Loto Fakaaue ke he Tau Fakalatahaaga Kerisiano

“Kia manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki; aua neke tiaki e fakapotopotoaga ha tautolu.”​—HEPERU 10:24, 25.

1, 2. (a) Ko e ha e o atu ke he fakalatahaaga he tau Kerisiano moli ko e fakamonuinaaga? (e) Ko e kakano fe ne fakalataha a Iesu mo e tau tutaki hana?

KO E fakamonuina ha ia ke o atu ke he fakalatahaaga Kerisiano, pete ni e tokogahoa ke hogofulu po ke totou afe e tau tagata tapuaki ha Iehova, ha kua talahau a Iesu: “Ko e mena kua fakapotopoto ai e tokoua po ke tokotolu ke he haku a higoa, ko au ha ha i ai fakalataha mo lautolu”! (Mataio 18:20) Moli ai, he magaaho ne taute e maveheaga ia, ne fakatutala a Iesu ke he tau mena fakafiliaga kua lata ke taute fakahako e lautolu kua takitaki e fakapotopotoaga. (Mataio 18:15-19) Ka e hagaao kia e tau kupu a Iesu ke he matapatu fakaakoaga he tau fakalatahaaga Kerisiano oti ne kua hafagi mo e pa aki e liogi he hana higoa? E. Manatu, he magaaho ne poaki e Iesu ke he hana tau tutaki ke taute e gahua tutaki, ne mavehe a ia: “Kitiala, to fakalataha au mo mutolu ke he tau aho oti, ato hoko ni ke he fakaotiaga he lalolagi.”​—Mataio 28:20.

² Nakai fakauaua ai ko e Ulu he fakapotopotoaga Kerisiano, ko e Iki ko Iesu Keriso, kua fakamakai lahi ke he tau fakalatahaaga oti he hana tau tutaki fakamoli. Lafi ai, kua mailoga e tautolu ko ia mo lautolu he puhala he agaga tapu he Atua. (Gahua 2:33; Fakakiteaga 5:6) Ne fiafia foki e Atua ko Iehova ke he feleveiaaga ha tautolu. Ko e matapatu kakano he tau feleveiaaga pihia ke lagaki hake “ki mua he fakapotopotoaga” e fakahekeaga ke he Atua. (Salamo 26:12) Ko e o ha tautolu ke he tau feleveiaaga he fakapotopotoaga ko e fakamoliaga he fakaalofa ha tautolu ki a ia.

3. Ko e heigoa e tau kakano aoga ne kua fakaaue a tautolu ke he tau fakalatahaaga Kerisiano?

³ Ha ha ai foki e tau kakano mitaki kua loto fakaaue a tautolu ke he tau fakalatahaaga Kerisiano. Ato toka e ia e lalolagi, ne kotofa e Iesu Keriso hana tau tutaki fakauku ke gahua ko e “fekafekau fakamoli mo e loto matala” he taute e tau mena kai fakaagaga he magaaho tonu ma e tau tagata he tua. (Mataio 24:45) Ko e puhala aoga ne taute e tau fagaiaga fakaagaga pihia he tau feleveiaaga he fakapotopotoaga ti pihia foki mo e tau fakalatahaaga lalahi​—tau toloaga mo e tau fonoaga. Kua takitaki he Iki ko Iesu Keriso e fekafekau fakamoli ke taute e vala tala kua lata ma e tau feleveiaaga pihia ma lautolu oti kua manako ke hao mai he fakaotiaga he fakatokatokaaga kelea nei mo e moua e moui ke he lalolagi tututonu fou he Atua.

4. Ko e heigoa e “aga” hagahaga kelea ne talahau mai he Tohi Tapu, mo e ko e heigoa ka lagomatai a tautolu ke fehola kehe mai ai?

⁴ Ti, kua nakai fahia ha Kerisiano ke fakatupu e aga hagahagakelea ne talahau mai he aposetolo ko Paulo, ne tohi: “Kia manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki; Aua neke tiaki e fakapotopotoaga ha tautolu tuga ne mahani he falu, ka kia fefakamafanaaki; kia au atu ai foki he pihia ha kua kitia e mutolu kua tata tuai e aho.” (Heperu 10:24, 25) He manamanatu fakahokulo ke he kotofaaga mo e tau aoga he o atu ke he tau fakalatahaaga Kerisiano ka lagomatai a tautolu he fakamoli katoatoa ai ke kau auloa ke he tau fakalatahaaga pihia.

Tau Feleveiaaga kua Ati Hake

5. (a) Ko e heigoa kua lauia e vagahau ha tautolu he tau feleveiaaga? (e) Ko e lata he ha ke nakai fakamule a tautolu he uiina a lautolu kua fiafia fou ke o mai he tau feleveiaaga?

⁵ Ha kua liogi e tau Kerisiano ke he agaga tapu a Iehova ke gahuahua ke he tau feleveiaaga Kerisiano, kua lata e tau tagata oti kua o atu ke foaki katoa ke gahua auloa mo e agaga mo e “aua neke fakahukia e Agaga Tapu he Atua.” (Efeso 4:30) He magaaho ne tohi he aposetolo ko Paulo e tau kupu omoomoi ia, ne fakatutala a ia ke he fakaaoga fakamitaki he vagahau. Kua lata e tau mena oti kua vagahau e tautolu ke fakaaoga ke “ati hake ke he mena ke aoga ai, kia tupu ai e mitaki kia lautolu kua fanogonogo ki ai.” (Efeso 4:29) Kua mua atu e aoga he mena nei ke he tau fakalatahaaga Kerisiano. He tohi hana ke he tau Korinito, ne pehi e Paulo kua lata ke ati hake, fakaako, mo e fakamalolo e tau feleveiaaga. (1 Korinito 14:5, 12, 19, 26, 31) Ko lautolu oti ne o atu kua aoga mai he tau feleveiaaga ia, putoia foki a lautolu ne o atu fou, ne kua liga talahau: “Ko e moli ha ha ia mutolu e Atua.” (1 Korinito 14:25) Ma e kakano nei, kua lata ia tautolu ke nakai fakamule he uiina a lautolu ne fiafia fou ke fakalataha mo tautolu, ha ko e taute pihia to fakamafiti e tupu fakaagaga ha lautolu.

6. Ko e heigoa falu mena kua lagomatai ke eke e feleveiaaga mo ati hake?

⁶ Ko lautolu oti kua mau kotofa ke he tau lauga, tau talahauaga, po ke tau fakataitaiaga he feleveiaga Kerisiano kua manako ke mailoga ko e puhala vagahau ha lautolu kua ati hake mo e lagotatai mo e Kupu he Atua ne tohi, ko e Tohi Tapu. Lafi ki ai ke talahau e vagahau tonu, kua lata ia tautolu ke fakakite e tau logonaaga mo e tau manatu he loto kua lautatai mo e tau aga fakaalofa he Atua mo Keriso. Ka maimaina a lautolu oti ne fai vala he fakaholoaga he feleveiaaga ke fakaata e ‘tau fua he agaga he Atua,’ tuga e olioli, fakauka, mo e tua, ti ko lautolu oti ne fakalataha atu to logona moli e ati hake.​—Kalatia 5:22, 23.

7. Maeke fefe he tau tagata ne o atu ke eke e fakalatahaaga mo ati hake?

⁷ Pete ni e tokofiha ne fai vala he fakaholoaga ke he tau feleveiaaga he fakapotopotoaga, kia kau auloa ai ke he fakalatahaaga kua ati hake. Fa mahani ke ha ha ai e tau magaaho ma e toloaga ke tali e tau huhu. Ko e tau magaaho nei ma e fakapuloaaga he tua ha tautolu ki mua he tau tagata. (Roma 10:9) Kia nakai fakaaoga e lautolu e magaaho ke fakatolomaki e tau manatu fakatagata, ke fakatokoluga e tau mouaaga fakatagata ha tautolu, po ke tuhituhi e matakainaga talitonu. Nakai kia fakahukia he mena ia e agaga he Atua? Ko e tau fekehekeheaki he tau matakainaga talitonu kua lata tonu ke taute fakagalo ke he agaga he fakaalofa. Kua talahau he Tohi Tapu: “Kia eke a mutolu mo tau tagata totonu ko e taha ke he taha, kia hofihofi ha mutolu a fakaalofa, mo e fefakamagaloaki a mutolu; tuga e Atua ha ia Keriso ne fakamagalo e ia a mutolu.” (Efeso 4:32) Ko e magaaho mitaki lahi ha ia kua foaki mai he tau fakalatahaaga Kerisiano ki a tautolu ke fakagahua e fakatonuaga mitaki nei! Ko e mena ia, tokologa kua o mai tuai ke he tau feleveiaaga mo e fakafetuiaki ka oti ai. Kua lagomatai foki he mena nei a lautolu ne fiafia fou, ne kua lata pauaki ke logona e fakafeleveiaaga. Ti ko e matagahua ma e tau Kerisiano oti ke taute e tau feleveiaaga kua ati hake ha ko e ‘manatu e taha ke he taha, ke fakalagalaga ai e fakaalofa mo e tau gahua mitaki.’

Tauteute Fakamitaki

8. (a) Ko e heigoa e tau fakatokatokaaga nava ne kua taute he falu ke maeke ke o atu he tau feleveiaaga? (e) Ko e heigoa e fakafifitakiaga kua fakatoka e Iehova ko e leveki mamoe?

⁸ Pete kua haga mukamuka ma e falu ke o atu ke he tau fakalatahaaga Kerisiano, ke he falu kua eke ai mo fakaholoaga kua tumau. Ma e fakatai, ko e matua fifine Kerisiano ne gahua tupe ke lagomatai aki e tau mena he kaina hana kua fa mategugu he hau ki kaina. Ti liga mogoia ke tauteute e ia e tau mena kai mo e lagomatai e fanau ke tauteute ma e feleveiaaga. Liga mamao e hala he falu Kerisiano ke hoko ke he tau feleveiaaga, po ke kua liga fakakaupa ha ko e tau matematekelea po ke fuakau. Moli, kua maama he Atua ko Iehova e tuaga he tagata fakamoli kua fina atu ke he feleveiaaga, tuga ni e leveki mamoe fakaalofa kua maama e tau manako he tau mamoe takitaha he fuifui hana. Kua talahau mai he Tohi Tapu: “To leveki e [Iehova] hana fuifui ke tuga ne leveki mamoe; to hapai e ia e tau punua mamoe ke he hana tau lima, mo e uta e ia a lautolu ke he hana fatafata; to takitaki fakatekiteki e ia e tau mamoe kua fai punua.”​—Isaia 40:11.

9, 10. Moua mai fefe e tautolu e aoga mai he tau feleveiaaga?

⁹ Ko lautolu ne taute e tau fakatokatoka lalahi ke maeke ke o atu tumau ke he tau feleveiaaga kua liga tote e magaaho kua fakaaoga e lautolu ke tauteute e tau tohi ka fakaaoga. He fakatumau ke he fakaholoaga fakafahi tapu he totou e Tohi Tapu kua lahi e palepale ka o atu ke he Aoga he Fekafekauaga Fakateokarasi. Tatai ai, ko e tauteuteaga tuai he falu he tau feleveiaaga, tuga e Fakaakoaga Kolo Toko mo e Fakaakoaga Tohi he Fakapotopotoaga, kua lahi ai e aoga he tau mena nei. He totou tuai e tohi fakaako mo e manamanatu ke he falu he tau kupu Tohi Tapu ne tohi ai, ko lautolu ne fai magafaoa kua tutuli e tau magaaho ka mautali lahi ke fakalataha katoatoa ke he tau fakatutalaaga aoga nei he Tohi Tapu.

¹⁰ Kua maeke he falu ne kua lahi e magaaho ata, ke fakaaoga fakalahi e magaaho ke tauteute ai ma e feleveiaaga. Ma e fakatai, taute e lautolu e kumikumiaga ke he kupu tohi kua tohi ai ka e nakai fatiaki mai. Ti kua lata e tau tagata oti ke tauteute ke fai aoga mai he tau feleveiaaga mo e fakalataha ke ati hake e fakapotopotoaga he tau lauga mo e tau talahauaga ha lautolu. He tauteute fakamitaki ai, to fakatoka he tau motua mo e tau fekafekau lagomatai e fakafifitakiaga mitaki he tali ku ti lau tonu. Mai he fakalilifu ma e tau foakiaga a Iehova, ko lautolu kua o atu ka tiaki e tau aga fakalavelave ka e taute agaia e feleveiaaga.​—1 Peteru 5:3.

11. Ko e ha e akonaki fakatagata kua lata ke tauteute ma e tau feleveiaaga?

¹¹ Ko e tau gahua mo e tau fakafiafia ne nakai aoga ke he malolo fakaagaga ha tautolu ka kaiha lahi e tau magaaho ha tautolu. Ka pihia, kua lata ke kumikumi e tautolu a tautolu mo e “aua neke goagoa” ke he fakaaogaaga he tau magaaho ha tautolu. (Efeso 5:17) Ko e foliaga ha tautolu ke ‘fakatau e tau magaaho’ mai he tau mena aoga tote ke maeke ke tuku fakalahi e magaaho ke he fakaakoaga Tohi Tapu fakatagata mo e tauteuteaga he feleveiaaga, ti pihia foki mo e fekafekauaga he Kautu. (Efeso 5:16) Talahau ai, nakai mukamuka tumau e mena nei mo e kua lata e akonakiaga fakatagata. Ko e tau tagata fuata kua taute ai e mena nei kua fakatoka ai e fakaveaga mitaki ma e holo ki mua anoiha. Ne tohi e Paulo ke he kapitiga tote lahi hana ko Timoteo: “Kia manamanatu a koe ke he tau mena na [ko e fakatonuaga a Paulo ki a Timoteo], kia fakamahani a koe ki ai; kia kitia ai he tau tagata oti hāu a mafiti.”​—1 Timoteo 4:15.

Tau Fakafifitakiaga Mai he Kupu he Atua

12. Ko e heigoa e fakafifitakiaga mua atu ne fakatoka he magafaoa a Samuela?

¹² Manamanatu la ke he fakafifitakiaga mitaki ne fakatoka he magafaoa a Samuela, ne fakalataha tumau ke he tau fakatokatokaaga ke fakapotopoto mo e tau tagata tapuaki he magaaho ne fakatu e faituga he Atua i Sailo. Ko e tau tagata tane ni ne kua lata ke o atu he tau tau oti ke he tau fakamanatuaga he tau galue. Ka e ko e matua tane a Samuela, ko Elekana, ne uta katoa e magafaoa hana he ‘hake a ia mai hana maga ke he taha tau mo e taha tau ki Sailo ke hufeilo, mo e eke poa ai ki a Iehova Sapaota.’ (1 Samuela 1:3-5) Ko e taone nofo a Samuela, i Ramata-sofimo, kua liga tu tata atu ke he fahi tahi ne iloa ai he vaha nei ko Renitisi he tau matafu matiketike he “mouga ko Efaraimo.” (1 Samuela 1:1) Kua liga kavi ke 30 e kilomita he fenoga hui atu ki Sailo, ko e o hui mategugu he vaha ia. Ko e mena hanei ne taute fakamoli he magafaoa a Elekana “ke he taha tau mo e taha tau, ka [o hake a lautolu] ke he fale a Iehova.”​—1 Samuela 1:7.

13. Ko e heigoa e fakafifitakiaga ne fakatoka he tau Iutaia fakamoli he nofo a Iesu ke he lalolagi?

¹³ Ne tupu hake foki a Iesu he magafaoa lahi. Ne fenoga tumau e magafaoa he tau tau oti mai i Nasareta kavi ke 100 e kilomita ke he fahi toga ke o atu ke he galue Paseka i Ierusalema. Ua la e hala ka fakaaoga e lautolu. Ko e hala fano hako ne putoia ai e palia ke he Pahua i Megiddo ti toli hake mogoia teitei ke 600 e mita he matakavi Samaria ki Ierusalema. Ko e taha hala talahaua ne fina atu a Iesu he fenoga fakahiku hana ki Ierusalema he 33 V.N. Ne putoia e mena nei he o hifo hui ke he Pahua i Ioritana he fahi tahi ato hoko a ia “ke he kelekele i Iutaia he fahi atu a Ioritana.” (Mareko 10:1) He mafegahala nei, “he o hake ki Ierusalema” kua mamao ke 30 e kilomita, ti tokoluga ai ke molea e 1,100 mita. (Mareko 10:32) Tumau ai, ko e toloaga he tau tagata fakamanatu fakamoli he galue ne taute e fenoga uka i Kalilaia ki Ierusalema. (Luka 2:44) Ko e fakafifitakiaga mitaki ha ia ma e tau fekafekau ha Iehova ke he tau motu tu hagahaga mitaki he vaha nei, tokologa kua maeke ke o ke he tau fakalatahaaga Kerisiano mo e haohao mitaki, fakaaue ke he tau puhala peleoafi he vaha fou nei!

14, 15. (a) Ko e heigoa e fakafifitakiaga ne fakatoka e Ana? (e) Ko e heigoa kua ako e tautolu mai he aga mitaki ne fakagahuahua he falu ne o atu fou ke he tau feleveiaaga?

¹⁴ Ko e taha fakafifitakiaga ko Ana ko e takape ne 84 e tau moui. Kua talahau mai he Tohi Tapu ne “nakai fano kehe a ia he faituga.” (Luka 2:37) Lafi atu, kua fakakite e Ana e fiafia lahi ke he falu. He kitia ai e tama mukemuke ko Iesu mo e ako ai ko ia e Mesia ne mavehe mai, ko e heigoa ne taute e ia? Ne fakaaue a ia ke he Atua mo e kamata ke “vagavagahau kia ia ke he tau tagata oti kana ne talifaki ke he lukutoto i Ierusalema.” (Luka 2:38) Ko e aga mitaki ha ia, ko e fakafifitakiaga ma e tau Kerisiano he vaha nei!

¹⁵ E, ko e fakalataha atu mo e fai vala he tau feleveiaaga ha tautolu kua lata ke fiafia ai, tuga a Ana, ke nakai manako a tautolu ke ­tonoa. Logona pihia e tokologa ia lautolu kua fou. He o mai he pouli ke he maama homo ue atu he Atua, kua manako a lautolu ke ako e tau mena kua maeke ia lautolu, ti tokologa kua fakakite e fakamakai lahi ma e tau feleveiaaga Kerisiano. He taha fahi, ko lautolu kua leva he kupu moli kua lata ke puipui mai neke ‘toka e lautolu e fakaalofa fakamua.’ (Fakakiteaga 2:4) Ko e kelea lahi he malolo tino po ke falu mena he falu mogo kua fakakaupa ai e tagata ke fina atu ke he feleveiaaga. Kia nakai lata ia tautolu ke fakaata e velevelemena, fakafiafiaaga, po ke tote e fiafia ke fakaohooho a tautolu ke nakai mautauteute, fakateafu, po ke tau tagata nakai o tumau he feleveiaaga.​—Luka 8:14.

Fakafifitakiaga Mitaki Lahi

16, 17. (a) Ko e heigoa e aga a Iesu ke he tau fakalatahaaga fakaagaga? (e) Ko e heigoa e aga mitaki kua lata e tau Kerisiano oti ke lali ke muitua?

¹⁶ Ne fakatoka e Iesu e fakafifitakiaga mua ue atu he fakakite e fakaaueaga ma e tau fakalatahaaga fakaagaga. He tote agaia ke 12 e tau, ne fakatata e ia e fakaalofa hana ma e fale he Atua i Ierusalema. Ne galo he tau matua hana a ia ka e fakamui ti moua a ia hane tutala mo e tau akoako he faituga ke he Kupu he Atua. He tali a ia ke he tupetupe he tau matua hana, ne huhu fakalilifu a Iesu: “Nakai kia iloa e mua ko e mena lata ke nofo au ke he fale he haku a Matua?” (Luka 2:49) Omaoma ki ai, ne liu e tama tote ko Iesu mo e tau matua hana ki Nasareta. Ne fakatumau a ia ke fakakite e manako lahi hana ke he tau feleveiaaga he tapuakiaga he fina atu tumau ke he sunako. Ti, he kamata e ia e fekafekauaga hana, kua talahau he Tohi Tapu: “Kua hoko foki a ia ki Nasareta, ne tupu ai a ia; ti kua hu atu a ia ke he sunako ke he aho sapati ko e hana mahani haia; kua tu ki luga ke totou.” He mole e totou mo e fakamaama e Iesu e Isaia 61:1, 2, kua kamata e toloaga ke ‘nava kia ia, kua ofo he tau kupu fakaalofa ne hopo mai he hana fofoga.’​—Luka 4:16, 22.

¹⁷ Muitua he tau feleveiaaga Kerisiano he vaha nei e puhala nei. He oti e hafagi e feleveiaaga aki e lologo fakaheke mo e liogi, kua totou mo e fakamaama e tau kupu mai he Tohi Tapu (po ke tau kupu tohi kua fatiaki mai he tohi fakaako Tohi Tapu). Kua lago ke he tau Kerisiano moli ke fifitaki e aga mitaki ha Iesu Keriso. He maeke agaia e tau tutuaga ha lautolu, kua moua e lautolu e fiafia he o tumau ke he tau fakalatahaaga Kerisiano.

Tau Fakafifitakiaga he Vaha Fou Nei

18, 19. Ko e heigoa e tau fakafifitakiaga mua ue atu ne fakatoka he tau matakainaga he tau motu nakai monuina he fakalilifu e tau feleveiaaga, tau toloaga mo e tau fonoaga?

¹⁸ He tau matakavi nakai monuina he lalolagi, tokologa e tau matakainaga ha tautolu kua fakatoka e fakafifitakiaga mitaki he loto fakaaue ma e tau fakalatahaaga Kerisiano. I Mosamipiki ne 45 e tula, ko e 90 e kilomita he o hui ai e leveki fahi motu ko Orlando, mo e hoana hana, ko Amélia, he mouga tokoluga ke taute e toloaga. Ti taute pihia foki e laua he liliu ke taute e taha toloaga. Ne talahau mitaki e Orlando: “Ne logona e maua nakai fai mena ne taute e maua he magaaho ne feleveia e maua e tau matakainaga he Fakapotopotoaga Bawa. Ke o mai he toloaga mo e liliu ke he tau kaina ha lautolu ko e ono e aho he fenoga, ko e kavi ke 400 kilomita he o hui ai, ti ia lautolu ko e matakainaga tane ne 60 e tau moui!”

¹⁹ Ka e kua e loto fakaaue ke he tau feleveiaaga fakafahi tapu he fakapotopotoaga? Ko Kashwashwa Njamba ko e matakainaga fifine tino ukiuki he atu tau 70 hana. Ne nofo a ia i Kaisososi, ko e maaga tote kavi ke 5 e kilomita mai he Fale he Kautu i Rundu, Namipia. Ke fina atu ke he tau feleveiaaga, ne viko e ia he fano hui ke 10 e kilomita he uho vao. Kua keli ti kaiha e falu ne o he hala nei, ka e fakatumau ni a Kashwashwa ke hau. Laulahi he tau feleveiaaga ne taute ke he vagahau ne nakai maama e ia. Ti aoga fefe a ia he hau? He muitua ke he tau kupu tohi,” he talahau e Kashwashwa, “kua lali au ke manamanatu ko e hagaao ke he heigoa e lauga.” Ka e nakai iloa a ia ke totou, ti muitua fefe e ia e tau kupu tohi? “Kua fanogonogo au ke he tau kupu tohi ne iloa manatu e au,” he tali e ia. He tau tau loga kua mole, ne tokaloto e ia loga e tau kupu tohi he manamanatuaga hana. Ke fakatolomaki e lotomatala hana ke fakaaoga e Tohi Tapu, kua fina atu a ia ke he vahega ne fakaako ke totou ne fakatoka he fakapotopotoaga. “Fiafia lahi au ke fina atu ke he tau feleveiaaga,” he talahau e ia. “Fai mena fou tumau ke ako. Kua fiafia lahi au ke fakalataha mo e tau matakainaga. Pete ni e nakai vagahau au ki a lautolu oti, ka e o mai tumau a lautolu mo e feleveia mo au. Mo e mua atu e aoga, kua iloa e au he hau ke he tau feleveiaaga, kua fakafiafia e au e loto a Iehova.”

20. Ko e ha ne nakai lata ia tautolu ke tiaki e tau feleveiaaga Kerisiano?

²⁰ Tuga a Kashwashwa, totou miliona e tau tagata tapuaki a Iehova he lalolagi katoa kua fakakite e loto fakaaue lahi ma e tau fakalatahaaga Kerisiano. Ha kua haga atu e lalolagi a Satani ke he moumouaga, nakai lata ia tautolu ke tiaki e fakalataha auloa ha tautolu. Ka e, kia fakatumau a tautolu ke mataala fakaagaga mo e fakakite e loto fakaaue hokulo ma e tau feleveiaaga, tau toloaga, mo e tau fonoaga. Nakai ni fakafiafia he naia e loto a Iehova ka e to lagomatai lahi a tautolu ke fakalataha ke he fakaakoaga faka-Atua kua takitaki atu ke he moui tukulagi.​—Tau Fakatai 27:11; Isaia 48:17, 18; Mareko 13:35-37.

Tau Huhu Fakamanatu

◻ Ko e ha e o atu ke he tau fakalatahaaga Kerisiano ko e fakamonuinaaga?

◻ Maeke fefe ia lautolu kua o atu ke kau auloa ke he feleveiaaga ati hake?

◻ Ko e heigoa e fakafifitakiaga mua atu ne fakatoka e Iesu Keriso?

◻ Ko e heigoa e fakaakoaga kua ako mai he tau matakainaga ke he tau motu nakai monuina?

[Puha he lau 28]

Loto Fakaaue a Lautolu ke he Tau Feleveiaaga Fakafahi Tapu

Totou miliona e tau tagata ne nonofo ke he tau taone ne matematekelea ke he mativa mo e kolokolovao. Pete ni e tau tutuaga pihia, ko e tau Kerisiano moli he vahaloto ha lautolu kua fakakite e loto fakaaue ma e tau fakalatahaaga Kerisiano. Talahau ai he taha motua kua fekafekau ke he taha he tau fakapotopotoaga Soweto i Gauteng, Aferika Toga: “He fakapotopotoaga ne 60 e Tau Fakamoli mo e tau tagata fakailoa nakai la papatiso, ne ha ha ia mautolu ke he vahaloto he 70 ke he 80, falu magaaho kua molea atu, ne fakalataha ke he tau feleveiaaga ha mautolu. Pete ni e nakai mamao e o maiaga he tau matakainaga, kua hagahaga kelea e tuaga he fahi nei i Sow­eto. Taha e matakainaga tane ne kua hoka ai e tua he hau ke he feleveiaaga. Ti tokoua e matakainaga fifine ne taofi ai he lali ke kaiha a laua. Ka e nakai taofi he mena nei a lautolu he o mai. He tau Aho Tapu, ne ha ha ai e fakaakoaga lologo ku he oti e liogi he feleveiaaga. Kavi ke he 95 e pasene ne nonofo tumau mo e uhu e tau lologo ke fakaaoga he tau feleveiaaga he tapu hake. Kua lagomatai he mena nei a lautolu ne fou ke ako e tau lologo mo e uhu auloa ai.”

Ha ha ai foki falu fakalavelave ki a lautolu he tau maaga i tua, tuga e loa he puhala ke fenoga mai ke maeke ke fakalataha ke he tau feleveiaaga lagatolu he fahi tapu. Taha e hoa mau fiafia ne nonofo ai 15 e kilomita he mamao mo e Fale he Kautu i Lobatse, Potosuana. Ma e tau kua mole, ne o mai tumau a laua fakalataha mo e tau fanau tokoua ha laua ke he tau feleveiaaga. Kua gahua taute tevae e tane ke lagomatai aki e magafaoa. Kua fakafua he hoana e tau koloa ikiiki ke lagomatai aki e gahua tupe he magafaoa ke maeke ia lautolu ke totogi e puhala ke he tau feleveiaaga.

He afiafi he vaha mafana nakai la leva, he mole e feleveiaaga mo e leveki takaiaga ne leo noa e magafaoa nei he tuaga pasi he 9:00 p.m. Kua oti tuai e holo he pasi ha ko e kelea he matagi. Ne tu e leoleo he vene hana mo e huhu ko e eke ha a lautolu. He logona e tuaga ha lautolu, ne momoko a ia ia lautolu mo e uta a lautolu ki kaina ne 15 e kilomita he mamao. Kua nakai la papatiso ia e hoana, ne tala age ke he tane hana: “Kitia, ka tuku fakamua e tautolu e tau feleveiaaga, to foaki mai tumau a Iehova.” Kua fakakite he tane mogonei e manako ke eke mo tagata fakamatala he tala mitaki.

[Fakatino he lau 30]

Ko e Tau Fakamoli tuga anei i Romania ne fakatoka e fakafifitakiaga mitaki he loto fakaaue ma e tau fakalatahaaga Kerisiano