Taha e Fuifui Mamoe, Taha e Leveki Mamoe

“Ko mutolu kua mumui mai kia au, . . . ti nonofo ai foki a mutolu ke he tau nofoaiki ne hogofulu ma ua, ke fakafili ai e tau faoa a Isaraela ne hogofulu ma ua.”—MATA. 19:28.

1. Fehagai fēfē a Iehova mo e tau hologa a Aperahamo, ti ko e ha ne nakai kakano e mena nei kua tiaki katoatoa e ia e tau tagata ne toe?

KUA ofania e Iehova a Aperahamo, ti fakakite e Ia e fakaalofa fakamooli ke he tau hologa a Aperahamo. Molea ai 15 e senetenari, ne mailoga e ia e motu ha Isaraela, ne tupu mai ia Aperahamo, ko e tau tagata fifili haana, ko e haana “koloa uho.” (Totou Teutaronome 7:6.) Kakano kia e mena ia kua tiaki katoatoa e Iehova e tau tagata he falu motu? Nakai. He magahala ia, ko lautolu ne nakai ko e tau Isaraela ne manako ke tapuaki ki a Iehova kua fakaatā ke pipiki atu ke he motu pauaki haana. Ko e tau tagata nei ne liliuina kua mailoga ko e vala he motu. Kua lata ke taute a lautolu tuga ko e tau matakainaga. (Levi. 19:33, 34) Ti kua poaki ki a lautolu ke omaoma e tau fakatufono oti a Iehova.—Levi. 24:22.

2. Ko e heigoa e fakailoaaga ofoofogia ne taute e Iesu, ti takitaki atu ke he tau hūhū fe?

² Pete ia, na taute e Iesu e fakailoaaga ofoofogia nei ke he tau Iutaia he vahā haana: “To uta kehe ia mutolu e kautu he Atua, ka e age ke he taha motu ke ta mai ai e tau fua hana.” (Mata. 21:43) Ko hai ka fakalataha ke he motu foou nei, ti lauia fēfē a tautolu he magahala nai ha ko e hikiaga nei?

Ko e Motu Foou

3, 4. (a) Fakakite fēfē he aposetolo ko Peteru e motu foou? (e) Ko hai ne fakalataha ke he motu foou nei?

³ Ne fakakite fakamaaliali he aposetolo ko Peteru e motu foou nei. Ne tohia e ia e tau kupu nei ke he tau matakainaga Kerisiano haana: “Ko mutolu, ko e hau fifili a mutolu, ko e tau patuiki mo e tau ekepoa, ko e motu tapu, mo e motu kua moua māna, kia fakakite atu e mutolu e mitaki hana ne ui a mutolu ke o mai he pouli ke he hana maama ke ofo lahi ai.” (1 Pete. 2:9) Tuga ne talahau tuai, ko e tau Iutaia he tino ne talia a Iesu ko e Mesia, ko lautolu e tau tagata fakamua he motu foou ia. (Tani. 9:27a; Mata. 10:6) Fakamui, ne putoia foki e tau tagata tokologa ne nakai ko e tau Isaraela ke he motu nei, ha kua matutaki atu a Peteru ke pehē: “Ko mutolu nakai ko e motu i tuai, ka ko e vaha nai ko e motu he Atua.”—1 Pete. 2:10.

⁴ Kua vagahau a Peteru he mena nei ki a hai? He kamataaga he tohi haana, pehē a ia: “Ko ia [Atua] kua fanau fakafou ai a tautolu ha ko e hana fakaalofa lahi, kia moua e tautolu e amaamanaki kua moui, ha ko e liu tu mai a Iesu Keriso mai ia lautolu kua mamate. Kia moua e tufaaga nakai tuai popo, nakai fai kelea nakai tuai fifigo, kua toka ke he lagi ma [m]utolu.” (1 Pete. 1:3, 4) Ti ko e motu foou nei kua fakalataha ai e tau Kerisiano fakauku, ne moua e amaamanakiaga ke he lagi. Ko lautolu ko e “Isaraela he Atua.” (Kala. 6:16) He fakakiteaga, ne kitia he aposetolo ko Ioane e tau Isaraela fakaagaaga nei ne 144,000. “Ko lautolu ia ne fakafua mai he tau tagata, ko e tau fua uluaki ma e Atua mo e Punua mamoe” ke eke mo “tau ekepoa” mo e ke “eke foki a lautolu mo tau patuiki fakalataha mo [Iesu] ke he tau tau ne taha e afe.”—Fakakite. 5:10; 7:4; 14:1, 4; 20:6; Iako. 1:18.

Putoia Foki Nakai e Falu?

5. (a) Hagaao ki a hai e talahauaga “Isaraela he Atua”? (e) Ko e ha e kupu “Isaraela” ne nakai fakakaupā tumau e kakano?

⁵ Maama ai, ko e alaga kupu “Isaraela he Atua” ia Kalatia 6:16 kua hagaao katoatoa ni ke he tau Kerisiano fakauku. Ka kua fai magaaho nakai ne fakaaoga e Iehova e motu ha Isaraela ke eke mo fakatino, po ke fakataiaga, kua putoia e tau Kerisiano foki nakai ni ko lautolu ne fakauku? Kua moua ai e tali he tau kupu nei ha Iesu ke he tau aposetolo fakamooli haana: “Tuga ne kotofa mai he haku a Matua e kautu kia au, ke pihia foki he kotofa e au kia mutolu. Kia kai a mutolu mo e inu ke he haku a kaiaga mena ke he kautu haku, kia nonofo foki ke he tau nofoaiki, mo e fakafili e tau faoa a Isaraela ne hogofulu ma ua.” (Luka 22:28-30) To fakamooli e mena nei he “fakafouaga” he magahala Pule Meleniamu he Keriso.—Totou Mataio 19:28.

6, 7. Hagaao ki a hai e talahauaga “tau faoa a Isaraela ne hogofulu ma ua” he tau kupu ia Mataio 19:28 mo e Luka 22:30?

⁶ Ko e 144,000 to eke mo tau patuiki, tau ekepoa, mo e tau fakafili he lagi he magahala he Pule Afe Tau. (Fakakite. 20:4) Ko hai ka fakafili e lautolu, mo e ko hai ka pule a lautolu ki ai? Ne tala mai a Mataio 19:28 mo e Luka 22:30 ki a tautolu to fakafili e lautolu “e tau faoa a Isaraela ne hogofulu ma ua.” Ko hai ne fakatino “e tau faoa a Isaraela ne hogofulu ma ua” he kupu nei? Ne hukui e lautolu e tau tagata oti ne moua e amaamanakiaga he lalolagi—ko lautolu ne tua ke he poa ha Iesu ka e nakai putoia ke he vahega patuiki fakaekepoa. (Ne nakai putoia e faoa ha Levi he tohiaga he tau faoa toko 12 ha Isaraela he tino.) Ko lautolu ne fakatino ki ai e kupu nei he tau faoa 12 ha Isaraela ko lautolu ka moua e tau aoga fakaagaaga mai he tau gahua fakaekepoa he 144,000. Ko lautolu nei ne moua e aoga ka e nakai ko e tau ekepoa kua eke foki mo tau tagata he Atua, ti ofania mo e talia e ia a lautolu. Kua latatonu a lautolu ke tuga e tau tagata haana he tau vahā i tuai.

⁷ Felauaki tonu ai, he mole e kitia he aposetolo ko Ioane e tau Isaraela fakaagaaga ne 144,000 kua fakamau fakamailoga tukulagi ato hoko e matematekelea lahi, ne kitia foki e ia e “moto tagata tokologa” ne nakai maeke ke totou “mai he tau motu oti.” (Fakakite. 7:9) To hao atu a lautolu nei he matematekelea lahi ke he Pule Meleniamu he Keriso. I ai, to fakalataha mo lautolu e tau piliona ne liliu tu mai. (Ioane 5:28, 29; Fakakite. 20:13) To fakalataha oti a lautolu nei ke he “tau faoa a Isaraela [fakatai] ne hogofulu ma ua,” ka fakafili e Iesu mo e haana 144,000 kua pule mo ia.—Gahua 17:31; 24:15; Fakakite. 20:12.

8. Fakaata fēfē he tau mena tutupu he Aho he Fakafeiloaga e fakafetuiaga he 144,000 mo e tau tagata ne toe?

⁸ Ko e fakafetuiaga nei he 144,000 mo e tau tagata ne toe kua fakaata e tau mena tutupu he Aho he Fakafeiloaga he tau tau takitaha. (Levi. 16:6-10) Fakamua, kua lata e ekepoa ne mua ke foaki e povi taane mo poa he hala “ha ko ia, katoa mo e hana magafaoa.” Ti ko e poa ha Iesu kua fakagahua fakamua ke he magafaoa haana he tau ekepoa lagomatai, ko lautolu ka fekafekau mo ia he lagi. Pihia foki he Aho he Fakafeiloaga i tuai, ua e koti ne foaki ma e tau hala he falu Isaraela. He fakatokaaga nei, ne fakatino he faoa fakaekepoa e 144,000, ka e fakatino e lautolu oti ne toe i Isaraela a lautolu kua moua e amaamanakiaga ke he lalolagi. Fakakite mai ai he talahauaga nei “tau faoa a Isaraela ne hogofulu ma ua” ia Mataio 19:28 kua nakai hagaao ke he tau ekepoa lagomatai ha Iesu ne fakauku ke he agaaga ka ko lautolu oti ne toe kua tua ke he poa a Iesu.a

9. Ko hai ne hukui he tau ekepoa he faituga he fakakiteaga a Esekielu, ti ko hai ne hukui he tau Isaraela ne nakai ko e tau ekepoa?

⁹ Manamanatu ke he taha fakataiaga foki. Ne foaki ke he perofeta ko Esekielu e fakakiteaga lahi he faituga ha Iehova. (Eseki., ve. 40-48) Ke he fakakiteaga ia, ne gahua e tau ekepoa he faituga, he foaki e tau fakaakoaga mo e moua e hatakiaga mo e fakatonuaga a Iehova. (Eseki. 44:23-31) He puhala ia foki, ne omai e tau tagata he tau magafaoa kehekehe ke tapuaki mo e foaki e tau poa. (Eseki. 45:16, 17) He tala nei mogoia, ne fakatino he tau ekepoa a lautolu ne fakauku, ka ko e tau Isaraela mai he tau magafaoa nakai ko e tau ekepoa ne fakatino a lautolu ne moua e amaamanakiaga ke he lalolagi. Ne fakamaama he fakakiteaga ko e ua e matakau ne gahua fakalataha, mo e vahega ekepoa ne takitaki e tapuakiaga meā.

10, 11. (a) Ko e heigoa e fakamooliaga ne atihake e tua kua kitia e tautolu ke he tau kupu a Iesu? (e) Ko e heigoa e hūhū ne lagā hagaao ke he tau mamoe kehe?

¹⁰ Ne vagahau a Iesu hagaao ke he ‘tau mamoe kehe,’ ne nakai mai he “lotopa” nei ko e “fuifui mamoe gahoa” he tau tutaki fakauku haana. (Ioane 10:16; Luka 12:32) Ne pehē a ia: “Ko lautolu foki kua lata he takitaki mai e au, to fanogonogo foki a lautolu ke he leo haku; ati taha ai e fuifui mamoe, mo e leveki mamoe ne tokotaha.” Kua atihake mooli e tua ke kitia e fakamooliaga he tau kupu ia! Ne fakalataha e tau matakau ne ua—ko e matakau tote ia lautolu ne fakauku mo e moto tagata tokologa he tau mamoe kehe. (Totou Sakaria 8:23.) Pete kua nakai fekafekau e tau mamoe kehe he lotopā he faituga fakaagaaga, kua fekafekau a lautolu i fafo he lotopā he faituga ia.

¹¹ Ka e, ka fakaaoga e Iehova he falu magaaho a lautolu ne nakai ko e tau ekepoa ha Isaraela i tuai ke fakatino e tau mamoe kehe nei, kua lata kia a lautolu ia ne moua e amaamanakiaga he lalolagi ke kai mo e inu foki e tau mena fakatai he Fakamanatuaga? To fakatutala a tautolu mogonei ke he tali ke he hūhū nei.

Ko e Maveheaga Foou

12. Ko e heigoa e fakatokaaga foou ne talahau tuai e Iehova?

¹² Ne talahau tuai e Iehova e fakatokaaga foou ma e tau tagata haana he pehē a ia: “Ko e maveheaga hanai ke eke e au mo e magafaoa a Isaraela ka mole atu e tau aho ia, . . . To tuku e au haku a tau fakatufono ki loto ia lautolu, mo e tohi e au ke he tau loto ha lautolu; to eke foki au mo Atua ha lautolu, ti eke a lautolu mo motu haku.” (Iere. 31:31-33) Puhala he maveheaga foou nei, ne mavehe a Iehova ki a Aperahamo ke moua e fakamooliaga lilifu mo e tukulagi.—Totou Kenese 22:18.

13, 14. (a) Ko hai e tau tagata ne putoia ke he maveheaga foou? (e) Ko hai kua moua e aoga, ti ‘taofi atu’ fēfē a lautolu ke he maveheaga foou nei?

¹³ Ne hagaao a Iesu ke he maveheaga foou nei he pō to mate a ia he pehē a ia: “Ko e kapiniu nai, ko e maveheaga fou ia ke he haku a toto, kua fakamaligi ma mutolu.” (Luka 22:20; 1 Kori. 11:25) Kua putoia kia e tau Kerisiano oti ke he maveheaga foou nei? Nakai. Ko e falu, tuga e tau aposetolo ne inu e kapiniu ia he afiafi ia, ko e tau tagata ne putoia he maveheaga foou.b Ne taute foki e Iesu e maveheaga mo lautolu ke pule fakalataha mo ia he Kautu haana. (Luka 22:28-30) To gahua ai a lautolu mo Iesu he Kautu haana.—Luka 22:15, 16.

¹⁴ Ka e kua a lautolu ka momoui he lalolagi i lalo he Kautu haana? Ko lautolu ia ka moua e aoga mai he maveheaga foou. (Kala. 3:8, 9) Pete kua nakai putoia a lautolu i ai, kua ‘taofi atu’ a lautolu ke he maveheaga nei he mumuitua ke he tau poakiaga ia, tuga ne talahau tuai he perofeta ko Isaia: “Ko e tau tagata kehe foki kua fakalataha mai kia Iehova, ke fekafekau kia ia, mo e fakaalofa ke he higoa a Iehova, ke eke mo tau fekafekau hana, ko lautolu oti kua omaoma ke he aho sapati ka e nakai holi ai e lautolu, mo e taofi mau e lautolu haku a maveheaga. To tamai e au a lautolu ke he haku a mouga tapu, mo e fakafiafia ai e au a lautolu ke he haku a fale liogi.” Ti pehē atu a Iehova: “Kua talahaua haku a fale ko e fale liogi ma e tau motu oti.”—Isaia 56:6, 7.

Ko Hai Kua Lata ke Kai mo e Inu?

15, 16. (a) Ko e heigoa ne matutaki he aposetolo ko Paulo e maveheaga foou ki ai? (e) Ko e ha a lautolu ne moua e amaamanakiaga ke he lalolagi kua nakai kai mo e inu e tau mena fakatai he Fakamanatuaga?

¹⁵ Ko lautolu he maveheaga foou kua “ha ha [ai] e pule ke huhu atu ke he mena tapu ue atu.” (Totou Heperu 10:15-20.) Ko lautolu nei ka “moua e . . . kautu kua nakai maueue.” (Hepe. 12:28) Ti, ko lautolu ni ka eke mo tau patuiki mo e tau ekepoa he lagi mo Iesu Keriso kua lata ke inu mai he “kapiniu” ne hukui e maveheaga foou. Ko lautolu nei ne putoia he maveheaga foou ko lautolu ne fakatutane ke he Punua Mamoe. (2 Kori. 11:2; Fakakite. 21:2, 9) Ko lautolu oti ne toe ne hohoko atu ke he Fakamanatuaga he tau tau takitaha ko e tau tagata kitekite fakalilifu, ne nakai kai mo e inu e tau mena fakatai.

¹⁶ Ne lagomatai foki e Paulo a tautolu ke maama ko lautolu ne moua e amaamanakiaga ke he lalolagi kua nakai kai mo e inu e tau mena fakatai he Fakamanatuaga. Ne pehē a ia ke he tau Kerisiano fakauku: “Ha ko e tau aho oti kua kai ai e mutolu e areto nai, mo e inu ke he kapiniu nai, kua fakailoa atu ai e mutolu e matulei he Iki, ato haele mai a ia.” (1 Kori. 11:26) Magaaho fe ka “haele mai” e Iki? Magaaho ka hau a ia ke uta e tau tagata fakahiku he vahega kitofaitaane haana ne fakauku ke he kaina ha lautolu he lagi. (Ioane 14:2, 3) Maaliali ai, ko e fakamanatuaga he tau tau takitaha he Kaiaga Afiafi he Iki to nakai tumau tukulagi. Ko e ‘tau fanau kua toe’ he tega he fifine ne ha ha agaia he lalolagi to matutaki ke kai ke he kaiaga nei ato moua e lautolu oti e palepale ha lautolu ke he lagi. (Fakakite. 12:17) Kaeke kua lata a lautolu ka momoui tukulagi ke he lalolagi ke kai mo e inu e tau mena fakatai, to lata e kaiaga nei he Fakamanatuaga ke matutaki tukulagi.

“To Eke Foki a Lautolu mo Motu Haku”

17, 18. Fakamooli fēfē e perofetaaga ne fakamau ia Esekielu 37:26, 27?

¹⁷ Ne talahau tuai e Iehova e kaufakalataha he tau tagata haana ke he tau kupu nei: “To eke foki e au e maveheaga mo lautolu ko e maveheaga ke [“mafola,” NW]; to eke foki ia mo maveheaga mo lautolu tukulagi; to fakanofo ai e au a lautolu, mo e fakatokologa e au a lautolu, to fakatu ai foki e au haku a faituga ia lautolu tukulagi. To ha i ai foki ia lautolu haku a fale; to eke foki au mo Atua ha lautolu, to eke foki a lautolu mo motu haku.”—Eseki. 37:26, 27.

¹⁸ Ko e tau tagata oti he Atua kua aoga mai he fakamooliaga he maveheaga mua ue atu nei, ko e maveheaga nei ma e mafola faka-Kerisiano. E, kua fakamau e Iehova e mafola ma e tau fekafekau omaoma oti haana. Ko e fua he agaaga haana kua kitia mooli ia lautolu. Kua fakatino he faituga nei haana e tapuakiaga meā faka-Kerisiano ne ha ha ia lautolu. Kua eke mooli a lautolu mo tau tagata haana, ha kua tiaki e lautolu e tau puhala tapuaki tupua oti ti eke hokoia a Iehova mo Atua ke tapuaki a lautolu ki ai.

19, 20. Ko hai ne putoia mo lautolu ne ui e Iehova “motu haku,” ti ko e heigoa ne fakamooli he maveheaga foou?

¹⁹ Ko e fiafia lahi ha ia ke kitia e kaufakalataha he tau matakau nei ne ua he mogonei ha tautolu! Pete kua tupu lahi e moto tagata tokologa ne nakai ha ha ai e amaamanakiaga ke he lagi, kua matalahi a lautolu ke fakalataha mo lautolu ia. Kua pipiki a lautolu ke he Isaraela he Atua. He taute e mena nei, kua fakalataha atu a lautolu ki a lautolu ne ui e Iehova “motu haku.” Kua fakamooli ai e perofetaaga nei ha ko lautolu: “To fakalataha atu e tau motu kehe loga kia Iehova ke he aho ia; to eke a lautolu ke he aho ia mo tau motu haku, to nofo foki au i loto ia koe.”—Saka. 2:11; 8:21; totou Isaia 65:22; Fakakiteaga 21:3, 4.

²⁰ Ne fakamooli e Iehova e tau mena oti nei he puhala he maveheaga foou. Totou miliona e tau tagata kehe fakaagaaga kua eke mo motu ne talia e Iehova. (Mika 4:1-5) Kua eketaha a lautolu ke matutaki ke taofi atu ke he maveheaga ia he talia e tau foakiaga mo e omaoma e tau poakiaga i ai. (Isaia 56:6, 7) He taute pihia, fakalataha mo e Isaraela he Atua, kua olioli e lautolu e tau monuina loga he mafola hololoa. Kia eke ai mo monuina haau—he mogonei mo e tau mogo i mua!

[Tau Matahui Tala]

Manatu Nakai e Koe?

• Ko hai e “tau faoa a Isaraela ne hogofulu ma ua” ka fakafili he 144,000?

• Ko e heigoa e matutakiaga ha lautolu ne fakauku mo lautolu e tau mamoe kehe he maveheaga foou?

• Kua lata kia e tau Kerisiano oti ke kai mo e inu e tau mena fakatai he Fakamanatuaga?

• Ko e heigoa e kaufakalataha ne talahau tuai ma e magahala ha tautolu?

[Graph/Tau Fakatino he lau 25]

(Ma e puhala katoa ne tohi aki, kikite e tohi)

Tokologa kua fekafekau fakalataha mogonei mo e Isaraela he Atua

1950 | 373,430

1970 | 1,483,430

1990 | 4,017,213

2009 | 7,313,173