“Kia Tuku Foki e Koe ke he Loto Hau” e Faituga he Atua!

“Ko e Tama he tagata na e, . . . kia tuku foki e koe ke he loto hau e tau mena oti ke fakakite atu ai e au kia koe . . . kia talahau atu e koe ke he magafaoa a Isaraela e tau mena oti ne kitia e koe.”​—ESEKIELU 40:4.

1. Ko e tuaga fe ne ha ha ai e tau tagata fifili he Atua he 593 F.V.N.?

KO E tau 593 F.V.N., ko e tau ke 14 aki he fakapaeaaga a Isaraela. Ke he tau Iutaia nonofo i Papelonia, kua liga mamao ligo e motu ha lautolu. Ti ko e mogo fakamui ne kitia he laulahi ia lautolu a Ierusalema, kua puho he afi, malolololo e tau kaupa lalahi, mo e malona e tau fale mahuiga i ai. Ko e faituga ha Iehova​—ko e lilifu tokoluga he maaga, ko e lotouho ni aia he tapuakiaga mea he lalolagi katoa​—kua malolololo tuai. Mogonei ha ha i mua e matapatu lahi he fakapaeaaga a Isaraela. To 56 la e tau tau ato laveaki ai tuga ne mavehe.​—Ieremia 29:10.

2. Ko e ha kua momoko a Esekielu he manamanatu ke he faituga he Atua i Ierusalema?

² Kua liga momoko e perofeta tua fakamoli ko Esekielu ke manamanatu ke he faituga he Atua kua malona mo e totou teau e tau kilomita he mamao, ko e moumouaga kua takalo ai e tau manu favale. (Ieremia 9:11) Ko e matua tane hana, ko Posai, ne fekafekau ko e ekepoa i ai. (Esekielu 1:3) Liga olioli foki e Esekielu e monuina ia ni, ka kua uta paea a ia fakalataha mo e tau tagata talahaua a Ierusalema he 617 F.V.N., he tote agaia a ia. Kavi he mogonei ke 50 e tau tau he moui, liga iloa e Esekielu to nakai liu a ia kitia a Ierusalema po ke fai vala ke he liu ati hake he faituga i ai. Manamanatu la, mogoia, ke he lahi he fiafia ha Esekielu ke moua e fakakiteaga he faituga lilifu ue atu!

3. (a) Ko e heigoa e kakano he fakakiteaga a Esekielu ke he faituga? (e) Ko e heigoa e tau matapatu vala ne fa he fakakiteaga?

³ Ko e fakakiteaga loa nei, ne ha ha ai ke he hiva e veveheaga he tohi ha Esekielu, kua foaki ke he tau Iutaia fakapaea e maveheaga ke fakamalolo e tau tua. To fakafou e tapuakiaga mea! He tau senetenari tali mai he mogo ia, ke hoko ke he vaha ha tautolu, kua eke ai e fakakiteaga nei mo fakamaloloaga ke he tau tagata ne ofania a Iehova. He puhala fe? Kia kumikumi atu a tautolu ke he kakano he fakakiteaga fakaperofeta a Esekielu ke he tau Isaraela fakapaea. Kua fa e matapatu vala i ai: ko e faituga, ko e tau ekepoa, ko e tau iki, mo e motu.

Kua Fakafou e Faituga

4. Kua uta ki fe a Esekielu he kamataaga he hana a fakakiteaga, ko e heigoa ne kitia e ia i ai, mo e ko hai ne uta a ia ke fakakitekite?

⁴ Fakamua, ne uta a Esekielu ke he “mouga tokoluga lahi.” I luga he mouga ke he fahi toga ko e faituga mahaki, tuga e maaga pa takai viko. Ko e agelu, ne “tino mai kua tuga ne tino he apa kula,” ne fakakite age ke he perofeta e tau mena i loto. (Esekielu 40:2, 3) He fakakiteaga, ne kitia e Esekielu e agelu ne fafati fakamatatetotonu e tau gutuhala tatai ne tolu mo e tau poko he tau leoleo, ko e pa i tua mo e pa i loto, tau poko kai, ko e fatapoa, mo e faituga he mena tapu mo e tau poko Tapu mo e Tapu Ue Atu.

5. (a) Ko e heigoa e fakamoliaga ne age e Iehova ki a Esekielu? (e) Ko e heigoa e “tau tino mamate he tau patuiki ha lautolu” ne kua lata ke uta kehe mai he faituga, ti kua aoga he ha e mena nei?

⁵ Ati, kitia ai a Iehova i loto he fakakiteaga. Ne hu a Ia ki loto he faituga mo e fakamoli age ki a Esekielu to nofo a Ia i ai. Ka kua poaki e Ia ke fakamea Hana fale: “Ka ko ainei, kia tiaki e lautolu e tau feuaki ha lautolu, mo e tau tino mamate he tau patuiki ha lautolu, ke mamao ia au, ti nofo ai au fakalataha mo lautolu tukulagi.” (Esekielu 43:2-4, 7, 9) Ko e “tau tino mamate he tau patuiki ha lautolu” kua hagaao moli atu ke he tau tupua. Ne takiva he tau pule totoko mo e tau tagata a Ierusalema e faituga ha Iehova aki e tau tupua, ti tuga ni kua eke e tau mena ia mo tau patuiki. (Fakatatai Amosa 5:26.) Kua nakai momoui e tau atua po ke tau patuiki nei, ka ko e tau mena mamate mo e kiva ki mua a Iehova. Kua lata ai ke uta kehe.​—Levitika 26:30; Ieremia 16:18.

6. Ko e heigoa ne fakakite he fafati he faituga?

⁶ Ko e heigoa e kakano he vala nei he fakakiteaga? Kua fakamoli age ke he tau tagata fakapaea e fakafou katoatoa he tapuakiaga mea he faituga he Atua. Mua atu, kua foaki he fafatiaga he faituga e fakamoliaga faka-Atua, to hoko moli e fakamoliaga he fakakiteaga. (Fakatatai Ieremia 31:39, 40; Sakaria 2:2-8.) To fakamea e tau tapuaki tupua oti. Ti liu agataha a Iehova ke fakamonuina hana fale.

Ko e Tau Ekepoa mo e Tau Iki

7. Ko e heigoa e tau fakailoaaga hagaao ke he tau Levi mo e tau ekepoa?

⁷ Ko e tau ekepoa kua fakamea, po kua hakahaka foki. Kua akonaki e tau Levi he tapuaki tupua, ka kua fakaheke mo e taui mitaki age e fanau a Satoka he tutumau ke fakamea.a Ka e fai tuaga agaia e tau matakau ua ia ke fekafekau he fale fakafou he Atua​—moli, to falanaki ni ke he mahani fakamoli takitokotaha ha lautolu. Mo e poaki age foki a Iehova: “To fakaako foki e lautolu e motu ke mailoga ai e tau mena tapu mo e tau mena nakai tapu, kia iloa ai e lautolu e tau mena nakai meā mo e tau mena meā.” (Esekielu 44:10-16, 23) Ti, to fakafou ai e tau ekepoa, mo e taui mitaki ke he fakauka fakamoli ha lautolu.

8. (a) Ko hai e tau iki i Isaraela mai i tuai? (e) Ko e puhala fe ne makutu ai e tau iki he fakakiteaga a Esekielu ke he tapuakiaga mea?

⁸ Kua hagaao foki e fakakiteaga ki a ia ne ui ko e iki. Tali mai he vaha a Mose, ne ha ha ai e tau iki he motu. Ko e kupu Heperu ma e iki, na·siʼʹ, kua hagaao ke he ulu he fale he matua tane, ko e magafaoa, po ke motu foki. He fakakiteaga a Esekielu, kua akonaki e tau pule ne fakavahega i Isaraela ke tututonu mo e mitaki e tau fifiliaga. Pete ni kua nakai he vahega ekepoa, ne gahua e tau iki ke he puhala mahuiga he tapuakiaga mea. Ne hu a ia ki loto mo e hu ki fafo he pa i tua mo e tau magafaoa nakai ko e tau ekepoa, nofo he fakamaluaga he fale he Gutuhala he Fahi Uta, mo e age e tau poa ma e tau tagata ke foaki. (Esekielu 44:2, 3; 45:8-12, 17) Ti kua fakamoli age e fakakiteaga ke he tau tagata ha Esekielu, to fakamonuina e motu fakafou aki e tau takitaki mahani mitaki, tau tagata tane ne lago ke he tau ekepoa he fakatokatoka e tau tagata he Atua mo e eke mo tau tagata fakamoli ke he tau mena fakaagaga.

Ko e Motu

9. (a) To vevehe fefe e motu, ka ko hai ka nakai fai tufaaga? (e) Ko e heigoa e tufaaga tapu, mo e ko e heigoa i loto?

⁹ Ke fakahiku, ne putoia e fakakiteaga a Esekielu ke he motu katoa a Isaraela. To vehevehe ai mo e takitaha e vala ma e magafaoa. Kua fai tufaaga foki e tau iki. Ka kua nakai fai e tau ekepoa, ha kua talahau e Iehova, “Ko au kua eke mo tufaaga ha lautolu.” (Esekielu 44:10, 28; Numera 18:20) Ne fakakite he fakakiteaga nei ko e vala kelekele he tau iki kua ha he tau paka he fahi pauaki ne ui ko e tufaaga tapu. Ko e vala kelekele fakafahi fa anei ne vevehe ke he tolu e vala​—ko luga ma e tau Levi ne tokihala, ko e lotouho ma e tau ekepoa, mo e i lalo ma e maaga mo e tau kelekele tupuolaola he tau paka. Kua ha ha e faituga ha Iehova he vala kelekele he tau ekepoa, he lotouho he tufaaga fakafahi fa.​—Esekielu 45:1-7.

10. Ko e heigoa e kakano he perofetaaga hagaao ke he veheveheaga he motu ke he tau Iutaia fakapaea ne tua fakamoli?

¹⁰ Liga fakamalolo he tau mena nei e tau loto he tau tagata fakapaea! Kua fakamoli mai ke igatia e magafaoa mo e tufaaga he motu. (Fakatatai Mika 4:4.) To ha ha i ai e tapuakiaga mea he matakavi tokoluga mo e lotouho ia. Mo e mailoga foki he fakakiteaga a Esekielu ko e tau iki, to nonofo ke tuga e tau ekepoa he vala kelekele ne poa he tau tagata. (Esekielu 45:16) Ti he motu fakafou, kua lata e tau tagata ke poa ke he gahua ha lautolu ne kotofa e Iehova ke takitaki, ke lagomatai a lautolu he kau fakalataha ke he tau hatakiaga ha lautolu. Ke he tau mena oti, ne fakatino he motu nei e fakatokatokaaga, kau fakalatahaaga, mo e puipuiaga.

11, 12. (a) Fakamoli fakaperofeta fefe a Iehova ke he hana tau tagata to fakamonuina e ia e motu fakafou ha lautolu? (e) Ko e heigoa ne fakatino he tau akau he tau tapa vaitafe?

¹¹ To fakamonuina nakai e Iehova e motu ha lautolu? Ne tali he perofetaaga e huhu nei mo e fakatino loto olioli. Ne tafe e vai mai he faituga, kua tafe lahi ai, kua eke ai mo vaitafe he hoko atu ke he Tahi Mate. Ne fakamoui ai e tau vai mamate, mo e tupu foki e gahua takafaga ika he tau fahi tahi. He tau tau oti kua fua ai e tau akau loga he tau tapa vaitafe, ke foaki e tupuolamoui mo e malolo.​—Esekielu 47:1-12.

¹² Ke he tau tagata fakapaea, kua fakataogoogo mo e fakamoli he maveheaga nei e fakafou fakamua atu he tau perofetaaga ne ofania e lautolu. Kua nakai lagataha ni e fakamaama he tau perofeta omoi he agaga e fakafouaga mo e puke tagata a Isaraela ke he tau kupu fakaparataiso. Ko e tau matakavi mateafu ne liliu momoui foki ko e matapatu tala fakaperofeta. (Isaia 35:1, 6, 7; 51:3; Esekielu 36:35; 37:1-14) Ti talifaki ai e tau tagata ke he fakamonuinaaga foaki moui a Iehova ke tafe mai he vaitafe he faituga fakafou. Hagaao ki ai, to liu fakamoui e motu mate fakaagaga. Ti monuina ai e tau tagata fakafou he ko e tau tagata tane aga fakaagaga​—ne tututonu mo e mauokafua tuga e tau akau he tau tapa vaitafe, tau tagata ne takitaki e liu ati hake he motu maona kelea. Kua tohia foki e Isaia hagaao ke he “tau akau he tututonu” ka ‘ati hake e tau mena maona mai i tuai.’​—Isaia 61:3, 4.

Fakamoli a Fe e Fakakiteaga?

13. (a) Ko e heigoa e kakano ne fakamonuina e Iehova hana tau tagata fakafou aki e “tau akau he tututonu”? (e) Kua fakamoli fefe e perofetaaga hagaao ke he Tahi Mate?

¹³ Kua fakaatukehe kia e tau tagata fakapaea? Mamao mai he pihia! Ha kua liliu a lautolu fakafou ne toe ke he motu fakahele ha lautolu he 537 F.V.N. Fai magaaho, i lalo he takitakiaga he “tau akau he tututonu” nei​—tuga e tohikupu ko Esera, tau perofeta ko Hakai mo Sakaria, mo e Ekepoa ne Mua ko Iosua​—ne liu ati hake e tau matakavi ne kua leva e maona. Ko e tau iki, ke fakatai ki ai ko Nehemia mo Serupapelu, kua mitaki mo e tonu e pule ke he motu. Kua liu fakafou ai e faituga ha Iehova, mo e hana a tau foakiaga ma e moui​—ko e tau fakamonuinaaga he moui he hana maveheaga​—kua liu tafe mai foki. (Teutaronome 30:19; Isaia 48:17-20) Ko e taha fakamonuinaaga ko e iloilo. Kua liliu e tau ekepoa ke he tau matagahua, mo e tau ekepoa kua hataki e tau tagata ke he Matafakatufono. (Malaki 2:7) Ko e fua, ne malolo fakaagaga e tau tagata mo e liliu mo tau fekafekau fua loga ha Iehova, tuga ne fakatino he Tahi Mate ne kua maulu mo e fakatupuolatia e gahua takafaga ika.

14. Ko e ha kua fai fakamoliaga foki e perofetaaga a Esekielu ne mua atu ke he mena ne tupu he liliu atu e tau Iutaia mai he fakapaea i Papelonia?

¹⁴ Ko e tau mena nei ni kia ne fakamoli he fakakiteaga ha Esekielu? Nakai; nukua mua atu e mena ne fakakite mai. Kia mailoga: Ko e faituga ne kitia e Esekielu kua nakai maeke ke ati hake tuga ne fakamaama mai. Moli, kua mailoga lahi he tau Iutaia e fakakiteaga ia ti taute moli e falu talahauaga.b Ka kua lahi mahaki e faituga he fakakiteaga ke hao he Mouga ko Moria, ne toka ai e faituga fakamua. Ke lafi ki ai, kua nakai haia he maaga e faituga a Esekielu ka kua mamao atu ke he taha vala kelekele kehe, ka ko e faituga ke ua aki kua ati hake he mena ne tutu ai e tau tagata fakamua he maaga ko Ierusalema. (Esera 1:1, 2) Taha mena foki, kua nakai tafe mai e vaitafe he faituga a Ierusalema. Ti kua kitia ni he tau Isaraela e fakamoliaga tote he perofetaaga a Esekielu. Fakakite he mena nei kua liga ha ha i ai e fakamoliaga lahi mo e fakaagaga he fakakiteaga nei.

15. (a) Kua fakagahuahua i ne fe e faituga fakaagaga a Iehova? (e) Fakakite he heigoa kua nakai fakamoli e fakakiteaga a Esekielu he magahala he moui a Iesu he lalolagi?

¹⁵ Nakai taumaleku ai, kua lata ia tautolu ke kumi e fakamoliaga lahi he fakakiteaga a Esekielu i loto he faituga mua ue atu ha Iehova, ne tala lahi e aposetolo ko Paulo ki ai he tohi Heperu. Kua fakagahuahua ai e faituga ia he magaaho ne fakauku a Iesu Keriso ko e Ekepoa ne Mua he 29 V.N. Ka kua fakamoli kia e fakakiteaga a Esekielu he vaha a Iesu? Nakai, tuga ni ne fakakite mai. Ne fakamoli he Ekepoa ne Mua, ko Iesu, e alito fakaperofeta he Aho he Fakafeiloaga he puhala he hana papatisoaga, hana poa matulei, mo e hana haeleaga ke he Tapu Mua Ue Atu, ko e lagi ni a ia. (Heperu 9:24) Fuluola ai, ha kua nakai totoku ha mena he fakakiteaga a Esekielu hagaao ke he ekepoa ne mua po ke Aho he Fakafeiloaga. Maali ai, kua nakai tuhi e fakakiteaga nei ke he senetenari ke fakamua aki V.N. Ti ko e magahala fe ne hagaao ai ki ai?

16. Ko e heigoa ne fakamanatu mai he fakakiteaga a Esekielu ki a tautolu ke he falu a perofetaaga, mo e lagomatai fefe he mena nei a tautolu ke mailoga e magaaho he fakamoliaga ne mua he fakakiteaga a Esekielu?

¹⁶ Ke moua e tali, kia liliu kikite a tautolu ke he fakakiteaga ia ni. Ne tohia e Esekielu: “Ko e tau fakakiteaga mai he Atua ne uta ai e ia au ke he motu ko Isaraela, mo e tuku ai au ki luga he mouga tokoluga lahi, ne ha i ai ke he fahi toga e fale tuga ne māga.” (Esekielu 40:2) Ko e fakatokaaga he fakakiteaga nei, ko e “mouga tokoluga lahi,” kua fakamanatu ki a tautolu e Mika 4:1: “Ka to hoko ni ke he tau aho a mui, to fakamau ai e mouga ha i ai e fale a Iehova ke he tapunu mouga he tau mouga, to fakatokoluga ai foki ki luga he tau matiketike, ti tafe atu ki ai e tau motu oti kana.” Fakamoli ne fe e perofetaaga nei? Fakakite he Mika 4:5 kua hoko e mena nei he magaaho ne tapuaki agaia e tau motu ke he tau tupua fakavai. Ti, hanei he vaha ha tautolu, ko e “tau aho a mui,” ka malikiti hake ai e tapuakiaga mea, liuaki ai ke he hana a tuaga kua lata he tau momoui he tau fekafekau he Atua.

17. Lagomatai fefe he perofetaaga ia Malaki 3:1-5 a tautolu ke fakamalolo he magaaho ka fakamea e faituga he fakakiteaga a Esekielu?

¹⁷ Kua maeke fefe e fakafouaga nei? Liu manatu, ke he mena tupu ne mua atu he fakakiteaga a Esekielu, ne hoko fakalutukia mai a Iehova ke he faituga mo e fakamakamaka ke fakamea hana fale he tapuakiaga tupua. Ti, i ne fe ne fakamea ai e faituga fakaagaga he Atua? He Malaki 3:1-5, ne talahau tuai e Iehova e magaaho ka ‘hoko fakalutukia mai a Ia ke he hana faituga’ fakalataha mo e hana “Agelu he maveheaga,” ko Iesu Keriso. Ko e matagahua? “Ko ia kua tuga e afi he tagata tunu auro, kua tuga foki e moli he tagata unu tapulu.” Kua kamata e tunu auro nei he magahala he felakutaki ke fakamua aki he lalolagi. Ko e fua? Ne nofo a Iehova he hana fale mo e fakamonuina e motu fakaagaga he hana tau tagata tali mai he 1919. (Isaia 66:8) Ti, fakahiku ai e tautolu kua kitia he perofetaaga a Esekielu ke he faituga e fakamoliaga ne mua he magahala he tau aho a mui.

18. To hoko a fe e fakamoli fakahiku ke he fakakiteaga he faituga?

¹⁸ Tuga ni falu he tau perofetaaga fakafou, kua fai fakamoliaga fakamuiaki foki e fakakiteaga a Esekielu, he Parataiso. Ko e magaaho ia ni ka moua he tau tagata tututonu e tau aoga loga he fakatokatokaaga he faituga he Atua. Mogoia ka fakahoko he Keriso e uho he hana poa lukutoto, fakalataha mo e hana tau ekepoa he lagi ne 144,000. To malagaki hake e tau tagata omaoma i lalo he pule he Keriso ke he mitaki katoatoa. (Fakakiteaga 20:5, 6) Ka e nakai ko e Parataiso e magaaho kua mua he fakamoliaga he fakakiteaga a Esekielu. Ko e ha ne nakai ai?

Kua Tuhi e Fakakiteaga ke he Vaha Ni ha Tautolu

19, 20. Ko e ha kua lata e fakamoliaga ne mua he fakakiteaga ke kitia he vaha nei nakai he Parataiso?

¹⁹ Ne kitia e Esekielu e faituga ne lata ke fakamea he tapuaki tupua mo e feuaki fakaagaga. (Esekielu 43:7-9) Kua nakai ni hagaao e mena nei ke he tapuakiaga ki a Iehova he Parataiso. Taha mena foki, ko e tau ekepoa he fakakiteaga kua fakatino e vahega ekepoa ne ha ha agaia he lalolagi, nakai he mole e liu fakatu mai ha lautolu ke he lagi po ke magahala he Afetau. Ko e ha? Ha kua fakatino e tau ekepoa ke fekafekau he pa i loto. Ne fakakite he tau vala tala he tau fufuta fakamua atu he The Watchtower, kua fakatino he pa nei e tuaga fakaagaga kehe maka he tau ekepoa i lalo he Keriso he nonofo agaia a lautolu he lalolagi.c Kikite atu foki, nukua peehi mai he fakakiteaga e nakai mitaki katoatoa he tau ekepoa. Kua tala age ki a lautolu ke foaki e tau poa ma e lalu tau hala. Kua hataki a lautolu ke he hagahaga kelea he nakai mea​—fakaagaga mo e tau mahani. Ti kua nakai fakatino e lautolu a lautolu kua fakauku ne liu fakatutu mai ne tohia ki ai he aposetolo ko Paulo: “Ko e mena to fakatagi ni e pu, ti fakatu mai ai a lautolu kua mamate, ke he moui nakai popo.” (1 Korinito 15:52; Esekielu 44:21, 22, 25, 27) Kua lafi mo e fekafekau fakatonu atu e tau ekepoa he fakakiteaga ke he tau tagata. To nakai taute pehenei he Parataiso, ka nonofo e vahega ekepoa he lagi. Kua foaki ai he fakakitega nei e fakatino mitaki lahi he puhala ne gahua auloa ai a lautolu ne fakauku mo e “moto tagata tokologa” he lalolagi he vaha nei.​—Fakakiteaga 7:9; Esekielu 42:14.

²⁰ Ti kua fakakite he fakakiteaga a Esekielu he faituga e lauiaaga katoa he fakameaaga fakaagaga hane fakamoli he vaha nei. Ka ko e heigoa e kakano he mena ia ki a koe? Nakai ko e ha kumikumiaga fakalotu noa anei. Kua lahi e fehagaiaga he fakakiteaga nei ke he ha tautolu a tapuakiaga he tau aho takitaha ke he Atua moli hokoia, ko Iehova. To kitia ai e tautolu he vala tala ne mui mai.

[Tau Matahui Tala]

Manatu Nakai e Koe?

◻ Ko e heigoa e fakamoliaga fakapa he faituga he fakakiteaga a Esekielu mo e tau ekepoa i ai?

◻ Fakamoli tuai fefe e fakakiteaga a Esekielu ke he veveheaga he motu?

◻ He fakafouaga ha Isaraela mai i tuai, ko hai e tau iki tua fakamoli, mo e ko hai ne tuga e “tau akau he tututonu”?

◻ Ko e ha kua lata ai ke kitia e fakamoliaga he fakakiteaga a Esekielu ke he faituga he magahala he tau aho a mui?