Ko e Heigoa e Kautu he Atua?

KO E heigoa e matakupu he fakamatala ha Iesu? Ne talahau ni e Iesu, ko e Kautu he Atua. (Luka 4:43) He fanogonogo e tau tagata ki a ia he vagahau, ne logona mooli e lautolu e tau fakamauaga loga ke he Kautu ia. Ne fakagogoa kia a lautolu? Hūhū nakai a lautolu ki a ia ko e heigoa e Kautu nei? Nakai. Ne nakai fakamau he tau Evagelia e ha hūhū pihia. Ti ko e matakupu talahaua kia e Kautu he Atua ke he tau tagata ia?

Ko e mena ne tupu, ko e tau Tohiaga Tapu i tuai ne fakalilifu lahi he tau Iutaia ko e mena tapu ne fakamaama e Kautu, ti kua fakakite he tau kupu maaliali mo e mauokafua hagaao ki ai mo e ko e heigoa ka taute. He vahā nei, kua maeke ia tautolu ke lahi atu e mena ka ako ke he Kautu ke he puhala taha ia ni—he fakaaoga e Tohi Tapu. Kia fakatutala ke he fitu e tala mooli ne fakaako he Tohi Tapu ki a tautolu hagaao ke he Kautu. Ko e tolu fakamua kua mukamuka ke moua he tau Iutaia he magahala ha Iesu mo e fakamua atu. He tolu ne toe, ne fakakite he Keriso po ke tau aposetolo haana he magahala he senetenari fakamua. Ke fakahiku aki, kua kitia he vahā nei ha tautolu.

1. Ko e Kautu he Atua ko e fakatufono mooli, to tumau tukulagi ni. Kua fakakite he perofetaaga fakamua he Tohi Tapu to fakafano mai he Atua a ia ka fakahao e tau tagata tua fakamooli. Ne fakahigoa ko e “tega,” ko Ia ka utakehe e tau matematekelea ne kamata he totoko a Atamu, Eva, mo Satani. (Kenese 3:15, NW) Fakamui, ne tala age ai ke he patuiki tua fakamooli ko Tavita e taha mena ofoofogia hagaao ke he “tega,” po ke Mesia. To eke a ia mo patuiki he Kautu. To kehe e fakatufono nei mai he tau fakatufono oti ne toe. To tumau tukulagi ni.—2 Samuela 7:12-14.

2. Ko e Kautu he Atua ka fakaotioti e tau fakatufono oti kana he tagata. Ne age ke he perofeta ko Tanielu e fakakiteaga ne kitia e ia e tau hukui he tau pule malolō he lalolagi, ne mai he fakamauaga tuai ti hoko ke he vahā nei ha tautolu. Mailoga e tapunu ofoofogia he fakakiteaga ia: “Ko e vaha he tau patuiki [fakahiku he tagata] ia to fakatu ai he Atua he lagi e kautu nakai fakaoti tukulagi; ko e kautu foki ia nakai tuku atu ai ke he taha motu, to tuki malipilipi mo e fakaotioti e tau kautu oti ia, ka ko ia to tumau tukulagi a ia.” Ti ko e tau kautu oti, po ke tau fakatufono, he lalolagi nei—mo e tau felakutaki, favale, mo e matahavala ha lautolu—to moumou tukulagi. Ne fakakite he perofetaaga ha Tanielu, ko e Kautu he Atua to nakai leva ti pule ke he lalolagi katoa. (Tanielu 2:44, 45) Kua mooli katoatoa, ko e fakatufono ia ni ka tumau tukulagi ai.a

3. Ko e Kautu he Atua ka fakaoti e tau felakutaki, gagao, hoge, pihia mo e mate. Kua fakakite he tau perofetaaga ofoofogia he Tohi Tapu e mena ka taute he Kautu he Atua ke he lalolagi nei. To taute he fakatufono ia e tau mena kua nakaila po ke nakai maeke he tau fakatufono he tagata ke taute. Manamanatu la—to moumou tukulagi e tau kanavaakau oti kana he felakutaki! “Kua fakahiku e ia e tau ato hoko ke he fakatulakiaga he lalolagi.” (Salamo 46:9) To nakai fai ekekafo, fale gagao, po ke tau gagao kehekehe. “To nakai pehe mai foki taha kua nofo ai, Kua gagao au.” (Isaia 33:24) To nakai to e hoge, temotemoai e tau mena kai, mate hoge. “To ha i ai e puke aloalolima he tau saito ke he motu.” (Salamo 72:16) To nakai fai mauku, alaala, tau tanuaga tagata, tau fale mamate, po ke matematekelea ne fakalataha mo e tau mena ia. Ko e mate, ko e fī tumau ha tautolu, to fakahiku ke utakehe ai. Ko e Atua “to fakaoti tukulagi e ia e mate; to holoholo kehe foki he Iki ko Iehova e tau hihina mata mai he tau mata oti.”—Isaia 25:8.

4. Kua fifili he Atua e Pule he Kautu he Atua. Ne nakai fifili he Mesia a ia, po ke fifili he tau tagata nakai mitaki katoatoa. Ko Iehova ko e Atua ne fifili a ia. Kua fakakite mai ni he tau matahigoa ko e Mesia mo e Keriso. Kua kakano e tau kupu ua nei “Ko Ia ne Fakauku.” Ti ko e Patuiki nei ne fakauku, po ke kotofa ni e Iehova ma e matagahua pauaki haana. Ne pehē e Atua hagaao ki a ia: “Kitiala, haku a fekafekau to taofi e au a ia; ko ia ne fifili e au kua fiafia ai haku loto; kua tuku atu e au haku [a]gaga ki luga hana; to ta atu ai e ia e fakafiliaga ma e tau motu kehe.” (Isaia 42:1; Mataio 12:17, 18) Ko hai foki ka ko e Tufuga ni ha tautolu ne iloa mitaki e Pule kua lata mo tautolu?

5. Kua fakakite he Pule he Kautu he Atua e latatonu haana ki mua he tau tagata oti. Ne fakamooli e Iesu ha Nasareta e Mesia ne talahau tuai. Ne fanau mai a ia he laini he magafaoa ne fifili pauaki he Atua. (Kenese 22:18; 1 Nofoaga he Tau Patuiki 17:11; Mataio 1:1) He nofo he lalolagi, ne loga e perofetaaga ne fakamooli e ia hagaao ke he Mesia ne fakamau tuai he tau senetenari fakamua atu. Ne fakakite mai foki he lagi ko ia e Mesia. Puhala fe? Ne vagahau e Atua mai he lagi, he fakakite ko ia ko e Tama ni Haana; ne fakakite he tau agelu ko Iesu e Mesia ne talahau tuai; ti taute tumau e Iesu e tau mana—ki mua he totou teau po ke totou afe e tau tagata kitekite—ne fakakite fakamaaliali mai e malolō he Atua.b Ne fakakite lagaloga e Iesu ko e Pule fēfē a ia. Ne nakai ni ha ha ia ia e malolō ke lagomatai e tau tagata ka e manako pihia foki. (Mataio 8:1-3) Ne fakamokoi, fakaalofa hofihofi noa, malolō, mo e fakatokolalo a ia. Ko e fakamauaga he moui haana he nofo he lalolagi kua haia i loto he Tohi Tapu ma e tau tagata oti ke totou.

6. He Kautu he Atua, toko 144,000 ka pule fakalataha mo Keriso. Ne pehē a Iesu to fai foki, putoia e tau aposetolo haana, ka pule he lagi mo ia. Ne fakahigoa e ia e matakau nei ko e “fuifui mamoe gahoa.” (Luka 12:32) Fakamui, ne tala age ke he aposetolo ko Ioane ko e 144,000 e numera katoa he fuifui mamoe gahoa nei. To moua e lautolu e matagahua ofoofogia he lagi, ke pule ko e tau patuiki mo e fekafekau ko e tau ekepoa fakalataha mo Keriso.—Fakakiteaga 5:9, 10; 14:1, 3.

7. Ko e Kautu he Atua, kua pule mogonei i luga he lagi, hane tauteute ke kamata pule ke he lalolagi katoa. Ko e kupu mooli fakahiku nei ko e taha he tau mena kua mua e ofoofogia ka ako a tautolu ki ai. Kua loga e fakamooliaga ne fakakite he Tohi Tapu kua fitā e age e pule ki a ia ko e Patuiki he lagi. Kua patuiki a ia he lagi mogonei, he vahā nei ha tautolu, mo e nakai leva to fakalahi atu e pule haana ke he lalolagi katoa mo e fakamooli e tau perofetaaga homo ue atu ne fitā he talahau. Ka e iloa moolioli fēfē e tautolu kua pule e Kautu he Atua mogonei? Mo e to kamata a fe ke pule ke he lalolagi?

[Tau Matahui Tala]