Nakai Tuai Oti e Puhala he Fakaalofa
“Kia foli a mutolu ke he tau mena fakaalofa kua mua; ka e fakakite e au kia mutolu e puhala kua mua he mitaki.”—1 KORINITO 12:31.
1-3. (a) Tatai lahi fefe e ako ke fakakite e fakaalofa mo e ako he vagahau fou? (e) Ko e heigoa e tau mena kua fakakite e ako ke fakaalofa mo paleko?
KUA lali nakai a koe ke ako e vagahau fou? Ko e paleko, ke talahau ki ai! Moli, maeke he tama tote ke ako e vagahau he fakatapakupaku ki ai. Kua hufia lahi he uho ulu hana e tau leo mo e tau kakano he tau kupu, ato maeke fakamui he tama tote ke vagahau fakamitaki, ha ko e liga fakatumau ki ai. Nakai pihia ke he tau tagata lalahi. Kumikumi tumau e tautolu e tohi fakamaama kupu ma e vagahau kehe, ke maeke ke iloa falu talahauaga aoga he vagahau kehe. Nakai leva mo e fakatapakupaku lahi ki ai, maeke ia tautolu ke kamata ke manatu ke he vagahau fou mo e mukamuka lahi ai ke vagahau.
2 Ko e ako ke fakakite e fakaalofa kua tuga e ako he vagahau fou. Moli, ko e lahi he fua faka-Atua nei kua ha ha pauaki ke he tau tagata. (Kenese 1:27; fakatatai 1 Ioane 4:8.) Ke fakakite agaia e fakaalofa kua lata mo e laliaga mua ue atu—mua atu he vaha nei, kua tote lahi e fakaalofa. (2 Timoteo 3:1-5) Ko e mena anei he falu magaaho kua tupu ke he magafaoa. E, tokologa kua lalahi hake ke he tuaga vale ne nakai fai kupu fakaalofa ai—he ka fai. (Efeso 4:29-31; 6:4) Maeke fefe, mogoia ia tautolu ke ako ke fakakite e fakaalofa—pete ni e nakai iloa lahi ai e tautolu?
3 Maeke he Tohi Tapu ke lagomatai. Ia 1 Korinito 13:4-8, kua talahau e Paulo, nakai ke he fakamaama noa ke he puhala he fakaalofa, ka ko e talahauaga malolo he puhala he tuaga tokoluga he tau gahua fakaalofa. Ko e manamanatu ke he tau kupu nei to lagomatai a tautolu ke moua e alito he fua faka-Atua nei ti mautauteute mitaki a tautolu ke fakakite ai. Kia manamanatu la tautolu ke he falu puhala he fakaalofa ne fakamaama mai e Paulo. To tuku fakalapalapa e tautolu ke he tolu e vahega: ko e tau mahani ha tautolu; mua atu ai ke he fakafetuiaga ha tautolu mo e falu; fakahiku ai, ko e fakauka ha tautolu.
Lagomatai he Fakaalofa a Tautolu ke Kautu Mai he Fakatokoluga
4. Ko e heigoa e maamaaga kua moua mai he Tohi Tapu ma e mahekeheke?
4 He fakaoti e talahauaga fakamua hana hagaao ke he fakaalofa, ne tohi e Paulo ke he tau Korinito: “Nakai mahekeheke e fakaalofa.” (1 Korinito 13:4) Ko e mahekeheke kua fakakite ke he fakafualoto ke he monuina po ke tau mouaaga he falu. Ko e mahekeheke pihia kua moumou—fakatino, logonaaga, mo e fakaagaga.—Tau Fakatai 14:30; Roma 13:13; Iakopo 3:14-16.
5. Maeke fefe he fakaalofa ke lagomatai a tautolu ke kautu mai he mahekeheke ka tuga kua nakai moua e tautolu falu kotofaaga fakateokarasi?
5 He mena nei, huhu hifo ki a koe ni, ‘Kua mahekeheke kia a au ka nakai moua ha kotofaaga fakateokarasi?’ Ka tali e, kia nakai fakaatukehe. Kua fakamanatu mai he tagata tohia Tohi Tapu ko Iakopo ki a tautolu e ‘manako lahi ke he mahekeheke’ kua ha ha he tau tagata nakai mitaki katoatoa oti. (Iakopo 4:5) Ko e fakaalofa ma e matakainaga hau kua lagomatai a koe ke moua e aga lagotatai. Kua maeke ke fakafiafia a koe mo lautolu kua fiafia mo e nakai onoono ki ai ko e totoko fakatagata ka moua he taha e fakamonuina po ke lagomataiaga.—Fakatatai 1 Samuela 18:7-9.
6. Ko e heigoa e tuaga kelea lahi ne tupu he fakapotopotoaga Korinito he senetenari fakamua?
6 Kua lafi e Paulo “nakai mahekeheke e fakaalofa, nakai hula e fakaalofa, ti nakai fakatokoluga.” (1 Korinito 13:4) Ka fai taleni po ke iloilo a tautolu, nakai lata ke fia kitia. Moli, ko e mena vihi anei mo e falu patu fakatokoluga ne o mai ke he fakapotopotoaga Korinito tuai. Liga ha ia lautolu e tau lotomatala mua ue atu he fakakite e tau manatu po ke puhala mitaki lahi he taute e tau mena. Ko e fakamatalahi ne lautolu a lautolu kua maeke ke vehevehe aki e fakapotopotoaga. (1 Korinito 3:3, 4; 2 Korinito 12:20) Ko e tuaga nei kua kelea lahi mahaki ati maeke ia Paulo he magaaho fakamui ke akonaki e tau Korinito kua ‘fakauka ke he tau tagata goagoa,’ ne kua fakamaama fakamao e Paulo ko e “tau aposetolo kua mumua.”—2 Korinito 11:5, 19, 20.
7, 8. Fakakite mai la he Tohi Tapu e puhala ke fakaaoga e tautolu ha taleni pauaki ke fakatolomaki aki e kaufakalataha.
7 Ko e tuaga pihia kua tupu he vaha nei. Ma e fakatai, liga fa mahani e falu ke palau hagaao ke he tau mouaaga ha lautolu ke he fekafekauaga po ke tau kotofaaga ha lautolu ke he fakatokatokaaga he Atua. Pete ni e fai lotomatala pauaki a tautolu po ke feua kua nakai moua he falu he fakapotopotoaga, to foaki mai kia he mena ia ki a tautolu e kakano ke fakaikaluga? He tau mena oti ia, kua lata ia tautolu ke fakaaoga e tau taleni pauaki ha tautolu ke fakatolomaki e kaufakalataha—nakai ha tautolu ni.—Mataio 23:12; 1 Peteru 5:6.
8 Ne tohi e Paulo pete ni e loga e tau tagata he fakapotopotoaga, “kua fakalata foki he Atua e tino katoa.” (1 Korinito 12:19-26) Ko e kupu Heleni ne fakaliliu “fakalata” kua fakakite e gahua fakalataha, tuga he fio he tau lanu. Ti nakai fai he fakapotopotoaga kua lata ke logona e fakatokoluga hagaao ke he tau lotomatala hana ti lali ke pule ke he falu. Ko e fakaikaluga mo e foli kua nakai fakaata ke he fakatokatokaaga he Atua.—Tau Fakatai 16:19; 1 Korinito 14:12; 1 Peteru 5:2, 3.
9. Ko e heigoa e tau fakafifitakiaga hataki kua foaki mai he Tohi Tapu ke he tau tagata takitaha kua manamanatu ki a lautolu ni?
9 Ko e fakaalofa kua “nakai kumi e ia hana tau mena.” (1 Korinito 13:5) Ko e tagata fakaalofa kua nakai haikau e falu ke he puhala hana. Kua talahau mai he Tohi Tapu e tau fakafifitakiaga hataki ke he mena nei. Ke fakatata: Totou e tautolu ki a Talila, Iesepela, mo Atalia—ko e tau fifine ne fakavaia e falu ma e tau mahani lotokai ni ha lautolu. (Tau Fakafili 16:16; 1 Tau Patuiki 21:25; 2 Nofoaga he Tau Patuiki 22:10-12) Pihia foki e tama tane he Patuiki ko Tavita ko Apisaloma. Ne fina atu a ia ki a lautolu ne o mai ki Ierusalema ma e fakafiliaga ti talahau fakavaivai ko e lotopa he patuiki kua nakai fiafia moli ke he tau mena vihi ha lautolu. Ati tala age e ia kua lata moli he lotopa ke fai tagata tane loto mafanatia tuga a ia! (2 Samuela 15:2-4) Moli, nakai fiafia a Apisaloma ke he tau tagata matematekelea, ka ki a ia ni. He eke ni e ia a ia mo patuiki, ne fakavaia e ia e tau loto he tokologa. Ka e nakai leva, ne feleveia a Apisaloma mo e kaumahalaaga lahi. He mate hana, ne nakai moua e ia e tanuaga lilifu.—2 Samuela 18:6-17.
10. Fakakite fefe e tautolu kua manamanatu a tautolu ke he tau mena he falu?
10 Ko e hatakiaga anei ma e tau Kerisiano he vaha nei. Ko e tagata tane po ke fifine, kua ha ha ia tautolu e tau malolo fakaohooho pauaki. Kua mukamuka ia tautolu ke taute ke he puhala ha tautolu, he ulu ki lalo e fakatutalaaga po ke tuku hifo a lautolu ne kehe e manatu. Ka fakaalofa moli a tautolu, to tumau a tautolu ke manamanatu ke he falu. (Filipi 2:2-4) To nakai fakateaga e tautolu e falu po ke fakatolomaki e tau manatu tuaha ha ko e iloaaga ha tautolu po ke tuaga ha tautolu he fakatokatokaaga he Atua, ke tuga ko e uho ni e kitiaaga ha tautolu. Nakai, kia manatu e tautolu e fakatai he Tohi Tapu: “Kua mua atu e mahani fakatokoluga ke he malaia; kua mua atu foki e mahani fakahakehake he loto ke veli ai e tagata.”—Tau Fakatai 16:18.
Taute he Fakaalofa e Fakafetuiaga Mafola
11. (a) Ke he puhala fe ke fakakite e tautolu e fakaalofa kua totonu mo e nakai mahani fuafuakelea? (e) Fakakite fefe e tautolu kua nakai fiafia a tautolu ha ko e nakai tututonu?
11 Ne tohi foki e Paulo ko e fakaalofa kua “totonu” ti “nakai mahani fuafuakelea” ai. (1 Korinito 13:4, 5) E, to nakai fakaata he fakalofa a tautolu ke mahani hemu, fakalialia, po ke aga nakai fakalilifu. Ka e, to manamanatu a tautolu ke he tau logonaaga he falu. Ma e fakatai, ko e tagata fakaalofa to tiaki e taute mena ke fakalauia aki e tau manamanatuaga he falu. (Fakatatai 1 Korinito 8:13.) Ko e fakaalofa kua “nakai fiafia ke he tau mahani kelea, ka e fiafia ni mo e kupu moli.” (1 Korinito 13:6) Ka ofania e tautolu e tau fakatufono a Iehova, to nakai matamohe a tautolu ke he mahani kelea po ke fakafiafia e tau mena ne vihiatia he Atua. (Salamo 119:97) To lagomatai he fakaaalofa a tautolu ke kumi e olioli he tau mena ke ati hake ka e nakai ke moumou.—Roma 15:2; 1 Korinito 10:23, 24; 14:26.
12, 13. (a) Fefe e tali atu ha tautolu ka fakaita mai e taha ki a tautolu? (e) Talahau e tau fakafifitakiaga he Tohi Tapu ke fakakite kua maeke foki he ita tonutika ke fakatupu a tautolu ke gahua nakai pulotu.
12 Kua tohi e Paulo ko e fakaalofa “nakai ita vave” (“nakai uliulitonu,” Phillips). (1 Korinito 13:5) Mailoga ai, kua pauaki ni ma tautolu ko e tau tagata nakai mitaki katoatoa ke hogohogomanava po ke logona e tuaga ita ka totoko mai he taha. Pete ia, to nakai tonu ke fakafualoto e ita po ke tumau ke he tuaga ita. (Salamo 4:4; Efeso 4:26) Ka nakai taofi ai, to liga fakatupu foki he ita kua tonu a tautolu ke goagoa, ti fakalago e Iehova a tautolu ke he mena nei.—Kenese 34:1-31; 49:5-7; Numera 12:3; 20:10-12; Salamo 106:32, 33.
13 Kua fakaata he falu e tau nakai mitaki katoatoa he falu ke lauia e tau fifiliaga ha lautolu he o atu ke he tau feleveiaaga po ke fakalataha ke he fekafekauaga he fonua. He fakamua, tokologa ia lautolu nei kua taufetului fakamakamaka ma e tua, liga ke fakauka he totokoaga mai he magafaoa, va he tau kapitiga gahua, mo e falu foki. Ne fakauka a lautolu ke he tau fakatauhele nei ha kua kitekite a lautolu ki ai ko e tau kamatamata he fakamoli, ti kua tonu ni ke taute pihia. Ka ko e heigoa ka tupu ka talahau po ke taute he matakainaga Kerisiano taha mena nakai mitaki? Nakai kia ko e kamatamata foki anei he fakamoli? Moli, ka tumau a tautolu ke he tuaga ita, to ‘fakaata e tautolu ha mena ma e tiapolo.’—Efeso 4:27.
14, 15. (a) Ko e heigoa e kakano ke “nakai talahaua e kelea”? (e) Fakafifitaki fefe e tautolu a Iehova he fakamagalo?
14 Mo e kakano mitaki, kua lafi e Paulo ko e fakaalofa kua “nakai talahaua e kelea.” (1 Korinito 13:5) Kua fakaaoga e ia he mena nei e kupu fakamauaga tupe, ke fakakite fakamoli kua fakamau hifo e ita ke he fakamauaga tupe ke manatu tumau. Kua fakaalofa nakai ke taute e fakamauaga tumau he kupu po ke gahua fakamamahi, ke tuga to lata ia tautolu ke hagaao ki ai he falu magaaho i mua? Ko e fiafia ha ia ha tautolu he nakai kumikumi e Iehova a tautolu ke he puhala nakai fakaalofa hofihofi! (Salamo 130:3) E, ka fakamagalo a tautolu, to utakehe e ia e tau hehe ha tautolu.—Gahua 3:19.
15 Kia fifitaki e tautolu a Iehova ke he mena nei. Kia nakai molea e hogohogomanava ha tautolu ka tuga ke fakaita mai taha ki a tautolu. Ka mafiti a tautolu ke ita, ko e fakamamahi lahi ni a tautolu ia tautolu nakai ko e tagata ne fakamamahi mai ki a tautolu. (Fakamatalaaga 7:9, 22) Ka kua lata ia tautolu ke manatu ko e fakaalofa kua “talia e tau mena oti.” (1 Korinito 13:7) Moli, nakai fai ia tautolu kua manako ke fakavaia, ka kua nakai lata foki ia tautolu ke tuaha lahi ke he tau manatu he tau matakainaga ha tautolu. Ka lata ai, kia manamanatu mitaki a tautolu ke he falu.—Kolose 3:13.
Lagomatai he Fakaalofa a Tautolu ke Fakauka
16. Ke he tau tutuaga fe kua lagomatai he fakaalofa a tautolu ke fakauka?
16 Ati talahau mai ai e Paulo ki a tautolu kua “fakauka e fakaalofa.” (1 Korinito 13:4) Kua fakamalolo a tautolu ke fahia ke he tau tuaga kamatamata, liga ke loa e magaaho. Ma e fakatai, tokologa e tau Kerisiano ne kua nakai tatai e lotu he magafaoa ke he tau tau loga. Kua nonofo takitokotaha e falu, nakai ha ko e fifiliaga, ka kua nakai moua e hoa kua lata “mo e Iki.” (1 Korinito 7:39; 2 Korinito 6:14) Ti ha ha ai a lautolu kua fetului mo e lolelole ha ko e tau vihi malolo tino. (Kalatia 4:13, 14; Filipi 2:25-30) Moli, he fakatokaaga nakai mitaki katoatoa nei, nakai fai tagata he tuaga he moui ne nakai lata ma e taha puhala fakauka.—Mataio 10:22; Iakopo 1:12.
17. Ko e heigoa ka lagomatai a tautolu ke fakauka ke he tau mena oti?
17 Kua fakamafana mai e Paulo ki a tautolu ko e fakaalofa kua “fakauka ke he tau mena oti . . . amaamanaki ke he tau mena oti, kua fakamanavalahi ke he tau mena oti.” (1 Korinito 13:7) Ko e fakaalofa ma Iehova to fakamalolo a tautolu ke matematekelea ke he ha tuaga tututonu. (Mataio 16:24; 1 Korinito 10:13) Nakai kumi e tautolu e mate. Nakai pihia, ko e foliaga ha tautolu ke nonofo mafola mo e milino. (Roma 12:18; 1 Tesalonia 4:11, 12) Moha ia, ka mamafuta mai e tau kamatamata he tua, kua fakauka fiafia a tautolu ki ai ha ko e vala anei he feua he tutaki Kerisiano. (Luka 14:28-33) He fakauka a tautolu, lali a tautolu ke fakatumau e kitekiteaga mitaki, he amanaki ma e fua mitaki lahi he vahaloto he tau tutuaga kamatamata.
18. Lata fefe e fakauka pete ni foki ma e vaha fiafia?
18 Ko e matematekelea lahi nakai ni ko e tuaga kua ui ma e fakauka. Ko e falu magaaho, ke fakauka kakano ke tumau, ke fakatumau ke he puhala kua fakatoka pete ni ko e tau tutuaga kamatamata kua hoko po ke nakai. Kua putoia e fakauka he fakatumau ke he puhala fakaagaga mitaki. Ma e fakatai, fakalataha nakai a koe ke he fekafekauaga, he lagotatai ke he tau tuaga hau? Kua totou mo e manamanatu fakahokulo nakai e koe e Kupu he Atua mo e matutaki mo e Matua hau he lagi ke he liogi? Kua fakalataha tumau nakai a koe ke he tau feleveiaaga he fakapotopotoaga, ti kua moua kia e koe e aoga mai he fefakamaloloaki mo e tau matakainaga talitonu hau? Ka pihia, kua fakauka a koe ke he tau vaha fiafia mo e matematekelea. Kia nakai fakalolelole, “ha ko e mena to helehele mai a tautolu ke he vaha ke lata ai, kaeke kua nakai fakalolelole a tautolu.”—Kalatia 6:9.
Fakaalofa—“Puhala kua Mua he Mitaki”
19. Ko e “puhala kua mua he mitaki” fefe e fakaalofa?
19 Kua peehi e Paulo e aoga he fakakite e fakaalofa he fakahigoa e fua faka-Atua nei ko e “puhala kua mua he mitaki.” (1 Korinito 12:31) “Mua he mitaki” ke he puhala fe? Ne tohi hifo laia e Paulo e tau mena fakaalofa he agaga, ne kua mahani ke he tau Kerisiano he senetenari fakamua. Kua maeke he falu ke perofeta, falu kua foaki ki ai e malolo ke fakamaulu e tau gagao, tokologa kua foaki ki ai e lotomatala ke vagahau. Ko e tau mena fakaalofa ofoofogia moli! Ka e, tala age a Paulo ke he tau Korinito: “Kaeke kua vagahau au ke he tau vagahau he tau tagata katoa mo e tau agelu, ka e nakai fai fakaalofa, kua eke au mo apa kula kua fakapako po ke kumepalo kua fakatagi. Kaeke foki ha ha ia au ke perofeta atu, mo e iloa e au e tau mena galo oti, mo e maama katoatoa; kaeke foki ha ha ia au e tua katoatoa ke uta kehe ai e tau mouga, ka e nakai fai fakaalofa au, ko e mena noa ni au.” (1 Korinito 13:1, 2) E, pihia foki e tau gahua kua fakalata ke uho ne kua eke mo “tau gahua ke mamate ai” ka manako ki ai kua nakai fakaalofa ma e Atua mo e katofia.—Heperu 6:1.
20. Ko e ha kua lata ai e laliaga tumau ka feaki e tautolu e fakaalofa?
20 Kua foaki mai e Iesu taha kakano he lata ia tautolu ke feaki e fua faka-Atua he fakaalofa. “Ko e mena ia ke iloa ai he tau tagata oti kana, ko e haku a tau tutaki a mutolu,” he talahau e ia, “ka feofanaki a mutolu.” (Ioane 13:35) Ko e kupu “ka” kua toka ai ke he tau Kerisiano takitaha po ke ako nakai e ia ke fakakite e fakaalofa. Mole ia, he nofo ai ke he motu kehe to nakai peehi a tautolu ke ako ke vagahau e vagahau ia. Po ke o atu ke he tau feleveiaaga he Fale he Kautu po ke fio mo e tau matakainaga Kerisiano kua amanaki ni ti fakaako a tautolu ke fakakite e fakaalofa. He fakaako e “vagahau” nei ko e laliaga fakatumau.
21, 22. (a) Kua lata ke tali atu fefe a tautolu ka nakai lagotatai a tautolu ke he falu puhala he fakaalofa ne fakatutala a Paulo ki ai? (e) Ke he puhala fe ke talahau e tautolu kua “nakai tuai oti” e fakaalofa?
21 Falu magaaho, to nakai lagotatai a koe mo e falu puhala he fakaalofa ne fakatutala a Paulo ki ai. Ka kia nakai fakalolelole. Fakagahua fakatekiteki ki a koe ni. Kia ono tumau ke he Tohi Tapu ti fakagahua e tau matapatu fakaakoaga he fehagaiaga hau mo e falu. Kia nakai nimo e fakafifitakiaga ne fakatoka e Iehova ma tautolu oti. Ne fakamafana e Paulo ke he tau Efeso: “Kia eke a mutolu mo tau tagata totonu ko e taha ke he taha, kia hofihofi ha mutolu a fakaalofa, mo e fefakamagaloaki a mutolu; tuga e Atua ha ia Keriso ne fakamagalo e ia a mutolu.”—Efeso 4:32.
22 Tuga he ako ke vagahau ke he vagahau fou ti hoko ke he magaaho fakamui kua mukamuka lahi ai, ti nakai leva to liga moua e koe kua mukamuka lahi ke fakakite e fakaalofa. Kua fakamafana e Paulo ki a tautolu kua “nakai tuai oti e fakaalofa.” (1 Korinito 13:8) Nakai tuga e tau mena fakaalofa mana he agaga, to nakai fakahiku e fakaalofa. Ti fakatumau ke fakakite e fua faka-Atua nei. Kua pihia he fakahigoa e Paulo, ko e “puhala kua mua he mitaki.”
Maeke Nakai ia Koe ke Fakamaama?
◻ Lagomatai fefe he fakaalofa a tautolu ke kautu mai he fakatokoluga?
◻ Maeke fefe he fakaalofa ke lagomatai a tautolu ke fakatolomaki e mafola he fakapotopotoaga?
◻ Maeke fefe he fakaalofa ke lagomatai a tautolu ke fakauka?
◻ Ko e “puhala kua mua he mitaki” fefe e fakaalofa?
[Fakatino he lau 13]
Maeke he fakaalofa ke lagomatai a tautolu ke nakai ekefakakelea e tau matakainaga talitonu ha tautolu
[Tau Fakatino he lau 15]
Kakano he fakauka ke fakatumau e puhala fakaagaga mitaki