“Kia Nonofo Fakalatalata” ha kua Tata Mai Tuai e Fakatulakiaga
“Kua tata mai tuai e fakatulakiaga he tau mena oti; hanai, kia nonofo fakalatalata a mutolu.”—1 PETERU 4:7.
1. Ko e heigoa ne kua putoia ke he “nonofo fakalatalata”?
KO E tau kupu i luga he aposetolo ko Peteru kua lata ke ha ha ai e fakaohoohoaga mitaki lahi ke he puhala moui he tau Kerisiano. Pete ia, ne nakai tala age a Peteru ke he tau tagata totou hana ke fehola mai he tau matagahua fakalalolagi mo e tau levekiaga he moui; nakai fakamalolo foki e ia ke hopoate ke he fakaotiotiaga ka hoko mai. Ka kua tala age a ia: “Kia nonofo fakalatalata.” Ke “nonofo fakalatalata” kua lata foki ke fakakite e fifiliaga mitaki, ke fakailoilo, lotomatala mo e fakapulotu ha tautolu a vagahau mo e tau gahua. Ko e kakano ke toka e Kupu he Atua ke pule ke he ha tautolu a manamanatuaga mo e tau gahua. (Roma 12:2) Ha kua nonofo a tautolu “i mua he hau fakakeukeu mo e faliuliu,” kua lata ai ke nonofo fakalatalata ke kalo mai he tau mena vihi mo e tau mena uka.—Filipi 2:15.
2. Kua aoga fefe e fakauka ha Iehova ke he tau Kerisiano he vaha nei?
2 Kua maeke foki he “nonofo fakalatalata” ke lagomatai a tautolu ke moua e onoonoaga mitaki, mo e moli ki a tautolu ni. (Tito 2:12; Roma 12:3) Kua lata lahi e mena nei he fakahagaao atu ke he tau kupu ne tohi he 2 Peteru 3:9: “Kua nakai mule mai e Iki ke he mena kua talahaua mai, tuga he manatu he falu ke he mule; ka e fakauka mai a ia ki a tautolu, he nakai finagalo a ia ke malaia taha, ka kia hohoko oti kana ke he tokihala.” Kia mailoga kua fakauka a Iehova, nakai ni ke he tau tagata nakai talitonu, ka e pihia foki “ki a tautolu”—ko e tau tagata he fakapotopotoaga Kerisiano. Ko e ha? Kakano kua “nakai finagalo a ia ke malaia taha.” Liga kua lata agaia e falu ke taute e tau hikihikiaga mo e fakahakohakoaga ke maeke ke moua e foaki fakaalofa he moui tukulagi. Ati o mai a a tautolu ke kumikumi atu ke he tau matapokopoko ne kua liga lata mo e falu fehikitaki.
“Nonofo Fakalatalata” he ha Tautolu a Tau Fakafetuiaga Fakatagata
3. Ko e heigoa e tau huhu ka liga huhu hifo he tau matua ki a lautolu ni hagaao ke he ha lautolu a fanau?
3 Ko e loto kaina kua lata mo nofoaga mafola. Ka e ko e falu kua taute ai mo “fale kua puke he tau . . . taufetoko.” (Tau Fakatai 17:1) Ka e kua hau a magafaoa? Kua tokanoa kia e kaina hau mai he “ita, mo e miha, mo e kupu kelea”? (Efeso 4:31) Ka e kua hau a fanau? Kua logona hifo nakai e lautolu e fakaalofa mo e manako? (Fakatatai Luka 3:22.) Kua fai magaaho nakai a koe ke fakatonu mo e fakaako a lautolu? Kua “fakailoilo [nakai e koe] ke he tututonu” nakai ke he vale mo e ita? (2 Timoteo 3:16) Ha ko e fanau “ko e mena moua mai ia Iehova,” kua loto lahi a ia ke iloa e puhala ke leveki aki a lautolu.—Salamo 127:3.
4. (a) Ko e heigoa ka tupu ka eke fakakelea he tane e hana hoana? (e) Maeke fefe he tau hoana ke ati hake e mafola mo e Atua mo e fiafia i loto he magafaoa katoa?
4 Ka e kua ha tautolu a hoa he fakamauaga? “Kua lata pihia foki ke he tau tane ke fakaalofa age ke he tau hoana ha lautolu, tuga e tau tino ha lautolu. Ko ia kua fakaalofa ke he hana hoana, kua fakaalofa a ia kia ia ni. Ha kua nakai fakai taha ke fakavihia hana a tino, ka kua fagai mo e leveki ai e ia, pihia foki e Iki mo e ekalesia.” (Efeso 5:28, 29) Ko e tagata tane favale, pule lahi, po ke nakai manamanatu kua nakai fakahagahaga kelea ni hokoia e mafola he hana kaina ka e fakalolelole foki hana a fakafetuiaga mo e Atua. (1 Peteru 3:7) Ka e kua e tau hoana? Kua lata foki ia lautolu ke ‘takitokotaha mo e omaoma ke he tau tane ha lautolu tuga e omaoma ke he Iki.’ (Efeso 5:22) Ke manamanatu ke fakafiafia e Atua ka maeke ke lagomatai e hoana ke nakai holopi ke he tau hehe he hana a tane mo e ke omaoma ki a ia mo e nakai totoko. He falu magaaho, liga kua logona hifo he hoana e lata ke talahau e manatu hana. Ne talahau he Tau Fakatai 31:26 hagaao ke he hoana makaukau: “Kua vagahau a ia mo e iloilo; ha ha i ai ke he hana alelo e fakatufono he fakaalofa.” He taute atu ke he hana tane ke he puhala totonu, mo e lilifu, kua taofimau e ia hana mafola mo e Atua, ti ati hake e ia e fiafia he magafaoa katoa.—Tau Fakatai 14:1.
5. Kua lata he ha e tau fuata ke muitua ke he fakatonuaga he Tohi Tapu ne hagaao ke he ha lautolu a tau matua?
5 Tau fanau fuata, fefe e tauteaga hau ke he hau a tau matua? Kua fakaaoga kia e koe e vagahau fakahukia, nakai lilifu ne kua fakaata tumau he lalolagi? Po ke omaoma a koe ke he poaki he Tohi Tapu: “Ko mutolu na, ko e tau fanau, kia omaoma ke he tau matua ha mutolu ke he Iki, ha ko e mena tonu ni haia. Kia fakalilifu a ko e ke he hau a matua tane, mo e hau a matua fifine, (ha ko e fakatufono fakamua haia ha ha i ai e talahauaga.) Kia mitaki ai a koe, kia fakatuleva e tau aho hau ke nofo ai a koe ki luga he kelekele”?—Efeso 6:1-3.
6. Kua maeke fefe a tautolu ke kumi e mafola mo e tau matakainaga tapuaki auloa?
6 Kua fakatata foki e tautolu e “nonofo fakalatalata” he magaaho ne “kumi [e tautolu] e mafola mo e tutuli ki ai” fakalataha mo e tau matakainaga tapuaki auloa. (1 Peteru 3:11) Kua mafuta mai e tau nakai fetaliaaki mo e tau fehalakaki he taha magaaho ke he taha magaaho. (Iakopo 3:2) Kaeke ke fakaata e faitaua ke tupu, kua maeke ai ke fakahagahaga kelea e mafola he fakapotopotoaga katoa. (Kalatia 5:15) Ati fakamafiti a ke fakamitaki e tau fetotokoaki; kia kumi e tau fakamafolaaga.—Mataio 5:23-25; Efeso 4:26; Kolose 3:13, 14.
“Nonofo Fakalatalata” mo e Tau Matagahua Fakamagafaoa
7. (a) Kua fakamafana mai fefe a Paulo ke fakakite e “nonofo fakalatalata” he tau lekua fakalalolagi? (e) Ko e heigoa e aga ne kua lata ke ha ha he tau tane mo e tau hoana Kerisiano ke he tau matagahua he loto kaina?
7 Kua hataki he aposetolo ko Paulo e tau Kerisiano ke “nonofo fakalatalata.” (Tito 2:12) Ko e mena fuluola, ha kua tomatoma mai e Paulo he tau kupu ia, ke he tau fifine “ke fakaalofa ke he tau tane ha lautolu, kia fakaalofa foki ke he tau fanau ha lautolu. Kia mahani fakalatalata a lautolu mo e nakai matagaoi, kia nonofo kaina.” (Tito 2:4, 5) Ne tohia e Paulo e naia he tau tau 61-64 V.N., tau tau gahoa ato hoko e fakahikuaga he fakatokaaga he tau mena faka-Iutaia. Ka e, ko e tau lekua fakalalolagi, tuga e gahua he loto kaina, kua aoga lahi agaia. Ti kua lata tokoua e tane mo e hoana ke kuku mau e kitekiteaga malolo mo e mitaki ke he ha laua a tau matagahua he loto kaina “neke eke fakakelea e kupu he Atua.” Taha e ulu he magafaoa ne fakamolemole atu ke he tagata ahiahi ha kua fakama e levekiaga he hana fale. Ne fakamaama e ia kua nakai fakafou ai “kakano ha kua gahua paionia a ia.” Ko e mena nava ke taute e tautolu e tau poa ma e Kautu, ka e kua lata ke fakaeneene nakai ke fakamatematekelea e levekiaga he tau magafaoa ha tautolu.
8. Kua maeke fefe e tau ulu magafaoa ke leveki e tau manako he ha lautolu a magafaoa ke he puhala lagotatai?
8 Kua fakatonu age e Tohi Tapu ke he tau matua tane ke tuku fakamua ha lautolu a magafaoa, he talahau ko ia ne kaumahala ke foaki ma e hana a magafaoa “kua fakatikai e ia e tua, kua mua foki hana kelea kia ia kua faliuliu.” (1 Timoteo 5:8) Kua kehekehe e tau tutuaga moui he lalolagi katoa, ti kua mitaki ke fakatumau ke maimaina ke he tau amaamanakiaga he koloa tino. “Aua neke foaki mai e koe kia au e nofogati po ke muhu mena,” he liogi he tagata tohia he Tau Fakatai 30:8. Pete ni ia, kua nakai lata he tau matua ke fakaheu e tau manako koloa tino he ha lautolu a fanau. Ko e mena pulotu kia, ke fakatai, ke tiaki pauaki e tau koloa aoga lahi ma e hana magafaoa ke maeke ke tutuli e tau kotofaaga fakateokarasi? Nakai kia to fakaita he mena nei e fanau hana? He taha fahi, ne pehe he Tau Fakatai 24:27: “Kia taute e koe hāu a tau gahua i fafo, mo e fakalatalata ai ke he vao; ka mole ia ti ta ai e koe hāu a fale.” E, ha kua ha i ai e kapeletu ke he tau koloa tino, ko e ‘ta he hana a fale’—ke he puhala fakaagaga mo e ke he loto logonaaga—kua aoga lahi.
9. Ko e ha kua pulotu ai ma e tau ulu magafaoa ke manamanatu atu neke mate po ke gagao a lautolu?
9 Kua taute nakai e koe e tau foakiaga ke leveki aki hau a magafaoa neke matematekelea a koe he mate fakalutukia? Ne pehe he Tau Fakatai 13:22: “Kua tufatufa he tagata mahani mitaki hana tau mena ke he fanau he hana fanau.” Ke lafi atu ke he tufatufaaga he iloilo ki a Iehova mo e ke he fakafetuiaga mo ia, kua manako ai e tau matua ke foaki e tau koloa tino ma e ha lautolu a fanau. He tau motu loga kua lali e tau ulu magafaoa tokaga ke fai tupe ne fakaputu, fakamatafakatufono e manakoaga, mo e inisua. Ha ko e mena nakai tokanoa mai e tau tagata he Atua he “vaha mo e tau mena tutupu.” (Fakamatalaaga 9:11) Ko e tupe kua eke “mo mena ke malu ai,” mo e fa mahani e fakatokatokaaga mitaki ke puipui mai he tau mena uka. (Fakamatalaaga 7:12) He tau motu ne nakai totogi he fakatufono e levekiaga fakaekekafo, kua liga fifili e falu ke toka taha tupe ma e tau levekiaga he malolo tino po ke taute e falu puhala ke puipui e malolo tino.a
10. Ko e puhala fe ka liga “tatanaki” he tau matua Kerisiano ma e ha lautolu a fanau?
10 Kua pehe foki e tau Tohiaga Tapu: “Ko e mena nakai lata ke tatanaki he tau fanau ma e tau matua, ka ko e tau matua ma e fanau.” (2 Korinito 12:14) He lalolagi kua fa mahani e tau matua ke tatanaki e tupe ma e fakaakoaga mo e fakamauaga anoiha he ha lautolu a fanau ke moua ai e lautolu e kamataaga mitaki he moui. Kua manamanatu nakai a koe ke tatanaki ma e tuaga fakaagaga anoiha he tama hau? Kia fakalata, ke fakatai, kua tutuli he tama lahi e fekafekauaga mau. Pete ni kua nakai lata e tau fekafekau mau ke manako po ke amanaki ke lagomatai fakatupe he falu, liga lata he tau matua tokaga ke fifili ke ‘tufatufa e tau mena’ ke maeke ke lagomatai a ia ke tumau he fekafekauaga mau.—Roma 12:13; 1 Samuela 2:18, 19; Filipi 4:14-18.
11. Kua fakakite kia he kitekiteaga fakamoli ke he tupe e noa ke he tua? Kia fakamaama.
11 Ke kikite fakamoli atu ke he tupe kua nakai fakakite he naia e noa ke he tua kua teitei hoko ke he fakatulakiaga e fakatokaaga kelea ha Satani. Ko e fakakiteaga ni a ia he “iloilo” mo e fifiliaga fakalatalata. (Tau Fakatai 2:7; 3:21) Kua lagataha e mogo ne talahau e Iesu “kua mua e pulotu he tau tagata he mouiaga nai . . . , ke he tau tagata he maama” he ha lautolu a puhala fakaaoga tupe. (Luka 16:8) Ti, ko e mena haia ne kua kitia ai he falu e lata ke taute e tau fakahakohakoaga ke he puhala ne fakaaoga e lautolu ha lautolu a tau koloa, ke maeke ai ia lautolu ke leveki fakamitaki e tau manako he ha lautolu a tau magafaoa.
“Nonofo Fakalatalata” he ha Tautolu a Kitekiteaga ke he Fakaakoaga
12. Ko e puhala fe ne fakaako e Iesu hana tau tutaki ke lata mo e tau tutuaga fou?
12 “Ko e mena mole atu e mahani he lalolagi nai,” mo e ko e tau hikihikiaga lalahi he fahi fakatupe mo e tau tutupuaga fakasaiene kua holo ki mua e mafiti. (1 Korinito 7:31) Ka e, kua fakaako e Iesu hana tau tutaki ke hikihiki fano. Ne tala age a ia ki a lautolu he fakafano atu e ia a lautolu ke he ha lautolu a gahua fakamatala fakapa: “Aua neke uta ma mutolu e tau auro, po ke tau ario, po ke tau apa kula ke he tau pipi ha mutolu. Aua foki neke uta ha kato mo e fenoga; aua foki neke takiua e tau tapulu tino, po ke tau afialoalohui, po ke tokotoko; ha ko e mena lata e mena kai ke he tagata eke gahua.” (Mataio 10:9, 10) Ti, he mole matua atu e magaaho ia, ne talahau a Iesu: “Ko e tagata ne fai kato tupe, kia uta ai e ia, ti pihia foki mo e kato.” (Luka 22:36) Ko e heigoa kua hiki? Ko e tau tutuaga. Ko e takatakaiaga fakalotu kua mua atu e nakai fekapitigaaki, ti he mogonei kua lata ia lautolu ke tauteute e tau foakiaga ma lautolu ni.
13. Ko e heigoa e matapatu kakano he fakaakoaga, mo e maeke fefe e tau matua ke lagomatai ha lautolu a fanau ke he mena nei?
13 Ke tuga he vaha nei, liga kua lata he tau matua ke kikite fakamoli atu ke he fahi fakatupe he vaha nei. Ke fakatai, kua taute kia e koe e tau fakatokaaga ke moua he fanau hau e fakaakoaga kua lata? Kua lata e matapatu kakano he fakaakoaga ke tauteute aki e tama ke eke mo fekafekau mautali ha Iehova. Mo e ko e fakaakoaga ne mua e aoga mai he tau mena oti ko e fakaakoaga fakaagaga. (Isaia 54:13) Kua tupetupe foki e tau matua hagaao ke he lotomatala he ha lautolu a fanau ke lagomatai ni e lautolu a lautolu ke he puhala tupe. Ti kia tuku age ke he ha mutolu a fanau e takitakiaga, lagomatai a lautolu ke fifili e tau fakaakoaga he aoga na kua lata, mo e tutala mo lautolu ko e pulotu nakai ke tutuli ha fakaakoaga lafi ki luga po ke nakai. Ko e tau fifiliaga ia ko e matagahua fakamagafaoa, ti kua nakai lata he falu ke tuhituhi atu ke he puhala kua taute. (Tau Fakatai 22:6) Ka e kua a lautolu ne fifili ke fakaako ha lautolu a fanau he loto kaina?b Pete ni kua tokologa ne kautu ke he gahua ia, ko e falu kua moua e matagahua ia ke uka lahi mai he mena ne manatu a lautolu, ti kua lauia kelea tuai ha lautolu a fanau. Ti kaeke kua manamanatu a koe ke he fakaakoaga he kaina, kia fakamua ke totou e totogi, he fuafua fakamoli kua ha ha nakai ia koe e lotomatala mo e fakauka fakatagata ke maeke ke fakatumau ki ai.—Luka 14:28.
‘Aua Neke Kumi e Tau Mena Lalahi’
14, 15. (a) Kua galo fefe ia Paruka hana a lagotatai fakaagaga? (e) Ko e ha ne kua goagoa ai ki a ia ke ‘kumi e tau mena lalahi’?
14 Ha kua nakaila hoko mai e fakahikuaga he lalolagi nei, liga to eke e falu ke haga atu ke kumi e tau mena ne fakaohooho mai he lalolagi—ko e tau feua talahaua, tau gahua tupe lalahi, mo e muhu koloa. Kia onoono atu ke he tohikupu ha Ieremia, ko Paruka. Ne tagi a ia: “Oi te fakaalofa kia au! ha kua lafilafi e Iehova e mānu ke he haku a mamahi; kua oti haku manava he tauoi au, nakai moua e au ha okiokiaga.” (Ieremia 45:3) Kua mategugu a Paruka. Ke fekafekau mo tohikupu ha Ieremia ko e gahua uka mo e tupetupe lahi. (Ieremia 36:14-26) Mo e kua nakai kitia ai ha fakaotiaga ke he tupetupeaga. To 18 la e tau tau ato fakaotioti a Ierusalema.
15 Ne tala age a Iehova ki a Paruka: “Kitiala, ko e mena ne ati hake e au, to ulu e au ki lalo, ko e mena foki ne to e au, to taaki ai e au; ko e motu oti nai haia. Ko koe foki, kua kumi kia e koe e tau mena lalahi māu? Aua neke kumi.” Kua galo ai e lagotatai ha Paruka. Ne kamata a ia ke ‘kumi e tau mena lalahi ma hana ni,’ liga fakalata ko e muhu koloa, talahaua, po ke puipuiaga fakatino. Ha kua ‘taaki [e Iehova] e tau motu oti,’ ko e heigoa e kakano ne talahau ai ke kumi e tau mena ia? Ati tuku age e Iehova ki a Paruka e fakamanatuaga kakano nei: “To fakahoko e au e malaia ki luga he tau tagata oti . . . , ka to ta atu e au hau a moui kia koe, ke eke mo mena ne moua he tau ke he tau mena oti ke fano a koe ki ai.” To nakai hao e tau koloa fakatino mai he fakaotiotiaga ha Ierusalema! Kua fakamoli ni hokoia e Iehova e fakamouiaga he hana ‘solu ke eke mo mena moua he tau.’—Ieremia 45:4, 5.
16. Ko e heigoa e fakaakoaga ne kua maeke he tau tagata ha Iehova ke ako mai he mena ne tupu ki a Paruka?
16 Ne omaoma a Paruka ke he fakahakoaga ha Iehova, mo e, moli ke he maveheaga ha Iehova, ne hao a Paruka ke he hana a moui! (Ieremia 43:6, 7) Ko e fakaakoaga malolo ha ia ma e tau tagata ha Iehova he vaha nei! Nakai ko e magaaho anei ke ‘kumi e tau mena lalahi ma ha tautolu.’ Ko e ha? Kakano “ha ne mole atu foki e lalolagi katoa mo e hana tau manako lahi.”—1 Ioane 2:17.
Ko e Fakaaogaaga Mitaki Lahi he Magaaho ne Toe
17, 18. (a) Kua fefe e logonaaga ha Iona he magaaho ne tokihala e tau Nineva? (e) Ko e heigoa e fakaakoaga ne fakakite age e Iehova ki a Iona?
17 Kua maeke fefe, mogoia, ia tautolu ke fakaaoga fakamitaki e magaaho ne toe? Kia ako e tau mena ne tupu ke he perofeta ko Iona. Ne “fano [a ia] ki Nineva . . . ti ui age a ia kua pehe, Kua toe fagofulu e po ti fakaoti a Nineva.” Kua ofo ai a Iona, he talia he tau Nineva hana ogo mo e tokihala! Ne taofi mai ai a Iehova he fakaotioti e maaga. Ko e logonaaga ha Iona? “Iehova na e, kua ole atu e au kia koe, ke uta kehe e koe haku a moui, ha kua mitaki ke mate au, ka e kelea ke moui.”—Iona 3:3, 4; 4:3.
18 Ati fakakite ai e Iehova ki a Iona e fakaakoaga mua e aoga. “Ti fakatupu ai e [Ia] e kakaiona ti fakavihi ai a ia ki luga a Iona, ti eke a ia mo fakamalu ki luga hana ulu . . . Ti fiafia lahi a Iona ha ko e kakaiona.” Ka e, kua ku lahi e fiafia ha Iona, he fifigo vave e akau. Kua eke ai a Iona ke “ita” ha ko e hana nakai hagahaga mitaki. Ati peehi age e Iehova e kakano Hana, he talahau: “Kua fakaalofa a koe ke he kakaiona . . . Ka e nakai kia fakaalofa au ki Nineva ko e maga lahi, ha ha i ai e tau tagata kua mua he tokologa ke he taha teau uafulu e afe, kua nakai iloa e lautolu po ko fe e lima matau ha lautolu, po ko fe e lima hema ha lautolu, ti ha ha i ai foki e tau manu huifa loga.”—Iona 4:6, 7, 9-11.
19. Ko e heigoa e manamanatuaga fulukovi kua lata ia tautolu ke kalo mai ai?
19 Kua fulukovi ha e fakamaamaaga ha Iona! Kua eke a ia ke fakaalofa ke he akau, ka e nakai mafai a ia ke fakaalofa ke he tau tagata ha Nineva—ko e tau tagata, he puhala fakaagaga, ne “nakai iloa e lautolu po ko fe e lima matau ha lautolu, po ko fe e lima hema ha lautolu.” Liga kua pihia foki a tautolu ke manako atu ke he fakaotiotiaga he fakatokaaga kelea nei he lalolagi mo e kua hako ke pihia! (2 Tesalonia 1:8) Ka e, he fakatalitali ai kua ha ha ia tautolu e matagahua ke lagomatai e tau tagata loto fakamoli, he puhala fakaagaga, ne kua nakai ‘iloa ha lautolu a lima matau mai he ha lautolu a lima hema.’ (Mataio 9:36; Roma 10:13-15) To fakaaoga nakai e koe e magaaho ku ne toe ke lagomatai e tokologa ke he mena kua maeke ia koe ke moua e iloilo mua ue atu ha Iehova? Ko e heigoa foki e gahua ne tatai ke he fiafia he lagomatai e falu tagata ke moua e moui?
Kia Fakatumau ke “Nonofo Fakalatalata”
20, 21. (a) Ko e heigoa e falu puhala ne kua maeke ia tautolu ke fakatata e “nonofo fakalatalata” he magahala he tau aho i mua? (e) Ko e heigoa e monuina ka moua mai he “nonofo fakalatalata”?
20 Ha kua fakatumau e fakatokaaga ha Satani ke uku atu ke he fakaotiotiaga, ko e tau totokoaga fou kua moli ni ke fehagai mo tautolu. Ne talahau tuai mai he 2 Timoteo 3:13: “Ko e tau tagata mahani kelea mo e tau tagata kua fakavai, to tolomaki atu a lautolu ke au atu he kelea.” Ka e aua “neke fakalolelole ha mutolu a tau loto mo e nakai fahia.” (Heperu 12:3) Kia falanaki ki a Iehova ma e fakamaloloaga. (Filipi 4:13) Kia ako ke fakamolulu, ke lata mo e tau tutuaga kelea ue atu nei, ka e nakai manamanatu ke he tau mena kua mole. (Fakamatalaaga 7:10) Kia fakaaoga e pulotu, he fakatumau atu ke he hatakiaga ne foaki mai he “fekafekau fakamoli mo e loto matala.”—Mataio 24:45-47.
21 Ko e fiha e loa he magaaho ne toe kua nakai iloa e tautolu. Pete ni ia, kua maeke ia tautolu ke talahau mo e mauokafua “kua tata mai tuai e fakatulakiaga he tau mena oti.” Ato hoko mai e fakatulakiaga ia, kia o mai a a tautolu ke “nonofo fakalatalata” he ha tautolu a tau fakafehagai mo e falu, ke he puhala ne tokaga a tautolu ma e ha tautolu a tau magafaoa, mo e ke he ha tautolu a tau matagahua fakalalolagi. He taute pihia, kua lata ia tautolu oti ke mauokafua to fakahiku ai a tautolu ke moua e “monuina, kua nakai fai ila, mo e nakai talahaua kelea”!—2 Peteru 3:14.
[Tau Matahui Tala]
a He Tau Fahi Kaufakalataha, ke fakatai, kua tokologa ne fai inisua ma e tau momoui, pete ni he tau mamafa e tau mena ia. Kua iloa he falu magafaoa Fakamoli e falu toketa ne fakamakai ke fakaaoga e taha puhala nakai fai toto ka eke ke fai puipuiaga fakaekekafo e tau magafaoa. Tokologa e tau ekekafo ka talia e totogi ne fakaata he fakatokaaga fakakaupa he inisua po ke puipuiaga he malolo tino mai he fakatufono.
b Ka tutuli he taha e fakaakoaga he kaina ko e fifiliaga fakatagata a ia. Kikite e vala tala “Fakaakoaga he Kaina—Ma Hau Kia?,” ne ha ha he fufuta tohi ia Aperila 8, 1993, he Awake!
Tau Matakupu Fakamanatu
◻ Maeke fefe ia tautolu ke fakakite e “nonofo fakalatalata” he ha tautolu a tau fakafetuiaga fakatagata?
◻ Maeke fefe ia tautolu ke fakakite e lagotatai he tokaga atu ke he ha tautolu a tau matagahua fakamagafaoa?
◻ Ko e ha ne kua lata ai e tau matua ke fakakite e fiafia ke he fakaakoaga fakalalolagi he ha lautolu a fanau?
◻ Ko e heigoa e tau fakaakoaga ne ako mai e tautolu ia Paruka mo Iona?
[Fakatino he lau 12]
He magaaho ne eke fakakelea e tane mo e hoana e taha ke he taha, kua fakalolelole tuai e laua e fakafetuiaga ha laua mo Iehova
[Fakatino he lau 14]
Kua lata e tau matua ke fakakite e fiafia ke he fakaakoaga he ha lautolu a fanau