Fakaako e Iehova ti Hoko Mai ke he Vaha Nei
“Kua foaki mai he Iki ko Iehova kia au e alelo ha lautolu ne fakaako.”—ISAIA 50:4.
1, 2. (a) Ne tauteute tuai e Iehova hana tama aoga ne fiafia lahi a ia ki ai ma e heigoa, mo e heigoa e fua ne moua? (e) Mailoga fefe e Iesu e Punaaga he tau fakaakoaga hana?
KO E Faiaoga e Atua ko Iehova tali mai he eke a ia mo Matua. He fai magaaho he mole mai e totokoaga he falu fanau hana, ne tauteute tuai e ia hana tama aoga ne fiafia lahi a ia ki ai, ko e hana Tama Uluaki, ma e fekafekauaga ke he lalolagi. (Tau Fakatai 8:30) Ko e Isa veveheaga 50 a Isaia ne fakakite fakaperofeta mai e tama aoga nei he pehe: “Kua foaki mai he Iki ko Iehova kia au e alelo ha lautolu ne fakaako, ke iloa ai e au ke fakamafana ke he kupu a ia ne matematekelea.” (Isaia 50:4) Ko e fua he fakagahua e fakaakoaga he Matua hana he magaaho ne nofo he lalolagi, kua eke na Iesu mo punaaga he okiokiaga ma lautolu oti ‘ne mategugu mo e pehia he tau kavega.’—Mataio 11:28-30.
2 Kua loga e tau gahua malolo lahi ne taute e Iesu he vaha he senetenari fakamua. Ne fakamaama e ia e tau matapouli mo e fakaliu tu mai foki a lautolu ne mamate, ka e iloa mua ni he tau tagata a ia he vaha hana ko e faiaoga. Ko e mena ia foki ne ui aki he hana tau tutaki mo e tau tagata totoko a ia. (Mataio 8:19; 9:11; 12:38; 19:16; Ioane 3:2) Ne nakai talia e Iesu e nava ke he mitaki ke he mena ne fakaako e ia ka e talahau tonu ni: “Ko e haku a tau kupu, nakai ko e haku, ka ko e hana ne fakafano mai au.” “Ha ko e mena tuga ne fakaako mai he haku a Matua kia au, ko e tau mena ia ne tala atu ai e au.”—Ioane 7:16; 8:28; 12:49.
Fakafetuiaga Homo Lahi he Faiaoga-Tama Aoga
3. Fakakite mai fefe he perofetaaga a Isaia e fiafia pauaki ha Iehova ki a lautolu ne fakaako e ia?
3 Kua mahomo atu e mitaki he faiaoga ne fiafia fakatagata pauaki, makutu lahi, mo e fakaalofa ke lagomatai hana tau tama aoga. Kua fakakite mai he veveheaga 50 ia Isaia ko e ha ha he Atua ko Iehova e faga fiafia pauaki pihia ki a lautolu ne fakaako e ia. Ne “fafagu e ia au ke he pogipogi,” he talahau mai he perofetaaga, kua “fafagu ai e ia haku a tau teliga, ke fanogongo ai au tuga na lautolu kua fakaako.” (Isaia 50:4) Kua talahau mai he tau kupu nai e tala ke he faiaoga ne fafagu tuai hana fanau aoga he pogipogi ke maeke ai ke fakaako a lautolu. He tala ke he kakano he perofetaaga, taha e pulotu ke he Tohi Tapu ne kitia: “Ko e manatu hanai, kua eke ni e Tagata Lukutoto . . . ko ia ne kua, ka vagahau fakatai, kua fano he aoga he Atua; mo e kua lata a ia ke foaki age e tau fakaakoaga ke he falu. . . . Ti ko e Mesia ni kua lata lahi mahaki, mai he fakaakoaga faka-Atua, ke eke mo faiaoga he tau tagata.”
4. Mahani fefe a Iesu ke he fakaakoaga he Matua hana?
4 Kua homo lahi, ka fiafia e fanau aoga ke he fakaakoaga he faiaoga ha lautolu. Mahani fefe a Iesu ke he fakaakoaga he Matua hana? Kua felauaki hana mahani mo e mena ne totou e tautolu ia Isaia 50:5: “Kua vevete he Iki ko Iehova haku a tau teliga, ti nakai totoko atu e au, ti nakai tukumuli au.” E, kua fiafia lahi a Iesu ke ako. Kua eke a ia, tuga e talahauaga, ke fakateliga lahi. Mua atu ki ai, kua manako lahi a ia ke taute e ha mena ne ole e Matua ke taute e ia. Kua nakai mahani totoko a ia; ka e, pehe a ia: “Ka e aua neke eke hoku loto, ka ko e hau a finagalo.”—Luka 22:42.
5. (a) Fakakite mai he heigoa ko e iloa tuai e Iesu e tau kamatamataaga ka hoko ai e matematekelea ki a ia he lalolagi? (e) Ne fakakatoatoa fefe e perofetaaga a Isaia 50:6?
5 Kua fakakite mai he perofetaaga kua fakailoa tuai ke he Tama e tau mena ka hohoko ki a ia ka taute e ia e finagalo he Atua. Kua kitia ai e mena nei mai he mena ne talahau e ia ne ako: “Ne tuku atu e au haku tua kia lautolu ne fahi, mo e haku a tau kauvehe kia lautolu ne futi e hafe; ti nakai ufiufi e au haku mata he mā mo e tauanu.” (Isaia 50:6) Tuga ne fakakite mai he perofetaaga, kua kelea lahi e mahani vale ne taute ki a Iesu he lalolagi. “Ti tauanu ai a lautolu ke he hana fofoga,” he tohia he aposetolo ko Mataio. “Ka e taupoki atu ni he falu.” (Mataio 26:67) Ne hoko e mena nei he taute he tau takitaki lotu he po Penetekoso he tau 33 V.N. He aho hake, ne age e Iesu hana tua ke he faoa fahi, kua fakaalofa noa he keli he tau kautau Roma a ia to fakatautau a ia he akau ke mate.—Ioane 19:1-3, 16-23.
6. Fakakite mai he heigoa ko e nakai galo e tua mauokafua a Iesu ke he hana Faiaoga, mo e taui fefe ai hana tua mauokafua?
6 Ko e Tama, kakano he fakaako mitaki tuai, kua nakai galo ai e tua mauokafua ke he hana Faiaoga. Kua kitia ai e mena nei mai he mena ne holo atu a ia ke talahau hagaao ke he perofetaaga: “Ha ko e Iki ko Iehova to lagomatai mai e ia kia au; ko e mena ia nakai ma ai au.” (Isaia 50:7) Kua uho e palepale he tua mauokafua a Iesu ke he lagomatai he hana Faiaoga. Ne fakatokoluga he hana Matua a ia, he fakamonuina a ia ke he tuaga mua atu i luga he tau fekafekau oti kana he Atua. (Filipi 2:5-11) Kua homo ue atu foki e tau fakamonuinaaga ne tatali mai ki a tautolu kaeke kua omaoma a tautolu ke tapiki ke he fakaakoaga a Iehova mo e “nakai tukumuli.” Kia onoono a tautolu ke kitia ko e maeke fefe e fakaakoaga ia ke moua he vaha ha tautolu.
Ko e Fakaholoaga Fakaako kua Fakalaulahi
7. Ne taute mau fefe e Iehova hana fakaakoaga ke he lalolagi?
7 Tuga he fita he kitia e tautolu, ne fakaaoga e Iehova hana Hukui he lalolagi, ko Iesu Keriso, ke taute e fakaakoaga faka-Atua he vaha he senetenari fakamua. (Ioane 16:27, 28) Ne tuhi tumau a Iesu ke he Kupu he Atua ko e pule malolo he hana fakaakoaga, mo e fakatoka ai e fakafifitakiaga ma lautolu ne fakaako e ia. (Mataio 4:4, 7, 10; 21:13; 26:24, 31) He mole ai, kua taute e fakaakoaga a Iehova he lalolagi he puhala mai he fekafekauaga ha lautolu ne fakaako e ia. Kia manatu ne poaki a Iesu ki a lautolu: “Hanei, kia o atu a a mutolu ke eke e tau motu oti kana mo tutaki, . . . Ti fakaako atu a mutolu kia lautolu kia omaoma ke he tau mena oti ne tala atu e au kia mutolu.” (Mataio 28:19, 20) He magaaho ka taute e tau tutaki, kua eke a lautolu nei mo vala he “fale he Atua, ko e ekalesia he Atua moui haia.” (1 Timoteo 3:15) Kua taute ai foki a lautolu mo tau fakapotopotoaga kehekehe ne kua fakaako e Iehova a lautolu. (Gahua 14:23; 15:41; 16:5; 1 Korinito 11:16) Kua fakatumau pihia nakai e fakaakoaga faka-Atua ati hoko mai ke he vaha ha tautolu?
8. Fakakite mai fefe e Iesu to fai takitakiaga e gahua fakamatala ke he lalolagi ato hoko mai e fakaotiaga?
8 Moli, kua pihia! He tolu e aho to mate a ia, ne talahau tuai e Iesu ato hoko e fakaotiaga he fakatokaaga he tau mena nei, to ha ha i ai e gahua fakamatala lahi mahaki. “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti,” he talahau e ia, “ti hoko mai ai e fakaotiaga.” Mo e fakaholo atu a Iesu ke fakamaama mai e kanavaakau ka takitaki e fakaholoaga he fakamatalaaga mo e fakaakoaga ke he lalolagi katoa. Ne vagahau a ia hagaao ke he “fekafekau fakamoli mo e loto matala” ka eke mo puhala, po ke kanavaakau, ke foaki atu ke he Hana tau fekafekau e mena kai fakaagaga. (Mataio 24:14, 45-47) Ne fakaaoga he Atua ko Iehova e “fekafekau” nei ke leveki e tau mena he Kautu he lalolagi oti.
9. Ko hai ne ha ha he fekafekau fakamoli mo e loto matala?
9 He vaha nei, kua moua mai e fekafekau fakamoli mo e loto matala he tau hakega he Kautu ne toe agaia. Ko e tau Kerisiano fakauku a nei, ko lautolu he 144,000 ne nonofo agaia he lalolagi, “ko e ha Keriso” a lautolu ia mo e kua eke ko e vala he “tega a Aperahamo.” (Kalatia 3:16, 29, fakatatai NW; Fakakiteaga 14:1-3.) Maeke fefe ia koe ke kitia moli e fekafekau fakamoli mo e loto matala? Mua atu ke he gahua ne taute e lautolu mo e tapikiaga tata lahi ha lautolu ke he Kupu he Atua, ko e Tohi Tapu.
10. Ko e heigoa e tau kanavaakau ne fakaaoga he vahega fekafekau ke fakatolomaki e tau fakaakoaga a Iehova?
10 Ne fakaaoga e Iehova e “fekafekau” nei mo hana puhala ke fakaako e tau tagata he vaha nei. Ko lautolu ia he vahega fekafekau ne talia e higoa Tau Fakamoli a Iehova he tau 1931. Tali mai he magaaho ia kua loga e tau miliona tagata ne fakalataha mo lautolu mo e talia e higoa mo e o fakalataha ke tukuogo e Kautu he Atua. Ko e mekasini nei, Ko e Kolo Toko Fakapuloaaga he Kautu a Iehova, e matapatu kanavaakau ne fakaaoga he “fekafekau” he gahua fakaako. Ka e pete ni, kua fakaaoga foki e falu tohi, fakalataha mo e tau tohi kili mao, tau tama tohi ikiiki, tau porosua, tau tuleke, mo e tau mekasini Awake!
11. Ko e heigoa e tau aoga ne fakatupe he “fekafekau,” mo e heigoa e kakano ne taute ai e tau aoga oti nei?
11 Ke lafi ki ai, kua fakatupe he “fekafekau” e tau aoga kehekehe. Kua fakalataha ke he tau mena nei e Aoga Tohi Tapu a Kiliata he Kolo Toko, ko e mena lima e mahina he loa he aoga ne tauteute tuai e tau fekafekau fuata ma e fekafekauaga misionare ke he taha motu kehe, mo e Aoga Fakaako Fekafekau ne ua e mahina he loa, ne fakamahani e tau motua nofo noa mo e tau fekafekau lagomatai ma e tau kotofaaga fakateokarasi uho. Kua ha ha i ai foki e tau Aoga Fekafekauaga he Kautu, ne kua fakaako mai he taha magaaho ke he taha magaaho e tau motua Kerisiano mo e tau fekafekau lagomatai ke he ha lautolu a tau matagahua he fakapotopotoaga, mo e Aoga Fekafekau Paionia, ne fakakanavaakau e tau tagata evagelia ke lauia mitaki lahi ha lautolu a gahua fakamatala.
12. Ko e heigoa e tau vala fakafahi tapu he fakaholoaga fakaako?
12 Ko e taha mena foki he fakaholoaga fakaako ko e tau feleveiaaga ne taute laga lima he fahi tapu he tau fakapotopotoaga ne kua molea e 75,500 he tau tagata a Iehova he lalolagi oti. Kua lagomatai lahi nakai kia koe e tau feleveiaaga nei? He fanogonogo fakamitaki a koe ke he tau fakaakoaga ne foaki mai, fakakite nakai e koe ko e tali tonu moli a koe, ko e nofo moli a koe he aoga he Atua? Kua kitia maali nakai he falu hau a tupu tolomaki fakaagaga ko e ha ha ia koe e “alelo ha lautolu ne fakaako”?—Isaia 50:4; 1 Timoteo 4:15, 16.
Fakaako he Tau Feleveiaaga he Fakapotopotoaga
13. (a) Ko e heigoa e puhala aoga ne fakaako ai e Iehova hana tau tagata he vaha nei? (e) Maeke fefe ia tautolu ke fakakite ha tautolu a fakaaueaga ma e Kolo Toko?
13 Kua mua atu he fakaako e Iehova hana tau tagata mai he tau fakaakoaga fakafahi tapu ke he Tohi Tapu, he fakaaoga e Kolo Toko ko e lagomatai ke fakaako atu. Kua onoono nakai a koe ke he feleveiaaga nei ko e kavi kua maeke ia koe ke fakaako e Iehova? Pete ni ko e hagaao mua a Isaia 50:4 ki a Iesu, kua maeke ni foki ke hagaao ki a lautolu oti ne fakaataina ne lautolu a lautolu ke moua e tau mena ne foaki mai he Atua ko e “alelo ha lautolu ne fakaako.” Taha e puhala kua maeke ia koe ke fakakite ko e tokiofa e koe e Kolo Toko he totou mafiti e tau fufuta tohi oti he moua ai e koe. Ti ko e magaaho ka fakaako ai e Kolo Toko he fakapotopotoaga, kua maeke ia koe ke fakakite hau a fakaaueaga ki a Iehova he ha ha i ai mo e tauteute tuai foki ke tukuogo ke he tau tagata hau a amaamanakiaga.—Heperu 10:23.
14. (a) Ko e ha ai ko e monuina lahi ke tali he tau feleveiaaga? (e) Ko e heigoa e tau faga tali he kau ikiiki ne mua atu e fakamalolo?
14 Kua fakaaue nakai a koe ko e hau a tau tali he tau feleveiaaga, kua maeke ia koe ke fai vala he fakaholoaga fakaako homo ue atu a Iehova? Kua moli, ka tali he tau feleveiaaga ko e puhala aoga a ia kua maeke ia tautolu ke fefakalagalaga e taha ke he taha ke “fakaalofa mo e tau gahua mitaki.” (Heperu 10:24, 25) Maeke nakai e fanau ikiiki ke fai vala he fakaholoaga fakamahani nei foki? E, kua maeke a lautolu. Fa mahani lahi e tau tali he kau ikiiki ne hake mai he loto ke eke mo fakamaloloaga ki a lautolu ne lalahi. He falu magaaho, kua omoomoi he tau tali he fanau ikiiki a lautolu ne fou agaia ke he tau feleveiaaga ha tautolu, ke onoono fakalahi ke he kupu moli he Tohi Tapu. Ko e falu kau ikiiki kua totou mai ni ha lautolu a tau tali he paratafa po ke talahau e mena ne fanafana he tagata lahi ke he teliga ha lautolu. Ka e pete ni, kua mua atu ne fakamaloloaga ka mau tuai e tali ha lautolu. Kua tuku atu moli he tau tali pihia e fakalilifuaga ke he ha tautolu a Faiaoga Homo Ue Atu mo e hana fakahologa fakaako tokoluga muatua.—Isaia 30:20, 21.
15. Ko e heigoa kua maeke he tau mamatua ke taute ke lagomatai e fanau ikiiki ke lauia mitaki e tau tali?
15 Kua olioli moli ka kitia e fanau ikiiki ne manako ke fakaheke auloa ke he ha tautolu a Atua. Kua uho ki a Iesu e tau fakahekeaga ha lautolu ne ikiiki. (Mataio 21:15, 16) Kua kitia he taha motua Kerisiano: “He vaha tama tote haku, ne manako au ke tali he Fakaakoaga Kolo Toko. He mole he lagomatai au ke tauteute tuai e tali, ne loto e matua tane haku ke ako laga fitu e au e tali.” Liga he magaaho he fakaakoaga Tohi Tapu fakamagafaoa ha mutolu, kua maeke a mutolu ko e tau mamatua ke lagomatai ha mutolu a fanau ikiiki ke tauteute tuai e tau tali ti talahau ai ke he tau kupu vagahau ha lautolu ni ma e tau paratafa ne fifili tuai he Kolo Toko. Lagomatai a lautolu ke fakaaue ke he monuina lahi mahaki ne ha ha ia lautolu he fakalataha ke he fakaholoaga fakaako a Iehova.
16. Ko e heigoa e tau mena aoga ne moua mai he Aoga Fekafekau Fakateokarasi, mo e ko hai kua maeke ke hu he aoga?
16 Kua lata foki e tau fakaakoaga he falu feleveiaaga Kerisiano ke onoono fakamitaki lahi ki ai, ti kua lata ua a lautolu ne monuina ke lauga e tau tala mo e mo lautolu foki ne fanogonogo atu ke he tau fakaakoaga ne fakaako atu. He magaaho nei kua molea e 50 e tau tau he fakaaoga e Iehova e Aoga Fekafekau Fakateokarasi he fahi tapu ke fakamahani aki e tau miliona he tau tagata tane mo e tau fifine ke lauia mitaki e fakamatalaaga he fekau he Kautu. Kua maeke a lautolu ne fa fakalataha tumau mo e fakapotopotoaga ke hu i ai, mo e tau tagata foki ne nakai leva he o ke he tau feleveiaaga, ka felauaki ha lautolu a puhala he moui mo e tau matapatu fakaakoaga Kerisiano.
17. (a) Mua atu ko e heigoa e kakano ne fakatu ai e Feleveiaaga ma e Tau Tagata? (e) Ko e heigoa e tau mena kua lata ke tokaloto he tau tagata ne lauga ke he tau tagata?
17 Ko e taha vala tuai foki he fakaholoaga fakaako ko e Feleveiaaga ma e Tau Tagata. Tuga ne fakakite mai ai he higoa hana, ko e mena fakatu tuai ne feleveiaaga nei ke fakailoa e tau matapatu fakaakoaga he Tohi Tapu ke he tau tagata kehe nakai ko e Tau Fakamoli. Ti kua lata a ia ne lauga ke talahau e tau tala ke maeke ai a lautolu ne logona laia e fekau ke maama. Ko e kakano he mena nei kua lata e tau talahauaga ke fakamaama, tuga e “tau mamoe kehe,” “tau matakainaga,” mo “lautolu ne toe agaia,” ko e tau talahauaga ne liga nakai maama he tau tagata kehe nakai ko e Tau Fakamoli. Ha ko e mena o mai e tau tagata ke he Feleveiaaga ma e Tau Tagata ti kua liga kehe lahi e tau taofiaga po ke puhala he moui mai he tau Tohiaga Tapu—pete ni ko e mitaki ke he kaufakalatahaaga he vaha nei—kua lata ne tagata lauga ke loto matala mo e nakai vaiga e tau taofiaga po ke tau puhala moui pihia.—Fakatatai 1 Korinito 9:19-23.
18. Ko e heigoa foki a falu feleveiaaga fakafahi tapu he fakapotopotoaga, mo e heigoa e kakano ne kua taute ai a lautolu?
18 Ko e Fakaakoaga Tohi he Fakapotopotoaga ko e feleveiaaga he fahi tapu ne kua fakaako e tohi ne tauteute tuai he takitakiaga he fekafekau fakamoli mo e loto matala ti kua uta fakalataha ai mo e Tohi Tapu. Ko e tohi Revelation—Its Grand Climax At Hand! e tohi ne fa e fakaako he magaaho nei he tau motu loga. Kua taute ai e Feleveiaaga Fekafekau ke fakakanavaakau aki e tau tagata a Iehova ke gahua lahi auloa ke he fakamatalaaga he tala mitaki he Kautu mo e ke taute tutaki.—Mataio 28:19, 20; Mareko 13:10.
Fakaako he Tau Feleveiaaga Lalahi
19. Ko e heigoa e tau toloaga lalahi ne fakatoka he “fekafekau” he tau tau takitaha?
19 Kua molea e teau he tau tau, he fakatoka he “fekafekau fakamoli” e tau fonoaga mo e tau toloaga ke fakaako mo e fakamafanatia pauaki atu ke he tau Kerisiano moli. He magaaho nei, tolu e tau feleveiaaga lalahi pihia ne fa e taute he tau tau oti. Kua ha ha i ai e toloaga aho taha ne o ki ai e matakau he tau fakapotopotoaga ne ha ha ai he takaiaga. He vaha he tau, kua takitaha foki e tau takaiaga he tolo ke ua e aho ko e mena kua ui ko e toloaga he takaiaga. Ke lafi ki ai, kua ha ha i ai e toloaga ne ui ko e fonoaga he fahi motu, ne o ki ai e falu takaiaga. He falu tau kua liga to hoko e tau fonoaga he lalolagi oti. Ko e tau toloaga lalahi nei ne o e Tau Fakamoli mai he tau motu loga ki ai ko e mena fakamalolo lahi moli ke he tua he tau tagata a Iehova!—Fakatatai Teutaronome 16:16.
20. Ko e heigoa ne pehi lahi tumau he tau toloaga lalahi he Tau Fakamoli a Iehova?
20 He tau 1922, he magaaho ne feleveia e 10,000 tagata i Cedar Point, Ohio, he F.K.A., kua omoomoi he fakamafanaaga he tagata lauga a lautolu i ai: “Ko e aho na nei he tau aho oti. Kitiala, kua pule e Patuiki! Ko mutolu hana tau hukui gahua fakapuloa. Ko e mena ia, fakailoa, fakailoa, fakailoa, e Patuiki mo e hana kautu.” Kua pehi lahi tumau he tau fono lalahi pihia e gahua fakamatala. Ma e fakatai, kua fakailoa ke he fonoaga he lalolagi oti i New York City he tau 1953, hagaao ke he fakatuaga he fakaholoaga ma e tau fakapotopotoaga oti ke fakamahani ke he gahua he taha fale ke he fale. Kua lauia lahi e fakagahuahuaaga he mena ia ke he fakamatalaaga he Kautu he tau motu loga.
Fakaako he Atua ke Fakaako Atu
21. Ko e heigoa e monuina kua manako a tautolu ke talia, mo e nakai ke fakagalo noa hana kakano?
21 Kua moli, kua fai fakaholoaga fakaako mitaki lahi a Iehova he lalolagi he vaha nei! Ko lautolu oti ne fakaaoga lahi ai kua eke tuai ke fakaako he Atua, e, maeke ke ha ha ia lautolu ne kua age e “alelo ha lautolu ne fakaako.” Ko e monuina lahi ha, ka tala pihia, ke ha ha he aoga he Atua! Ka e, ka talia e monuina nei, kua lata ia tautolu ke nakai fakato noa hana kakano. Ne fakaako e Iehova a Iesu ke maeke a ia ke fakaako atu ke he falu, mo e fakaako ai e Iesu hana tau tutaki ke maeke ai a lautolu ke taute e gahua taha ia ne taute e ia ka e ke he tau matakavi loga atu foki. Kua hane fakamahani ai pihia he fakaholoaga fakaako homo ue atu a Iehova a tautolu e kakano ke fakaako atu ke he falu.—Ioane 6:45; 14:12; 2 Korinito 5:20, 21; 6:1; 2 Timoteo 2:2.
22. (a) Ko e heigoa e lekua ne ha ha ia Mose mo Ieremia, ka e kua fakamitaki fefe? (e) Ko e heigoa e fakamoliaga ia tautolu to taute ni he Atua ke fakakatoatoa e fakamatalaaga he Kautu?
22 Kua talahau kia a koe, tuga ne taute e Mose, “Ha kua nakai mahifi foki haku a alelo,” po ke tuga ne talahau e Ieremia, “Kitiala, nakai iloa e au ke vagahau”? To lagomatai e Iehova a koe tuga ne lagomatai e ia a laua. “To fakalataha au mo e gutu hau,” he tala age e ia ki a Mose. Mo e ki a Ieremia ne pehe a ia: “Aua neke matakutaku a koe . . . ha ko e mena laveaki e au a koe.” (Esoto 4:10-12; Ieremia 1:6-8) He magaaho ne manako e tau takitaki lotu ke fakamamate hana tau tutaki, ne pehe a Iesu: “Ka fakamamate a lautolu nai, ti ui mai ni e tau maka.” (Luka 19:40) Ka kua lata nakai e tau patuo ke tauui mai he magaaho ia, mo e nakai lata a lautolu he magaaho nei kakano he fakaaoga e Iehova e tau alelo ha lautolu ne fakaako e ia ke uta e hana fekau he hana Kautu.
Maeke Nakai Ia Koe ke Tali?
◻ Ko e heigoa e fakafetuiaga mitaki lahi he Faiaoga mo e Tama Aoga ne lagaki hake he veveheaga 50 a Isaia?
◻ Ne taute mau fefe e Iehova e fakaholoaga fakaako lahi mahaki?
◻ Ko e heigoa e falu vala he fakaholoaga fakaako a Iehova?
◻ Ko e ha ai ko e monuina homo ue atu ke fai vala ka taute he fakaholoaga fakaako a Iehova?
[Fakatino he lau 26]
Fa mahani lahi e tau tali he fanau ikiiki ne hake mai he tau loto ke fakamalolo atu ki a lautolu ne lalahi