Fakatumau ke O he Puhala a Iehova
“Kia talifaki a koe kia Iehova, mo e tumau ke he hana puhala; ti fakamatalahi e ia a koe ke eke māu e motu.”—SALAMO 37:34.
1, 2. Ko e heigoa kua putoia he o he puhala a Iehova ke he Patuiki ko Tavita, ti ko e heigoa kua lata ma tautolu he vaha nei?
“KIA fakakite mai e puhala ke fano ai au; ha kua manako lahi haku a loto kia koe.” (Salamo 143:8) Ne fatiaki mo e loto katoa he tau Kerisiano he vaha nei e tau kupu ia he Patuiki ko Tavita. Kua manako moli a lautolu ke fakafiafia a Iehova mo e o he puhala hana. Ko e heigoa kua putoia he mena nei? Ma Tavita, ne kakano ko e taofi ke he fakatufono he Atua. Kua putoia e falanaki ki a Iehova nakai ke he tau kaufakalatahaaga mo e tau motu. E, ko e kakano ke mahani fakamoli he fekafekau ki a Iehova, nakai ke he tau atua he tau tagata ne katofia. Ma e tau Kerisiano, kua lahi atu foki e mena kua putoia he o he puhala a Iehova.
2 Taha e mena, ko e o he puhala a Iehova he vaha nei kua kakano ko e fakagahuahua e tua he poa lukutoto a Iesu Keriso, fakakite a ia ko e “puhala, mo e kupu moli, mo e moui.” (Ioane 3:16; 14:6; Heperu 5:9) Kua kakano foki, ko e fakamoliaga he “fakatufono a Keriso,” ne kua putoia ai e fakakite he fefakaalofaaki, mua atu ke he tau matakainaga fakauku a Iesu. (Kalatia 6:2; Mataio 25:34-40) Ko lautolu kua o he puhala a Iehova kua ofania e tau matapatu fakaakoaga mo e tau poakiaga hana. (Salamo 119:97; Tau Fakatai 4:5, 6) Kua tokiofa e lautolu e kotofaaga uho he fakalataha ke he fekafekauaga Kerisiano. (Kolose 4:17; 2 Timoteo 4:5) Ko e liogi e vala tumau he tau momoui ha lautolu. (Roma 12:12) Ti kua “o fakalaulau a [la]utolu; nakai tuga ne tau tagata goagoa ka kia tuga e tau tagata iloilo” a lautolu. (Efeso 5:15) Kua nakai poa moli e lautolu e tau koloa fakaagaga ma e tau koloa fakaaoga ku po ke tau fakafiafiaaga tino nakai tonu. (Mataio 6:19, 20; 1 Ioane 2:15-17) Pete ia, ko e mahani fakamoli ki a Iehova mo e falanaki ki a ia kua lata. (2 Korinito 1:9; 10:5; Efeso 4:24) Ko e ha? Ha ko e tuaga ha tautolu kua tatai lahi ki a Isaraela i tuai.
Lata ma e Falanaki mo e Mahani Fakamoli
3. Ko e ha e mahani fakamoli, tua, mo e falanaki kua lagomatai a tautolu ke fakatumau ke o he puhala a Iehova?
3 Ko e motu tote a Isaraela ne takai viko he tau katofia nakai kapitiga ne fakalataha ke he tau matagahua fakakeukeu he tapuaki ke he tau atua tupua. (1 Nofoaga he Tau Patuiki 16:26) Ko Isaraela ni ne fekafekau ki a Iehova ko e Atua tokotaha maka moli ne nakai kitia, ti manako a ia ki a lautolu ke fakatumau e tokoluga he tau tutuaga mahani mitaki. (Teutaronome 6:4) Pihia foki he vaha nei, gahoa e tau miliona tagata kua tapuaki ki a Iehova, ti nonofo a lautolu he lalolagi kua teitei ke ono e piliona tagata ne kehe mamao mai he tau tutuaga mo e onoonoaga fakalotu mai he ha lautolu. Ka fakalataha a tautolu mo lautolu tokogahoa e miliona ia, kua lata ia tautolu ke fakamamao mai he fakaohooho he puhala hepe. Fefe? Ko e mahani fakamoli ki a Iehova ko e Atua, tua ki a ia, mo e falanaki mauokafua to lagomatai ka fakamoli e ia e tau maveheaga hana. (Heperu 11:6) To puipui he mena nei a tautolu mai he falanaki a tautolu ke he tau mena kua amanaki ki ai e lalolagi.—Tau Fakatai 20:22; 1 Timoteo 6:17.
4. Ko e ha e tau motu kua ‘pouligia e tau loto manamanatu’?
4 Ne fakakite he aposetolo ko Paulo e lata he tau Kerisiano ke kehe mai he lalolagi he tohi e ia: “Hanai, kua tala atu e au kia mutolu mo e fakakite atu e mena nai ki mua he Iki, aua neke tuai mahani a mutolu tuga e falu a motu kehe kua mahani a lautolu ke he goagoa he tau loto ha lautolu; kua pouligia ha lautolu a tau loto manamanatu, kua mafoki kehe a lautolu mai he moui ha he Atua, ha ko e goagoa ha lautolu, ha kua mao ha lautolu a tau loto.” (Efeso 4:17, 18) “Ko e maama moli” a Iesu. (Ioane 1:9) Ko e tagata ka tiaki a ia po ke talahau ke talitonu ki a ia ka e nakai omaoma ke he “fakatufono a Keriso” kua ‘pouligia e tau loto manamanatu.’ Mamao mai he o he puhala a Iehova, “kua mafoki kehe a lautolu mai he moui ha he Atua.” Pete ni kua manamanatu a lautolu kua pulotu a lautolu ke he puhala fakalalolagi, kua ha ha ia lautolu e “goagoa ha lautolu” ha ko e iloilo ni kua takitaki ke he moui, ko e ha Iehova ko e Atua mo Iesu Keriso.—Ioane 17:3; 1 Korinito 3:19.
5. Pete ni kua kikila e maama he kupu moli ke he lalolagi, ko e ha e tau loto he tokologa kua nakai mafoki?
5 Ka e, ko e maama he kupu moli kua kikila ke he lalolagi! (Salamo 43:3; Filipi 2:15) “Kua kalaga e iloilo i fafo.” (Tau Fakatai 1:20) He tau kua mole ne molea e piliona he tau tula ne tala age he Tau Fakamoli a Iehova ke he tau katofia ha lautolu hagaao ki a Iehova ko e Atua mo Iesu Keriso. Ne totou teau miliona ne fanogonogo. Ka kua lata nakai, mogoia, ia tautolu ke ofo ha kua tokologa ne kaumahala ke fanogonogo? Nakai. Ne tutala a Paulo ke he “mao ha lautolu a tau loto.” Falu kua ha ha ai e tau loto mao ha ko e lotokai po ke manako lahi ke he tau tupe. Falu ne fakaohooho he lotu fakavai po ke onoaga gahua fakalalolagi kua tupu holofa he vaha nei. Ko e moui uka ne takitaki e tokologa ke haga tua atu a lautolu ke he Atua. Kua fakaheu he falu ke hokotia ke he tau tutuaga tokoluga he mahani a Iehova. (Ioane 3:20) To mao foki kia e loto hana kua fano he puhala a Iehova ke he tau mena pihia?
6, 7. Pete ni ko e tau tagata tapuaki ha Iehova ko e Atua a lautolu, ke he tau magaaho fe ne mokulu kehe e tau Isaraela, ti ko e ha?
6 Na tupu e mena nei ki Isaraela i tuai, he fakakite e Paulo. Ne tohi e ia: “Ne eke e tau mena ia mo tau fakamailoga kia tautolu, neke foli a tautolu ke he tau mena kelea, tuga ne foli e lautolu. Aua foki neke hufeilo ke he tau tupua, tuga e falu ia lautolu; tuga he tohi mai, Ne nonofo e motu o tagata ki lalo ke kai mena, mo e inu, ti tutu ai a lautolu ke koli. Aua foki neke feuaki a tautolu, tuga ne falu ia lautolu ne feuaki, mo e mahaikava ke he aho taha ne uafulu e afe, ti tolu e afe.”—1 Korinito 10:6-8.
7 Ne hagaao fakamua a Paulo ke he magaaho ne tapuaki a Isaraela ke he punua povi i kelekele he Mouga ko Sinai. (Esoto 32:5, 6) Ko e nakai omaoma pauaki anei ke he poakiaga faka-Atua ne kua talia e lautolu ke omaoma he tau fahitapu gahoa fakamua. (Esoto 20:4-6; 24:3) Ti, hagaao foki a Paulo ke he magaaho ne hufeilo a Isaraela ki a Paala fakalataha mo e tau tama fifine a Moapi. (Numera 25:1-9) Ne fakakite he tapuaki punua povi e taufeauhi kelea muitui, he ‘tutu ai ke koli.’a Ne fakalataha e tapuakiaga Paala mo e feuaki vevela he mahani fakatane mo e fifine. (Fakakiteaga 2:14) Ko e ha ne taute he tau Isaraela e tau agahala nei? Ha kua fakaata e lautolu e tau loto ha lautolu ke ‘foli ke he tau mena kelea’—ko e tapuaki tupua po ke tau gahua fakakeukeu ne fakalataha ki ai.
8. Ko e heigoa kua ako mai e tautolu he tau mena ne tupu ki Isaraela?
8 Ne fakakite mai e Paulo kua lata ia tautolu ke ako mai he tau mena nei. Ako e heigoa? Kua nakai manatu ke he Kerisiano ke hufeilo ke he punua povi po ke atua Moapi i tuai. Ka e kua e mahani feuaki po ke tau tafeauhi fakagoagoa? Kua kitia lahi e tau mena nei he vaha nei, ti kaeke ke fakaata e tautolu e manako ke he tau mena ia ke tupu he tau loto ha tautolu, to uta kehe ai a tautolu mai ia Iehova. To tatai agaia ni kaeke kua taute e tautolu e tapuaki tupua—ko e mafoki kehe mai he Atua. (Fakatatai Kolose 3:5; Filipi 3:19.) Moli, kua fakahiku e Paulo hana fakatutalaaga ke he tau mena tutupu ia he fakamafana e tau matakainaga talitonu: ‘Kia fehola kehe he hufeilo ke he tau tupua.’—1 Korinito 10:14.
Lagomatai he O he Puhala he Atua
9. (a) Ko e heigoa e lagomatai ka moua e tautolu ke matutaki a tautolu ke o he puhala a Iehova? (e) Ko e heigoa taha puhala kua logona e tautolu e ‘kupu ki tua ha tautolu’?
9 Ka fifili a tautolu ke o he puhala a Iehova, kua nakai tokanoa a tautolu mai he lagomatai. Ne perofeta e Isaia: “To logona foki he tau teliga ha mutolu e kupu ki tua ha mutolu, ka afe age a mutolu ke he fahi matau po ke afe age a mutolu ke he fahi hema, kua pehe mai, Ko e puhala hanai ke o ai a mutolu.” (Isaia 30:21) Maeke fefe he ‘tau teliga ha tautolu’ ke logona e ‘kupu ki tua ha tautolu’? Nakai fai he vaha nei ne logona teliga e leo po ke moua tino e fekau mai he Atua. Ko e “kupu” kua logona kua hau ki a tautolu oti he puhala taha. Fakamua mo e mua ue atu, kua hau he tau Tohiaga Tapu omoomoi he agaga, ko e Tohi Tapu, ne kua toka ai e tau manatu he Atua mo e fakamauaga he tau fehagai hana mo e tau tagata. Ha kua fakatapakupaku a tautolu he tau aho oti ke he tau manatu mai he tau punaaga ‘ne mafoki kehe mai he moui ha he Atua,’ ma e malolo tino fakaagaga mitaki, kua lata ia tautolu ke totou e Tohi Tapu mo e manamanatu fakahokulo tumau ki ai. To lagomatai he mena nei a tautolu ke kalo kehe mai he “tau mena na kua nakai aoga” mo e ke ‘katoatoa ai e mitaki he taute e tau gahua mitaki oti kana.’ (Gahua 14:14, 15; 2 Timoteo 3:16, 17) To fakamalolo a tautolu, ati hake a tautolu, ti lagomatai a tautolu ‘ke monuina e tau puhala oti ke o ai a tautolu.’ (Iosua 1:7, 8) Ti, kua fakamafana he Kupu a Iehova: “Ko e fanau na e, kia fanogonogo mai ā kia au; ha kua monuina a lautolu kua omaoma ke he haku a tau puhala. Kia fanogonogo mai a mutolu ke he tau mena kua fakaako atu, kia iloilo ai a mutolu, ka e aua neke tiaki e mutolu.”—Tau Fakatai 8:32, 33.
10. Ko e heigoa e puhala ke ua aki kua logona e tautolu e ‘kupu ki tua ha tautolu’?
10 Ko e ‘kupu ki tua ha tautolu’ kua puhala mai foki he “fekafekau fakamoli mo e loto matala,” ne foaki e “tau mena kai ke he tau magaaho.” (Mataio 24:45-47) Ko e taha puhala he foaki e tau mena kai nei kua lolomi ai i loto he tau tohi ne fakave ke he Tohi Tapu, ti he tau tau e kua mole kua mahu e foakiaga he tau mena kai nei. Ma e fakatai, he puhala mai he mekasini Kolo Toko, ko e maamaaga ha tautolu ke he perofetaaga ne kua hakahaka ai. I loto he senolo nei, ne fakamalolo a tautolu ke fakauka ke he gahua fakamatala mo e taute tutaki pete ni e holo ki mua e fekehekeheaki, na kua lagomatai a tautolu ke kalo kehe mai he tau matahele, ti kua fakamafana a tautolu ke fakatupu e tau fua Kerisiano mitaki. Ko e tokiofa ha tautolu haia mogoia he tau mena kai he tau magaaho tonu!
11. Fakamaama e puhala ke tolu aki kua logona e tautolu e ‘kupu ki tua ha tautolu.’
11 Kua foaki foki he fekafekau fakamoli mo e loto matala e tau mena kai he puhala mai he tau feleveiaaga tumau ha tautolu. Kua putoia he tau mena nei e tau feleveiaaga he fakapotopotoaga he matakavi, tau feleveiaaga lagaua he tau ke he tau toloaga takaiaga, mo e tau fonoaga lalahi lagataha. Ko e heigoa he Kerisiano loto fakamoli ka aoga ke he tau feleveiaaga ia? Ko e tau lagomatai aoga a ia ke ati hake aki a tautolu he o he puhala a Iehova. Ha kua tokologa kua fakaaoga lahi e tau magaaho he gahuaaga po ke aoga ne fio mo lautolu ne nakai fakalataha e tua ha lautolu, ko e feoakiaga Kerisiano tumau kua fakahao moui moli. Kua foaki mai he tau feleveiaaga ki a tautolu e magaaho mitaki ke ‘fefakalagalagaaki ai e fakaalofa mo e tau gahua mitaki.’ (Heperu 10:24) Fakaalofa a tautolu ke he tau matakainaga ha tautolu, ti fiafia a tautolu ke feoaki mo lautolu.—Salamo 133:1.
12. Ko e heigoa e fifiliaga he Tau Fakamoli a Iehova, ti fakakite fefe e lautolu he magaaho kua mole e mena ia?
12 Ko e fakamalolo he tau mena kai fakaagaga pihia, teitei ono e miliona he tau tagata he vaha nei kua o he puhala a Iehova, ti totou miliona e falu kua fakaako e Tohi Tapu ke ako e puhala ke taute ai. Kua fakalolelole kia a lautolu ha kua gahoa a lautolu ke he numera ka fakatatai atu ke he tau piliona he puke tagata he lalolagi? Nakai pihia! Ne fifili a lautolu ke fakatumau ke omaoma ke he ‘kupu ki tua ha lautolu,’ he taute fakamoli e finagalo a Iehova. He fakakite he toloaga e fifiliaga nei, he tau Fonoaga he Fahimotu mo e Lalolagi Katoa he “Moui he Puhala he Atua” he 1998/99, ne talia he tau hukui e fakamoliaga he fakakite e tuaga mai he tau loto ha lautolu. He mui mai ko e tau kupu he fakamoliaga ia.
Fakamoliaga
13, 14. Ko e heigoa e onoonoaga moli ke he tuaga he lalolagi kua ha ha he Tau Fakamoli a Iehova?
13 “Ko mautolu, ko e Tau Fakamoli a Iehova ne fakapotopoto ke he Fonoaga he ‘Moui he Puhala he Atua,’ kua talia loto katoa ko e puhala ni he Atua kua mua ue atu he moui. Ka e, mailoga e mautolu na kehe e logonaaga he tokologa he vaha nei. Ne kumikumi he kaufakalatahaaga tagata e loga he tau puhala, tau pulotu, mo e tau manatu fakalotu ke he mena kua fakatu e puhala mitaki ue atu he moui. Ko e onoonoaga fakamoli ke he fakamauaga tuai he tagata mo e tau tuaga he lalolagi he vaha nei kua fakatoka mai e fakamoliaga he talahauaga faka-Atua ne fakamau he Ieremia 10:23: ‘Nakai ha ha he tagata kua fano ke fakatonu e mena ke fano a ia ki ai.’
14 “He tau aho oti kua kitia e tautolu loga atu e fakamoliaga kua fakamau e moli he tau kupu ia. Ma e vala lahi, ko e fakalatahaaga tagata kua tiaki e moui he puhala he Atua. Kua tutuli he tau tagata e mena kua tuga ke hako ki a lautolu ni. Ko e tau fua kua matematekelea lahi—ko e mavehevehe he moui magafaoa, tokaholo e tau fanau nakai fai takitakiaga; ko e velevelekoloa lahi, kua fakahiku ke he nofogati mo e fakaita; ko e holifono mo e favale noa, ti loga lahi e tau tagata lauia noa; ko e feveheveheaki fakamatakau mo e tau felakutaki, tokologa ai e tau tagata ne mamate; holo ki mua e mahani kelea, puke ai he tau gagao pikitia he mahani fakatane mo e fifine. Ko e falu ni anei mai he tau mena vihi loga ne tauhele aki e tutuliaga he fiafia, mafola, mo e haohao mitaki.
15, 16. Hagaao ke he moui he puhala he Atua, ko e heigoa e fifiliaga ne fakakite ke he fakamoliaga?
15 “Ha ko e kitiaaga he tuaga momoko he tagata mo e tata lahi atu ke he ‘tau ke he aho lahi he Atua mana,’ ne higoa ko Amaketo (Fakakiteaga 16:14, 16), kua fifili a tautolu ko e Tau Fakamoli a Iehova:
16 “Fakamua: Kua onoono a tautolu kua nonofo a tautolu ki a Iehova ko e Atua, ne tukulele katoatoa takitokotaha a tautolu ki a ia, ti kua fakatumau e tua nakai maueue ha tautolu he foakiaga a Iehova ke he puhala mai he lukutoto he hana Tama, ko Iesu Keriso. Kua fifili a tautolu ke o he puhala he moui he Atua, fekafekau ko e hana Tau Fakamoli, mo e mumui atu ke he hana pule katoatoa he fakakite he tuaga pule ha Iesu Keriso.
17, 18. Ko e heigoa e tuaga he Tau Fakamoli a Iehova ka matutaki ke fakatumau hagaao ke he tau tutuaga he mahani mo e ke he tau matakainaga Kerisiano?
17 “Ua aki: To fakatumau ni a tautolu ke tapiki mau ke he tau mahani mo e tau tutuaga fakaagaga kua tokoluga atu he Tohi Tapu. Kua fifili a tautolu ke fakamamao mai he o tuga e tau motu ke he puhala goagoa he tau loto ha lautolu. (Efeso 4:17-19) Ko e fifiliaga ha tautolu ke tumau e mea ki mua a Iehova mo e nakai ilaila mai he lalolagi.—Iakopo 1:27.
18 “Tolu aki: To tapiki mau ni a tautolu ke he tuaga faka-Tohiaga Tapu ko e tau matakainaga Kerisiano he lalolagi katoa. To fakatumau ni a tautolu mo tau Kerisiano tuuho ke he tau motu, he nakai fakaata e tautolu a tautolu ke nakai putoia fakamagafaoa, fakamotu, po ke fevihiatiaaki po ke feveheveheaki fakamatakau.
19, 20. (a) Ko e heigoa ka taute he tau matua Kerisiano? (e) To fakatumau fefe e tau Kerisiano moli oti ke fakakite a lautolu ko e tau tutaki a Keriso?
19 “Fa aki: Ko tautolu kua mamatua to feaki ni e tau fanau ha tautolu ke he puhala he Atua. To fakatoka e tautolu e fakafifitakiaga he moui Kerisiano, ne kua putoia ai e totouaga tumau he Tohi Tapu, fakaakoaga he magafaoa, mo e fakalataha loto katoa ke he fakapotopotoaga Kerisiano mo e fekafekauaga he fonua.
20 “Lima aki: To lali oti a tautolu ke feaki e tau fua faka-Atua kua fakatoka mai he Tufuga ha tautolu, mo e to fakamakai ni a tautolu ke muitua ke he hana aga fakaperesona mo e hana tau puhala, tuga ne taute e Iesu. (Efeso 5:1) Kua fifili a tautolu ke fakagahuahua e tau mena oti ha tautolu ke he fakaalofa, ha ko e mena ia kua fakakite a tautolu ko e tau tutaki he Keriso.—Ioane 13:35.
21-23. Ko e heigoa he Tau Fakamoli a Iehova ka fakatumau ke taute, mo e ko e heigoa kua fakaohooho a lautolu?
21 “Ono aki: He nakai fakalolelole to fakatumau ni a tautolu ke fakamatala e tala mitaki he Kautu he Atua, taute tutaki, ti fakaako atu e tautolu ki a lautolu ke he moui he puhala he Atua mo e fakamalolo ki a lautolu ke moua atu e tau fakamahaniaga ke he tau feleveiaaga he fakapotopotoaga.—Mataio 24:14; 28:19, 20; Heperu 10:24, 25.
22 “Fitu aki: Takitokotaha mo e ko e fakatokatokaaga fakalotu, to fakatumau ni a tautolu ke tuku fakamua e finagalo he Atua ke he tau momoui ha tautolu. He fakaaoga hana Kupu, ko e Tohi Tapu, ko e takitakiaga ha tautolu, to nakai mafoki kehe a tautolu ke he fahi matau po ke fahi hema, ka e fakamau ai ke he puhala he Atua kua mua atu e tokoluga ke he tau puhala he lalolagi. Kua fifili a tautolu ke tutuli e moui he puhala he Atua—mauokafua mo e mahani fakamoli, mogonei mo e tukulagi!
23 “Kua taute e tautolu e fakamoliaga nei ha kua mauokafua katoatoa a tautolu ke he maveheaga fakaalofa a Iehova ko ia ka taute e finagalo he Atua to tumau tukulagi. Kua taute e tautolu e fakamoliaga nei ha kua iloa e tautolu ko e momoui ke he tau matapatu fakaakoaga, fakatonuaga, mo e fakamafanaaga faka-Tohiaga Tapu kua eke ai ma e puhala mitaki ue atu he moui he vaha nei mo e kua fakatoka ai e fakaveaga mitaki ma e vaha anoiha, ke maeke ia tautolu ke moua e moui moli. (1 Timoteo 6:19; 2 Timoteo 4:7e, 8) Mua atu ai, kua taute e tautolu e fakamoliaga nei ha kua fakaalofa a tautolu ki a Iehova ko e Atua mo e tau loto, solu, manamanatu, mo e malolo katoa ha tautolu!
24, 25. Ko e heigoa e tali ke he fakamoliaga ne fakatoka, ti ko e heigoa e fifiliaga ha lautolu kua o he puhala a Iehova?
24 “Ko lautolu oti ne fakapotopoto ke he fonoaga nei ne talia ke he manatu he fakamoliaga nei, fakamolemole talahau E!”
25 Totou teau e tau male toloaga mo e tau kavi he lalolagi katoa ne taogo he tali tomumu he tau tagata oti ne fakapotopoto ai “E!” Nakai fakauaua ai to fakatumau ni a lautolu ko e Tau Fakamoli a Iehova ke o he puhala a Iehova. Kua ha ha ia lautolu e falanaki katoatoa ia Iehova mo e tua to fakamoli e ia hana tau maveheaga. Kua fakatumau ni a lautolu ke mahani fakamoli ki a ia, pete ni ka tupu ha mena. Ti kua fifili a lautolu ke taute hana finagalo.
“Kau e Atua mo Tautolu”
26. Ko e heigoa e tuaga fiafia ha lautolu kua o he puhala ha Iehova?
26 Ne manatu he Tau Fakamoli a Iehova e fakamaloloaga he salamo: “Kia talifaki a koe kia Iehova, mo e tumau ke he hana puhala; ti fakamatalahi e ia a koe ke eke māu e motu.” (Salamo 37:34) Kua nakai nimo e lautolu e tau kupu fakamalolo a Paulo: “Kaeke ke kau e Atua mo tautolu, ko hai kia taha ke paleko mai kia tautolu? Ko ia kua nakai toka hana ni a Tama, ka e tuku mai a ia ke hukui aki a tautolu oti kana, ka e nakai kia foaki noa mai e ia kia tautolu e tau mena oti kana fakalataha mo ia?” (Roma 8:31, 32) E, ka fakatumau a tautolu ke o he puhala a Iehova, to “foaki fakalahi mai [e ia] e tau mena oti ke fiafia ai.” (1 Timoteo 6:17) Nakai fai matakavi mitaki foki ke tatai mo e matakavi nei ha tautolu—o he puhala a Iehova, fakalataha mo e tau matakainaga fakahele ha tautolu. He kau a Iehova he fahi ha tautolu, kia fifili a tautolu ke nonofo mau i ai mo e ke fakauka ke hoko ke he fakaotiaga, he mauokafua katoatoa ke he hana ni a magaaho to kitia e tautolu a ia ka fakamoli e tau maveheaga fakahikuhiku hana.—Tito 1:2.
[Matahui Tala]
a Hagaao ke he kupu Heleni nei ne fakaliliu ‘tutu ke koli,’ kua pehe e tagata fakamaama kua hagaao ke he tau koli ne ha ha ai ke he tau galue pouliuli ti lafi atu: “Loga he tau koli nei, na kua talahaua lahi, ne talaga pauaki ke fakaohooho aki e tau manako feuaki vevela.”
Manatu Nakai e Koe?
◻ Ko e heigoa kua lata ma e Kerisiano ke fano he puhala a Iehova?
◻ Ko e lata he ha a tautolu ke falanaki ki a Iehova mo e mahani fakamoli ki a ia?
◻ Ko e heigoa e lagomatai kua moua he o a tautolu he puhala a Iehova?
◻ Talahau falu manatu he fakamoliaga ne moua ke he tau Fonoaga he “Moui he Puhala he Atua.”manako feuaki vevela.”
[Tau Fakatino he lau 16]
Ko e fakamoliaga aoga ne fakatoka he “Fonoaga Fahimotu mo e Lalolagi Katoa he ‘Moui he Puhala he Atua’”