Tutuli e Mafola Mahani Atua he Moui Fakamagafaoa
“Ko mutolu ko e tau magafaoa he tau motu, kia ta atu e mutolu kia Iehova, kia ta atu e mutolu kia Iehova e lilifu mo e malolo.”—SALAMO 96:7.
1. Ko e heigoa e kamataaga ne taute e Iehova ma e moui fakamagafaoa?
NE TAUTE e Iehova mai he kamataaga e moui fakamagafaoa ke mafola mo e fiafia he magaaho ne fakalataha e ia e tagata tane fakamua mo e fifine fakamua ke he fakamauaga. Kua moli ni, kua fiafia lahi a Atamu ti fakakite e ia hana loto olioli he talahauaga ku ne fakamua atu: “Ko e hui ni hanai he haku hui, mo e kakano he haku kakano; to ui a ia ko e fifine, ha ko e mena uta a ia mai he tane.”—Kenese 2:23.
2. Ko e heigoa ne mauloto he Atua ma e fakamauaga he lafi atu ke he tamaiaga he fiafia ke he hana fanau tagata?
2 He magaaho ne fakatu he Atua e fakatokatokaaga he fakamauaga mo e he magafaoa, kua nakai ni koenaia hana a fioiaaga ke ta mai e fiafia ke he hana fanau he tagata. Kua manako a ia ki a lautolu ke taute hana a finagalo. Ne tala age e Atua ke he hoa fakamua: “Kia fanau a mo e fakatokologa, kia fakapuke foki e lalolagi, mo e kautu ki ai; kia pule foki ke he tau ika he tahi, mo e tau manu lele he pulagi, katoa mo e tau mena momoui oti kua totolo ke he kelekele.” (Kenese 1:28) Moli ni ko e kotofaaga mua he mitaki. To fiafia lahi a Atamu, Eva, mo e ha laua a fanau anoiha kaeke kua omaoma e tokoua ne mau fakamua ke taute e finagalo ha Iehova!
3. Ko e heigoa kua lata ma e tau magafaoa ke nonofo ke he mahani Atua fakamoli?
3 Kua pihia foki ni he vaha nei, kua fiafia lahi e tau magafaoa he magaaho ka gahua auloa a lautolu ke taute e finagalo he Atua. Mo e ko e tau onoonoaga mitaki ha a ia ne ha ha he tau magafaoa omaoma pihia! Ne tohia he aposetolo ko Paulo: “Ko e mahani Atua kua aoga ia ke he tau mena oti kana, he toka ai e mena kua talahaua mai ke he mouiaga nai katoa mo ia kua tatali.” (1 Timoteo 4:8) Ko e tau magafaoa ne moui ke he mahani Atua fakamoli kua mumuitua ke he tau matapatu fakaakoaga he Kupu ha Iehova mo e taute hana a finagalo. Kua tutuli e lautolu e mafola mahani Atua mo e kua moua ai e fiafia “he mouiaga nai.”
Kua Fakahagahaga Kelea e Moui Fakamagafaoa
4, 5. Ko e ha ne maeke ai ke talahau kua fakahagahaga kelea tuai e moui fakamagafaoa he lalolagi katoa he mogonei?
4 Moli ni, kua nakai kitia e tautolu e mafola mo e fiafia he tau magafaoa takitaha. He fatiaki e kumikumiaga ne taute he fale kumikumi puke tagata ne ui ko e Population Council, ne tohi he The New York Times: “He tau motu mautu mo e mativa, ko e feakiaga he moui fakamagafaoa kua hane fa e hokotia atu ke he tau hikihikiaga lalahi.” Ko e tagata tohia he kumikumiaga nei kua fatiaki ai he talahau: “Ko e manatu, ko e magafaoa ko e matakau mauokafua mo e kaufakalataha ne kua taute e matua tane ko e foaki he tupe mo e matua fifine ko e foaki he levekiaga ko e mena nakai moli. Ko e moli anei ko e tau mena fa mahani tuga e matua fifine nakai mau, tupu tolomaki he tau vevehe, [mo e] ikiiki lalahi he tau magafaoa . . . kua tupu ai ke he lalolagi katoa.” Ha ko e tau mena fa mahani pihia, kua totou miliona e tau magafaoa ne noa mo e mauokafua, mafola, mo e fiafia, mo e tokologa hane fa e mavehevehe foki. I Sepania kua holo hake e tau vevehe ke 1 mai he 8 he tau fakamauaga he kamataaga he tau hogofulu tau he senetenari 20 aki—ko e tupu mahaki a ia he 1 mai he 100 he 25 ni e tau tau fakamua atu. Ko Igilani kua hokotaki ke eke foki ke totou tokoluga e tau vevehe i Europa—he 4 mai he 10 e tau fakamauaga ne kaumahala. Kua kitia foki he motu ia e tupu tolomaki he numera he tau magafaoa matua tokotaha.
5 Ko e tuga kua nakai maeke e falu tagata ke fakatali ke moua e tau vevehe. Kua tokologa ne fakaputuputu atu ke he “Fale Tapu Vevehe Fakamauaga” ne tata ki Tokyo, Sapani. Ko e faituga Sinito nei kua talia e tau ole ma e tau vevehe mo e ma e feveheveheaki he falu matutakiaga fakalialia. Kua igatia e tau tagata tapuaki ke tohi he tama lapa akau tote hana a ole, tau ai ki luga he fahi he fale tapu, mo e liogi ma e tali. Ne talahau he tohitala Tokyo ko e magaaho ne fakatu e fale tapu kavi ke taha e senetenari he mole, “ko e tau hoana he tau tagata fakafua koloa mautu he matatepu ia kua tohia e tau liogi ole ke tiaki he tau tane ha lautolu e tau hoana mau pouli ha lautolu mo e liliu mai ki a lautolu.” Ka e, he vaha nei, kua laulahi e tau ole ma e tau vevehe, nakai ke liu ke fematutaki. Nakai taumaleku, kua fakahagahaga kelea tuai e moui fakamagafaoa he lalolagi katoa. Kua lata kia e mena nei ke fakaofo e tau Kerisiano? Nakai, kakano kua tuku mai he Tohi Tapu ki a tautolu e maamaaga ke he matematekelea he magafaoa he mogonei.
Ko e Ha kua Matematekelea e Magafaoa?
6. Ko e heigoa e kitiaaga ne ha ha he 1 Ioane 5:19 ke he matematekelea he magafaoa he vaha nei?
6 Hanei e taha kakano ne matematekelea e magafaoa he vaha nei: “Ko e lalolagi oti ha he pule hana kua mahani kelea.” (1 Ioane 5:19) Ko e heigoa ne kua amanaki mai e tautolu ia ia ne kelea, ko Satani ko e Tiapolo? Ko ia ko e pikopiko kelea muitui. (Ioane 8:44) Ti ko e mena haia ne holopi ai e lalolagi hana he fakavaia mo e mahani kelea, ne kua lahi e moumou ke he moui fakamagafaoa! I fafo he fakatokatokaaga he Atua, ko e fakaohoohoaga fakasatani kua fakamatakutaku mai ke moumou e fakatuaga he fakamauaga ha Iehova mo e ta mai e fakahikuaga ke he mafola he moui fakamagafaoa.
7. Maeke fefe e tau magafaoa ke lauia ke he tau mahani ne fakakite he tau tagata tokologa he tau aho fakahiku nei?
7 Ko e taha e kakano foki ma e tau mena vihi fakamagafaoa ne fakamalaia aki e tau tagata he mogonei kua fakakite mai he 2 Timoteo 3:1-5. Ko e tau kupu fakaperofeta ha Paulo ne fakamau i ai kua fakakite mai ko e hane nonofo a tautolu he “tau aho fakamui.” Ko e tau magafaoa kua nakai loto mafola mo e fiafia kaeke ko lautolu i ai “ke ofaofa he tau tagata a lautolu ni, to velevele koloa, to hula noa, to fakatokoluga, to vagahau kelea, to faliuliu ke he tau matua, to nakai fakaaue, to mahani kelea, to nakai fai fakaalofa to nakai fia loto mafola, to tauamuamu, to nakai taofi e tau manako he tino, to mahani favale, nakai loto ke he mitaki, to afo tagata, to mahani fakahanoa, to fakatokoluga, to manako lahi ke he tau mena ke fiafia ki ai, ka e manako tote ke he Atua; to ha i ai ia lautolu e gati he mahani Atua, ka kua tiaki e lautolu e malolo ne toka ai.” Kua nakai maeke e magafaoa ke fiafia katoatoa kaeke ke taha mai ai kua noa ke he fakaalofa hofihofi pauaki po ke kua nakai fakamoli. Kua maeke fefe ke mafola e moui fakamagafaoa kaeke kua fai tagata vale mo e nakai fetaliaaki he fale? Ka e au atu agaia e kelea, ha kua maeke fefe ke ha ha ai e mafola mo e fiafia ka eke falu he magafaoa ke manako lahi ke he tau mena ke fiafia ki ai ka e manako tote ke he Atua? Ko e tau mahani haia he tau tagata he lalolagi nei ne pule a Satani. Ti ko e mena haia ne potagotago e fiafia he magafaoa he tau aho fakahiku nei!
8, 9. Ko e heigoa e fua ka taute he aga he fanau ke he fiafia he magafaoa?
8 Kua fai kakano agaia ne nakai fai mafola mo e fiafia e loga he tau magafaoa, ko e mahani kelea he fanau. He magaaho ne talahau tuai e Paulo e tau tutuaga he tau aho fakahiku, ne perofeta e ia to tokologa e fanau ka liuliu ke he tau matua. Kaeke ko e tagata tote a koe, kua lagomatai nakai he hau a mahani ke taute e magafaoa hau ke mafola mo e fiafia?
9 Ko e falu fanau kua nakai mitaki e tau mahani. Ke fakatai, taha e tama tane tote ne tohia e tohi loto kelea nei ke he hana matua tane: “Ka nakai mahalo a koe ke uta au ki Alexandria to nakai tohi atu au ki a koe, po ke vagahau ki a koe, po ke mavehe ki a koe, ti ka fano a koe ki Alexandria to nakai mahalo au ke toto hau a lima po ke liu ke feleveia mo koe. Ko e mena anei ka tupu kaeke ke nakai uta e koe au . . . Ka e fakafano mai ki a au e [kitara], he ole au ki a koe. Ka nakai mahalo a koe, to nakai kai au mo e nakai inu au. Ti haia!” Kua tatai nakai e mena ia ke he vaha fou nei? Ko e tohi ia mai he tama tane ke he hana a matua tane kua tohia ai i Aikupito i tuai he 2,000 he tau tau kua mole.
10. Maeke fefe he tau tama ikiiki ke lagomatai e tau magafaoa ha lautolu ke tutuli e mafola mahani Atua?
10 Ko e aga he tama Aikupito ia kua nakai fakatupu e mafola fakamagafaoa. E moli, kua mua atu e tau mena fakatupetupe ne tutupu ke he tau magafaoa he tau aho fakahiku nei. Ka e, ko mutolu ko e tau tama ikiiki kua maeke ia mutolu ke lagomatai e magafaoa hau ke tutuli e mafola mahani Atua. Fefe? He omaoma ke he fakatonuaga nei he Tohi Tapu: “Ko mutolu e tau fanau, kia fanogonogo a mutolu ke he tau matua ha mutolu ke he tau mena oti; ha ko e mena mitaki ia ha ha he Iki.”—Kolose 3:20.
11. Maeke fefe e tau matua ke lagomatai ha lautolu a fanau ke eke mo tau fekafekau loto fakamoli ha Iehova?
11 Ka e kua a mutolu ma tau matua? Kia lagomatai fakamitaki ha mutolu a fanau ke eke mo tau fekafekau tua fakamoli ha Iehova. “Kia fakaako a e tama ke lata mo e hana puhala,” he talahau he Tau Fakatai 22:6. “Ka hoko foki ke he vaha ke motua ai a ia, nakai ni fano kehe ai a ia.” Mo e fakaakoaga faka-Tohiaga Tapu mitaki mo e tau fakafifitakiaga mitaki he tau matua, tokologa e tau tama tane mo e tama fifine ne nakai o kehe mai he puhala hako ka momotua a lautolu. Ka e lahi e mena ne lago atu ke he aoga mo e laulahi he fakaakoaga ke he Tohi Tapu mo e ke he loto manamanatu he tama tote.
12. Ko e ha kua lata e kaina Kerisiano ke loto mafola?
12 Kaeke ke lali oti e tau tagata he ha tautolu a magafaoa ke taute e finagalo ha Iehova, kua lata ai ia tautolu ke olioli e mafola mahani Atua. Ko e kaina Kerisiano kua lata ke fakapuke aki e ‘tau tagata he mafola.’ Ne fakakite mai he Luka 10:1-6 ko e tau tagata pihia ne manamanatu ki ai a Iesu he magaaho ne fakafano atu e ia e tau tutaki ne 70 ko e tau fekafekau mo e tala age ki a lautolu: “Ko e fale ke huhu atu a mutolu ki ai, kia pehe atu fakamua a mutolu, Kia monuina e faoa nai. Kaeke ko e tagata he monuina ha i ai, to hoko kia ia ha mutolu a fakamonuina.” He o mo e mafola e tau fekafekau ha Iehova mai he taha fale ke he taha fale mo e “vagahau mitaki he mafola,” ne kumi e lautolu e tau tagata he mafola. (Gahua 10:34-36; Efeso 2:13-18) Kua lata ai, ko e magafaoa Kerisiano ne ha ha ai e tau tagata he mafola kua lata ke loto mafola.
13, 14. (a) Ko e heigoa ne manako a Naumi ma Ruta mo Orepa? (e) Kua lata e kaina Kerisiano ke eke mo okiokihaga fefe?
13 Kua lata e kaina ke eke mo nofoaga mafola mo e okiokiaga. Ko e takape motua ko Naumi ne amaamanaki ke foaki age he Atua ke he hana tau figona fifine fuata, ne takape, ko Ruta mo Orepa, e okiokiaga mo e mafanatia ne fua mai he moua e tane mo e kaina mitaki. Ne pehe a Naumi: “Kia foaki mai e Iehova kia mua ke moua e mua takitokotaha e okiokihaga ke he kaina he hana tane.” (Ruta 1:9) Hagaao atu ke he manako ha Naumi, ne tohia he taha tagata fakaako ko e tau kaina pihia “to moua e [Ruta mo Orepa] e laveakiaga mai he tupetupeaga mo e fakaatukehe. To moua e laua e okiokiaga. To eke ai ko e mena ka nonofo ai a laua, mo e ka moua he ha laua a tau logonaaga molu mo e tau manako lilifu e mauokafua mo e milino. Ko e fakamaamaaga kehe he tau Heperu . . . kua fakakite fakamitaki he hagaaoaga he tau kupu lafi fakalataha he [Isaia 32:17, 18].”
14 Fakamolemole kia mailoga e talahauaga nei ke he Isaia 32:17, 18. Kua totou ai e tautolu ki ai: “Ko e mena ke tupu mai he mahani tututonu ko e monuina haia; to tupu mai foki he mahani tututonu e okioki mo e nakai haofia tukulagi. To nonofo foki haku motu ke he mena ke monuina ai, mo e tau fale ke nakai haofia ai, mo e tau okiokihaga ke nonofo fakatekiteki ai.” Ko e kaina Kerisiano kua lata mo okiokiaga he tututonu, fakatekiteki, nakai haofia, mo e mafola mahani Atua. Ka e kua kaeke ke mafuta hake e tau kamatamataaga, tau fekehekeheaki, po ke falu mena vihi? Ko e mogo haia ka lata lahi ia tautolu ke iloa e mena galo he fiafia he magafaoa.
Tau Matapatu Fakaakoaga Aoga Lahi ne Fa
15. Maeke fefe ia koe ke fakamaama e mena galo he fiafia he magafaoa?
15 Ko e tau magafaoa takitaha he lalolagi kua fakahigoa ai he Atua ko Iehova, ko e Tufuga he tau magafaoa. (Efeso 3:14, 15) Ti ko lautolu ne manako ke fiafia e magafaoa kua lata ke kumi e takitakiaga hana mo e fakaheke ki a ia, tuga ne taute he salamo: “Ko mutolu ko e tau magafaoa he tau motu, kia ta atu e mutolu kia Iehova, kia ta atu e mutolu kia Iehova e lilifu mo e malolo.” (Salamo 96:7) Ko e mena galo he fiafia he magafaoa kua ha i loto he tau lau tohi he Kupu he Atua, ko e Tohi Tapu, mo e he fakagahuahuaaga he tau matapatu fakaakoaga i ai. Ko e magafaoa ne fakagahuahua e tau matapatu fakaakoaga nei to fiafia mo e to olioli e mafola mahani Atua. Ati o mai a a tautolu ke onoono atu ke he tau matapatu fakaakoaga aoga nei ne fa.
16. Ko e heigoa e matagahua ne kua lata he manako fakalatalata ke taute i loto he moui fakamagafaoa?
16 Taha he tau matapatu fakaakoaga nei kua fakave ai ke he mena nei: Ko e manako fakalatalata kua aoga lahi ke he mafola mahani Atua he moui fakamagafaoa. Ne talahau he Patuiki ko Solomona: “Ko e tagata kua nakai pule ke he hana loto, kua lata a ia mo e maga kua maona, kua nakai fai kaupa.” (Tau Fakatai 25:28) Ke fakakaupa ha tautolu a agaga—he fakagahuahua e manako fakalatalata—kua aoga lahi kaeke ke manako a tautolu ke moua e magafaoa loto mafola mo e fiafia. Pete ni kua nakai mitaki katoatoa a tautolu, kua lata ia tautolu ke fakagahuahua e manako fakalatalata, ko e fua he agaga tapu he Atua. (Roma 7:21, 22; Kalatia 5:22, 23) To feaki hake he agaga e manako fakalatalata ia tautolu kaeke ke liogi a tautolu ma e fua nei, fakagahuahua e fakatonuaga he Tohi Tapu ne hagaao ki ai, mo e fakalataha atu ke he falu ne fakakite ai. Ko e puhala nei ka lagomatai a tautolu ke ‘fehola kehe he feuaki.’ (1 Korinito 6:18) To lagomatai he manako fakalatalata a tautolu ke tiaki e mahani vale, kalo kehe po ke kautu mai he hufiaaga he kava, mo e fehagai fakamitaki atu ai ke he tau tutuaga uka.
17, 18. (a) Hagaao fefe e 1 Korinito 11:3 ke he moui fakamagafaoa Kerisiano? (e) Kua eke fefe e mailogaaga he tuaga ulu pule ke fakatupu aki e mafola mahani Atua i loto he magafaoa?
17 Taha matapatu fakaakoaga aoga lahi kua maeke ke talahau he puhala nei: Ko e mailogaaga he tuaga ulu pule ka lagomatai a tautolu ke tutuli e mafola mahani Atua he tau magafaoa ha tautolu. Ne tohia e Paulo: “Kua loto au ke iloa ai e mutolu ko e ulu he tau tane oti ko Keriso haia, ko e ulu he hoana ko e tane haia, ka ko e ulu a Keriso ko e Atua haia.” (1 Korinito 11:3) Ko e kakano hanei ko e tagata tane ka uta e takitakiaga he magafaoa, kua lagomatai fakamoli e hana hoana, mo e kua omaoma e fanau. (Efeso 5:22-25, 28-33; 6:1-4) Ko e tau mahani pihia ka fakatupu aki e mafola mahani Atua he moui fakamagafaoa.
18 Kua lata he tane Kerisiano ke manatu ko e tuaga ulu pule faka-Tohiaga Tapu nakai ko e pule okooko. Kua lata ia ia ke fifitaki ki a Iesu, hana a Ulu. Pete ni kua eke a ia “mo ulu he tau mena oti,” ko Iesu kua “nakai hau a ia ke fekafekau mai e tau tagata kia ia, ka kia fekafekau atu a ia.” (Efeso 1:22; Mataio 20:28) Ke he puhala taha ia ni, kua fakagahuahua he tagata tane Kerisiano e tuaga ulu pule he puhala fakaalofa ne kua taute a ia ke leveki fakamitaki e tau fiafiaaga he hana a magafaoa. Mo e moli ni kua manako e hoana Kerisiano ke kaufakalataha ke he hana a tane. Ha ko e hana a “hoa” mo e “lagomatai,” kua foaki e ia e tau fua ne noa he hana a tane mo e ti tuku age ki a ia e lagomatai kua lata. (Kenese 2:20; Tau Fakatai 31:10-31) Na lagomatai he fakagahuahuaaga he tuaga ulu pule ne tonu e tau tane mo e tau hoana ke fefakalilifuaki mo e omoomoi e fanau ke omaoma. E, ko e mailogaaga he tuaga ulu pule ka fakatupu e mafola mahani Atua he moui fakamagafaoa.
19. Ko e ha ne aoga lahi ai e mitaki he matutakiaga ma e mafola mo e fiafia he magafaoa?
19 Ko e matapatu fakaakoaga aoga ke tolu aki kua maeke ke fakakite he tau kupu nei: Ko e mitaki he matutakiaga kua aoga lahi ma e mafola mo e fiafia he magafaoa. Ne talahau he Iakopo 1:19 ki a tautolu: “Kia takitokotaha e tau tagata mo e alumaki ke fanogonogo, kia fakatuai ke vagahau atu, kia fakatuai ke he ita.” Ko lautolu he magafaoa kua lata ke fefanogonogoaki mo e fetutalaaki kakano ko e mena hala ua e matutakiaga he magafaoa. Ka e, pete ni he magaaho ka moli e mena ha tautolu ne talahau, kua liga ni ke fakaauatu e hukia kaeke ke vagahau ai he puhala fakakelea, fakatokoluga, po ke hauhaua. Kua lata ha tautolu a vagahau ke fai fakaalofa, “fakamasima ke he masima.” (Kolose 4:6) Ko e tau magafaoa ne mumuitua ke he tau matapatu fakaakoaga faka-Tohiaga Tapu mo e mitaki e matutakiaga hane tutuli e mafola mahani Atua.
20. Ko e ha ne talahau ai e koe kua aoga lahi e fakaalofa ke he mafola fakamagafaoa?
20 Ko e matapatu fakaakoaga ke fa aki anei: Ko e fakaalofa kua aoga lahi ke he mafola mo e fiafia he magafaoa. Liga fai vala aoga e fakaalofa fakavihi ke he fakamauaga, mo e maeke he fakaalofa hohofi hokulo ke tupu ia lautolu he magafaoa. Ka e, ko e mena ne mua atu e aoga, ko e fakaalofa ne fakamaama mai he kupu Heleni a·gaʹpe. Ko e fakaalofa hanei ne feaki e tautolu ma Iehova, ma Iesu, mo e ma e ha tautolu a katofia. (Mataio 22:37-39) Ne fakakite he Atua e fakaalofa nei ma e tau tagata he foaki mai “hana Tama fuataha, kia nakai mate taha ne tua kia ia, ka kia moua e ia e moui tukulagi.” (Ioane 3:16) Kua mitaki lahi ai ha kua maeke ia tautolu ke fakakite e faga fakaalofa taha ia ki a lautolu he ha tautolu a magafaoa! Ko e fakaalofa mua ue atu nei ko e “pipi haia ke fakamaopoopo ai.” (Kolose 3:14) Kua pipi fakalataha ai e tokoua ne mau mo e omoi a laua ke fetauteaki e mena mitaki mo e ke he ha laua a fanau. He magaaho ka hohoko mai e tau mena uka, kua lagomatai he fakaalofa a laua ke fehagai tokoua e tau lekua. Kua maeke ia tautolu ke tua moli ke he mena nei kakano ko e “fakaalofa . . . nakai kumi e ia hana tau mena . . . Kua fakauka ke he tau mena oti, kua talia e tau mena oti, kua amaamanaki ke he tau mena oti, kua fakamanavalahi ke he tau mena oti.” (1 Korinito 13:4-8) Kua fiafia moli e tau magafaoa ne kua simeni he fakaalofa ki a Iehova e fefakaalofaaki!
Kia Fakatumau ke Tutuli e Mafola Mahani Atua
21. Ko e heigoa ka liga fakatolomaki e mafola mo e fiafia he magafaoa hau?
21 Ko e tau matapatu fakaakoaga fakamua mo e falu foki ne futiaki mai he Tohi Tapu kua fakatokatoka i loto he tau tohi ne foaki mai e Iehova he puhala he “fekafekau fakamoli mo e loto matala.” (Mataio 24:45) Ke fakatai, ko e tau fakailoaaga pihia kua moua i loto he tohi ne 192 e lau Ko e Mena Galo he Fiafia he Magafaoa, ne fakatoka mai he tau Fonoaga Maaga Motu “Tau Uta Fekau he Mafola Mahani Atua” he Tau Fakamoli a Iehova ne taute ke he lalolagi katoa he 1996/97. Ko e tau fakaakoaga fakatagata mo e fakamagafaoa ke he tau Tohiaga Tapu fakalataha mo e lagomataiaga he tohi ia ka fua mai e tau mena aoga loga. (Isaia 48:17, 18) E, ke fakagahuahua e fakatonuaga faka-Tohiaga Tapu ka liga fakatolomaki e mafola mo e fiafia he magafaoa hau.
22. Ke he heigoa kua lata a tautolu ke takai viko ha tautolu a moui fakamagafaoa?
22 Kua ha ha ia Iehova e tau mena homo ue atu he vaha i mua ma e tau magafaoa ne fakafita ke he hana finagalo, mo e kua lata tonu a ia ma e ha tautolu a fakaheke mo e fekafekauaga. (Fakakiteaga 21:1-4) Ti ko e mena haia kia takai viko e moui he magafaoa hau ke he tapuakiaga he Atua moli. Mo e kia fakamonuina he ha tautolu a Matua fakaalofa he lagi, ko Iehova, a koe aki e fiafia he kua tutuli ai e koe e mafola mahani Atua he hau a moui fakamagafaoa!
To Tali Fefe e Koe?
◻ Ko e heigoa kua lata kaeke ke nonofo e tau magafaoa ke he mahani Atua fakamoli?
◻ Ko e ha kua ha ha ai e matematekelea he magafaoa he vaha nei?
◻ Ko e heigoa e mena galo he fiafia he magafaoa?
◻ Ko e heigoa e falu he tau matapatu fakaakoaga ka lagomatai a tautolu ke fakatupu e mafola mo e fiafia he moui fakamagafaoa?
[Fakatino he lau 18]
Kua maeke he mitaki he matutakiaga ke lagomatai a tautolu ke tutuli e mafola mahani Atua i loto he moui fakamagafaoa