Tau Monuina he Kautu ma Hau Ia
KO E aposetolo Kerisiano ko Paulo ne makaka lahi ke he falu vagahau talahaua he magahala hana. Ne moua e ia e tataiaga ke he fakaakoaga univesiti he vaha nei. Ne olioli e ia e tau tutuaga mo e tau tonu oti ko e tagata Roma. (Gahua 21:37-40; 22:3, 28) Ko e tau mouaaga nei kua maeke ke fakamalolo a ia ke mautu mo e talahaua. Ka e, pehe a ia: “Ko e tau mena oti ne moua e au, kua manatu au nakai aoga e tau mena ia ha ko Keriso . . . kua manatu foki au ko e otaota ia, kia moua e au a Keriso.” (Filipi 3:7, 8) Ko e ha ne talahau pihia a Paulo?
He iloa fakamua ai ko Saulo i Tasesa mo e ko e tagata favale ha lautolu nukua ‘moua he mahani na,’ ne eke a Paulo mo tagata tua he mole kitia e fakakiteaga he liu tu mai mo e lilifu ko Iesu. (Gahua 9:1-19) Ma Paulo, ko e mena nei ne tupu he puhala ki Tamaseko ne fakamoli katoataoa ko Iesu e Mesia ne mavehe, po ko Keriso, ko e pule anoiha he Kautu ne mavehe mai. Kua ta mai foki e hikiaga lahi mahaki ke he puhala moui ha Paulo, he fakakite ai he hana talahauaga malolo na i luga. He falu kupu, ha ko e loto katoatoa mo e fakamoli, ne tokihala a Paulo.—Kalatia 1:13-16.
He Tohi Tapu, ko e vepi “tokihala” ne fa fakaliliu mai he kupu Heleni ne kakano “iloa fakamui,” kua kehe ke he “iloa tuai.” Ti, ko e tokihalaaga kua putoia e hikiaga he manamanatuaga, aga, po ke amaamanaki, ko e tiaki he puhala tuai he taha nukua kelea. (Gahua 3:19; Fakakiteaga 2:5) Ko e mena ne tupu ki a Paulo, ne nakai fakaata e ia e mena fuluola ne tupu he puhala ki Tamaseko ke fakalolelole po ke peehi e iloaaga fakalotu hana. Kia ia ko e matala ke kitia moli ko e puhala fakamua hana he moui, he fakaheu a Keriso, kua teao noa. Ne mailoga foki e ia to maeke ke aoga mai he hana iloilo moua fou hagaao ke he Keriso, kua lata ia ia ke taute taha mena ke fakahako aki hana puhala moui.—Roma 2:4; Efeso 4:24.
Ko e Hikiaga ne Ta Mai e Tau Monuina
Fakamua, ko e iloilo ha Paulo he Atua ne moua lahi mai he vahega fakalotu he tau Farasaio, na ko ia taha he matakau. Ko e tau taofiaga ha lautolu ne putoia lahi ke he pulotu mo e aga fakamotu he tagata. Ha ko e tau onoono hifo fakalotu, ne kitia hehe ai e fakamakutu mo e tau laliaga ha Paulo. Pete ni kua manatu a ia kua fekafekau a ia ke he Atua, ka e hane tau atu ki a ia.—Filipi 3:5, 6.
He mole atu e moua e iloilo tonu hagaao ki a Keriso mo e hana matagahua he finagalo he Atua, kua maeke ia Paulo ke kitia na fehagai a ia mo e fifiliaga: Kua lata kia a ia ke tumau mo Farasaio mo e matutaki ke fiafia e tuaga mo e matalahi, po ke hiki hana puhala moui mo e kamata ke taute e mena kua lata ke moua e taliaaga he Atua? Fiafia ai, ne taute e Paulo e fifiliaga hako, ha kua talahau e ia: “Ha kua nakai ma au ke he tala mitaki; ha ko e mana he Atua ia ke momoui ai a lautolu oti kana kua tua, kua fakamua e tau tagata Iutaia, katoa mo e tau tagata Heleni.” (Roma 1:16) Ne eke a Paulo mo tagata fakamatala fakamakutu he tala mitaki hagaao ki a Keriso mo e Kautu.
Loga e tau he mole, ne tala age a Paulo ke he tau Kerisiano fakahele hana: “Nakai manatu au kua moua tuai e au; ka e taha ni e mena kua eke e au, kua fakanimonimo e au e tau mena kua mole atu, ka e oho atu au ke he tau mena ha i mua. Kua poi mau atu au ke he fakamailoga ke moua ai e palepale ne ui mai ai e Atua mai luga kia au ha ia Keriso Iesu.” (Filipi 3:13, 14) Ne aoga a Paulo mai he tala mitaki ha kua tiaki fakamakai e ia e mena ne fakaohooho kehe mai a ia he Atua mo e ne tutuli loto katoa e ia e tau foliaga ne felauaki mo e finagalo he Atua.
Heigoa Hau ka Taute?
Liga logona fou laia e koe e tala mitaki he Kautu. Futiaki kia e amaamanakiaga he moui tukulagi he parataiso mitaki katoatoa ki a koe? Nukua lata, ha kua ha ha ia tautolu oti e manako pauaki ke moui mo e olioli e moui mafola mo e haohao mitaki. Kua talahau mai he Tohi Tapu kua tuku he Atua e “tukulagi” ke he tau loto ha tautolu. (Fakamatalaaga 3:11) Ti kua pauaki ni ma tautolu ke amaamanaki ma e magaaho ka maeke e tau tagata ke momoui tukulagi ke he mafola mo e fiafia. Ti ko e mena haia kua foaki he tala mitaki he Kautu.
Ke hoko moli e amaamanakiaga ia, kua lata ia koe ke fakaako mo e kumikumi e kakano he tala mitaki. Ne fakamafana mai he aposetolo ko Paulo: “Kia kumikumi e [koe] po ke heigoa e finagalo he Atua, ko e mena mitaki, kia talia foki mo e fiafia, ti kua katoatoa.” (Roma 12:2) Ti, tuga a Paulo, he mole e moua e iloilo mo e maama, kua lata ia koe ke taute fifiliaga.
He taha fahi, liga kua fita he moua e koe tau taofiaga pauaki hagaao ke he vaha hau anoiha. Manatu kua fita a Saulo he ha ha ia ia e tau manatu hagaao ke he finagalo he Atua ato eke a ia mo aposetolo ko Paulo. Ka e he nakai ni amanaki ma e fakakiteaga fakamana mai he Atua, he ha he onoono ke he aoga he manatu? Huhu hifo ki a koe ni: ‘Iloa moli nakai e au e finagalo he Atua hagaao ke he tau tagata mo e lalolagi? Ko e heigoa e fakamoliaga kua maeke ia au ke foaki ke fakamoli aki e tau taofiaga haku? Kua kautu kia e fakamoliaga haku i lalo hifo he kumikumiaga he maama he Kupu he Atua, ko e Tohi Tapu?’ Nakai kaumahala a koe he kumikumi e tau taofiaga fakalotu hau ke he puhala nei. Moli, kua lata a koe ke manako ke taute pihia ha kua fakamafana mai he Tohi Tapu ki a tautolu: “Kia kamatamata e tau mena oti, kia taofi e tau mena mitaki ke mau.” (1 Tesalonia 5:21) Fakahiku ai, nakai kia ko e taliaaga he Atua kua aoga lahi mahaki?—Ioane 17:3; 1 Timoteo 2:3, 4.
Kau kua mavehe mai he tau takitaki lotu e moui tukulagi ki a tautolu. Ka e ato fakave e maveheaga ia ke he tau fakaakoaga he Tohi Tapu, to nakai maeke ke lagomatai a tautolu ke moua e tau monuina he Kautu he Atua. He Lauga talahaua hana he Mouga, ne hataki fakamao a Iesu: “Nakai hohoko ke he kautu he lagi a lautolu oti kua pehe mai kia au, Ko e Iki na e, ko e Iki na e; ka ko ia ni kua eke e finagalo he haku a Matua ha ha he lagi.”—Mataio 7:21.
Mailoga e peehiaga ha Iesu ke eke e finagalo he hana a Matua ma e takitakiaga ke moua aki e tau monuina he Kautu he Atua. He falu kupu, ko e kitiaaga he mahani Atua kua nakai ni talia he Atua. Moli, ne holo atu a Iesu ke talahau: “Tokologa ke pehe mai kia au ke he aho ia, Ko e Iki na e, ko e Iki na e, nakai kia ko e mena perofeta age a mautolu ke he hau a higoa, ko e hau a higoa foki ne vega ai e mautolu ki fafo e tau temoni, ko e hau a higoa foki ne eke ai e mautolu e tau mana loga. Ati tala age ai e au kia lautolu, nakai iloa ni e au a mutolu, kia o kehe a a mutolu ia au, ko mutolu ne eke e tau mahani kelea.” (Mataio 7:22, 23) Maali ai, ko e mena aoga ke iloa moli e tautolu kua maamateka e tautolu e kakano he tala mitaki he Kautu ti fakalagotatai ai ki ai.—Mataio 7:24, 25.
Ataina Mai e Lagomataiaga
He molea e 100 e tau tau, hane fakamatala he Tau Fakamoli a Iehova e tala mitaki he Kautu he Atua. He puhala he tohi mo e he kupu he gutu, hane lagomatai e lautolu e tau tagata he lalolagi katoa ke moua e iloilo moli he Kautu, tau mena ka ta mai he tau monuina, mo e mena kua lata ke taute he taha ke moua e tau monuina ia.
Kua fakamalolo e mautolu a koe ke tali atu e fekau ne fakamatala he Tau Fakamoli a Iehova. He talia mo e fakagahua e tala mitaki, ka moua e koe e tau monuina mua ue atu, nakai ni mogonei ka e pihia foki ke he vaha anoiha ka pule e Kautu he Atua ke he lalolagi katoatoa.—1 Timoteo 4:8.
Gahua mogonei, ma e tau monuina he Kautu he Atua kua tata mai!
[Tau Fakatino he lau 7]
Puhala he tohi mo e he kupu he gutu, hane fakamatala he Tau Fakamoli a Iehova e tala mitaki he Kautu he Atua