Iehova—Ko e Atua kua Fakakite e Tau Mena Galo

“Ha i ai e Atua ke he lagi kua fakakite mai e tau mena galo.”​—TANIELU 2:28.

1, 2. (a) Kehe fefe mai a Iehova he hana a Fi lahi mahaki? (e) Fakaata fefe he tau tagata e kehekeheaga nei?

KO IEHOVA, ko e Atua mua ue atu mo e fakaalofa he lalolagi mo e lagi katoatoa, ko ia ni tokotaha maka ko e Tufuga, ko e Atua he pulotu mo e fakafiliaga tonu. Nakai lata ke fufu hana aga, hana tau gahua, po ke hana tau finagalo. He hana magaaho tonu mo e he hana a lotomatala, kua fakakite e ia a ia. He puhala nei kua kehe a ia mai he hana a Fi, ko Satani ko e Tiapolo, kua lali ke fufu hana aga moli mo e tau amaamanakiaga.

² Ha kua kehe mai a Iehova ia Satani, ti pihia foki ha laua a tau tagata tapuaki. Ko lautolu ne muitua ke he takitakiaga a Satani kua kitia ai ha ko e fakaheheaga mo e fakavaia. Kua lali a lautolu ke fakakite a lautolu kua aoga lahi, ka e taute agaia e tau gahua ne pule ki ai e pouli. Ko e tau Kerisiano Korinito ne talahau ki ai ke nakai ofo ke he mena moli nei. “Ha ko lautolu, ko e tau aposetolo pikopiko a lautolu, ko e tau ekegahua fakavai, kua faliu e lautolu a lautolu mo tau aposetolo a Keriso. Nakai ko e mena foki ia ke ofo ai, ha ko Satani ni kua faliu e ia a ia mo agelu he maama.” (2 Korinito 11:13, 14) Ko e tau Kerisiano, ke he taha fahi, kua onoono atu ki a Keriso mo Takitaki ha lautolu. He nofo ai he lalolagi ne fakakite fakamitaki katoatoa e ia e aga he hana Matua, ko e Atua ko Iehova. (Heperu 1:1-3) Ti, he muitua ki a Keriso, kua fifitaki he tau Kerisiano a Iehova, ko e Atua he kupu moli, fakakitia ai, mo e maama. Nakai lata foki a lautolu ke fufu e aga ha lautolu, tau gahua ha lautolu, po ke tau finagalo ha lautolu.​—Efeso 4:17-19; 5:1, 2.

3. Maeke fefe ia tautolu ke fakakite e hepe he talahauaga ko e tau tagata kua eke mo Tau Fakamoli a Iehova kua fakaohooho kelea ke fakalataha ke he “tau mena galo”?

³ Ke he tau magaaho kua iloa e ia e mena mitaki lahi, kua fakailoa e Iehova e tau matafeiga hagaao ke he hana a tau finagalo mo e hagaao ke he vaha i mua ne kua nakai la iloa ia ke he tau tagata. Ke he mena nei ko ia ko e Atua kua fakakite e tau mena galo. Ti, ko e tau tagata kua manako ke fekafekau ki a ia kua uiina ai​—e fakamakamaka​—ke ako e tala ia ne fakakite. Ko e kumikumiaga he 1994 kua molea e 145,000 he Tau Fakamoli he taha e motu Europa ne fakakite e mena ia, he avelesi, ko e igatia a lautolu mo e kumikumi fakatagata e tau fakaakoaga he Tau Fakamoli a Iehova ke tolu e tau tau ato fifili ke eke mo Fakamoli. Ne taute e lautolu e fifiliaga hagaao ke he ha lautolu a tokanoaaga ke fifili mo e nakai fakaohooho. Mo e kua fakatumau a lautolu ke fai tokanoaaga ke fifili mo e gahua. Ma e fakatai, kakano ha kua tokogahoa e falu kua nakai talia mo e tau tutuaga tokoluga he mahani mea ma e tau Kerisiano, kua fifili e lautolu nei he magaaho fakamui ne nakai manako a lautolu ke fakatumau mo Tau Fakamoli. Kua fuluola ha, mogoia, ko e magahala he lima e tau he mole, kua tokologa lahi he Tau Fakamoli fakamua nei kua taute e tau lakaaga ke liu a lautolu fio auloa mo e gahua ko e Tau Fakamoli.

4. Ko e heigoa kua lata ke nakai fakalavelave e tau Kerisiano tua fakamoli, mo e ko e ha ne nakai pihia ai?

⁴ Moli, nakai liliu mai oti e Tau Fakamoli fakamua, mo e ia lautolu kua ha ha i ai falu ne moua matagahua he fakapotopotoaga Kerisiano. Nakai ofo ke he mena nei, ha ko e mena taha he tau tutaki tata lahi a Iesu, ko e aposetolo ko Iuta, ne liliu kehe. (Mataio 26:14-16, 20-25) Ka e ko e fakamaamaaga kia anei ke fakalavelave hagaao ke he faka-Kerisiano hokoia? Ti kua nakai fakaaoga kia he mena nei e kautuaga he gahua fakaako ha lautolu ko e Tau Fakamoli a Iehova ne fa e taute? Nakai pihia, nakai maeke foki he gahua nakai tua ha Iuta Isakariota ke fakamotuhia e tau finagalo he Atua.

Mua Ue Atu ka e Fakaalofa

5. Iloa fefe e tautolu kua fakaalofa a Iehova mo Iesu ke he tau tagata, mo e kua fakatata fefe e lautolu e fakaalofa nei?

⁵ Ko e Atua he fakaalofa a Iehova. Kua manamanatu a ia ke he tau tagata. (1 Ioane 4:7-11) Pete ni e tuaga tokoluga hana, kua olioli a ia he eke e tau tagata mo tau kapitiga hana. He taha he hana a tau fekafekau i tuai, kua totou e tautolu: “Ne tua Aperahamo ke he Atua, ti talahaua ia kia ia mo tututonu, ti talahaua foki a ia, ko e kapitiga he Atua.” (Iakopo 2:23; 2 Nofoaga he Tau Patuiki 20:7; Isaia 41:8) Ha ko e tau kapitiga tagata kua fakaauloa ke he tau mena pulega, po ke tau mena galo, ti pihia foki a Iehova mo e hana a tau kapitiga. Ke he mena nei kua fifitaki e Iesu hana a Matua, ha kua kapitiga atu a ia mo e hana tau tutaki mo e fakaauloa ke he tau mena galo mo lautolu. “Nakai tuai totoku atu e au a mutolu ko e tau fekafekau,” he tala age e ia ki a lautolu, “ha ko e mena nakai iloa he fekafekau e tau mena kua eke he hana iki; ka e totoku atu e au a mutolu ko e tau kapitiga; ha kua fakailoa atu e au kia mutolu e tau mena oti ne fanogonogo ai au ke he haku a Matua.” (Ioane 15:15) Ko e tala “galo,” kua fakaauloa ai e Iehova, hana Tama, mo e tau kapitiga ha laua kua fakalataha ai a lautolu ke he pipiaga he fakaalofa mo e fakamoliaga.​—Kolose 3:14.

6. Ko e ha ne nakai lata a Iehova ke fufu hana tau amaamanakiaga?

⁶ Ko e kakano he higoa Iehova, “Ko Ia ne Taute ke Tupu Moli,” kua fakakite hana lotomatala ke eke e mena kua lata ia ia ke taute ke maeke ke fakakatoatoa hana finagalo. Nakai tuga e tau tagata, nakai lata a Iehova ke fufu hana tau amaamanakiaga ha ko e tuaha to liga maeke he falu ke fakalavelave a ia he fakamoli e tau mena ia. Nakai kaumahala a ia, ti hafagi katoa e ia hana Kupu, ko e Tohi Tapu, kua mua atu ke he mena kua finagalo a ia ke taute. Kua mavehe e ia: “To pihia ni haku a kupu kua fina atu ai he gutu haku, nakai liu noa mai a ia kia au; ka to eke ni e mena kua loto au ki ai, to monuina foki ia ke he mena ne fakafano atu ai e au.”​—Isaia 55:11.

7. (a) Ko e heigoa ne talahau tuai e Iehova i Etena, mo e kitia moli fefe e Satani ko e Atua kua moli? (e) Tumau fefe e matapatu fakaakoaga he 2 Korinito 13:8 ke moli?

⁷ Nakai leva he mole atu e totokoaga i Etena, ne fakakite e Iehova e fakatokatokaaga he fua fakaoti he taufetoko tumau ke he vahaloto hana mo e Fi hana, ko Satani. Ko e Tega ne mavehe he Atua to mamahi, ka e nakai mamahi mo e unoko tukulagi, ka to matematekelea a Satani ke he unoko kelea lahi he magaaho fakamui. (Kenese 3:15) He 33 V.N., ne fakaunoko moli he Tiapolo e Tega, ko Keriso Iesu, he fakahoko hana mate. He puhala nei, ne fakamoli e Satani e Tohiaga Tapu mo e ke he tauteaga ne kitia moli ai kua eke a Iehova mo Atua he kupu moli, pete ni nakai ko e amaamanakiaga moli ha Satani anei. Ko e hana a fakavihia ke he kupu moli mo e tututonu, ti pihia foki mo e hana aga fakatokoluga mo e nakai tokihala, ne takitaki a ia ke taute moli ai e mena ne talahau tuai he Atua to taute e ia. E, ke he tau tagata totoko oti he kupu moli, ti hoko foki ki a ia ko Satani, kua moli ai e matapatu fakaakoaga: “Ko e mena nakai maeke ia mautolu ha mena ke totoko atu ke he kupu moli, ka ko e tau mena kua lata mo e kupu moli.”​—2 Korinito 13:8.

8, 9. (a) Ko e heigoa ne iloa e Satani, ka e kua fakakelea kia he iloilo nei e utaaga he tau finagalo a Iehova? (e) Ko e heigoa e hatakiaga maali kua fakaheu he tau tagata totoko a Iehova, mo e ko e ha?

⁸ Ha kua fakatu ai e Kautu he Atua nakai kitia he 1914, kua fakagahua ai e Fakakiteaga 12:12: “Ko e mena ia kia fiafia ai a koe ko e lagi, mo mutolu kua nonofo ai. Oi fakaalofa kia mutolu kua nonofo ke he fonua mo e tahi, ha kua hifo kia mutolu e tiapolo kua ita lahi, ha kua iloa e ia kua tote hana vaha.” Ka e, ko e iloilo kia he tote he hana a vaha kua taute a Satani ke hiki hana puhala? Ko e fakakiteaga a ia he fahi a Satani ko e Atua he kupu moli mo e ko e Pule Mua Ue Atu a Iehova, ko ia tokotaha kua lata ke tapuaki. Pete ia, kua nakai manako e Tiapolo ke talahau kua kaumahala a ia, pete ni he iloa ai e ia.

⁹ Kua fakakite katoa e Iehova e mena ka tupu he magaaho ka hau a Keriso ke fakahoko e fakafiliaga ke he fakatokatokaaga he lalolagi a Satani. (Mataio 24:29-31; 25:31-46) Ke he mena nei kua fakailoa he hana Kupu hagaao ke he tau pule he lalolagi: “Ha ko e mena ka pehe a lautolu, Kua mafola, kua nakai haofia, ti hokotia fakalutukia ai a lautolu he mahaikava, tuga ne mamahi fanau ke he fifine kua fatu.” (1 Tesalonia 5:3) Ko lautolu kua mumuitua ke he fakafifitakiaga a Satani kua fakaheu e hatakiaga mahino nei. Kua fakapouli a lautolu kakano ha ko e tau loto kelea ha lautolu, ti kua puipui mai he mena nei a lautolu mai he tokihala he ha lautolu a puhala kelea mo e hiki mai he ha lautolu a tau pulega mo e lagatau kua lali ke totoko ke he tau finagalo a Iehova.

10. (a) Liga lahi atu fefe e fakamoliaga he 1 Tesalonia 5:3, ka e kua lata e tau tagata a Iehova ke tali atu fefe? (e) Ko e ha kua malolo lahi e tau tagata kua nakai tua he totoko e tau tagata he Atua anoiha?

¹⁰ Mua atu ke he 1986, ko e magaaho ne fakapuloa he Tau Motu Kaufakalataha ko e Tau he Mafola he Lalolagi Katoa, kua puke e lalolagi ke he tau tala hagaao ke he mafola mo e nakai haofia. Ko e tau lakaaga mauokafua kua taute ai he lali ke fakahao e mafola he lalolagi, tuga mo e mouaaga he kautu. Ko e fakamoliaga katoatoa kia anei ke he perofetaaga nei, po ke maeke ia tautolu ke amanaki ke he fakailoaga ofoofogia anoiha he taha puhala foki? To fakamahino e Iehova e mena ia ke he magaaho tonu ni hana. He magaaho nei, kia mataala fakaagaga a tautolu he, “fakatalitali mo e foli atu kia hoko mai e aho he Atua.” (2 Peteru 3:12) Hane mole atu tumau e tau magaaho mo e lahi agaia e tala ke he mafola mo e nakai haofia, ko e falu ia lautolu kua iloa e hatakiaga nei, ka e fifili ni ke fakaheu ai, kua eke ai ke malolo lahi e manatu to nakai, po ke nakai maeke ia Iehova, ke fakamoli hana kupu. (Fakatatai Fakamatalaaga 8:11-13; 2 Peteru 3:3, 4.) Ka e iloa he tau Kerisiano moli to fakahoko e Iehova hana finagalo!

Fakalilifu Fakamitaki ma e Tau Hukui kua Fakaaoga e Iehova

11. Ko e heigoa kua ako e Tanielu mo Iosefa hagaao ki a Iehova?

¹¹ He magaaho ne ha ha ai he Patuiki ko Nepukanesa, ko e pule he Pule Atu Motu ha Papelonia-Fou e miti fakatupetupe ne kua nakai maeke ke manatu, ne ole lagomatai a ia. Kua nakai maeke foki he hana tau ekepoa, tau tagata mana, mo e tau taulatua ke tala age ki a ia hana miti po ke fakamaama e kakano hagaao ki ai. Ko e fekafekau he Atua ko Tanielu, kua maeke ke taute ai, pete ni kua fita he talahau e ia ko e fakakite ke he miti mo e hana kakano nakai ko e fua he hana a pulotu ni. Ne pehe a Tanielu: “Ha i ai e Atua ke he lagi kua fakakite mai e tau mena galo, mo e fakailoa mai ke he patuiki ko Nepukanesa e tau mena ke hohoko mai ke he tau aho a mui.” (Tanielu 2:1-30) Ko e tau senetenari gahoa fakamua atu, ko Iosefa, ko e taha perofeta he Atua, ne pihia e mena tupu ko Iehova ko e Fakakite he tau mena galo.​—Kenese 40:8-22; Amosa 3:7, 8.

12, 13. (a) Ko hai e perofeta mua ue atu he Atua, mo e ko e ha kua tali pihia ai e koe? (e) Ko hai he vaha nei ko e “tau fekafekau foki kua toka ki ai e tau mena galo he Atua,” mo e fefe ha tautolu a onoonoaga ki ai?

¹² Ko e perofeta mua ue atu ha Iehova ke fekafekau he lalolagi ko Iesu. (Gahua 3:19-24) Ne fakamaama e Paulo: “Ko e Atua, ko ia ne vagahau mai ke he vaha i tuai, ne tuku fano mai ke he tau lagatau kehekehe ke he tau matua ke he tau perofeta, kua vagahau mai e ia kia tautolu ke he tau aho nai ke fakahiku ai ke he Tama, ko ia ne kotofa e ia mo mataohi he tau mena oti kana; ne eke foki e ia e tau mena oti kia ia.”​—Heperu 1:1, 2.

¹³ Ne tutala a Iehova ke he tau Kerisiano fakamua he puhala he hana Tama, ko Iesu, ne kua talahau ai e tau mena galo faka-Atua ki a lautolu. Ne tala age a Iesu ki a lautolu: “Kua foaki atu kia mutolu ke iloa e mutolu e tau mena galo he kautu he Atua.” (Luka 8:10) He magaaho fakamui ne vagahau a Paulo hagaao ke he tau Kerisiano fakauku ko e “tau fekafekau a Keriso, ko e tau fekafekau foki kua toka ki ai e tau mena galo he Atua.” (1 Korinito 4:1) He vaha nei, kua fakatumau e tau Kerisiano fakauku ke fekafekau pihia, he fakakatoa e matakau he fekafekau fakamoli mo e loto matala kua puhala mai he Kau Fakatufono ne foaki e tau mena kai fakaagaga ke he tau magaaho tonu. (Mataio 24:45-47) Kaeke ke fakalilifu lahi mahaki a tautolu ke he tau perofeta ne omoomoi he Atua he tau vaha kua mole atu, mo e mua atu ke he Tama he Atua, kua nakai kia maeke foki ia tautolu ke fakalilifu ke he matakau tagata hane fa e fakaaoga e Iehova he vaha nei ke fakakite e tala faka-Tohi Tapu kua lata lahi ma e hana tau tagata he tau aho uka nei?​—2 Timoteo 3:1-5, 13.

Hafagi po ke Fakagalogalo?

14. Magaaho fe ka uta ai he tau Kerisiano e tau gahua he puhala galo, he mumuitua ai ke he fakafifitakiaga ha hai?

¹⁴ Ko e hafagiaga kia ha Iehova ke fakakite e tau mena ko e kakano kua lata tumau mo e ke he tau tutuaga oti he tau Kerisiano ke fakakite e tau mena oti kua iloa e lautolu? Kua muitua e tau Kerisiano ke he hatakiaga ha Iesu ke he hana tau aposetolo ke “loto matala a mutolu tuga e tau gata, kia totonu foki tuga e tau lupe.” (Mataio 10:16) Ka tala age ki a lautolu ke nakai tapuaki ke he Atua ha ko e pehiaga he tau manamanatuaga ha lautolu, kua fakatumau e tau Kerisiano ke “omaoma ke he Atua,” ha kua mailoga e lautolu kua nakai fai tonu e hukui tagata ke pa malu e tapuaki ki a Iehova. (Gahua 5:29) Kua fakatata e ia ko Iesu e tonu lahi he mena nei. Kua totou e tautolu: “Kua mole e tau mena ia, ati haele fano ai a Iesu i Kalilaia; nakai finagalo foki a ia ke haele i Iutaia, ha ko e mena kolo he tau tagata Iutaia ke kelipopo a ia. Kua tata e galue a Iutaia he tau fale api. Ati tala age ai a Iesu kia lautolu [hana tau matakainaga tino nakai tua]: . . . O hake a a mutolu ke he galue ia; nakaila hake au ke he galue ia, ha ko e mena nakaila hoko mai haku a vaha. Kua tala age a ia e tau mena na kia lautolu, kua nofo mau a ia i Kalilaia. Kua o hake hana tau matakainaga, ati haele hake ai a ia ke he galue, nakai fakakite, ka e tuga ne hake fufu.”​—Ioane 7:1, 2, 6, 8-10.

Ke Fakailoa po ke Nakai ke Fakailoa?

15. Fakakite fefe e Iosefa ko e taofi he mena galo ko e fakaalofa ke taute ai he falu magaaho?

¹⁵ Ke he falu magaaho, ko e nakai talahau he mena galo kua nakai ni pulotu ka ko e fakaalofa foki. Ma e fakatai, fefe e aga ha Iosefa, ko e matua tane hiki ha Iesu, he magaaho ne iloa e ia ko e fifine hana ne amanaki ke mau, ko Maria, kua fatu? Kua totou e tautolu: “Ko Iosefa foki hana tane ko e tagata tututonu a ia, nakai loto foki a ia ke fakama a ia ki mua he tau tagata, kua manatu a ia ke fakafano fakatekiteki atu a ia.” (Mataio 1:18, 19) Ko e mena nakai totonu aia kaeke ke fakama pihia a ia ki mua he tau tagata!

16. Ko e heigoa e matagahua he tau motua, ti pihia mo e tau tagata oti he fakapotopotoaga, kua ha ha ai ke he tau pulega?

¹⁶ Ko e tau mena pulega ka liga ke fakatupu e fakama po ke mamahi kua nakai lata ke fakakite ke he tau tagata nakai tonuhia. Kia tokaloto he tau motua Kerisiano e mena nei he magaaho ka foaki e lautolu e fakatonuaga po ke fakamafanaaga ke he tau matakainaga Kerisiano po ke pihia foki ni mo e akonaki a lautolu ma e agahala kelea lahi ki a Iehova. Kua lata ke taute e tau mena nei ke he puhala faka-Tohiaga Tapu; he fakakite e tau pulega fakamatafeiga ki a lautolu ne nakai putoia kua nakai lata mo e nakai fakaalofa. Moli ai, ko e tau tagata he fakapotopotoaga Kerisiano to nakai lali ke huhu fakamakutu ke he vala tala pulega mai he tau motua ka e ke fakalilifu e matagahua he tau motua ke taofi mau e tau mena galo. Kua tohi mai he Tau Fakatai 25:9: “Kia eke la e mua e taufetoko ha mua mo ia ne katofia mo koe; ka e ua fakakite atu e tau kupu galo he taha tagata.”

17. Ko e ha e tau Kerisiano ke he laulahi he tau magaaho ke taofi mau e tau mena galo, ka e ko e ha ne nakai lata ke taute pihia tumau?

¹⁷ Ko e fakaakoaga nei kua taofi moli foki ke he moui magafaoa po ke he vahaloto he tau kapitiga tata. Ko e taofi e falu he tau mena galo kua aoga ke kalo kehe mai he tau mena nakai femaamaaki mo e tau fakafetuiaga tupetupe. “Ko e matagi mai he fahi tokelau kua tupu ai e uha; mo e alelo kua ekefakakelea hala kautua kua tutupu ai e tau mata ita.” (Tau Fakatai 25:23) Moli lahi, ko e fakamoli ki a Iehova mo e hana tau matapatu fakaakoaga tututonu, ti fakaalofa foki ki a lautolu kua hehe, kua fa mahani ke lata ke tala age ke he tau mamatua, tau motua Kerisiano, po ke ko lautolu kua ha ha ai e tonu ti pihia mo e tau mena galo.a Ka ko e laulahi ai, kua toka mau he tau Kerisiano e tau mena galo fakatagata he falu, he leveki ai tuga he leveki e lautolu ha lautolu.

18. Ko e heigoa e tau mahani Kerisiano tolu kua maeke ke lagomatai a tautolu ke fifili ko e mena kua lata ke fakailoa e tautolu mo e ke nakai fakailoa e tautolu?

¹⁸ He fakakatoatoaaga, kua fifitaki he Kerisiano a Iehova he taofi mau e tau mena galo pauaki ka lata, ke fakakite ai he magaaho kua lata tonu. He fifili ai e mena ka lata mo e nakai lata ia ia ke fakailoa, kua takitaki a ia he loto fakatokolalo, tua, mo e fakaalofa. Kua puipui he loto fakatokolalo a ia mai he fakalaulahi hana a aoga ni, he lali ai ke nava mai e falu he tala age ki a lautolu e tau mena oti kua iloa e ia po ke fakafiu aki a lautolu mo e tau mena galo kua nakai maeke ia ia ke talahau. Ko e tua he Kupu a Iehova mo e fakapotopotoaga Kerisiano kua fakaohooho a ia ke fakamatala e tau tala Tohi Tapu faka-Atua ka e ke fakaeneene ke kalo kehe he talahau e tau mena ne kua liga ke fakaita e falu he magaaho fakamua. E, kua fakaohooho he fakaalofa a ia ke tokanoa ke talahau e tau mena kua fakatokoluga aki e Atua mo e kua lata he tau tagata ke iloa ke maeke ke moua e moui. Ke he taha fahi, kia leveki ai e ia e tau pulega fakatagata, mailoga ai ko e laulahi he tau mena ke fakakite ai kua nakai fai fakaalofa.

19. Ko e heigoa e puhala he gahua kua lagomatai ke kitia mitaki e tau Kerisiano moli, mo e ko e heigoa e fua?

¹⁹ Ko e talahauaga lagotatai nei kua lagomatai ke kitia mitaki e tau Kerisiano moli. Nakai fufu e lautolu e aga he Atua he ufitia fakatupua po ke i tua he fakaakoaga Tolu Taha kua halahu mo e nakai maeke ke fakamaama. Ko e tau atua nakai iloa kua kitia ai ke he lotu fakavai, nakai moli. (Kikite Gahua 17:22, 23.) Ko e Tau Fakamoli fakauku a Iehova kua fakaaue moli e kotofaaga he eke mo “tau fekafekau foki kua toka ki ai e tau mena galo he Atua.” He fakakite fakalahi ai e tau mena galo nei ke he falu, kua lagomatai a lautolu ke ta mai a lautolu ne loto fakamoli ke kumi e tuaga kapitiga mo Iehova.​—1 Korinito 4:1; 14:22-25; Sakaria 8:23; Malaki 3:18.

[Matahui Tala]

To Tali Fefe e Koe?

◻ Ko e ha ne nakai lata a Iehova ke fufu hana tau amaamanakiaga?

◻ Kia hai ne fakakite e Iehova hana tau mena galo?

◻ Ko e heigoa e matagahua he tau Kerisiano hagaao ke he tau mena galo?

◻ Ko e heigoa e tau mahani tolu ka lagomatai e tau Kerisiano ke iloa e mena ke fakailoa mo e mena ka lata ke nakai fakailoa?

[Tau Fakatino he lau 20, 21]

Fakakite e Iehova e tau mena galo he puhala mai he hana Kupu