To Tokanoa e Tau Tagata Oti Kana

“Kua manatu au ko e mena noa e tau mamahi he vaha nai ke fakatai ke he monuina ke fakakite mai ia tautolu a mui. Ha kua fakaneinei e tau mena ne eke ti fakatalitali ni ke he fakakite mai e tau tama he Atua. Nukua mahala e tau mena ne eke ke he mena popo vave, nakai loto a ia ki ai, ka e pihia ha ko ia ne mahala ai. Ne fakamahala mo e amaamanaki, ha ko e mena to toka noa ai e tau mena ne eke mai he tupaaga ke he mena popo vave kia hoko atu ai ke he tokanoaaga ha ha he monuina he fanau he Atua. Ha kua iloa e tautolu kua oi fakalataha mo e mamahi fanau fakalataha e tau mena oti ne eke kua hoko ni ke he vaha nai.”​—ROMA 8:18-22.

I LOTO he vala nei he hana tohi ke he tau Kerisiano i Roma, ne talahau e Paulo e fakahikuaga aoga lahi ko e ha ne kaumahala e tau momoui ke ataina moli mo e kua fa kitia tumau ke taanaana mo e mamahi. Kua fakamaama foki e ia e puhala ke moua e tautolu e tokanoaaga moli.

Ko e “Tau Mamahi he Vaha Nai”

Kua nakai fakateaga a Paulo ke he “tau mamahi he vaha nai” he pehe a ia ‘ko e mena noa e tau mena ia ke he monuina ke fakakite mai ia tautolu a mui.’ He magahala he vaha a Paulo pihia foki he vaha fakamui, ne mamahi lahi e tau Kerisiano i lalo he pule katoatoa mania he tau Roma, ne tote e tokaga ke he tonu he tau tagata. He iloa he tau Roma ko e tau fi he Motu e tau Kerisiano, ne fakahoko ai a lautolu ke he ekefakakelea muitui. Ne pehe e tagata fakamau tala tuai ko J. M. Roberts: “Tokologa e tau Kerisiano he matapatu taone [Roma] ne kua mamate fakakelea i loto he male po kua tugi momoui.” (Shorter History of the World) Ki a lautolu nei he favaleaga a Nero, ne tohi mai taha hokotakiaga: “Ko e falu kua fakatautau, falu kua tuitui e tau kili manu ki ai ti kai he tau kuli, falu kua liligi aki e ta ti huhunu ke eke mo tau molikasa he mogo pouli.”​—New Testament History, ha F. F. Bruce.

Ko e tau Kerisiano fakamua ia kua manako lahi ke tokanoa mai he ekefakakelea pihia, ka kua nakai mahala a lautolu ke holitu e tau fakaakoaga a Iesu Keriso ke moua ai. Kua tutu uho maunivaniva a lautolu, ke fakatai ki ai, he fetului he vahaloto he pule malolo ha Roma mo e tau Iutaia ne tau ke moua e tokanoaaga ko e tau Matakau Makutu Lahi. (Ioane 17:16; 18:36) Ke he tau Matakau Makutu Lahi, “ke pehe ke fakatali ke he magaaho mitaki he Atua, kua nakai ko e mena lata ma e matematekelea he mogonei.” Ko e mena kua lata, he talahau e lautolu, ko e “tau atu ke he fi,” ko Roma. (New Testament History) Kua kehe e manatu he tau Kerisiano fakamua atu. “Ke fakatali ke he magaaho mitaki he Atua” ko e taha fifiliaga tonu ni a ia ki a lautolu. Kua mauokafua a lautolu kua nakai fai mena foki ka ko e gahua faka-Atua ni ka fakaoti tukulagi e “tau mamahi he vaha nai” mo e ta mai e tokanoaaga moli mo e tukulagi. (Mika 7:7; Hapakuka 2:3) Fakamua to kikite atu ke he puhala ka tupu ai, kia kumikumi a tautolu ko e ha “nukua mahala e tau mena ne eke ke he mena popo vave” he mogo fakapa.

‘Mahala ke he Mena Popo Vave’

Ko e tau kupu nei “tau mena ne eke,” he talahau e Benjamin Wilson i loto he The Emphatic Diaglott, kua nakai kakano “ko e tau manu po ke tau mena nakai moui” tuga ne manatu he falu ka e ke he, “tau tagata oti.” (Fakatatai Kolose 1:23.) Kua hagaao ke he tau magafaoa katoa he tagata​—ko tautolu oti ne manako lahi ma e tokanoaaga. Ko tautolu ‘kua mahala ai ke he mena popo vave’ ha ko e tau gahua he tau matua fakamua ha tautolu. Ti kua tupu ai, ‘nakai ha ko e loto a tautolu ki ai’ po ke ko e fua he fifiliaga he tagata. Ka ko e mena moua e tautolu e tau tutuaga ha tautolu. Mai he maamaaga he faka-Tohiaga Tapu, kua hepe a Rousseau he magaaho ne pehe a ia “kua fanau e tagata mo e tokanoaaga.” Ka kua fanau a tautolu oti ke he liliaga he hala mo e nakai mitaki katoatoa, fakatupa, ke he fakatokaaga ne puke he tau kapaletu mo e tau mena popo vave.​—Roma 3:23.

Ko e ha ne pehenai ai? Kakano kua manako e tau matua fakamua ha tautolu, ko Atamu mo Eva, ke ‘tuga e Atua,’ ke fifili ni e laua e mena mitaki mo e mena kelea. (Kenese 3:5) Ne fakaheu e laua taha mena aoga lahi hagaao ke he tokanoaaga. Ko e Tufuga ni hokoia ka moua e tokanoa katoatoa. Ko ia ko e Pule he Lalolagi mo e Lagi Katoatoa. (Isaia 33:22; Fakakiteaga 4:11) Ko e tokanoaaga he tagata ko e tokanoaaga fakakaupa. Ko e mena haia ne fakamafana he tutaki ko Iakopo e tau Kerisiano he vaha hana ke takitaki he “fakatufono kua katoatoa e mitaki ha i ai e tokanoaaga.”​—Iakopo 1:25.

Kua tonu ai a Iehova ke vega kehe a Atamu mo Eva mai he magafaoa he lalolagi katoatoa hana, ti mamate ai a laua. (Kenese 3:19) Ka e kua ha laua fanau? Ha kua fakaalofa hofihofi noa, pete ni kua fakahoko ni e laua he mogonei e nakai mitaki katoatoa, hala, mo e mate, kua fakaata agaia e Iehova a laua ke fanafanau. Ti “kua hoko mai ai e mate ke he tau tagata oti kana.” (Roma 5:12) Ko e kakano ia he Atua ne ‘mahala e tau mena ne eke ke he mena popo vave.’

Kua “Fakakite Mai e Tau Tama he Atua”

Kua mahala he Atua e tau mena ne eke ke he mena popo vave he fakave ke he tua ke liuaki mai he taha aho e tokanoaaga ke he magafaoa he tagata he puhala he tau gahua he “tau tama he Atua.” Ko hai e “tau tama [nei] he Atua”? Ko e tau tutaki a Iesu Keriso, tuga e falu “[tagata] ne eke,” ne fanau ke he tupaaga he hala mo e nakai mitaki katoatoa. He mogo ne fanau ai kua nakai fai nofoaga a lautolu he magafaoa mea, mitaki katoatoa he lalolagi katoa he Atua. Ka e taha e mena mitaki lahi ne taute e Iehova ma lautolu. He puhala he poa lukutoto ha Iesu Keriso, ne fakatokanoa e Ia a lautolu mai he liliaga ke he hala mo e talahaua a lautolu ke “tututonu,” po ke mea fakaagaga. (1 Korinito 6:11) Ti hiki e ia a lautolu mo “tau tama he Atua,” liuaki mai ai a lautolu ke he magafaoa he lalolagi katoa hana.​—Roma 8:14-17.

Ko e tau tama hiki ha Iehova, to moua e lautolu e kotofaaga mua ue atu. To eke a lautolu mo “tau ekepoa ke he Atua ha mautolu; kua eke foki a mautolu mo tau patuiki ke he lalolagi” he fakalataha mo Iesu Keriso ko e vala he Kautu he Atua he lagi, po ke fakatufono. (Fakakiteaga 5:9, 10; 14:1-4) Ko e fakatufono nei kua maunivaniva ke he tau matapatu fakaakoaga he tokanoaaga mo e fakafiliaga tonu​—nakai ke he ekefakakelea mo e pule kelea. (Isaia 9:6, 7; 61:1-4) Ne talahau he aposetolo ko Paulo ko e tau tama nei he Atua ko e tau ekegahua mo Iesu, ko e ‘tega a Aperahamo’ ne kua leva e mavehe mai. (Kalatia 3:16, 26, 29) Kua uho ai e matagahua ha lautolu ke fakamoli e maveheaga ne taute he Atua mo e hana kapitiga ko Aperahamo. Ko e vala he maveheaga ia, ne kakano mai he tega a Aperahamo (po ke, fanau) kua “monuina ai e tau motu oti kana he lalolagi.”​—Kenese 22:18.

Ko e heigoa e fakamonuinaaga ne ta mai e lautolu ke he tau tagata? Kua fakalataha e tau tama he Atua ke fakatokanoa e magafaoa katoa he tagata mai he fua kelea he hala a Atamu mo e ke liuaki e tau tagata ke he mitaki katoatoa. Ko e tau tagata “mai he tau motu oti, mo e tau faoa, mo e tau tagata kehekehe” to fakamonuina e lautolu a lautolu ha ko e poa lukutoto ha Iesu Keriso mo e he omaoma ke he hana pule Kautu mitaki. (Fakakiteaga 7:9, 14-17; 21:1-4; 22:1, 2; Mataio 20:28; Ioane 3:16) Ke he puhala nei to liliu foki e “tau mena oti ne eke” ke olioli e “tokanoaaga ha ha he monuina he fanau he Atua.” Ti nakai ko e tokanoaaga fakakaupa mo e mataku he fakapolitika anei, ka ko e tokanoaaga mai he tau mena oti ne fakatupu e mamahi mo e fakaatukehe ke he magafaoa he tagata tali mai he holitu e Atamu mo Eva e pule okooko he Atua. Ati maeke ai e aposetolo ko Paulo ke talahau “ko e mena noa e tau mamahi he vaha nai” ke fakatai ke he fekafekau monuina ka taute e lautolu ne tua fakamoli!

To kamata he magaaho fe ke “fakakite mai e tau tama he Atua”? Nakai leva ni he mogonei, he magaaho ka fakakite maaliali e Iehova ke he tau tagata e tau tama he Atua. To hoko ai he magaaho ka fakaliu tutu mai e “tau tama” nei ke he matakavi fakaagaga, ke auloa mo Iesu Keriso ke uta kehe mai he lalolagi nei e mahani kelea mo e ekefakakelea, he tau a Iehova i Amaketo. (Tanielu 2:44; 7:13, 14, 27; Fakakiteaga 2:26, 27; 16:16; 17:14; 19:11-21) Kitia ai e tautolu e tau fakamoliaga ne viko takai ia tautolu kua hokulo tuai a tautolu ke he “tau aho fakamui,” magaaho ka gata ai e fakauka he Atua ke he fakafualoto mo e fua he mahani kelea.​—2 Timoteo 3:1-5; Mataio 24:3-31.

E, tuga ni ne talahau he aposetolo ko Paulo, “kua oi fakalataha mo e mamahi fanau fakalataha e tau mena oti ne eke kua hoko ni ke he vaha nai”​—ka e to nakai leva lahi. Ti, ko e totou miliona ne momoui he mogonei ka kitia e “liu fakafou ai e tau mena oti kana, ne talahau mai ai he Atua ke he tau fofoga he hana tau perofeta tapu oti tali mai he kamataaga,” fakalataha mo e liu fakafou he mafola, tokanoaaga, mo e fakafili tonu ke he magafaoa katoa he tagata.​—Gahua 3:21.

Hoko Mai Tuai e Tokanoaaga Moli

Ko e heigoa hau ka taute ke olioli e “tokanoaaga ha ha he monuina he fanau he Atua”? Ne talahau a Iesu Keriso: “Kaeke ke tumau fakaoti a mutolu ke he haku a kupu, ko e tau tutaki moli haku a mutolu. To iloa foki e mutolu e mena moli, ko e mena moli foki ke toka noa ai a mutolu.” (Ioane 8:31, 32) Ko e kei haia ke he tokanoaaga​—ke ako mo e kia oma e tau poakiaga mo e tau fakaakoaga he Keriso. Kua ta mai foki he mena nei taha vala he tokanoaaga ke he magaaho nei. He vaha tata mai anoiha, to ta mai ai e tokanoaaga katoatoa i lalo he pule a Keriso Iesu. Ko e puhala pulotu ke iloa e “kupu” ha Iesu he kumikumi atu ke he Tohi Tapu. (Ioane 17:3) Ke tuga e tau Kerisiano fakamua, kia fakamalolo ke fakalataha mo e fakapotopotoaga he tau tutaki moli ha Keriso. Ka taute pihia, to moua e koe e aoga mai he tau kupu moli ataina ne foaki mai e Iehova he puhala he fakatokatokaaga hana he vaha nei.​—Heperu 10:24, 25.

He “fakatalitali ni ke he fakakite mai e tau tama he Atua,” liga lata ia koe ke feaki e mauokafua ne ha ha he aposetolo ko Paulo ke he levekiaga mo e lagomatai he Keriso, ti pihia foki he magaaho ne tuga kua nakai fahia ke he tau matematekelea mo e tau nakai tonu. He mole e tutala ke he fakakiteaga he tau tama he Atua, ne huhu a Paulo: “Ko hai kia taha ke fakamavehe a tautolu mo e fakaalofa a Keriso? ko e matematekelea kia, po ke fakaatukehe, po ke favale, po ke hoge, po ke nakai fai felevehi, po ke tau mena uka, po ke pelu?” (Roma 8:35) Moli, ko e tau Kerisiano he vaha a Paulo, ke fakaaoga e tau kupu ha Rousseau, kua ha ha agaia he “tau filifili” ke he tau matakau ekefakakelea kehekehe. “Kua kelipopo ai a [lautolu] ke he aho oti” tuga e “tau mamoe ko e tamate ha ne fai.” (Roma 8:36) Fakaata nakai e lautolu e tau mena ia ke fakatupetupe aki a lautolu?

“Ko e tau kautu to atu a tautolu ke he tau mena oti nai, ha ko ia ne fakaalofa mai kia tautolu,” he tohia e Paulo. (Roma 8:37) Kua kautu kia, pete ni kua fakauka e tau Kerisiano ke he tau mena loga? Fefe? “Kua iloa tonuhia e au,” he tali e ia, “nakai maeke ke he mate, po ke moui, po ke tau agelu, po ke tau iki, po ke tau toa, po ke tau mena ha i ai nai, po ke tau mena ne tatali. Po ke tokoluga, po ke hokulo, po ke taha mena kua eke, nakai maeke ke he tau mena ia ke fakamavehe a tautolu mo e fakaalofa he Atua, ha ia Keriso Iesu ha tautolu a Iki.” (Roma 8:38, 39) Maeke foki ia koe ke “kautu” mai he ha ‘matematekelea po ke fakaatukehe po ke favale’ ne fakauka ai a koe ki ai. Kua fakamoli mai e fakaalofa he Atua to nakai leva​—tata lahi he mogonei​—‘to tokanoa a tautolu mai he tau mena oti ne eke mai he tupaaga mo e hoko atu ke he tokanoaaga ha ha he monuina he fanau he Atua.’