Kia Gahua Ni a Mutolu Kia Momoui Ai!
“Ko e haku a tau fakahele na e, . . . kia gahua ni a mutolu mo e matakutaku mo e vivivivi, kia momoui ai a mutolu.”—FILIPI 2:12.
1, 2. Ko e heigoa e tau talahauaga talahaua ne takitaki e tau tagata tokologa ke logona kua nakai fai takitakiaga a lautolu ke he puhala momoui ha lautolu?
“NA FANAU pihia kia a koe?” Nakai la leva, ne tu e huhu ia he kili he mekasini talahaua. I kelekele he mataulu e tau kupu: “Aga fakatagata, mahani, ti pihia mo e tau fifiliaga he moui. Kua fakakite mai he tau fakaakoaga fou ko e laulahi ni ke he tupumaiaga hau.” Ko e tau talahauaga pihia kua fakatupu e falu ke logona kua tote e takitakiaga ha lautolu ke he tau momoui ha lautolu ni.
2 Kua matakutaku e falu ko e fua he feaki fakamatua he tau matua ha lautolu po ke puhala fakaako he tau faiaoga ha lautolu kua tuga ke fakakupu a lautolu ke he moui nakai fiafia. Kua nonaia a lautolu ke fatiaki e tau hehe he tau matua ha lautolu, ke taute ha lautolu a tau aga kelea pauaki, ke kitia moli aki e nakai fakamoli ki a Iehova—fakaku ai, ke taute e tau fifiliaga kelea. Pihia kia e mena kua fakaako he Tohi Tapu? Ha ha i ai moli e tau tagata lotu kua talahau malolo kua fakaako he Tohi Tapu e tau mena pehenei, ko e fakaakoaga he talahau tuai. Hagaao ke he fakaakoaga nei, ne leva tigahau e kotofa he Atua e tau mena tutupu takitaha he moui hau.
3. Ko e heigoa e fekau fakamalolo kua ha ha he Tohi Tapu ke he ha tautolu a iloilo ke iloa e vaha anoiha ha tautolu?
3 Ko e tau manatu kehekehe oti nei kua taha ni e kakano: Tote lahi e fifiliaga hau, tote e takitakiaga ke he puhala he moui hau. Ko e fekau fakalolelole moli a ia, ti lafi e fakaloleloleaga ke he mena vihi. Talahau he Tau Fakatai 24:10: “Kaeke ke fakalolelole a koe ke he aho matematekelea, kua tote ni hāu a malolo.” Ka kua fakamalolo a tautolu ke fakaako, hagaao ai ke he Tohi Tapu, kua maeke ni ia tautolu ke ‘gahua ni a tautolu kia momoui.’ (Filipi 2:12) Fakamalolo fefe e tautolu e mauokafua ha tautolu ke he fakaakoaga faka-Tohiaga Tapu nei?
Ko e Gahua “Ati Hake” kua Taute e Tautolu ia Tautolu
4. Pete kua tutala e 1 Korinito 3:10-15 ke ati hake aki e tau koloa nakai vela he afi, ko e heigoa kua nakai hagaao e mena nei ki ai?
4 Manamanatu la ke he fakataitaiaga he aposetolo ko Paulo ne moua he 1 Korinito 3:10-15. Ne tutala a ia i loto ke he ati hake he gahua faka-Kerisiano, ti ko e matapatu fakaakoaga he hana fakataitaiaga kua hagaao ke he fekafekauaga i loto mo e i fafo. Kakano kia a ia ko e fifili e tutaki ke fekafekau ki a Iehova mo e nofo fakamoli tumau kua lago katoatoa e matagahua ia ki a lautolu ne fakaako mo e fakamahani a ia? Nakai. Ne peehi e Paulo e aoga he taute he faiaoga e gahua ati hake kua mitaki lahi. Ka e he iloa e tautolu he vala tala fakamua, ne nakai pehe a ia ko e tagata fakaako po ke tutaki kua nakai fai fifiliaga ke he mena nei. Moli, ko e fakataitaiaga a Paulo kua hagaaki ke he gahua kua taute e tautolu ke he falu, nakai ko e ati hake ni ia tautolu. Fakamoli e mena nei ha kua vagahau a Paulo ke he gahua ati hake fakahanoa ne kua moumou ka e hao a ia ko e tagata talaga. Na fa talahau he Tohi Tapu falu magaaho e vagahau fakatai ia ke he gahua kua taute e tautolu ia tautolu.
5. Ko e heigoa e tau Tohiaga Tapu kua fakakite kua lata he tau Kerisiano ke taute e gahua “ati hake” ki a lautolu ni?
5 Manamanatu, ma e fakatai, ia Iuta 20, 21: “Ko mutolu, ko e tau fakahelehele na e, kia ati hake e mutolu a mutolu ke he ha mutolu a tua kua tapu ue atu, ko e Agaga Tapu ke liogi ai a mutolu, Kia fakatumau e mutolu a mutolu ke he fakaalofa he Atua.” Kua fakaaoga foki e Iuta e kupu Heleni taha nei ma e “ati hake” ne kua fakaaoga e Paulo he 1 Korinito veveheaga 3, ka kua hagahaga e manatu hana ke tuga kua ati hake e tautolu ia tautolu e fakaveaga he tua ha tautolu. He fakamau e Luka e fakataitaiaga a Iesu he tagata ne fakatu hana fale he mena patu, kua fakaaoga e kupu Heleni taha nei ma e “fakaveaga” kua fakaaoga e Paulo he hana a fakataitaiaga he ati hake faka-Kerisiano. (Luka 6:48, 49) Lafi ki ai kua fakaaoga e Paulo e fakatai he fakamau ke he “mauokafua” he magaaho ne fakamafana e ia hana tau Kerisiano ke tolomaki fakaagaga. E, kua fakaako he Kupu he Atua ke taute e tautolu e “ati hake” ke lata ni mo tautolu.—Efeso 3:15-19; Kolose 1:23; 2:7.
6. (a) Fakataitai e fua he tutaki Kerisiano takitokotaha ha ko e fakalataha ke he gahua ati hake. (e) Ko e heigoa e matagahua kua ha ha i ai he tau tutaki oti?
6 Ko e gahua ati hake Kerisiano kia ko e gahua he tagata tokotaha? Manamanatu la kua fifili a koe ke ta e fale. Fano a koe ke moua e palana he tagata palana fale. Kua amanaki a koe ke lahi e gahua ka taute ni e koe, kua fakagahua e koe e tagata ta fale ke gahua mo koe ke fakakite ki a koe e tau puhala kua mua atu. Ka fakatoka e ia e fakaveaga mao, lagomatai a koe ke maama e tau pulega, fakakite e tau koloa mitaki ke fakatau, ti fakaako foki a koe hagaao ke he puhala ta fale, to liga talia e koe kua taute e ia e gahua mitaki. Ka e kua ka fakaheu e koe e hatakiaga hana, he fakatau e tau koloa tau mukamuka po ke malona vave, po ke kehe mai he tau pulega he tagata palana fale? Moli to nakai tukupau aki e koe e tagata ta fale po ke tagata palana fale kaeke ke malolo e fale! Tatai ai, fua mai e tutaki Kerisiano takitokotaha ha ko e fakalataha ke he gahua talaga. Ko Iehova e takitaki palana mua ue atu. Kua lalago e ia e Kerisiano fakamoli, ko e taha he ‘tau ekegahua he Atua,’ kua fakaako mo e talaga e tagata fakaako. (1 Korinito 3:9) Ka e lauia foki e tagata fakaako. He fokifokiaga fakahiku, kua lago ni ki a ia e puhala he hana moui. (Roma 14:12) Ka manako a ia ke moua e tau mahani Kerisiano mitaki, kua lata a ia gahua malolo ke moua ai, ke ati hake ia lautolu.—2 Peteru 1:5-8.
7. Ko e heigoa e tau totokoaga kua fehagai e falu Kerisiano, mo e ko e heigoa e fakamafanaaga ma lautolu?
7 Kua kakano kia e mena nei, ko e tau talagaaga, takatakaiaga, mo e fua he tau faiaoga ha tautolu kua nakai fai kakano? Nakai pihia. Kua mailoga he Kupu he Atua e tau mena nei kua aoga mo e omoomoi. Ko e tau hagahaga loga kua hala mo e hehe kua pauaki ti kua uka lahi ke totoko. (Salamo 51:5; Roma 5:12; 7:21-23) Ko e fakamahani fakamatua mo e totokaaga he kaina kua lahi mahaki e fakaohooho ke he tau tagata fuata—ma e mitaki po ke kelea. (Tau Fakatai 22:6; Kolose 3:21) Ne vihia e Iesu e tau takitaki lotu Iutaia ha ko e tau lauiaaga kelea he tau fakaakoaga ha lautolu ke he falu. (Mataio 23:13, 15) He vaha nei, ko e tau lauiaaga pihia kua putoia ai a tautolu oti. Ma e fakatai, ko e falu he tau tagata he Atua kua fehagai mo e tau totokoaga ti ko e fua ko e vaha tama nakai mukamuka. Ko lautolu nei kua lata mo e totonu mo e fakaalofa ha tautolu. Ti moua e lautolu e mafanatia mai he fekau he Tohi Tapu ne kua nakai fifili a lautolu ke liu fatiaki e tau hehe po ke nakai fakamoli he tau mamatua ha lautolu. Manamanatu la e puhala kua fakatata he falu he tau patuiki Iutaia i tuai e mena nei.
Tau Patuiki a Iuta—Taute Ni e Lautolu e Tau Fifiliaga ha Lautolu
8. Ko e heigoa e fakafifitakiaga kelea ne moua mai e Iotamo he matua tane hana, ka ko e heigoa e fifiliaga ne taute e ia?
8 Ne patuiki a Usia i Iuta he fuata mui lahi he 16 e tau moui mo e pule ai ke 52 e tau tau. He vaha oti nei “ne eke ai e ia e mahani tututonu ki mua a Iehova ke lata mo e tau mena oti ne eke e Amasia ko e matua tane hana.” (2 Tau Patuiki 15:3) Ne fakamonuina e Iehova a ia aki e tau kautuaga fakakautau. Momoko ai, ne matalahi a Usia ha ko e kautuaga. Ne fakaikaluga mo e totoko a ia ki a Iehova he tugi e tau poa manogi he fatapoa he faituga, ko e matagahua ne fakatoka pauaki ma e tau ekepoa. Ne akonaki ai ki a Usia ka e liliu vale ni. Ti fakatokolalo ai a ia—he lauia he lepela mo e nofo kehe ai. (2 Nofoaga he Tau Patuiki 26:16-23) Fefe e tali atu he tama hana ko Iotamo ke he tau mena oti nei? Na maeke he tama fuata nei ke fakaohooho he hana a matua tane mo e fakaheu e fakatonuaga a Iehova. Kua lata he tau tagata ke fakaohooho kelea ha kua fakatumau ni a lautolu ke he tau gahua fakalotu hehe. (2 Tau Patuiki 15:4) Ka e taute ni e Iotamo e fifiliaga hana. “Ne eke e ia e tau mena tonu ki mua a Iehova.”—2 Nofoaga he Tau Patuiki 27:2.
9. Ko e heigoa falu fakaohoohoaga mitaki ha Ahasa, ka e fefe e fakaotiaga he moui hana?
9 Ne pule a Iotamo ke 16 e tau tau, tumau fakamoli ki a Iehova ke he magaaho oti ia. Ko e tama tane hana ko Ahasa, ne moua e fakafifitakiaga mitaki ue atu he matua tane fakamoli. Ti ha ha i ai foki ia Ahasa e tau fakaohoohoaga mitaki. Ne fakamonuina a ia ke moui he magaaho ne perofeta fakamalolo ai e tau perofeta fakamoli ko Isaia, Hosea, mo Mika ke he motu. Ka kua taute e ia e fifiliaga kelea. “Ka e nakai eke e ia e mahani tututonu ki mua a Iehova, tuga na Tavita hana matua.” Ne taute e ia e tupua Paala mo e hufeilo ki ai ti tugi foki hana tau tama tane ke he poa ke he tau atua pouliuli. Pete ni e tau fakaohoohoaga mitaki ia, ne kaumahala kelea a ia ko e patuiki mo e ko e fekafekau ha Iehova.—2 Nofoaga he Tau Patuiki 28:1-4.
10. Ko e matua tane fefe a Ahasa, ka ko e heigoa e fifiliaga ne taute he tama tane hana ko Hesekia?
10 Mai he onoonoaga he tapuakiaga mea, kua uka lahi ke manamanatu ke he matua tane kelea ke kehe mai ia Ahasa. Ka e ko e tama tane hana ko Hesekia ne nakai fifili ke he hana matua tane! Ko e tau tama fuata ha Ahasa ne keli ke poa ki a Paala ne tuga ni e tau lafu ha Hesekia. Ka e fakanonaia kia he feakiaga matematekelea nei a Hesekia he moui nakai fakamoli ki a Iehova? Kehe ai ha kua eke a Hesekia mo taha he tau patuiki mua atu moli i Iuta—ko e tagata ofania mo e pulotu. “Ne ha i ai a Iehova mo ia.” (2 Tau Patuiki 18:3-7) Moli, ha i ai e kakano ke talitonu pete ni ko e patuiki fuata tote agaia a Hesekia ko e tagata tohi omoomoi he Salamo 119 a ia. Ka pihia, ti nakai uka ke kitia e kakano ne tohi e ia e tau kupu nei: “Kua tagi ni hoku loto he fakaatukehe.” (Salamo 119:28) Pete ni e tau vihi maanu hana, ne fakaata e Hesekia e Kupu a Iehova ke takitaki hana moui. Kua talahau mai he Salamo 119:105: “Ko e hāu a kupu ko e hulu ia ke he haku tau hui, mo e maama ke he haku puhala.” E, taute ni e Hesekia e fifiliaga ma hana—ko e fifiliaga tonu.
11. (a) Pete ni e fakaohoohoaga mitaki he matua tane hana, kelea muikau fefe e totokoaga a Manase ki a Iehova? (e) Ko e heigoa e fifiliaga ne taute e Manase ke he fakaotiaga he moui hana, mo e ko e heigoa kua iloa e tautolu mai he mena nei?
11 Kehe mai ai, he taha he patuiki mitaki ue atu a Iuta ne mui mai e patuiki kelea muikau. Ne fakatupu he tama a Hesekia ko Manase e tapuaki tupua, taulatua, mo e tau favale lalahi ne mua atu. Kua talahau mai he fakamauaga “ti vagahau mai a Iehova kia Manase mo e hana motu,” ne liga puhala mai he tau perofeta. (2 Nofoaga he Tau Patuiki 33:10) He fakamauaga tuai Iutaia ne tali age a Manase he helehele a Isaia. (Fakatatai Heperu 11:37.) Ko e hako po ke nakai e mena ia, ne kaumahala a Manase ke fanogonogo ke he ha hatakiaga faka-Atua. Ne tugi moui e ia falu he tau tama tane hana mo poa, tuga ni e mena ne taute he hana matua tupuna ko Ahasa. Ka ko e tagata kelea nei, ke he fehagaiaga mo e tau kamatamata kelea lahi he magaaho fakamui he moui, ne fakatokihala mo e hiki hana tau puhala. (2 Nofoaga he Tau Patuiki 33:1-6, 11-20) Kua fakaako he fakataiaga hana ki a tautolu ko e tagata kua taute e tau fifiliaga kelea muikau kua nakai mamao mai he fakahaoaga. Maeke ia ia ke hiki.
12. Ko e heigoa e tau fifiliaga kehe ne taute e Amoni mo e tama tane hana ko Iosia hagaao ke he fekafekau ki a Iehova?
12 Na kua lata ke lahi e mena ne ako mai he tama tane a Manase ko Amone mai he fakatokihala he matua tane hana. Ka e taute foki e ia e tau fifiliaga hepe. Ko Amone ‘ne fakalahi ai hana tau hala’ ato hokotia a ia ke kelipopo. Kehe mamao ai hana tama tane ko Iosia. Ne fifili ni a Iosia ke ako mai he mena ne tupu ke he hana matua tupuna. Kua kamata a ia ke pule he valu ni e tau he moui. He 16 ni e tau hana, kua kamata a ia ke kumi ki a Iehova mo e he magaaho fakamui kua eke a ia mo patuiki fakamoli kua lata ke muitua ki ai. (2 Nofoaga he Tau Patuiki 33:20–34:5) Ne taute e ia e fifiliaga—ko e fifiliaga tonu.
13. (a) Ko e heigoa kua ako e tautolu mai he tau patuiki Iutaia ne fakatutala ki ai a tautolu? (e) Aoga fefe e fakamahaniaga fakamatua?
13 Ko e kumikumiaga ku nei ke he tau patuiki Iutaia ne fitu kua fakaako mai e fakaakoaga malolo lahi. He falu mena foki, ko e tau patuiki kelea lahi ne mitaki e tau tama tane, mo e fehikitaki ai, ko e tau patuiki mitaki lahi ne kelea muikau e tau tama tane. (Fakatatai Fakamatalaaga 2:18-21.) Nakai fakatote he mena nei e aoga he fakamahaniaga fakamatua. Ko e tau matua ne fakamahani e tau fanau ha lautolu hagaao ke he puhala ha Iehova kua foaki moli ke he tau fanau ha lautolu e kotofaaga mitaki ue atu ke eke mo tau fekafekau fakamoli a Iehova. (Teutaronome 6:6, 7) Fai fanau agaia ni, pete ni e lali fakalahi e tau mamatua fakamoli, kua fifili ke mumui ke he puhala hehe. Falu fanau, pete ko e fakaohoohoaga kelea he tau matua, kua fifili ke fakaalofa mo e fekafekau ki a Iehova. Mo e fakamonuinaaga hana, kua kautu e tau momoui ha lautolu. Fa manamanatu nakai a koe ke he falu magaaho, ko e mena fe ka hoko ki a koe? Manamanatu la, ke he falu he tau fakamoliaga fakaperesona a Iehova kua maeke ia koe ke fifili hako!
Mauokafua a Iehova ki a Koe!
14. Iloa fefe e tautolu kua maama e Iehova e tau kuku ha tautolu?
14 Kitia e Iehova e tau mena oti. Talahau he Tau Fakatai 15:3: “Ha ha he tau mena oti ni e tau fofoga a Iehova; kua kitekite ni a ia ke he tau tagata mahani kelea katoa mo e tau tagata mahani mitaki.” Ne pehe a Tavita hagaao ki a Iehova: “Ne fioia he na fofoga hāu haku a tino oti ka e nakai nakai la mau; kua tohi oti foki ke he hāu a tohi, kua taute e tau aho ka e nakai la ha i ai taha.” (Salamo 139:16) Ti iloa e Iehova e tau hagahaga kelea kua taufetului a koe ki ai—ko e mena tupu pauaki ia koe po ke moua ai ko e fua he falu fakaohoohoaga kua molea atu he takitakiaga hau. Kua maama tonu e ia e puhala kua lauia a koe he tau mena nei. Kua iloa mitaki e ia e tau kuku hau mai he mena ne iloa e koe. Ti fakaalofa hofihofi a ia. Nakai lahi e mena kua amanaki a ia mai ia tautolu ke taute.—Salamo 103:13, 14.
15. (a) Ko e heigoa taha punaaga he fakamafanaaga ma lautolu kua fakamamahi pauaki he falu? (e) Kua fakalilifu e Iehova a tautolu takitokotaha he foaki mai e matagahua fe ki a tautolu?
15 He taha fahi, kua nakai kitia e Iehova a tautolu ko e tau tagata matematekelea lolelole ke he tuaga. Ka kelea e tupuaga he vaha fakamua ha tautolu, moua e tautolu e fakamafanaaga moli kua vihiatia e Iehova e mahani fakamamahi taute pauaki. (Salamo 11:5; Roma 12:19) Ka e tokanoa kia e ia a tautolu ka fuluhi mai a tautolu mo e taute pauaki e tau fifiliaga hehe? Nakai pihia. Talahau mai he Kupu hana: “Ko e mena to igatia e tagata mo e fua hana ni a kavega.” (Kalatia 6:5) Kua fakalilifu e Iehova e tau mena momoui takitaha hana aki e matagahua ke taute e mena hako mo e fekafekau ki a ia. Tuga he tala age e Mose ke he motu ko Isaraela: “Kua ui age au ke he aho nai ke he lagi mo e lalolagi ke talahau atu kia mutolu, kua tuku atu e au ki mua ha mutolu e moui mo e mate, ko e monuina mo e malaia; ko e hanai, kia fifili la e moui, kia moui ai a koe katoa mo e hau a fanau.” (Teutaronome 30:19) Kua mauokafua a Iehova to taute foki e tautolu e fifiliaga hako. Iloa fefe tautolu e mena ia?
16. Kautu fefe a tautolu he ‘gahua ni ha tautolu a fakamouiaga’?
16 Mailoga e mena ne tohi he aposetolo ko Paulo: “Hanai, ko e haku a tau fakahele na e, . . . kia gahua ni a mutolu mo e matakutaku mo e vivivivi, kia momoui ai a mutolu. Ha ko e Atua ni, kua gahua ki loto ia mutolu ke tupu ai e loto ke he hana finagalo fakaalofa, kia gahua foki ki ai.” (Filipi 2:12, 13) Ko e kupu Heleni “gahua ni” kua fakakite mai ko e fakakatoatoa taha mena. Ti nakai fai ia tautolu kua kotofa ke kaumahala po ke ke tiaki noa. Kua mauokafua a Iehova ko e Atua kua maeke ia tautolu ke fakakatoatoa e gahua ne foaki mai ki a tautolu ke taute—ko e gahua kua takitaki atu ke he fakamouiaga ha tautolu—ane mai ai kua nakai omoomoi e ia e talahauaga pihia. Ka e kautu fefe a tautolu? Nakai ni ke he malolo ha tautolu. Ka malolo lahi a tautolu i ai mo e ia tautolu ni, to nakai lata ke “matakutaku mo e vivivivi.” Ka e ‘gahuahua’ e agaga tapu hana ko Iehova he tau loto mo e tau manamanatuaga ha tautolu he lagomatai a tautolu ke ‘gahua ke tupu ai e loto.’ Mo e lagomatai fakaalofa ia, fai kakano kia ke nakai taute e tautolu e tau fifiliaga hako he moui mo e momoui ki ai? Nakai!—Luka 11:13.
17. Ko e heigoa e tau hikihikiaga kua taute e tautolu ma tautolu, mo e to lagomatai fefe e Iehova a tautolu ke taute pihia?
17 To ha ha i ai e tau fakalavelave ia tautolu ke kautu mai ai—liga ko e tumauaga he tau mahani kelea mo e tau fakaohoohoaga mamahi ka fakakeukeu e tau manamanatuaga ha tautolu. Pete ia, mai he lagomatai he agaga a Iehova, to kautu mai a tautolu he tau mena nei! He tohi e Paulo ke he tau Kerisiano i Korinito, kua malolo lahi e Kupu he Atua ke “ulu ai e tau kolo.” (2 Korinito 10:4) Moli, kua lagomatai e Iehova a tautolu ke taute e tau hikihikiaga mitaki ke he tau momoui ha tautolu. Kua fakamafana mai he Kupu hana ki a tautolu ke ‘tuku kehe e tagata tuai’ mo e ‘tapulu ke he tagata fou kua eke ke lata mo e Atua, ke he tututonu mo e mahani mitaki ke fakamoli ai.’ (Efeso 4:22-24) Maeke moli kia he agaga a Iehova ke lagomatai a tautolu ke taute e tau hikihikiaga pihia? Moli! Kua fua mai e tau fua he agaga he Atua ia tautolu—ko e tau fua fulufuluola mo e uho kua manako oti a tautolu ke feaki. Mena fakamua i ai ko e fakaalofa.—Kalatia 5:22, 23.
18. Ko e heigoa e fifiliaga kua lata he tau tagata manamanatu oti ke taute, mo e ko e heigoa he mena nei kua lagomatai a tautolu ke fifili?
18 Kua fakatoka mai he mena nei e tokanoaaga he kupu moli. Ha ha ia Iehova e fakaalofa nakai fai fakaotiaga, ti kua taute a tautolu ke he hana fakataiaga. (Kenese 1:26; 1 Ioane 4:8) Ti fifili a tautolu ke fakaalofa ki a Iehova. Ti ko e fakaalofa ia—nakai ko e moui mua ha tautolu, nakai ko e moua he tau hehe ha tautolu, nakai ko e hagahaga pauaki ha tautolu ke taute kelea—ko e kei ke he vaha anoiha ha tautolu. Ko e fakaalofa ki a Iehova ko e Atua ko e mena kua lata ia Atamu mo Eva ke taute ke nonofo fakamoli i Etena. Ko e fakaalofa pihia kua lata ia tautolu takitokotaha ke maeke ke hao mai i Amaketo mo e kautu atu he kamatamata fakahiku he fakaotiaga he Pule he Afetau. (Fakakiteaga 7:14; 20:5, 7-10) Igatia a tautolu takitokotaha mo e feaki e fakaalofa pihia, pete ni e tutuaga ha tautolu. (Mataio 22:37; 1 Korinito 13:13) Kia fifili a tautolu ke fakaalofa ki a Iehova mo e ati hake e fakaalofa tukulagi ia.
Ko e Heigoa Hau a Manatu?
◻ Ko e heigoa e tau manatu talahaua kua nakai tatai mo e fakaakoaga hako hagaao ke he matagahua he tagata?
◻ Ko e heigoa e gahua ati hake kua lata e tau Kerisiano takitokotaha ke taute e lautolu ia lautolu?
◻ Fakatata fefe he tau fakafifitakiaga he tau patuiki Iutaia kua maeke he tau tagata takitaha ke taute hana ni a fifiliaga?
◻ Fakamafana mai fefe e Iehova ki a tautolu kua maeke ia tautolu ke taute e tau fifiliaga hako he moui, pete ni e tau fakaohoohoaga kelea ne viko takai ia tautolu?
[Fakatino he lau 29]
Fifili kia hau a vaha i mua ke he tau tupumaiaga?
[Fakatino he lau 31]
Pete ni e fakafifitakiaga kelea he matua tane hana, ne fifili a Iosia ke fekafekau ke he Atua