Tauteute Katoatoa mo Tau Faiaoga he Kupu Moli
“Ko e Atua . . . kua taute a mautolu kia lata a mautolu ke eke mo tau fekafekau.”—2 KORINITO 3:5, 6.
1, 2. Ko e heigoa e tau laliaga ke he fakamatalaaga ne fa taute, ka ko e ha ne mahani e tau mena ia ke kaumahala?
FEFE la koe kaeke ke foaki ki a koe e gahua ne nakai lata a koe ke taute? Manamanatu la: Kua fofola ki mua hau e tau koloa ne lata ia koe, mo e ha ha ai e tau kanavaakau. Ka e nakai kiki a koe ko e taute fefe e gahua ia. Au atu e kelea, kua manako lahi ma e gahua pauaki nei. Kua amaamanaki e tau tagata ki a koe. Ko e fakahogohogo ha e mena ia!
2 Nakai ko e manamanatuaga noa e matalekua ia. Manamanatu ke he fakafifitakiaga. He falu magaaho, taha mai he tau lotu Kerisitenitome nukua lali ke fakatokatoka mo e taute e fekafekau he taha fale ke he taha fale. Ko e tau laliaga pihia kua mahani ni ke kaumahala, ti oti noa ka mole atu falu fahi tapu po ke tau mahina. Ko e ha? Kua nakai lagomatai e Kerisitenitome e tau tagata hana ke lata ma e gahua. Kua nakai lata foki e tau akoako ma e gahua fakamatala ia, pete kua loga e tau tau ne fakaako ke he tau aoga fakalalolagi mo e tau aoga akoako. Ko e ha kua maeke ia tautolu ke talahau e mena ia?
3. Ia 2 Korinito 3:5, 6, ko e heigoa e talahauaga ne fakaaoga lagatolu, mo e heigoa e kakano?
3 Na talahau he Kupu he Atua e mena kua lata ma e tagata fakamatala moli he tala mitaki faka-Kerisiano. Ne omoi he agaga e aposetolo ko Paulo ke tohia: “Ha ko e mena nakai maeke ia mautolu hoko mautolu ke manamanatu ha mena tuga ne mai ia mautolu, ka ko e Atua kua maeke ai a mautolu; ko ia foki kua taute a mautolu kia lata a mautolu ke eke mo tau fekafekau.” (2 Korinito 3:5, 6) Mailoga e talahauaga ne fakaaoga lagatolu hinei—‘lata ke eke.’ Ko e heigoa e kakano? Ne talahau he Vine’s Expository Dictionary of Biblical Words: “Ka tala ke he tau mena [ko e kupu faka-Heleni fakamua] kua fakakakano ‘kuenaia’ . . . ; ka hagaao ke he tau tagata, kua kakano ‘mitaki,’ ‘aoga.’” Ti ko ia ne ‘lata ke eke’ kua mitaki mo e aoga ke taute e matagahua ne foaki. E, ko e tau fekafekau moli he tala mitaki kua lata ke taute e gahua nei. Kua mitaki, latatonu, po ke aoga a lautolu ke fakamatala.
4. (a) Fakakite fefe he fakafifitakiaga ha Paulo ko e lata mo e fekafekau faka-Kerisiano kua nakai fakakaupa ke he tokogahoa ne fifili? (e) Ko e heigoa e tau puhala tolu ne taute e Iehova a tautolu mo tau fekafekau?
4 Ka e mai i fe, mogoia, e lata ia? Mai he tau taleni fakatagata? Mai he tau pulotu tokoluga? Mai he tau fakaakoaga pauaki he tau aoga mahuiga? Ne moua he aposetolo ko Paulo e tau mena oti nei. (Gahua 22:3; Filipi 3:4, 5) Pete ni ia, ne talahau fakatokolalo e ia ko e lata hana mo fekafekau kua mai, nakai he tau aoga fakaako tokoluga, ka e mai ia Iehova ko e Atua. Kua lata ni kia e lata ia ma e tokogahoa ne fifili? Ne tohia e Paulo ke he fakapotopotoaga Kerisiano hagaao ke he “lata ha mautolu ke eke.” Kua talahau moli he mena ia kua manako a Iehova ke mitaki oti e tau fekafekau tua fakamoli hana, mo e maeke ke taute e gahua ne kotofa e ia ki a lautolu. Taute fefe e Iehova e tau Kerisiano moli he vaha nei ke lata? Kia fakatutala a tautolu ke he tau puhala tolu ne fakaaoga e ia: (1) hana Kupu, (2) hana agaga tapu, mo e (3) hana fakatokatokaaga.
Taute he Kupu a Iehova a Tautolu ke Lata
5, 6. Ko e heigoa e lauiaaga he tau Tohiaga Tapu ke he tau Kerisiano moli?
5 Fakamua, lagomatai fefe he Kupu he Atua a tautolu ke lata mo tau fekafekau? Ne tohia e Paulo: “Ko e tau Tohi Tapu oti kana mai he Agaga he Atua ia, kua aoga ni ke fakaako ai, ke fakatonu ai, ke akonaki ai, ke fakailoilo ai foki ke he tututonu. Kia katoatoa ai e mitaki he tagata he Atua, kia taute ni a ia ke he tau gahua mitaki oti kana.” (2 Timoteo 3:16, 17) Ti kua lagomatai he tau Tohiaga Tapu a tautolu ke “katoatoa ai e mitaki” ke taute e “tau gahua mitaki” he fakaako e tau tagata hagaao ke he Kupu he Atua. Ka e kua, mogoia, e tau tagata he tau lotu ha Kerisitenitome? Kua ha ha ia lautolu e Tohi Tapu. Maeke fefe he tohi tahamaka ke lagomatai falu tagata ke eke mo tau fekafekau mitaki mo e nakai lagomatai falu? Kua moua e tali he aga ha tautolu ke he Tohi Tapu.
6 Momoko ni, he tokologa ne o lotu ka e nakai talia e ogo he Tohi Tapu “ko e kupu [moli] he Atua.” (1 Tesalonia 2:13) Kua ati hake e Kerisitenitome e fakamauaga fakama hagaao ke he mena nei. He mole e tau tau he fakaako he tau aoga fakalotu, kua tauteute kia e tau akoako mo tau faiaoga he Kupu he Atua? Nakai pihia. Ha ko e falu tagata fakaako ne kamata e tau fakaakoaga fakalotu ha lautolu, ko e tau tagata talitonu ke he Tohi Tapu ka kua fakahiku ke eke mo tau tagata fakauaua! Ko e mena ne tupu, he nakai fakamatala e Kupu he Atua—nukua nakai talitonu e tokologa ha lautolu ki ai—ne fuluhi kehe e lautolu e fekafekauaga ha lautolu ke he taha fahi, he putoia ke he tau tutalaaga fakapolitika, fakahakehake e tau mena fakamotu, po ke tuhi ke he tau pulotu he tagata he tau lauga ha lautolu. (2 Timoteo 4:3) Ke he taha fahi, kua muitua e tau Kerisiano moli ke he fakafifitakiaga ha Iesu Keriso.
7, 8. Kehe fefe e aga ha Iesu ke he Kupu he Atua mai he aga he tau takitaki lotu he vaha hana?
7 Ne nakai fakaata e Iesu e tau takitaki lotu he vaha hana ke fakaohooho e manamanatuaga hana. Pete he fakaako e vahega tote, tuga e tau aposetolo hana, po ke moto tagata, ne fakaaoga fakamitaki e Iesu e Tohi Tapu. (Mataio 13:10-17; 15:1-11) Ne tuku kehe he matagahua nei a ia mai he tau takitaki lotu he vaha hana. Ne nakai fakamalolo e lautolu e tau tagata ke fakakia atu ke he tau mena hokulo he Atua. Moli ai, na fa mahani e faiaoga he tau aho ia ke talitonu ko e falu vala he Tohi Tapu kua hokulo lahi, ti kua lata ni ke tutala mo e tagata ne fiafia ki ai—mo e pete he pihia, kua lata ni ke tutala fanafana mo e uufi e tau ulu. Ko e tau takitaki lotu ia kua matakutaku aitu foki hagaao ke he fakatutalaaga he falu a vala he Tohi Tapu ke tuga ne matakutaku aitu a lautolu hagaao ke he fakaleoaga he higoa faka-Atua!
8 Kua nakai pihia a Keriso. Ne talitonu a ia, nakai ni ko e tokogahoa ne fifili ka e tau tagata oti kana nukua lata ke manamanatu ke he “tau kupu oti ne to mai he fofoga he Atua.” Kua nakai manako a Iesu ke tuku age e kei he iloilo ke he vahega fifili pauaki he tau tagata pulotu. Ne tala age a ia ke he tau tutaki hana: “Ko e tau mena kua tala atu e au kia mutolu ke he pouli, kia talahau atu e mutolu ke he maama; ko e mena foki kua logona he tau teliga ha mutolu, kia fakamatala atu e mutolu ki luga he tau fale.” (Mataio 4:4; 10:27) Ne manako lahi a Iesu ke fakamatala e iloilo he Atua ke he tau tagata tokologa ka maeke.
9. Fakaaoga fefe he tau Kerisiano moli e Tohi Tapu?
9 Ko e Kupu he Atua kua lata mo matapatu foliaga he fakaakoaga ha tautolu. Ke fakatai ki ai, he magaaho ka lauga a tautolu he Fale he Kautu he Tau Fakamoli a Iehova, kua nakai kuenaia ni ke totou e tau kupu fifili mai he Tohi Tapu. Kua lata ia tautolu ke fakamaama, fakataitai, mo e fakaaoga e kupu tohi he lauga. Ko e foliaga ha tautolu ke lagaki e ogo he Tohi Tapu mai he tau lau lomi mo e peehi ai ke he tau loto he tau tagata fanogonogo ha tautolu. (Nehemia 8:8, 12) Kua lata foki e Tohi Tapu ke fakaaoga he magaaho kua lata ke fakatonutonu po ke foaki e akonakiaga ke fakahako. Pete he vagahau e Tau Fakamoli a Iehova ke he tau vagahau kehekehe mo e o mai he tau feakiaga kehekehe, nukua fakalilifu oti e lautolu e Tohi he tau tohi—ko e Tohi Tapu.
10. Ko e heigoa e lauiaaga nukua foaki he ogo omoi agaga he Tohi Tapu ki a tautolu?
10 Ka fakaaoga mo e fakalilifu pihia, kua ha ha he ogo he Tohi Tapu e malolo. (Heperu 4:12) Kua omoi ai e tau tagata ke hikihiki e tau momoui ha lautolu, tuga e fuluhi kehe he tau gahua nakai mai he Tohi Tapu ko e faivao, feuaki, tapuaki tupua, konahia, mo e kaiha. Kua lagomatai e tokologa lahi ke aaki e tagata tuai mo e tui e tagata fou. (Efeso 4:20-24) Haia, kaeke fakalilifu ai e tautolu ke mua ke he tau manatu po ke tau mahani fakatagata mo e fakaaoga fakamitaki ai, kua maeke he Tohi Tapu ke lagomatai ke taute a tautolu ke mitaki, mo e tauteute katoatoa mo tau faiaoga he Kupu he Atua.
Taute he Agaga ha Iehova a Tautolu ke Lata
11. Ko e ha kua lata ke hagaao ke he agaga tapu ha Iehova ko e “lagomatai”?
11 Ke uaaki, kia fakatutala a tautolu ke he matagahua he agaga tapu ha Iehova, po ke malolo gahuahua, he tauteute katoatoa a tautolu. Kua nakai lata ke nimo e tautolu ko e agaga ha Iehova ko e malolo mua ue atu a ia. Ne foaki e Iehova e malolo ke he Tama fakahele hana ke fakaaoga e malolo mua ue atu ia ma e tau Kerisiano moli oti kana. Ko e mena ia ne hagaao a Iesu ke he agaga tapu ko e “lagomatai.” (Ioane 16:7) Ne hataki e ia e tau tutaki hana ke ole ki a Iehova ma e agaga ia, he talahau fakamoli ki a lautolu to foaki fakamokoi ai e Iehova.—Luka 11:10-13; Iakopo 1:17.
12, 13. (a) Ko e ha ne aoga ai ke liogi a tautolu ma e agaga tapu ke lagomatai a tautolu he fekafekauaga ha tautolu? (e) Fakakite fefe he tau Farasaio kua nakai gahuahua e agaga tapu ki a lautolu?
12 Kua lata ke liogi tumau a tautolu ma e agaga tapu ke he tau aho oti, mua atu ke lagomatai a tautolu he fekafekauaga ha tautolu. Ko e heigoa e lauiaaga he malolo gahuahua ia ki a tautolu? Kua maeke ke gahuahua ke he tau manamanatuaga mo e tau loto ha tautolu, lagomatai a tautolu ke hiki, ke tupu ki mua, mo e ke hukui e tagata tuai aki e tagata fou. (Kolose 3:9, 10) Kua maeke ke lagomatai a tautolu ke ati hake e tau fua uho tuga ha Keriso. Tokologa ia tautolu kua maeke ke fatiaki noa e Kalatia 5:22, 23. Ne tohi he tau kupu ia e tau fua he agaga he Atua. Fakamua ko e fakaalofa. Ko e fua ia kua aoga lahi ke he fekafekauaga ha tautolu. Ko e ha?
13 Ko e fakaalofa ko e omoomoiaga ne mua a ia. Ko e fakaalofa ki a Iehova mo e katofia nukua omoi e tau Kerisiano moli ke fakamatala e tala mitaki. (Mareko 12:28-31) Ka noa mo e fakaalofa ia, kua nakai maeke a tautolu ke lata mo tau faiaoga he Kupu he Atua. Kikite la e kehekeheaga he vahaloto ha Iesu mo e tau Farasaio. Ne talahau he Mataio 9:36 hagaao ki a Iesu: “Kua fioia e ia e lanu tagata, ati fakaalofa hofihofi ai a ia kia lautolu, ne fakafita a lautolu, mo e tiaki atu ai, tuga e tau mamoe nakai fai leveki a lautolu.” Fefe e logonaaga he tau Farasaio ke he tau tagata noa? Ne talahau e lautolu: “Ka ko e moto tagata na, nakai iloa e fakatufono, kua ulaafia ni a lautolu.” (Ioane 7:49) Kua nakai fakaalofa e tau Farasaio ia ma e tau tagata ka e fakateaga lahi ki ai. Kitia maali ai, kua nakai gahuahua e agaga ha Iehova ia lautolu.
14. Kua lata fefe e fakafifitakiaga ha Iesu ke he fakakiteaga he fakaalofa he fekafekauaga hana, ke omoi a tautolu?
14 Ne fakaalofa a Iesu ma e tau tagata. Ne mataala a ia ke he tau mamahi ha lautolu. Iloa e ia nukua ekefakakelea a lautolu, kua tiaki atu ai, ke tuga e tau mamoe nakai fai leveki. Ne talamai he Ioane 2:25 ki a tautolu “kua fioia e [Iesu] ni e tau mena ha i loto he tau tagata.” Ha ko e Iki Gahua ha Iehova he magahala he tufugatiaaga, kua ha ia Iesu e maama hokulo ke he foliga he tagata. (Tau Fakatai 8:30, 31) Ko e maamaaga ia ne fakahokulo e fakaalofa hana. Kia eke e fakaalofa ia mo malolo omoomoi tumau ke he gahua fakamatala ha tautolu! Kaeke manatu a tautolu to tutupu ki mua fakaagaga a tautolu hagaao ke he mena nei, kia liogi a tautolu ma e agaga tapu ha Iehova mo e gahua mogoia ke fakatatai ke he tau liogi ha tautolu. To tali e Iehova e liogi ha tautolu. To fakafano mai e ia e malolo ne mua nei ke lagomatai a tautolu ke tuga e Keriso, ne mua atu e lata ke fakamatala e tala mitaki.
15. Hagaao fefe e tau kupu ia Isaia 61:1-3 ki a Iesu ka e he magaaho taha ia ne fakatapakupaku e tau tohikupu mo e tau Farasaio?
15 Mai i fe e tau lataaga ha Iesu? “Ha ha i luga ia au e Agaga he Iki,” he talahau e ia. (Luka 4:17-21) E, ne kotofa e Iehova a Iesu he puhala he agaga tapu. Ti kua nakai lata foki a Iesu ke moua taha fakamoliaga. Nukua kotofa nakai he agaga tapu e tau takitaki lotu he vaha hana? Nakai. Ti, nakai taute foki a lautolu ke fakamoli e Isaia 61:1-3, ne totou fakaleo lahi e Iesu mo e fakahagaao ni ki a ia. Fakamolemole totou e tau kupu ia, mo e kitia ni e koe, ko e tau tohikupu mo e tau Farasaio fakatupua kua nakai fakatatai ki ai. Kua nakai fai tala mitaki a lautolu ke fakapuloa ke he tau nonofogati. Mo e maeke fefe a lautolu ke fakamatala e tokanoaaga ke he kau mahala mo e vetevete ai a lautolu ne lili? Ke he kakano fakaagaga, kua lili foki a lautolu ke he tau aga fakamotu ne taute he tagata! Nakai tatai mo e tau tagata ia, kua lata nakai a tautolu ke fakaako e tau tagata?
16. Ko e heigoa e mauokafua ne kua logona he tau tagata ha Iehova he vaha nei ke he lata ha lautolu mo tau fekafekau?
16 Moli, kua nakai fakaako a tautolu he tau aoga fakaako tokoluga ha Kerisitenitome. Kua nakai fai kotofaaga a tautolu ke eke mo tau faiaoga mai he tau aoga fakalotu. Ti, nakai kia ha ha ia tautolu e tau lataaga? Nakai pihia! Ko e kotofaaga ha tautolu ko e Tau Fakamoli hana, kua mai e Iehova. (Isaia 43:10-12) Kaeke liogi a tautolu ma e agaga hana mo e gahua ke fakatatai atu ke he tau liogi ha tautolu, to moua e tautolu e tau lataaga tokoluga atu. Moli, kua nakai mitaki katoatoa a tautolu mo e kaumahala ke he tau fakafifitakiaga ne fakatoka he Faiaoga ne Mua, ko Iesu. Pete ni ia, nakai kia kua loto fakaaue a tautolu he fakaaoga e Iehova e agaga hana ke lata mo e tauteute a tautolu mo tau faiaoga he Kupu hana?
Taute he Fakatokatokaaga ha Iehova a Tautolu ke Lata
17-19. Maeke fefe he tau feleveiaaga faka-fahitapu ne lima ne foaki mai he fakatokatokaaga ha Iehova ke lagomatai ke taute a tautolu ke lata mo tau fekafekau?
17 Mogonei kia tutala a tautolu ke he kakano ke tolu aki ne tauteute e Iehova a tautolu mo tau faiaoga he Kupu hana—ko e fakapotopotoaga, po ke fakatokatokaaga hana he lalolagi, ne fakaako a tautolu ke eke mo tau fekafekau. Fefe? Manamanatu la ke he polokalama he fakaakoaga ne olioli a tautolu ki ai! He taua vaha tapu, kua o atu a tautolu ke he tau feleveiaaga Kerisiano ne lima. (Heperu 10:24, 25) Kua fakapotopoto a tautolu ke he tau matakau ikiiki he Fakaakoaga Tohi he Fakapotopotoaga ke olioli ke he fakaakoaga Tohi Tapu fakahautoka he puhala he tau tohi ne moua he puhala he fakatokatokaaga ha Iehova. He fanogonogo mo e tali, kua ako ai a tautolu mo e fefakamaloloaki. Kua moua foki e tautolu e tau fakaakoaga mo e tau levekiaga fakatagata mai he tau leveki he fakaakoaga tohi. He Feleveiaaga Toloaga Tagata mo e Fakaakoaga he Ko e Kolo Toko, kua moua foki e tautolu e tau mena kai fakaagaga lahi.
18 Ko e Aoga Fekafekau faka-Teokarasi ha tautolu kua talaga ke foaki ki a tautolu e puhala ke fakaako. He tauteute ma e tau lauga he tau tagata fakaako, ne ako e tautolu e puhala ke fakaaoga e Kupu he Atua ke fakaako ke he tau mataulu tala loga. (1 Peteru 3:15) Kua kotofa nakai a koe ke lauga ke he mataulu tala ne fa mahani, ti ako foki e koe taha mena fou hagaao ki ai? Ko e mena fa mahani a ia ke tupu. Nakai fai mena foki nukua fakamatila lahi aki e iloilo ha tautolu ke he mataulu tala, ka e he fakaako ai ke he falu. Pete kua nakai kotofa a tautolu ke taute e fakatataaga, kua maeke agaia ia tautolu ke ako ke eke mo tau faiaoga mitaki lahi. He tau tagata fakaako takitokotaha, kua mailoga e tautolu e tau fua mitaki, mo e maeke a tautolu ke manamanatu ke he puhala ka fifitaki e tautolu e tau fua nei.
19 Ko e Aoga Fekafekau kua talaga foki ke taute a tautolu mo tau faiaoga he Kupu he Atua. He tau fahi tapu loga, kua olioli a tautolu ke he tau lauga, tau fakatutalaaga, mo e tau fakatataaga ne talaga pauaki ma e fekafekauaga ha tautolu. Ko e heigoa e feleveiaaga ka fakaaoga e tautolu? Maeke fefe a tautolu ke fehagai mo e tau paleko kehekehe he fekafekauaga ha tautolu he fonua? Ko e heigoa e tau puhala he fakamatalaaga kua hafagi ki a tautolu ne kua lata ke kumi fakalahi atu ki ai? Ko e heigoa ka lagomatai a tautolu ke eke mo tau faiaoga lauia mitaki lahi he magaaho ka taute e tau aahi atu mo e takitaki e tau fakaakoaga Tohi Tapu? (1 Korinito 9:19-22) Ko e tau huhu ia kua tali mo e fakatutala fakamatafeiga ki ai he Feleveiaaga Fekafekau. Loga e tau vala he tau feleveiaaga kua fakave ke he tau vala tala he Ha Tautolu a Fekafekau he Kautu, ko e taha kanavaakau ne foaki ke taute a tautolu ma e gahua aoga lahi ha tautolu.
20. Aoga katoa fefe a tautolu mai he tau feleveiaaga mo e tau toloaga?
20 He tauteute ma e, mo e o atu ke he tau feleveiaaga ha tautolu mo e fakagahuahua e mena ne ako e tautolu ke he gahua ha tautolu ko e tau faiaoga, kua moua e tautolu e fakaakoaga hololoa. Ka kua lahi atu foki. Kua ha i ai foki ia tautolu e tau feleveiaaga lalahi—tau toloaga mo e tau fonoaga—nukua talaga ke taute a tautolu mo tau faiaoga he Kupu he Atua. Mo e amaamanaki ha ia ha tautolu ke fanogonogo fakamitaki mo e fakagahuahua e tau fakatonuaga pihia!—Luka 8:18.
21. Ko e heigoa e tau fakamoliaga ne fakakite kua lauia mitaki e fakaakoaga ha tautolu, mo e tuku age e lilifu ki a hai?
21 Kua lauia mitaki kia e fakaakoaga ne foaki e Iehova? Kia kumi atu a tautolu ke he tau fakamoliaga. He tau tau takitaha, kua totou teau mo e afe e tau tagata nukua lagomatai ke ako e tau matapatu taofiaga he Tohi Tapu mo e ke moui fakatautau atu ke he mena ne manako e Atua ma lautolu. Kua tupu ki mua e numera ha tautolu, ka e nakai fai ia tautolu ka uta e lilifu ma e gahua ia. Kua lata ia tautolu ke maama moli e tau mena ia, tuga ne maama e Iesu. Ne talahau e ia: “Nakai maeke ia taha ke hau kia au, ka nakai futia mai he Matua ne fakafano mai au.” Ke tuga e tau aposetolo i tuai tigahau, ko tautolu ko e tau tagata nakai ako mo e goagoa. (Ioane 6:44; Gahua 4:13) Ko e kautu ha tautolu kua falanaki ni ki a Iehova, ko ia ne futia mai e tau tagata loto fakamoli ke he kupu moli. Ne talahau mitaki e Paulo: “Ne to e au, ne fakamalū e Apolo, ka ko e Atua ni kua fakatutupu ai.”—1 Korinito 3:6.
22. Ko e ha kua nakai lata a tautolu ke fakalolelole lahi hagaao ke he fakalataha katoatoa atu ke he fekafekauaga faka-Kerisiano?
22 E, ko Iehova ko e Atua kua putoia lahi mai ke he gahua ha tautolu ko e tau faiaoga he Kupu hana. Liga nakai tumau a tautolu ke logona hifo kua lata a tautolu mo tau faiaoga. Ka e manatu, ko Iehova ne futia e tau tagata ki a ia mo ke he Tama hana. Ko Iehova ne taute a tautolu ke lata ke fekafekau ke he tau tagata fou he puhala he Kupu hana, hana agaga tapu, mo e fakatokatokaaga hana he lalolagi. Kia tali atu a tautolu ke he fakaakoaga ha Iehova he fakagahuahua e tau mena mitaki ha ne foaki mai he mogonei ke lagomatai a tautolu ke tauteute katoatoa mo tau faiaoga he Kupu he Atua!
To Tali Fefe e Koe?
• Taute fefe he Tohi Tapu a tautolu ma e gahua fakamatala?
• Ko e heigoa e matagahua ne taute he agaga tapu ke lata a tautolu mo tau fekafekau?
• Ko e tau puhala fe kua lagomatai he fakatokatokaaga ha Iehova he lalolagi a koe ke lata mo tagata fakamatala he tala mitaki?
• Ko e ha kua lata ia tautolu ke mauokafua ka gahua he fekafekauaga?
[Fakatino he lau 17]
Ko e faiaoga he Kupu he Atua, ne fakatata e Iesu e fakaalofa ma e tau tagata