Ko e Tau Mamoe Kehe mo e Maveheaga Fou

“Ko e tau tagata kehe . . . ko lautolu oti kua omaoma ke he aho sapati ka e nakai holi ai e lautolu, mo e taofi mau e lautolu haku a maveheaga. To tamai e au a lautolu ke he haku a mouga tapu.”​—ISAIA 56:6, 7.

1. (a) Hagaao ke he fakakiteaga a Ioane, ko e heigoa kua fakamoli ka e tautaofi e tau matamatagi he fakafiliaga ha Iehova? (e) Ko e heigoa e moto tagata ue atu ne kitia e Ioane?

KE HE fakakiteaga ke fa aki he tohi he Fakakiteaga, ne kitia he aposetolo ko Ioane kua tautaofi e tau matagi moumou he fakafiliaga ha Iehova ka e fakakatoatoa e tau tagata oti he “Isaraela he Atua.” Ko lautolu fakamua hanei ka fakamonuina puhala mai ia Iesu, ko e matapatu he tega a Aperahamo. (Kalatia 6:16; Kenese 22:18; Fakakiteaga 7:1-4) Ke he fakakiteaga taha ia, ne kitia e Ioane e “moto tagata tokologa, kua nakai maeke ia taha ke totou, mai he tau motu oti, mo e tau faoa, mo e tau tagata kehekehe, mo e tau vagahau kehekehe, . . . kua tauui foki a lautolu mo e leo lahi, kua pehe atu, Ko e fakamouiaga ha he Atua ha tautolu, ko ia kua nofo ke he nofoaiki, katoa mo e Punua mamoe.” (Fakakiteaga 7:9, 10) He talahau, ‘Ko e fakamouiaga ha he Punua mamoe,’ kua fakakite he moto tagata tokologa kua fakamonuina foki a lautolu he puhala he Tega ha Aperahamo.

2. Kitia ine fe e moto tagata, ti fakakite fefe a lautolu?

² Kua mailoga e moto tagata tokologa nei he 1935, mo e he vaha nei kua molea ai e lima e miliona. Fakamailoga ai ke fakahao mai he matematekelea lahi, ko e tau tagata i ai to vehevehe ai ma e moui tukulagi ka vehe ai e Iesu e “tau mamoe” mai he “tau koti.” Ko e tau Kerisiano he moto tagata kua ha ha i ai ke he “tau mamoe kehe” he fakataiaga a Iesu ke he tau fuifui mamoe. Kua amanaki a lautolu ke moui tukulagi ke he lalolagi parataiso.​—Mataio 25:31-46; Ioane 10:16; Fakakiteaga 21:3, 4.

3. Kehekehe fefe e tau Kerisiano fakauku mo e tau mamoe kehe hagaao ke he maveheaga fou?

³ Ma e 144,000 ko e monuina he maveheaga faka-Aperahamo kua fakahoko he puhala he maveheaga fou. Ha ko e tau tagata gahua he maveheaga nei, ne o mai a lautolu ki lalo he “fakaalofa noa” mo e “fakatufono kia Keriso.” (Roma 6:15; 1 Korinito 9:21) Ti, ko e 144,000 ni e tau tagata he Isaraela he Atua kua fakalataha ke he kaiaga he Fakamanatuaga he mate a Iesu, mo e ko lautolu ni ne taute e Iesu e maveheaga hana ma e Kautu. (Luka 22:19, 20, 29) Nakai gahua e tau tagata he moto tagata tokologa he maveheaga fou. Pete ia, kua fakalataha a lautolu ke he Isaraela he Atua mo e nonofo mo lautolu ke he “motu” ha lautolu. (Isaia 66:8) Ti kua mitaki lahi ni ke talahau kua o mai foki a lautolu ki lalo he fakaalofa totonu a Iehova mo e ki lalo he fakatufono ki a Keriso. Nakai ni ko e tau tagata gahua he maveheaga fou, kua aoga lahi a lautolu ki ai.

“Tau Tagata Kehe” mo e “Isaraela he Atua”

4, 5. (a) Hagaao ki a Isaia, ko e matakau fe ka fekafekau ki a Iehova? (e) Fakamoli fefe a Isaia 56:6, 7 ke he moto tagata tokologa?

⁴ Ne tohi he perofeta ko Isaia: “Ko e tau tagata kehe foki kua fakalataha mai kia Iehova, ke fekafekau kia ia, mo e fakaalofa ke he higoa a Iehova, ke eke mo tau fekafekau hana, ko lautolu oti kua omaoma ke he aho sapati ka e nakai holi ai e lautolu, mo e taofi mau e lautolu haku a maveheaga. To tamai e au a lautolu ke he haku a mouga tapu, mo e fakafiafia ai e au a lautolu ke he haku a fale liogi; ko e ha lautolu a tau poa huhunu mo e ha lautolu a tau poa to talia ia ki luga haku a fatapoa.” (Isaia 56:6, 7) I Isaraela, ko e kakano anei ko e “tau tagata kehe,” ne nakai ko e tau Isaraela, to tapuaki ki a Iehova​—ofania hana higoa, omaoma e tau kupu he maveheaga he Fakatufono, fakatumau e Sapati, mo e taute e tau poa he faituga, ko e “fale liogi” he Atua.​—Mataio 21:13.

⁵ He vaha ha tautolu, ko e “tau tagata kehe foki kua fakalataha mai kia Iehova” ko e moto tagata tokologa. Kua fekafekau a lautolu nei ki a Iehova he fakalataha mo e Isaraela he Atua. (Sakaria 8:23) Kua foaki e lautolu e tau poa kua talia tuga he Isaraela he Atua. (Heperu 13:15, 16) Kua tapuaki a lautolu he faituga fakaagaga he Atua, ko e hana “fale liogi.” (Fakatatai Fakakiteaga 7:15.) Taofi mau nakai a lautolu ke he Sapati he fahi tapu? Nakai poaki ki a lautolu ne fakauku po ke moto tagata ke taute e mena nei. (Kolose 2:16, 17) Pete ia, ne talahau a Paulo ke he tau Kerisiano Heperu fakauku: “Kua toka agaia e okiokihaga tuga e aho sapati mo e tau tagata he Atua. Ha ko ia kua hao atu ke he hana okiokihaga, kua okioki foki a ia ke he hana tau gahua, tuga e Atua ke he hana ni.” (Heperu 4:9, 10) Ko lautolu ia e tau Heperu ne huhu atu ke he ‘okiokihaga he sapati’ nei ne omaoma a lautolu ke he “tututonu mai he Atua” mo e okioki mai he lali ke fakakite a lautolu ke he tau gahua he Fakatufono. (Roma 10:3, 4) Ko e tau Kerisiano fakauku Motu Kehe kua fiafia e okiokihaga ia he fakalataha a lautolu ke he tututonu ha Iehova. Kua fakalataha atu e moto tagata tokologa ki a lautolu ke he okiokihaga ia.

6. Toto mau fefe he tau mamoe kehe e maveheaga fou he vaha nei?

⁶ Lafi ki ai, kua ha ha i ai e tau mamoe kehe ke he maveheaga fou tuga e tau tagata kehe i tuai ne ha ha i ai ke he maveheaga he Fakatufono. He puhala fe? Nakai he eke mo tau tagata gahua i ai ka e omaoma ke he tau fakatufono ne fakalataha ki ai mo e lagomatai mai he tau fakatokatokaaga ia. (Fakatatai Ieremia 31:33, 34.) Tuga e tau hoa fakauku ha lautolu, kua tohi e fakatufono ha Iehova ke he “loto hana.” Ne ofania lahi mo e omaoma e lautolu e tau poakiaga mo e tau matapatu fakaakoaga ha Iehova. (Salamo 37:31; 119:97) Tuga e tau Kerisiano fakauku, ne iloa e lautolu a Iehova. (Ioane 17:3) Ka e kua e peritome? Ato 1,500 e tau tau to taute e maveheaga fou, ne fakamafana e Mose e tau Isaraela: “Kia peritome ai e mutolu ke he kili he tau loto ha mutolu.” (Teutaronome 10:16; Ieremia 4:4) He mole e peritome tumau he tino mo e Fakatufono, kua lata tokoua e tau fakauku mo e tau mamoe kehe ke “peritome” ke he tau loto ha lautolu. (Kolose 2:11) Fakaoti aki, kua fakamagalo e Iehova e hehe he tau mamoe kehe he liligi e Iesu e “toto he maveheaga.” (Mataio 26:28; 1 Ioane 1:9; 2:2) Nakai hiki he Atua a lautolu ko e tau tama tane fakaagaga, tuga he taute e ia ke he 144,000. Ka e talahau tututonu e ia e tau mamoe kehe, he puhala kua talahau tututonu a Aperahamo ko e kapitiga he Atua.​—Mataio 25:46; Roma 4:2, 3; Iakopo 2:23.

7. Ko e heigoa e fakamonuinaaga ma e tau mamoe kehe he vaha nei, ko hai kua talahau tututonu tuga a Aperahamo?

⁷ Ha kua talahau tututonu e 144,000, kua hafagi e puhala he amaamanakiaga ha lautolu ke pule mo Iesu ke he Kautu he lagi. (Roma 8:16, 17; Kalatia 2:16) Ma e tau mamoe kehe, ha kua talahau tututonu ko e tau kapitiga he Atua kua fakaata a lautolu ke tapiki mau ke he amaamanakiaga he moui tukulagi ke he lalolagi parataiso​—he hao mai i Amaketo ko e vala he moto tagata tokologa po ke mai he ‘liu tutu mai ko lautolu ne tututonu.’ (Gahua 24:15) Ko e fakamonuinaaga ha ia ke fai amaamanakiaga mo e kapitiga he Pule Katoatoa he lagi mo e lalolagi katoatoa, ‘ke nofo he hana a fale uta fano’! (Salamo 15:1, 2) E, ko e tau fakauku mo e tau mamoe kehe kua fakamonuina ke he puhala homo ue atu he puhala ia Iesu, ko e Tega ha Aperahamo.

Ko e Aho he Fakafeiloaga Lahi Mahaki

8. Ko e heigoa kua fakatai tuai mai he tau poa he Aho he Fakafeiloaga i lalo he Fakatufono?

⁸ He fakatutala e maveheaga fou, ne fakamanatu e Paulo ke he hana tau tagata totou e Aho he Fakafeiloaga he tau i lalo he maveheaga he Fakatufono. He aho ia, ko e tau poa vehevehe ne taute​—taha ma e magafaoa he ekepoa Levi mo e taha ma e tau magafaoa he 12 ne nakai ko e tau ekepoa e magafaoa. Kua leva e fakamaama e poa lahi mahaki ke he puhala fakatai a Iesu ka aoga e 144,000 mo e amaamanakiaga ke he lagi mo e tau miliona ke he amaamanakiaga ke he lalolagi.a Ne fakakite e Paulo ke he fakamoliaga ko e tau aoga he poa a Iesu ka taute puhala he Aho he Fakafeiloaga lahi mahaki i lalo he maveheaga fou. Ko e Ekepoa Ne Mua he aho lahi mahaki nei, ne foaki e Iesu e moui mitaki katoatoa hana ko e poa he fakafeiloaga ke maeke ke moua e “fakamouiaga tukulagi” ma e tau tagata.​—Heperu 9:11-24.

9. He ha ha i ai ke he maveheaga fou, ko e heigoa kua ofania he tau Kerisiano fakauku Heperu?

⁹ Tokologa e tau Kerisiano Heperu he senetenari fakamua ne ‘fakamakutu [agaia] ke he fakatufono [faka-Mose].’ (Gahua 21:20) Lata ai, ne fakamanatu e Paulo ki a lautolu: “Kua eke ai a [Iesu] mo hulalo he maveheaga fou, ha ko e hana matulei ke lukutoto aki e tau hala ne eke ke he maveheaga fakamua, kia moua ai e lautolu kua uiina e tufaaga tukulagi kua talahaua mai.” (Heperu 9:15) Ne tokanoa he maveheaga fou e tau Kerisiano Heperu mai he maveheaga tuai, ne kua fakakite e tau agahala ha lautolu. Fakaaue ke he maveheaga fou, kua ofania he “uiina e tufaaga tukulagi [he lagi] kua talahaua mai.”

10. Ko e heigoa kua fakaaue ki ai e tau fakauku mo e tau mamoe kehe ke he Atua?

¹⁰ Ko “ia” ne “tua ke he Tama” to aoga mai he poa lukutoto. (Ioane 3:16, 36) Ne pehe a Paulo: “Ti pihia foki e Keriso, laga taha ni kua eke a ia mo poa ke fua ai e tau hala he tau tagata tokologa, to fakakite foki a ia kia lautolu kua tatali kia ia ke he hana lagaua mai, nakai ke fua ai e tau hala, ka kia momoui ai a lautolu.” (Heperu 9:28) He vaha nei, ko lautolu ne kumi fakamakamaka ki a Iesu fakalataha mo e tau Kerisiano fakauku kua hao he tau Isaraela he Atua mo e tau miliona he moto tagata tokologa, ka moua foki e tupuaga tukulagi. Tau vahega ua ia kua fakaaue ke he Atua ma e maveheaga fou mo e tau monuina he foaki e moui ke fakalataha ki ai, putoia foki e Aho he Fakafeiloaga lahi mahaki mo e fekafekauaga he Ekepoa ne Mua, ko Iesu, ke he Tapu Mua Ue Atu he lagi.

Lavelave ke he Fekafekauaga Tapu

11. Ha kua fakamea e tau manamanatuaga he poa a Iesu, ko e heigoa he tau fakauku mo e tau mamoe kehe ne fiafia ai he taute?

¹¹ He hana tohi ke he tau Heperu, ne peehi e Paulo e uho lahi mahaki he poa a Iesu ke he fakatokatokaaga he maveheaga fou tuga he fakatatai ke he tau poa agahala i lalo he maveheaga tuai. (Heperu 9:13-15) Ko e poa mua atu a Iesu kua maeke ke “fakamea ha [ta]utolu a tau loto manamanatu mai he tau gahua ke mamate ai, kia fekafekau ai a [ta]utolu ke he Atua moui.” Ma e tau Kerisiano Heperu, ko e “tau gahua ke mamate” ne putoia e “tau hala ne eke ke he maveheaga fakamua.” Ma e tau Kerisiano he vaha nei, kua fakalataha e lautolu e tau hala ne taute fakamua ne kua ha ha i ai e fakatokihalaaga moli mo e kua fakamagalo he Atua. (1 Korinito 6:9-11) Mo e fakamea e tau manamanatuaga, kua taute he tau Kerisiano fakauku e ‘fekafekau tapu ke he Atua moui.’ Ti pihia foki e moto tagata tokologa. He fakamea ha lautolu a tau manamanatuaga puhala he “toto he Punua mamoe,” ko lautolu he faituga fakaagaga mua atu he Atua ke “fekafekau kia ia ke he aho mo e po.”​—Fakakiteaga 7:14, 15.

12. Fakakite fefe e tautolu kua “loto fakamoli ke he tua kua makamakafua”?

¹² Lafi ki ai, ne pehe a Paulo: “Kia fakatata atu a tautolu kia ia mo e loto fakamoli ke he tua kua makamakafua, kua pīpī tuai ha talu tau loto mai he loto manamanatu kelea, kua koukou foki ha tautolu a tau tino ke he vai tavana.” (Heperu 10:22) Fakakite fefe e tautolu a tautolu kua “loto fakamoli ke he tua kua makamakafua”? Ne fakamafana e Paulo e tau Kerisiano Heperu: “Kia taofi mau e tautolu ha tautolu a amaamanaki [ke he lagi] kua talahau atu e tautolu mo e nakai hikihikifano; ha kua fakamoli a ia kua talahaua mai; kia manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki; aua neke tiaki e fakapotopotoaga ha tautolu tuga ne mahani he falu, ka kia fefakamafanaaki; kia au atu ai foki he pihia ha kua kitia e mutolu kua tata tuai e aho.” (Heperu 10:23-25) Ka moui e tua ha tautolu, to nakai “tiaki e fakapotopotoaga ha tautolu.” To fiafia a tautolu ke fakalagalaga e tau matakainaga ke he fakaalofa mo e tau gahua mitaki mo e fakamalolo ke he gahua aoga he fakapuloa e amaamanakiaga ha tautolu, ke he lalolagi nei po ke lagi.​—Ioane 13:35.

Ko e “Maveheaga Tukulagi”

13, 14. Ke he tau puhala fe kua tukulagi e maveheaga?

¹³ Ko e heigoa ka tupu ka mailoga he 144,000 fakahiku e amaamanakiaga ha lautolu ke he lagi? Kua tiaki kia e maveheaga fou ke nakai fakaaoga? Ke he magaaho ia, to nakai fai he Isaraela he Atua ka toe he lalolagi. Ko e tau tagata oti ke he maveheaga ka fakalataha mo Iesu “ke he kautu he [hana] Matua.” (Mataio 26:29) Ka e manatu e tautolu e tau kupu a Paulo he tohi hana ke he tau Heperu ko e: “Atua hana e monuina, . . . ne liu fakatu mai ia lautolu kua mamate e Leveki mamoe ne mua, ko e Iki ha tautolu ko Iesu, ha ko e toto he maveheaga tukulagi.” (Heperu 13:20; Isaia 55:3) Ke he manatu fe kua tukulagi e maveheaga fou?

¹⁴ Fakamua, nakai tuga e maveheaga he Fakatufono, to nakai liu hukui. Ua aki, ko e tau fua he fakagahuahuaaga kua tumau ia, ti pihia ke he tuaga patuiki a Iesu. (Fakatatai Luka 1:33 mo e 1 Korinito 15:27, 28.) Ko e Kautu he lagi kua ha ha i ai e matakavi tukulagi ke he tau finagalo ha Iehova. (Fakakiteaga 22:5) Tolu aki, to fakatumau ni e tau mamoe kehe ke aoga mai he fakatokaaga he maveheaga fou. Ke he Pule he Afe Tau ha Keriso, to fakatumau e tau tagata mahani fakamoli ke he “fekafekau kia [Iehova] ke he aho mo e po ke he faituga hana” tuga ni he taute e lautolu mogonei. To nakai liu a Iehova ke ta mai e tau agahala ha lautolu kua mole ne kua fakamagalo he fakave ke he “toto he maveheaga” a Iesu. To fakatumau a lautolu ke olioli e tuaga tututonu ko e tau kapitiga a Iehova, mo e fakatufono hana to tohi agaia he tau loto ha lautolu.

15. Fakamaama e fakafetuiaga a Iehova mo e tau tagata tapuaki he lalolagi he lalolagi fou.

¹⁵ To maeke nakai ia Iehova ke talahau hagaao ke he tau fekafekau nei: ‘Ko au e Atua ha lautolu, ko e tau tagata haku a lautolu’? E. “To nofo a ia mo lautolu; to eke a lautolu mo motu hana, to ha ia lautolu e Atua ni, ko e ha lautolu a Atua haia.” (Fakakiteaga 21:3) To eke a lautolu mo “tau heaga api he tau tagata tapu,” tau hukui he lalolagi he “māga kua ofania,” ko e kitofaitane he lagi ha Iesu Keriso. (Fakakiteaga 14:1; 20:9; 21:2) To maeke e tau mena nei kakano ha ko e tua ha lautolu ke he liligiaga he “toto he maveheaga” a Iesu mo e omaoma ha lautolu ke he tau patuiki mo e tau ekepoa he lagi, ne nonofo ke he lalolagi ko e Isaraela he Atua.​—Fakakiteaga 5:10.

16. (a) Ko e heigoa e tau tuaga kua fakatali ma lautolu ka liu tutu mai? (e) Ko e heigoa e tau monuina ka hoko e fakaotiaga he afe tau?

¹⁶ Ko hai ne mamate ka liu fakatu mai ke he lalolagi? (Ioane 5:28, 29) To uiina foki a lautolu ke ‘monuina oti kana’ ha ko Iesu, ko e Tega a Aperahamo. (Kenese 22:18) To ofania foki e lautolu e higoa a Iehova, fekafekau ki a ia, taute e tau poa kua talia, mo e fekafekau ke he fale liogi hana. Ko lautolu ka taute pihia ka huhu atu ke he okiokihaga he Atua. (Isaia 56:6, 7) Ke he fakaotiaga he afe tau, ko e tau fakamoli oti to ta mai ke he mitaki katoatoa he tagata he puhala mai e pule ia Iesu Keriso mo e hana tau matakainaga ekepoa, 144,000. To tututonu ni a lautolu, nakai ni talahau tututonu a lautolu ko e tau kapitiga he Atua. To “liu foki momoui” a lautolu, tokanoa katoatoa ai mai he hala mo e mate ne tupu mai ia Atamu. (Fakakiteaga 20:5; 22:2) Ko e fakamonuinaaga ha ia! Mai he kitekiteaga ha tautolu he vaha nei, kua eke ai e gahua ekepoa ha Iesu mo e 144,000 ke fakakatoatoa. Ko e tau monuina he Aho he Fakafeiloaga lahi mahaki ka hoko katoatoa ai. Fakalaulahi ai, to “tuku atu e ia e kautu ke he Atua, ko e Matua haia.” (1 Korinito 15:24) To ha ha i ai e kamatamata fakahiku ke he tau tagata, mo e to moumou tukulagi a Satani mo e tau temoni hana.​—Fakakiteaga 20:7, 10.

17. He kitia e fiafia ne fakatali ki a tautolu, ko e heigoa ha tautolu takitokotaha ka fifili ke taute?

¹⁷ Ko e heigoa e matagahua, ka fai, ka taute he “maveheaga tukulagi” ke he vaha fiafia nei ka amanaki ke kamata? Nakai ma tautolu a ia ke talahau. Ko e mena ne kua fakakite e Iehova kua lahi ma tautolu mogonei. Kua ofoofogia lahi ki a tautolu. Manamanatu la​—ke he moui tukulagi ko e vala he “lagi fou mo e lalolagi fou”! (2 Peteru 3:13) Kia nakai fai mena ke fakalolelole aki e manako ha tautolu ke moua e maveheaga ia. Ko e mauokafua to nakai mukamuka. Ne pehe a Paulo: “Nukua aoga kia mutolu e fakauka, kia moua ai e mutolu e tau mena kua talahaua mai, ka oti he eke e mutolu e finagalo he Atua.” (Heperu 10:36) Manatu, he fahia mai he ha mena vihi, ko e ha totokoaga kua lahi mahaki, kua nakai aoga lahi ke he fiafia ne fakatali mai ki a tautolu. (2 Korinito 4:17) Ti, ki a nakai fai ia tautolu ke “tukumuli ke he malaia.” Ka kia, fakamoli e tautolu a tautolu ke eke ke “tua ke momoui ai e tau agaga.” (Heperu 10:39) Kia falanaki katoatoa a tautolu oti ki a Iehova, ko e Atua he tau maveheaga, ke he fakamonuinaaga tukulagi a tautolu oti kana.

[Matahui Tala]

Maama Nakai e Koe?

◻ Mai he tau Kerisiano fakauku, ko hai kua fakamonuina mai he Tega a Aperahamo?

◻ Ha kua fakamonuina mai he maveheaga fou, kua eke fefe tau mamoe ke tuga e tau tagata liliuina i lalo he maveheaga tuai?

◻ Fakamonuina fefe e tau mamoe kehe he fakatokaaga he Aho he Fakafeiloaga?

◻ Ko e ha ne ui ai e Paulo e maveheaga fou ko e “maveheaga tukulagi”?

[Puha he lau 30]

Fekafekau Tapu He Faituga

Kua tapuaki e moto tagata mo e tau Kerisiano fakauku i loto he lotopa he lalolagi he faituga mua ue atu a Iehova. (Fakakiteaga 7:14, 15; 11:2) Nakai kakano ai ke fakaoti kua nonofo a lautolu he Lotopa kehe he tau Tagata Motu Kehe. He nofo a Iesu he lalolagi, ne fai Lotopa e tau Tagata Motu Kehe he faituga. Pete ia, ke he tau fakatokaaga fakaohooho faka-Atua he tau faituga a Solomona mo Esekielu, nakai fai foakiaga ma e Lotopa he tau Tagata Motu Kehe. He faituga a Solomona, ne ha ha i ai e lotopa i tua ne maeke he tau Isaraela mo e tau tagata liliuina, tau tagata tane mo e fifine, ne tapuaki auloa ai. Ko e puhala fakaperofeta a nei he lotopa he lalolagi he faituga fakaagaga, ne kitia ai e Ioane e moto tagata ne taute e fekafekauaga tapu.

Pete ia, ko e tau ekepoa ni mo e tau Levi ka huhu atu ke he lotopa i loto, ne toka ai e fatapoa ue atu; ko e tau ekepoa ni ka huhu atu ke he Tapu; mo e ekepoa ne mua ni ka hu atu ke he Tapu Mua Ue Atu. Kua maama ai ko e lotopa i loto mo e Tapu ka maama ke fakaata e tuaga fakaagaga lahi atu he tau Kerisiano fakauku he lalolagi. Ti fakakite he Tapu Mua Ue Atu e lagi ni, ne moua he tau Kerisiano fakauku e moui nakai maeke ke mate fakalataha mo e Ekepoa ne Mua ha lautolu he lagi.​—Heperu 10:19, 20.

[Fakatino he lau 32]

Mo e onoonoaga he olioli ne fakatali ki a tautolu, kia “tua ke momoui ai e tau agaga” ha tautolu