Fakatata ke he Atua
Ko e Matua Nakai Fai Fakatataiaga
“MATUA.” Ko e tau kupu gahoa ne fakalagā e tau logonaaga hokulo he tau tagata. Ko e matua taane ne ofania mooli e fanau haana kua lagomatai a lautolu ke tupu olaola. Mo e kakano mitaki, kua hagaao e Tohi Tapu ki a Iehova ko e Atua, ko e “Matua” a Ia. (Mataio 6:9) Ko e vahega Matua fēfē a Iehova? Ke tali e mena ia, omai la tautolu ke kumikumi e tau kupu ne vagahau e Iehova ki a Iesu he magaaho ne papatiso a Iesu. Ti ko e puhala ne vagahau e matua taane ke he fanau haana kua fakakite fakalahi ko e vahega matua fēfē a ia.
Kavi ke he Oketopa 29 V.N., ne fano a Iesu ke he Vailele ko Ioritana ke papatiso. Ne talahau he Tohi Tapu e mena ne tupu: “Kua papatiso a Iesu, ti hake mai agataha a ia he vai, kitiala, kua maihiua tuai e lagi kia ia, kua kitia foki e ia e [a]gaga he Atua kua hifo mai tuga ne lupe, kua hoko ki luga ia ia. Kitiala, ko e leo mai he lagi, kua pehe mai, Ko e haku a tama fakahele hanā, kua fiafia na au kia ia.”a (Mataio 3:16, 17) He vagahau ni e Iehova, ko e tau kupu fakahele nā ne talahau fakalahi ko e vahega Matua fēfē a ia. Mailoga ko e tolu e talahauaga ha Iehova ke he Tama haana.
Fakamua, ke he tau kupu ‘ko e haku a Tama hanā,’ ne tuga e pehē a Iehova, ‘Kua matalahi au ke eke mo Matua haau.’ Ko e matua taane manamanatu ne fakamakona e manako he fanau haana ke moua e mailogaaga mo e levekiaga. Kua lata e tau tama ke fakamafana kua uho a lautolu ko e tau tagata takitaha he magafaoa. Manamanatu la ke he logonaaga ha Iesu—ko e tagata lahi foki—ke moua e mailogaaga pihia mai he haana Matua!
Uaaki, he hagaao ke he Tama haana ko e “fakahele,” ne talahau fakalapalapa e Iehova e fakaalofa haana ma Iesu. Ko e taha kakano, kua pehē e Matua, ‘Kua ofania e au a koe.’ Kua tala age he matua taane mitaki ke he tau tama haana kua ofania lahi e ia a lautolu. Ko e tau kupu pihia—fakalataha mo e fakaalofa hokulo ne atihake—kua lagomatai e tau tama ke tutupu olaola. Kua aamotia mooli e loto a Iesu ke logona e leo he haana Matua he talahau e fakaalofa ki a ia!
Toluaki, ke he tau kupu “kua fiafia ni au,” ne fakakite e Iehova e fiafia haana ke he Tama. Kua tuga ke pehē a Iehova, ‘Mea, kua fiafia au ke he mena ne taute e koe.’ Kua kumi magaaho e matua fakahele ke tala age ke he tau tama haana kua fiafia a ia ke he tau mena mitaki ne talahau po ke taute e lautolu. Kua moua mai he fanau e malolō mo e loto toa mai he fiafia fakamatua. Mooli kua liga fakamalolō ki a Iesu ke logona kua fiafia e Matua ke he mena ne taute e ia!
Mooli, kua nakai fai fakatataiaga a Iehova ko e Matua. Kua manako lahi nakai e loto haau ma e matua taane pihia? Ka manako, ti mafanatia a koe ke iloa kua maeke ke moua e fakafetuiaga mo Iehova. He tua kua ako e koe hagaao ki a Ia mo e lali fakamooli ke taute e finagalo haana, to tali mai a ia. Kua talahau he Tohi Tapu: “Kia fakatata atu a mutolu ke he Atua, ti fakatata mai ai a ia kia mutolu.” (Iakopo 4:8) Ko e heigoa ka taute a koe ke logona hifo e haohao mitaki lahi he moua e pipiaga tata mo Iehova ko e Atua, ko e Matua mitaki lahi mahaki ne mua ue atu?
[Matahui Tala]
a Hagaao ke he tala taha ia he Evagelia a Luka, ne fakaaoga e Iehova e kupu fakahigoa “koe,” he talahau: “Ko e haku a Tama fakahele a koe, kua fiafia ni au kia koe.”—Luka 3:22.