e talahauaga ne kitia fakamua ia Sakaria 8:2, ne totou ai e tautolu: “Kua pehe mai e vagahau a Iehova Sapaota, Ne fakamakutu au mo e makutu lahi ha ko Siona; ne fakamakutu foki au mo e ita lahi ha ko ia.” Ko e mavehe a Iehova ke fakamakutu, ke fakamakamaka lahi, ma e hana a tau tagata kua kakano ko e to mataala a ia ke liuaki mai e mafola ha lautolu. Ko e liuaki ha Isaraela ke he hana a motu mo e liu talaga he faituga ko e fakamoliaga he fakamakamaka.

⁷ Ti, ka e kua mogoia, kia lautolu ne totoko ke he tau tagata a Iehova? Ko e hana a fakamakamaka ma e hana a tau tagata ka tatai ai ke he hana “ita lahi” ki luga he tau fi nei. He magaaho ne tapuaki ai e tau Iutaia tua fakamoli ke he faituga ne liu talaga, kua maeke ke fakaata e lautolu e fakahikuaga ha Papelonia malolo lahi, kua to ki lalo mogonei. Kua maeke foki a lautolu ke manamanatu e kaumahala kelea he tau fi ne lali ke taofi e liu talaga he faituga. (Esera 4:1-6; 6:3) Mo e maeke ia lautolu ke fakaaue ki a Iehova ha kua fakamoli e ia hana a maveheaga. Ko e hana a fakamakamaka ne fakakautu a lautolu!

“Ko e Maga kua Fakamoli”

8. Ke he vaha ha Sakaria, kua eke fefe a Ierusalema mo maga he fakamoli ne fekehekeheaki mo e tau vaha fakamua?

⁸ Ko e magaaho ke lagaua aki ne tohi e Sakaria: “Kua pehe mai e vagahau a Iehova.” Ko e heigoa e tau kupu a Iehova he magaaho nei? “Kua liu atu au ki Siona, to nofo foki au i loto a Ierusalema; to ui ai a Ierusalema, Ko e maga kua fakamoli; ko e mouga foki a Iehova Sapaota, to ui ai a ia, Ko e mouga tapu.” (Sakaria 8:3) Ato 607 F.V.N., ko Ierusalema ne nakai ko e maga kua fakamoli. Ko e hana a tau ekepoa mo e tau perofeta kua kolokolovao, mo e hana a tau tagata kua nakai tua fakamoli. (Ieremia 6:13; 7:29-34; 13:23-27) Ko e tau tagata he Atua hane liu talaga e faituga mogonei, kua fakakite ai ha lautolu a tau gahua ke he tapuaki mea. Ke he agaga kua liu foki a Iehova ha ha i Ierusalema. Ko e kupu moli he tapuaki mea kua liu foki vagahau i ai, ti maeke ke ui a Ierusalema “ko e maga kua fakamoli.” Ko e matakavi tokoluga hana ka fakahigoa ai “ko e mouga tapu a Iehova.”

9. Ko e heigoa e hikiaga kehe lahi he tuaga kua iloa e “Isaraela he Atua” he 1919?

⁹ Ha kua fai kakano e tau fakailoaaga ua nei ki a Isaraela i tuai, kua fai kakano lahi foki ai ma tautolu ha kua tata e fakaotiaga he senetenari 20 aki. Teitei ke 80 e tau tau kua mole atu, magahala he felakutaki fakamua, gahoa a lautolu fakauku ne tokoafe kua hukui a “Isaraela he Atua” ne hokotia ke he fakapaea fakaagaga, tuga ni a Isaraela i tuai ne fakapaea ki Papelonia. (Kalatia 6:16) Fakaperofeta ai, kua fakamaama ai a lautolu ko e tau gati tino ne tafola he puhala tu. Ka e, ha ha agaia ni ia lautolu e manako moli ke tapuaki ki a Iehova “mo e agaga mo e kupu moli.” (Ioane 4:24, NW) Ti, he 1919, ne fakatoka e Iehova a lautolu mai he fakapaeaaga, he fakatu a lautolu mai he tuaga mate fakaagaga ha lautolu. (Fakakiteaga 11:7-13) Ti kua tali mo e taogo ai e leo a Iehova E, ke he huhu fakaperofeta a Isaia: “Ke mamahi fanau kia e motu ke he aho taha? Ke fanau mai agataha kia e motu?” (Isaia 66:8) He 1919, ne liliu foki e tau tagata a Iehova ko e motu fakaagaga ke he ha lautolu a “motu” ni, po ke matakavi fakaagaga he lalolagi.

10. Kamata he 1919, ko e heigoa e tau fakamonuinaaga kua ha ha i ai he tau Kerisiano ne fakauku kua olioli ke he ha lautolu a “motu”?

¹⁰ Kua haohao mitaki ai ke he motu ia, ko e tau Kerisiano ne fakauku kua fekafekau ai ke he faituga fakaagaga mua atu a Iehova. Kua kotofa ai a lautolu ko e “fekafekau fakamoli mo e loto matala,” kua talia e matagahua he leveki ma e tau koloa a Iesu he lalolagi, ko e kotofaaga ne olioli agaia a lautolu he tata atu ke he fakaotiaga he senetenari 20 aki. (Mataio 24:45-47) Ne ako mitaki mai e lautolu e fakaakoaga ko Iehova ko e “Atua ni hana e mafola.”​—1 Tesalonia 5:23, NW.

11. Kua fakakite fefe he tau takitaki lotu Kerisitenitome a lautolu ko e tau fi he tau tagata he Atua?

¹¹ Ti ko e heigoa mogoia e tau fi ha Isaraela he Atua? Ko e hakahakau a Iehova ma e hana a tau tagata kua tatai ke he hana a ita ke he tau tagata totoko. Ke he magahala he felakutaki fakamua he lalolagi, ko e tau takitaki lotu ha Kerisitenitome kua lahi mahaki e pehiaaga he lali a lautolu​—mo e kaumahala​—ke fakaoti e matakau tote he tau Kerisiano ne vagahau e kupu moli. He magahala he felakutaki ua he lalolagi, ko e tau fekafekau he Kerisitenitome kua kau auloa ke he taha ni e mena: He tau fahi ne ua he taufetoko, ne fakaohooho e lautolu e tau fakatufono ke fakamate aki e Tau Fakamoli a Iehova. Pihia foki he vaha nei, kua loga e tau motu kua fakalagalaga he tau takitaki lotu e tau fakatufono ke taofi po ke pa e gahua fakamatala Kerisiano he Tau Fakamoli a Iehova.

12, 13. Fakakite fefe e ita ha Iehova ki a Kerisitenitome?

¹² Nakai galo e Iehova e mena nei. He mole atu e felakutaki fakamua he lalolagi, ko Kerisitenitome fakalataha mo Papelonia Lahi ne toe, kua veveli ai. (Fakakiteaga 14:8) Ko e veliaga a Kerisitenitome kua eke ai mo iloaaga he tau tagata, kamata ai he 1922, ko e tau tala he tau malaia fakatai kua liligi, fakakite ai hana a tuaga mate fakaagaga ke he tau tagata mo e hataki ai hana a moumouaga ne hau. (Fakakiteaga 8:7–​9:21) Ha ko e fakamoliaga he liligi mai e tau malaia nei ne fakaholo atu, ko e lauga “Tata Mai e Fakaotiaga he Lotu Fakavai” kua fakapuloa ai ke he lalolagi katoa ia Apelila 23, 1995, mui mai e tufatufaaga he tau teau he tau miliona he tau lagaki he fufuta pauaki he Kingdom News.

¹³ He vaha nei, ko Kerisitenitome kua ha ha ai ke he tuaga momoko. Ke he senetenari ke 20 aki, ko e hana a tau tagata kua fekelipopoaki ke he tau felakutaki vale ne fakamonuina ai he hana a tau akoako mo e tau fekafekau. Ke he falu motu ko e hana a fakaohoohoaga kua teitei ke nakai kitia. Kua nofo a ia ke he moumouaga fakalataha mo Papelonia lahi ne toe.​—Fakakiteaga 18:21.

Mafola ma e Tau Tagata he Atua

14. Ko e heigoa e kupu fakaperofeta ne fakatino mai he tau tagata ne mafola?

¹⁴ Ke he taha fahi, ke he tau 1996 nei, kua olioli e tau tagata a Iehova ke he mafola ne mua ue atu he ha lautolu a motu liuaki mai, tuga he fakamaama he fakailoaaga ke tolu aki ha Iehova: “Kua pehe mai e vagahau a Iehova Sapaota, To nonofo foki e tau patu momotua ko e tau patu tane mo e tau patu fifine ke he tau male i Ierusalema; ko e tagata foki mo e hana tokotoko ke he hana lima he loga ha lautolu a tau tau. To puke foki e tau male he maga ke he tau tama ikiiki ko e tau tama tane mo e tau tama fifine kua fefeua ai ke he hana tau male.”​—Sakaria 8:4, 5.

15. Pete ni e tau felakutaki he tau motu, ko e heigoa e mafola kua olioli he tau fekafekau ha Iehova?

¹⁵ Ko e kupu fakafulufuluola nei kua fakatino mai e mena kehe lahi ke he lalolagi felakutaki nei​—ko e tau tagata he mafola. Tali mai he 1919, ko e tau kupu fakaperofeta a Isaia kua fakamoli ai: “Ko e [mafola], ko e [mafola] kia ia ne mamao katoa mo ia ne tata mai, kua pihia mai a Iehova; to fakamalolo foki e au a ia. Ka . . . kua pehe mai e Atua, nakai fai [mafola] e tau tagata mahani kelea.” (Isaia 57:19-21, fakatatai NW.) Moli ai, ko e tau tagata a Iehova, pete he nakai fai vala he lalolagi, kua nakai maeke ke fehola kehe mai he lauiaaga ke he go he tau motu. (Ioane 17:15, 16) Ke he falu motu, kua fakauka a lautolu ke he tau mena uka lalahi, mo e gahoa kua hokotia ke he kelipopoaga. Ka e, mafola e tau Kerisiano moli ke he ua e puhala lalahi. Fakamua, ko e “mafola mo e Atua ha ko e Iki ha [l]autolu, ko Iesu Keriso.” (Roma 5:1) Ke ua aki, kua ha ha ia lautolu e mafola ia lautolu ni. Kua feaki e lautolu e “iloilo mai luga,” ne kua “fakamua hana mea, ti mafola.” (Iakopo 3:17; Kalatia 5:22-24) Lafi atu ai, kua onoono atu a lautolu he olioli e mafola ke he manamanatuaga kua katoatoa lahi he magaaho he “tau tagata mahani molu, to eke ma lautolu e motu; ti fakafiafia foki e lautolu a lautolu ha ko e [“mafola,” NW] kua lahi.”​—Salamo 37:11.

16, 17. (a) Fakamalolo fefe he tau “patu tane mo e tau patu fifine” ti pihia mo e “tau tama tane mo e tau tama fifine” e fakatokatokaaga a Iehova? (e) Ko e heigoa ne fakatata e mafola he tau tagata a Iehova?

¹⁶ Kua ha ha agaia “e tau patu tane mo e tau patu fifine” he vahaloto he tau tagata a Iehova, ko lautolu ne fakauku ne manatu e tau kautuaga fakamua he fakatokatokaaga a Iehova. Ko e ha lautolu a tua fakamoli mo e fakaukaaga kua lahi e fakaaue ki ai. Ko lautolu e tau fuata fakauku kua takitaki ai e vaha vevela he atu tau 1930 mo e ke he Felakutaki II he Lalolagi, ti pihia mo e tau tau fiafia he tupu ki mua ne mui mai ai. Fakalaulahi atu, mua atu ke he 1935, ko e “moto tagata tokologa” he tau “mamoe kehe” kua kitia ai. (Fakakiteaga 7:9; Ioane 10:16) Ko e tau Kerisiano fakauku kua momotua fakahaga mo e tokogahoa lahi, kua taute ai he tau mamoe kehe e gahua fakamatala mo e kua fakalaulahi atu ke he lalolagi oti. Ke he tau tau e kua mole ko e tau mamoe kehe kua tafe mai ke he motu he tau tagata he Atua. Ko e tau kua mole hokoia, 338,491 ia lautolu kua papatiso he fakamailoga ha lautolu a tukuleleaga ki a Iehova! Ko lautolu ia ne fou kua fuata moli, he vagahau fakaagaga ai. Ko e ha lautolu a fuata mo e fakamakamaka kua uho ai ha ko e fakatupu ki mua e lautolu e kau gahua ha lautolu ne lologo e tau fakahekeaga mua ue atu “ha he Atua ha tautolu, ko ia kua nofo ke he nofoaiki, katoa mo e Punua mamoe.”​—Fakakiteaga 7:10.

¹⁷ He vaha nei, ‘kua puke e male he tau tama tane mo e tau tama fifine,’ ko e Tau Fakamoli ne malolo tuga e tau fuata. Ke he tau he fekafekauaga he 1995, kua moua e tau hokotaki mai he 232 e tau motu mo e tau aelani he lalolagi. Ka e nakai ha ha i ai ha taufetoko fakalalolagi, nakai fai fevihiatiaaki fakamagafaoa, nakai fai mahekeheke kelea, he vahaloto he kau fakauku mo e tau mamoe kehe. Kua tutupu auloa ni a lautolu, fakaagaga mo e kaufakalataha ke he fakaalofa. Ko e fakamatakainaga he lalolagi katoa he Tau Fakamoli a Iehova kua kehe moli ke he tuaga he lalolagi.​—Kolose 3:14; 1 Peteru 2:17.

Uka Lahi Kia ma Iehova?

18, 19. Ke he tau tau tali mai he 1919, fakakatoatoa fefe e Iehova e mena kua tuga e uka ke he tuaga he tagata?

¹⁸ He 1918, i tuai he magaaho ne gahoa ni e afe ha lautolu ne fakauku ne toe ko e tau solu lolelole he fakapaeaaga fakaagaga, ne nakai fai tagata ne kitia tuai e puhala he tau mena tutupu ka hohoko. Ka e moha ia na iloa e Iehova​—tuga he fakatoka mai he fakailoaaga fakaperofeta hana ke fa aki: “Kua pehe mai e vagahau a Iehova Sapaota, Kaeke ko e mena uka ke he manatu he tau tagata ne toe he motu nai ke he tau aho ia, ko e mena uka foki kia ke he haku manatu? Kua pihia mai a Iehova Sapaota.”​—Sakaria 8:6.

¹⁹ He 1919, ne fakamalolo he agaga a Iehova hana a tau tagata ke lata ma e gahua i mua. Ka e, ko e tua ni ke taofi mau ke he fakatokatokaaga tote he tau tagata tapuaki a Iehova. Kua gahoa a lautolu, mo e loga e tau mena ne nakai maaliali. Pete ia, fakavala ikiiki mai e Iehova e fakamaloloaga ki a lautolu fakamatakau mo e taute a lautolu ke taute e gahua Kerisiano he fakamatala e tala mitaki mo e taute tutaki. (Isaia 60:17, 19; Mataio 24:14; 28:19, 20) Fano fakahaga, ne lagomatai e ia a lautolu ke manamanatu ke he tau matakupu kua lata ke he tu uho mo e pule katoatoa ke he lagi mo e lalolagi katoatoa. Kua lahi kia e uka ma Iehova ke fakakatoatoa hana a finagalo ha ko e matakau tote he tau Fakamoli? Ko e tali moli ko e nakai!

“To Eke Au mo Atua ha Lautolu”

20. Kua laulahi fefe e fakapotopoto he tau tagata he Atua ne perofeta ki ai?

²⁰ Kua fakakite fakalaulahi he fakailoaaga ke lima aki e tuaga fiafia he Tau Fakamoli a Iehova he vaha nei: “Kua pehe mai e vagahau a Iehova Sapaota, Kitiala, to fakamoui e au haku motu mai he motu ne hake ai e la, mo e motu ne to ai e la. To ta mai e au a lautolu ti nonofo ai a lautolu i loto a Ierusalema; to eke foki a lautolu mo motu haku, to eke foki au mo Atua ha lautolu ke he fakamoli mo e tututonu.”​—Sakaria 8:7, 8.

21. Ke he puhala fe he mafola mua atu he tau tagata a Iehova kua tumau mo e fakalaulahi ai?

²¹ He 1996 ne talahau mo e nakai fakauaua a tautolu ko e tala mitaki kua fakamatala ai ke he lalolagi katoa, mai “he motu ne hake mai e la” ke he “motu ne to ai e la.” Kua moua ai e tau tutaki he tau tagata he tau motu oti, mo e kua kitia ai e lautolu e fakamoliaga ke he maveheaga a Iehova: “To fakaako e Iehova hau a fanau oti, ti lahi e [“mafola,” NW] he fanau hau.” (Isaia 54:13) Kua ha ha i ai ia tautolu e mafola ha kua fakaako e Iehova a tautolu. Ke he mena nei, ko e tau tohi hane tohi fakailoa ke molea e 300 he tau vagahau. Ke he tau kua mole hokoia, 21 e tau vagahau kua lafi ki ai. Ko e mekasini Kolo Toko kua tohia fakailoa ai mogonei kua moua katoa ai ke he 111 e tau vagahau, mo e Awake! ke he 54. Ko e tau fonoaga he motu mo e he lalolagi katoa kua foaki e fakatataaga he tau tagata he mafola he tau tagata he Atua. Ko e tau feleveiaaga fakafahi tapu kua fakalataha a tautolu mo e foaki e tau fakamaloloaga kua lata ke tumau e mauokafua. (Heperu 10:23-25) E, kua hane fakaako e Iehova e hana a tau tagata “ke he fakamoli mo e tututonu.” Kua foaki e ia e mafola ke he hana a tau tagata. Kua monuina ha a tautolu ke fai vala he mafola mua ue atu ia!

Maeke Nakai Ia Koe ke Fakamaama?

◻ Ke he vaha fou, kua maeke fefe a Iehova ke ‘fakamakutu mo e ita lahi’ ma e hana a tau tagata?

◻ Olioli fefe e tau tagata a Iehova ke he mafola, pihia foki ke he tau motu ne ha ha i ai e felakutaki?

◻ Ke he puhala fe ne ‘puke e tau tama tane mo e tau tama fifine ke he male’?

◻ Ko e heigoa e tau foakiaga kua taute ke maeke he tau tagata a Iehova ke fakaako e ia?

[Fakatino he lau 22, 23]

Ke he senetenari ke ono aki F.V.N., ko e tau Iutaia tua fakamoli ne liu talaga e faituga kua ako ko Iehova ni e punaaga falanaki hokoia he mafola?