“Kia Fakamalolo ke he Fakaalofa ke he Tau Tagata Kehe”

“Kia tufatufa ha mutolu a tau mena ke he tau tagata tapu kua nonofogati, kia fakamalolo ke he fakaalofa ke he tau tagata kehe.”​—ROMA 12:13.

1. Ko e heigoa e mena lahi he tagata kua manako, mo e fakakite fefe ai?

KE HIFO he puhala tu ogoogonoa he tuuta kaina nakai mahani he tuloto po ko e mena hagahagakelea he tau vaha nei. Ka e ko e mena ke tuga ni foki e fakatupetupeaga ka ha i ai he toloaga mo e nakai iloa ha tagata po ke kua mailoga ai. Moli lahi, ko e vala uho he tupuaga pauaki he tagata ke lata ke leveki ki ai, manako, mo e fakaalofa ki ai. Nakai fai tagata ne manako ke taute tuga e tagata kehe po ke tagata mai tua.

2. Ne foaki fefe e Iehova ma e ha tautolu a manako ke faihoani?

² Ko e Taute mo e Tufuga he tau mena oti kana, ko e Atua ko Iehova, kua mataala ai ke he manako he tagata ma e faihoani. Ha ko e Fakatokatoka he hana tufugatiaaga he tagata, tali mai he kamataaga ne iloa he Atua “kua nakai mitaki ke tokotaha e tagata,” ti fai mena ne taute e ia ki ai. (Kenese 2:18, 21, 22) Ko e fakamauaga he Tohi Tapu kua puke ai ke he tau fakafifitakiaga he tau gahua he mahani totonu ne fakakite e Iehova ke he tau tagata mo e he hana a tau fekafekau. Kua fakamalolo he mena nei a tautolu ke ako e puhala “kia fakamalolo ke he fakaalofa,” ke he olioli mo e fiafia he falu mo e ke he ha tautolu ni a makonaaga.​—Roma 12:13.

Fiafia ke he Tau Tagata Kehe

3. Fakamaama e kakano mua ue atu he fakaalofa ke he tau tagata kehe.

³ Ko e talahauaga “fakaalofa ke he tau tagata kehe” ne kua fakaaoga he Tohi Tapu kua fakaliliu mai he kupu Heleni phi·lo·xe·niʹa, ne kua taute mai he tau kupu kuku ua ne kakano “fakaalofa” mo e “tagata kehe.” Ti, ko e fakaalofa ke he tau tagata kehe kua matapatu kakano ko e “fiafia ke he tau tagata kehe.” Pete ia, ko e nakai ko e aga fa mahani anei po ke puhala he aga mitaki. Kua lauia ai e tau logonaaga he taha mo e tau fakaalofa hofihofi noa. Ko e kupu fakagahuahua phi·leʹo, hagaao ke he Exhaustive Concordance of the Bible ha James Strong, kua kakano ai “ke kapitiga ki ai (fiafia ai [ke he taha po ke mena]), fakatai ai ke ha ha ai e fakaalofa hofihofi ma e (tauteaga he matutakiaga fakatagata, ke eke mo manamanatuaga po ke logonaaga).” Ti, ko e fakaalofa ke he tau tagata kehe kua fano muatua ai ke he fakaalofa ne fakave ke he matapatu fakaakoaga, liga mai he manamanatuaga he matagahua po ke kotofaaga. Kua fa mahani ai ko e fakakiteaga he fiafia moli, fakaalofa hofihofi noa, mo e kapitiga.

4. Kia hai kua lata ke fakakite e fakaalofa ke he tau tagata kehe?

⁴ Ko ia ne moua e fiafia mo e fakaalofa hofihofi nei ko e “tagata kehe” (faka-Heleni, xeʹnos). Liga ko hai a ia nei? Ke liu foki, kua fakamaama mai he Concordance ha Strong e kupu xeʹnos ko e ‘kehe (kua kitia moli ai ko e mena kehe, po ke fakatai ko e mena nakai fa mahani); ne kua talahau ai ko e tagata uiina po ke (fehikiaki) ko e tagata kehe.’ Ti ko e fakaalofa ke he tau tagata kehe, tuga he fakakite mai he Tohi Tapu, kua maeke ke fakaata mai e mahani totonu ne fakakite ke he taha tagata ne fiafia a tautolu ki ai, po ke ke fakalaulahi atu foki ke he tagata kehe katoatoa. Ne fakamaama e Iesu: “Kaeke foki ke fakaalofa atu a mutolu kia lautolu ne fakaalofa mai kia mutolu, ko e heigoa kia e palepale kua moua e mutolu? Ka e nakai kia eke he tau telona e mena foki ia? Kaeke ke fakaalofa a mutolu ke he tau matakainaga ha mutolu hoko lautolu, ko heigoa kia e mena uho kua eke e mutolu? ka e nakai kia eke pihia he tau telona.” (Mataio 5:46, 47) Ko e fakaalofa ke he tau tagata kehe moli kua maeke ke kautu mai he feveheveheaki mo e onoono hifo ne fakave mai ha ko e fili tagata mo e matakutaku noa.

Iehova, ko e Leveki Mitaki Katoatoa

5, 6. (a) Ko e heigoa ne toka he manamanatuaga ha Iesu he talahau a ia, “Ha mutolu a Matua ha ha he lagi kua katoatoa hana a mahani mitaki”? (e) Kitia fefe e fakamokoi a Iehova?

⁵ He mole e tuhi ke he tau kukuaga he fakaalofa ne taute he tau tagata ke he taha mo e taha, tuga he fakakite mai i luga, ne lafi ki ai e Iesu e talahauaga nei: “Ko e hanai, kia katoatoa ha mutolu a mahani mitaki, ke tuga ha mutolu a Matua ha ha he lagi kua katoatoa hana a mahani mitaki.” (Mataio 5:48) Moli ai, kua mitaki katoatoa a Iehova ke he tau mena oti. (Teutaronome 32:4) Pete ia, ne fakamaama e Iesu taha e mena pauaki he mitaki katoatoa a Iehova, he kua talahau e ia fakamua: “Kua fakahake [he Atua e] la kia lautolu kua mahani kelea katoa mo lautolu kua mahani mitaki, kua fakato hifo foki e ia e uha kia lautolu kua tututonu katoa mo lautolu kua nakai tututonu.” (Mataio 5:45) He magaaho ka fakakite ai e mahani totonu, ne nakai fili a Iehova.

⁶ Ha ko e Tufuga, ko Iehova e pule he tau mena oti. “Ko e mena ha ha ia au e tau manu oti he vao motua, ko e tau manu kua totolo ke he tau mouga ko e afe ni. Kua iloa e au e tau manu lele oti ha he atu mouga; ko e tau manu he vao foki, ha ha ia au ia,” he talahau e Iehova. (Salamo 50:10, 11) Ka e, nakai fufu lotokai e ia ha mena taha. He hana a fakamokoi, ne foaki e ia ma e tau mena momoui oti. Ne talahau he salamo hagaao ki a Iehova: “Kua fakamafola e koe hāu a lima, mo e fakamakona e manako he tau mena momoui oti.”​—Salamo 145:16.

7. Ko e heigoa e puhala ne ako e tautolu mai he taute e Iehova ke he tau tagata kehe mo lautolu kua lata?

⁷ Ne foaki e Iehova ke he tau tagata e tau mena kua lata mo lautolu​—ti pihia ke he tau tagata ne nakai iloa a ia, ko e tau tagata kehe ki a ia. Kua fakamanatu e Paulo mo Panapa ke he tau tagata ne tapuaki tupua he maaga ko Luseta “kua nakai toka noa ai e ia [ko Iehova] ke nakai fai mena ke talahau ai a ia, he hana totonu mai, mo e foaki mai e tau uha mai he lagi kia tautolu, mo e tau tau ke tupu ai e tau fua, he fakamakona foki e ia, e tau loto ha tautolu ke he tau mena kai mo e fiafia.” (Gahua 14:17) Mua atu ki a lautolu ne kua lata, kua totonu mo e mahani fakamokoi a Iehova. (Teutaronome 10:17, 18) Kua lahi mahaki e mena ne maeke ke ako mai e tautolu ia Iehova he fakakite e mahani totonu mo e fakamokoi​—ke fakaalofa ke he tau tagata kehe—​ke he falu.

8. Fakakite fefe e Iehova e hana a fakamokoi he leveki ke he tau mena fakaagaga ha tautolu?

⁸ He lafi atu ke foaki mua ue atu ma e tau mena kua lata fakatino he tau mena momoui hana, ne leveki e Iehova ma e ha lautolu a tau mena kua lata ke he puhala fakaagaga. Ne gahua a Iehova ke he puhala kua mua atu e fakamoli ke he ha tautolu a levekiaga fakaagaga, ti pihia ato fai ia tautolu ke mailoga kua manako lahi moli a tautolu ke he tuaga fakaagaga. Ne totou e tautolu ia Roma 5:8, 10: “Kua fakakite mai he Atua hana fakaalofa kia tautolu he matulei a Keriso ke hukui aki a tautolu, ka ko e tau tagata hala agaia a tautolu. . . . Kaeke kua fakafeilo a tautolu mo e Atua ke he matulei he Tama hana, ka ko e tau fi a tautolu.” Ko e foakiaga ia ne maeke ai ma e tau tagata agahala ke o mai ke he fakafetuiaga fiafia he magafaoa mo e Matua ha tautolu he lagi. (Roma 8:20, 21) Ne kitia foki e Iehova ki ai kua foaki ki a tautolu e takitakiaga kua tonu mo e puhala ke maeke ia tautolu ke taute e moui kua kautu pete ni kua ha ia tautolu e tuaga agahala mo e nakai mitaki katoatoa.​—Salamo 119:105; 2 Timoteo 3:16.

9, 10. (a) Maeke he ha a tautolu ke talahau kua leveki mitaki katoatoa a Iehova? (e) Maeke fefe he tau tagata tapuaki moli ke fakafifitaki a Iehova ke he mena nei?

⁹ He kitekiteaga ke he mena nei, kua maeke ia tautolu ke talahau ko e leveki mitaki katoatoa moli a Iehova ke he tau puhala loga. Ne nakai fakaheu e ia a lautolu ne kua nonofogati, tu tokolalo, mo e mahani tokolalo. Ne fakakite e ia e fiafia moli ki ai mo e manamanatuaga ma e tau tagata kehe, ti pihia ke he hana a tau fi, ti nakai kumi a ia ma e ha palepale. He tau mena oti nei, nakai kia ko ia e fakafifitakiaga kua mua atu he leveki mitaki katoatoa?

¹⁰ Ha ko e Atua he fakaalofa totonu mo e fakamokoi pihia, ne manako a Iehova ke he hana a tau tagata tapuaki ke fifitaki a ia. He Tohi Tapu katoa, kua kitia e tautolu e tau fakafifitakiaga kehe lahi he mahani totonu nei. Ne talahau he Encyclopaedia Judaica ko e “i Isaraela i tuai, ko e fakaalofa ke he tau tagata kehe kua nakai ko e mena fakauaua noa he tau mahani mitaki, ka e ko e fakaveaga he mahani mitaki . . . Ko e aga fa mahani faka-Tohi Tapu he fakafeleveia e tagata fenoga mategugu mo e he tamai e tagata kehe ke he hana a fakalatahaaga ko e fakatokatokaaga mai he fakaalofa ke he tau tagata kehe mo e tau mena fakafetui oti ne ha ha ai ne kua tupu ke he mahani tonu-mitaki kua mua atu e uho he aga fakamotu Iutaia.” Kua mua atu mai he matahigoa he ha motu po ke ha matakau pauaki, ko e fakaalofa ke he tau tagata kehe kua lata ke eke mo mahani pauaki he tau tagata tapuaki moli oti ha Iehova.

Ko e Leveki ke he Tau Agelu

11. Ko e heigoa e fakafifitakiaga kehe lahi ne tamai ai he fakaalofa ke he tau tagata kehe e tau monuina nakai amaamanaki ki ai? (Kikite foki e Kenese 19:1-3; Tau Fakafili 13:11-16.)

¹¹ Ko e taha he tau fakamauaga mua ue atu e talahaua he Tohi Tapu hagaao ki a Aperahamo mo Sara he magaaho ne api a laua he tau aluna a Mamere, ne tata atu ki Heperona. (Kenese 18:1-10; 23:19) Ne nakai fakauaua ai e aposetolo ko Paulo he tokaloto ai e mena tupu nei he magaaho ne foaki e ia e fakamafanaaga nei: “Aua neke nimo ia mutolu ke fakaalofa age ke he tau tagata kehe; ha ko e mena ia kua talia aki he falu e tau agelu mo e nakai iloa.” (Heperu 13:2) He fakaako ai ke he fakamauaga nei ka lagomatai a tautolu ke kitia e fakaalofa ke he tau tagata kehe nakai ko e mena he aga fa mahani po ke he feakiaga. Ka e, ko e aga he mahani Atua ne tamai e tau fakamonuinaaga mua ue atu.

12. Fakatata fefe e Aperahamo e hana a fakaalofa ke he tau tagata kehe?

¹² Ne fakakite mai he Kenese 18:1, 2 ko e tau tagata ahi mai kua nakai iloa mo e nakai amaamanaki ki ai a Aperahamo, ke tuga ke talahau ko e tau tagata kehe tokotolu ne o mai ke o ke he taha mena. Ko e aga fa mahani he tau Fahi Uta, hagaao ke he falu he tau tagata talahau tala, ko e tagata fano fenoga ke he motu kehe kua ha ha ai e tonu ke amanaki ke he fakaalofa ke he tau tagata kehe pete ni kaeke kua nakai iloa e ia ha tagata i ai. Ka e nakai leo a Aperahamo ke he tau tagata kehe ke fakagahua e tonuhia ha lautolu; ne fakaaoga e ia e lotomatala. Ne “poi atu ai a ia” ke fonofono e tau tagata kehe nei ne mamao mai ia ia​—ko e mena oti nei ke he “magaaho la,” mo e kua 99 e tau tau he moui ha Aperahamo! Nakai kia fakakite he mena nei e fakamoliaga a Paulo ki a Aperahamo ke eke ai mo fakafifitakiaga ma tautolu? Ko e kakano haia he fakaalofa ke he tau tagata kehe, ko e fiafia po ke fakaalofa he tau tagata kehe, ko e manamanatu ma e tau manako ha lautolu. Ko e mahani kua mitaki.

13. Ko e ha ne “fakaveli fakafohifo” ai a Aperahamo ke he tau tagata ne ahi atu?

¹³ Kua talahau foki he fakamauaga ki a tautolu he mole atu e feleveia mo e tau tagata kehe, “ti fakaveli fakafohifo ai a [Aperahamo] ke he kelekele.” Fakaveli ke he tau tagata kehe ne nakai iloa? Ko e fakaveli, tuga ne taute e Aperahamo, ko e puhala ke fakafeleveia aki e tagata uiina lilifu po ke taha he tuaga tokoluga, nakai ke fio mo e taute he tapuaki ki ai, ne kua toka ai ma e Atua. (Gahua 10:25, 26; Fakakiteaga 19:10.) He fakaveli, nakai ni ke fakalifa hifo he ulu ka e ko e fakaveli “ke he kelekele,” kua tuku age ai e Aperahamo ke he tau tagata kehe nei e lilifu ko e mena aoga. Ko ia ko e ulu he magafaoa lahi mo e monuina ne tupuna mai i tuai, ka e onoono a ia ke he tau tagata kehe nei ke uho mai ia ia. Ko e kehe ha ia e mena nei mai he tuaha aga fa mahani he tau tagata kehe, he aga leo ke kitia! Kua fakatata moli e Aperahamo e kakano he talahauaga: “Kia takitokotaha mo e mua ke tuku atu e lilifu ke he falu.”​—Roma 12:10.

14. Ko e heigoa e gahua malolo mo e poa kua putoia ai he fakakite e Aperahamo e fakaalofa ke he tau tagata kehe?

¹⁴ Ko e vala ne toe he fakamauaga kua fakakite e moli he tau logonaaga a Aperahamo. Kua mua atu e mitaki he mena kai. Ti pihia ke he magafaoa lahi ne ha ha ai e loga he fuifui manu, ko e “punua povi, kua mukamuka mo e mitaki” na nakai ko e kai fa mahani ke he tau aho oti. Hagaao ke he tau aga fa mahani malolo he matakavi ia, ne fakakite he Daily Bible Illustrations ha John Kitto: “Ko e tau fakafiafiaaga kua nakai molea atu ato kehe ai ni ke he falu he tau kaiaga galue, po ke hoko mai he tagata kehe; ti ko e tau magaaho pihia ni ka tao ai e manu ke kai, ti pihia mo e tau tagata ne loga e tau fuifui manu mo e tau manu kehekehe.” Nakai fakaata he matagi vela e tau mena kai ke toka leva, ti ke maeke ke taute aki e tau kai pihia, ko e tau mena oti kua lata ai ke taute ai he magaaho ia ni. Ati ko e mena ia ni he fakamauaga ku nei, ko e kupu “fakaave” po ke “alumaki” kua kitia ai ke laga tolu, mo e “poi” moli ai a Aperahamo ke taute e kai!​—Kenese 18:6-8.

15. Ko e heigoa e onoonoaga kua tonu he tau foakiaga fakatino ne fakakite e fakaalofa ke he tau tagata kehe, ne kua fakafifitaki mai e Aperahamo?

¹⁵ Ko e kakano, ti pihia ai, nakai ko e taute he galue lahi ke nava mai e taha tagata. Pete ni he taute e Aperahamo mo Sara e tau gahua oti ia ke tauteute mo e fakatoka e kai, ka e mailoga la e mena ne fakakite e Aperahamo fakamua ki ai: “Ato ta mai e taha magavai ke holoholo aki ha mutolu a tau hui, mo e okioki a mutolu ki lalo he akau. To tamai foki e au taha mena kai, mo e okioki a mutolu to o ai a mutolu; ha ko e mena ia kua o mai ai a mutolu ke he fekafekau ha mutolu.” (Kenese 18:4, 5) Ko e “taha mena kai” ia kua liliu ai ke he kaiaga lahi he povi gako fakalataha mo e areto pukupuku mai he falaoa mata mitaki, pata, mo e huhu​—ko e galue kua lata ai mo e patuiki. Ko e heigoa e fakaakoaga? He magaaho ka fakakite e fakaalofa ke he tau tagata kehe, ko e mena ne aoga, po ke mena ke pehi, nakai ko e tau uka he tau mena kai mo e tau mena inu, po ke mitaki fefe e fakafiafiaaga ka taute, mo e falu mena atu foki. Nakai falanaki e fakaalofa ke he tau tagata kehe ke he maeke he taha ke fakatau e tau mena tau uka. Ka e, kua fakave ai ke he manamanatuaga moli he levekiaga he falu mo e manako ke taute e mitaki ke he falu ke he mena kua fahia ki ai e taha. “Kua mua e mitaki e tufaaga he tau lakau kai, ne age mo e fakaalofa, ke he povi mai he fale povi ne age mo e fakavihia,” he talahau he fakatai he Tohi Tapu, mo e kua fakatoka i ai e kei ke he fakaalofa ke he tau tagata kehe moli.​—Tau Fakatai 15:17.

16. Fakakite fefe e Aperahamo e loto fakaaue ma e tau mena fakaagaga ke he mena ne taute e ia ma e tau tagata ahi atu?

¹⁶ Kia mailoga e tautolu, kua ha ha ai foki e kakano mua atu fakaagaga ke he mena tupu katoa. Ke he taha kakano ni, kua iloa ai foki a Aperahamo ko e tau tagata ahi nei ko e tau uta vagahau mai ia Iehova. Kua fakakite e mena nei he talahau ki a lautolu aki e tau kupu: “Ko e Iki na e, kaeke kua ofania mai nai e koe au, aua neke fano leva a koe ia au ko e hau a fekafekau.”a (Kenese 18:3; fakatatai Esoto 33:20.) Nakai iloa tuai e Aperahamo kaeke ko e fekau ha laua ma hana po ke ko e o a laua ke he taha mena. Pete ia, kua loto fakaaue a ia ha kua fakahoko ai e gahuahuaaga he finagalo a Iehova. Ko lautolu nei kua fakalataha ai ke he misoni mai ia Iehova. Ane taute e ia e taha mena ke kauauloa ke he mena ia, to eke ai mo fiafiaaga hana. Kua mailoga e ia ko e tau fekafekau a Iehova kua lata ai mo e mitaki mua ue atu, mo e to foaki e ia e mena kua mitaki mua ue atu ke he tau tutuaga ia. He taute ai pihia, to ha ha i ai e tau fakamonuinaaga fakaagaga, ke lata mo ia ni po ke taha tagata kehe. Ati ko e fua, ne fakamonuina lahi ai a Aperahamo mo Sara ha ko e ha laua a fakaalofa ke he tau tagata kehe moli.​—Kenese 18:9-15; 21:1, 2.

Ko e Tau Tagata Fakaalofa ke he Tau Tagata Kehe

17. Ko e heigoa ne manako a Iehova mai he tau Isaraela hagaao ke he tau tagata kehe mo lautolu ne nonofogati kua ha ha ai mo lautolu?

¹⁷ Ko e fakafifitakiaga kehe lahi ha Aperahamo kua nakai maeke ke galo ai he motu ne tupu mai a ia. Ko e Matafakatufono ne age e Iehova ke he tau Isaraela kua putoia e tau foakiaga ke fakakite e fakaalofa ke he tau tagata kehe ne ha ha mo lautolu. “Ko e tagata kehe ka nofo ia mutolu, tuga ne tagata kua fanau ke he motu a ia, ti fakaalofa atu a koe kia ia tuga na koe kia koe ni; ha ko e tau tagata paea a mutolu ke he motu ko Aikupito; ko au ko Iehova ko e ha mutolu a Atua.” (Levitika 19:34) Ko e tau tagata ne kua lata ke foaki e levekiaga pauaki ki a lautolu haia ne lata mo e lagomatai fakatino mo e nakai tiaki noa a lautolu. He magaaho ne fakamonuina e Iehova a lautolu aki e loga he tau heleheleaga, he mogo ne olioli a lautolu ke he ha lautolu a tau galue, he magaaho ne okioki mai a lautolu mai he tau gahua ha lautolu he tau tau Sapati, mo e ke he falu a tau magaaho foki, kua lata ke manatu ai he tau tagata a lautolu ne nakai monuina​—ko e tau takape, tau fanau ne nakai fai mamatua, mo e tau tagata motu kehe ne nonofo ai he motu.​—Teutaronome 16:9-14; 24:19-21; 26:12, 13.

18. Aoga fefe e fakaalofa ke he tau tagata kehe he fakatatai ke he mouaaga he fiafia mo e monuina a Iehova?

¹⁸ Ko e aoga he mahani totonu, fakamokoi, mo e fakaalofa ke he tau tagata kehe ke he falu, mua atu ki a lautolu ne kua lata, kua maeke ke kitia ai he puhala ne fehagai a Iehova mo e tau Isaraela he magaaho ne tiaki e lautolu ke fakagahuahua e tau mahani nei. Kua talahau fakamahino e Iehova ko e mahani totonu mo e fakamokoi ke he tau tagata kehe mo lautolu ne kua lata kua ha ha ai ke he tau poakiaga ma e hana a tau tagata ke moua e hana a tau fakamonuinaaga tumau. (Salamo 82:2, 3; Isaia 1:17; Ieremia 7:5-7; Esekielu 22:7; Sakaria 7:9-11) He magaaho ne fakamakamaka e motu ke omaoma e tau mena nei mo e falu a tau poakiaga, kua fua loga a lautolu mo e kua olioli ai ke he tau koloa tino mo e fakaagaga loga. He magaaho ne lavelave a lautolu ke he tau koloa lotokai fakatagata mo e tiaki ke fakakite e tau mahani totonu nei ki a lautolu ne kua lata, kua moua e lautolu e vihiatiaaga a Iehova, mo e he magaaho fakamui ko e fakafiliaga lahi kua liligi hifo ki a lautolu.​—Teutaronome 27:19; 28:15, 45.

19. Ko e heigoa kua lata ke manamanatu atu a tautolu ki ai?

¹⁹ Kua aoga ha ia mogoia, ma tautolu ke kumikumi e tautolu a tautolu mo e kitia kaeke kua momoui a tautolu ke he tau amaamanakiaga a Iehova ke he mena nei! Kua mua atu e mena nei ke he vaha nei he onoonoaga he agaaga lotokai mo e feveheveheaki he lalolagi. Maeke fefe a tautolu ke fakakite e fakaalofa ke he tau tagata kehe Kerisiano i loto he lalolagi mavehevehe? Ko e tala a ia ka fakatutala ki ai he vala tala ka hau.

[Matahui Tala]

Manatu Nakai e Koe?

◻ Ko e heigoa e kakano he Tohi Tapu he talahauaga ne liliu “fakaalofa ke he tau tagata kehe”?

◻ Ke he tau puhala fe ko Iehova e fakafifitakiaga mitaki katoatoa he fakakite e fakaalofa ke he tau tagata kehe?

◻ Fefe e laulahi atu he fakaalofa ke he tau tagata kehe a Aperahamo?

◻ Ko e ha e tau tagata tapuaki moli oti ne kua “fakamalolo ke he fakaalofa ke he tau tagata kehe”?