Kua Fakaako ke Taute e Finagalo ha Iehova
“Kia fakaako mai e koe au ke eke hāu a finagalo; ha ko koe ni ko e haku a Atua.”—SALAMO 143:10.
1, 2. (a) Kua lata a tautolu ke fakaako he magaaho fe, mo e ko e heigoa e kitekiteaga moli? (e) Ko e ha e fakaako e Iehova kua mua e aoga?
HE TAU aho oti kua moui ai e tagata mo e gahuahua, ti kua lata ke fakaako ki a ia e tau mena aoga. Kua moli e mena ia ki a koe, mo e moli pihia foki he falu. Ka e ko e heigoa ka tupu ka mate ai? Kua nakai fakai ke fakaako ha mena po ke iloa mena he tuaga ia. Kua talahau fakamaaliali mai he Tohi Tapu ko e tau tagata mamate kua “nakai iloa e lautolu ha mena.” Kua nakai fai manamanatu ai i Seoli, ko e tukuaga he tau tagata. (Fakamatalaaga 9:5, 10) Kua kakano ka e mena nei ko e ha tautolu a fakaako, fakatolomaki he iloilo, kua teao tuai? Kua falanaki e naia ke he mena ne fakaako e tautolu mo e ke he puhala ne fakaaoga e tautolu e iloilo ia.
2 Kaeke kua fakaako a tautolu ke he tau mena fakalalolagi ni hokoia, kua nakai ha ha i ai e tukulagi he vaha anoiha ha tautolu. Kua fiafia ai, mogoia, ko e tau miliona he tau tagata he tau motu oti kua fakaako ai e finagalo faka-Atua fakalataha mo e amaamanakiaga ke moui tukulagi. Ko e fakaveaga he amaamanakiaga nei kua falanaki ke he fakaakoaga mai ia Iehova, ko e Punaaga he iloilo foaki moui.—Salamo 94:9-12.
3. (a) Ko e ha kua maeke ai ke talahau ko Iesu ko e tagata fakaako fakamua he Atua? (e) Ko e heigoa e fakamoliaga ne ha ha ia tautolu ko e to fakaako e Iehova e tau tagata, mo e ko e heigoa e fua?
3 Ko e Tama fuataha he Atua, ko e tagata Hana ne fakaako fakamua, kua fakaako ke taute e finagalo he hana a Matua. (Tau Fakatai 8:22-30; Ioane 8:28) Ati, fakakite ai e Iesu to fakaako he hana Matua e tau hogofulu afe he tau tagata. Ko e heigoa e tau amanakiaga ki a tautolu ne fakaako mai he Atua? Ne talahau e Iesu: “Kua tohi he tau perofeta, To fakaako he Atua a lautolu oti kana. Hanai, ko lautolu oti ne fanogonogo ke he Matua, mo e ako ai, to o mai a lautolu kia au . . . Ko e moli, ko e moli, ke tala atu e au kia mutolu, ko ia ne tua mai kia au, kua moua e ia e moui tukulagi.”—Ioane 6:45-47.
4. Kua lauia fefe e tau miliona he tau tagata he fakaakoaga faka-Atua, mo e ko e heigoa e tau amanakiaga ne ha ha ai ia lautolu?
4 Kua fatiaki mai a Iesu he Isaia 54:13, ne kua hagaao atu ke he fifine fakatai he Atua, ko e Siona he lagi. Ko e perofetaaga ia kua hagaao fakatonu atu ke he hana a tau tama tane, ko e tau tutaki fakauku he agaga ne 144,000 ha Iesu Keriso. Ko e tau tagata ne toe mai ia lautolu ia ko e tau tama tane fakaagaga kua gahuahua he vaha nei, ne hane fa e foafoa e polokalama fakaakoaga he lalolagi katoa. Ti ko e fua, ko e tau miliona he falu ne ha ha he “moto tagata tokologa” kua lagomatai foki he fakaako e Iehova. Kua ha ha ai ia lautolu e amanakiaga kehe mua atu he fakaakoaga ne kua noa mo e fakalavelaveaga he mate. Kua fefe e mena ia? E, kua ha ha ai a lautolu ke hao mai he “matematekelea lahi” mo e ke olioli e moui tukulagi he lalolagi parataiso.—Fakakiteaga 7:9, 10, 13-17.
Ko e Peehiaga Mua Atu ke Taute e Finagalo he Atua
5. (a) Ko e heigoa e lauga he tau he 1997? (e) Kua lata ke fefe e logonaaga ha tautolu he o atu ke he tau feleveiaaga Kerisiano?
5 He magahala he 1997, i loto he molea e 80,000 he tau fakapotopotoaga he lalolagi katoa, to tokaloto he Tau Fakamoli a Iehova e tau kupu hafagi he Salamo 143:10: “Kia fakaako mai e koe au ke eke hāu a finagalo.” Ko e lauga he tau a ia ma e 1997. Ko e tau kupu ia, kua fakatata ke kitia tumau he tau Fale he Kautu, to eke ai mo fakamanatu ko e kavi ke moua e fakaakoaga faka-Atua kua ha ha he tau feleveiaaga he fakapotopotoaga, ko e kavi ka fakalataha atu a tautolu ke he polokalama he hatakiaga. He magaaho ka fakalataha mo e ha tautolu a tau matakainaga he tau feleveiaaga ke fakaako he ha tautolu a Faiaoga Homo Ue Atu, kua maeke a tautolu ke logona hifo tuga e salamo, ne tohia: “Ne fiafia au he pehe mai a lautolu kia au, Kia o a tautolu ke he fale a Iehova.”—Salamo 122:1; Isaia 30:20.
6. He tau kupu ha Tavita, ko e heigoa kua fakailoa e tautolu?
6 E, kua manako a tautolu ke fakaako ke taute e finagalo he Atua nakai ko e finagalo he ha tautolu a fi ko e Tiapolo po ke finagalo he tau tagata nakai mitaki katoatoa. Ti, ke tuga a Tavita, kua fakailoa e tautolu e Atua ne tapuaki mo e fekafekau a tautolu ki ai: “Ha ko koe ni ko e haku a Atua; kia takitaki au he hāu a Agaga mitaki ke he kelekele molemole.” (Salamo 143:10) He nakai manako ke fio auloa mo e tau tagata nakai fakamoli, kua manako a Tavita ke ha ha he mena ne taute ai e tapuakiaga ha Iehova. (Salamo 26:4-6) Mo e agaga he Atua ke fakahakohako hana a tau lakaaga, kua maeke ia Tavita ke fano he tau puhala tututonu.—Salamo 17:5; 23:3.
7. Kua gahuahua fefe e agaga he Atua i luga he fakapotopotoaga Kerisiano?
7 Ko e Tavita Mua Ue Atu, ko Iesu Keriso, ne fakamafanatia ke he tau aposetolo to fakaako he agaga tapu a lautolu ke taute e tau mena oti mo e liu fakamanatu ki a lautolu e tau mena oti ne tala age e ia ki a lautolu. (Ioane 14:26) Tali mai he Penetekoso, kua tumau a Iehova ke fakakite “e tau mena hokulo ia he Atua” ne toka ai hana Kupu tohia. (1 Korinito 2:10-13) Kua taute e ia e mena nei mai he puhala kitia mata ne fakahigoa e Iesu ko e “fekafekau fakamoli mo e loto matala.” Kua foaki mai ai e tau mena kai fakaagaga ne kua fioia ai he polokalama fakaakoaga ma e tau fakapotopotoaga he tau tagata he Atua he lalolagi katoa.—Mataio 24:45-47.
Kua Fakaako e Finagalo he Atua he Tau Feleveiaaga ha Tautolu
8. Ko e ha e fakalataha ke he Fakaakoaga he Kolo Toko kua mua atu e aoga?
8 Ko e vala he Fakaakoaga Kolo Toko he tau fahi tapu kua fa hagaao ke he fakaaogaaga he tau matapatu fakaakoaga he Tohi Tapu. Kua lagomatai moli he mena nei a tautolu ke fahia ke he tau tupetupeaga he moui. He falu he tau fakaakoaga kua fioia ai e tau kupu moli mitaki lahi po ke tau perofetaaga he Tohi Tapu. Kua lahi ha e mena ne fakaako mai ki a tautolu he tau fakaakoaga ia! He tau motu loga kua puke lahi e tau Fale he Kautu ha ko e tau feleveiaaga nei. Ka e he falu numera he tau motu, kua to hifo e o ke he tau feleveiaaga. Ko e ha, he manatu e koe? Liga kia, ha kua fakaata he falu e gahua tupe ke fakalavelave aki ha lautolu a fakapotopoto tumau “ke fakalagalaga ai e fakaalofa mo e tau gahua mitaki”? Po ke kua loga e tau matahola ne fakamole ke he tau gahua fakafiafia po ke he kitekite televisoni, ti kua lavelave lahi e setulu ke o atu ke he tau feleveiaaga oti? Kia liu manatu e tomatomaaga mai he agaga he Heperu 10:23-25. Nakai kia kua mua atu e aoga ke fakapotopoto auloa ma e hatakiaga faka-Atua he mogonei he ‘kitia ai e tautolu kua tata tuai e aho’?
9. (a) Kua maeke fefe he Feleveiaaga Fekafekau ke mau tauteute a tautolu ma e fekafekauaga? (e) Ko e heigoa e aga ha tautolu hagaao ke he fakamatalaaga?
9 Taha he ha tautolu a tau matagahua ne mua ko e eke mo tau fekafekau he Atua. Kua talaga e Feleveiaaga Fekafekau ke fakaako aki a tautolu ke he puhala ka maeke ia tautolu ke fakakatoatoa fakamitaki e mena nei. Kua ako e tautolu e puhala ke tutala ke he tau tagata, tau mena ke talahau, ko e mena ke taute he magaaho ka fiafia mai, mo e mena foki ke taute he magaaho ka nakai talia he tau tagata e fekau ha tautolu. (Luka 10:1-11) Ha kua fa fetutalaaki mo e fakatata e tau puhala mitaki lahi he tau feleveiaaga nei he tau fahi tapu, kua mau tauteute mitaki a tautolu ke hokotia ke he tau tagata nakai ni he magaaho ka o he taha fale ke he taha fale ka e pihia foki he magaaho ka fakamatala he tau puhala tu, he tau mena paaka motoka, he tau peleoafi ma e tau tagata, he tau male vakalele, he tau gahuaaga pisinisi, po ke he tau aoga. Ke felautatai mo e ha tautolu a ole, “Kia fakaako mai e koe au ke eke hāu a finagalo,” to manako a tautolu ke fakaaoga e tau magaaho oti ke taute tuga ne tala mai he ha tautolu a Iki: ‘Kia kikila atu ha mutolu a maama ki mua he tau tagata, ati fakaheke atu ai a lautolu ke he Matua ha mutolu ha ha he lagi.’—Mataio 5:16.
10. Maeke fefe a tautolu ke lagomatai a ‘lautolu kua lata’?
10 He tau feleveiaaga he fakapotopotoaga pihia, kua fakaako foki a tautolu ke taute e tau tutaki he falu. Ti, ka moua ai e fiafia po ke toka hifo e tohi, ko e foliaga ha tautolu he magaaho ka taute e tau liliu ahi atu ko e kamata e tau fakaakoaga Tohi Tapu. Ko e kakano, kua teitei tatai e mena nei ke he tau tutaki ne ‘nonofo mo lautolu kua lata’ ke fakaako ai a lautolu ke he tau mena ne poaki e Iesu. (Mataio 10:11; 28:19, 20) He ha ha i ai e tau lagomatai homo ue atu, tuga e tohi Iloilo ne Takitaki Atu ke he Moui Tukulagi, kua mautali moli a tautolu ke taute katoatoa ha tautolu a fekafekauaga. (2 Timoteo 4:5) He tau fahi tapu takitaha he fina atu a koe ke he Feleveiaaga Fekafekau mo e Aoga Fekafekau Fakateokarasi, kia lali ke moua mo e fakaaoga foki e tau fakaakoaga lagomatai ka taute a koe mo taha he tau fekafekau kua lata he Atua, he taute hana a finagalo.—2 Korinito 3:3, 5; 4:1, 2.
11. Kua fakatata fefe he falu e tua ke he tau kupu ne moua he Mataio 6:33?
11 Ko e finagalo he Atua a ia ke ‘kumikumi fakamua e tautolu e kautu mo e hana tututonu.’ (Mataio 6:33) Kia huhu hifo ki a koe ni, ‘Maeke fefe ia au ke fakagahuahua e matapatu fakaakoaga nei kaeke ke fakalavelave mai e tau poakiaga he gahua haku [po ke he hoa haku] mo e fina atu ke he feleveiaaga?’ Tokologa a lautolu ne motua fakaagaga ka taute e lakaaga ke vagahau ke he ha lautolu a tau takitaki gahua hagaao ke he lekua ia. Taha e fekafekau gahua mau ne fakailoa ke he hana takitaki gahua e manako hana ke fai magaaho ke fina atu ke he tau feleveiaaga he fakapotopotoaga he tau fahi tapu takitaha. Kua talia e ia e ole. Ka e kua fia iloa ai hagaao ke he mena ne taute he tau feleveiaaga, ne ole a ia ke fano. Ko e he naia ne logona e ia e fakailoaaga hagaao ke he fonoaga fahi motu ka hoko. Ko e mena ne tupu, kua tauteute e takitaki gahua ke ha ha ke he fonoaga katoa. Ko e heigoa e fakaakoaga ne moua e koe mai he fakafifitakiaga nei?
Kua Fakaako he Tau Mamatua Mahani-Atua e Finagalo ha Iehova
12. Ma e fanau ke fakaako ki ai e finagalo ha Iehova, ko e heigoa kua lata ke taute he tau mamatua Kerisiano mo e fakauka mo e fakamalolo?
12 Ka e ko e tau feleveiaaga mo e tau fonoaga, nakai ni ko e foakiaga hokoia ke fakaako ke taute e finagalo faka-Atua. Kua poaki ke he tau mamatua mahani Atua ke fakamahani, akonaki, mo e feaki e fanau ha lautolu ke fakaheke a Iehova mo e taute hana a finagalo. (Salamo 148:12, 13; Tau Fakatai 22:6, 15) Ke taute pihia kua lata ai ia tautolu ke uta ha tautolu a “tau tama ikiiki” ke he tau feleveiaaga ko e mena ke ‘fanogonogo mo e ako’ ai a lautolu, ka e kua he fakaako a lautolu mai he tau tohiaga tapu he kaina? (Teutaronome 31:12; 2 Timoteo 3:15) Tokologa he tau magafaoa ne kamata ke taute e tau polokalama he fakaakoaga Tohi Tapu fakamagafaoa, ke nakai ni leva ti fakagalogalo ai po ke tiaki noa. Kua tupu nakai e mena ia kia koe? To fakahiku nakai a koe ko e fifiliaga ke taute tumau e fakaakoaga pihia kua nakai hako po ke kua kehe lahi e magafaoa hau ti kua nakai fai aoga ki a koe? Pete ni ko e heigoa e tuaga, kia kikite atu a mutolu ma tau mamatua ke he tau vala tala “Ha Tautolu a Tau Tufaaga Monuina Fakaagaga” mo e “Ko e Tau Palepale he Fakaukaaga” i loto he The Watchtower ia Aokuso 1, 1995.
13. Maeke fefe e magafaoa ke lagomatai mai he fioia e matakupu he aho?
13 Kua fakamalolo e tau magafaoa ke fakamahani ke fioia e matakupu he aho mai he Examining the Scriptures Daily. Kua mitaki ke totou e matakupu mo e tau fakailoaaga, ka e ke fetutalaaki ke he matakupu mo e fakagahuahua ai kua mua atu e aoga. Ke fakatai ki ai, kaeke ke fioia e Efeso 5:15-17, kua lata a lautolu he magafaoa ke manamanatu ke he puhala ke ‘fakaaoga e tau aho he mouiaga nei’ ma e fakaakoaga fakatagata, ke fakalataha ke he falu he tau puhala he fekafekau gahua mau, mo e ke leveki e falu he tau kotofaaga fakateokarasi. E, ko e fakatutalaaga fakamagafaoa ke he matakupu he aho ka takitaki e taha po ke tokologa ke fakaholo atu ke “iloa [katoatoa] e finagalo he Iki.”
14. Kua lata e tau mamatua ke tuga e tau faiaoga fefe he fakakite mai he Teutaronome 6:6, 7, ti ui ai ma e heigoa?
14 Kua lata e tau mamatua ke eke mo tau faiaoga mua e makutu ke he ha lautolu a fanau. (Teutaronome 6:6, 7) Ka e nakai ni koenaia ke akonaki po ke poaki age ke he ha lautolu a fanau. Kua lata foki e matua tane mo e matua fifine ke fanogonogo, ko e taute pihia ka iloa mitaki ai e tau mena ne kua lata ke fakamaama, fakamahinohino, fakatata, po ke liu fatiaki. He taha magafaoa Kerisiano, kua fakaohooho he tau mamatua e matutakiaga he fakamalolo age ke he ha laua fanau ke huhu e tau huhu hagaao ke he tau mena ne nakai maama po ke kua fakatupu e tuahaaga. Ati iloa ai e laua kua uka he tama tane fuata ke maama ko e nakai fai kamataaga a Iehova. Kua maeke ai e tau mamatua ke fakaaoga e tau fakailoaaga mai he tau tohi he Sosaiete he Kolo Toko ne fakakite ko e magaaho mo e vaha kua talia ke nakai fai fakaotiaga. Kua moua ai e tali, ati fakamakona ai he mena ia e tama tane ha laua. Ti kia taute taha magaaho ke tali fakamitaki mai he tau Tohiaga Tapu e tau huhu he hau fanau, lagomatai a lautolu ke kitia ko e ako ke taute e finagalo he Atua ko e mena mua atu e makona. Ko e heigoa foki he tau tagata he Atua—tau fuata mo e tau momotua—kua fakaako he vaha nei?
Kua Fakaako ke Fakaalofa mo e ke Tau
15. Liga to kamatamata he magaaho fe ha tautolu a moli he fakaalofa fakamatakainaga?
15 Ke felautatai mo e poakiaga fou ha Iesu, ko tautolu kua ‘ako tuai he Atua ke feofanaki.’ (1 Tesalonia 4:9) He magaaho ka milino mo e fuafua mitaki e tau mena, liga kua logona hifo e tautolu e fakaalofa ha tautolu ke he tau matakainaga oti pito. Ka e kua he magaaho ka kitia ai e tau kehekeheaga fakatagata po ke hukia a tautolu ha ko e mena ne talahau po ke taute he taha Kerisiano? He magaaho nei liga kua kamatamata ai e fakaalofa moli ha tautolu. (Fakatatai 2 Korinito 8:8.) Ko e heigoa kua fakaako he Tohi Tapu a tautolu ke taute he tau magaaho pihia? Taha mena ko e ukufeke ke fakakite e fakaalofa ke he kakano katoatoa. (1 Peteru 4:8) He nakai kumi ha tautolu ni a fiafia, hauhaua ha ko e tau mena ikiiki, po ke talahaua e kelea ke he taha, kua lata ia tautolu ke gahua ke toka e fakaalofa ke ufitia e tau agahala loga. (1 Korinito 13:5) Kua iloa e tautolu ko e finagalo he Atua anei, ha ko e mena ia ne fakaako mai he hana a Kupu.
16. (a) Ko e faga felakutaki fe ne fakaako e tau Kerisiano ke fakalataha ki ai? (e) Kua mau tauteute fefe a tautolu?
16 Pete ni he nakai fakalataha he tokologa e fakaalofa mo e felakutaki, ko e mena fakamui ko e taha mena kehe ne fakaako a tautolu ki ai, ka e ko e faga felakutaki kehe. Kua mailoga e Tavita hana falanakiaga ki a Iehova ke fakaako ki a ia e puhala he felakutaki, pete ni kua putoia e mena ia ke he tauaga moli ke he tau fi a Isaraela he vaha hana. (1 Samuela 17:45-51; 19:8; 1 Tau Patuiki 5:3; Salamo 144:1) Ka e kua e tau ha tautolu he vaha nei? Ko e ha tautolu a tau kanavaakau nakai ko e tau mena he tino. (2 Korinito 10:4) Ko e ha tautolu ko e tau fakaagaga, ne kua lata ia tautolu ke mau tauteute he tui e tapulu tau fakaagaga. (Efeso 6:10-13) Puhala mai he hana Kupu mo e hana tau tagata fakapotopoto, kua fakaako e Iehova a tautolu ke tau e tau fakaagaga mo e kautu.
17. (a) Ko e heigoa e tau lagatau ne fakaaoga he Tiapolo ke fakalavelave aki a tautolu? (e) Ko e heigoa kua lata ia tautolu ke fakapulotu ke puipui mai ai?
17 Ke he tau puhala fakahehe mo e fakavaia, kua fa fakaaoga he Tiapolo e tau mena fakalalolagi, tau tagata tiaki taofiaga, mo e falu ne totoko ke he kupu moli he lali ke fakalavelave a tautolu ke he tau mena he vao. (1 Timoteo 6:3-5, 11; Tito 3:9-11) Kua tuga e kitia e ia kua nakai kautu lahi e hana laliaga ke fakahehe a tautolu he tuhi fakatonu mai e ekefakakelea, ti kua lali a ia ke fakaveli a tautolu he taute a tautolu ke talahau ha tautolu a tau feguguaki mo e tau huhu goagoa, ne noa mo e tau mena fakaagaga. Ke tuga e tau toa mataala, kua lata ia tautolu ke mataala pihia ke he tau hagahaga kelea ke tuga a tautolu ke he tau ekefakakelea ne fakatonutonu mai.—1 Timoteo 1:3, 4.
18. Ko e heigoa ne kua putoia ke he moui a tautolu nakai ma tautolu?
18 Kua nakai fakatokoluga e tautolu e tau manako he tau tagata po ke finagalo he tau motu. Kua fakaako e Iehova a tautolu he puhala mai he fakafifitakiaga ha Iesu ke lata a tautolu ke moui nakai ma tautolu ni; ka e, ke moua e manamanatuaga ne ha ha ia Keriso Iesu mo e moui ma e finagalo he Atua. (2 Korinito 5:14, 15) He vaha kua mole, liga kua moui a tautolu ke he moui nakai fakalatalata mo e matahavala, ne fakaaoga goagoa e magaaho uho. Kua fakakite he tau tafeaufi, tau inuaga he kava, mo e tau mahani kelea e lalolagi nei. Ha kua fakaako ai a tautolu he mogonei ke taute e finagalo he Atua, nakai kia kua loto fakaaue a tautolu ke vevehe mai he lalolagi kelea nei? Ti kua lata a tautolu ke tau fakaagaga fakamalolo ke puipui mai neke fakalataha atu ke he tau mena fakalalolagi.—1 Peteru 4:1-3.
Fakaako a Tautolu ke Aoga ni a Tautolu
19. Ke fakaako e finagalo ha Iehova mo e taute ai ka takitaki atu ke he tau lagomatai fe?
19 Kua lata lahi ke mailoga ko e fakaako ke taute e finagalo ha Iehova ko e mena aoga lahi ki a tautolu. Kua maama mitaki ai, kua lata ia tautolu ke taute ha tautolu a vala he omaoma fakalahi ke ako ti mumuitua ke he tau fakailoaaga ne mai ki a tautolu he puhala he hana Tama mo e puhala mai foki he hana Kupu mo e tau tagata fakapotopoto. (Isaia 48:17, 18; Heperu 2:1) He taute ai pihia e tautolu, to fakamalolo a tautolu ke tutu mauokafua he tau magaaho matematekelea fakalutukia nei mo e puipui mai he tau afa i mua. (Mataio 7:24-27) Mo e he mogonei foki, to fakafiafia e tautolu e Atua he taute hana a finagalo mo e to iloa moli ai to tali e tau liogi ha tautolu. (Ioane 9:31; 1 Ioane 3:22) Mo e to moua e tautolu e fiafia moli.—Ioane 13:17.
20. Ko e heigoa kua mitaki ke manamanatu fakahokulo ki ai he mailoga e koe e lauga he tau he magahala he 1997?
20 He magahala he fakaholoaga he 1997, to moua e tautolu e tau magaaho ke totou mo e fioia e lauga he tau, he Salamo 143:10: “Kia fakaako mai e koe au ke eke hāu a finagalo.” He taute e tautolu e mena nei, kia o mai a a tautolu ke fakaaoga falu he tau magaaho ke fakaata atu ke he tau foakiaga ne taute he Atua ma tautolu ke fakaako ki ai, tuga ne fakatoka mai luga. Mo e o mai a tautolu ke fakaaoga e manamanatuaga fakahokulo pihia ke he tau kupu ia ke eke mo fakaohoohoaga ke gahua fakatatai mo e olelalo ia, he iloa “ko e tagata kua eke e finagalo he Atua to tumau a ia tukulagi.”—1 Ioane 2:17.
To Tali Fefe e Koe?
◻ Ko hai ne hane fa e fakaako ke taute e finagalo ha Iehova he vaha nei?
◻ Kua lata fefe e Salamo 143:10 ke lauia ki a tautolu he magahala he 1997?
◻ Kua fakaako fefe a tautolu ke taute e finagalo he Atua?
◻ Ko e heigoa ne poaki ke he tau mamatua Kerisiano ke fakaako ha lautolu a fanau?