Iehova, ko e Atua kua “Fakamagalo e Tau Hala”

“Ha ko koe, ko e Iki na e, kua mitaki ni a koe, ti fakamagalo e tau hala.”​—SALAMO 86:5.

1. Ko e heigoa e kavega mamafa ne fua he Patuiki ko Tavita, ti moua fefe e ia e fakamafanaaga ke he hana loto tupetupe?

NE ILOA he Patuiki ko Tavita i Isaraela i tuai e mamafa he manamanatuaga hala. Ne tohi e ia: “Ha kua hoko ni haku a tau hala ki luga hoku ulu; ne tuga e kavega mamafa, kua pehia ai au. Kua lolelole lahi na au, kua malipilipi lahi ni au; kua fakatutū au ha ko e oi he haku a loto.” (Salamo 38:4, 8) Pete ia, ne moua e Tavita e mafanatia ke he hana a loto tupetupe. Ne iloa e ia ha kua vihiatia e Iehova e agahala, kua nakai vihiatia e ia e tau tagata agahala​—kaeke kua tokihala moli a ia mo e tiaki e puhala agahala hana. (Salamo 32:5; 103:3) Mo e tua katoatoa ke he amanaki lahi a Iehova ke foaki e fakaalofa hofihofi ke he tau tagata tokihala, ne pehe a Tavita: “Ha ko koe, ko e Iki na e, kua mitaki ni a koe, ti fakamagalo e tau hala.”​—Salamo 86:5.

2, 3. (a) Ka agahala a tautolu, ko e heigoa e kavega ka maeke ke hahamo e tautolu ha ko e fua ia, mo e ko e ha kua aoga e mena nei? (e) Ko e heigoa e hagahaga kelea “neke mahala” he agahala? (i) Ko e heigoa e fakamoliaga kua foaki mai he Tohi Tapu ki a tautolu hagaao ke he amanaki lahi a Iehova ke fakamagalo?

² Ka agahala a tautolu, ko e fakahikuaga to hahamo foki e tautolu e pehia he malipilipi he manamanatuaga mamahi. Ko e logonaaga pehia nei kua nakai kehe, kua aoga lahi foki. Kua omoi a tautolu ke taute e tau lakaaga kua tonu ke fakahako ha tautolu a tau hepehepe. Ka ko e falu Kerisiano, kua pehia lahi ha ko e hala. Ko e vihiatia ha lautolu he loto kua liga ke fakaohooho to nakai fakamagalo katoatoa ai he Atua a lautolu, pete ni kua lahi e fakatokihala ha lautolu. “Ko e mena fakalolelole ke manamanatu kua nakai fakaalofa a Iehova ki a koe,” he talahau he taha matakainaga fifine, he manatu e hepehepe ne taute e ia. He mole e fakatokihala hana mo e talia e fakatonuaga lagomatai mai he tau motua he fakapotopotoaga, ne fakatumau ni a ia ke logona e nakai lata mo e fakamagaloaga he Atua. Ne fakamaama e ia: “Ne ole au he tau aho oti ki a Iehova ma e hana a fakamagaloaga.” Kaeke “neke mahala” a tautolu ke he momoko lahi, to lali a Satani ke taute a tautolu ke lolelole, ke logona kua nakai lata he fekafekau ki a Iehova.​—2 Korinito 2:5-7, 11.

³ Ka e nakai pihia e onoonoaga a Iehova ki ai! Kua fakamoli he hana a Kupu ki a tautolu ka fakakite e tautolu e fakatokihala moli mai he loto, to mautali, e mautali a Iehova ke fakamagalo. (Tau Fakatai 28:13) Kaeke ke hagahaga kua nakai fai fakamagaloaga e Atua ki a koe, liga kua lata ke maama mitaki e kakano mo e puhala ka fakamagalo e ia.

Ko e Ha a Iehova kua “Fakamagalo e Tau Hala”?

4. Ko e heigoa kua manatu e Iehova ke he tauteaga ha tautolu, mo e kua lauia fefe e mena nei ke he puhala ne taute aki e ia a tautolu?

⁴ Kua totou e tautolu: “Tuga ne vaha mamao e fahi uta mo lalo, kua fakamamao pihia e ia ia tautolu ha tautolu a tau holifono. Tuga ne hofihofi e fakaalofa he matua ke he hana fanau, kua hofihofi pihia e fakaalofa a Iehova kia lautolu kua matakutaku kia ia.” Ko e ha kua hagahaga a Iehova ke fakakite e fakaalofa hofihofi? Kua tali mai he kupu ne mui mai: “Ha kua fioia e ia e mena ne eke aki a tautolu; kua manatu e ia ko e kelekele ni a tautolu nai.” (Salamo 103:12-14) E, nakai nimo e Iehova kua taute mai a tautolu he kelekele, fai matulituli, po ke tau lolelole, ti ko e fua he nakai mitaki katoatoa. Ko e talahauaga kua fioia e ia e “mena ne eke aki a tautolu” kua fakamanatu mai kua fakatatai he Tohi Tapu a Iehova ke he tagata eke kapiniu kelekele mo tautolu ko e tau kapiniu kua eke e ia.a (Ieremia 18:2-6) Kua taute fakamalolo he tagata eke kelekele e kelekele ka e mailoga foki e tauteaga ha lautolu. Ti, pihia foki a Iehova, ko e Peresona Eke Kelekele ne Mua, kua fakalaulau hana tau fehagaiaga mo tautolu hagaao ke he tauteaga agahala ha tautolu kua matulituli.​—Fakatatai 2 Korinito 4:7.

5. Fakamaama fefe he tohi a Roma e malolo lahi he pili he agahala ke he tino hala ha tautolu?

⁵ Kua maama e Iehova e malolo lahi mahaki he agahala. Kua fakamaama he tau Tohiaga Tapu e agahala ko e malolo fakaohooho ne kua pili mate ke he tagata. Ko e fefe la e malolo he agahala ka pili? Ke he tohi a Roma, kua fakamaama he aposetolo omoomoi he agaga ko Paulo e mena nei ke he tau kupu maaliali: Kua ‘nonofo mo e hala’ a tautolu, tuga e tau kautau kua ha ha i lalo he pule he takitaki ha lautolu (Roma 3:9); kua “kautu” e hala ke he tau tagata tuga e patuiki (Roma 5:21); kua “nofo i loto” ia tautolu (Roma 7:17, 20); kua fakatumau e “fakatufono” ke gahua i loto ia tautolu, he lali ke takitaki e puhala ha tautolu. (Roma 7:23, 25) Ko e uka ha ia he tauaga ia ki a tautolu ke totoko e taofiaga malolo he agahala kua piki mai ke he tino hala ha tautolu!​—Roma 7:21, 24.

6. Fefe e onoonoaga a Iehova ki a lautolu kua kumi hana fakaalofa hofihofi mo e loto tokihala?

⁶ Ka e, iloa he Atua fakaalofa hofihofi ha tautolu ko e omaoma mitaki katoatoa kua nakai maeke ia tautolu, pete ni ko e lahi fefe e mena ne manako e tau loto ha tautolu ke tuku age ki a ia. (1 Tau Patuiki 8:46) Kua fakaalofa a ia he talahau moli ki a tautolu ka kumi e tautolu e fakaalofa hofihofi fakamatua tane hana mo e loto tokihala, to fakakite e ia e fakamagaloaga. Ne pehe e salamo ko Tavita: “Ko e tau poa ke he Atua ko e loto malipilipi ia; ko e Atua na e, nakai vihiatia e koe e loto malipilipi mo e pehia.” (Salamo 51:17) To nakai tiaki e Iehova, po ke fakahaga kehe, e tagata loto malipilipi mo e pehia ha ko e tau kavega he hala. Kua fuluola ha ia e fakamaamaaga ke he mautali a Iehova ke fakamagalo e tau hala!

7. Ko e ha ne nakai falanaki a tautolu ke he fakaalofa hofihofi he Atua?

⁷ Kua kakano kia e mena nei, ke falanaki a tautolu ke he fakaalofa hofihofi he Atua, he fakaaoga e agahala pauaki ha tautolu ke eke mo piu ke he agahala? Nakai pihia! Nakai takitaki a Iehova ha ko e tau manatu noa. Fai fakakaupaaga e fakaalofa hofihofi hana. To nakai fakamagalo e ia a lautolu ne taute mo e fakahululoto ti taute pauaki mo e nakai fai fakamagaloaga. (Heperu 10:26-31) Ke he taha fahi, ka kitia e ia e loto “malipilipi mo e pehia,” kua “fakamagalo” e ia. (Tau Fakatai 17:3) Kia manamanatu la tautolu ke he falu vagahau aoga lahi ne fakaaoga he Tohi Tapu ke fakamaama e katoatoa he fakamagaloaga faka-Atua.

Katoatoa Fefe e Fakamagalo a Iehova?

8. Ko e heigoa ka taute e Iehova, ka fakamagalo e ia e tau agahala ha tautolu, ti ko e heigoa e lauiaaga he mena nei ki a tautolu?

⁸ Ne pehe e patuiki fakatokihala ko Tavita: “Ti fakakite atu e au kia koe haku a hala, ti nakai fufu foki e au haku a mahani hepehepe; ne pehe au, To fakakite e au haku a holifono kia Iehova; ti fakamagalo ni e koe e kelea he haku a hala.” (Salamo 32:5) Ko e kupu “fakamagalo” kua fakaliliu e kupu Heperu kua kakano “nikiti,” “fua, po ke hahamo.” Kua fakaaoga ai pehenei ke ‘utakehe e hala.’ Ti nikiti e Iehova e tau agahala a Tavita mo e uta ai fakamamao. (Fakatatai Levitika 16:20-22.) Nakai fakauaua ai kua fakatotoka e tau logonaaga he hala ne hahamo ai e Tavita. (Fakatatai Salamo 32:3.) Kua maeke foki ia tautolu ke mauokafua katoatoa ke he Atua ke fakamagalo e tau agahala ha lautolu kua kumi e fakamagaloaga he fakave ha lautolu a tua ke he poa lukutoto ha Iesu Keriso. (Mataio 20:28; fakatatai Isaia 53:12.) Ko lautolu kua nikiti e Iehova e tau agahala mo e utakehe ai kua nakai lata ke fakatumau ke hahamo e kavega he tau logonaaga hala ha ko e tau agahala kua mole.

9. Ko e heigoa e kakano he tau kupu a Iesu: “Kia fakamagalo e koe kia mautolu ha mautolu a tau hala”?

⁹ Ne fakaaoga e Iesu e fakafetuiaga he tau tagata oko kaitalofa mo e tau tagata ne kaitalofa ke fakatai aki e puhala fakamagalo a Iehova. Ma e fakatai, ne fakamafana e Iesu a tautolu ke liogi: “Kia fakamagalo e koe kia mautolu ha mautolu a tau hala.” (Mataio 6:12) Kua fakatai e Iesu e “tau hala” ke he tau “eke fakakelea.” (Luka 11:4) Ka agahala a tautolu, kua “eke fakakelea” a tautolu ki a Iehova. Ko e kupu fakagahuahua faka-Heleni ne fakaliliu “fakamagalo” kua kakano ke “fakatoka, tiaki, eke fakakelea, he nakai peehi ai.” He puhala, ka fakamagalo e Iehova, ne nakai fakahoko e ia e hala ka tuga ke totogi fakahala a tautolu. Ti maeke he tau tagata agahala kua fakamagalo ke mafanatia ai. Kua nakai peehi a Iehova ke totogi e tau kaitalofa ne fakamagalo e ia!​—Salamo 32:1, 2; fakatatai Mataio 18:23-35.

10, 11. (a) Ko e heigoa e fakatino ne fakakite he talahauaga “holoholo kehe,” ne moua he Gahua 3:19? (e) Fakataitai fefe e katoatoaaga he fakamagaloaga a Iehova?

¹⁰ Ia Gahua 3:19, kua fakaaoga he Tohi Tapu e taha fakataiaga ke fakamaama e fakamagaloaga he Atua: “Hanai, kia tokihala a a mutolu, mo e mafokifoki a mutolu, kia holoholo kehe ai ha mutolu a tau hala.” Ko e talahauaga ‘holoholo kehe’ kua fakaliliu ai e kupu fakagahuahua Heleni, ka fakaaoga ai fakametafoa, kua kakano ai ke “holoholo kehe, tiaki, fakamagalo po ke moumou.” Hagaao ke he falu tagata fakaako tokoluga, kua fakakite he talahauaga e hihika kehe he matatohi. Maeke fefe e mena nei? Ko e vaitohi ne fa fakaaoga he tau vaha i tuai kua taute mai he fiofioaga kua putoia e vai uli, pili, mo e vai. Nakai leva e fakaaoga e vaitohi, to uta he tagata e omomi pala mo e fakamea aki e tau matatohi.

¹¹ Ko e fakatino fuluola haia he katoatoa he fakamagaloaga a Iehova. Ka fakamagalo e ia e tau agahala ha tautolu, kua tuga kua uta e ia e omomi mo e fakamea aki ai. Kia nakai matakutaku a tautolu to manatu e ia e tau agahala ia ha tautolu he vaha i mua, ha kua fakakite mai he Tohi Tapu taha mena kehe hagaao ke he fakaalofa hofihofi a Iehova kua kehe lahi moli: Ka fakamagalo a ia, kua nimo e ia!

“Nakai Tuai Manatu e Au ha Lautolu a Tau Hala”

12. He pehe e Tohi Tapu kua nimo e Iehova e tau agahala ha tautolu, kua kakano kia kua nakai liu manatu e ia, mo e ko e ha ne tali pihia ai a koe?

¹² Puhala he perofeta ko Ieremia, ne mavehe e Iehova hagaao ki a lautolu he maveheaga fou: “To fakamagalo e au ha lautolu a tau mahani kelea, mo e nakai tuai manatu e au ha lautolu a tau hala.” (Ieremia 31:34) Kakano kia e mena nei ka fakamagalo e Iehova kua nakai maeke ia ia ke liu manatu e tau agahala? Nakai pihia e mena ka tupu. Kua talahau he Tohi Tapu ki a tautolu e tau agahala he tau tagata tokologa ne fakamagalo e Iehova, putoia foki a Tavita. (2 Samuela 11:1-17; 12:1-13) Kua mailoga agaia ni e Iehova e tau hehe ne taute e lautolu, ti kua maeke ke pihia foki a tautolu. Ko e fakamauaga he tau agahala ha lautolu, ti pihia foki e fakatokihalaaga ha lautolu mo e fakamagaloaga mai he Atua, ne fakamau ai mo fakaakoaga ma tautolu. (Roma 15:4) Ti ko e heigoa mogoia, e kakano he Tohi Tapu he talahau kua nakai “manatu” e Iehova e tau agahala ha lautolu ne fakamagalo e ia?

13. (a) Ko e heigoa kua putoia e kakano he kupu fakagahuahua Heperu “to manatu e au”? (e) He magaaho ne pehe a Iehova, “Nakai tuai manatu ha lautolu a tau hala,” ko e heigoa kua talahau moli mai e ia ki a tautolu?

¹³ Ko e kupu fakagahuahua Heperu ne fakamaama “manatu e au” kua hagahaga ke lahi atu e kakano mai he liu manatu e vaha kua mole. Hagaao ke he Theological Wordbook of the Old Testament, kua lauia ai foki e “putoia ki ai he taute e fakagahuaaga kua tonu.” Ti, ke he puhala nei, ke “manatu” e agahala kua putoia ai e fakagahuahuaaga ke he tau tagata agahala. He magaaho ne pehe e perofeta ko Hosea hagaao ke he tau Isaraela mahani kelea, “To manatu ai e ia [Iehova] ha lautolu a mahani kelea,” ne kakano e perofeta to fai mena a Iehova ka taute ke he nakai fai fakatokihalaaga ha lautolu. Ti, kua lafi he vala ne toe he kupu: “To taui atu e ia e tau hala ha lautolu.” (Hosea 9:9) Ke he taha fahi, he magaaho kua talahau a Iehova, “Nakai tuai manatu e au ha lautolu a tau hala,” kua talahau moli a ia ki a tautolu ka lagataha e fakamagalo e ia e tagata tokihala, to nakai totoko atu a ia ki a ia ha ko e tau agahala ia ke he falu vaha i mua. (Esekielu 18:21, 22) Kua nimo e ia ke he puhala kua nakai fatiaki tumau e ia e tau agahala ha tautolu ke eke fakakelea po ke fakahala tumau a tautolu. Kua fakatoka e Iehova e fakafifitakiaga mua ue atu ma tautolu ke fifitaki ka fakafehagai a tautolu mo e falu. Ka tutupu mai e fekehekeheaki, kua mitaki lahi ke nakai manatu tumau e tau ita i tuai ne kua talia a koe mogoia ke fakamagalo.

Ka e Kua e Tau Fua Fakahiku?

14. Ko e ha e fakamagaloaga kua nakai kakano kua tokanoa mai e tagata agahala kua tokihala mai he tau fua oti he hana a puhala hepe?

¹⁴ Kua kakano kia e mautali a Iehova ke fakamagalo kua vevehe kehe e tagata agahala ne tokihala mai he tau fua he puhala hehe hana? Nakai pihia. To nakai tokanoa a tautolu ka agahala. Ne tohi e Paulo: “Ha ko e mena kua gana he tagata, ko e mena ia ni ke helehele mai e ia.” (Kalatia 6:7) Kua liga fehagai a tautolu mo e falu he tau fua he ha tautolu a gahua po ke tau mena vihi, ka e he mole atu e foaki e fakamagaloaga, ne nakai fakatupu e Iehova e faitaua ke fakamamafa aki a tautolu. Ka tutupu e tau mena fakatupetupe, kua nakai lata he Kerisiano ke logona hifo, ‘Liga kua fakahala e Iehova au ha ko e tau agahala i tuai.’ (Fakatatai Iakopo 1:13.) Ke he taha fahi, nakai tokanoa e Iehova a tautolu mai he tau lauiaaga oti he tau gahua hepe ha tautolu. Tau vevehe, fatu noa, gagao utafano he mahani fakatane mo e fifine, nakai tuaha po ke fakalilifu ki ai​—ko e tau mena oti nei liga ko e tau fua momoko he agahala, mo e nakai puipui e Iehova a tautolu mai he tau mena ia. Liu manatu ai pete ne fakamagalo e ia a Tavita ma e hana tau agahala mo Patisepa mo Uria, nakai puipui e Iehova a Tavita mai he tau fua matematekelea ne mui mai.​—2 Samuela 12:9-14.

15, 16. Aoga fefe e fakatufono ne fakamau ia Levitika 6:1-7 ke he tagata nakai agahala mo e tagata hehe?

¹⁵ Liga fai fua foki e tau agahala ha tautolu. Manamanatu, ma e fakatai, ke he talahauaga ia Levitika veveheaga 6. Kua talahau he Fakatufono faka-Mose hinei e tuaga ka taute he tagata e hepe kelea lahi he uta pulenoa e tau koloa he matakainaga Isaraela he kaiha, fakakeukeu, po ke fakavaivai. Kua fakatikai he tagata agahala kua hala a ia, ti pihia foki he fakamalolo ke omonuo fakavai. Ko e taufetokoaki ka e nakai fai fakamoliaga. Nakai leva, mogoia, kua ligoia e tagata hehe ke he manamanatuaga mo e talahau hana agahala. Ke moua e fakamagaloaga he Atua, kua lata ke tolu foki e mena ka taute e ia: liuaki e mena ne uta e ia, totogi e tagata ia 20 e pasene he fakahala, mo e poa e punua mamoe ko e poa agahala. Ti, talahau e fakatufono: “Ti eke ai he ekepoa e lukutoto mana ki mua a Iehova, ti fakamagalo ai a ia.”​—Levitika 6:1-7; fakatatai Mataio 5:23, 24.

¹⁶ Ko e fakatufono nei ko e foakiaga fakaalofa hofihofi mai he Atua. Kua aoga ma e tagata nakai agahala, he kua liuaki ai e koloa mo e nakai fakauaua kua totoka ai e logonaaga he talahau ai he tagata hehe hana agahala. He magaaho taha ia, kua aoga e fakatufono ki a ia kua hoko ke he magaaho fakahiku ti omoi a ia ke talahau hana hala mo e fakahako hana hepe. Moli ai, ka nakai talia a ia ke taute pihia, to nakai fai fakamagaloaga ma hana mai he Atua.

17. Ka mamahi falu ha ko e tau agahala ha tautolu, ko e heigoa e amanakiaga a Iehova ke taute e tautolu?

¹⁷ Pete ne nakai nonofo a tautolu he Fakatufono faka-Mose, kua foaki mai ki a tautolu e maamaaga uho ke he manatu a Iehova, putoia ai e kitiaaga hana ke he fakamagaloaga. (Kolose 2:13, 14) Ka fakamamahi po ke eke fakakelea e falu ha ko e tau agahala ha tautolu, kua fiafia a Iehova kaeke ke taute e tautolu ke ‘tonu.’ (2 Korinito 7:11) Kua putoia ai e mena nei he talahau e agahala ha tautolu, fakakite e hala ha tautolu, mo e fakamolemole foki ke he tagata nakai agahala. Ti tutu a tautolu ki mua a Iehova ke he fakaveaga he poa a Iesu mo e olioli e totokaaga he manamanatuaga mea mo e fakamoliaga kua fakamagalo tuai he Atua.​—Heperu 10:21, 22.

18. Ko e heigoa e akonakiaga kua fakalataha mo e fakamagaloaga a Iehova?

¹⁸ Tuga ni ha matua fakaalofa, maeke ia Iehova ke foaki e fakamagaloaga mo e fuafuaaga he akonakiaga. (Tau Fakatai 3:11, 12) Ko e Kerisiano tokihala kua maeke ke fakaoti hana tau kotofaaga he fekafekau ko e motua, fekafekau lagomatai, po ke paionia. Kua fakamamahi lahi ki a ia ke galo e tau kotofaaga he magaaho ia ne kua uho ki a ia. Ko e akonakiaga pihia, nakai kakano kua galo e ia e taliaaga a Iehova po ke kua utakehe e fakamagaloaga a Iehova. He lafi ki ai, kua lata ke manatu e tautolu ko e akonakiaga mai ia Iehova ko e fakatonuaga he hana a fakaalofa ki a tautolu. He talia mo e fakagahua ai ke he tau manako mitaki lahi ha tautolu mo e ke takitaki atu ke he moui tukulagi.​—Heperu 12:5-11.

19, 20. (a) Ka taute e koe e tau mena hepe, ko e ha kua nakai lata ia koe ke logona hifo kua nakai ha ha i ai e fakaalofa hofihofi a Iehova? (e) Ko e heigoa ka fakatutala ke he vala tala ka hau?

¹⁹ Kua fakamalolo ha ia ke iloa kua fekafekau a tautolu ke he Atua kua “fakamagalo e tau hala”! Kua lahi atu e mena ne kitia e Iehova ke he tau agahala mo e tau hepe ha tautolu. (Salamo 130:3, 4) Kua iloa e ia e mena ne toka he tau loto ha tautolu. Ka logona e koe kua malipilipi mo e pehia e loto hau ha ko e tau hepe kua mole, kia nakai fakaoti aki kua nakai fai fakaalofa hofihofi a Iehova ki a koe. Pete ni kua ha ha ai e tau hehe kua taute e koe, ka tokihala fakamoli a koe, he taute e tau lakaaga ke fakatonu aki, mo e liogi fakamakamaka ma e fakamagaloaga a Iehova he fakave ke he toto ne liligi e Iesu, to maeke ia koe ke mauokafua katoatoa kua hagaao e tau kupu he 1 Ioane 1:9 ki a koe: “Kaeke ke fakakite e tau hala ha tautolu, kua fakamoli a ia mo e mahani tututonu ke fakamagalo ai e tau hala he tautolu, mo e fakamea a tautolu he tau mahani hepehepe oti kana.”

²⁰ Kua fakamalolo he Tohi Tapu ke fifitaki e tautolu e fakamagaloaga a Iehova he tau fakafehagaiaga ha tautolu ke he taha. Amanaki a tautolu ke hoko atu ki fe e fakamagalo mo e nimo ka agahala mai e falu ki a tautolu? To fakatutala ke he mena nei he vala tala ka hau.

[Matahui Tala]

To Tali Fefe e Koe?

◻ Ko e ha a Iehova kua “fakamagalo e tau hala”?

◻ Fakamaama fefe he Tohi Tapu e katoatoaaga he fakamagaloaga a Iehova?

◻ Ka fakamagalo a Iehova, ke he puhala fe ka nimo e ia?

◻ Ko e heigoa kua amanaki a Iehova ki a tautolu ke taute atu ke he falu ka mamahi ha ko e tau agahala ha tautolu?

[Fakatino he lau 24]

Ka mamahi falu ha ko e tau agahala ha tautolu, kua amanaki a Iehova ki a tautolu ke fakatonu