Fakamalolo ha Tautolu a Tua Mauokafua ke he Tututonu he Atua

“Kua fakaako atu ai e au kia koe, . . . kia tua a koe kia Iehova.”​—TAU FAKATAI 22:19.

1, 2. (a) Ko e ha ne fakakite he Tau Fakamoli a Iehova e tua mauokafua ki a Iehova? (Tau Fakatai 22:19) (e) Ko e heigoa ne fakakite kua lata he falu tagata ke fakamalolo ha lautolu a tua mauokafua ia Iehova?

KUA fakamonuina e tau Kerisiano moli aki e iloilo tonu a Iehova mo e hana tau finagalo. Kua foaki fiafia he “fekafekau fakamoli mo e loto matala” ki a lautolu e “tau mena kai [fakaagaga] ke he tau magaaho.” (Mataio 24:45) Ko e iloilo ne moua e lautolu kua eke mo fakaveaga kanomao ke fakamatapatu aki e tua mauokafua ke he Atua. Ti, ko e matakau, kua fakakite maaliali he Tau Fakamoli a Iehova e tua mauokafua ki a Iehova mo e ke he hana tututonu.

² Ka e tuga, liga kua lata takitokotaha e falu he Tau Fakamoli ke fakamalolo e tua mauokafua ia. Kua fa lavea ke moua he Sosaiete e tau tohi ne fakakite e tehatehaua hagaao ke he tau fakamaamaaga mai i loto he tau tohi. Ko e mahalohalo nei kua liga pihia ai ha ko e tau hikihiki he tau maama, po kua liga fehagai a lautolu mo e tau mena ne lauia ki a ia ne kumikumi, mahomo atu ke he puhala manamanatu.​—Fakatatai Ioane 6:60, 61.

3. Ko e heigoa foki ka tupu ke he tau fekafekau tua fakamoli ha Iehova, mo e ko e ha?

³ Kua iloa foki he tau fekafekau moli ha Iehova e kupu moli ia Fakamatalaaga 9:11: “Ne liu foki kitia e au i lalo he lā, nakai ko e tau mafiti ne eke mo matakai ke he poitufi, nakai ko e tau tagata malolo ne kautu ai ke he tau, nakai ha ha i ai foki e tau mena kai ke he tau tagata iloilo, ti nakai ha ha i ai e koloa ke he tau tagata pulotu, nakai ko e tau tufuga foki kua ofania; ka ko e vaha mo e tau mena ke tutupu ai kua hoko ia kia lautolu oti.” To fakamoli fefe e mena nei ke he kakano laulahi po ke fakaagaga? Liga kua iloa e tautolu e tau Kerisiano ne mafiti ke fakaaoga e fakatonuaga he Tohi Tapu, malolo ke puipui e kupu moli, iloilo he fakagahuahua e tau matapatu fakaakoaga he Tohi Tapu, mo e muamua ke tutuli e iloilo tonu. Ka ko e “vaha mo e tau mena ke tutupu,” ati liga kitia ai he falu a lautolu he mogonei ke tukupa ha ko e pakia po kua motua fakahaga. Liga manamanatu a lautolu to huhu atu nakai a lautolu ke he lalolagi fou he Atua ka e nakai mamate.

4, 5. Ko e ha ne ai fai kakano ai e tau Kerisiano ke galo e tua mauokafua ke he tututonu a Iehova?

⁴ Ka galo e hoa mau he Kerisiano, kua hukia lahi e mamahi mo e galo. Liga kua fekafekau a laua tokoua ko e tau hoa ki a Iehova ke he tau tau loga. Ti iloa he hoa ne moui kua fakaoti ai he mate e pipiaga he fakamauaga.a (1 Korinito 7:39) Mogonei, ke nakai fakalolelole hana tua mauokafua, kua lata ia ia ke tau taofi hana tau logonaaga.​—Fakatatai Mareko 16:8.

⁵ Kua pulotu ai ke kitia e mate he hoa, matua, tama, po ke kapitiga Kerisiano uho mo magaaho ke fakakite ai e tua mauokafua ke he tututonu a Iehova! Pihia foki ka fehagai mo e galo he tau mena fakatagata, kia tua mauokafua a tautolu kua nakai hepehepe a Iehova. Kua tua mauokafua a tautolu to fiafia e tau tagata oti ne moua e moui tukulagi ​—ke he puhala he haoaga po ke he liu tu mai. Ke he Atua, ne pehe e salamo: “Kua fakamafola e koe hāu a lima, mo e fakamakona e manako he tau mena momoui oti. Kua tututonu a Iehova ke he hana tau mahani oti; kua fakaalofa a ia ke he hana tau mena oti ne eke. Kua tata mai a Iehova kia lautolu oti kana ne ui atu kia ia, ko lautolu oti ne ui kia ia mo e fakamoli. Kua eke e ia e mena kua manako ki ai e lautolu kua matakutaku kia ia; to fanogonogo a ia ke he ha lautolu a kalaga atu, ti fakamoui e ia a lautolu.”​—Salamo 145:16-19.

Tau Logonaaga he Matematekelea Noa

6, 7. (a) Liga ko e ha ne eke falu he Tau Fakamoli ne matematekelea he vaha kua mole ke kehe e maamaaga he mogonei? (e) Ko e ha kia nakai lata ke talahau e tautolu kua hepehepe a Iehova he fakaata e tau matematekelea pihia he vaha kua mole?

⁶ He vaha kua mole, ne matematekelea e falu he Tau Fakamoli he nakai talia ke fai vala he tau gahua ne kua liga fakaata ai he tau manamanatuaga ha lautolu he mogonei. Ke fakatai ki ai, liga ko e ha lautolu a fifiliaga anei he tau tau kua mole ke he falu faga gahua he motu. Ti liga he mogonei kua logona hifo he matakainaga kua maeke ia ia ke taute ai mo e nakai laka loa atu he tu uho faka-Kerisiano hana hagaao ke he fakatokaaga he tau mena nei.

⁷ Kua hepehepe kia a Iehova ke toka a ia ke matematekelea he tiaki e mena ka liga taute e ia he mogonei mo e nakai maimaina? Nakai manatu pihia e laulahi ia lautolu ne hohokotia ki ai. Ka kua fiafia a lautolu he maeke ke fakatata ke he tau tagata mo e maamateka kua mautali a lautolu ke tumau ke he matakupu he pule katoatoa ke he lalolagi mo e lagi katoatoa. (Fakatatai Iopu 27:5.) Kua fai kakano kia ke tokihala taha tagata he muitua ke he hana manamanatuaga ke tu mauokafua ki a Iehova? He taute fakamoli e tau matapatu fakaakoaga faka-Kerisiano he maama ai e lautolu po ke omaoma ke he tau fakaohooho he manamanatuaga, kua lata lahi a lautolu ke eke mo kapitiga ha Iehova. Moli, ko e pulotu a ia ke kalo mai he puhala ka faguna e manamanatuaga he taha po ke liga fakatupetupe e falu. Kia manamanatu a tautolu hagaao ke he lekua nei ne fakatoka mai he aposetolo ko Paulo.​—1 Korinito 8:12, 13; 10:31-33.

8. Ko e ha ne ai fai kakano e tau Kerisiano Iutaia, ne taofi mau ke he Fakatufono he mogo fakamua, ke huhu toko e tututonu a Iehova?

⁸ Ke fakafiafia a Iehova, kua poaki ke he tau Iutaia ke omaoma ke he Tau Poakiaga Hogofulu mo e tau fakatufono loga foki ne lafi ki luga ne kavi ke 600. He mogo fakamui, i lalo he fakaholoaga faka-Kerisiano, kua nakai poaki ke omaoma ke he tau fakatufono pihia ke fekafekau ki a Iehova, nakai pihia foki ke he tau Iutaia he tino. Kua nakai tuai putoia ki ai e tau fakatufono ne hagaaki ke he peritome, taute e Sapati, poa manu, mo e omaoma ke he tau puhala kai pauaki. (1 Korinito 7:19; 10:25; Kolose 2:16, 17; Heperu 10:1, 11-14) Ko e tau Iutaia​—fakalataha mo e tau aposetolo​—kua eke mo tau Kerisiano kua laveaki mai he matagahua ke taute e tau fakatufono ne poaki ke omaoma a lautolu ki ai he magaaho ne ha ha agaia i lalo he maveheaga he Fakatufono. Ti gugu nakai a lautolu kua hepehepe e fakaholoaga he Atua he poaki e tau mena ki a lautolu he mogo fakamua, ka kua nakai tuai aoga he mogonei? Nakai, kua olioli a lautolu he mahomo atu e maama ke he tau finagalo a Iehova.​—Gahua 16:4, 5.

9. Ko e heigoa ne moli hagaao ke he falu he Tau Fakamoli, ka ko e ha ne nakai tokihala ai a lautolu?

⁹ He tau vaha fou, ha ha ai e Tau Fakamoli ne kua kakana lahi ke he tau mena ka taute po ke nakai taute e lautolu. Ko e mena ia ne matematekelea lahi ai a lautolu mai he falu. He magaaho fakamui, kua lagomatai he iloilo tolomaki a lautolu ke holo ki mua ha lautolu a kitiaaga ke he tau mena. Ka e nakai lata ke tokihala he fakalautatai atu ke he manamanatuaga ha lautolu, pete ni kua liga lahi e matematekelea ne moua. Kua mitaki lahi ha ia he fakatata e lautolu ha lautolu a manako lahi ke matematekelea he tua fakamoli ki a Iehova, ke “eke . . . e mena nai ha ko e vagahau mitaki.” Kua fakamonuina e Iehova e mahani Atua fakamoli pihia. (1 Korinito 9:23; Heperu 6:10) Ne tohia he aposetolo ko Peteru mo e maamaaga: “Kaeke kua mahani mitaki a mutolu ka e fakamamahi, ti kua fakauka a mutolu, ko e mena haia kua mitaki ke he Atua.”​—1 Peteru 2:20.

Ako Mai ia Iona

10, 11. Fakakite fefe e Iona e nakai tua mauokafua ki a Iehova (a) he magaaho ne kotofa ke fano ki Nineva? (e) he magaaho ne nakai fakaotioti he Atua e tau Nineva?

¹⁰ He magaaho ne fekau ke fano ki Nineva, ne mahala a Iona ke kitia e tua mauokafua ha Iehova ia ia. He mole e mena matakutakuina ne tupu he nakai mahalo a ia ke omaoma, ne maama ai e Iona, ati mailoga e hepe hana, talia e kotofa he motu kehe, mo e hataki atu ke he tau Nineva hagaao ke he fakatulakiaga ka hoko mai. Ka kua kehe e mena ne tupu: Kakano kua tokihala e tau Nineva, ti fifili e Iehova ke nakai fakaotioti a lautolu.​—Iona 1:1–​3:10.

¹¹ Fefe mogoia a Iona? He nakai fiafia, ne gugu a ia ke he Atua he liogi. Ko e kakano ne fakaatukehe ai a ia ko e: ‘To fakahiku ni pihia he manatu e au. Kakano a ia, ne nakai fia hau au ki Nineva he mogo fakamua. Ka e he mogonei, he kua mole tukua e tau mena ne kapaletu au ki ai, he hoko atu ke he matematekelea mo e fakama he folofua he ika mahaki, mo e haku gahua fakamakamaka ke hataki e tau Nineva ke he fakatulakiaga ne tata mai, ko e fua tukua anei! Kua nakai aoga tuai e tau gahua oti mo e tau matematekelea haku! Mitaki ni au fakalata he mate!’​—Iona 4:1-3.

12. Ko e heigoa ka ako e tautolu mai he mena ne tupu ki a Iona?

¹² Aoga kia e kakano ne gugu ai a Iona? Kua hepehepe kia a Iehova he fakakite ke he tau tagata taute mena kelea ne kua tokihala e fakaalofa hofihofi? Moli, kua lata ia Iona ke olioli; he totou hogofulu e tau afe he tau tagata ka fakahao mai he moumouaga! (Iona 4:11) Ka kua fakakite he hana mahani nakai fakalilifu mo e gugu e nakai hokulo e tua mauokafua hana ke he tututonu a Iehova. Kua mua ni hana manamanatu ki a ia ni mo e tote lahi ke he falu. Kia ako e tautolu mai ia Iona ke tuku ki tua ni a tautolu mo e ha tautolu ni a tau logonaaga fakatagata. Kia talitonu a tautolu ko e mena hako a ia ke taute ka omaoma ki a Iehova, mumuitua ke he takitakiaga ne mai he puhala he hana fakatokatokaaga mo e talia hana tau fifiliaga. Kua talitonu a mautolu “to monuina a lautolu kua matakutaku ke he Atua.”​—Fakamatalaaga 8:12.

Kia Fakamalolo e Tua Mauokafua ha Tautolu he Mogonei!

13. Maeke fefe ia tautolu oti ke fakamalolo ha tautolu a tua mauokafua ki a Iehova?

¹³ Ko e mena pulotu a ia ke fakamalolo e tua mauokafua ha tautolu ki a Iehova. (Tau Fakatai 3:5-8) Kua lata moli a tautolu ke taute taha mena foki mai he liogi hokoia, ke lagomatai e Iehova a tautolu ke lahi e tua mauokafua. Kua tupu e tua mauokafua he fakave ke he iloilo tonu, ti kua lata ia tautolu ke taute e fakaako Tohi Tapu fakatagata, he totou ua e Tohi Tapu mo e tau tohi ne fakamaama aki e Tohi Tapu, mo vala he ha tautolu a fakaholoaga he aho. Kua aoga lahi e o tumau ke he tau feleveiaaga Kerisiano, pihia foki e tauteute fakamitaki mo e fakalataha ke he mena kua lata. He tumau ke fakamatala e tau kupu moli he Tohi Tapu ke he falu, he kautu ke he tau totoko, ka fakahokulo aki foki ha tautolu a tua mauokafua ki a Iehova mo e ke he hana Kupu. Ati matutaki lahi a tautolu mo ia ke he tau aho oti.

14. Nakai leva, to ui he ha ke he tau tagata he Atua ke fakakite ha lautolu a tua mauokafua ki a Iehova ke mahomo atu ke he vaha fakamua?

¹⁴ To fakalutukia mai, he vaha anoiha, e matematekelea lahi mahaki ne nakaila hoko ia ke he lanu tagata. (Mataio 24:21) Ka hoko mai, kua lata he tau fekafekau he Atua ke fakakite, ke mahomo atu ke he vaha fakamua, e tua mauokafua ke he tututonu a Iehova mo e ke he takitakiaga ne foaki he fakatokatokaaga hana. Ke he puhala fakatai, to omaoma mauokafua a lautolu he mogoia ke he tomatomaaga he Atua: “Kia o mai a, haku a motu na e; kia huhu atu ā mutolu ke he ha mutolu a tau poko, mo e pa ai ha mutolu a tau gutuhala ki tua ha mutolu; kia fakamumuli ai a koe ke he magaaho kiliiku, ato mole atu e ita lahi.” (Isaia 26:20) Kua fita a lautolu he huhu atu ke he takatakaiaga puipui mitaki he tau fakapotopotoaga ne kua molea e 85,000 he 232 e motu. Ko e heigoa ni ka lafi atu ke he tomatomaaga “kia huhu atu ā mutolu ke he ha mutolu a tau poko,” kua lata ia tautolu ke tua mauokafua to lagomatai e Iehova a tautolu ke taute ai.

15. Kua peehi fefe e matakupu ke he tua mauokafua he magahala he 1998, mo e ko e ha kua tonu ai ke pihia?

¹⁵ Kua lata lahi ia tautolu he mogonei ke fakamalolo ha tautolu a tua mauokafua. Ka nakai tua mauokafua ke he tau matakainaga faka-Kerisiano ha tautolu, ke he fakatokatokaaga a Iehova mo e, ke mua atu, ki a Iehova ni, to nakai fakaai ke hao. Ti kua lata lahi ha ia he magahala he 1998, ke fakamanatu tumau ke he Tau Fakamoli a Iehova he lalolagi katoa e tau kupu he lauga he tau, “ko e mena fakamomoui a lautolu oti kana kua ui ke he higoa he Iki”! (Roma 10:13) Ko e mena ia kua lata ia tautolu ke fakatumau ke tua mauokafua. Ka mailoga e tautolu ha tama tehatehaua kiliiku he tua mauokafua nai, kia gahua agataha a tautolu ke fakahako ai he mogonei, e, he aho nei ni.

To Tututonu ai e Fakafiliaga a Iehova

16. Ko e heigoa ka tupu ane mai kua nakai feaki e tua mauokafua, mo e puipui fefe ai e tautolu neke tupu e mena nei?

¹⁶ He Heperu 3:14, kua hataki ke he tau Kerisiano fakauku: “Kua igatia a tautolu fakalataha kia Keriso, kaeke ke taofi mau e tautolu e tua fakamua ha tautolu ato hoko ke he fakahikuaga.” Ko e matapatu fakaako, kua hagaao foki e tau kupu nei ke he tau Kerisiano ne moua e amaamanakiaga ke he lalolagi. Kua maeke e tua mauokafua ke galo ka nakai feaki. Kua lata ai ia tautolu ke fakatumau ke tutuli e iloilo tonu, ko e mena ia ka fakamalolo aki e fakaveaga ne matapatu ai ha tautolu a tua mauokafua!

17. Ko e ha kua tua mauokafua a tautolu to tonu e fakafiliaga a Iesu hagaao ke he fakahaoaga?

¹⁷ Nakai leva to tivi he Keriso e tau motu oti kana ke maeke ia ia ke “vevehe kehekehe ai e ia a lautolu, tuga e leveki mamoe kua vevehe e tau mamoe mo e tau koti.” (Mataio 25:31-33) Ati tua mauokafua ai a tautolu to fakafili tututonu e Keriso ko hai kua lata ke fakahao. Ne age e Iehova ki a ia e pulotu, lotomatala, mo e falu mahani kua lata “ke fakafili ai e lalolagi mo e tututonu.” (Gahua 17:30, 31) Kia tatai ha tautolu a talitonu mo e ha Aperahamo, ne talahau: “Kia mamao ni ia koe [ma Iehova] ke eke pihia, ke tamate e tau tagata tututonu fakalataha mo e tau tagata mahani kelea; ke fakatatai foki e tau tagata tututonu mo e tau tagata mahani kelea, kia mamao e mena ia ia koe. Nakai kia hako e mena ka eke he fakafili he lalolagi oti?”​—Kenese 18:25.

18. Ko e ha kia nakai kapaletu lahi a tautolu ka nakai iloa e tautolu taha mena he mogonei?

¹⁸ Mo e tua mauokafua katoatoa ke he tututonu a Iehova, kua nakai lata a tautolu ke kapaletu ke moua e tau tali ke he tau huhu tuga anei: ‘To fakafili fefe e tau mukemuke mo e fanau ikiiki? Ka hoko mai a Amaketo, kua fita nakai he hohoko atu mo e tala mitaki ke he tau tagata tokologa? Ka e kua a lautolu ne gagao vikoia? Ka e kua . . . ?’ Kia pehe, liga nakai iloa e tautolu he mogonai to tali fefe e Iehova e tau matakupu nei. Ka e, to taute ni e ia ke he puhala tututonu mo e fakaalofa hofihofi. Kia nakai ke mahalohalo a tautolu ki ai. Ka e, liga ofo mo e fiafia a tautolu ke kitia kua taute ai e ia he puhala ne nakaila tuaha ki ai a tautolu.​—Fakatatai Iopu 42:3; Salamo 78:11-16; 136:4-9; Mataio 15:31; Luka 2:47.

19, 20. (a) Ko e ha kua nakai hepe ke huhu e tau huhu fakalatalata? (e) A fe ka foaki e Iehova e tau tali kua lata?

¹⁹ Kua nakai fakalolelole he fakatokatokaaga a Iehova e mahani fakamoli, tau huhu kua lata, ke tuga ne fakavai he falu tagata totoko. (1 Peteru 1:10-12) Ka kua fakatonu e Tohi Tapu ke kalo mai he tau kumiaga goagoa mo e tuaha. (Tito 3:9) Ke huhu e tau huhu kakano mo e kumikumi ke he Kupu he Atua mo e tau tohi Kerisiano ke moua e tau tali faka-Tohiaga Tapu ka fakamalikiti aki ha tautolu a iloilo tonu ati fakamalolo ai ha tautolu a tua mauokafua ia Iehova. Ne muitua e fakatokatokaaga ke he fakafifitakiaga ha Iesu. Ne nakai mahalo a ia ke tali e tau huhu ne nakaila hoko mai e magaaho tonu ke tali ai. Ne fakamaama e ia: “Loga gaia e tau mena ia au ke tala atu e au kia mutolu, ka kua nakai maeke ke talia e mutolu ke he vaha nai.” (Ioane 16:12) Ne fakamoli age a ia na fai mena foki ne nakaila iloa e ia he magaaho ia.​—Mataio 24:36.

²⁰ Loga agaia e tau mena ke fakailoa mai e Iehova. Kua pulotu ai ke fakatali ki a ia, ke tua mauokafua to tonu ni e magaaho ka fakakite e ia hana tau finagalo ke fehagai mo e tau manako he mogoia ni. Lata ai ia tautolu ke tua mauokafua ka hoko mai e magaaho kotofa ha Iehova, to fiafia a tautolu he moua e maama lafi ki luga ke he hana tau puhala. E, ka fakagahuahua e tautolu e tua mauokafua katoatoa ki a Iehova mo e ke he fakatokatokaaga ne fakaaoga e ia, to moua e tautolu e palepale. Ne fakamoli mai e Tau Fakatai 14:26 ki a tautolu: “Ko e matakutaku kia Iehova, ha ha i ai e mena tumau ke tua ki ai; to fai mena foki ke malu ai hana fanau.”

[Matahui Tala]

Ko e Heigoa Hau a Manatu?

◻ Ko e ha kua nakai pulotu ke fakalolelole ha tautolu a tua mauokafua ki a Iehova ha ko e tau manamanatuaga?

◻ Ko e heigoa ka ako e tautolu mai he mena ne tupu ki a Iona?

◻ Ko e ha e fakaako Tohi Tapu mo e o ke he tau feleveiaaga kua aoga ai?

[Fakatino he lau 14]

Pihia ka fehagai mo e matematekelea fakatagata, kua mauokafua a tautolu ko e tututonu a Iehova

[Tau Fakatino he lau 16]

Moli nakai kua tua mauokafua a koe ki a Iehova?