Kua Maeke Nakai Au ke Fakamatala?
1. Ko e ha kua nakai lata ia tautolu ke logona hifo kua temotemoai e iloilo ha tautolu ke fakamatala?
1 Ka hūhū hifo pihia a koe, ua tupetupe! Nakai ko e fakaakoaga tokoluga po ke lotomatala pauaki ka maeke a tautolu ke eke mo tau fekafekau. Falu he tau tutaki fakamua atu ne ‘nakai ako mo e goagoa.’ Pete ia, ko e tau tagata fakamatala lauia mitaki a lautolu he tala mitaki ha kua eketaha a lautolu ke mumui ke he fifitakiaga ne fakatoka e Iesu.—Gahua 4:13; 1 Pete. 2:21.
2. Ko e heigoa falu aga fakaako a Iesu?
2 Puhala Fakaako a Iesu: Kua mukamuka, aoga, mo e nakai uka ke maama e tau fakaakoaga haana. Kua maama he tau tagata fanogonogo haana e tau hūhū, tau fakatai mo e tau fakafeleveia mukamuka haana. (Mata. 6:26) Ne fakakite e ia e fiafia mooli ke he tau tagata. (Mata. 14:14) Lafi ki ai, ne tutala a Iesu mo e mauokafua mo e pule, he iloa na poaki e Iehova ki a ia mo e fakamalolō ki a ia ke taute e kotofaaga haana.—Luka 4:18.
3. Lagomatai fēfē e Iehova a tautolu ke taute e gahua he fonua ha tautolu?
3 Lagomatai e Iehova a Tautolu: Puhala he haana Kupu mo e fakatokatokaaga, kua foaki he Faiaoga Homo Ue Atu ha tautolu e fakamahani kua lata mo tautolu ke kautū he fakamatala e tala mitaki. (Isaia 54:13) Ha kua fakamau hifo e Iehova e puhala fakaako a Iesu, kua maeke ia tautolu ke fokifoki mo e fifitaki e tau puhala haana. Kua foaki mai e Iehova ki a tautolu haana a agaaga tapu mo e fakamahani a tautolu puhala he tau feleveiaaga he fakapotopotoaga. (Ioane 14:26) Lafi ki ai, kua foaki e ia e tau tagata fakailoa lotomatala ka lagomatai a tautolu ke lauia mitaki lahi.
4. Ko e ha ne ha ha ia tautolu e manatu kua maeke ke talahau e tala mitaki ke he falu?
4 Ha ha ia tautolu e tau kakano oti ke logona hifo kua maeke ia tautolu ke fakamatala, ha ko e ‘Atua kua maeke ai e tautolu.’ (2 Kori. 3:5) He falanaki a tautolu ki a Iehova mo e fakamooli he fakaaoga fakamitaki e tau foakiaga fakaalofa haana, to ‘katoatoa ai e mitaki, kia taute ni ke he tau gahua mitaki oti kana.’—2 Timo. 3:17.