“Ko e Faituga” mo e “Iki” he Vaha Nei

“Ka ko e Iki ka huhu mai ki fale a lautolu, to hu mai a ia fakalataha mo lautolu; ka huhu atu a lautolu ki fafo, to hu atu foki a ia.”​—ESEKIELU 46:10.

1, 2. Ko e heigoa e matapatu moli ne lagomatai a tautolu ke moua e tau kakano loga he fakakiteaga he faituga a Esekielu?

KUA nakai makona katoatoa e falu rapai ke he tohi a Esekielu. Hagaao ke he Talmud, kua manatu falu ia lautolu ke uta kehe e tohi mai he fakatufono he Tohiaga Tapu. Ne uka lahi ki a lautolu e fakakiteaga he faituga ati talahau kua nakai fakaai e tagata ke maama ai. Kua fakagogoa foki e falu tagata fakaako Tohi Tapu ha ko e fakakiteaga a Esekielu ke he faituga ha Iehova. Ka e kua a tautolu?

² Tali mai he liu fakafou e tapuakiaga mea, ne fakamonuina e Iehova hana tau tagata he foaki e tau lupalupa loga he lotomatala fakaagaga, putoia ai e maamaaga ke he faituga fakaagaga he Atua​—ko e fakaholoaga tuga e faituga a Iehova ma e tapuakiaga mea.a Kua lagomatai he moliaga nei a tautolu ke moua e tau kakano loga he fakakiteaga a Esekielu. Kia kitekite fakalahi ai a tautolu ke he tau vala fa he fakakiteaga nei​—ko e faituga, ko e ekepoa, ko e iki, mo e motu. Ko e heigoa e kakano he tau mena e he vaha nei?

Ko e Faituga mo Koe

3. Ko e heigoa ke ako e tautolu mai he alo fale tokoluga nea mo e tau fakatino he kaupa he tau hala ke o ki loto ke he faituga?

³ Manamanatu la kua o a tautolu kitekite e faituga he fakakiteaga nei. Ne o atu a tautolu mo e toli fitu e sitepe ke he taha he tau gutuhala mamahaki. I loto he puhala nei, ne onoono hake a tautolu mo e ofoofogia. Ko e alo fale kua molea 30 e mita i luga ia tautolu! Kua fakamanatu ai ki a tautolu e tokoluga nea he tau tutuaga ke huhu atu ke he fakaholoaga he tapuakiaga a Iehova. Ko e kikila mai he tau puhio kua fakamaama aki e tau pama ne ta he kaupa, ne kua fakaaoga he tau Tohiaga Tapu ke fakatino aki e mahani tonu. (Salamo 92:12; Esekielu 40:14, 16, 22) Ko e mena tapu nei kua lata ma lautolu ne mahani mea mo lautolu ne mahani hakohako fakaagaga. Ke fakatatai atu ke he mena ia, kua manako a tautolu ke tumau ke mahani hakohako ke talia e tapuakiaga ha tautolu ki a Iehova.​—Salamo 11:7.

4. Ko hai ne kua nakai fakaata ke huhu atu ke he faituga, ti ko e heigoa ne fakaako he mena nei ki a tautolu?

⁴ He tau fahi oti he hala papahi, tolu e poko he tau leoleo. To fakaata nakai he tau leoleo a tautolu ke o ki loto he faituga? Tala age a Iehova ki a Esekielu nakai maeke ke hu ki loto ha “tagata kehe, kua nakai peritome e loto.” (Esekielu 40:10; 44:9) Ko e heigoa e kakano he mena ia? Kua talia ni he Atua ke tapuaki ki a ia a lautolu ne mumuitua mo e momoui ke he hana tau fakatufono. (Ieremia 4:4; Roma 2:29) Ne talia fiafia e ia a lautolu pihia ki loto he hana a fale ie fakaagaga, ko e hana fale tapuaki. (Salamo 15:1-5) Tali mai he liu fakafou e tapuakiaga mea he 1919, ko e fakatokatokaaga a Iehova kua fakatokoluga mo e hane fakamea ai hana tau fakatufono ke he mahani mitaki. Ko lautolu ne nakai mahalo pauaki ke omaoma kua nakai talia ke he fakalatahaaga he hana tau tagata. He vaha nei, ko e matagahua fakave ke he Tohi Tapu ke tuku ki tua e tau tagata hehe ne nakai tokihala, kua taute pihia ke tumau e mea he tapuakiaga ha tautolu.​—1 Korinito 5:13.

5. (a) Ko e heigoa e tataiaga ne ha ha he vahaloto he fakakiteaga a Esekielu mo e fakakiteaga a Ioane ne fakamau he Fakakiteaga 7:9-15? (e) He fakakiteaga a Esekielu, ko hai ne fakatino he tau magafaoa 12 ne tapuaki he pa i tua?

⁵ Kua hafagi atu e hala papahi ke he pa i tua ne fa e tapuaki mo e fakaheke e tau tagata ki a Iehova. Ati fakamanatu mai he mena nei ki a tautolu e fakakiteaga a Ioane ke he “moto tagata tokologa” ne tapuaki ki a Iehova “ke he aho mo e po ke he faituga hana.” Kua kitia ai e tau pama he tau fakakiteaga ua. He fakakiteaga a Esekielu ne fakamanaia e lautolu e tau kaupa he hala ki loto. He fakakiteaga a Ioane ne toto he tau tagata tapuaki e tau lau pama he tau lima ha lautolu, fakakite ai e fiafia ha lautolu ke fakaheke ki a Iehova mo e talia fiafia a Iesu mo Patuiki ha lautolu. (Fakakiteaga 7:9-15) He fakamaamaaga he fakakiteaga a Esekielu, ne fakatino he tau magafaoa 12 ha Isaraela e ‘tau mamoe kehe.’ (Ioane 10:16; fakatatai Luka 22:28-30.) Ko koe foki nakai ne fiafia ke fakaheke ki a Iehova he fakapuloa hana Kautu?

6. Ko e mo ha e tau poko kai he pa i tua, mo e ko e heigoa e kotofaaga ne fakamanatu he mena nei ki a lautolu he tau mamoe kehe?

⁶ He kitekite viko e tautolu e pa i tua, kitia ai e tautolu 30 e poko kai ne fakalataha ai e tau tagata ke foaki e tau poa ha lautolu. (Esekielu 40:17) He vaha nei, ko lautolu he tau mamoe kehe kua nakai poa e tau manu, ka kua nakai o mai a lautolu mo e nakai fai mena ke he faituga fakaagaga. (Fakatatai Esoto 23:15.) Ne tohia he aposetolo ko Paulo: “Hanai, kia uta mau e tautolu e poa fakaheke ke he Atua kia [Iesu] ni, ko e fua haia he tau laugutu ha lautolu, kua fakaaue atu ke he hana higoa. Aua neke nimo ia mutolu ke mahani mitaki atu mo e fakaalofa atu; ha ko e tau poa pihia kua fiafia ai e Atua.” (Heperu 13:15, 16; Hosea 14:2) Ko e monuina lahi haia ke foaki ki a Iehova e tau poa pihia.​—Tau Fakatai 3:9, 27.

7. Ko e heigoa ne fakamoli mai he fafatiaga he faituga ki a tautolu?

⁷ Ne kitekite e Esekielu taha agelu ne fafati e faituga he fakakiteaga nei. (Esekielu 40:3) Pihia foki, ne tala age ke he aposetolo ko Ioane: “Ati tu a, mo e fafati e koe e faituga he Atua, mo e fatapoa, mo lautolu kua hufeilo ki ai.” (Fakakiteaga 11:1) Ko e heigoa e kakano he fafati nei? Kua eke e tau mena ua ia mo fakamoliaga, ko e fakamailoga kua nakai fai mena taha ke taofi a Iehova mai he fakamoli hana tau finagalo hagaao ke he tapuakiaga mea. Tuga foki he vaha nei, kia mauokafua a tautolu kua nakai fai mena​—nakai foki ko e totoko vevela mai he tau fakatufono malolo​—ke taofi e fakafouaga he tapuakiaga mea.

8. Ko hai ne huhu atu ke he tau gutuhala ke he pa i loto, mo e ko e heigoa ne fakamanatu mai he tau gutuhala nei ki a tautolu?

⁸ He o atu a tautolu ke he taha fahi he pa i tua, ne kitia e tautolu tolu e gutuhala ne takitaki atu ke he pa i loto; kua fakaatuatu mo e tatai e lalahi he tau gutuhala i loto mo e tau gutuhala i tua. (Esekielu 40:6, 20, 23, 24, 27) Ko e tau ekepoa ni hokoia ka huhu atu ke he pa i loto. Kua fakamanatu mai he tau gutuhala i loto ki a tautolu kua fakatatai atu a lautolu ne fakauku ke he tau tutuaga mo e tau matafakatufono faka-Atua, ti takitaki foki he tau tutuaga mo e tau matafakatufono ia ni e tau Kerisiano moli oti. Ka ko e heigoa e gahua he tau ekepoa, mo e ko e heigoa e kakano he vaha nei?

Ko e Tau Ekepoa Fakamoli

9, 10. Ne foaki fefe he “tau patuiki mo e tau ekepoa” e tau fakaakoaga fakaagaga, tuga ne fakatino mai he vahega ekepoa he fakakiteaga a Esekielu?

⁹ He vaha fakamua to Kerisiano, ne gahua fakamakamaka e tau ekepoa he faituga. Ke keli mo e poa e tau manu, mo e leveki e tau matakainaga ekepoa mo e tau tagata ko e gahua uka fakatino. Ka e fai gahua aoga foki a lautolu. Ne poaki e Iehova hagaao ke he tau ekepoa: “To fakaako foki e lautolu e motu ke mailoga ai e tau mena tapu mo e tau mena nakai tapu, kia iloa ai e lautolu e tau mena nakai meā mo e mena meā.”​—Esekielu 44:23; Malaki 2:7.

¹⁰ Fakaaue nakai a koe ke he gahua uka mo e holoilalo ne taute he matakau fakauku, “ko e tau patuiki mo e tau ekepoa,” ha ko e tapuakiaga mea? (1 Peteru 2:9) Tuga e tau ekepoa Levi mai i tuai tigahau, kua muamua a lautolu ke foaki e tau fakaakoaga fakaagaga, ke lagomatai e tau tagata ke maama e mena mea mo e nakai mea ne kua talia ke he Atua. (Mataio 24:45) Ko e tau fakaakoaga pihia, ne puhala mai he tau tohi ne fakave ke he Tohi Tapu mo e tau feleveiaaga mo e tau fonoaga Kerisiano, kua lagomatai e totou miliona ke fakafeilo ke he Atua.​—2 Korinito 5:20.

11. (a) Peehi fefe he fakakiteaga a Esekielu e aoga he mea ke he tau ekepoa? (e) He tau aho fakahiku, ko e puhala fe ne fakamea ai a lautolu ne fakauku ke he kakano fakaagaga?

¹¹ Pete ni ia, kua lata e tau ekepoa ke mua atu e mena taute mai he fakaako e falu ke mea; kua lata foki ni ia lautolu ke mea. Ti kitia e Esekielu e fakameaaga ma e tau ekepoa i Isaraela. (Esekielu 44:10-16) Pihia foki, ne fakakite mai he fakamauaga tuai he 1918, ne nofo a Iehova ‘tuga e tagata fakamea’ he hana faituga fakaagaga, ke tivi e vahega ekepoa fakauku. (Malaki 3:1-5) Ko lautolu kua kitia ke mea fakaagaga po kua tokihala mai he tapuaki tupua fakamua kua fakaata ke gahua atu foki he faituga fakaagaga hana. Pete ni ia, ke tuga e tau tagata oti, maeke agaia ia lautolu takitokotaha ne fakauku ke kelea​—fakaagaga mo e ke he tau mahani. (Esekielu 44:22, 25-27) Kua gahua fakamakamaka a lautolu ke tumau ‘neke ilaila he lalolagi.’​—Iakopo 1:27; fakatatai Mareko 7:20-23.

12. Ko e ha kua lata ia tautolu ke fakaaue ke he gahua ha lautolu ne fakauku?

¹² Liga igatia a tautolu ke huhu, ‘Fakaaue nakai au ke he fakafifitakiaga ne fakatoka mai e lautolu ne fakauku he tau tau loga he fekafekauaga fakamoli ha lautolu? Fifitaki nakai e au e tua ha lautolu?’ Kua mitaki ia lautolu he moto tagata tokologa ke manatu to nakai nonofo mau mo lautolu a lautolu ne fakauku ke he lalolagi nei. Ke he tau ekepoa he fakakiteaga a Esekielu, ne talahau e Iehova: “To nakai ta age e mutolu ha tufaaga [he kelekele] ma lautolu i Isaraela; ko au ni ko e tufaaga ha lautolu.” (Esekielu 44:28) Pihia foki, kua nakai fai nofoaga tukulagi a lautolu ne fakauku he lalolagi. Kua ha ha ia lautolu e tufaaga i luga he lagi, ti ko lautolu he moto tagata tokologa kua fiafia lahi ke lagomatai mo e fakamalolo a lautolu ne nonofo agaia he lalolagi nei.​—Mataio 25:34-40; 1 Peteru 1:3, 4.

Ko e Iki​—Ko Hai a Ia?

13, 14. (a) Ko e ha kua lata e iki ke mai he tau mamoe kehe? (e) Ko hai ne fakatino mai he iki?

¹³ Ati mafuta mai e huhu loto fakalagalaga nei. Ko hai, mogoia, ne fakatino he iki? Ha kua talahau ko ia ko e tagata tokotaha mo e ko e matakau, liga to manatu ni a tautolu kua fakatino e ia e vahega tagata. (Esekielu 44:3; 45:8, 9) Ka ko hai? Moli ni, nakai ko lautolu ne fakauku. Haia he fakakiteaga, ne gahua fakalataha a ia mo e tau ekepoa, ka e nakai ko ia taha ia lautolu. Nakai tuga e vahega ekepoa, kua age ki a ia e tufaaga he kelekele mo e amaamanakiaga ke he lalolagi, nakai ki luga he lagi. (Esekielu 48:21) Mua atu, ne pehe e Esekielu 46:10: “Ka ko e iki ka huhu mai ki fale a lautolu [tau magafaoa nakai ekepoa], to hu mai a ia [ke he pa i tua he faituga] fakalataha mo lautolu; ka huhu atu a lautolu ki fafo, to hu atu foki a ia.” Kua nakai hu atu a ia ke he pa i loto ka e tapuaki ni he pa i tua, kua hu atu mo e hu ki fafo fakalataha mo e tau tagata. Kua fakakite ai he tau mena nei ko e iki a ia mo lautolu he moto tagata tokologa he tau mamoe kehe.

¹⁴ Kitia maali ai, kua fai matagahua e iki ke he tau tagata he Atua. He pa i tua, ne nofo a ia he fakamaluaga he Gutuhala he Fahi Uta. (Esekielu 44:2, 3) Kua fakakite ai he mena nei e tuaga leveki, tatai ai ke he tau patu i Isaraela ne nonofo he gutuhala he maga mo e taute e fakafiliaga. (Ruta 4:1-12; Tau Fakatai 22:22) Ko hai he tau mamoe kehe ne haia he tuaga leveki he vaha nei? Ko e tau motua mo e amaamanakiaga ke he lalolagi ne kotofa he agaga tapu. (Gahua 20:28) Ti ko e vahega iki mogonei hane fa e tauteute mo e amaamanaki ke fekafekau ke he tuaga leveki he lalolagi fou.

15. (a) Fakamaama fefe he fakakiteaga a Esekielu e fakafetuiaga he vahaloto he tau motua ne mai he moto tagata tokologa mo e he vahega ekepoa fakauku? (e) Ko e heigoa e takitakiaga ne taute he tau motua fakauku he fakatokatokaaga he Atua he lalolagi?

¹⁵ Ko e heigoa, mogoia, e fakafetuiaga he vaha nei he vahaloto he vahega ekepoa fakauku mo e tau patu pihia, taha vala he moto tagata tokologa, ne hane fekafekau he tau tutuaga leveki? Ne fakakite he fakakiteaga a Esekielu kua ha ha he tau motua he moto tagata tokologa e matagahua lagomatai mo e omaoma, ka kua takitaki fakaagaga e lautolu ne fakauku. Taute fefe? Manatu, kua age ke he tau ekepoa i loto he fakakiteaga e matagahua ke fakaako e tau tagata ke he tau mena fakaagaga. Kua tala age foki ki a lautolu ke eke mo tau iki fakafili ke he tau mena fakamatafakatufono. Lafi ki ai, ko e tau Levi kua kotofa ke “leoleo e tau gutuhala” he faituga. (Esekielu 44:11, 23, 24) Maali ai, kua omaoma e iki ke he tau fekafekauaga fakaagaga mo e takitakiaga he tau ekepoa. Kua lata lahi ai, mogoia, he vaha fou nei ke takitaki e lautolu ne fakauku e tapuakiaga mea. Ke fakatai ki ai, ko lautolu he Kau Fakatufono he Tau Fakamoli a Iehova kua fifili mai ia lautolu ia. Kua fakamahani he tau motua fakauku fakamoli ia ke he tau tau loga e vahega iki ne tupu ki mua, he tauteute a lautolu ka ha ha he vahega nei ma e aho ka foaki ki a lautolu e fafati katoatoa he pule malolo ke he lalolagi fou he Atua ka hoko mai.

16. Hagaao atu ke he Isaia 32:1, 2, kua lata ke fefe e mahani he tau motua oti?

¹⁶ Ko e tau faga leveki fefe a lautolu nei, ne talifaki ke he tau matagahua mamahaki ko e vahega iki? Ne pehe mai e perofetaaga ne moua ia Isaia 32:1, 2: “Kitiala, to pule e patuiki ha ko e mahani tututonu, to pule foki e tau iki ha ko e tonu. To eke foki e tagata ke tuga ne fakamumuliaga mai he matagi, mo e mena ke malu ai ka to e afa, ke tuga ne tau vailele ke he motu paku lā, ke tuga ne malu foki he kau maka lahi ke he motu nakai fai vai.” Ko e perofeta nei hane fakamoli he vaha nei he gahua e tau motua​—lautolu ne fakauku mo e tau mamoe kehe​—ke puipui e fakapotopotoaga mai he ‘tau afa’ pihia tuga e favaleaga mo e fakalolelole.

17. Kua lata ke onoono hifo fefe e tau leveki Kerisiano ki a lautolu ni, ti fefe e onoonoaga he fakapotopotoaga ki a lautolu ia?

¹⁷ Ko e kupu “iki” he faka-Heperu, kua nakai fakaaoga mo mataulu ke fakahakehake aki e tau tagata. Ka kua fakamaama mai e matagahua ne fua he tau tagata nei he leveki e tau mamoe he Atua. Ne hataki fakalahi e Iehova: “Toka a, ko mutolu na ko e tau iki a Isaraela; kia toka e favale mo e fofo mena, ka kia eke e mahani hako, mo e mahani tututonu.” (Esekielu 45:9) Kua mitaki ke oma he tau motua oti he vaha nei e fakatonuaga pihia. (1 Peteru 5:2, 3) Ti mailoga ai he fakapotopotoaga nukua foaki e Iesu e tau leveki mo “tau mena fakaalofa ke he tau tagata.” (Efeso 4:8) Kua toka he Kupu mai he agaga he Atua e fakaataaga ha lautolu. (1 Timoteo 3:1-7; Tito 1:5-9) Mena ia ati mumuitua e tau Kerisiano ke he takitakiaga he tau motua.​—Heperu 13:7.

18. Ko e heigoa falu matagahua ha lautolu ne amaamanaki mo vahega iki he mogonei, mo e ko e heigoa e matagahua he vaha anoiha?

¹⁸ He vaha Tohi Tapu ne lahi e pule he falu a iki, ka e tote he falu. He vaha nei, ko e tau motua he moto tagata tokologa kua kehekehe e laulahi he tau matagahua. Kua fekafekau e falu ke he taha ni e fakapotopotoaga; falu loga e fakapotopotoaga ne fekafekau ki ai ha ko e tau leveki o fano; falu fekafekau ke he motu katoa ha ko lautolu he La Komiti; falu lagomatai fakatonu atu ke he tau komiti kehekehe he Kau Fakatufono. He lalolagi fou, to kotofa e Iesu e “tau iki ke he lalolagi oti” ke takitaki e tau tagata tapuaki ha Iehova he lalolagi. (Salamo 45:16) Moli ni to fifili e ia e tokologa ia lautolu nei mai he tau motua fakamoli he vaha nei. Ha kua fakamoli e tau tagata tane e he mogonei, to fifili ai e ia ke tuku age ke he tokologa e tau kotofaaga lalahi he vaha anoiha, magaaho ka fakakite e ia e matagahua he vahega iki he lalolagi fou.

Ko e Motu he Tau Tagata he Atua he Vaha Nei

19. Ko e heigoa ne fakakite he motu he fakakiteaga a Esekielu?

¹⁹ Ne fakatino foki he fakakiteaga a Esekielu e motu fakafou a Isaraela. Ko e heigoa ne fakakite he vala nei he fakakiteaga? Talahau tuai mai he falu perofetaaga fakafou ko e motu, ko Isaraela, to eke mo parataiso tuga i Etena. (Esekielu 36:34, 35) He vaha nei, olioli foki e tautolu e “motu” fakafou, ne tuga foki ni a Etena. Ke he puhala ia ni, kua fa tala a tautolu hagaao ke he ha tautolu a parataiso fakaagaga. Ne fakakakano he Ko e Kolo Toko e “motu” ha tautolu ko e “fahi gahua” he tau tagata fifili he Atua.b Ko e ha mena ni ne nofo ai e fekafekau ha Iehova, ko ia haia he motu fakafou kaeke ke fakamakamaka a ia ke fakatokoluga e tapuakiaga moli he muitua ke he tau tuagahui ha Keriso Iesu.​—1 Peteru 2:21.

20. Ko e heigoa e matapatu fakaakoaga ka liga ako e tautolu mai he “tufaaga tapu” he fakakiteaga a Esekielu, mo e puhala fe ke fakagahuahua e tautolu e matapatu fakaakoaga nei?

²⁰ Ka e kua e vala kelekele ne ui ko e “tufaaga tapu”? Ko e tufaaga he tau tagata anei ke lagomatai aki e tau ekepoa mo e maga. Pihia foki, kua lata e “tau tagata oti he motu” ke foaki e vala kelekele ma e tau iki. Ko e heigoa e kakano he mena e he vaha nei? Nakai pehe kua lata e tau tagata he Atua ke fakamamafa aki e vahega akoako totogi tupe. (2 Tesalonia 3:8) Ka ko e lagomatai ne foaki ke he tau motua kua pauaki ke he tau mena fakaagaga. Kua putoia ai ke lagomatai e tau gahua he mogoia ni mo e fakakite e agaga kaufakalataha mo e omaoma. Ka e, he vaha a Esekielu, ko e tufaaga nei kua poa ni “kia Iehova,” nakai ke he taha tagata.​—Esekielu 45:1, 7, 16.

21. Ko e heigoa ke ako e tautolu mai he veheveheaga he kelekele he fakakiteaga a Esekielu?

²¹ Kua nakai moua ni hokoia he tau iki mo e tau ekepoa e tau nonofoaga kotofa he motu fakafou nei. Kua fakakite he veheveheaga he kelekele ko e igatia e tau magafaoa 12 mo e tufaaga mauokafua. (Esekielu 47:13, 22, 23) Ti ko lautolu he moto tagata tokologa kua nakai ni moua e tufaaga he parataiso fakaagaga he vaha nei ka e to moua foki e kotofaaga ke he kelekele he magaaho ka moua e lautolu e tufaaga he lalolagi he Kautu he Atua.

22. (a) Ko e heigoa ne fakakite he fakakiteaga a Esekielu? (e) Ko e heigoa ke ako e tautolu mai he tau gutuhala he tau fahi oti he maga?

²² Ke fakahiku, ko e heigoa ne fakatino he maga i loto he fakakiteaga? Nakai ko e maga i luga he lagi, ha kua toka ai he motu “vao” (nakai tapu). (Esekielu 48:15-17) Ti liga ni ko e taha mena he lalolagi. Ka ko e heigoa e maga? Kua fakamaama mai kia e manatu ko e tau tagata ne fakapotopoto mai mo vahega mo e fakatu taha mena talaga po ke fakatokatokaaga? E. Kua fakatino ai he maga e levekiaga he lalolagi ka aoga oti ai a lautolu ne haia he kaufakalatahaaga tututonu he lalolagi. To fakahoko katoatoa ai mogoia e levekiaga he “lalolagi fou” ka hoko mai. (2 Peteru 3:13) Ko e tau fahi oti he tau gutuhala he maga, ne igatia ma e magafaoa takitaha, kua fakakite moli e nakai fai fakakaupaaga. He vaha nei, kua nakai ha ha i lalo he ha levekiaga fakagalogalo e tau tagata he Atua. Ko e tau matakainaga tane ne fai matagahua kua lata ke mukamuka ke o atu ki ai; ko e tau matapatu fakaakoaga ne takitaki a lautolu nukua talahaua ke he tau tagata oti. Ha kua feaki he tau tagata he tau magafaoa oti e kelekele ne lagomatai aki e maga kua fakamanatu ki a tautolu e lagomatai he tau mamoe kehe, pihia foki ke he puhala fakakoloa, ko e fakaholoaga leveki ne taute ma e tau tagata he Atua he lalolagi katoa.​—Esekielu 48:19, 30-34.

23. Ko e heigoa ke kikite atu a tautolu ki ai he vala tala ne mui mai?

²³ Ka e kua, mogoia, e vaitafe ne tafe mai he haeleaga tapu he faituga? Ko e mena ne fakakite he naia he vaha nei mo e ke he vaha anoiha to eke ai mo matapatu tala he vala tala ke tolu aki he tau fufuta nei.

[Tau Matahui Tala]

Tau Fakamanatuaga

◻ Ko e heigoa ne fakatino he faituga he fakakiteaga a Esekielu?

◻ Ko hai ne fakatino he tau ekepoa ne fekafekau he faituga?

◻ Ko e heigoa e vahega iki, mo e ko e heigoa falu matagahua ha lautolu?

◻ Ko e heigoa e kelekele he fakakiteaga a Esekielu, mo e ko e heigoa e kakano ne tufatufa ai ke he tau magafaoa 12?

◻ Ko e heigoa ne fakatino he maga?

[Fakatino/​Mepe he lau 23]

(Ma e puhala katoa ne tohi aki, kikite e tohi)

Ko e tufatufa he kelekele tuga a ia he fakakiteaga a Esekielu

KO E TAU MAGAFAOA HOGOFULU MA UA

Ko e Tahi Lahi

Tahi a Kalilaia

Vaitafe i Ioritana

Tahi Kona

TANO

ASERA

NAFATALI

MANASE

EFARAIMO

REUPENA

IUTA

KO E IKI

PENIAMINA

SIMEONA

ISAKARA

SEPULONA

KATO

[Fakatino]

FAKALAULAHIAGA HE TUFAAGA TAPU

A. “Kua Haele Ai a Iehova” (Iehova—Sama); B. kelekele tupuolaola he maga

Tufaaga he tau Levi

Haeleaga tapu a Iehova

Tufaaga he tau Ekepoa

B A B